ئەو رێزلێنانە رێزلێنانە لە وشەی كوردی رەسەن و هەموو ئەدەبی كوردی – knwe.org
سەرەکی » چاوپێکه‌وتن » ئەو رێزلێنانە رێزلێنانە لە وشەی كوردی رەسەن و هەموو ئەدەبی كوردی

مستەفا ساڵح كەریم بۆ سۆشیال میدیای کوردستانی نوێ

ئەو رێزلێنانە رێزلێنانە لە وشەی كوردی رەسەن و هەموو ئەدەبی كوردی

رۆژی 5/7/2018 وەزارەتی رۆشنبیریی و شوێنەوارو گەشتوگوزاری حكومەتی فیدڕاڵی عیراق بەچاودێریی فریاد رواندزی وەزیری رۆشنبیریی، ئاهەنگێكی رێزلێنانی بۆ چیرۆكنووس و رۆژنامەنووسی كورد مستەفا ساڵح كەریم رێكخست.

ئاهەنگی رێزلێنانەكە بە وتەیەكی فریاد رواندزی وەزیری رۆشنبیری حكومەتی فیدڕاڵی عیراق دەستیپێكرد كە تێیدا بەخێرهاتنی ئامادەبووانی كردو زۆر بەوردی باسی لە رۆڵ و جێدەستی مستەفا ساڵح كەریم كرد. هەروەها لەئاهەنگەكەداچەند لێكۆڵینەوەو وتارێك لەلایەن هەریەک لە د. فوئاد حەمە خورشید و د.حامید عەلوان و د. فایەق مستەفا و د.سەنا شەعلان و د. شەوقی کەریم پێشکەشکرا.
بۆ دووەمین رۆژ لەلایەن بەڕێز د.فوئاد مەعسوم سەرۆک کۆماری عیراق پێشوازیی لە مستەفا ساڵح كەریم کردو پیرۆزبایی وەرگرتنی خەڵاتەکەی لێکرد و زۆر بەبایەخەوە رۆڵی رێزلێنراوی هەڵسەنگاند.

