سەرەکی » چاوپێکه‌وتن » ژنێك كە ئازارەكانی نیشتمان دەنووسێتەوە

گفتۆگۆیەكی نەرمین عوسمان لەگەڵ ئەمیرە محەمەد

ژنێك كە ئازارەكانی نیشتمان دەنووسێتەوە

 چەند ژنە کەسایەتییەکی ناسراو لە مێژووی کورددا هەن کە لەبواری جیاجیادا کەسانی لێوەشاوەو چالاک بوون، بەڵام هەرگیز ئەو چالاکییانەیان نەکردووەتە بانگەشەو کایەیەک بۆ خۆناساندن، لەوبارەیەوە لە ماوەی رابردوودا خاتوو نەرمین عوسمان کە بۆ خۆشی ژنێکی چالاکی بواری پەروەردەو  تێکۆشەرێکی کایەی سیاسیشە زنجیرەیەک سەردان و بەسەرکردنەوەی دەستپێکردووە بۆ گفتوگۆو هەڵدانەوەی لاپەڕە پرشنگدارەکانی ژیان و کارو چالاکیی ئەو خانمانەی کوردستان کە وەک سەربازی ون خزمەتێکی زۆریان بە چەند نەوەیەک کردووە لە بواری جیاجیادا، بەڵام نەوەی نوێ وەک پێویست ئاشنا نییە بە بەخشش و کۆششە مرۆڤدۆستامەکانیان، بۆیە بەسوپاسەوە خاتوو نەرمین پوختەی ئەو گفتوگۆیانە و ئەرشیفی وێنەو بیرەوەرییەکانی ئەو خانمە چالاکوانانە دەنووسێتەوەو بۆ دەربازکرنیشیان لە فەوتان و لەبیرچوونەوە، پێشکەشی کوردستانی نوێ-ی دەکات و کوردستانی نوێش ناوبەناو وێنەکان و چیرۆکی ژیانی پڕ بەخششی ئەو کەسایەتییانە بڵاودەکاتەوە.

نووسینەوەی مێژووی سەروەرییەكان بە دەست و قەڵەمی سوڵتانێك نە نوسراوەتەوە بۆ مەدح و سەنای خۆی ، كەسێك نووسیویەتییەوە لە زاری ئازارەكانەوە، وەك خۆی كێشاویەتی، وێنای چاوی قوربانییەكانی بە چاوی پڕ لە فرمێسكەوە فڵچەی تابلۆیەكی جوگرافیایەكی بێ سنووری ڕەنگ كردووە ، پڕن لە گوڵ لە هەموو رەنگ و عەترەكان بۆ هەموو ماندووبوون و ئازارەكان، زمانێك بە راستگۆیی و خۆشەویستییەوە ، بۆ كارەكەی و هەڵدانەوەی لاپەڕەی ئازارەكانی نەتەوەیەكی ستەمدیدە، بە هێمنی و لەسەرخۆیی و گوێگرتن لەو هەموو ئازارە، كارێكی ئاسان نییە پڕن لە ناسۆر، هەر بۆیە هێندەی تر هێمن بووە لە رقی زەمەنێكی بێ بەزەیی، ئەمیرە محەمەد ئەو ژنەیە كە بەردەوامە لە نووسینەوەی ئازارەكان .
لە ساڵی 1952 لە سلێمانی لە گەڕەكی سەرچیمەن لە دایك بووە ، سەرەتای خوێندنی لە قوتابخانەی سەربەستی سەرەتایی كچان دەستی پێ كردووە ، دواناوەندی لە سلێمانی كچان لە بەشی وێژەیی بووە ، كۆلێجی ئاداب بەشی زمان و ئەدەبی كوردی لە زانكۆی سلێمانی بە پلەی زۆر باشە تەواو كردووە .
سەرەتای كارو چالاكییەكانی لە یەكێتی قوتابیان دەستی پێكردووە ، لە ساڵی 1970- 1971 پەیوەندیی بە ئەڵقە ڕۆشنبیرییەكانی كۆمەڵەی ماركسی لینینی كوردستانەوە كردووە ، ژمارەی كادرییەكەی (64 أ) بووە ، تا ئێستا لە ڕیزەكانی یەكێتیدا بەردەوامە وەك كادرێكی كارا خەبات و كارو چالاكی دەكات.
لەكاتی دەست بەكاربوونی وەك مامۆستا، خوێندكارەكانی بە گیانی كوردایەتیی پەروەردە دەكرد، كە ئێستا بەشێكیان بەرپرسی حزبی و حكومین.
