سەرەکی » ئاراستە » كوڕی من چەكی پێشمەرگایەتی لەشانی داناگرێت

كوڕی من چەكی پێشمەرگایەتی لەشانی داناگرێت

سه‌رحه‌د یونس محه‌مه‌د

هێشتا قوڕەكەی سەری و فرمێسكەكانی وشك نەبووبوونەوە، جێگای چڕنوكەكانی بەسەر ڕوومەتەكانییەوە مابوون و قەتماغەیان گرتبوو، سەرتاپا ڕەشی پۆشیبوو. كوێخا عەبدوڕەحمانی باوكی وا چەند ڕۆژێكە ماڵئاوایی لە دنیا كردووە ، خزم و كەسوكار هەموو لە ماتەمدا بوون بۆی. وەزیرە خانم ئەو ئێوارەیە دەستی مناڵەكانی گرت و هاتەوە بۆ ماڵەكەی خۆی. كاتژمێرێكی مابوو بۆ بانگی شێوان، خۆرەكە بە زەردهەڵگەڕاوی بەرەو ڕۆژئاوا كەناری گرتبوو. حەمەی مێردی نزیكەی مانگێكە چووەتە شاخ و چەكی پێشمەرگایەتی كردووەتە شانی. وەزیرە بە خۆی و مناڵە وردەكانیەوە لەلای كوێخا عەبدوڕەحمانی باوكی خەمەكانی بەبا دەدا، وا ئەویش گەشتی بۆ قیامەت كردووە و مال و خانەوادەی ڕەشپۆش كردووە.
ڕۆنی كردە ناو مەنجەڵەكە و خستییە سەر عەلادینەكە ، لە دەفرێكدا كەمێ‌ برنجی شۆردەوە و ئامادەی كرد بیكاتە ناو مەنجەڵەكەوە، گرمە گرمی ماشێنێك لە دەرەوە پەیدا بوو.مناڵەكان شڵەژان و ڕایان كردە ژوورەوە، سەركەوت هاواری كرد:
– دایە گیان پڕی دەرەوەیە لە سەرباز و ئەمن، وەرە دەرەوە.
– بەزیادم نەكرد ڕۆڵە گیان بەم ئێوارەیە ئیشیان چییە؟
وەزیرە لەچكەكەی لەسەری قایم كرد و هاتە دەرەوە ، ڕووی كردە چەكدارەكان و وتی:
– پیاومان لە ماڵەوە نییە فەرموون كێتان ئەوێ‌؟
كابرایەكی زلی ناقۆڵا دەمانچەیەكی بە كەلەكەوە بوو لەگەڵ ڕیزێك شانە، بریسكەكی قۆندەرەكانی دەهات،نێوچاوانی گرژ و مۆن ، سمێڵێكی درێژ و پڕ كە بە دوكەڵی جگەرە ڕەنگی زەرد بوو بوو ، نەڕاندی:
– ها ئێرە ماڵی محەمەدە؟ كوڕی غەفور ئاغجەلەری؟ بزانم لە كوێیە؟
وەزیرە بە ترس و لەرزەوە وەڵامی دایەوە:
– گەورەم محەمەد لەماڵەوە نییە ، بەجێی هێشتوین و ڕۆشتووە نازانین لە كوێیە؟
– بەڵێ‌ بەڵی ، لە ماڵەوە نییە ! دەتەوێت خۆت لە گێلی بدەیت ، یاڵا خۆتان كۆ بكەنەوە ئێوە دەستبەسەرن، خۆت و مناڵەكانت بەند دەكرێن و ئازادیش نابن تا محەمەدی مێردت چەك دانەنێت، ئەوە فەرمانی سەركردایەتی شۆڕشە لەبەغداوە دەرچووە.
وەزیرە و مناڵە وردەكانی دەستیان كرد بە گریان و شیوەن، سەركەوت و هێرۆ كەمێ‌ گەورەتر بوون، بەڵام سەردار و لەیلا ساڵ و دوو ساڵ تەمەنیان بوو، ئەمن و پۆلیس پەلی مناڵەكانیان گرت و بەرەو مسەلەحەكە ڕاپێچیان كردن، دایك بەدوای مناڵدا خۆی هاویشتە ناو ماشێنەوە، وەزیرە هەرچەند هاواری كرد با كەلوپەل و جل و بەرگی ئەم مناڵانە كۆ بكەمەوە ، هیچ دەرفەتێكیان نەدا و شۆفێر ماشێنی تاودا، لە ماوەی چەند خولەكێكدا گەشتنە بەر بینای ئەمنی ئاغجەلەر .
