سەرەکی » وتار » مسته‌فا ساڵح كه‌ریم‌ » كۆنگرە بۆ كاتێكی نادیار دواخرا

كۆنگرە بۆ كاتێكی نادیار دواخرا

(94)

* دەربارەی كۆبوونەوەكەی هەولێر كاك فەرهاد عەونی بە دڵتەنگییەوە لە لاپەڕە 626/ی بیرەوەریەكانیا نوسیویەتی: ((كۆبوونەوەكە بە ناكامی تەواو بوو، هەركەسە بۆ شوێنی خۆی گەڕایەوە)). دوای ڕێكەوتنمان لەسەر دواخستنی كۆنگرە، لە لاپەڕە 627 دا ڕۆژی 22/2 نوسیویەتی: ((لە یەزدانی گەورە دەپاڕێمەوە كە كوردستان سەلامەت بكات و هەموو لایەكمان دەرك بەوە بكەین كە كورد دوژمنی زۆرە)).
* ئیدی لەو ڕۆژە بەدواوە تا 9/3 هیچ جۆرە باسێكی كۆنگرە لە یاداشتەكانی كاك فەرهادا نابینرێ‌، لە لایەنی منیشەوە هیچ زانیاریەكم لەسەر وادەی كۆنگرە نەبوو، بەڵام ڕۆژانە بە كورتی لە ڕۆژژمێری خۆمدا ئاماژەم بە ڕووداوە گرنگەكانی ئەو سەردەمە داوە. شیاوی وتنە لە 22/2 وتارێكم دەربارەی كلتووری ڕێوڕەسمی خۆپیشاندانی شارستانیانە نووسی، ئەوەشم ڕەت كردەوە كە {دەسكێ‌ لە گوڵەكەی باخەكەی سەرا، كە بە خوێناوی میللەت ئاو درا}مەبەست لە بەردەركی سەرای شەشی ئەیلولە چۆن ئەبێ‌ بگۆڕڕی و بكرێ‌ بە (سەرای ئازادیی) لەنێوان ئەو دوو زاراوەیەدا جیاوازی زۆرە.
* لە 23/ی شوبات لە دیدەنی دۆستێكدا كاك صلاح الدینی موهتەدی پێی وتم: بۆ لەسەر گۆڕینی ناوی بەردەركی سەرا نەهاتویتە دەنگ كە كردویانە بە ساحەی ئازادی و سەرای ئازادی، وتم: نوسیومەو لە (كوردستانی نوێ‌)دا دەیخوێننەوە.
* ڕۆژی 9/3/2011 كاك فەرهاد عەونی لە لاپەڕە 627/ی یاداشتەكانیدا دەڵێ‌: لە ئەنجومەنی سەندیكا ((بڕیارێكی دەستە جەمعیمان دا، دیسان بۆ دواخستنی كۆنگرە بۆ كاتێكی دیكە كە بەهیچ شێوەیەك لە ناوەڕاستی مانگی مایس تێنەپەڕێ‌.))
* باسی ئەو كۆبوونەوەیە لە ڕۆژژمێری مندا بەم شێوەیە هاتوە: سەعات دەی ڕۆژی 9/3 ئەنجومەنی سەندیكا كۆبوەوە، هەرچەندە بڕیاری دواخستنی كۆنگرە بۆ جارێكی تریش درا بەڵام دەست نیشان نەكرا كەی ببەسترێ‌.
سەعات (12)لەگەڵ سكرتێری لقەكان و لێپرسراوانی نوسینگەكان كۆبووینەوە، بڕیارەكانی ئەنجومەن ڕاگەیەنراو ئەوانیش هاوڕابوون، دوای نان خواردن هەریەكەمان بۆ شاری خۆی گەڕایەوە.
* جارێكی تریش دوای 9/3 وادەی كۆنگرە و باس كردنی كەوتە گۆمەوە، ناوی نەماو باسیش نەكرا، وترابوو لە مانگی مایس تێنەپەڕێ‌ ئەوا تێپەڕی و ئەولاتریش. بەڵام لە لاپەڕە 683 دا كاك فەرهاد نوسیویەتی: وا بە هۆكاری جیاجیا كە پەیوەندی بە بارودۆخەكەوەو سەفەری دوو لە برادەرانی ئەنجومەن هەبوو بۆ دەرەوەی وڵات كۆنگرە دواخرا بۆ 19 ـــ 21/7/2011.
* لەسەر ئەم دواخستن و دەست نیشان كردنی نۆزدەی تەمووزە هەفتەی ئاییندە زۆرم قسە پێیە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

پێش سەفەر .. پێداچوونەوەیەك

(97) ڕۆژی 2/3/2011 بەڵگەنامەی پێویستم دا بە هەڵسوڕێنەری میهرەجانی بەدرخان، ...