لەشارەوە بۆ شاخ
لە ساڵی 1985 سنووری چالاكییەكانی گواستەوە لە شارەوە بۆ شاخ و چووە سنووری مەڵبەندی ( 3 ) لە تیپی ( 78 )ی كارۆخ لەگەڵ دكتۆر شێركۆی هاوسەریدا .
لەدوای ئەنفالی سەر مەڵبەندی ( 3 ) ئاوارەی ئێران بوون، لەوێش درێژەیان بە خەبات داوە ، لە هەمان كاتدا بەشداریی چالاكییە سیاسی و كۆمەڵایەتییەكانی كردووە، یارمەتی دكتۆر شێركۆی دەدا لەو كاتانەی كە بریندار و نەخۆش روویان دەكردە نەخۆشخانەكە، لە دوای راپەڕین گەڕانەوەو بوو بە كادیری بەشی بیرو هۆشیاری مەڵبەندی سلێمانی.
لە كۆنفرانسی 1995ی مەڵبەنددا یەكەم دەنگی ژنان و شەشەم دەنگی تێكڕای كاندیدەكانی هێناوە، ئەوكات بوو بە ئەندامی مەڵبەندی یەكی رێكخستنی سلێمانی و چۆتە بەشی راگەیاندن و بووەتە بەڕێوەبەری رادیۆی سلێمانی .
یەكێك لەو كارانەی كە شانازیی پێوە دەكات لە رادیۆكە، رێژەی بەرنامەكانی لە ( 7 ) بەرنامەوە كردووەتە ( 36 ) بەرنامە. هەروەها یەكەم ژن بووە هەفتانە بەرنامەیەكی سیاسیی بە ناوی گۆشە نیگاوە لە تەلەفزیۆنی گەلی كوردستان پێشكەش كردووە كە لەسەر پرسە گەرمەكانی رۆژ بووە، ئەوسا كاك عەباس عەبدولڕزاق بەڕێوەبەری تەلەفزیۆن بووە.
پرۆژەی چنینی فەرش
لە دوای راپەڕین دەبێتە راگری كۆمەڵەی هەرەوەزیی سلێمانی، لە ساڵی 1992 پەیوەندیی كردووە بە یەكێتی ژنانەوەو رۆڵێكی باڵای گێڕاوە بۆ زیندووكردنەوەی گۆڤاری تەوارو چەندین بابەتی گرنگی نووسیوە، بەشێكی بەناوی خوازراوەوە لە گۆڤاری تەوارو بڵاوكراوەكانی یەكێتی ژناندا .
خاوەنی دەیان پڕۆژەی جوانە لەوانە دامەزراندنی پڕۆژەی چنینی فەرش و بەڕە بۆ خزمەتی پاشماوەی ئەنفال و كەسوكاری شەهیدان لە شاری سلێمانی و ئۆردوگاكانی سمود و شۆڕش ، زۆرجار بەڕێز مام جەلال سەردانی ئەو پڕۆژەیەی دەكرد بە یاوەریی میوانە بیانییەكان و هانی دەدان بۆ كڕینیان‌و هەروەها خۆشی وەك دیاریی دەیكڕی و دەینارد بۆ هەندێ كەس بەمەبەستی هاندان و دروستكردنی دەرامەتی بۆ ئەو ژنانە .
هەروەها یەكەم بەرنامەی رادیۆیی دەنگی گەلی كوردستانی لەسەر پرسەكانی ژن ئامادە دەكرد هەر خۆیشی ناوی نا ( دەنگی ژنان ) و سوهێلە ئەحمەد وەك بێژەر پێشكەشی دەكرد ،
هەروەها یەكەم ژن بوو لەناو مەڵبەند سەرقاڵی بەستنی كۆڕ و سیمینار بووە لەسەر بابەتەكانی رۆژ ، هەر بۆ هەمان مەبەست سەردانی ناوچە دوورە دەستەكانی دەكرد .
وەك خۆی ئاماژەی بۆ كرد، یەكەم ژن بووە بابەتی سیاسی لە كوردستانی نوێ لە لاپەڕە ( 2 ) ئامادە بكات و بیاننووسێت .
ساڵی 1994 بووە بە ئەندامی دەستەی نووسەرانی گۆڤاری دەنگی مامۆستا، بەردەوامیش بووە لە نووسینی بابەت لە رۆژنامەی ئاوێنە و كوردستانی نوێ و بڵاوكراوەكانی تردا .