بەدوای وەرگرتنی خەڵاتەوە نیم
دەربارەی ئەم رێزلێنان و بەخشینی خەڵاتەو هەڵسەنگاندنی ئەم هەنگاوەی وەزارەتی رۆشنبیریی مامۆستا مستەفا ساڵح کەریم وتی: پێش ئەوەی باسی ئەم رێزلێنانە بکەم، حەزدەکەم هەڵوێستی خۆم بەرامبەر بەخەڵات وەرگرتن بخەمەڕوو، من یەکێکم لەوانەی بەدوای وەرگرتنی خەڵاتدا نەگەڕاوم. پێشترو چەند ساڵێک لەمەوبەر دەزگایەک خەڵاتی دەبەخشی داوایانکرد کە سیڤی پێشکەش بکرێت، من یەكێک بووم لەوانەی کە ئەوەم رەتکردەوەو سیڤیم نەنارد، چونکە پێموایە پێویست ناکات بۆ خەلات وەرگرتن خۆم داوای بکەم. هەڵبەتە من پێشتر لەلایەن سەندیکای رۆژنامەنووسانی عیراق و سەندیکای رۆژنامەنووسانی کوردستان و چەندین دەزگای رووناکبیریی و یەکێتی مامۆستایانی کوردستانەوە خەڵات کراوم و رێزم لێنراوە. بەڵام وەکو وەزارەتی رۆشنبیریی و بەمشێوە بەرفراوان و گەورەیە پێشتر تەنها یەکجار کراوە ئەویش بۆ موزیسیان کاک دلێر ئیبراهیم سازکراوە.
وتیشی: لەم ماوەیەدا کاک فریاد رواندزی وەزیری رۆشنبیریی عیراق کە زۆر بایەخ بەم مەسەلەیە ئەدات تەکلیفی کرد کە دەبێت من لەلایەن وەزارەتەوە خەڵات بکرێم، لەئەنجامدا گەیشتینە ئەوەی کە لەم کاتەدا ئەم رێزلێنان و ئاوڕلێدانەوەیە بۆ من پێویستەو قبوڵم کرد، ئەویش لەبەرئەوەی کە لەوێ زۆربەی نووسەرو رۆژنامەنووسە عەرەبەکان من دەناسن و پێشییان وتم: کە چەند کەسێکیش لێرەوە دەتوانن بێن بۆ مەراسیمەکەو تەنها دەرفەتیش بۆ چواردە کەس هەبوو کە بریتیبوون لە نووسەران و هونەرمەندان و مامۆستایانی زانکۆ بەشدارییان کرد.
مەراسیمەکە لەدەزگای رۆشنبیریی و بڵاوکردنەوەی کوردی لەبەغدا بەڕێوەچوو، سەرەتا بەڕێز فریاد رواندزی وتارێکی بەپێزی پێشکەشکردو تێیدا باسی چالاکییەکانی منی کرد، دواتر پانێلێک بەڕێوەچوو کە کاک ئاوات حەسەن ئەمین بەڕێوەی برد، تێیدا بابەتی هەریەکە لە د. فوئاد حەمە خورشید و د. حامید عەلوان و شەوقی کەریم کە خۆیان لەوێ ئامادەبوون و بابەتی هەریەکە لە د.فایەق مستەفا کە مامۆستای زانکۆی سلێمانییەو د. سەنا شەعلان کە ئەدەیبێکی ناسراوی ئوردنییە، خۆیان لەوێ ئامادە نەبوون پێشکەشکران. دیارە وتارەکان لەسەر کاری ئەدەبی و رۆژنامەنووسی من بوون کە لە رۆژنامەی ژین-ەوە خۆبەخشانە کارمکردووەو کاری خەبات و تێکۆشانی سیاسی و هەروەها لایەنی کاری پەروەردەیی کە من ماوەی 32 ساڵ مامۆستا بووم و پاشان بەڕێوەبەرو دواتریش سەرپەرشتیاری پەروەردەیی بووم پێشکەشکرد، دیارە ساڵی 84 لە کۆڕێکی فراواندا لەگەڵ هەریەکە لە شێرکۆ بێکەس، رەووف بێگەرد و چەند برادەرێک رێکەوتین کە لەو کۆڕەدا من قسە بکەم، دواتر لەکۆڕەکەدا داوای چەند شتێکم کرد لەوانە ئازادکردنی هونەرمەند (قادر کابان) کە ئەوکاتە دەستگیر کرابوو، هەروەها داوامکرد کە سانسۆر نەمێنێت و ئا لەم بابەتانە، دوای قسەکانم بوو بەچەپڵەڕیزان، بۆیە لێپرسراویكی بەعس ئەوکات نەجم عەبدوڵڵا عیراقی دەستیکرد بەقسەکردن و قسەپێوتن بەیەکێتی نیشتمانی کوردستان و بەڕێز مام جەلال، دوای ئەوە منیش داوامکرد قسە بکەم هەستام و وتم: ئەو لایەنەی تۆ رەخنەیان لێدەگریت و باسیان دەکەیت رەنگە چەند مانگێکی تر لەسەر مێزی گفتوگۆ دابنیشن دانووستان بکەن، لەبەرئەوە سیاسەت فەنی مومکیناتە، بۆیە دەبێت ئیعتیبار بۆ ئەو لایەنە بگەڕێنیتەوە پارسەنگی سووکی نەخەیتە پاڵی، ئەگەرنا چۆن سبەینێ لەگەڵی دادەنیشیت، دیسان ناو هۆڵەکە بووەوە بەچەپڵەڕێزان. دوای ماوەیەک لەبواری پەروەدە دەریانکردم لەوێ نەمام. دیارە ئەمانە هەمووی قۆناغەکانی ژیانی من بوون کە لەم پانێلەدا باسکران و من شانازییان پێوەدەکەم. سوپاسی کاک فریاد رواندزی و وەزارەتی رۆشنبیری و هەموو ئەو کەسانە دەکەم کە بۆ سازکردنی ئەم مەراسیمە ماندووبوون.

