ئێستاش من له‌به‌غدا خه‌ون ده‌بینم* – knwe.org
سەرەکی » ئاراستە » ئێستاش من له‌به‌غدا خه‌ون ده‌بینم*

ئێستاش من له‌به‌غدا خه‌ون ده‌بینم*

ئه‌م وێنه ‌شیعریه ‌پێشکه‌شه ‌‌به‌هه‌موو ئه‌و به‌ڕێزانه‌ی که‌له‌م ده‌قه‌دا ناویان هاتووه‌و ناویان نه‌هاتووه‌و خۆله‌نێو ئه‌م فه‌زایه‌دا ده‌بیننه‌وە.
***
لەگەڵ سەرەتای شەڕی ئیران و عێراق و بۆ ماوی چوار ساڵی یەکەمی بەردەوامی شەڕ ..ئێمه‌‌نەوەیەک له‌‌زانکۆکانی به‌غدا بەهاوخەمی یەکمان گرتەوه‌، لەنێو هه‌موو ئاستەنگه‌‌دەروونی و ئابووری و نەتەوەییەکانی ژێر دەسەڵاتی به‌عس وترس و دڵەڕاوکێی بەردەوامی ڕۆژانه‌، بەهه‌ر دەرده‌سەرییەک بوو زۆربەمان خوێندنمان تەواوکردو ئیستا زۆربەیان کەسانی دیارو لێهاتوون و ناودارن و لەکوردستان خەریکی خزمەتن . وەک وەفایەک بۆ ئەم بەڕێزانەو وەک هۆیەک بۆ له‌بیرنەکردنی ئەم ڕۆژگاره‌بەم هه‌موو خەونەی که‌ئێستاش هه‌رلەبەغدا دەیبینم ، بەم وڕینه‌شیعریه‌وێنەکانی ئەو ڕۆژگاره‌‌دەخەینەوه‌‌بەرچاوی نەوەکانی ئێستاو داهاتوو .

مه‌ولود ئیبراهیم حه‌سەن

ئه‌مجاره‌ش
له‌که‌مینی پرسگه ‌‌ڕزگارمان بوو
گه‌یشتینه‌‌ مه‌یدان
له‌گه‌ڵ سۆفی و (١)
شه‌یداو(٢)
ئازاد(٣)
له‌خواردنگه‌یه‌کی لاپه‌ڕ
نانێکی هه‌رزان ده‌خۆین
چایه‌ک له‌زه‌هاوی (٤)
ڕۆژنامه ‌له‌په‌رله‌مان ده‌خوێنینه‌وە(٥)
قاوه‌یه‌ک له‌موڕه‌به‌عە(٦)
به‌یانی ڕۆژی یه‌که‌می پێشانگای نێو ده‌وڵه‌تی کتێبە
ده‌بێ ئه‌م هه‌فته‌یه ‌ده‌ست به‌ نانخواردنه‌وه ‌‌بگرین
هه‌ژاری چووەته ‌‌خوێنمانەوە
ئه‌مرۆ گوشاد له‌ هاوکاری (٧+٨)
چیرۆکه‌ وه‌رگێڕاوه‌که‌ی بڵاوکردبووه‌وە
شیعریکی تازه‌ی له‌تیف ده‌نگی داوه‌ته‌وه‌(٩)
چیرۆکی سه‌رکه‌وتن به‌ره‌و خواره‌وه‌ی سه‌روه‌ر (١٠)
عه‌رد هه‌ژێنێکه ‌‌له‌ گۆڤارێکی عه‌ره‌بی دا
ئێواره‌ قه‌ره‌داغی تای شیعری گرتبوو(١١)
به‌یانی ئه‌مرۆ ناسر بڵاوکراو‌ی له‌ده‌ست گیرا(١٢)
گیراو تا ئێستا نه‌گه‌ڕاوه‌ته‌وە
عه‌بدوڵلا گۆران گوتی: با بچین چایه‌کی سه‌ر خه‌لوز بخۆینه‌وه‌(١٣)
نه‌ژاد له ‌شوێنه‌وار نوێنه‌ری هه‌موو کورده‌(١٤)
زۆر ته‌نیایە
عه‌سر گه‌ڕامه‌وه ‌‌په‌تاته‌و ته‌ماته‌و کودووم کڕیبوو
بۆنی بریانی سه‌ردار ناوخۆی پڕکرد(١٥)
برا چاو ڕه‌شه‌کان به‌شی ئێمه‌یان که‌مکرده‌وە
به‌یانی ژنه‌کەی بەشی ناوخۆ به‌کوڵ ده‌گریا (١٦)
بازنه‌ زێڕەکانی دەستی نەمابوون
فه‌رمانبه‌ره‌ میسریه‌که ‌‌دیار نه‌بوو
وێنه ‌گه‌وره‌که‌ی سه‌رۆک له‌به‌رده‌م ناوخۆ
شه‌و چاوێکی له‌ده‌ست دابوو
ماشێنه‌کان تیژ تێده‌په‌ڕێن
ڕێبواره‌کان سه‌ریان داده‌خست
سه‌رۆک به ‌چاوێکه‌وه ‌زۆر توڕه‌تر دیار بوو
له ‌پرسگه‌ هه‌موو گیانیان پشکنین
به‌رده‌رگا جمه‌ی ده‌هات
ترس بڵقی ده‌دا له‌کۆلیژ
حوسه‌ین عه‌لی مه‌حفوز گوتی ئاگات له‌خۆت بێ کوڕم(١٧)
ئه‌مین موتابچی دووجار بانگی کرد مەولود بابه‌ بابە(١٨)
هاشم گوتی بچیته‌ده‌رەوه‌ باشتره‌(١٩)
ئه‌میر به‌سه‌ر دیواری بازی دابوو (٢٠)
کچان دابوویانه‌قاقای پێکه‌نین پانتۆله‌که‌ی ته‌قی بوو
سه‌ر هه‌ڵدەگرم وده‌چمه ‌قه‌مبه‌رعه‌لی (٢١)
له‌کۆڵانێکی بنبه‌ست
یازده‌ هه‌والی مه‌رگ ده‌خوێنمه‌وە
کۆڵانه‌که ‌بۆخۆی بووه ‌‌به ‌‌دۆزه‌خ
شه‌هیده‌کان ده‌چنه ‌‌به‌هه‌شت
پیرەژنه‌که‌‌ گوتی وه‌لعه‌باس مالمان خراو بی(٢٢)
بوکه‌‌یه‌ک مانگیه‌که‌‌ زمانی گیرابوو
منداڵه ‌تازه‌‌ زمانگرتووەکە
داوای باوکی ده‌کرد
پیره‌مێرده‌که ‌خه‌ریکی وه‌رگرتنی
شه‌هیدانه‌ی کوڕه‌که‌ی بوو
زه‌نگی هاتنی فرۆکه‌‌لێیدا
شه‌قام و کۆڵان هه‌تیو که‌وتن
رادیۆی چایخانه‌که‌‌ هاواری ده‌کرد ئاگاداربن ئاگادار
ته‌له‌فزیۆن ده‌یگوت
دوژمن له‌هه‌موو به‌ره‌کان شکاوە
نه‌ته‌وه‌یه‌کگرتووه‌کان داوای ڕاوه‌ستانی شه‌ڕی ده‌کرد
ئه‌مریکا چه‌کی تازه‌ی داوه ‌‌به‌عێراق