لە ساڵی 1996 لە سنووری باشماخ لەگەڵ مامۆستا شێخ حسێن و سەرگوڵ خان و كۆمەڵێك كەسیتر كەوتونەتە رێكخستنەوەی خەڵك و ورە بەرزكردنەوەیان و راییكردنی هەندێ كارو چالاكیی كۆمەڵایەتی، هەروەها وەرگێڕانی چەند نامیلكەیەك لەوانە :
-ژنان و مافەكانی مرۆڤ
-حزب و ئایدۆلۆجیا
ئەمنە سوورەکەو
جێ دەستی ئەمیرەخان
خاتوو ئەمیرە بۆی گێرامەوەو وتی: «جارێك لەگەڵ هێرۆخان سەردانی ئەمنە سوورەكەمان كرد، كە هاتینە دەرەوە هێرۆخان لێی پرسیم چیت لەلا گەڵاڵە بووە؟، منیش لە وەڵامدا وتم: لێرەوە دەتوانین هەنگاو بنێین بۆ نووسینەوەی مێژوو، ئیتر لەو رۆژەوە كەوتوومەتە كۆكردنەوەی ئەرشیفی ناو ماڵان و چاوپێكەوتن لەگەڵ تێكۆشەران، هەر لەوێش لەساڵی 2007 یش بووم بە بەڕێوەبەری مۆزەخانەی نیشتمانی ئەمنەسورەكە». هەروەها دەڵێت: «لەو سەردەمانەدا چاوپێكەوتنێكم لەگەڵ رۆژنامەی ئاوێنە كردو داوام كرد كە مەڵبەندێك بكرێتەوە بۆ راهێنانەوەی كەسە ستەمدیدەكان (كەسو كاری شەهیدان و ئەنفال و زیندانییە سیاسییەكان « .
لەساڵی 2000 بۆتە بەڕێوەبەری دیوان لە وەزارەتی كارو كاروباری كۆمەڵایەتی و لەوێش بۆتە ئەندامی دەستەی نووسەرانی گۆڤاری وەزارەتەكە .
2002 راژەكەی گواستۆتەوە بۆ وەزارەتی پەروەردە- (ئیدارەی سلێمانیی پێشوو)، لەوێ دەبێ بە بەڕێوەبەری گشتیی فێركردنی گشتی، ئەو خۆی لەوبارەیەوە دەڵێت: « لەو دوو وەزارەتە لەگەڵ هاوكارەكانم و ستافی وەزارەت دەیان پڕۆژەی سەردەمیانەمان جێبەجێ كرد یان هەنگاوێكی باش بەرەو پێشمان برد».
هەروەها دەڵێت:» لەو كارانەی كە كردوومە، جگە لە بەشداریم لە زۆربەی پڕۆژەكان، یەكەم مەنهەجی باخچەی ساوایانم ئامادەكرد بەناوی كتێبی (خونچەكانی بەهار)، لەوكاتانەی كە سەردانی بەغدامان دەكرد لەگەڵ وەزیری پەروەردەی ئەوكاتە (نەرمین عوسمان )، بردمان بۆ (یونسێف) بۆ ئەوەی وەریبگێڕنە سەر زمانی عەرەبی».
«هەروەها لەو كاتانەی كە لە وەزارەتی پەروەردە بووم بە وەفد چووین بۆ ئێران، لەوێ نامیلكەیەكم هێنایەوە بۆ كوردستان لە وەزارەتی پەروەردە وەرگیراو كردمان بە رێنمایی هاتوچۆ بۆ منداڵان و دابەشمانكرد بەسەر خوێندنگاكەندا.
دەشڵێت: هەندێ سەرچاوەم بۆ ئامادەیی پیشەسازیش ئامادەكرد، لە پڕۆژەی نەهێشتنی نەخوێندەواریی كە وەزارەتی پەروەردە ئەنجامیدا، شەشەم كتێبم بۆ ئەو پڕۆژەیە ئامادەكردو كرا بە پڕۆگرامی خوێندن لە بنكەكاندا «.
«دوای یەكگرتنەوەی هەردوو حكومەتی ئیدارەی سلێمانی ‌و هەولێر بە هەمان پۆست ماوەتەوەو لەوێشەوە بە وەفد سەردانی ئوردن و هیندستانیان كردووە بۆ بینینی خول لەسەر خوێندنی خێرا «.
