سەرەکی » وتار » ڕه‌سوڵ بۆسكێنی » دیاردە نەرێنییەکان و گۆشکردنی…

دیاردە نەرێنییەکان و گۆشکردنی…

دیاردە نەرێنییەکان و گۆشکردنی کۆمەڵگە بە بێهیوایی

له‌ناو هه‌ر گروپ و كۆمه‌ڵگەیه‌كدا په‌روه‌رده‌و فێركردنی دروست كه‌سی هوشیارو پته‌و و بیروباوه‌ڕ به‌خۆبوون دێنێته‌ به‌رهه‌م، له‌م روانگه‌یه‌وه‌ ده‌بێ هه‌میشه‌ فێرخواز به‌گه‌شبینی و نموونه‌ی سه‌ركه‌وتن گۆش بكرێت، ئه‌و باوه‌ڕه‌ له‌هه‌ستیدا بچه‌سپێنرێت کە هه‌میشه‌ به‌ره‌و سه‌ركه‌وتن هه‌نگاو بنێت، ئه‌گه‌ر شكستیشی خوارد، پاساو بۆ شكسته‌كه‌ی نه‌هێنێته‌وه‌و به‌ باوه‌ڕه‌وه‌ هه‌وڵی هه‌ستانه‌وه‌و به‌رده‌وامی به‌ره‌و سه‌ركه‌وتن بدات.
به‌پێی راو سه‌رنجی پسپۆڕانی بواری دەروونزانی و پەروەردەیی، لێكدانه‌وه‌ی دروست ئه‌وه‌یه‌ لایه‌نی باش‌و ئه‌رێنی له‌به‌رچاو بگیرێت، نابێت به‌هیچ شێوه‌یه‌ك لە پرۆسەی په‌روه‌رده‌كردندا په‌نا ببرێته‌ به‌ر نموونەکانی شکست و سه‌رنجی فێرخواز به‌ نموونه‌ی خیانه‌ت و شكست و دۆڕان گۆش بكرێت، چونکە لە داهاتوودا کەسی فێرکراو بە تێوری شکست، به‌ خۆدۆزینەوە له‌ سەرکەوتن و ره‌واییدان به‌ شکست بەرجەستە دەکات.
لەکاتێکدا كاری دروست بۆ پێگه‌یاندن‌و په‌روه‌رده‌ی كۆمه‌ڵگەیه‌كی پێشكه‌وتوو ده‌بێ به‌گیانی باوەڕبوون بە سەرکەوتن بنیات بنرێت، بۆئه‌وه‌ی به‌گه‌شبینیه‌وه‌ له‌ داهاتوو بڕوانێ و ئه‌گه‌ر تووشی شكست هات، هه‌وڵبدات سوود له ‌شكسته‌كه‌ی وه‌ربگرێت و دووباره‌ به‌گیانی باوه‌ڕ به‌خۆبوونەوە هه‌ستێته‌وه‌، نه‌ك له‌ شكستدا نائومێدو له‌خیانه‌تیشدا پاساو بۆ خیانه‌ته‌كه‌ی بهێنێته‌وه‌، بێگومان له‌کۆمەڵگە پێشکەوتووەكاندا بە تایبەتی ئەوانەی بنیاتنه‌ری مێژووی دروستی مرۆڤایه‌تین، به‌م شێوه‌‌ مامه‌ڵه‌و په‌روه‌ده‌یە كۆمه‌ڵگەیه‌كی ته‌ندروست راده‌هێنن و کار بەو تێورانە دەکەن.
له‌ زۆربەی کۆمەڵگەکانی جیهان و ته‌نانه‌ت له‌ كۆمه‌ڵگە تازه‌ گه‌شەكردووه‌كانیشدا، چه‌ندین نموونه‌ی خیانه‌ت و شكست هه‌یه‌، به‌ڵام خائینه‌كان سزا ده‌درێن و شكسته‌كانیش به ‌ئومێده‌وه‌ هه‌وڵی چاره‌سه‌ریان ده‌درێت، بۆئه‌وه‌ی كۆمه‌ڵگەیه‌كی دروست بنیات بنرێت.