دوێنێ به‌زۆر ڕیشی کوڕه‌ هه‌له‌بجه‌ییه‌که‌یان تراشی بوو(٢٣)
ده‌یگوت نوێژ ناکه‌م تا خوا حه‌قم نه‌کاتەوە
وێنه‌ی وشتری سه‌رگرده‌که‌ی کێشابوو هاشم (٢٤)
گوتی ڕاسته ‌‌مامه‌ڕیشه خه‌ریکی گفتوگۆیه‌(٢٥)
ده‌ڵێن حکومه‌ت قوشته‌په‌ی له‌بارزانیان چۆلکرد(٢٦)
کورده‌ فه‌یلیه‌کان به‌جلی ماڵه‌وه‌ ڕاپێچی سنوور کراون(٢٧)
یازده‌هه‌زار گه‌نجیان گواستەوه‌‌بۆ کارگه‌ی مه‌رگ
ئه‌مرۆ گوتیان موالیدیان ڕاکێشاوە
کامه‌ران له‌کلاس گوتی تۆش ده‌گرێته‌وه‌ عائیدونی(٢٨)
هه‌فته‌یه‌ که‌سامی بزرە(٢٩)
دوێنێ هیوایان له‌ژووری سه‌ندیکا سوور کردبوه‌وە(٣٠)
وابزانم سبه‌ی نۆره‌ی منە
ئه‌وهه‌فته‌یه‌‌ چوومه ‌‌ئه‌بوغرێب(٣١)
چوار به‌ندی نه‌مابوون
چه‌ند گه‌نجێکی تازه‌یان هێنابوو
کابرای ئینفیرادی هه‌ر له‌ناو قه‌فه‌س بوو
ده‌رگا داخراوه‌که‌ هێشتا نه‌کرابووه‌وە
به‌ندیه‌‌شێت بووه‌ که‌هه‌ر جوێنی ده‌دا
خه‌له‌ف جه‌للاد له‌‌ناوه‌ڕاست ساحه‌که‌‌ ڕاوه‌ستابوو
به‌ندییه‌ک به‌ڕووتی سه‌ره‌و ژیر سزا ده‌درا
عروبه ‌هه‌موو جارێ پێم ده‌ڵێ: خۆشه‌ویسته‌که‌ت له‌چیایە(٣٢)
سه‌میره‌‌ دیسان ڕۆژنامه‌که‌ی بردم(٣٣)
بورجی خۆی ده‌خوێنێنته‌وە
ئه‌و بورجانه‌ی شادو غه‌مگینی ده‌که‌ن
ئای سه‌میره ‌هاوکلاسه‌که‌م
شادی و خه‌می تۆ چه‌ند ئاسانە
سالم پۆرتریتی وشه‌ی هێنایه‌وه‌(٣٤)
ئه‌مجاره‌‌ وێنه‌ی منی کێشابوو
عه‌باس ئێستا زۆرشه‌رمم لێده‌کات (٣٥)
جاسم له نوکته ‌‌ناکه‌وێ (٣٦)
مامۆستای نابینا ده‌ڵی ئه‌سکه‌نده‌ر دانیشە(٣٧)
گه‌نجێکی پۆله‌کامان له‌نوێ ئاشق بووە
کلاس بۆنی ئه‌شق و ترسی لێدێت
مه‌ها سێ ڕۆژه‌ غائێبە(٣٨)
براکه‌ی مانگێکه ‌بێ سه‌رو شوێنە
دیسان مامۆستای ڕۆشنبیری نه‌ته‌ویی نمره‌که‌ی منی دابه‌زاندووە
رائید فایه‌ق گوتی بۆچی نه‌چوویته‌‌ به‌شی کوردی
منیش گوتم ئه‌ی تۆ بۆ نه‌چوویته‌ به‌شی عه‌ره‌بی
تیشکی چاوەکانی وەک گولـله ‌وابوون
ئێستاش من هه‌موو به‌یانیه‌ک له‌به‌غدا له‌خه‌و هه‌ڵده‌ستم
له‌به‌غدا ده‌گه‌ڕێمه‌وه‌‌ ماڵ
له ‌به‌غدا ده‌خه‌وم
هه‌موو خەوێکم گۆڕەو شارێکە
هه‌فته‌ی پێشوو له‌‌شه‌قامی موته‌نه‌بی
پرسیاری کتێبی فارسیم له ‌‌پیره‌میرده‌که‌ کرد(٣٩)
خه‌ریک بوو خوێنی ڕاوه‌ستێ
سبه‌ینێ ژنه‌ مه‌سیحیه‌که‌‌ جاریکی تر
ده‌رگای کتێبخانه‌ی ڕۆژهه‌ڵاتم به‌سه‌ردا داده‌خات
سبه‌ی ئیواره‌فاروق کۆڕی فه‌لسه‌فه‌و ژیان پێشکه‌ش ده‌کات(٤٠)
حه‌مه ‌‌شوان دیسان خۆی ئاماده‌کردووە(٤١)
کوڕه‌که‌ی به‌شیر موشیر دەپرسێ ڕۆژنامه‌ی خه‌بات هاتووە(٤٢)
ڕۆژی دووشه‌ممه ‌‌گه‌نجه‌کان کچه ‌کوردێکیان له‌گه‌ل ڕەشپیستیک دیبوو
شه‌و هه‌موو شەو خه‌ویان لێ نه‌ده‌که‌وت
زه‌هرای فه‌له‌ستینی به‌ چاوه‌ جوانه‌کانی ڕۆژباشی لێکردم(٤٣)
ئه‌منه‌که‌ هه‌ردوو چاوی زه‌ق کرده‌وە
له‌به‌رده‌م ژووری سه‌ندیکا ئاوڕ نه‌ده‌نه‌وە
ده‌رگای ژووری سه‌ندیکا کراوه‌ته‌وە
دوێنێ هیوایان تێدا سوورکردبووه‌وە
ده‌ترسم سبه‌ی نۆره‌ی من بێت
هه‌ردووکمان سه‌یری یاری کردنی قوتابیان ده‌که‌ین
ڕزگار نازانم مرۆڤ یابسه ‌‌بخوات چۆن ده‌توانی ئه‌وه‌نده ‌غار بدات(٤٤)
دوو کێلۆ په‌نیرم خستبووه ‌ناو به‌سته‌نیه‌کە
هیچیان بۆ نه‌هێشتبوومه‌وە
ئێواره ‌له‌گه‌ڵ هه‌ولێر قسه‌ مکرد گوتیان نه‌که‌ی بێیته‌وە
خودایه ‌‌شه‌وی پینج شه‌ممه‌و هه‌ینی
به‌‌ته‌نیا له‌به‌شی ناوخۆ چۆن ڕۆژ ده‌کرێته‌وە
نه‌ورۆز كه‌گه‌ڕامه‌وە
له‌بازگه‌ دوو سه‌عات ڕایانگرتم
له‌ پیناسه‌که‌م نووسرابوو به‌شی فارسی
ئه‌مجاره‌ش جانتاکه‌م هه‌ڵده‌گرم و خوێندن به‌جێده‌هێلم
سۆفی په‌شیمانم ده‌کاته‌وه‌(٤٥)
دوا ڕۆژی دوا تاقیکردنه‌وه‌ی دوا ساڵە
ده‌وری دووه‌مه‌و که‌وتووم و به‌تاقیکردنه‌وه ‌ڕاناگه‌م
بنووسه‌‌ هاوین دێمه‌وه ‌بۆ مه‌شق
ناینووسم
بنووسه‌ هاوین نایێمه‌وە بۆ مه‌شق