لەدوای پۆرسەی رزگاركردنی عیراق بەشداریی لە كۆنگرەی دەنگی ژنانی عیراقدا كردووە، هەروەها سەردانی ناوچە دابڕێنراوەكانی كردووە بە مەبەستی كردنەوەی خوێندنگەی كوردی كە پڕۆژەیەكی حكومەتی هەرێم بوو وەزارەتی پەروەردە جێبەجێی دەكرد.
چۆن دکتۆر شێرکۆی ناسی و ژیانی هاوسەرییان دروستکرد؟
لە میانی گفتوگۆكەماندا دەربارەی ناسینی دكتۆر شێركۆ و هاوسەرگیرییەكەیان و پەیوەندییان بۆی گێڕامەوەو وتی: «ماڵی ئێمە و شێركۆ دراوسێ بووین، كاتێ كە كۆمەڵەی ماركسی لینینی دامەزرا، بوومە ئەندامی ئەڵقە رۆشنبیرییەكانی كۆمەڵەو بە رێكخەرەكەم وت: كوڕێك هەیە بە ناوی شێركۆ، هەندێك جار كتێبی ماركس و لینینم دەداتێ، لە وەڵامدا رێكخەرەكە وتی: تۆ حەقت نەبێ، خەریكی كاری خۆت بە، لەدوای رۆیشتنی ئەندامەكانی تر وتی: ئەویش ئەندامی كۆمەڵەیە، بەڵام نابێ ناوی بهێنی لای خەڵك، (بەهۆی مەترسییە زۆرەكانەوە، كەسمان ئاگامان لە شانەكانی تر نەبوو )، ئەوسا دكتۆر شێركۆ لەگەڵ گوڵزار غەریب لەیەك شانە بوون ، وردە وردە بەهۆی ئەدەبدۆستیی هەردووكمان زیاتر لێك نزیكبووینەوەو لەساڵی 1979 هاوسەرگیریمان كرد «.
وتیشی: «سەرەتا دكتۆر شێركۆ دەیان شیعری ناسكی دڵداریی هەبوو ناوە ناوە شیعرێكی ناسكی بۆ دەناردم» .
خاتوو ئەمیرە خۆشی وەك نووسەرێك بە شیعر دەستی پێ كردووە، شیعری بڵاوكراوەی هەیە لە گۆڤاری بەیاندا .
هەروەها ئەوەشی بۆ باسكردم كە جارێكیان شیعرێكی بۆ چەوساوەكان نووسیووەو لەوبارەیەوە وتی: «ئەوسا ئاغایەتی لەماڵی باوكم هێشتا مابوو، لە گۆڤاری بەیان بڵاومكردبووەوەو نەشم دەوێرا بیبەمەوە ، بەڵام براكەم شیعرەكەی بینیبوو، پیشانی باوكمی داو وتی: دژی ئاغا نووسیویەتی، باوكم لەبری تووڕەبوون، دەستخۆشی لێكردم و وتی: مادام دەتوانێ بنووسێ و بیربكاتەوە، كێشە نییە، چونكە باوكم خۆشی شاعیرێكی باش بوو» .
وتیشی: باوكم زۆر كوردپەروەربوو، بیرمە كە ئەو رۆژەی بڕیارماندا پەیوەندیی بە هێزی پێشمەرگەوە بكەین، چووم بۆ لای باوكم و پێموت» ئەویش لەوەڵامدا وتی: « تۆ ئازادی، بەڵام تۆ دەچیتە دەرەوە دەبێت بزانی ژیان لەوێ ئاسان نییە، زەحمەتیی زۆر دەبینی و لەوێ پەڵپ بە شێركۆ نەگری و بگەڕێیتەوەو مەیدە بە كوشت».
هەروەها وتی: «دایكیشم پێیوتم ئیتر دەبێت وەك خەڵكی ئەو ناوچانە بژیت، وەك گوندنشینەكان ژیانی خۆشگوزەرانیت نامێنێ و تێكەڵی ناو دێهاتەكان ببە».
«ئەو ئامۆژگارییانەم بەهەند وەرگرت، جگە لە بیروباوەڕی خۆشم كە كادرێكی كۆمەڵە بووم، دەبوایە سادە رەفتار بكەم «.
وتیشی: «ئیتر تێكەڵ بووم لەگەڵ خەڵكی ئەو ناوچانەو بەشداریی بۆنەكانیانمان دەكرد، زۆر شتیان فێركردین و زۆریشیان لێوە فیربووم، لەوانە فێری تەون بووم، بەڵام تا ئێستا فێری ئاگركردنەوەی كوورەكە نەبووم «.
