سەرەکی » وتار » ڕه‌سوڵ بۆسكێنی » شه‌هید مسته‌فا خـۆشناو له‌ ببیره‌وه‌ری مه‌لا عه‌بدوڵای بێتواته‌دا

شه‌هید مسته‌فا خـۆشناو له‌ ببیره‌وه‌ری مه‌لا عه‌بدوڵای بێتواته‌دا

ڕۆژی 19ی حوزه‌یرانی 1947، ڕۆژێكی گرنگ و بایه‌خداره‌ له‌مێژووی خه‌باتی ڕزگاریخوازی نه‌ته‌وه‌ی كوردا، له‌ به‌ره‌به‌یانێكی خه‌ماوی و په‌ژاره‌ییدا چوار ئه‌فسه‌ری سه‌ربه‌رزی نه‌ته‌وه‌كه‌مان گه‌ردنی به‌رزیان به‌په‌تی سێداره‌ داكرا و پله‌ی به‌رزی شه‌هاده‌تیان به‌ده‌ستهێنا، به‌تۆمه‌تی ئه‌وه‌ی له‌ڕۆژهه‌ڵاتی كوردستان هاوكاری و به‌شداری كۆماری كوردستانیان له‌ مه‌هاباد كردووه‌ و داوای مافه‌ ڕه‌واكانی گه‌لی كوردیان كردووه‌.
له‌م ڕووه‌وه‌ له‌ شۆڕشی دووه‌می بارزان له‌ 1944 حزبی هیوا ڕۆڵێكی گرنگی گێڕا له‌و شۆڕشه‌دا به‌ناردنی ئه‌فسه‌ره‌ كورده‌كان وه‌كو ئه‌فسه‌ری په‌یوه‌ندی نێوان حكومه‌تی عێراق و شۆڕشی بارزان، هه‌ستی نه‌ته‌وه‌یی و سۆزی كوردایه‌تی ئه‌فسه‌ره‌كانی په‌یوه‌ندی هانده‌ر بوو بۆ ئه‌م كاره‌، به‌تایبه‌ت مسته‌فا خۆشناو و میرحاج له‌و بواره‌دا چالاكانه‌ تێده‌كۆشان، له‌و ماوه‌یه‌دا مسته‌فا خۆشناو به‌نهێنی سه‌ردانی ئێرانی كرد و په‌یوه‌ندی كرد به‌ كۆمه‌ڵه‌ی ژیانه‌وه‌ی كوردستان (ژ.ك) له‌سه‌ر ئه‌م هه‌ڵوێسته‌ی حكومه‌تی عێراق له‌ڕیزه‌كانی سوپا ده‌ریكرد و فه‌رمانی ده‌ستگیركردنی ده‌ركرد، به‌ڵام ئه‌م خۆی نه‌دا به‌ده‌سته‌وه‌ و له‌گه‌ڵ چه‌ند ئه‌فسه‌رێكی نیشتمان په‌روه‌ردا په‌یوه‌ندیان به‌ جوڵانه‌وه‌ی بارزانه‌وه‌ كرده‌وه‌.
كاتێك جوڵانه‌وه‌كه‌ به‌سه‌رۆكایه‌تی مه‌لا مسته‌فا بارزانی ناچار به‌پاشه‌كشه‌ كرا، ڕوویان كرده‌ ڕۆژهه‌ڵاتی كوردستان، له‌دوای دامه‌زراندنی كۆماری كوردستان له‌ مه‌هاباد، هه‌ر چوار ئه‌فسه‌ری شه‌هید (مسته‌فا خۆشناو، عزه‌ت عه‌بدولعه‌زیز، خیرالله‌ عه‌بدولكه‌ریم، محه‌مه‌د مه‌حمود قودسی) له‌گه‌ڵ هه‌موو تێكۆشه‌ر و نیشتمانپه‌روه‌رانی كورد به‌مه‌به‌ستی خزمه‌ت كردنی ئه‌و كۆماره‌ له‌ڕێزه‌كانیدا دڵسۆزانه‌ خه‌باتیان كرد، له‌پێناوی خزمه‌ت به‌كۆمار پسپۆڕی و شاره‌زایی خۆیان خسته‌كار.