به‌داخه‌وه‌‌ کومەڵگەی کوردی پڕیەتی لە نموونەی خیانەت و راده‌ست بوون و شكست، به‌ڵام به ‌پێچه‌وانه‌ی هه‌موو كۆمه‌ڵگەیه‌ك تاکی کۆمەڵگەی كوردی بۆ خۆدزینه‌وه‌ له‌ شكست و دانپێدانه‌نانی دۆڕان، زۆرجار پاساوی ئه‌و شكسته‌ به ‌خیانه‌ت و ته‌سلیم بوون وه‌ڵام ده‌داته‌وه‌ و خۆی له ‌به‌رپرسیارێتی ده‌رباز ده‌كات. زۆرجار ئه‌وه‌نده‌ی له‌لایه‌ن ده‌وروبه‌ره‌وه‌ به‌رگریی له‌ خیانه‌تكار ده‌كرێت، ئه‌وه‌نده‌ له‌لایه‌ن خۆیه‌وه‌ به‌رگریی له‌ خۆی ناكرێت، ئه‌م دیارده‌ نه‌خوازراو و پیس و قێزه‌ونه‌ لەناو خێزان، له‌كارو فه‌رمان، له‌ خه‌بات و تێكۆشان، له‌ كایه‌ی ئابووریی و سیاسی و له‌هه‌موو كایه‌كانی ژیانی کۆمەڵایەتیدا ئاماده‌یی هه‌یه‌، ئه‌مه‌ش وایكردووه‌ به‌رده‌وام گوێبیستی وشه‌ی خیانه‌ت ده‌‌بینه‌وه‌، له‌جیاتی سزاو پێداچوونه‌وه‌ی ئه‌م كاره‌، خێرا پاساوی خیانه‌تی خیانه‌تكاران ده‌درێته‌وه‌و زۆرجار له‌ بێهیواییدا گوێبیستی ده‌سته‌واژه‌ی (پاره‌و كوردو خیانه‌ت) ده‌بین، وه‌ك ئه‌وه‌ی خیانه‌ت‌ به ‌به‌ژنی كورددا بڕابێت، بۆیە تێوری خیانەت بە شێوەیەک کاریگەریی لەسەر کۆمەڵگای كوردی و بەتایبەت نووخبەی سیاسیی کوردی داناوه‌ زۆر جار بە ئه‌نجامدانی خیانەت شكستی گه‌وره‌ ده‌خوڵقێنێ و پاساویشی ئه‌وه‌یه‌ خیانه‌تی لێكراوه‌.
ئه‌مه‌ بابه‌تێكی گرنگ و وردكارییه‌ و پێویسته‌ سه‌دان توێژینه‌وه‌ و لێكۆڵینه‌وه‌ی وردی له‌سه‌ر ‌بكرێت، نه‌ته‌وه‌ی كورد نه‌ته‌وه‌یه‌كی جیاواز نیه‌، به‌ڵام له‌ زۆربه‌ی كۆمه‌ڵگەو نه‌ته‌وه‌كانی تردا له‌كاتی نموونه‌كانی خیانه‌ت و شكسدا ئه‌و نه‌ته‌وه‌یه‌ دۆست و خه‌مخۆری هه‌یه‌ به‌ته‌نگیه‌وه‌ بێت و به‌دواداچوونی خیانه‌ت و خراپه‌كارییه‌كانی بكات و باری لاری راست بكاته‌وه‌، هه‌ندێك جار ده‌گاته‌ ئاستی زۆره‌ملێ و هه‌ڕه‌شه‌ لێكردن بۆ وازهێنان له‌ هه‌ڵه‌كانی.به‌پێچه‌وانه‌وه‌ له‌كاتی تووشبوونی كورد به‌م نه‌ریته‌ خراپ و قێزه‌ونه‌، هه‌موو دۆست و نزیكانی پشتی تێده‌كه‌ن و دوژمنه‌كانیشی وه‌ك هێلانه‌ زه‌رده‌واڵه‌ بۆ گیانی ئاڵۆز ده‌بن. ئه‌م كاره‌ زۆر خراپ به‌سه‌ریدا شكاوه‌ته‌وه‌، له‌و باره‌یه‌وه‌ كورد خۆی به‌بێ دۆست‌و بێكه‌س ده‌زانێت، هه‌ربۆیه‌ كورد پێی وایه‌ هه‌ره‌ دۆستی نزیك چیاكانی نیشتمانه‌كه‌یه‌تی.
به‌م پێودانگه‌ كاری حزبایەتی و بەشداریی لە سیاسەت له‌ كۆمه‌ڵگەی كوردی لە مێژووی رابردوودا، پڕیەتی لە باس و نموونەکانی خیانەت و ته‌سلیم بوون به ‌دوژمن، په‌روه‌رده‌كردنی ئه‌ندام و پێگەیاندنی کادری حزب له‌ناو ده‌ریای ئه‌م جۆره‌ نموونانه‌دا تاساو و سه‌رسوڕماوه‌، له‌ئه‌نجامدا ئه‌گه‌ر خیانەت شكستی به‌شێكی نه‌ته‌وه‌ بێت، ئه‌وا بۆتە سەرکەوتنی به‌شێكی تری‌ نه‌ته‌وه‌ی كورد. هه‌ڵبه‌ت سه‌ركه‌وتن له‌ روانگه‌ی به‌رژه‌وه‌ندیخوازیی ته‌سكی حزبی و تایبه‌تی، له ‌دواجاردا ماڵوێرانی و كه‌وتن و شكستی نه‌ته‌وه‌یی لێكه‌وتۆته‌وه‌.