لە میانەی گفتوگۆكەدا باسی گوزەرانی ماڵی خۆیانی بۆ كردم، وەڵامی هەندێ پرسیاری دامەوە كاتێك لێم پرسی ئێوە ماڵی خۆتان زۆربەتان خەریكی ئەدەب و نووسینن، چۆن رۆژانە گوزەر دەكەن؟ بیستوومە ماڵی ئێوە زۆر جدین و گۆشەگیرن، خاتوو ئەمیرە لەوبارەیەوە وتی: «كاتێ كە شووم كرد، دكتۆر شێركۆ دەبوایە لە دێهات ‌و گوندەكان دەوام بكا وەك دكتۆرێك و دواتریش بووین بە پێشمەرگە و ماوەیەك لە ئێران بووین و بەهۆی ئەوەی منداڵەكانی خۆشمان زۆریان نەهامەتیی بینیووەو خوێندنیان لە ئێران بە زمانی فارسی بوو ، كە گەڕاینەوە كاتێكی باشمان بۆیان تەرخانكرد بۆئەوەی بیانهێنینەوە سەر هێڵی منداڵی ئێرە.
ئەو جۆرە ژینگانە و ئەو دوورییە لە دەوروبەر دووری خستبووینەوە و كەسانێكی تر هاتنە ژیانمانەوە كە پەیوەندیی بە كاری سیاسی و ئەدەبیمانەوە هەبوو، بەڵام لەناو ماڵەكەمان ژینگەیەكی ترمان بۆخۆمان پێكهێناوە، پڕە لە سۆزو خۆشەویستی و میهرەبانی و گۆڕینەوەی راوبۆچوونەكانمان، باسی رووداوەكانی رۆژ و بابەتی كتێب، لە هەمان كاتدا هەمووان سەرقاڵی نووسین و خوێندنەوەو بەدواداچوونین» .
خاتوو ئەمیرە بەردەوام بوو لە گفتوگۆكە و وتی» لە خولی یەكەم و لەساڵی ( 2010 ) بووم بە ئەندامی ئەنجومەنی ناوەندو سەرۆكی لیژنەی سكاڵابووم، ئێستاش بە ئەندام مەكتەب لە ئەرشیفی ناوەندی مێژوویی كاردەكەم«.
وتیشی:» ئەوكاتەی كە لە ئەمنەسوورەكە كارم دەكرد، بە هێرۆخانم وت: پێویستیمان بە كتێبخانەیەكە‌و هەروەها چاككردنی ژوورێك بۆ جۆری مینەكان و بە هۆڵێك بۆ پاراستنی نامەو دیاریی زیندانییەكان و ئەرشیفی ناو ماڵان، ئەو داواكاریانەم كرد بە نووسراوو دامە دەستی، لەوبارەیەشەوە وتی: بیرۆكەكان جوانن، پێویستی بە نووسراو نییە ، بۆ ناسینەوەی و سەرچاوەی ئەو ئۆتۆمبیلە سەربازییانە لەسەر داوای خۆم ئەفسەری فەرماندەیی پسپۆڕی بۆ ناردم و زانیارییەكانمان وەرگرت» .
ئەو وتیشی :» هەر لەسەر داوای خۆم بە سوپاسەوە بەڕێوەبەرایەتی مین هاوكارییان كردین بۆ ناسینەوە‌و پێناسەی جۆری مینەكان، لە هەمان كاتدا دەیان پۆستەری جیاجیای زیانەكان و خۆپاراستنیان لەسەر مین بۆ هێناین، بەردەوامیش ئەو بەشەیان بە ئاماری ساڵانەی قوربانیانی مین دەوڵەمەند دەكرد».
«ئیتر هێرۆخان كتێبخانەیەكی گەورەی لە ئەمنە سوورەكە دروستكرد و ستایشی نارد بۆ دروستكردنی هۆڵی پڕۆژەی دیاریی ئازادی ، ئیتر دوای ئەوە من بووم بە ئەندامی ئەنجومەنی ناوەند و داوام كرد بۆ یەك كار كاتی خۆم تەرخان بكەم و نەدەكرا دوو كار بكەم و هەمان بایەخیان پێ بدەم و بەنیوە ناچڵی كارەكانم بكەم ، بەڵام لەگەڵ ئەوەشدا تائێستا ( 12 ) كتێبم بە چاپ گەیاندووە وەك پڕۆژەی دیاریی ئازادی و چەندین پیشانگەم كردووەتەوە، هەموو ئەو ئەرشیفە جوانانەی ناو ماڵانم كۆكردۆتەوەو پێشكەشی بەڕێوەبەرایەتیی ئەمنە سوورەكە (مۆزەخانەی نیشتمانیی ئەمنە سوورەكە )م كردووە ، تا ئێستاش بەردەوامم و خەریكی كۆكردنەوەی ئەرشیفی ناو ماڵانم و چاوپێكەوتنی زارەكی لەگەڵ شاهید حاڵەكاندا دەكەم.