ژن و مناڵ ڕاپێچی زیندان كران و لە گۆشەی ژوورێكی تاریكدا لەسەر پارچە ڕاخەرێك دانیشتن، پاش كاتژمێرێك چەند خێزانێكی تریان دەستگیركرد و هێنایانن بۆ لای ئەمان.
پاش هەفتەیەك مانەوە لەو جێگایە و سەردانیكردنی كەسوكار بۆ لایان و دابین كردنی خواردن و كەلوپەلی پێویست ،لە سپێدەیەكی بەیانیاندا ئۆتۆمبێلی گواستنەوەی زیندانی لە گرتووخانەكە ئامادە كرا و ژن و مناڵ و گەورە و بچوكیان خستە ناویەوە بەرەو چەمچەماڵیان بردن ، هاوكات لەو ڕۆژەدا مام غەفور ئەحمەد و ئافتابە خانمی خێزانی كە دایك و باوكی شەهید حەمە غەفورن دەهێنن بۆ زیندانی چەمچەماڵ و پاش چەند ڕۆژێك ڕاپێچی زیندانی گەورەی سلێمانی دەكرێن. پیاوە دڵڕەقەكانی بەعس لە زیندانی چەمچەماڵ قۆناغە تفەنگێك دەدەن لەسەری وەزیرە خانم و سەری شەڵاڵی خوێن دەكەن، چونكە شێر ئاسا بەگژیاندا چووبووەوە و جنێوی پێ‌ داوبوون.
دواتر ئەم خانەوادەیە لەگەڵ سەرجەم خانەوادەکانی تری پێشمەرگەدا لەکۆتایی مانگی تشرینی دوومدا بەرەو زیندانی ناسرییە لە باشوری عێراق ڕاپێچ دەکرێن .
(ژیانی ناو زیندان بەدرێژی لە جێگایەکی تردا باس کراوە و لێرەدا خوێنەر ماندوو ناکەین)
خەوبینینی مام غەفور ئاغجەلەری
تا نیوەشەو لەگەڵ حاجی مشیر و حاجی عەبدولكەریم و مام حەمەدەمین دەمەتەقەیان دەكرد و كۆڕی باس و بەسەرهاتی زەمەنی جاحێڵی و ئەسپ سواری و ڕاو وشكار گەرم كرابوو ، دوای ئەوەی خەو زۆری بۆ هێنان مام غەفور هاتەوە بۆ جێگاكەی خۆی و مێزەرەكەی لەسەری لابرد و لە جێگاكەیدا ڕاكشا. شەوگار گەرم بوو هیچی بەخۆیدا نەدا، پاش ماوەیەك چاوەكانی چوونە خەو و بەهەموو هەست و نەستییەوە لە جێهانی بێداری بڕا و خەوی لێكەوت.
كەم كەس هەیە شەوانە یان چەند شەو جارێك خەوێك نەبینێت، ئیتر ئەو خەوە (تێكەڵ و پێكەڵ) یان (خەوی ڕاستەقینە) بێت. دیارە جۆری دووەمیان كەمتر دەبینرێت و بۆ هەموو كەس مەیسەر نابێت، یان دەبێت كەسەكە زۆر ئیماندار بێت، یان سادە و دڵساف و بێ‌ گوناهـ بێت، یان زوڵم لێكراو و ستەمدیدە بێت، ئەگەر بەو دڵ غەمبار و پاكەیانەوە بخەون خەوەی ڕاستەقینە دەبینن .
ما غەفور ئەو شەوە دەچێتە ناو قوڵایی خەوەوە و دەچێتەوە بۆ زێدی خۆی لە ئاغجەلەر و تەماشای ماڵی خۆیان دەكات ، لەپڕ گڵۆپی بەر هەیوانەكەیان دەتەقێت و دەكەوێتە خوارەوە و دنیا لەبەرچاوی تاریك دەبێت. كاتێ‌ خەبەری دەبێتەوە هەموو گیانی لەناو عەرەقی لاشەیدا تەڕ بووە و وەكو بی ناو ئاو دەلەرزێت، چەند جارێك سڵاوات لێ دەدات و دەڵێت:
– خوایە بەخێری بگێڕیت هەر حەمە هیچی بەسەر نەهاتبێت ئیتر باكم لە هیچ شتێكی تر نییە.
