سەرەکی » دۆسێ » ئەمریكا بەرگری لە هاوپەیمانی عەرەبی دەكات

تۆمەتی تاوانی جەنگی رووبەڕووكراوە

ئەمریكا بەرگری لە هاوپەیمانی عەرەبی دەكات

ئیدارەی ئەمریكا، بەرگری لە هاوپەیمانمی عەرەبی دەكات لە یەمەن و دەڵێت، ئۆپەراسیۆنە سەربازییەكانی لەو وڵاتە بە بەئاگاییەوە ئەنجام دەدات و خۆی بەدووردەگرێت لە بەئامانجگرتنی مەدەنییەكان.
جیمس ماتیس وەزیری بەرگری ئەمریكا لەو بارەیەوە رایگەیاندووە»فڕۆكەوانە سعودی و ئیماراتییەكان كە لە ولایەتە یەكگرتووەكان مەشقییان پێكراوە، خۆیان بەدووردەگرن لە پێگە و دامەزراوە مەدەنییەكان، ئەمەش لەكاتێكدایە، نەتەوە یەكگرتووەكان رایدەگەیەنێت كە هەندێك لە بۆردومانەكانی هاوپەیمانی عەرەبی لە یەمەن، دەگەنە ئاستی ئەنجامدانی» تاوانی جەنگ».
جیمس ماتیس لە كۆتایی مانگی ئابی رابردوو رایگەیاندبوو»وڵاتەكەی بەردەوام دەبێت لەسەر هەماهەنگیكردن لەگەڵ هاوپەیمانی عەرەبی بە سەركردایەتی سعودیە لە یەمەن»، بەرگریشی لەو ئۆپەراسیۆنە سەربازیانە كردبوو كە هاوپەیمانی عەرەبی ئەنجامیان دەدات و نەتەوە یەكگرتووەكان لەراپۆرتێیكدا كە لەلایەن شارەزایانەوە ئامادەكراوە دەڵێت، بۆردومانەكان دەگەنە ئاستی ئەنجامدانی تاوانی جەنگ لە یەمەن.
ولایەتە یەكگرتووەكان تەئكید لەسەر بەردەوامبوونی دەكاتەوە لەو پشتیوانیانەی پێشكەش بە هاوپەیمانی عەرەبی دەكات، لەپێناو رووبەڕبوونەوەی حوسییەكان كە لەلایەن ئێرانەوە كۆمەك دەكرێن.
جیمس ماتیس لە كۆنفرانسێكی رۆژنامەوانی لە واشنتۆن رایگەیاندبوو»چەندان ساڵە هەماهەنگیمان لەگەڵ سعودیە و ئیمارات هەیە، هەوڵەكانیشتمان خستۆتەگەڕ، تا برینداربوون و كوژرانی مەدەنییەكان سنورداربكرێت».
بە گوتەی ماتیس»تەنانەت بۆ جارێكیش بێ‌ هودەییمان بەدی نەكردووە كاتێك نیگەرانییەكانمان بۆ هاوپەیمانی عەرەبی خستۆتەڕوو».
وەك وەزیری بەرگری ئەمریكا باسی دەكات»دەزانین ئەو مەشقەی بە فڕۆكەوانە سعودی و ئیماراتییەكان كراوە، بەرەنجامی هەیە، بەڵام هەندێك لە بۆردومانەكانی هاوپەیمانی عەرەبی لە هەندێك جاردا بونەتە مایەی كوژرانی دەیان مەدەنی، ئەمەش تەنیا هەڵەیە و دەكرێت بە كارەسات ناوببرێت».
جمیس ماتیس دەڵێت»بینیومانە فڕۆكەوانەكان لە ئاسماندا كاتێك هەستییان كردووە ئەركەكەیان مەترسی زۆری تێدایە، رەتیان كردۆتەوە بۆمبەكان بخەنەخوارەوە، پێشتریش رێگەی ئەمەیان پێدراوە، هەروەها بینیومانە رێوشوێن گیراوەتەبەر بۆ دیاریكردنی ئەو ناوچانەی خوێندنگە، یان نەخۆشخانەیان تێدا بووە».
ماتیس دان بەو هەڵانەدا دەنێت كە «بەتەواوەتی كارەساتبارن»، جەختیش لەسەر بەگەڕخستنی هەوڵەكان دەكاتەوە بۆ بەرگرتن لە دووبارەبوونەوەی ئەو هەڵانە.