ناینووسم
بنووسه ‌ناینووسم
ناینووسم ..ناینووسم.. ناییننوووسمممم
باشه‌ من ده‌زانم چیت لیده‌که‌م
پێنج ساڵه ‌بروانه‌مه‌که‌م وه‌رنه‌گرتووته‌وە
مامۆستا چاودێره‌که‌م به‌چاوی پر فرمیسکه‌وە
وه‌ک کوڕی خۆی له‌باوه‌شیم ده‌گرێ وماچم ده‌کات
کوردەکان زۆر به‌ڕێزن
سامی هه‌موو به‌یانیه‌ک پیم ده‌ڵێ(٤٦)
هیواخوازم هه‌ردوو چاوم کوێر بێت و جوو ببینم کورد نه‌بینم
ده‌ی به‌وچاوانه‌ی حه‌زده‌که‌ی جووی پێ ببێنی منی کوردیش ببینە
توانا به‌‌ له‌هجه‌ی به‌غدایی دایده‌گرێ(٤٧)
سامی له‌‌و ڕۆژه‌وه‌‌ سام گرتوویه‌تی
رائیدەی مامۆستای ئازه‌ری (٤٨)
مه‌ولود کورده‌کان چۆ نه‌‌زیره‌ک و جوان و هێمنن
هۆی جوانیه‌که‌نازانم
به‌ڵام هێمنی و زیره‌کیه‌که‌‌ هۆی بێ پشتیە
دکتۆر زیاب چوار ساڵه ‌هه‌موو پرسیاره‌کانی خۆی (٤٩)
له‌ برام مه‌ولود دا کۆکردووته‌وە
محه‌مه‌د نوری ئه‌گه‌رهاتی بۆ میسر ئه‌مه ‌‌ناونیشانمه‌(٥٠)
له ‌به‌رده‌م وه‌زاره‌ت تۆپه‌کی ده‌سکردی وه‌ستا ڕه‌جه‌ب داندراوه‌(٥١)
سه‌ربازه‌که ‌نه‌یهیشت وینه‌یه‌کی له‌ته‌ک بگرین
له‌وبه‌ر سه‌یری ئه‌و کچ و کوڕه‌م کرد که ‌نه‌ده‌گه‌یشتنه‌‌یه‌ک(٥٢)
عه‌بدولهادی شه‌س ساڵ خۆی دواخست(٥٣)
دواجارکردیان به‌سه‌ربازو کوژرا
ئه‌م به‌یانیه‌ کوڕه ‌ئیتیحادیه‌که‌یان به‌ڕووتی له‌گه‌ڵ ژنه‌فه‌ڕاشه‌که‌‌ گرت
شه‌و ژووری هه‌موو قوتابیه‌‌ کورده‌کانیان ورد پشکنی
که‌‌ گه‌ڕاینه‌وه ‌دەوام سه‌روه‌ر (٥٤)
لیستی هه‌موو ئه‌و ڕۆمانانه‌ی پیشاندام که‌هاوین خوێندبوونیه‌وە
من هه‌رچوار مانگ خه‌ریکی کرێکاری بووم
چاوت ‌جوانه ‌له‌یلا
خان و مانه‌‌ له‌یلا هێی هێی(٥٥)
هه‌ره ‌‌له‌یلێ هه‌ره ‌‌له‌یلێ
ئۆۆۆۆف هاوار له‌یلی هاوار له‌یلێ(٥٦)
ئه‌م کوردانه‌‌ هه‌موویان گۆرانیبێژن
هه‌مووشیان خزمی یه‌کترن
ماویه‌کی زۆره ‌‌ڕزگار نایه‌ته ‌دەوام (٥٧)
ئه‌ویش به‌دەردی گه‌نجه ‌فه‌یلیه‌کان چوو
سامان کاک مه‌ولود که‌سیان نه‌هێشتووە(٥٨)
که‌نتۆره‌که‌ی به‌رامبه‌رم وێنه‌ی سه‌رۆک و سه‌باح میرزای به‌سه‌ره‌وه‌یە
شه‌و ده‌ست به‌دامانچه ‌‌له‌وێنه‌که‌وه ‌‌دێنه‌ده‌ره‌وە
سەرۆک مه‌ولود دەتبینم نووستووی
سه‌باح هه‌سته‌وه‌ ئه‌مه ‌سه‌رۆکی فەرمانده‌یە
ئممم ئمم ئم
سۆفی کاک مه‌ولود چییه ‌‌بۆچی خه‌وت لێناکه‌وێ
ئێستاش من هه‌موو شه‌وێ له‌به‌غدا ڕاوم ده‌نێن
له ‌بەغدا تەقەم لێدەکەن
لە بەغدا له ‌بەندیخانەم
هاشم مەتەڕ گوتی
ئاگاداری ئەم دەشتی پڕ له‌چاوی تیژو گوێی سوک بە
ئه‌مڕۆ ئه‌مرۆ زۆر بێ تاقه‌ت بوو(٥٩)
ئه‌وه‌ته ‌به‌ده‌ل مزووری (٦٠)
خه‌ریکه ‌‌به‌ڕووسی نوکته ‌بۆ کچه‌عه‌ره‌به‌که‌‌ ده‌گێڕیته‌وە
ئای ئافره‌ت چ هه‌وێنێکە
به‌ده‌ل چۆن ئاوا هێمن دانیشتووە
گەنجەکەی بەشی شەریعه ‌‌بەردەوام له‌هاوینی بەغداش
دوو پانتۆل و دوو کراس و دوو بلوزو دوو چاکەت
له‌سەر یەک لەبەر دەکات و دوو جگارەش پێکەوه ‌دەکێشێ
دیسان به‌تاقیکردنه‌وه ‌‌ڕانه‌گه‌یشتم
دوا ڕۆژو دوا تاقیکردنه‌وه‌یە
سه‌د جاره ‌ئه‌م خه‌ونه ‌ده‌بێنم و ده‌بینمه‌وە
ئیسماعیل کاک مه‌ولود با به‌عه‌ره‌بی قسه ‌بكه‌ین (٦١)
تێتناگه‌م نا ئیسماعیل ل مال چه‌وا دئاخڤی هۆسا گه‌ل من ب ئاخڤە
یوسف بانگی کرد ها برایێ من مه‌ولود (٦٢)
خودێ خودی تو فیلی فیل
به‌داخه‌وه ‌مامۆستا فارس ئه‌و گه‌نجه ‌‌هێمنه ‌‌کوژرا
وابزانم یوسفیش(٦٣)
تاهیرم بینی به‌برینه‌وه ‌پێیده‌که‌نی (٦٤)
ست نه‌رمین فه‌رهه‌نگه‌که‌ی ئه‌دمۆنزو تۆفیق وه‌هبی بۆ هینابووم (٦٥)
جاری سێیه‌مه‌ دیوانه‌که‌م ڕه‌تده‌کرێته‌وە
ئه‌مڕۆکه‌ش ده‌چمه‌ گفتوگۆی ئه‌و نامه‌یه‌ی
که‌مال مه‌زهه‌ر سه‌رپه‌رشتی ده‌کات(٦٦)
نیوه‌ڕۆ کچ و کوڕانی به‌شی یاسا هاتبوون
ده‌یانگوت هاتووین ژن به‌ژنیێ بکه‌ین
ئه‌م هه‌ینییه‌‌ ده‌چینه ‌‌تاقی کیسرا(٦٧)
