سەرەکی » راپۆرت » حه‌وته‌مین ساڵیادی كه‌ناڵی کەرکوکی برایەتی و پێکەوەژیان

حه‌وته‌مین ساڵیادی كه‌ناڵی کەرکوکی برایەتی و پێکەوەژیان

كه‌ركوك – هێمن ئه‌حمه‌د

رۆژی 3/9/2018، به‌ئاماده‌بوونی رزگار عه‌لی ئه‌ندامی مه‌كته‌بی سیاسی (ی.ن.ك)و ژماره‌یه‌ك له‌به‌پرسی‌ حیزبی‌‌و حكومی‌، حه‌وته‌مین ساڵیادی كه‌ناڵی‌ ئاسمانیی‌ كه‌ركوك كرایه‌وه‌.
سه‌ره‌تای ده‌ستپێكی مه‌راسیمه‌كه‌، خوێندنه‌وه‌ی وتارێك له‌لایه‌ن رزگار عه‌لی ئه‌ندامی مه‌كته‌بی سیاسی (ی.ن.ك)ه‌وه‌، خوێندرایه‌وه‌و رایگه‌یاند: «كه‌ناڵی ئاسمانیی كه‌ركوك، كه‌ناڵی برایه‌تی‌و پێكه‌وه‌ ژیانه‌ له‌نێوان سه‌رجه‌م پێكهاته‌كانی شاری كه‌ركوك، هه‌روه‌ها كه‌ناڵێكه‌ خۆشه‌ویستی له‌نێوان دانیشتوانی شاره‌كه‌ی دروستكردووه‌، بۆیه‌ به‌بۆنه‌ی حه‌وته‌مین ساڵیادی دامه‌زراندنی كه‌ناڵه‌كه‌وه‌ پیرۆزبایی‌و ده‌ستخۆشی له‌به‌ڕێوه‌به‌رو لێپرسراو و ته‌واوی ستافی كه‌ناڵه‌كه‌ ده‌كه‌م، كه‌توانیویانه‌ شه‌و و رۆژ بخه‌نه‌سه‌ر یه‌ك بۆ ئه‌وه‌ی بتوانن ئه‌ركی پیرۆزی خۆیان راپه‌ڕێنن كه‌ئه‌ویش ئه‌ركی میدیاییه‌ كه‌به‌چوار زمان په‌خش ده‌كرێت».

ته‌نیا دوو كه‌ناڵ هه‌یه‌ كه‌ به‌چوار زمان په‌خش ده‌كرێت
وتیشی: «له‌هه‌موو عیراقدا دوو كه‌ناڵ هه‌یه‌ كه‌ به‌چوار زمان په‌خش ده‌كرێت ئه‌ویش ئه‌م كه‌ناڵه‌و كه‌ناڵی ئه‌لعیراقیه‌ی كه‌ركوكه‌ كه‌جێی شانازین بۆیه‌ ده‌ڵێم: خۆزگه‌ سه‌رجه‌م حیزب‌و لایه‌نه‌ سیاسیه‌كانی ئه‌م حكومه‌ته‌ی ئێستای عیراق كه‌ له‌زۆر بواری ده‌ستوردا پێشێلكاری ده‌كات‌و یه‌كێك له‌و پێشێلكارییانه‌ش «زمانه‌»، چونكه‌ له‌میدیاكاندا زمانی نه‌ته‌وه‌كانی دیكه‌ به‌كار ناهێنێت‌و قسه‌ی پێناكه‌ن، بۆیه‌ هیوادارین ده‌سته‌ی راگه‌یاندنی عیراق گوێبیستی ئه‌م ره‌خنانه‌ بێت‌و له‌مه‌و به‌دوا به‌هه‌ر چوار زمانی نه‌ته‌وه‌كانی دیكه‌ش قسه‌ بكه‌ن‌و به‌تایبه‌تی له‌كه‌ناڵه‌ حكومیه‌كان».
وتیشی: «هه‌ڤاڵانی خۆشه‌ویست، مه‌به‌سته‌مه‌ ئه‌م یاده‌وه‌رییه‌ی به‌ڕێز مام جه‌لال بۆ ئێوه‌ باس بكه‌م، كه‌په‌یوه‌ندی به‌دامه‌زراندنی كه‌ناڵی ئاسمانیی كه‌ركوكه‌وه‌ هه‌یه‌، پێش حه‌وت ساڵ له‌مه‌وبه‌ر پێش دامه‌زراندنی ئه‌م كه‌ناڵه‌ ئێمه‌ ره‌خنه‌مان له‌یه‌كێتی ده‌گرت به‌تایبه‌تی له‌به‌ڕێز مام جه‌لال له‌به‌رامبه‌ریشدا مام دڵێكی فراوانی هه‌بوو بۆ گوێ گرتن، ره‌خنه‌كه‌مان له‌سه‌ر ئه‌وه‌ بوو ده‌مانگوت: له‌كه‌ركوك میدیاییه‌كی به‌هێزی نییه‌ كه‌بتوانێت واقیعه‌كه‌ی بۆ هه‌موو دونیا بگوازێته‌وه‌و باسی بكات، چونكه‌ سه‌ره‌تا كه‌ئه‌م كه‌ناڵه‌ دامه‌زرا كه‌ناڵه‌كه‌ لۆكاڵی بوو، بۆیه‌ بیرمه‌ هه‌ڤاڵ مام جه‌لال پێڕاگه‌یاندین (ئیتر له‌ره‌خنه‌ی ئێوه‌ رزگارم بوو ئه‌و داواكارییه‌ی ئێوه‌ داواتان ده‌كرت من جێبه‌جێیم كردو به‌ڵێتان پێده‌ده‌م خۆم سه‌رجه‌م پێداویستیه‌كانی كه‌ناڵێ ئاسمانی كه‌ركوك جێبه‌جێ ده‌كه‌م)، بۆیه‌ جێگای شازایمانمانه‌ كه‌توانیومانه‌ به‌و چوار زمانه‌ له‌م شاره‌ قسه‌ بكه‌ین.

