ئه‌م كونجه‌ش

هەر بۆ (زەمان)

لەكونجێكدا لەوە دووا بووم (زەمەن) راستترە بۆ ئێمە یا (زەمان) بە پێچەوانەی نەمر محەمەد موكری یەوە كە (زەمەن) ی بەكاردەهێنا- من (زەمان) م لا باشتر بوو. كۆمەڵێك نموونەشم لەشیعری كوردی یەوە- هەر لە حاجی قادری كویی یەوە هێنابۆوەوە.
من بەردەوام دەخوێنمەوە‌و لە خوێندنەوەی هەر شتێك- سەرچاوەیەكی تازە‌و بیرێكی تازە دێتە بەردەمم و تۆماری دەکەم. ئەم پێشەكی یە (درێژ دادڕیانا) یەم بۆ ئەوەبوو كە بنووسم. لەسەرچاوەیەكدا دیم نووسراوە:
(ووشەی (زەمان) ووشەیەكی (عیبری) یە بەواتای ئەبەدیەتت‌و هەر مان)
ئەمە بەڵگەیەكیتر- خۆزگە هاوڕێم محەمەدی موكری دەماو دیخوێندەوە. هەر ئەمە دەمهێنێتە سەر باسی (عیبری) ‌و( عەرەبی) بۆ ئەوەش برای عەرەبی چاو ڕەشم (ئەمڕۆ) لێم زویر نەبن- كە كۆن لەكاتی عەرەبی خوێندنمدا. نەمر- مامۆستا كەمال ئیبراهیم- لەخانەی بەرزی مامۆستایاندا. لەكتێبەكەی خۆیدا (عمدة الصرف)، دەرسی (صرف)ی پێ دەووتین- ئەو دەرسەی لە كوردیی ئێستادا ناونراوە (گەردان).
لەو كتێبە بەنرخەی ئەو مامۆستا گەورەیەدا هاتبوو-كە (اشتقاقی ئەكبەر) ی ئیبن جنی هەیە لەوێدا (عرب-ربع- برع) هەریەكە‌و یەك مانا كۆیان دەكاتەوە. هەر بۆ ئەمەش(عەرەبی)‌ و (عیبری) دەبن بەیەك. دیارە (عەرەبی) ‌و(عیبری) ش هەردووكیان زمانی(سامی)ن بۆ ئەوەی بەنەتەوەش لەبنەڕەتدا هەریەك بووبن‌و جیابووبنەوە ئەوە موناقەشەیەكی دەوێ‌و ئێمە ئێستا لە (عەرەب) دەترسین‌و ناچینە ناو شەڕە جەنگیانەوە.
بەڵام ئەوەتا (عەرەبی) نیوەی جیهانی گرتۆتەوە‌و (عیبری) ش هەر لە فەلەستیندا هەیە كە بەشێكی ناونراوە (ئیسرائیل) ناچمە ناو ئەو باسەوە بەڵام وەك بیرەوەری ئەوە دەڵێم كە لەزانكۆی شام(جامعة دمشق) لەبەشی عەرەبیدا دەرسێكی (عیبری) مان هەبوو، مامۆستا(ربحی كمال) پێی دەووتین- كە ئەو كاتە (بێژەر) یش بوو لەبەشی (عیبری) ی رادیۆی شامدا. خۆی (فەلەستینی) بوو. بەڵام دیار بوو كە عەرەب بوو.
ئێستاش هەندێك دێڕم لە بیرماوە. رەنگە حەز بكەن بیخوێننەوە.
مامۆستا دەیووت:
هاحمور عاڤار عەل هەلگێشەر
واتە: (هاحمور-الحمار) (عاڤار-عبر) عەل(علی) (هەلگێشەر) (الجسر) أی (الحمار عبر علی الجسر) جا (كەر بەسەر پردەكەدا پەریبێتەوە یا(كەوتبێتە ناو ئاوەكەوە) چاوی دەرهات- ئێمە دەربەس نین. بەڵام كتێبی (عیبری) خوێندنەكەمان زۆر بەنرخ بوو. كە مامۆستا (ربحی كەمال) خۆی نووسیبووی. هەر لەسەرەتای كتێبەكەوە تا كۆتایی- مانای هەموو ووتەكانم بە عەرەبی نووسیبۆوە. ئەو كتێبەم لەگەڵ خۆمدا هێنایەوە عیراق. كە لە بەشی كوردیی كۆلێجی ئادابدا مامۆستا بووم. هاوكارێكم كە لەگەڵمدا مامۆستا بوو لێی سەندم‌و نەیدامەوە.
ئەو هاوكارەم لەبنەچەدا پێوەندی بە جولەكەوە هەبوو واتە ڕەگەزێكی جوولەكەی هەبوو- زۆری خۆش دەویستن. ئەو كتێبەم بەو جۆرە بمایە- ئێستا بۆ(عیبری) فێربوونەوە زۆر یارمەتیی دەدام‌و هەر بۆ زانینی زمانێكیتر سوودمەند بوو.
هەرچەندە من (گەلی عەرەبی فەلەستینم) زۆر خۆش دەوێ- بەتایبەتی كە كوردێكی زۆر شانازی كەر. بەبنەچە كوردی یەكەی خۆیەوە-سەركردەیانە: سەرۆك (ئەبو مازن-مەحموود عەبباس) بەڵام لەگەڵ ئەوەشدا ڕقم لە ڕەگەزی جوولەكە نی یە‌و هەموو گەل‌و نەتەوەیەكی سەرزەمینم خۆش دەوێ.
خۆزگە هەموو گەلان- بەراستی دەبوون بە برا‌و مرۆڤایەتی سەردەكەوت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

خاشوكچی

ناتوانم هیچ لەبارەی مەسەلەی وونبوونی جەمال خاشوكچی یەوە بڵێم. چونكە ...