ئافتاب خانم لە دەنگ دەنگی مام غەفور خەبەری دەبێتەوە و دەڵێت:
– ها پیاوەكە چیتە ؟ بۆچی بەخەبر هاتوویت؟
– ژنەكە خوا بەخێری بگێڕێت خەوێكی ناخۆشم بینی، لە خەومدا گڵۆپی بەرهەیوانەكەمان شكا و كەوتە خوارەوە، بەوەش دنیا لەبەرچاوم تاریك بوو، بەرپێی خۆم نەدەبینی.
– هیچ نییە پیاوەكە نییەتی خێرێك بهێنە ان شاالله بەخێر دەگوزەرێت.
بەم قسانەی ئافتاب خانم مامە غەفور كەمێ‌ هاتەوە سەر خۆیی و ڕاكشایەوە و هەر خەریكی زیكر كردن بوو. بەیانیش كاتێ‌ هەستا و هاتەوە ناو هاوڕێكانی خەوەكەی بۆ گێڕانەوە, ئەوانیش دڵخۆشییان دایەوە و وتیان هیچ نییە شەو سوعبەتی زۆرمان كردووە .
دوای تێپەڕبوونی زیاتر لە مانگێك بەسەر ئەو خەوەدا، لەكاتژمێری نۆی بەیانییەكدا ئەفسەرێك خۆی كرد بە ناو زینداندا ، كاغەزێكی بەدەستەوە بوو، لەسەر خۆكردییەوە و وتی:
– وەرنە پێشەوە هەموتان خڕ بن.
زیندانییەكان هەموو چوونە پێشەوە بۆ لای و گوێ‌ قوڵاغ بوون، تۆ بڵێی هەواڵێكی خۆشی هێنابێت؟
– غەفور ئەحمەد كێیە؟ ئەفسەرەكە وای وت و سەری بەرزكردەوە بۆ زیندانییەكان.
– بەڵی من ئەوم، مام عەفور وای وت.
– زۆر باشە وەرە ئەملاوە، ئەفسەرەكە پەلی مام غەفوری گرت و خستیە تەنیشتی خۆی. دواتر ناوی هەریەكە لە ئەفتاب حامید و وەزیرە عەبدوڕڕەحمان و مناڵەكانیشی خوێندەوە، پێی ڕاگەیاندن كە محەمەدی كوڕیان تەسلیم بە حكومەت بووەتەوە و ئەمانیش لەبری ئەوە ئازاد دەكرێن.
مام غەفور ڕەنگی ڕەش داگیرسا و لێوەكانی كەوتنە لەرزین ڕووی كردە حاجی مشیر و هاوڕێكانی و وتی:
– من كوڕی خۆم بناسم هەرگیز تەسلیم بە حكومەت نابێتەوە و چەكی پێشمەرگایەتی لەشانی داناگرێت، ئەوە كوژراوە بۆیە ئێمە ئازاد دەكەن.
حاجی مشیر و هەموو ئەو پیاو و ژنانەی لەو ناوە بوون وتیان نا ان شاالله هیچی بەسەر نەهاتووە و دیارە لەبەر خاتری ئێوە خۆی ڕادەست كردووەتەوە .
مام غەفور سەرێكی بادا و وتی:
– یاخوا وابێت بەخوا خەوەكەی خۆمە حەمە كوژراوە و گڵۆپەكەی من كوژاوەتەوە.
تا پەڕاوی ئازادبونیان تەواو كرا بوو بەشەو ، هەر بەو شەوە هاتن بە شوێنیاندا، مام غەفور لەگەڵ پیاوەكان باوەشیان كرد بەیەكدا و ئەملاولای یەكتریان ماچ كرد و گەردن ئازادییان لەیەكتری كرد، لەو لاشەوە بە هەمان شێوە پورە ئافتاب و باجی وەزیرە لەگەڵ ژنەكان دەست لەملان و خواحافیزییان لەیەكتری كرد و فرمێسكی خەم و شادییان تێكەڵاو كرد.
مام غەفور بە ئەفسەر و پۆلیسەكانی وت:
– ئێمەیەكی نەشارەزا بەم شەوە بۆ كوێ‌ بڕۆین با ئەمشەو بمێنینەوە و بەیانی بەڕێدەكەوین.