شارەزایان و راهێنەرانی ئەمریكایی، رێنماییان داوەتە فڕۆكەوانە سعودی و ئیماراتییەكان، تا خۆیان لە بۆردومانكردنی مەدەنییەكان بەدووربگرن، بەڵام هێزەكانی هاوپەیمانی عەرەبی، بەردەوام بە ئەنجامدانی پێشێلكاریی تۆمەتباركراون، بە تایبەتیش ئەوەی پەیوەندی بەو دوو بۆردومانەوە هەبوو كە لە 23ی ئابی رابردوو لە خۆرئاوای یەمەن ئەنجامدران و تێیاندا زیاتر لە زیارتر لە بیست منداڵ كوژران.
لە بۆردومانێكی تری هێزەكانی هاوپەیمانی عەرەبی لە پارێزگای سەعدەی باكووری یەمەن، زیاتر لە 40 منداڵ كوژران، ئەمەش وای لە ئەنتۆنیۆ گۆتێریش سكرتێری گشتی نەتەوە یەكگرتووەكان كرد، داوای ئەنجامدانی لێكۆڵینەوەیەكی سەربەخۆ و بێ‌ لایەنانە بكات بۆ زانینی ئەو هۆكارانەی بونەتە مایەی ئەنجامدانی ئەو بۆردومانە.
ماتیس لە كۆتایی قسەكانیدا رایگەیاندبوو»بەڵێ‌ ئێمە بەشێوەیەكی بەردەوام چاو بەو پشتیوانییەدا دەخشێنینەوە كە پێشكەشی دەكەین، بەڵام باشترین رێگەچارە گەیشتنە بە دانوستان لەژێر سەرپەرشتی نەتەوە یەكگرتووەكان».
نەتەوە یەكگرتووەكان، بەرپرسیارێتی ئەنجامدانی تاوانی جەنگ دەداتە پاڵ هاوپەیمانی عەرەبی لە یەمەن، ئەمەش بە گوتەی وڵاتانی هاوپەیمانییەكە ملدانە بۆ گوشاری حوسییەكان، لەكاتێكدا ولایەتە یەكگرتووەكان، بەپێدانی سوتەمەنی، پشتیوان لەو هێزانە دەكات.
هەر لەو چوارچێوەیەدا، رێكخراوی هیومن رایتس وۆچ كە بایەخ بە مافەكانی مرۆڤ دەدات، هاوپەیمانی عەرەبی تۆمەتبار كردبوو بە ئەنجامدانی تاوانی جەنگ، ئەمەش بەهۆی ئەو بۆردومانەی لە مانگی ئابی رابردوو ئۆتۆمبێلی كردبووە ئامانج كە سەرنشینەكانی لە منداڵانی خوێندكار پێكاتبوون.
بیڵ ڤان ئەسفڵید، توێژەر لە رێكخراوەكە رایگەیاندبوو»ئەو هێرشە پێشێلكارییەكی نوێیە لە تۆماری چەپەڵی هاوپەیمانی عەرەبی لە كوشتنی مەدەنییەكان كە پێشتریش لە بۆردومانەكانیدا، زەماوەند و مەراسیمی بەخاكسپاردن و نەخۆشخانە و خوێندنگەكانی لە یەمەن كردۆتە ئامانج».
بە گوتەی ئەسفڵید»ئەو وڵاتانەی زانیارییان هەیە لەبارەی ئەو تۆمارە و بۆمب و موشەكیان داوەتە سعودییەكان،تێوەدەگلێن لەو جۆرە هێرشانەی لە ئایندەدا ئەنجام دەدرێن و تێیاندا مەدەنییەكان دەبنە قوبانی».
بەپێی راپۆرتەكان، ولایەتە یەكگرتووەكان بە بەهای 7 ملیار دۆلار چەكی نوێ‌ و پەرەسەندووی بەسعودیە و ئیمارات فرۆشتووە، ئەمەش بەپێی بەیاننامەیەكی رێكخراوی هیومن رایتس وۆچ.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

توركیا سوورە لەسەر ئاشكراكردنی چارەنووسی تەرمەكەی خاشقچی

توركیا ئاماژە بە رادەستكردنی تۆماركراوەكانی تایبەت بە كوژرانی جەمال خاشقچی ...