هه‌تاو له‌سلیمانیه‌وه ‌‌مه‌نجه‌لێک کفته‌ی هێناوه‌(٦٨)
غه‌ریبه ‌‌له‌‌به‌شی ناو خۆ ویستوویه‌تی خۆی بکوژێ(٦٩)
ماڵی باوکی ئاگادارنین
سه‌لیم پاره‌ی بزرکردبوو
شه‌ڕ ده‌ستیپیکرده‌وه‌و له‌نه‌وتی که‌رکوکیانداوە
گفتوگۆ سه‌ری نه‌گرت
سه‌عات پێنج ڕێگا داده‌خری
له‌گه‌ڵ ئه‌لیس شه‌و سه‌عات دوو گه‌یشتین (٧٠)
ئەو سەیارەی له‌گەراج سواربووین
دەرکەوت هی ئەمن بوو
ئیستاش هه‌موو به‌یانیه‌ک من له‌‌ به‌غدا له‌خه‌و هه‌ڵده‌ستم
له‌کافتریا شۆربایەکی نیسک
چایەیەکی سەر ڕەژوو لای ئەبو سەباح
به‌دزییه‌وه‌‌ سینه‌م پڕ ده‌که‌م له‌بۆنی گوڵه‌ کنیرو عه‌تر
بوشره‌ هه‌موو به‌یانیه‌ک گوڵێکم بۆ دێنێ
کچه‌‌ به‌غدایی به‌گوڵه‌وه‌ جوانترن
به ‌ته‌نیا له‌زه‌هاوی دانیشتووم
له‌ کۆلیژه‌وه‌‌ به‌دواوەمن
چاکه ‌ناخۆمه‌وه‌و هه‌ڵده‌ستم
مامۆستایه‌کمان ئیستاش ناوێرێی بڵێ من کوردم (٧١)
سبه‌ی ده‌چێنه ‌سه‌ردانی مارف عومه‌ر گول
ده‌ستێکی کارناکات (٧٢)
مه‌هداوی به‌شی ڕوسی له ‌ترسا فه‌رهه‌نگه‌که‌ی ‌جێهێشت (٧٣)
ئاوات له‌کوێی تا چوارینه‌کانی بابا تاهیرو خه‌یام (٧٤)
به‌یه‌که‌وه‌ بخوێنینه‌وە
بوره‌ حاله‌م بوین ته‌دولبه‌ر
دڵه‌م ته‌نگه‌‌شه‌وێ وامۆ بسه‌ربه‌ر
نه‌هرۆ تەنیا گەنجێک بوو(٧٥)
ژیان به‌کۆمیدیا تیدەگەیشت
نوکته‌‌ زۆرو بەردەوامەکانی عه‌بدوڵڵا(٧٦)
زەردەخەنەکانی جەوادی نه‌دەگەیان ده‌دڵ(٧٧)
تالیب شەو ڕۆمانی هه‌شتاو چواری تەواوکرد(٧٨)
بەیانی دەستی به‌خوێندنەوەی سەرۆکی فەرمانده‌کرد
سمکۆ زۆر بێ تاقەت بوو(٧٩)
بەخراپی باسی مێژووی کوردی کردبوو دکتۆر
عەزیز گەردی له‌زانکۆی موسڵەوەو هاتبوو(٨٠)
ئەدەبی بێگانانی خستبووه ‌ژێر چاپ
خاره‌ جه‌عفەر به‌چاوی پڕ فرمیسکەوه ‌‌نانی بۆ نەدەخورا(٨١)
ئەمڕۆ رۆژی شەهید بوونی باوکی بوو
پاش نێوه‌ڕۆی ئەمڕۆ له‌گەڵ حسام و سەید محه‌مەد (٨٢)
پێکەوه‌‌ له‌ که‌باب ئەربیل نان دەخۆێن
سەید بەردەوام هه‌واڵی دەگمەن و نهێنی پێیە
هه‌موو هه‌ورازو نشێوه‌کانی ژیان و ڕەشەباکانی ڕۆژگار
نەیانتوانی هێمنییه ‌هه‌میشەییەکەی حامید بشێوێنن (٨٣)
موزەفەر ئاغایەتیەکەی به‌ڕوویەوه ‌دیارەو(٨٤)
به‌هێمنییه ‌کرمانجیەکەیەوه ‌‌زۆر جوانە

ئەحمەد زۆر هه‌وڵدەدات به‌زەردەخەنه‌ بەردەوامەکەی(٨٥)
خەمەگران و بەرچاوەکەی خۆی بۆ ناشاردرێتەوە
هه‌موو شەوێک من له ‌به‌غداوه‌ خەون دەبینم
له ‌بەغدا ڕاوم دەنێن
له ‌به‌غدا تەقەم لێدەکەن
له ‌بەغدا دەمخەنه‌ بەندیخانە
چی بکەم تا له ‌ڕابردووەوه‌ بێمەوه‌ ئێستا
چی بکەم له ‌بەغداوه‌ بێمەوه ‌بۆ ئێرە
بەدەست خۆم نییە
من ئێستاش هه‌ر له ‌به‌غدا دەژیم
هه‌موو بەیانیەک له ‌بەغدا لەخەو هه‌ڵده‌ستم
ڕابردوو بەرم نادا
ئیستا نامگرێته ‌خۆ
داهاتوو نایه‌ت
من لێره ‌نیم
من له ‌ئێستا ناژیم
چی بکەم من تا له ‌ڕابردووەوه ‌بێمه‌وه‌ ئێستا
چی بکەم لەوێوه ‌بێمەوه ‌بۆ ئێرە
من ئەو بووم، ئەو من نیم
ئەو من بوو، من ئەو نیم
چ لێکدابڕانێکە!
چ له‌تبوونیکە!
چۆن بێمەوه ‌سەریەک
چۆن ببمەوه ‌به‌خۆم
چۆن بێمەوه‌ ئێستا
چی لەم رابردووه‌ ئێستا کوژه‌بکه‌م
چی لەم ئێستا ون بووه‌ بکه‌م
ئێستام بووه ‌به‌ خەونی ڕابردوو
ڕابردووی خەونم بووه ‌به ‌ئێستا
ژیان نامگرێته‌خۆ
خەونی ڕابردوو کوشتمی
من کێم و له ‌چ شوێنێکم

١٢/٢٠١٧ – هه ولێر

(*) ئەم وڕێنەیه ‌شیعرێکی میژوویی پچرپچڕه ‌له ‌خەونه‌ بێ سه‌رو بەرەکانی ئێستام دەچێ. خاڵبەندی و هونەرێکی شیعر نووسینی تێدا بەکار نەهاتووە. بەرهه‌می چوار ساڵ خوێندنی زانکۆیە، ڕێک لەگەڵ دەستپێکردنی شەڕی ئێران-ئێراق١٩٨٠- ١٩٨٤ و وه‌ک کوردێک و عائیدونەک له‌سەردەمی بەعسدا و له‌نێوان ترس و لێدان و گرتن و شوێن بزركردن و سێداره‌وهه‌ژاری دا خوێندنمان تەواوکردو فەزای ئەم چوار ساڵه‌تەواو تیکەڵی ژیانمان بووه‌و لێمان دانابڕێ.
