نەسروڵڵا: هیچ چەكدارێكی حزبەكەمان لە یەمەن نەكوژراوە – knwe.org
سەرەکی » دۆسێ » نەسروڵڵا: هیچ چەكدارێكی حزبەكەمان لە یەمەن نەكوژراوە

وەڵامی سعودیە دەداتەوە

نەسروڵڵا: هیچ چەكدارێكی حزبەكەمان لە یەمەن نەكوژراوە

دوای ئەوەی هاوپەیمانی عەرەبی بە سەركردایەتی سعودیە، كوژرانی هەشت چەكداری حزبوڵڵای لوبنانی لە یەمەن راگەیاند، حەسەن نەسروڵڵا ئەمینداری گشتی حزبەكە، رەتیكردەوە هیچ چەكدارێكیان «نە لە رۆژانی رابردوو، نە لە ساڵانی رابردووشدا لە یەمەن كوژرابێت».
حەسەن نەسروڵڵا ئەمینداری گشتی حزبوڵڵای لوبنانی لە كۆتایی مانگی رابردوو، رەتیكردەوە هیچ چەكدارێكی حزبەكەی لەیەمەن كوژرابێت، ئەوەش دوای ئەوەی هاوپەیمانی عەرەبی بە سەركردایەتی ریاز رایگەیاندبوو كە هەشت چەكداری حزبەكەی لەو وڵاتەدا كوشتووە كە چەند ساڵێكە ناكۆكی چەكداریی بەخۆوە دەبینێت.
هاوپەیمانی عەرەبی بە سەركردایەتی سعودیە، لە كۆتایی مانگی حوزەیرانی رابردوو رایگەیاندبوو كە هەشت چەكداریی حزبوڵڵای لوبنانی لە هێرشێكی ئاسمانیدا كوشتووە كە حوسییەكانی لە سەنعای پایتەختی یەمەن كردبووە ئامانج، یەكێك لە كوژراوەكانیش فەرماندەیەكی مەیدانییە.
لە 29ی حوزەیرانی 2018، حەسەن نەسروڵڵا رەتیكردەوە هیچ چەكدارێكیان لە یەمەن كوژرابێت و لە وتارێكیدا كە لەڕێگەی تەلەفیزیۆنەوە بڵاوكرایەوە رایگەیاندبوو»لەماوەكانی رابردوودا، ئێمە لەبەر هۆكار و بەرژەوەندی دیارییكراو، هیچ قسەیەكمان لەو بارەیەوە نەكردووە كە ئایا بونمان لە یەمەن هەیە یاخود نا».
بە گوتەی نەسروڵڵا»لەوێ‌ بونمان هەبێت یاخود نا، لێرەوە بەشێوەیەكی تەواوەتی رەتیدەكەمەوە كە هیچ شەهیدێكمان نە لە رۆژانی رابردوو نە لە ساڵانی رابردوو لەو وڵاتەدا نییە».
ئەمینداری گشتی حزبوڵڵای لوبنانی رایگەیاندبوو»هیچ شتێكی تر هەیە، ئێمە نە رەتیدەكەینەوە و نە دەیسەلمێنین».
نەسروڵڵا لە 20ی تشرینی دووەمی رابردوو، رەتیكردبۆوە چەكی بۆ هیچ وڵاتێكی عەرەبی رەوانە كردبێت، یان موشەكی لە یەمەنەوە هەڵدابێت.
ئەمینداری گشتی حزبوڵڵای لوبنانی دەڵێت»نە چەكمان ناردووە بۆ یەمەن و نە چەكمان ناردووە بۆ بەحرەین و كوەیت، بە هەمان شێوە چەكمان نەناردووە بۆ عیراق، چەكمان رەوانەی هیچ وڵاتێكی عەرەبی نەكردووە، نە موشەكی بالیستی و نە هیچ چەكێكی پەرەسەندوو، تەنانەت دەمانچەشمان بۆ هیچ وڵاتێك رەوانە نەكردووە».
سعودیە، حزبوڵڵای لوبنانی و كۆماری ئیسلامی ئێران بە پشتیوانیكردن لە حوسییەكانی یەمەن تۆمەتبار دەكات و دەڵێت، بە چەك كۆمەكیان دەكەن و موشەكی بالیستییان لە تارانەوە بۆ رەوانە دەكرێت، ئەو موشەكانەش دەنرێن بە باشووری سعودیەوە.
ئەمە یەكەم جار بوو، هاوپەیمانی عەرەبی لە راگەیاندنێكی فەرمی خۆیدا كوژرانی چەكدارانی حزبوڵڵای لوبنانی لە یەمەن رابگەیەنێت.
بەڵام توركی مالیكی وتەبێژی هاوپەیمانی عەرەبی لە كۆتایی مانگی رابردوو رایگەیاندبوو»ئەمە یەكەم جار نییە چەكدارانی حزبوڵڵای لوبنانی لە یەمەن دەكوژرێن كە لە ساڵی 2014وە جەنگ بەخۆوەدەبینێت».
جەنگی یەمەن لە ساڵی 2015وە بۆتە مایەی كوژرانی نزیكەی دە هەزار كەس و برینداربوونی زیاتر لە 55 هەزار كەسی تر، وێڕای دروستكردنی گەورەترین قەیرانی مرۆیی لە وڵاتەكە.
سعودیە لە مانگی ئاداری ساڵی 2015وە سەركردایەتی هاوپەیمانییەكی سەربازیی دەكات بۆ پشتیوانی دەسەڵاتەكەی عەبد رەبە مەسنور هادی كە لەسەر ئاستی نێودەوڵەتی دانپێدانراوە، و رووبەڕووی حوسییە شیعەكان بۆتەوە كە دەستییان بەسەر سەنعای پایتەخت و زۆرێك لە ناوچەكانی تری وڵاتەكەدا گرتووە.

بەپێی نەتەوە یەكگرتووەكان»یەمەن لەئێستادا گەورەترین كارەساتی مرۆیی بەخۆوەدەبینێت».
وێڕای تێپەڕینی سێ‌ ساڵ بەسەر هەڵمەتی سەربازی هاوپەیمانی عەرەبی بە سەكردایەتی سعودیە لە یەمەن، لەئێستادا ئۆپەراسیۆنە سەربازییەكان لە باشووری وڵاتەكەدا چڕتربوونەتەوە و هێزە حكومییەكان هەوڵ دەدەن شاری حودەیدە و بەندەرەكەی كۆنترۆڵ بكەن كە بە پێگەیەكی ستراتیژی بۆ گەیاندنی یارمەتییە نێودەوڵەتییەكان دادەنرێت.
سعودیە پێیوایە، ئێران و حزبوڵڵای لوبنانی بە هەموو توانایەكییانەوە پشتیوانی لە حوسییەكان دەكەن لە یەمەن، لەگەڵ ئەوەشدا ئەو موشەكە بالیستییانە رەوانەی وڵاتەكە دەكەن كە ماوەیەكە باشووری شانشینی عەرەبی سعودییەیان هەراسان كردووە.
ئەو تۆمەتانەی سعودیە، لەلایەن ئێران و حزبوڵڵاوە رەتدەكرێنەوە، بەڵام بەردەوام لە میدیاكانیاندا بە ئاشكرا پشتیوانی و هاوسۆزیی خۆیان بۆ حوسییەكانی یەمەن دەردەبڕن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

سەرۆك وەزیرانی پێشووی قەتەر: میر محەمەد قسەی باشی بۆ ناكرێت

رەوتەد بن جاسم ئال سانی، سەرۆك وەزیرانی پێشووی قەتەر پێیوانییە ...