مه‌لا عه‌بدوڵای بێتواته‌ وه‌ك یه‌كێك له‌ تێكۆشه‌ران و به‌شداربووانی كۆماری كوردستان له‌گه‌ڵ شه‌هید مسته‌فا خۆشناودا پێشمه‌رگه‌ بووه‌، تاكو دوای روخانی كۆماری كوردستان، ڕووه‌ و عیراق دەگەرێنەوە تا سەر سنوور له‌گه‌ڵ شه‌هید مسته‌فا خۆشناو دابووه‌ و دوایی لیك جیادەبنەوە. مامۆستا مه‌ عه‌بدوڵا لاپه‌ڕه‌كانی مێژووی ئه‌و ڕۆژگاره‌مان بۆ هه‌ڵداته‌وه‌. و ‌بیره‌وه‌ریه‌كانی له‌گه‌ڵ شه‌هید مسته‌فا خۆشناوی نه‌مردا ده‌گێڕێته‌وه‌ و ده‌ڵێت:
ساڵی پێش تێكچوونی كۆماری كوردستان له‌ مەهاباد واته‌ لە 1945 شه‌هید مسته‌فا خۆشناو لێرە له‌ بێتواته‌ بوو، ماوه‌یه‌كی چاك لێره‌ بوو، ڕۆژێ‌ به‌رده‌وام لەگەڵ حاجی نەبی بوو، حاجی نه‌بی گوتی: مستەفا خۆشناو كوڕی ئەحمەد بەگیە، ئەحمەد بەگیش ماڵیان لە گوندی ئەنگۆزێ‌ بوو، مسته‌فا خۆشناو بچوك بوو، كه‌ باوكی مرد، ئه‌وان لێره‌ ڕۆیشتن و كه‌وته‌ كۆیه‌، لە كۆیەشیان پەروەردە كرد تا بووبه‌ ئه‌فسه‌ر له‌ سوپای عێراقدا..
مسته‌فا خۆشناو دیاره‌ له‌ حزبی هیوادا بوو، حزبەكە لەبەغدایە بوو، لقێكیان لە كەركوك بوو، من لەو فەرعەی كەكوك‌ هه‌میشه‌ دەچووم بۆ لایان، من یەكێك بووم لەوانەی ئەندام بووم لە كەركوك‌ لە حزبی هیوا، دەچوومە مەكتەبەكەی و كتێب و بڵاوكراوه‌ و شتم ده‌هێنا بۆ سنووره‌كه‌ی خۆمان، نزیكه‌ی پەنجا نوسخە ڕۆژنامه‌ی هیوام دا به‌ مەلا سەلامی بێتواته‌. هەر جاریك ڕۆژنامەیان دەردەكرد بانگیان دەكردم، دەچووم دەمهینا و بڵاوم دەكردەوە، به‌ڵام من نازانم ئەوان (مسته‌فا خۆشناو) حزبیان دامەزراندووە یان نا، چونكە حزبەكە هەموو شتێكی نهێنی بوو، ئەگەر زانیبایان حزبایەتیە دەكا و بۆ كوردایەتیە بەشداری حزبایەتی دەكا دەیان كوشت هه‌موویان دژی میللەتی كورد بوون.
ئه‌و كاته‌ من نەمدەناسی خه‌ڵك دەچوونە لای، من لیرە له‌ (بێتواته‌)م ناسی، ماوه‌یەك كه‌ كێشه‌ی هه‌بوو فیراری كرد، لەخوارێ‌ نەما هاتە ئێرە بێتواتێ، كاتی شەڕی حكومەتی ئەڵمانی، عەسكەربووم، كە مسته‌فا خۆشناو بوو به‌ ئه‌فسه‌ر لە حەبانیەی لە وێ‌ لەشەڕی عێراق، كە شەڕەكە قەوما، لێرە گیرا و بردیانە خوارێ‌ به‌ندیان كرد، پاشی به‌ند كردنێ‌ كە ئازاد بوو هاتەوە ئێرە، ماوەیه‌كی چاك لێرە بوو، لە ماڵێ‌ ئەحمەد مستەفا، و مەحمود ئاغا و حاجیاغا و ئەوان، خه‌ڵك یارمەتیان دەدا، ڕۆژێ‌ دەچووە شاخی و شەوێش دەهاتەوە، خه‌ڵك لە عیراقێ‌ خۆشیان دەویست، لێره‌ بوو، هەتا شەڕی دووەمی بارزانیان، بارزانیەكان په‌رێشان بوون، هەستا لێرانە گوتی دەڕۆم بۆ بارزان بۆ لای مه‌لا مسته‌فا، ئێمە بۆ كوردایەتی هاتووین، كوردایەتی دەكەین، بۆ ئەوە نەهاتووین بگەڕێین، ئێمەش دەچین لەگەڵ مەلا مستەفای دەكەوین، و لەوێ‌ شەڕی كوردایەتی دادەمەزرێنین.