١- مامۆستا کەریم سۆفی، دەرچووی به‌شی فارسیە، نووسەرو وه‌رگێڕه‌، ئیستا له‌هه‌ولێر خانەنشینە.
٢- مامۆستا خالید شەیدا، دەرچووی به‌شی ئینگلیزیە، نووسەرو شاعیره‌، ئێستا له‌ئه‌لمانیا دەژی.
٣ – د. ئازاد حەمه ‌شەریف، دەرچووی بەشی ئینگلیزیە، نووسەرو وەرگیڕه‌، ئیستا لە زانکۆی سەڵاحەدین کۆلیژی زمان مامۆستایە.
٤ – زەهاوی چایخانەیەکی ناوداری شاری بەغدایه‌و هونەرمەندو ڕۆشنبیرەکان ڕووی تێدەکەن.
٥ – پەرلەمان قاوەخانەیەکی گەوره‌و ناودارو کۆنی بەغدایە، جێی ڕۆشنبیرو هونەرمه‌ندو رۆژنامەنووس و سیاسەتمەدارەکانە.
٦ – موڕەبەعە، قاوەخانەیەکی تری ناوداری شاری بەغدایه‌و به‌هه‌مان شێوه ‌جێگای ڕۆشنبیرو سیاسه‌تمه‌دارو قوتابیانی قاوه‌خۆره‌وه‌ی زانکۆیە
٧ – مامۆستا گوشاد حه‌مه ‌سه‌عید، ده‌رچووی به‌شی زمانی فارسیەو نووسه‌رو وه‌رگیڕه‌و ئێستا له‌هه‌ولیر خانه‌نشینە.
٨ – رۆژنامه‌ی هاوکاری ڕۆژنامه‌‌یه‌کی کوردی بوو، له‌سه‌ره‌تای هه‌فتاکانی سه‌ده‌ی رابردووه‌وه ‌دەرده‌چوو ڕۆلێکی گرنگی گیڕا له‌پیشخستنی رۆشنبیری کوردیدا.
٩ – مامۆستا له‌تیف هه‌ڵمه‌ت، شاعیری ناوداری کورد، له‌وساڵانه‌دا شیعره‌کانی ڕۆڵی به‌رگری ناوشاریان ده‌بینی و خوێنه‌رێکی زۆری هه‌بوو.
١٠ – سه‌روه‌ر محه‌مه‌د، گه‌نجێکی هه‌ولیری بوو، به‌زمانی عه‌ره‌بی چیرۆکی ده‌نووسی و له‌به‌شی تورکی ده‌یخوێند، چیرۆکێکی له‌گۆڤاره ‌عه‌ره‌بیه‌کان بلاوکرده‌وه‌ به‌ناوی سه‌رکه‌وتن به‌ره‌وخواره‌وه‌ دەنگی دایه‌وە.
١١ – مامۆستا عه‌بدوڵڵا قه‌ره‌داغی، ده‌رچووی به‌شی فه‌لسه،‌ فه‌شاعیرو لێکۆله‌ر ئێستا خانه‌نشینه ‌له‌که‌رکوک.
١٢ – له‌و چوار ساڵەی خویندنمان، چه‌ندین ناسری کوڕه‌ کورد بێ سه‌رو شوێن بوون که‌س هه‌واڵیان نازانێ
١٣ – مامۆستا عه‌بدوڵلا قادرگۆران، ده‌رچووی به‌شی ئینگلیزیه‌و نووسه‌رو وەرگیڕه‌، به ‌داخه‌وه ‌له‌م چه‌ند ساڵه‌ی ڕابردوو کۆچی دوایی کرد.
١٤ – مامۆستا نه‌ژاد عه‌زیزسورمێ، ده‌رچووی به‌شی شوێنه‌وار، شاعیرو لێکۆله‌رو وه‌رگێره‌وئیستا له ‌هه‌ولیر خانه‌نشینە.
١٥ – مامۆستا سه‌ردار عه‌بدولکه‌ریم، ده‌رچووی به‌شی فارسی نووسه‌رو رۆژنامه‌نووس، ئێستا فه‌رمانبه‌ره ‌له ‌سه‌رۆکایه‌تی ئه‌نجومه‌نی وه‌زیرانی هه‌رێمی کوردستان.
١٦ – ژنه‌ ده‌ست پڕ بازنه‌که‌ له‌به‌شی ناوخۆ ناسراوبوو، کابرایه‌کی میسری به‌ناوی خواستن و بردنی بۆ میسر هه‌موو زێره‌که‌ی بردوو به‌جێی هێشت.
١٧ – دكتور حسین علی‌ محفوڤ مامۆستای به‌شی زمانی فارسی بوو بۆ من بۆنی باوکی لیده‌هات و زۆر دۆستی کورد بوو له‌گه‌ل دکتۆر ئه‌مین موتابچی له‌گه‌ل ئێمه‌زۆر باوکانه‌بوون له‌م ساڵانه‌ی دوایی کۆچی کرد
١٨ – دکتۆر ئه‌مین موتابچی، مامۆستای به‌شی فارسی بوو، قه‌ت ناوی نه‌ده‌هێنام هه‌میشه ‌ده‌یگوت باوکه‌ چۆنی چی هه‌یه‌ ئاگات له‌خۆت بێت.
١٩- مامۆستا هاشم مگر هاوکلاسم بوو، کوڕیکی شیعه‌ی زۆر چاک بوو، هه‌رچه‌نده‌ به‌ناچاری کرابوو به ‌به‌عسی، به‌ڵام زۆری رق له‌ ڕژێم بوو، زۆر یارمه‌تی منی داوه‌و پیاوه‌تی به‌سه‌رمه‌وه‌یە.
٢٠ – زۆرجار که‌ دەرگای کۆلیژ ده‌گیرا، ناچاربووین به‌سه‌ردیوارو به‌لای به‌شی ناوخۆی کچان بازده‌ین و هه‌ندێجار یامه‌تیان ده‌داین و ‌هه‌ندێجاریش پیمان پێده‌که‌نین.
٢١ – قەمبه‌ر عه‌لی، گه‌رەکێکی نزیک مه‌یدانه‌ و ‌ئه‌وده‌م زۆربه‌ی دانیشتوانه‌که‌ی کوردی فه‌یلی بوون.
٢٢ – وه‌لعه‌باس مالمان خراوبی رسته‌یه‌كی پڕ هه‌ناسه‌ساردییه‌کی له‌و مالانه‌ی کۆلانی بنبه‌ست بوو که‌ ده‌تبیست جەرگت ده‌توایه‌وە.
٢٣ – ئه‌منی به‌عس زۆر ڕیگای هه‌بوو بۆ ئازاردانی روحی هاوڵاتیان، یه‌کێ له‌و ڕیگایانه‌ تراشینی ڕیش و سمێل بوو.
٢٤ – تاکه‌ی وشتر له‌سه‌رگرد ده‌مینته‌وه‌ ڕسته‌یه‌کی پرسیار ئامیزی عه‌ره‌به‌ له‌چاوه‌ڕوانی نه‌مانی ڕژێمه‌کانه‌وه ‌زۆر دووباره‌ی ده‌که‌نه‌وە.
