ئیسرائیل هێزی سەربازیی زیاتر رەوانەی بەرزاییەكانی جۆلان دەكات – پەڕە 11 – knwe.org
سەرەکی » دۆسێ » ئیسرائیل هێزی سەربازیی زیاتر رەوانەی بەرزاییەكانی جۆلان دەكاتپەڕە 11

بۆ بەرگرتنە لە پەنابەرانی سوریا

ئیسرائیل هێزی سەربازیی زیاتر رەوانەی بەرزاییەكانی جۆلان دەكات

ئیسرائیل تانك و تۆپخانەكانی دەهێنێتە بەرەی پێشەوە لە بەرزاییەكانی جۆلان، لەكاتێكدا بەهۆی ئۆپەراسیۆنە سەربازییەكانی سوپای سوریاوە لە دەرعا، دەیان هەزار مەدەنی ئاوارە دەبن.
بنیامین نەتانیاهۆ سەرۆك وەزیرانی ئیسرائیل لای خۆیەوە رایگەیاندووە، وڵاتەكەی رێگە بە هاتنەناوەوەی مەدەنییەكان نادات بۆ نێو خاكی وڵاتەكەی، ئاماژە بە پێشكەشكردنی یارمەتییە مرۆییەكانیش كردبوو لە بەری ئەو دیوی سنورەكانەوە.
لە سەرەتای مانگی تەمموزی 2018، سوپای ئیسرائیل لە بەیاننامەیەكدا رایگەیاندبوو كە هێزی سەربازیی زیاتر و تانك و تۆپخانەكانی بەرەو جۆلان بەڕێخستووە، ئەمەش بەهۆی ئەو پەرەسەندنانەی لەبەری ئەودیوی بەرزاییەكانی جۆلانەوە هاتنەئارا، لە بەیاننامەكەشدا سوپا رایگەیاندووە كە ئیسرائیل پابەندە بە سیاسەتی دەستوەرنەدان.

ئاوارەكان روودەكەن سنورەكانی ئیسرائیل
ئەفسەرێكی سوپای ئیسرائیل كە بەرپرسی هەوڵە فریاگوزارییەكانە لە جۆلان رایگەیاندبوو، هەزاران ئاوارەی سوریا كە لەدەست شەڕوپێكدادانەكانی دەرعا هەڵاتوون، پەنایان بردووە بۆ ئەو گوند و ئۆردوگایانەی كە كارمەندە فریاگوزارییە نێودەوڵەتییەكان لەسەر سنور دروستییان كردوون.
ئەفسەرەكە كە پلەی موقەدەمە و نەیویستووە ناوی خۆی ئاشكرا بكات بە ئاژانسی (فرانس 24)ی راگەیاندبوو»پێموایە ئەوان وەها بیردەكەنەوە كە لەگەڵ نزیكبوونەوەیان لە سنورەكانی ئیسرائیل، بۆردومان ناكرێن و هەمان ئەو نەهامەتیانەیان بەسەردا نایەت كە لە دەرعا، یان حەلەب یان ناوچەكانی دەوروبەری دیمەشق بەسەریاندا هات».
لای خۆیەوە، بنیامین نەتانیاهۆ سەرۆك وەزیرانی ئیسرائیل رایگەیاندبوو، وڵاتەكەی رێگە بە هاتنەناوەوەی ئەو مەدەنییە سوریانە نادات بۆ نێو خاكی ئیسرائیل كە لە جەنگی وڵاتەكەیان هەڵاتوون، بەڵام حكومەتەكەی یارمەتی مرۆییان پێشكەش دەكات.
نەتانیاهۆ لە پێشەكی كۆبوونەوەكەی لەگەڵ ئەندامانی حكومەتی ئیسرائیل لە سەرەتای مانگی تەمموز رایگەیاندبوو»سەبارەت بە باشووری سوریا، بەردەوام دەبین لە پارێزگاریی و پاراستنی سنورەكانمان، بەپێی توانا یارمەتی مرۆیی پێشكەش بە ئاوارەكان دەكەین، بەڵام رێگەیان پێنادەین بێنە نێو خاكی وڵاتەوە».

پلانێكی پێشینە بۆ یارمەتی ئاوارەكانی سوریا
بۆ چەند ساڵێك دەچێت ئیسرائیل بەرنامەی پێدانی یارمەتییە مرۆییەكانی بۆ سورییەكان داناوە، ئەوەش لەڕێی سنورەكانەوە لە ناوچەی جۆلان و لەگەڵ ئەوەشدا زۆرێك لە بریندارەكانی سوریای چارەسەر كردووە.
سوپای ئیسرائیل لە سەرەتای ئەم مانگەدا رایگەیاندبوو كە لەڕێی هێڵی ئاگربەستەوە لەگەڵ سوریا، پرۆسەیەكی بە شەو ئەنجامداوە و 300 خێمە و 13 تۆن خۆراكی لەگەڵ مەوادی پزیشكی و جلوبەرگی بۆ چوار كەمپی ئاوارەكان رەوانە كردووە كە لە بەری ئەودیوی سنورەكانی سوریاوە لە جۆلان، دروستكراون.
دەیان هەزار سوری بەهۆی ئەو ئۆپەراسیۆنە سەربازییە فراوانەوە هەڵاتن كە هێزەكانی سوپای سوریا لە 19ی حوزەیرانی رابردووەوە بە پاڵپشتی روسیا لە پارێزگای دەرعا دەستیپێكردووە، تا پارێزگاكە بە تەواوەتی كۆنترۆڵ بكاتەوە، هەندێك كەمپیشی كاتیشی لە نزیك بەرزاییەكانی جۆلان دروست كردووە كە لە ساڵی 1967وە لەلایەن ئیسرائیلەوە داگیركراوە.

ئوردن یارمەتی ئاوارەكانی سوریا نادات
لەگەڵ دروستبوونی تەوژمێكی تری ئاوارەبوونی سورییەكان بەهۆی ئۆپەراسیۆنە سەربازییەكان لە پارێزگای دەرعا، بەشێكی ئەو ئاوارانە جگە لە رووكردنە سنورەكانی ئیسرائیل، بەرەو سنورەكانی وڵاتەكە لەگەڵ ئوردن رۆیشتوون، عەممان لە زاری سەرۆك وەیرانی وڵاتەكەوە رەتیدەكاتەوە بتوانن یارمەتی مرۆیی پێشكەش بەو ئاوارانە بكەن، هۆكاریی ئەوەش بۆ كەمبوونەوەی ئاستی یارمەتییەكانی رێكخراوە نێودەوڵەتییەكان دەگێڕێتەوە.
بەپێی ئاماری نەتەوە یەكگرتووەكان، زیاتر لە 600 هەزار ئاوارەی سوریا لەنێو ئوردوندان، بەڵام دەسەڵاتدارانی وڵاتەكە ئاماژە بۆ زیاتر لە 1.3 ملیۆن ئاوارە دەكەن، ئەمەش بە بارگرانییەكی زۆر لەسەر بودجەی وڵاتەكەیان دەبینن كە لەم ماوەیەی دواییدا رووبەڕووی قەیرانێكی ئابوری خنكێنەر بووەوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئەردۆغان زاواكەی دەكاتە وەزیری دارایی

رەجەب تەیب ئەردۆغان سەرۆكی توركیا، حكومەتی نوێی راگەیاند كە دانانی ...