بۆ شەهیدێک..دەبێت دەستی چەپمان بخەینە سەر دڵ! – knwe.org
سەرەکی » ئاراستە » بۆ شەهیدێک..دەبێت دەستی چەپمان بخەینە سەر دڵ!

بۆ شەهیدێک..دەبێت دەستی چەپمان بخەینە سەر دڵ!

ساڵح بێچار

جەمالی عەلی باپیر یەکێکە لەو ناوانەی تەنها بە بیستنی ناوەکەی کۆمەڵێک خەسڵەتی ئازایەتی و بوێریی و نەبەردییت دێت بە بیر و خەیاڵدا، چ وەک یاریزان و وەرزشوانێکی پیشەیی و بەتوانا و ناسراو، چ وەک پێشمەرگەیەکی چوست و چالاک و پڕ ورە و بڕوا و دواجاریش وەک سەرکردەیەکی خاکەڕا و دڵسۆزی شۆڕش و خەڵک و خاک.
هاوکات بە بینینی هەر وێنەیەکی ئەم پیاوە قارەمانە قۆناغێکی دیکەی تاڵ و تاریکی شەڕی خۆکوژییمان بیردەکەوێتەوە کە لە ماوەی زیاتر لە نیو سەدەدا دەیان سەرکردەی وەک شەهید جەمال و سەدان کادر و تێکۆشەری دڵسۆز و هەزاران پێشمەرگە و هاووڵاتی لە هەموو حیزب و لایەنەکان و لە تێڕای ناوچە و دەڤەرەکانی باشووری کوردستان بوونە قوربانی ئەو شەڕە پڕ شەرمە، وێڕای دەربەدەریی و ئاوارەیی و ماڵوێرانی و سەرگەردانی هەزارانی تر.
هەموو ئەو کار و خەبات و تێکۆشانەی ئەو ڕۆڵە بەجەرگەی گەلەکەمان بە تەمەنێکی کەم و کورتی (٣٦) ساڵییەوە بە ئەنجام گەیەنراون. کە بێگومان ئەگەر مەرگ مەودای بدایە نەخشە و پلانی زۆر کار و خەباتی دیکەی لە هەگبەدا بوو.
هۆشیاریی و دونیابینی شەهید جەمال تەنها لە بوارەکانی وەرزش و پێشمەرگایەتیدا قەتیس نەبووە، بەڵکو وەکو کوردێکی بەئاگا لە مێژووی نەتەوە بندەستەکەی، هەر لەگەڵ بەدونیا هاتنی یەکەم کۆرپەلەی بەتامەزرۆییەوە ناوی لێناوە (سیڤەر) وەک تاسە و تامەزرۆییەک بۆ «پەیمانی سیڤەر» کە لەو ڕۆژگارە ئەنگوستەچاوەی سەرەتای سەدەی پێشوو، پەیمانێکی مژدەبەخش و جێی ئومێد بووە بۆ کوردانی باکوور و باشووری کوردستان. دواتریش هەر بەحەسرەتی بەدینەهاتنی ئەو خەونە و جێبەجێنەکردنی پەیمانی سیڤەر بەهۆی «پەیمانی لۆزان»ەوە، کچی دووەمیشی ناودەنێت (لۆزان) تا هەرگیزاو هەرگیز ئەو جەزرەبەیەی دوژمنانی کورد –بەتایبەت کەمالیستەکان- بەهۆی ئەو پەیمانەوە لە کورد و گەلی کوردستانیان دا فەرامۆشی نەکات و هەمیشە لەبیری بێت.
ئەم ژمارەیەی پاشکۆی (یادگار) دوای (٣٧) ساڵ لە شەهیدبوونی سێوەکەی دڵی هەژاران و ڕەنجدەران دەکەینە ئەلبوومی بەشێک لە وێنە و یادگارییەکانی جەمالی عەلی باپیر.
دواجار سڵاو بۆ گیانی شەهید جەمال و ئەو (٧) شەهیدەی دیکەش کە هاوکات و پێکەوە پێشنیوەڕۆی پێنجشەممە ڕێکەوتی (٢٠-٨-١٩٨١) لەسەر «کانی گڵەزەردە»ی گوندی «سێکانیان» شەهید بوون.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شۆڕش چییە؟

لە شۆڕش گرنگتر، بەشداریپێكردنی كۆمەڵانی خەڵك ‌و ئاوێتەبوونی شۆڕشە بە ...