روداوه‌كانی شانزه‌ی ئۆكتۆبه‌ر
باسیله‌وه‌شكرد له‌دوای روداوه‌كانی شانزه‌ی ئۆكتۆبه‌ره‌وه‌ زۆرێك له‌عه‌ره‌ب‌و توركمانی شۆفینی تۆمه‌ت‌و قسه‌ی توندوتیژیان بۆ پێكهاته‌ی كورد هه‌ڵده‌به‌ست، له‌به‌رامبه‌ردا كه‌ناڵی ئاسمانیی كه‌ركوك به‌شێوازێكی برایه‌تی‌و پێكه‌وه‌ژیان‌و ئه‌كادیمیانه‌ وه‌ڵامی ئه‌و لایه‌نه‌ شۆڤێنیانه‌یان ده‌دایه‌وه‌ له‌گه‌ڵ ئه‌وه‌شدا ئێمه‌ به‌رده‌وام ئامۆژگاری كه‌ناڵی ئاسمانیی كه‌ركوكمان ده‌كرت‌و جێگای شانازییه‌ ئێمه‌یه‌، چونكه‌ ده‌بێت به‌زمانی چه‌پكه‌ گوڵه‌كه‌ وه‌ڵامی نه‌یارانی كورد بده‌ینه‌وه‌و ئه‌م سیاسه‌ته‌ش جێگیره‌ لای یه‌كێتی نیشتمانیی كوردستان، بۆیه‌ ئه‌م كه‌ناڵه‌، كه‌ناڵی سه‌رجه‌م خه‌ڵكی هه‌رێمی كوردستان‌و حیزبه‌ سیاسیه‌كانێتی بۆ كاری میدیایی‌و پێكه‌وه‌ژیان، نه‌ك بۆ كاری حیزبایه‌تی.