شەهید مستەفا خۆشناو كه‌ چوو بۆ بارزان من لەگەڵیدا نەبووم، لێرە قادری كوێخا عومەری لەگەڵ چوو، هەتا سەلان، لە سەلانیش گوتیان كاك مەجید و كاك حمەدیان لەگەڵ چوون، هەتا بردیانە بارزان، پاشی ئەوەی ئەوان چوونە ئێرانێ‌ و پاشی ماوەیەكی من فیرار بووم لەعەسكەریە، له‌و كاته‌ لەوەرتێم دەخوێند، حاجی برایم و ئەوان هاتن، منیش لەگەڵیان كەوتم، هەستام چومە كۆماری كوردستان لەمەهاباد، ساڵی 1946 مانگی حوزه‌یران بوو. هەر زۆریش مه‌به‌ستم بوو، چونكە لێرە سه‌ره‌تا وا بڕیار بوو لەگەڵ مستەفا خۆشناوی من بچم بۆ ئه‌و سه‌فه‌ره‌ی بارزان، سه‌ره‌ڕای ئه‌وه‌ش پێشتر ئێمه‌ كوردایەتیمان ده‌كرد، لەگەڵ زۆر برادەران، له‌به‌ر ئه‌وه‌ به‌شداری له‌ شۆڕش و كۆماری كوردستانمان به‌ئه‌ركی سه‌ر شانمان ده‌زانی، كە چووینە ئه‌وێش چووینه‌ لای مسته‌فا خۆشناوی، به‌خێرهاتنی كردین.
ئێمە كەچووین مستەفا خۆشناو لە بۆكانێ‌ بوو، چووینە بۆكانێ‌، باره‌گایان لە بۆكانێ‌ له‌ خانووی حەمەد ئاغای سەرایێ‌‌ بوو، لەگووندی سەرایێ‌ بوون، پێشمەرگەیەكی زۆری لەگەڵ دابوون، ته‌نیا نائب زابتەكی لێ‌ بوو، ناوی ئەحمەدە فەندی بوو، خەڵكی هەولێرێ‌ بوو، كاتب بوو، ئەوی لەگەڵ دابوو، خه‌ڵكی دیكه‌شی بێ‌ ئەژمار لەگەڵ دابوو، بەس بارزانی زۆر لێ‌ بوون. گوندی سەرایێ‌ جێیەكی خۆش بوو، خه‌ڵكه‌كه‌ به‌حه‌ماسه‌وه‌ بۆ كورد تێده‌كۆشان، به‌ڵام جاشیشی زۆر لێ‌ بوون، جاش لەگەڵ حەمەد ئاغای هەڵات بوون، چوو بوونە سەقز.
سه‌ره‌تا مستەفا خۆشناو سەرتیپی فەرماندەی هێزی بارزانیان بوو، لە بۆكانێ‌، لەوێ لەشەڕێكیدا بریندار بوو، زۆریان خۆش دەویست، لەوێ‌ پەروەردەی سه‌ربازی ئەو بارزانیانەی دەكرد كەلەوێ‌ بوون، ئازوقە و هەرچی كە هاتبا دەبوو ئەو دابه‌شی بكات، تا ئاخیری لێك حاجز بوون، داوای گواستنه‌وه‌ی كرد بۆ مەهابادێ،‌ قازی وەریگرت و كردیە فه‌رمانده‌ی هێزی ناوەند له‌ هێزی ناوەندی مایه‌وە تا كۆمار تێك چوو.
كه‌ بارودۆخی كۆمار تێكچوو لەوێ‌، لەگەڵ مستەفا خۆشناوی، یەكێكی لەگەڵ دابوو، ناوی ئەنوەر بوو، شووعی بوو، گووتی ئێمە دەڕۆین، بیرمان ده‌كرده‌وه‌ بچینە روسیا، كە كۆمار تێكچوو كه‌ گوتیان تەوریز تەسلیم كرا، ئەوان قەدەمیان شكان، گوتیان تازە چمان پێ‌ ناكرێت، به‌ڵام كورەكەی سەید تەها فەندی نازانم ناوی چی بوو. قوەتێكی زۆر هەبوو لەنەغەدەی.