ئەفسەرەكە وتی:
– نا بەهیچ شێوەیەك مافی مانەوەتان نییە لەم جێگایەدا و دەبێ‌ بڕۆن.
باوە گەورە و دایە گەورە لە لەگەڵ بوكەكەیاندا دەستی مناڵەكانیان گرت و لە زیندانی ناسرییە چوونە دەرەوە، بەرەو شەقامێك ڕۆشتن، لەوێ‌ شۆفێرێكی تاكسی ئیشارەتی لای ڕاستی داگیرساند و خۆی بۆ خستنە كەنار شەقامەكە بۆیان و سەری لەجامەوە دەرهێناو وتی:
مامە گیان ئەوە بەو شەوە ئۆغر بێت، بۆ كوێ‌ دەڕۆن و لە چی دەگەڕێن؟
مام غەفور و خانەوادەكەی توشی شۆك بوون، لەخۆشیدا نەیانزانی چی بكەن، ئەوە چییە خۆ بە كوردی قسە دەكات.
– كاكە گیان تۆ كێیت و چی دەكەیت لێرە ، خوا بۆ ئێمەی ناردوویت، مام غەفور وای وت.
– من كوردم و لەو خێزانانەم كە پێیان دەوترێت (عائدون) ڕەهەندی ئێرە كراوم و لێرە كاری تاكسی دەكەم، ئێوەم بە جلی كوردییەوە بینی بۆیە وەستام.
– یاخوا بێوەی بیت كوڕم ئێمەش هەر ئێستا لە زیندان هاتینە دەرەوە و دەمانەوێت بەرەو گەراجی بەغدا بڕۆین، مام غەفور دەستی خستبووە سەر دەرگای تاكسییەكە و وای وت.
– وەرن سەركەون ، من دەتانگەیەنم، شۆفێرەكە وای وت.
مام غەفور خێرا لەپێشی ئۆتۆمبێلەوە خۆی گەیاندە لای سەكن و سوار بوو، خێزان و بوك و كوڕەزاكانیشی لە دواوە دانیشتن و دەرگایان پێوەدا، شۆفێر دوای بەخێر هێنان ڕووی لە مام غەفور كرد و وتی:
– مامە گیان كەفارەتی زەحمەتتان بێت ، پێم ناڵێن خەڵكی چ شوێنێكن و بۆچی گیراون؟
مام غەفور هەناسەیەكی قوڵی هەڵكێشا و بەدەنگێكی غەمگینەوە وتی:
– برا گیان چی لە تۆ نهێنی بێت، ئێمە لەسەر كوڕەكەمان گیراوین كە بووە بە پێشمەرگە و شۆڕشیان لە دژی ئەم حكومەت و دەسەڵاتە هەڵگیرساندووەتەوە، خەڵكی ئاغجەلەرین و كوڕەكەشمان ناوی محەمەدە، لەو كاتەدا لای كردەوە بۆ دواوە و وتی محەمەد مێردی ئەم ژنەو باوكی ئەم مناڵانەیە.
شۆفێر بە بیستنی ئەم هەواڵە تاسا و پێی لەسەر دۆسەی بەنزینەكە هەڵبڕی ،ماشێن خاوی كردەوە و بە ئەسپایی ڕێگای دەبڕی، فرمێسك لە چاوەكانی قەتیس بوون، بەڵام شاردییەوە و نەیهێشت هەستی پێ‌ بكەن. ئەو ماوەیەك لەمەوبەر هەواڵی شەهید بوونی پۆلێك پێشمەرگەی بیستووە كە لەناویاندا محەمەد غەفور ئاغجەلەری ناوێك هەیە، بۆیە لای كردەوە بە لای مام غەفوردا و وتی:
– مامە گیان ئەمشەو لەماڵی برازای خۆت میوان بن و بەیانی بكەونە ڕێ‌.
مام غەفور وتی:
– نا برا گیان بەخوا دەبێ‌ بڕۆین ، ماڵت ئاوەدان بێت زەحمەت بكێشەو بمانگەیەنەرە نقڵیاتی بەغدا، هەرچۆن بووە دەبێت خێرا وەڕێ‌ كەوین.