هەر لەمیانەی گفتوگۆكەدا وتی: «كتێبێكیشم لەسەر شەهید مەلا عەلی بە ناوی ( شیعرو هەڵوێست دیوانی شەهید مەلاعەلی و چەپكێك بەڵگەی بیرەوەریی) چاپ كردووە، بە سوپاسەوە لقی سلێمانی یەكێتیی نووسەران بۆیان بە چاپ گەیاندووم، خۆشم لە ساڵی 1971ەوە ئەندامی یەكێتیی نووسەرانم، ئەوانی تریش بە سوپاسەوە كاك مەلا بەختیار هاوكار و پشتیوانم بووە» .
ئەمیرەخان هەروەها دەڵێت: «هەموو ئەو كارانەشم بە خۆبەخشی گەیاندووەتە دەستی خوێنەرو رەفەی كتێبخانەكان و ژیاندنەوەی مێژوویی یەكێتی و گەیاندنیان بە نەوەی دواڕۆژ « .
«هەر لە پڕۆژەكانی دیاریی ئازادی دەیان پیشانگە و فلیمێكی دیكۆمەنێتەریم ئامادەكردووە، هەروەها مۆنۆمێنتێكم لەبەردەم پاركی ئازادی بە هاوكاریی كاك مەلا بەختیار و كاك بەهرۆزی پارێزگاری ئەوكات بە ئەنجام گەیاندووە».
«دەیان كتێبم نزیك تەواوبوونەو تەمەنیش بوارم پێبدا دەیان بیرۆكەی جوانم لەلا گەڵاڵەبووە، هیوادارم جێبەجێیان بكەم. هەرچەندە مەرج نییە هەموو بیرۆكەیەك بگاتە ئەنجام، زۆر بیرۆكەم هەبووەو نەمتوانیووە بە ئەنجامیان بگەیەنم، لەوانە ( كردنەوەی خانەی بەساڵاچووان لەناو گەڕەكەكان و دەیانی تر)».
لە كۆتایی گفتوگۆكەدا بە هەناسەیەكی قووڵەوە بەردەوام بوو و وتی:» هەرچەندە كارەكەم پڕ ئازارو مەینەتییە ، رۆژانە ئازارەكان لام دووبارە دەبێتەوە، بەهۆی چاوپێكەوتنە نوێیەكانەوە، بەشێوازی جیاواز بەڵام بەوە دڵخۆش دەبم كە لەهەر چاوپێكەوتنێكدا گەنجینەیەكی پڕ گەوهەر دەبینم لە خەبات و مێژووە دراوشاوەكەی یەكێتی و لە دڵسۆزیی و وەفاداری كەسوكاری شەهیدان و ئەنفالكراوەكان و پێشمەرگەكان و بەردەوام بوونیان لەسەر هەمان رێباز «.
«هەروەها روح جوانیی ئەو كەسانەی چاوپێكەوتنیان بۆ دەكەم، دڵخۆشم دەكەن و دەڵێم ژیان هێشتا جوانیی خۆی هەیە دەتوانم بە نووسینەوەی ئەو هەموو ئازارو سەروەرییە كەمێك لە ئازارەكان كەم بكەمەوەو مشتێ بخەمە سەر خەرمانە پڕ سەروەرییەكەی یەكێتی» .
منیش دەڵێم : ئەمیرە محەمەد-یش یەكێكی دیكە لەو ژنانەیە كە مێژوو لەبیریان ناكات و نرخاندنی تێكۆشان و خزمەتەكانی، تیشكێكی دیكەی رووناكی دەخاتە سەر مێژوومان بۆ بەرچاوڕوونیی ئایندەو بونیادنانی داهاتوویەكی پرشنگدار.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شەڕی ناوخۆ مەگەر بەسەر جەستەی مندا رووبدات

لە كۆتایی مانگی رابردوودا، بەشی ئینگلیزیی كەناڵی «ئەلجەزیرە» چاوپێكەوتنێكی لەگەڵ ...