كە كۆمار تێكچوو، خه‌ڵكه‌كه‌ شێوا، قەرەباڵغی پەیدا بوو، مستەفاش چووه‌ لای دوو قونسولی روسیای لێ‌ بوون یەكێكیان ناوی ئەسەدۆڤ بوو، یەك ناوی مەمەندۆڤ بوو، مستەفا گوتی تەگبیرمان چیە؟ ئەوانیش گووتیان تەگبیرەكە تازە وا ڕۆیشت، تازە وا تێكودا، نەوكرد، مسته‌فا خۆشناو زۆر نیگه‌ران بوو، گوتی لە فكرمان ناچێت، ڕۆژێك هەردێت تۆڵه‌یان لێوەربگرین، ئینجا شەو داهات، مستەفا خۆشناو بانگی كابرایەكی كرد، گوتی لۆریەكی بێنە، لۆریەكی گەورەی هێنا، كه‌لوپه‌لمان هاویشتەناوێ‌ و بەشەوێ‌ چووینە ورمێ‌ ئەو كابرایەشمان هەر لەگەڵ دابوو، ئەنوەر خەڵكی هەولێرێ‌ بوو، چووینە وتێلێ‌، لە وتێلێ‌ ماینەوە.
ئێمە چوار كەس بووین، (مسته‌فا خۆشناو. ئه‌نوه‌ر، من (مه‌لا عه‌بدوڵا)، سه‌عید (واته‌ مام قادی باخچه‌وان- ڕانیه‌) زەكیە خێزانی مسته‌فا خۆشناو و ژنی ئه‌و ئه‌نوه‌ره‌شمان لەگەڵ دابوو، ژنی سەعیدی منداڵی ویش، دوو منداڵ، مسته‌فا خۆشناو ژنی هه‌بوو، سێ‌ كچی هەبوون، فرسەت، شەهێن، یەكیان ناوی پەریە جانازانم ماون یان نا لە سلیمانین.
به‌یانی كە له‌ خه‌وهەستاین هەرا بوو، خه‌ڵك هاوار هاواریان بوو، عەجەمان هەموو كوڵاویان لەسەری نابوو، كردبویانە تەپ و هۆڕ هاواریان دەكرد: (زیندەباش …زیندەباش موزەفەر فەیرۆزی) هاواریان دەكرد بۆ نیزامی نوێ،‌ حكومەتی ئێرانێ‌ بازاری گەرم بوو، په‌لاماریان ده‌داین، ده‌یانویست بمانگرن، تاڵانمان بكه‌ن، ڕێگایان نه‌ده‌‌دا بڕۆین، گوتیان جا چ بكەین، گوتمان: شه‌ڕیان له‌گه‌ڵ ده‌كه‌ین، ڕاستی حاجی برایمی گوتی شەڕی دەكەین، هەرچی بێتە پێشێ‌ دەیكوژین، من و حاجی برایم و سەعید ئەو سێ‌ كەسە چەكمان پێ‌ بوو، مستەفا خۆشناویش گوتی كه‌س مەكوژن، قەیدی ناكا لێیان مەدەن، هەر دەڕۆینە دەرله (‌ورمێ).
ئیتر هه‌ر چۆنێك بوو لەورمێ‌ هاتینەدەرێ‌، كابرایەك لەگەڵمان هات، هەتا هاتینە بەندێ‌، گوندێك هەبوو ناوی بەندێ‌ بوو، هاتینە بەندێ‌، لەوێ‌ چوینە ماڵێ‌ كابرایەكی ئەفسەر بوو، ئەویش ئەفسەری پێشمەرگان بوو، هەركی بوو، كابرا گەلێك نیگەران بوو، گووتی حەیف بۆ كورد ئاوامان لێ‌ هات، ئەمە نەمان دەزانی قازی هێندە زوو خۆ حەل دەكا، بۆ ئەوەمان نەبوو قازی ئەوەندە زوو خۆ حەل كا، ئەو میللەتەی بەرەڵاكا، خه‌ڵكه‌كه‌ش هه‌مووی په‌ره‌وازه‌ بوو.