شۆفێرە كوردەكە بۆی دەركەوت كە مام غەفور پێداگری دەكات و نامێنێتەوە ، ماشێنەكەی خێرا كرد و ڕووی كردە نقڵیاتی بەغدا، لەوێ‌ دابەزین و پیادە بوون بەڵام لەبەرئەوەی كاتژمێر دووی شەو بوو، هیچ نەفەرێك نەبوو پاسەكە پڕ بێت و بكەونەڕێ‌. ناچار لەبەردەم دوكانێكی ماسی فرۆش تا بەیانی مانەوە و ڕۆژیان كردەوە، سەگەلی ئەو ناوەش بەبۆنەی خواردنی پاشەڕۆی ماسییەوە تا بەیانی وازی لێ‌ نەهێناون و پەلاماری داون .
لە بەرەبەیانێكی زوودا پاس بەرەو شاری بەغدا بەڕێدەكەوێت، هەموو خانەوادەكە بە گەورە و بچوكەوە ژمارەیان حەوت كەس دەبێت جێگای پێنج نەفەریان گرتووە و لە جامەكانەوە تەماشای شارە پیس وپۆخڵەكەی ناسرییە دەكەن و لە شەقام و كۆڵان و دیمەكانی تر ڕادەمێنن. مام غەفور بە ڕدێنی سپییەوە لە جامی پاسەكەوە نیگای خستووەتە سەر ئەو بڕكە حوشترەی لە قەراغی ڕێگەكەدا دڕك و داڵی بیابان دەخۆن و كاوێژ دەكەنەوە، سەرەڕای ئەو خەفەتەی لە دڵیدا بوو ،هەستێكی خۆشی بۆ دروست كردبوو، كەوتەوە خەیاڵی مەڕ و مانگا لەوەڕاندنی ناو گژوگیای سەوز و جوانی كوردستان.
لەدڵی خۆیدا دەیوت خەوێكەو بەس كێ‌ دەڵێ‌ ئەم خەوەی من وەڕاست گەڕێت، لەوانەیە حەمەی كوڕم تاقەتی دووری ژن و مناڵەكانی نەبوبێت و خۆی ڕادەستی ڕژێم كردبێتەوە، یان چوزانم لەوانەیە تەنها لەبەر ئەوە هاتبێتەوە ئێمە ئازاد بكرێێن و پاشان بچێتەوە شاخ، لەبەری خۆیەوە ئەو وورد وكردانەی دەكرد، بەڵام هیچ نەیدەویست خەیاڵی خۆشی خێزانی و بوك و مناڵەكانی تێك بدات و باسی خەوەكەیان بۆ زیندوو بكاتەوە.
لە پێش نیوەڕۆ گەیشتنە شاری بەغدای پڕ حەشیمەت، مناڵەكان برسییان بوو لەپاس دابەزین و بە تاكسییەك بەرەو نقڵیاتی كەركوك ڕۆشتن، كاتێ‌ دابەزین لە دوكانێك ساردی و بسكیتیان خوارد و كەمێ‌ سكیان تێر بوو،مام غەفور و پورە ئافتاب هەر لە ناسرییە نیەتی ڕۆژوویان هێنابوو یەكی دوو دەنك خورمایان وەكو پارشێو بە ئاوەوە خواردبوو ، لە ڕێگا هیچیان نەخوارد، پێشینانمان ئەوەندە خاوەن عەزیمەت بوون لەسەفەر و ناخۆشیشدا لە مانگی ڕەمەزانیان نەخواردووە و بەرگەی گەرمای هاوین و دژوارییەكانی ڕێگایان گرتووە. دواتر هاتنە ناو نقڵیاتەكەوە ، شۆفێرەكان پرسییان:
– بۆ كوێ‌ دەڕۆن؟ مام غەفور وتی:
– لە زیندانی ناسرییە ئازاد كراوین و دەچینەوە بۆ ئاغجەلەر.
سواری ئامانەیەكی هەژدە نەفەری بوون و بەرەو شاری كەركوك وەڕێ‌ كەوتن، پاس تاوی دەدا و باخە خورما و پرتەقاڵەكانی دەدایە دوای خۆی ، تا لە كەركوك نزیك بوونەوە خۆرەكە لە ناوەڕاستی ئاسمانەوە هات بۆ لای دەستەچەپی پاسەكە .بانگی عەسر بوو گەشتنە شاری كەركوك ، لە بڵندگۆی مزگەوتەكانەوە لە هەرچی مزگەوتەوەیە دەنگی بانگ بەرزبوویەوە، مام غەفور ماندوو و شەكەت بوو، وتی لەماڵی پیرۆزی خوشكم لادەدەین و پشوو دەدەین ، لەئامانەكە دابەزین و سواری تاكسییەك بوون بەرەو ماڵی پورە پیرۆز.