رۆژێکی مێژوویی
هەروەها بۆ رۆژی دواتریش کە 6ی مانگ بوو، لەلایەن بەڕێز د. فوئاد مەعسوم سەرۆک کۆماری عیراق-ەوە داوەتکراین کە وەزیری رۆشنبیریی و کاک ئاوات حەسەن ئەمین و ئەو ژمارە ئەدیبەی میوانی مەراسیمەکە بوون ئامادەی ئەم داوەتە بوون، بێگومان من شانازی بەو تەشریفە وە دەکەم کە بەڕێز د. فوئاد مەعسوم نواندی، هەروەها شانازی بەقسەکانییەوە دەکەم کە لەو بۆنەیەدا لەسەر من کردی، چونکە بەڕێزیان من لەنزیکەوە دەناسێت و بۆ من رۆژێکی مێژوویی بوو، و سوپاسی هەموو ئەو بەڕێزانەش دەکەم کە بە تایبەت بە ئەو بۆنەیە بانگهێشتکرابوون.
وتیشی: ئەو رێزلێنانە تەنها بۆ خودی خۆم نییە، بەڵكو رێزلێنانە لە وشەی كوردی رەسەن ئەدەبی كوردی.

دەنگی من لە قەڵای دمدمەوە دەستپێدەکات
سەبارەت بەجیاوازی ئەم خەڵات و رێزلێنان و خەڵاتکردنەو، ساڵی 1957دا کە مامۆستا مستەفا ساڵح کەریم لەسەرەتای کاری ئەدەبییدا خەڵاتی دووەمی بۆ چیرۆک پێبەخشراوە، وتی:جیاوازییان زۆرزۆرە، چونکە ئەوە سەرەتای چیرۆک نووسینم بوو، دوای ئەوە ئەو چیرۆکانەی کە لە سەردەمی بەعسدا نووسیوومن شانازییان پێوە دەکەم بریتیبوون لە: رەشپۆشێکی جیهانی چوارەم، مەلەکان بەرەو کوێستان دەگەڕێنەوە، قەڵەم، پردی وەنەوشە، شێخی چۆلی، تەیرەن ئەبابیلە، مەلەکان بەرەو کوێستان دەگەڕێنەوە کە هەموویان سیاسی بوون و لەقاڵبێکی سیاسیدا داڕێژراون و لەسەردەمی بەعسیشدا نووسیومن، واتە ئەدەبی بەرگریی بوون.
دیارە ئەوکاتەی کە باست کرد، سەرەتام بوو لەکاری ئەدەبیدا، هێشتا دەنگی تایبەتی خۆم نەبوو، بەڵام دەنگی تایبەتی من لە دوای ئەوەوەیەو لەوێوە دەستپێدەکات و شانازی بەوەوە دەکەم کە ئەو سەردەمە مامۆستا برایم ئەحمەد بۆ یەکەمجار زۆر هانیدام و شەهیدانی قەڵای دمدمم نووسی کە لەلاپەڕەکانی مێژوودا ئەو رووداوانەی هەبوون خستمنە سەر کاغەزو کردمە رۆمانێکی کورت، بەڵام بەقاڵبێکی ئەدەبی و سیاسی و مێژوویی هەتا رۆمانسییەتیشی تێدابوو.
لەکۆتاییدا مامۆستا مستەفا ساڵح کەریم سوپاسی بەڕێز د.فوئاد مەعسوم سەرۆک کۆماری عیراق و فریاد رواندزی کرد کە هەریەکەیان لای خۆیەوە گرنگییان بەم بابەتە داو ئەویان بەسەر کردۆتەوە، هەروەها سوپاسی کوردستانی نوێی کرد بۆ گرنگیدانیان بەم بابەتەو سوپاسی هەموو ئەو بەڕێزانەشی کرد کە بەتایبەت پیرۆزباییان لێکردووە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

له‌ به‌رژه‌وه‌ندیی عیراقدا نییه‌ هاریكاریی لایه‌نێك بكات دژی لایه‌نێكی تر

د.فوئاد مه‌عسوم سه‌رۆك كۆمار له‌ چاوپێكه‌وتنێكی ته‌له‌فزیۆنیدا له‌گه‌ڵ كه‌ناڵی (الحره‌ ...