دەیانویست قازی بڕیاری شەڕ بدات، پێیان گوت، گوتیان تۆ وەرە هەقت بەسەر هیچ لا نەبێ‌ ئێمە شەڕ دەكەین، به‌ڵام قازی ڕازی نه‌بوو، گوتی: من بۆ خۆم لەناو میللەتی خۆم دەبم، گوتیان: ئه‌وه‌ دوژمنه‌ تۆش دەكوژێ‌ و میللەتیش دەكوژێ‌، بێ سوود بوو، خه‌ڵكه‌كه‌ قەدەمی شكا و هیوا بڕاو بوون، ئیتر ئێمه‌ شەوێ‌ ڕۆیشتین چوینە ڕاژانێ‌ گوندێك بوو، ڕاژان گوندی سەید موسا و سەید عیسای نەهری یە بوون، لەوێ‌ گەلێكیان خزمەت كردین گەلێكیان پێ‌ ناخۆش بوو، كە ئەو دۆخه‌ وابوو، شەو‌ لەوێ‌ بووین بۆ به‌یانی گوتیان دەڕۆین هەتا چوینە دۆرێ‌ گوندێك بوو ناوی دۆرێ‌ بوو، گوندی تەمەرخانی بوو، تەمەرخانی هەركی، گوتی: كورە مستەفا مەرۆ، گەلیكی پێ گوت مەرۆ، دانیشە ئەتۆ سایلی ئه‌م خه‌ڵكه‌، خۆ ئەو هەموو خه‌ڵكه‌ هەر ناكوژرێ‌. یان ئەگەر هەر نەبێت دەچینە شاخی هەتا شتەكە چاك دەبێت.
مستەفا خۆشناو ڕووی له‌ ئێمه‌ كرد و گوتی ئێمە دەچینە روسیای، ئەگەر بەقسەی من بكەن ئێوە نایەن، ئێمە لەوێ‌ یەكدیمان بەجێ‌ هێشت، ئەو ڕۆیی و ئێمەش گەراینەوە، من و حاجی برایم هاتینە گوندێ‌ شێخ عوبەیدوڵای لەوەزنێ‌، لەوێ‌ ماینەوە، چووینە شنۆیە لەشنۆیەش ماوه‌یەكی ماینەوە جا خه‌ڵكه‌كه‌ په‌رێشان بوو، زۆر گرانی بوو، ناخۆشی بوو، تابڵێی ناخۆشی بوو، من ئەحمەدی كاخدری لەگەڵ خۆی بردم سێ‌ چوار مانگان لەوێ‌ بووم، لای ئه‌و بووم، تاهاتینەوە كە هاتینەوەش هاتینە خەلانێ،‌ كە هاتینە خەلانێ‌ لەوێڕا من هاتمەوە.
هی وا هه‌ن ده‌ڵێن مسته‌فا خۆشناو و ئه‌وان له‌گه‌ڵ شێخ ئه‌حمه‌د و ئه‌وان خۆیان ڕاده‌ستی حكومه‌تی عێراق كردۆته‌وه‌، به‌ڵام ‌ ئەوەی وادەڵێ‌ ڕاست ناكه‌ن، ڕكی لە مستەفا خۆشناوی بوو. چۆن لەگەڵ ئه‌و دەچوو.
مستەفا خۆشناو له‌گه‌ڵ عزت عه‌بدولعەزیزی لە گوندی دزێ‌، شێخ عەبدوڵای لە وێیان یەكدی گرتبۆوە. له‌لای شێخ عەبدوڵای نەهری مابوونەوە، شێخ عەبدوڵاش گوتبووی: زۆر زۆرم پێ‌ خۆشە هەر چوارتان خۆ تەسلیمی حكومەتی بكەن و بتان كوژێ‌ نەك بارزانیه‌كان بوكوژن یان توشی كێشه‌ و ناخۆشیتان بكەن. لەوێش هێزی حكومەتی عێراق هاتبووە سنوور، فه‌رمانده‌یه‌كی سه‌ربازی سوپای عێراق، عەرەب بوو، ناوی سەید عەلی حیجازی بوو، سنووره‌كه‌ی گه‌مارۆ دابوو، هاتبوو هەڵی خەڵەتاندبوون، به‌ڵێنی پێدابوون، گوتبووی ئێوه‌ خۆتان ڕاده‌ست بكەنەوە، من نایەڵم هیچ خراپه‌یه‌كتان له‌گه‌ڵدا بكرێت، ئه‌ویش ناچار بوو، ڕێ‌ گیرابوو ئەو لایە ئێران ڕێی گرتبوو، ئەودیویش توركیا بوو، دەرنەدەچوو، زوو تا ڕێ‌ هەبوو نەڕۆیشت دوایش‌ نەكرا. ناچار ئه‌وان خۆیان ڕاده‌ست كرد. دوایە كه‌ تەسلیم بوو لەسەر شەرەفی سەید عەلی حیجازی بردنیان لەگەڵ خۆیان، لەوێشیان به‌ند كردن، ماوه‌یه‌كی زۆر ئازار و ئه‌شكه‌نجه‌ و هەڵواسین و له‌ كۆتایشدا ئیعدامیان بۆ دەرچوو.