٢٥ – له‌ گفتوگۆی یه‌کێتی و حکومه‌ت له‌ سه‌ره‌تای هه‌شتاکان هاشم-ی هاوکلاسم به‌دزییه‌وه‌ لیی پرسیم راسته‌گفتوگۆ هه‌یه ‌له‌نێوان مامه‌ڕیشه‌و حکومه‌ت له ‌مامه‌ڕیشه ‌مه‌به‌ستی پیشمه‌رگه‌ی ئازاو ناوداری کورد مامه‌ڕیشه‌بوو.
٢٦ – ساڵی هه‌شتاو سێ حکومه‌ت پیاوو گه‌نجه‌ بارزانییه‌کانی که‌مپی قوشته‌په‌ی هه‌موو بردوو زینده‌به‌چاڵی کردن.
٢٧ – له‌ساڵی هه‌شتاو یه‌ک حکومه‌ت زیاد له‌ ده‌هه‌زار گه‌نجی فه‌یلی بێ سه‌رو شوین کردو ئه‌وانی تریشی به‌جلی به‌ریانه‌وه ‌به‌لۆری سه‌ربازی برده ‌سنووری ئێران و ماڵ و موڵکی داگیرکردن.
٢٨ – عائیدون ئه‌وانه‌ بووین له‌پاش ڕیککه‌وتننامه‌ی جه‌زائیر١٩٧٥ گه‌ڕانه‌وه‌ عیراق و به‌ر لیبووردنی حکومه‌ت که‌وتن.
٢٩ – له‌ساڵانی خوێندنمان به‌رده‌وام چه‌ندین سامیمان لێ بزرده‌کرا.
٣٠ –ژوری سه‌ندیکا، ژوورێک بوو ده‌که‌وته ‌پشت پرسگەی کۆلیژ و زۆر جار قوتابی ده‌برایه ‌ناو ئه‌وسه‌ندیکایه‌و له‌وێ سزا ده‌دراو ته‌مبێ ده‌کرا.
٣١ – ئه‌بوغرێب، به‌ندیخانه‌یه‌کی ناودارو ناوبه‌دی عیراقه‌، ‌زۆر جار بۆ سه‌ردانی براو خزم و ناسیاره‌کانمان ده‌چووینه ‌مواجه‌هه‌ی گیراوه‌کان.
٣٢ – عروبه ‌کچێکی هاوکڵاسمان بوو، کچێکی به‌ڕێز زۆر جار به‌سوعبه‌ت ده‌یگوت خۆشه‌ویسته‌که‌ت له‌چیایە.
٣٣ – سه‌میره ‌کچێکی تورکمان بوو، کچێکی به‌ڕێز ڕۆژانه ‌هیوای خۆی له‌سه‌ر خوێندنه‌وه‌ی بورجه‌کان هه‌لده‌نا.
٣٤ – سالم، گه‌نجێکی هاوکلاسمان بوو زه‌وقیکی جوانی نووسینی هه‌بوو. هه‌ر له‌سالی دووه‌مه‌وه ‌هه‌شت هاوپۆلی هه‌لبژاردبوو به‌وشه‌ ‌پۆرترێتی بۆ ده‌کردن منیش یه‌کیک بووم له‌و هه‌شت که‌سە.
٣٥ – عه‌باس، هاوکلاسێکی ترمان بوو ڕۆژێک زۆر به‌ئه‌ده‌به‌وه ‌داوای لێکردم ببم به‌به‌عسی، منیس زۆر به‌هێمنی ره‌تمکرده‌وه ‌له‌وه‌پاش هه‌رچی منی ده‌بینی شه‌رم دایده‌گرت.
٣٦ – جاسم گه‌نجیکی درێژی به‌سراوی بوو، دکتۆر محه‌مه‌د نوری که ‌خه‌لکی میسر بوو له‌شێوه‌ به‌سراویه‌که‌ی نه‌ده‌گه‌یشت و به‌رده‌وام ده‌یگوت جاسم به‌عه‌ره‌بیه‌کی ڕەوان قسه‌بکە.
٣٧ – مامۆستایه‌کی زۆر باش و نابینامان هه‌بوو زۆر به‌هه‌ست بوو، ئه‌سکه‌نده‌ر هاوکلاسی نوکته‌چی له‌ده‌رسی ئه‌و پێیخواس ده‌کردوو له‌سه‌ر په‌نجه ‌وه‌ک پشیله‌ ده‌یویست بچێته‌ده‌رەوه‌ مامۆستا زوو هه‌ستی پێده‌کردوو ده‌یگوت ئه‌سکه‌نده‌ر جوان دانیشە.
٣٨ – مه‌ها، کچێکی هاوکلاسمان بوو، ئه‌ویش ماوەیه‌ک نه‌هاته‌دەوام دیاربوو براکه‌ی حکومه‌ت گرتبووی وبێ سه‌رو شوێن بوو.
٣٩ – ئێمه ‌له ‌به‌شی فارسی بووین، زه‌حمه‌تترین شت بۆ ئێمه‌ کڕینی کتیب بوو، له‌هه‌ر کتیبخانه‌یه‌ک داوای کتیبی فارسیمان کردبوایه ‌وایان ده‌زانی ئێمه ‌ئه‌منین زۆر ده‌ترسان و ڕه‌تیان ده‌کرده‌وه‌ که ‌کتێبی فارسی بفرۆشن.
٤٠ – دکتۆر فاروق ره‌فیق، نووسه‌رو لیکۆله‌ر، ده‌رچووی به‌شی فه‌لسه‌فه‌. له‌ سالانی خوێندن چالاک بوو له‌ نووسین و کۆرگێڕان ئیستا له‌سلیمانی داده‌نیشێ.
٤١ – مامۆستا حه‌مه ‌شوان» ئه‌ویش له‌گه‌ڵ دکتۆر فاروق ره‌فیق هاوکڵاس بوون و زۆر جار له‌کۆرو سمینار ده‌که‌وتنه ‌به‌رامبه‌ر یه‌کتر ئێستا له‌دەره‌و ده‌ژی.
٤٢ – ساڵی هه‌شتاو دوو ڕۆژیک له‌کۆمه‌ڵه‌ی ڕۆشنبیری کوردی پیاوێک له‌وێ بوو گوتیان ئه‌مه ‌کوڕی مامۆستا به‌شیر موشیره ‌ئه‌و به‌ڕێزه ‌سه‌یری ڕۆژنامه‌کانی سه‌ر مێزه‌که‌ی کردوو له‌پر پرسی ئه‌ری ئه‌ورۆ خه‌بات نه‌هاتووە.
٤٣ – له‌ساڵانی خوێندن حکومه‌تی عیراق بڕیارێکی ده‌رکرد ئه‌گه‌ر کچ و کوڕێکی زانکۆ کوردو عه‌ره‌ب ببنه ‌هاوسه‌ر حکومه‌ت پێنج سه‌د دیناریان به‌خۆرایی ده‌داتی» که‌چی ئه‌گه‌ر کوره‌ کوردیک رۆژباشی کچه‌ ‌عه‌ره‌بیک کردبا ئه‌من زانیبای کێشه‌یان بۆ دروست ده‌کرد.
٤٤- مامۆستا ڕزگار چاوشین، ده‌رچووی به‌شی ئێنگلیزی بوو، پیاوێکه ‌زۆر هێمن و له‌سەرخۆ، زۆر کەم قسەی دەکرد، بەڵام که ‌دەدوا جۆریک بوو له‌حیکمەت.