كاتێ‌ گەشتنە بەر دەرگای ماڵەكە و لە دەرگایاندا، ژنێكی ڕەشپۆش هات و دەرگای كردەوە.
ژن لەبەر دەرگای حەوش وەستاوەو لە میوانەكان ڕادەمێنێت ، یەك وشە چییە بۆی ناوترێت، مام غەفوری برای و ئافتاب و وەزیرەش تەماشای بەرگە ڕەشەكەی پیرۆز دەكەن دەتاسێن و تف لە قوڕگیان وشك دەبێت، مناڵەكانیش سەربەرز دەكەنەوە و ئەوڵەق دەبن، بۆچی كەس ناڵێت فەرموون و بۆچی هەمویان وەستاون. لەناكاو بوركانی گریان فرمێسك دەتەقێتەوە و دەبێت بە شیوەن و گریان ، پورە پیرۆز باوەش بە مناڵەكاندا دەكات و هەرچواریان لەناو دەستیدا كۆدەكاتەوە، بە گریان و فرمێسكەوە یەكە یەكە ڕایان دەموسێت، دواتر باوەش بە وەزیرەدا دەكات و دەیلاوێنێتەوە، مام غەفور هۆن هۆن فرمێسك دەڕێژێت و باوەش بە پیرۆزی خوشكیدا دەكات و دەڵێت: خوشكم خەوەكەی خۆم بوو ، وانییە ؟ حەمە كوژراوە؟
خوشك نە دەتوانێت بڵێت ئا، وەنەدەتوانێت نكولی بكات و بڵێت نا، جلكە ڕەشەكانی بەری گەواهی ئەوە دەدەن كە ئازیزترین كەسیان لەدەست داوە.
دواتر خەڵكی گەڕەكیش دەڕژێت بە سەریاندا و بەشداری ئەو شیوەنە دەكەن و ماتەم دەگێرن. ئەو شەوە لەماڵی پورە پیرۆز پرسە نوێ‌ كرایەوە و جۆگە و كانیاوی فرمێسكەكان تەقینەوە و تا بەرەبەیان كەس جگە لە مناڵە دڵ شكاوەكان كەس خەو نەچووە چاوی ، ناو بەناو هەواڵی زیندان و دەنگوباسی زیندانییەكان ناوكێشی شیوەن و گریانەكەیان دەكرا و وەكو تاوی بارانی بەهار كەمێ‌ ژیر دەبوونەوە و لە فرمێسك دەكەوتن ، پاش كەمێك هەوری ڕەشی خەفەت سەرتاپای دڵی مام غەفور و پورە ئافتاب و وەزیرەی دادەپۆشی و سێڵاوێك فرمێسكیان هەڵدەڕشتەوە.
لەگەڵ سپێدەی بەیاندا میوان و خانەخوێ‌ هەموو خۆیان كۆكردەوە و بەرەو ئاغجەلەر كەوتنەڕێ‌ ، كاتێ‌ خۆیان كرد بە گەڕەكدا دیسانەوە بوو بە شیوەن و گریان و لەخۆدانێك، تەواوی شارۆچكەكە بوو بە ماتەم و پرسە، هەموو پێشوازییان كرد لە خانەوادەیەكی ماندووی دڵشكاوی چاو پڕ لە خوێن. هێشتا تەپوتۆزی بیابان بەسەرو ڕوخساریانەوە دیارە و سوێراوی باشور پێستی سوڕهەڵگەڕاندوون، جگە لە جاش و ئەمنەكانی ئەو دەڤەرە كەس نەبوو بزە لەسەر لێوی بێت و فرمێسكی نەڕشتبێت، تەنانەت ئاسمانیش چەند نمە بارانێكی خستە سەر گۆنای زەوی و شاخەكانیش ڕەش هەڵگەڕان .
ئەو خێزانە ماندووە خێر لەخۆ نەدیوە دوای ئەوەی ڕاپێچی زیندان دەكرێن، ماڵەكەشیان هەڕاج فرۆش دەكەن و دەست دەگرن بەسەر خانووەكەیاندا، دوای دوو ساڵ لە ئازادبونیان خانووەكەیان پێ‌ دەدرێتەوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

تەلەڤزیۆنی کوردی

سەرکەوت عەلی حەبیب (٤) بێ خەمی تەلەڤزیۆنی کوردی لەبەرانبەر زمانی ...