«كه‌ گه‌ڕانه‌وه‌ عێراق شێخ ئه‌حمه‌د و بارزانیه‌كان ماوه‌ی گه‌ڕانه‌وه‌یان بۆ بارزان پێنه‌درا و نه‌فی كران بۆ خوارووی عێراق، جگه‌له‌ بارزانیه‌كان و ئه‌وانه‌ی له‌گه‌ڵ شێخ ئه‌حمه‌د بوون، چوار ئه‌فسه‌ره‌ نه‌مره‌كه‌ (مسته‌فا خۆشناو، عزه‌ت عه‌بدولعه‌زیز، محه‌مه‌د قودسی، خیرالله‌ عه‌بدولكه‌ریم) كه‌ خۆیان به‌ده‌سته‌وه‌دا له‌ ژووری ئیعدام توند كران، له‌به‌ره‌به‌یانی 19ی حوزه‌یرانی 1947 له‌سێداره‌ دران و ته‌رمه‌كانیان به‌شكۆوه‌ به‌ره‌و شاری ئامێدی و هه‌ولێر و سلێمانی به‌ڕێكران و له‌لایه‌ن جه‌ماوه‌ری كوردستانه‌وه‌ گه‌وره‌ترین پێشوازی له‌ ته‌رمه‌كانیان كرا.
وه‌سیه‌تنامه‌ و نامه‌ی ماڵئاوایی كه‌ ئه‌م چوار ئه‌فسه‌ره‌ به‌رله‌سێداره‌دانیان ڕوو له‌نه‌ته‌وه‌كه‌یان نووسیویانه‌ وه‌ك ژیانی پڕسه‌روه‌ریان نامه‌كه‌شیان جێگای شانازییه‌، چونكه‌ له‌لایه‌ك پڕه‌ له‌ ئامۆژگاری دڵسۆزانه‌ی نیشتمانپه‌ره‌وه‌ری بۆ ڕۆڵه‌كانی نه‌ته‌وه‌كه‌یان، له‌لایه‌كی دیكه‌ش ئاماژه‌ی خۆڕاگری و وره‌به‌رزی و بڕوای پته‌ویان به‌خه‌باتی ڕزگاری نیشتمانی و ئازادی نه‌ته‌وه‌ی كورد بوو، ئه‌وان هه‌روه‌ك له‌ژیاندا ڕچه‌شكێن بوون، له‌ مه‌رگیشدا بوونه‌ سه‌رمه‌شق و داهێنانی شێوه‌ی به‌رزی خه‌بات و گوێ نه‌دان به‌ پله‌ و پایه‌ی حكومی له‌پێناوی سه‌ربه‌ستی گه‌له‌كه‌یاندا».
ئه‌م به‌سه‌رهاته‌م هه‌موو به‌وردی نووسیبووه‌وه‌، كەمن لە خەلانێ ڕا هاتمەوە‌ گونده‌كه‌ی خۆمان، پۆلیس هه‌میشه‌ دەهاتن، ده‌وره‌یان ده‌داین، منیش لەترسی پۆلیسان شاردمەوە، گوتم جارێكی دیكە دێمەوە دەیانبینمەوە، دوایش كەچوومەوە نەما بوون، سێ‌ چوارگۆڤاری نیشتمانی تێدا بوون هەندێك جەریدەی تێدا بوون.