٤٥ – ئه‌وساڵانه‌ی له‌به‌غدا ده‌مخوێند، زۆر جار بێزار ده‌بووم و جانتاکه‌م هه‌ڵده‌گرت و ده‌مگوت وازدینم دوو سی رۆژ له‌ماڵ ده‌بووم و زۆرجار مامۆستا که‌ریم سۆفی په‌شیمانی دەکردمه‌وە.
٤٦ – له ‌رۆژانی یه‌که‌می خویندن سامی هاوکلاسمان به‌ڕسته‌ی هیوا ده‌خوازم چاوم کوێربیت و جوو ببینم کورد نه‌بینم تێی گه‌یاندین چاو هه‌یه‌ حه‌زده‌کات کوێر بێت و کورد نه‌بینێ.
٤٧ – توانا محه‌مه‌د کوڕه‌ کوردیکی هاوکلاسمان بوو له‌به‌غدا داده‌نیشت زۆر دڵسۆزبوو، به‌داخه‌وه ‌به‌ڕوداوی سه‌یاره‌ گیانی له‌ده‌ستدا.
٤٨ – دکتۆره ‌ڕائیده ‌ژنێکی ئازه‌ری بوو، ئه‌ده‌بی فارسی پی ده‌گوتین، پێشتر ده ‌سال گوێنده‌ی ڕادیۆ بوو‌له‌ئێران شیعری فارسی زۆر خۆش ده‌خوێنده‌وە.
٤٩ – دکتۆر زیاب، خه‌ڵکی لوبنان بوو، پیاوێکی بێ وه‌ی و خۆپاریزبوو، که‌یفی به‌ڕژیم نه‌ده‌هات و کوردی خۆشده‌ویست، به‌ڵام قه‌ت ئه‌مه‌ی به‌زار ده‌رنه‌ده‌بڕی ده‌بوایه‌ خۆت بیزانی و له‌گه‌لیشی باس نه‌که‌ی.
٥٠ – دکتۆر محه‌مه‌د نوری، مامۆستامان بوو، خه‌ڵکی میسر بوو مامۆستایه‌کی زۆر ڕووخۆش و خاکی بوو که‌ چۆوه‌ میسریش په‌یوه‌ندیمان هه‌ر هه‌بوو.
٥١ – له‌سه‌ر کۆرنیش و له‌به‌رامبه‌ر دائیره‌یه‌ک وه‌زاره‌تی به‌رگری دانه‌یه‌ک له‌تۆپی وه‌ستا ره‌جه‌ب داندرابوو قوتابیه ‌کورده‌کان زۆر به‌شانازیه‌وه ‌سه‌یریان ده‌کرد.
٥٢ – هێمایه‌ بۆ شیعرێکی زۆر جوانی برای به‌ڕیزم مامۆستا قوباد جه‌لی زاده ‌که‌باس له‌به‌یه‌ک نه‌گه‌یشتنی کچ و کوڕێکی کورد ده‌کات له‌به‌غدا.
٥٣ – به‌هۆی شه‌ڕی به‌رده‌وامی عیراق و ئیران زۆر قوتابی خۆی ده‌خست به‌و هیوایه‌ی شه‌ڕ کۆتایی بێت و نه‌چنه‌ سه‌ربازی به‌داخه‌و شه‌ڕ درێژه‌ی کیشاو گه‌یشته‌ گیانی زۆر گه‌نج و نامرادی کردن.
٥٤ – هاوینی دووەم که ‌گه‌ڕاینه‌وه‌ سه‌روه‌ر محه‌مه‌دی چیڕۆکنووس لیستێکی درێژی ڕۆمانی پیشاندام ‌گوتی ئه‌م هاوینه ‌هه‌مووم خوێندووته‌وه، ‌تواناو لیهاتوویه‌کی سه‌یری هه‌بوو له‌نووسین و خوێندنه‌وه‌دا. به‌داخه‌وه ‌ژیانی سه‌روه‌رو خۆشه‌ویسته‌که‌ی به ‌ئه‌فسانه‌یه‌کی نه‌زانراو کۆتایی هات.
٥٥ – چاوت جوانه ‌له‌یلا، گۆرانیه‌کی خۆش و به‌ناوی هونه‌رمه‌ندی گه‌وره‌ی کورد مامۆستا حه‌سەن زیره‌که‌ عه‌ره‌ب زۆریان پیخۆش بوو.
٥٦ – هه‌ره ‌له‌یلی له‌یلێ، گۆرانیه‌کی خۆش و به‌ناوی هونه‌رمه‌ندی گه‌وره‌ی کورد مامۆستا شه‌مال سائیبه‌عه‌ره‌ب زۆریان پیخۆش بوو.
٥٧ ٠ ڕزگار، کوڕێکی ماڵباتی بارزانی بوو، گه‌نجێکی هێمن و جوان له‌به‌شی فه‌ره‌نسی ده‌یخویند له‌ سەروبه‌ندی بزربوونی فه‌یلیه‌کان ئه‌ویش بزربوو زۆر به‌داخەوه‌.
٥٨ – مامۆستا سامان خانه‌قینی، له‌به‌شی ئینگلیزی ده‌یخوێند، شاعیرو میدیا کاره، ‌ئیستا له‌ده‌رەوەی ولات ده‌ژی.
٥٩ – ئه‌مرۆ ئادەم هاوکلاسێکی به‌شی فارسیمان بوو خه‌لکی هاودیانان بوو گه‌نجیکی جوان و هێمن ئێستا فه‌رمانبه‌ره‌ له‌ده‌ڤه‌ری سۆران.
٦٠ – مامۆستا به‌ده‌ل ره‌فۆ مزوری، ده‌رچووی به‌شی ڕوسی شاعیرو وه‌رگێرو میدیاکاری گه‌ڕۆک خه‌لکی شاری دهۆکه‌و ئێستا له‌دەره‌وه‌ی وڵات ده‌ژی که‌سایه‌کیه‌کی نیوه‌ندی ئه‌ده‌بی کوردی و عه‌ره‌بیە.
٦١- ئیسماعیل حه‌مه‌ده‌مین، خه‌لکی دهۆک بوو به‌داخەوه‌کۆچی دوایی کرد.
٦٢ – یوسف ئه‌ویش هاوکلاس و خه‌لکی دهۆک بوو کوڕیکی ڕووخۆش ده‌رچووی به‌شی فارسیه‌و له‌پاش ڕاپه‌ڕین بووه ‌ئه‌فسه‌ری پۆلیس و ئێستا له‌دەره‌وه‌ی وڵات ده‌ژی.
٦٣ – مامۆستا فارس، گه‌نجیکی جوان و پیاوێکی باش بوو، له‌گه‌ل یوسف هه‌ردووکیان کوڕی سه‌رۆک هۆزبوون و ده‌رچووی به‌شی فارسی بوون و بوون به‌ئه‌فسه‌رو دواجار به‌داخەوه ‌هه‌ردووکیان وه‌ک بیستمه‌وه‌ کوژراون.
٦٤ – دکتۆر تاهیر مسته‌فا، ئێستا مامۆستایه‌ له‌ به‌شی زمانی عه‌ره‌بی کۆلیژی زمانی زانکۆی سه‌لاحه‌دین و وه‌رگێرو ره‌خنه‌گرە.
٦٥ – دکتۆره ‌نه‌رمین مامۆستای به‌شی فارسی و خوارزای زانای کورد تۆفیق وه‌هبی بوو، کچێکی خاتوون و به‌ڕێز خاوه‌ن که‌سایه‌کیه‌کی به‌هێزبوو، هێمای هێمنی و ئاسوده‌یی قوتابیان بوو.