ته‌نیا هه‌ر ماده‌ی 140 نییه‌
هه‌ر له‌ویاده‌دا رزگار عه‌لی وتی: «لای پێكهاته‌ی كورد ته‌نیا جێبه‌جێ كردنی ماده‌ی 140 گرنگه‌؟ نه‌خێر وانییه‌، به‌ڵكو زۆر ماده‌ی دیكه‌ هه‌ن گرنگن‌و ده‌بێت جێبه‌جێ بكرێن ئێمه‌ وه‌كو گه‌لی كورد له‌به‌ڕێوه‌بردنی عیراقدا له‌ڕووی پۆست‌و ئیداره‌‌و یاساكانی نه‌وت‌و گاز‌و یاساكانی په‌یوه‌ندی ده‌ره‌وه‌ی عیراق به‌ش خوراوین، بۆیه‌ ده‌بێت شاندی دانوسكاری كورد به‌گشت حیزبه‌كانی هه‌رێمی كوردستانه‌وه‌ پێداگری له‌سه‌ر بابه‌ته‌ ده‌ستوریه‌كان بكه‌ن‌و نابێت به‌قسه‌ی ئه‌وانه‌ هه‌ڵبخه‌ڵه‌تێن چونكه‌ ئه‌وان ده‌ڵێن: ئێمه‌ پابه‌ندی ده‌ستورین، كه‌چی ئه‌وا 15 ساڵه‌ ئه‌وان پابه‌ندی ده‌ستور نه‌بونه‌و نابن، نموونه‌ش له‌ساڵی 2007 دا، بڕیارێك له‌سه‌ر زه‌وی گرێبه‌ست ده‌رچووه‌ كه‌چی ماوه‌ی 11 ساڵه‌ ئه‌و نوسراوه‌یان شاردۆته‌وه‌، بۆیه‌ ده‌بێت ئێمه‌ی كورد زۆر به‌وردی‌و ژیرانه‌ له‌گه‌ڵ ئه‌م حكومه‌ته‌ نوێیه‌ مامه‌ڵه‌ بكه‌ین، چونكه‌ ئه‌وانه‌ به‌قسه‌و ڕاگه‌یاندنه‌كانیان بێت؟ هیچیان نه‌هێشتوته‌وه‌، به‌ڵام له‌ڕاستیدا كه‌سێكی ترن، ده‌بێت به‌شێوازێك رێكه‌وتن له‌گه‌ڵیان ئه‌نجامبده‌ین كه‌ره‌نتیان لێوه‌ربگێرێ‌و داواكارییه‌كانمان جێبه‌جێ بكه‌ن بۆ ئه‌وه‌ی جارێكی تر كورد له‌خشته‌ نه‌برێت، چونكه‌ له‌عیراق حكومه‌تی شه‌راكه‌ت نییه‌، له‌به‌ر ئه‌وه‌ی له‌پێش شانزه‌ی ئۆكتۆبه‌رو دوای شانزه‌ی ئۆكتۆبه‌رش كۆمه‌ڵێك بڕیارمان بینی كه‌ له‌په‌رله‌مانی عیراقه‌وه‌ ده‌رچوو كه‌پشت به‌وه‌ ده‌به‌ستن كێ زۆرینه‌یه‌‌و كێ كه‌مینه‌یه‌ بۆیه‌ لێره‌دا كورد زه‌ره‌رمه‌ند ده‌بێت، چونكه‌ كورد له‌چاو عه‌ره‌بی سونه‌‌و شیعه‌ كه‌مینه‌یه‌، بۆیه‌ ئه‌وان هه‌موو كات ده‌توانن له‌په‌رله‌مانی عیراق بڕیار له‌دژی كورد بده‌ن وه‌ك ئه‌وه‌ی له‌ماوه‌ی رابردوو بینیمان‌و هه‌ر ئه‌وان بوون سیسته‌می لێكتێگه‌یشتن‌و شه‌راكه‌تیان له‌عیراق تێكدا، هۆكاره‌كه‌شی هه‌ر بۆ سیاسه‌تی عه‌ره‌ب ده‌گه‌ڕێته‌وه‌، بۆ هه‌موو لایه‌كیش ده‌ركه‌وت كه‌كاتێ داعش هێرشی بۆ عیراق هێنا كێ به‌رگری كردو كێ زیاتر خاكی خۆی پاراست؟ كه‌چی ئه‌و حكومه‌ته‌ی كه‌ئێستا ڕۆژانه‌ چوار ملیۆن به‌رمیل نه‌وت ده‌فرۆشێت نه‌یتوانی پارێزگاری له‌رۆزبه‌ی پارێزگاكانی عیراق بكات، به‌ڵام هێزه‌كانی پێشمه‌رگه‌ به‌و هه‌موو ماڵوێرانیه‌و قه‌یرانی داراییه‌ له‌پێش هه‌مویانه‌وه‌ كه‌ركوك‌و كه‌ركوكیه‌كانی پاراست، بۆیه‌ له‌كۆتاییدا دوباره‌ له‌ یادی حه‌وته‌مین ساڵه‌ی دامه‌زراندنی كه‌ناڵی ئاسمانیی كه‌ركوك پیرۆزبایی له‌سه‌رجه‌م كارمه‌ندانی ده‌كه‌م، كه‌لای ئێمه‌ی یه‌كێتی تاكه‌ كه‌ناڵه‌ كه‌ له‌كاتی بانگه‌شه‌ی هه‌ڵبژاردنی 12ی ئایاری ئه‌م ساڵدا توانی سه‌ركه‌وتوانه‌ ریكلام بۆ لیستی یه‌كێتی نیشتمانیی كوردستان له‌كه‌ركوك بكات.