ئه‌م تێۆری خیانه‌ته‌ به‌شێوه‌یه‌ك چووته‌ ناخی كۆمه‌ڵگەوه‌ له‌جیاتی ڕووه‌ گه‌ش و پڕشنگداره‌كه‌ی خه‌بات و تێكۆشان بۆ پاساوی ئه‌و خیانه‌ته‌، هه‌میشه‌ ڕووه‌ مه‌رگه‌سات و شكسته‌كه‌ی زه‌ق بكرێته‌وه‌.
ئه‌وه‌نده‌ی ماوه‌ی كه‌می فه‌رمانڕه‌وایی پڕشانازی كۆماری كوردستان له‌ مه‌هابادو هه‌ڵوێسته‌ جوان و مه‌ردانه‌ و پڕ سه‌روه‌رییه‌كانی قازی محه‌مه‌د سه‌ركۆماری كوردستان باس كراون، زۆر له‌وه‌ زیاتر تێکشكانه‌كان زه‌ق ده‌كرێنه‌وه‌، له‌جیاتی وێنه‌ی رۆژانی حوكمڕانی و داكۆكی له‌ كۆمار له‌گه‌ڵ سۆڤێتییه‌كان و دانوستانی له‌گه‌ڵ لایه‌ناكانی ترو چه‌ندان كاری پڕ سه‌روه‌ری تر، هه‌میشه‌ وێنه‌ی ملی لار بۆوه‌ی به‌په‌تدا كراوی قازی و نائومێد بوون به‌رچاوی نه‌وه‌ی نوێ ده‌خرێته‌وه‌.
یاخود رۆژانی پڕ شانازی شێخ سه‌عیدی پیران زیاتر وێنه‌ی له‌ سێداره‌دان و گه‌مارۆدراو به ‌سه‌ربازانی ره‌گه‌زپه‌رستی تورکیا پێشچاو ده‌خرێت، قاره‌مانێتی و سه‌روه‌رییه‌كانی شێخ مه‌حمودی نه‌مر له‌گه‌ڵ چه‌ندان نموونه‌ی له‌و جۆره‌، نموونه‌‌كانی خیانه‌ت و شكست زیاتر پیشان ده‌درێت، بێگومان ئه‌وه‌ كاریگه‌ریی خراپ و نه‌رێنی له‌سه‌ر ده‌روونی كۆمه‌ڵگە و نه‌وه‌ی نوێ داناوه‌، زیاتر ره‌وایی به ‌خیانه‌ت و شكست ده‌دات و خیانه‌ت به‌لای خیانه‌تكاره‌وه‌ ئاسایی دێته‌ به‌رچاو، ئه‌گه‌رچی شیاوترو راستر وایه‌ رووه‌ دیارو خه‌باتی پڕ شانازی و خۆڕاگرییه‌كانی تێكۆشه‌رانی نه‌ته‌وه‌كه‌مان به‌رچاوی نه‌وه‌ی نوێ بخرێت له‌ جیاتی شكست و خیانه‌تی خیانه‌تكاران، بۆئه‌وه‌ی چیتر تاكی كورد خیانه‌ت به ‌سه‌ركه‌وتن و پاساوی ده‌ربازبوون نه‌زانێت و خیانه‌تكاران بێ سزاو وه‌ك به‌رزه‌كی بانان بۆی ده‌رنه‌چن.
پێویسته‌ خیانه‌ت بكرێته‌ كارێكی هێنده‌ قێزه‌ون، ئه‌گه‌ر خیانه‌تكار سزاش نه‌درێت، خۆی له‌ڕووی ده‌روونیه‌وه‌ هێنده‌ نائارام بێت، رووی ناو خه‌ڵك و به‌رده‌می نه‌ته‌وه‌كه‌ی خۆی نه‌بێت، نه‌ك به‌رگریی لێ بكرێت، سه‌ره‌ڕای ئه‌وه‌ش كۆمه‌ڵگە به‌شێوه‌یه‌ك گۆش بكرێت کە هه‌میشه‌ به‌گه‌شبینیه‌وه‌ له‌ داهاتوو بڕوانێ و پاساوی به‌رده‌وامی و سه‌ركه‌وتن به‌وه‌ نه‌هێنێته‌وه‌ تازه‌ خیانه‌تی لێكراوه‌و پشت بكاته‌ خه‌بات و واز له‌هه‌موو شتێك و پیرۆزییه‌كان بهێنێت و بۆ ماوه‌یه‌ك په‌رده‌ی خامۆشی به‌سه‌ر خه‌باتی نه‌ته‌وه‌كه‌ماندا بدرێته‌وه‌. بێگومان هه‌مووشمان ده‌زانین ئه‌و په‌رده‌ی خامۆشیه‌ چ ماڵوێرانی و كاره‌سات و قوربانی و نائومێدیه‌ك به‌دوای خۆیدا دەهێنێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شه‌هید مسته‌فا خـۆشناو له‌ ببیره‌وه‌ری مه‌لا عه‌بدوڵای بێتواته‌دا

ڕۆژی 19ی حوزه‌یرانی 1947، ڕۆژێكی گرنگ و بایه‌خداره‌ له‌مێژووی خه‌باتی ...