٦٦ – دکتۆر که‌مال مه‌زهه‌ر،ئه‌وده‌م سه‌رپه‌رشتی نامه‌ی ماسته‌رو دکتۆرای ده‌کردو و بۆ سود وه‌رگرتن زۆر جار ده‌چووینه‌ هۆلی گفتوگۆی نامه‌کان.
٦٧ – تاقی کیسرا ئه‌یوانی کیسرا پاشماوه‌ی پاشای ساسانی ئه‌نه‌و شیروانه‌و گه‌وره‌ترین به‌رهه‌یوانی پاشایانه‌و له‌گه‌ج و که‌رپوج دروستکراوه ‌ده‌که‌وێته‌ خوارووی به‌غداو ئیستا به‌سه‌لمان پاک ده‌ناسری و جیگایه‌کی شوینه‌واری و گه‌شتی به‌هارانه‌ی قوتابیانی زانکۆیە.
٦٨ – زۆر جار قوتابیانی کورد کچ و کوڕ که‌ده‌هاتنه‌وه‌به‌غدا خواردنیان له‌گه‌ل خۆیان ده‌هیناو ده‌بوو به‌هۆیه‌ک کۆمان بکاته‌وە
٦٩ – به‌داخەوه‌ هه‌ندی کچ و کور به‌هۆی کیشه‌ی سۆزداری زۆر جار له‌و به‌غداو غه‌ریبیه ‌له ‌خۆکوژی نزیک ده‌بوونه‌وه‌و هه‌ندێ جار ده‌که‌وتنه‌ نه‌خۆشخانە.
٧٠ – ئه‌لیس گۆرگیس کچێکی مه‌سیحی هاوکڵاسمان بوو ئه‌ویش کچێکی هێمن و زۆبه‌ڕیز زۆر جار له‌گه‌ل من هاتووچۆی دەکرد پیشتر له‌گه‌ل باوکی پێکه‌وه ‌له‌کۆمپانیای فه‌ره‌نسی کارمان کردبوو.
٧١ – هه‌ندێک مامۆستا و هه‌تا قوتابیش له‌هه‌موو ماوه‌ی خوێندنیان به‌هۆی خراپی ره‌وشه‌که‌ خۆیان ئاشکرا نه‌ده‌کردوو نه‌یان ده‌گوت ئیمه‌ کوردین ئه‌مانه‌ زۆر به‌سوکی سه‌یر ده‌کران.
٧٢ – دکتۆر مارف عومه‌ر گوڵ، ده‌رچووی به‌ش یاسا و شاعیرو لیکۆله‌ر ئێستا مامۆستای زانکۆی سڵیمانیه‌و له‌ساڵانی خوێندندا گیراو و ئازاریکی زۆری بینی که ‌به‌ربوو ده‌ستێکی کاری نه‌ده‌کرد.
٧٣ – مامۆستا مه‌هداوی فه‌رمانبه‌ری سه‌رۆکایه‌تی زانکۆی سه‌لاحه‌دین له‌گه‌ل ئێمه ‌له‌به‌غدا و له‌به‌شی روسی وه‌رگیرا دوای هاته‌وه ‌له‌هه‌ولێر کۆمه‌ڵناسی تەواوکرد ئیستا له‌هه‌وڵیر دەژی.
٧٤ – مامۆستا ئاوات محه‌مه‌د ده‌رچووی به‌شێ زمانی ئینگلیزیه‌زه‌وقێکی ئه‌ده‌بی زۆرجوانی هه‌بوو زۆرجار پێکه‌وه‌چوارنیه‌کانی خه‌یام و باباتاهیرمان ده‌خوێنده‌وه‌وشیده‌کرده‌وه‌ئێستا ئه‌ندامئ ئه‌نجومه‌نی پاریزگای شاری که‌رکوکە
٧٥ -مامۆستا نه‌هرۆ گەنجێکی هه‌ولیری بوو له ‌بەشی فەلسەفه‌ دەیخوێند پاش تەواوکردنی خوێندن دانەمەزراو ئێستا خەریکی کاسبیە.
٧٦ – دکتۆر عەبدوڵلا خورشید، بەردەوام نوکتەی لێ هه‌ڵدەوەرا ئێستا مامۆستای زانکۆیه ‌له‌بەشی کۆمه‌ڵناسیی له‌زانکۆی سەلاحەدین.
٧٧ – دکتۆر جەواد فەقێ گەنجێکی هێمن و دەم ب ه‌زەرده‌خەنه ‌بوو ئێستا مامۆستای زانکۆیه ‌له ‌کۆیە
٧٨ – دکتۆر تالیب محەمەد حوسەین یەکی له‌وقوتابیانه ‌بوو بەردەوم ڕۆمانیک دووانی له‌نیو جانتاکەی
بوو ئێستا مامۆستای زانکۆیه ‌له‌بەشی کوردی زانکۆی سەڵاحەدین
٧٩ – مامۆستا سمکۆ بەهرۆز گەنجیکی کەرکوک بوو له‌به‌شی میژوو دەیخوێند ئێستا ڕۆشنبیرێکی دیاری شاری کەرکوکە
٨٠ – دکتۆر عەزیز گەردی، نووسەری گەورەو ناوداری کورد خاوەنی دوو دکتۆرایه ‌له‌کوردی و ئینگلیزی له‌زانکۆی سەڵاحەدین بوو ئێستا خانه‌نشینه ‌له‌سەرەتای هه‌شتاکان سەرپەرشتی بڵاوکراوەی ئەدەبی بێگانانی دەکرد له‌گەل چەند قوتابییەکی زانکۆی بەغداو موسل.
٨١ – مامۆستا جه‌عفەر ئەنوەر ڕەشید له‌بەشی یاسا دەیخوێند و له‌شەستەکان باوکی به‌فرۆکەی عیراقی شەهیدبووە.
٨٢ – مامۆستا سەید محه‌مەد سەید قەهار قوتابی بەشی ئینگلیزی بوو له‌ بنه‌ماڵەیەکی سەر به‌شۆڕش بوو ئیستا خانه‌نشینه ‌له‌سلیمانی دادەنیشێ.
مامۆستا حسام سەید کەریم بەرزنجی ڕۆماننووسی ناسراوی کورد له‌زانکۆی موسل له‌بەشی ئینگلیزی دەیخوێند ئیستا له ‌ئەلمانیا دەژیت.
٨٣- مامۆستا حامید محەمەد عەلی، دەرچووی بەشی ڕاگەیاندنەو ئێستا له‌هه‌ولێر ئەندامی ئەنجومەنی ڕۆژنامه‌نووسانی کوردستانە.
٨٤- مامۆستا موزەفەر، دەرچووی بەشی ئینگلیزیەو له‌بنه‌مالەی ئاغاکانی شاری هه‌ولیره‌و ئێستا له‌هه‌ولێر مامۆستایە.
٨٥- مامۆستا ئەحمەد دەرچووی بەشی شەریعەیه‌و ماوەیەکی زۆر پیشمەرگە بوو ئێستا له‌هه‌ولێر مامۆستایە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شۆڕش چییە؟

لە شۆڕش گرنگتر، بەشداریپێكردنی كۆمەڵانی خەڵك ‌و ئاوێتەبوونی شۆڕشە بە ...