چاره‌سه‌ر كردنی كێشه‌ی ماده‌ی 140
له‌وباره‌یه‌وه‌ دلێر مامۆستا قادر به‌ڕێوه‌به‌ری گشتیی كه‌ناڵی ئاسمانیی كه‌ركوك به‌كوردستانی نوێ-ی راگه‌یاند: «كردنه‌وه‌ی كه‌ناڵی ئاسمانیی كه‌ركوك دیاری سه‌رۆك «مام جه‌لال» بوو بۆ شاری كه‌ركوك، مه‌به‌ست له‌كردنه‌وه‌ی ئه‌و كه‌ناڵه‌ش ئه‌وه‌ بوو كه‌ كه‌ناڵێكی تایبه‌ت بێ به‌شاری كه‌ركوك. سیاسه‌ت‌و بیرو بۆچونی یه‌كێتی نیشتمانی كوردستان بوو ئه‌وه‌ی كه‌په‌یوه‌ندی به‌پێكه‌وه‌ژیانی نێوان نه‌ته‌وه‌كانی دیكه‌ی كه‌ركوكه‌وه‌ هه‌یه‌، هه‌روه‌ها ئه‌و بیرو بۆچونانه‌ی كه‌ئێمه‌ی یه‌كێتی بڕوامان پێیه‌تی ئه‌ویش كوردستانی بوونی كه‌ركوكه‌و بڕوامان به‌وه‌ش هه‌یه‌ كه‌ له‌كه‌ركوك پێكهاته‌ی عه‌ره‌ب‌و توركمان‌و كلدو ئاشوور هه‌یه‌و پێكه‌وه‌ له‌م شاره‌ ژیان به‌سه‌ر ده‌به‌ین، چونكه‌ یه‌كێتی ماڵه‌ گه‌وره‌یه‌و جێگای پێكهاته‌كانی دیكه‌ش له‌دام‌و ده‌زگاكانی ده‌بێته‌وه‌و یه‌كێتی ده‌بێته‌ پارێزه‌ری ماف‌و ده‌ستكه‌وته‌كانی ئه‌وان، هه‌روه‌ها مه‌به‌ستێكی دیكه‌ هه‌یه‌ ئه‌ویش ئه‌وه‌یه‌ له‌ڕێگای ئه‌م كه‌ناڵه‌وه‌و له‌چوار چێوه‌ی سیاسه‌تێكی واقیعانه‌وه‌ كه‌ركوك بگه‌ڕێنینه‌وه‌ سه‌ر هه‌رێمی كوردستان‌و هه‌روه‌ها چاره‌سه‌ر كردنی كێشه‌ی ماده‌ی 140».

تاكه‌ كه‌ناڵه‌ به‌چوار زمان په‌خش ده‌كات
هیدایه‌ت ره‌حیم جێگری به‌ڕێوه‌به‌ری گشتیی كه‌ناڵی ئاسمانیی كه‌ركوك به‌كوردستانی نوێ-ی راگه‌یاند: له‌دوای ئه‌و قه‌یرانه‌ داراییه‌ی كه‌ئێستا به‌روكی عیراق‌و هه‌رێمی كوردستانی گرتوته‌وه‌و كه‌ناڵی ئاسمانیی كه‌ركوكیش به‌ده‌ر نییه‌ له‌و قه‌یرانه‌ ئێمه‌ به‌رده‌وامین له‌پێشكه‌شكردنی په‌خشی به‌رنامه‌ سیاسیه‌كان‌و هه‌واڵه‌كانی كه‌ركوك‌و هه‌رێمی كورستان‌و عیراق به‌گشتیی، به‌ڵام ره‌نگه‌ له‌تموحی ئێمه‌دا نه‌بێ، به‌ڵام چۆكمان دانه‌داوه‌و به‌رده‌وامین له‌كاری رۆژانه‌ی خۆمان. خۆشبه‌ختانه‌ ساڵیپار نوسراوێكمان بۆ مه‌كته‌بی راگه‌یاندنی كردو ئه‌وانیش نوسراویان بۆ مه‌كته‌بی سیاسی یه‌كێتی كرد كه‌ ناوی بنێن ده‌زگای میدیایی كه‌ركوك، چونكه‌ (كه‌ناڵی لۆكاڵی كه‌ركوك، كه‌ركوك سپۆرت، چاپخانه‌ی شه‌هید ئازاد هه‌ورامی، رادیۆی كه‌ركوك F.M) له‌خۆ ده‌گرێت».