زۆر بیره‌وه‌ریم لەبەسەرهات و رووداو و جۆره‌ها شت له‌ عەسكەریە نوسیبوەوە، لێرە (بێتواته‌) شته‌كانم لە سندوقێكی دابوو، لە بێتواتێ‌ لەلای ڕەسوی مام خدرم دانابوو، ئه‌ویش بردبوویە مزگەوتێ‌، گوایه‌ ئه‌وێ پارێزراوتره‌ هەمووشتیان پەرت و بڵاوكردبوو، هه‌موو تێكچوو بردیان.
تێبینی: عه‌بدوڵا ساڵح عه‌بدوڵا، ناسراو به‌ (مه‌لا عه‌بدوڵای بێتواته‌)، له‌دایك بووی ساڵی 1924 له‌ باوه‌ه‌شی خێزانێكی هه‌ژار له‌ دایك بووه‌. له‌ته‌مه‌نی منداڵیدا ده‌خرێته‌ به‌رخوێندنی ئایینی، قۆناغی سه‌ره‌تایی له‌بێتواته‌ ته‌واو ده‌كات، دواتر به‌دوای خوێندندا شاره‌كانی هه‌ولێر و كۆیه‌ و گونده‌كانی هه‌رته‌ل و وه‌رتێ و چه‌ند شوێنێكی تر گه‌ڕاوه‌.
ئه‌وسا وه‌ك موسته‌عیدێكی وریا و لێهاتووی بیری نیشتمان په‌روه‌ری ده‌كه‌وێته‌ كه‌لله‌و چه‌ند به‌دوای خوێندنی ئاینی وێڵ بووه‌‌، ئه‌وه‌نده‌ش ئاشقی خزمه‌ت به‌ گه‌ل و نیشتمان بووه‌‌، كاتی دروست بوونی كۆماری كوردستان له‌مه‌هاباد، به‌ڕێبه‌رایه‌تی قازی محه‌مه‌دی نه‌مر، وه‌ك دوژمنان و داگیركه‌رانی كوردستان سه‌رسام ده‌كات، زیاتر‌یش تێكۆشه‌ران و دلسۆزانی كورد له‌ هه‌موو پارچه‌كانی كوردستان ڕاده‌چڵه‌كێنێت و دێنه‌ مه‌یدانی تێكۆشان بۆ به‌رگری و سه‌رخستنی كۆمار، كه‌وا ته‌واوی كوردی ژێرده‌سته‌ چاوه‌ڕێی ئه‌و ڕۆژه‌ بوون. مامۆستا مه‌لا عه‌بدوڵا ده‌بێته‌ پێشمه‌رگه‌ له‌ كۆماری كوردستان هاوڕێ له‌گه‌ڵ چه‌ند كه‌سێكی تری دڵسۆزی ناوچه‌كه‌یان ده‌چن له‌لای شه‌هید مسته‌فا خۆشناو ده‌بن تا كۆتایی هاتنی كۆمار‌.
لەڕۆژی 9-4-2013 بەیارمەتی مامۆستا عمر قادر جێگری لێپرسراوی مەڵبەندی 24 ڕاپەڕین، لەگەڵ سەركەوت حمید عبداللە كامێرامانی تەلەفزیۆنی گەلی كوردستان كەنالی راپەرین، چوینە بیتواتە بۆ لای مامۆستا مەلا عبداللە بیتواتە، به‌مه‌به‌ستی ئه‌نجامدانی گفتوگۆ ده‌رباره‌ی ئه‌و ڕۆژگاره‌ و چالاكیه‌كانی ڕۆژانه‌ و به‌سه‌رهاتی شه‌هید مسته‌فا خۆشناو.
هه‌زاران سڵاو له‌ ڕۆحی پاكی هه‌ر چوارئه‌فسه‌ره‌ شه‌هیده‌ سه‌ربه‌رزه‌كه ‌و مامۆستا مه‌لا عه‌بدوڵای بێتواته‌ و هه‌موو شه‌هیدانی ڕێگای ڕزگاری كوردستان.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

به‌ره‌نگاربوونه‌وه‌ و مل نه‌دان بۆ پێكهێنانی سواره‌ی حه‌میدییه‌

2-2 مل نەدانی بیتوێن و پشده‌ر بۆ پێكهێنانی (سوارەی حەمیدی) ...

freier porno porno gratis
doğubayazıt escort afşin escort afyon escort afyon escort alanya masaj salonu afyon masaj salonu efeler masaj salonu polatlı masaj salonu merzifon masaj salonu afyon masaj salonu akhisar masaj salonu akçakale escort