درێغیمان نه‌كردووه‌
مه‌هدی حاته‌م لێپرسراوی یه‌كه‌ی ئه‌رشیف‌و مۆنتاژی هه‌واڵ به‌كوردستانی نوێی راگه‌یاند: «به‌م بۆنه‌یه‌وه‌ پیرۆزباییه‌كی گه‌رم له‌سه‌رجه‌م كارمه‌ندان‌و بینه‌رانی كه‌ناڵی ئاسمانیی كه‌ركوك ده‌كه‌م‌و هیوادارین ئه‌و كارو به‌رنامانه‌ی پێشكه‌شمان كردووه‌ جێگه‌ی ره‌زامه‌ندی ئه‌وان بوبێت‌و داوای لێبوردنیانیش لێده‌كه‌ین به‌هۆی ئه‌م قه‌یرانه‌ داراییه‌وه‌ گه‌ر هه‌ر كه‌م‌و كوڕیه‌كه‌مان هه‌بوبێت، چونكه‌ ئه‌م كه‌ناڵه‌ دیاری سه‌رۆك مام جه‌لال بوو بۆ كه‌ركوك، بۆیه‌ هه‌ر لێره‌وه‌ داوا له‌به‌رپرسان‌و غه‌مخۆرانی شاری كه‌ركوك ده‌كه‌ن ئاوڕێك له‌م كه‌ناڵه‌ بده‌نه‌وه‌، چونكه‌ قه‌یرانی دارایی كاریگه‌ری له‌سه‌رمان دروستكردووه‌، به‌ڵام له‌گه‌ڵ ئه‌وه‌شدا ئێمه‌ درێغیمان نه‌كردووه‌». وتیشی: «هیوادارین له‌وه‌رزی نوێدا بتوانین چه‌ند گۆڕانكاریه‌ك له‌به‌رنامه‌كان بكه‌ین بۆئه‌وه‌ی دڵی بینه‌ری خۆمانی پێخۆش بكه‌ین».

به‌ربه‌ست‌و گرفته‌كان بشكێنین
مه‌حمه‌د تاهیر لێپرسراوی یه‌كه‌ی په‌یامنێران كه‌سه‌ر به‌ به‌شی هه‌واڵه‌ به‌كوردستانی نوێ-ی راگه‌یاند: «به‌ هیواین له‌مساڵدا بتوانین به‌باشترین شێوه‌ كاربكه‌ین‌و ئه‌و به‌ربه‌ست‌و گرفتانه‌ی دێنه‌ به‌ر كه‌ناڵه‌كه‌ تێكی بشكێنین، هه‌ڵبه‌ت كاری راگه‌یاندن له‌هه‌ر شوێنێك بێت بۆ خۆی كارێكی سه‌خته‌، گرانه‌، ماندوبوون، گرفته‌…هتد، به‌ڵام ده‌توانم بڵێم له‌شاری كه‌ركوك چوار هێنده‌ كاری راگه‌یاندن قورسه‌، بۆیه‌ هیوادارم له‌ساڵی ئاینده‌دا كاری باشتر پێشكه‌ش بكه‌ین‌و سه‌رجه‌م دام‌و ده‌زگاكان پاڵپشتمان بن بۆ رۆماڵكردنی راپۆرت‌و هه‌واڵ كه‌ له‌شاره‌كه‌ روبده‌ن». وتیشی: «له‌دوای حه‌وته‌مین ساڵیادی كه‌ناڵه‌كه‌ی به‌نیازین كار له‌سه‌ر پرسه‌ چاره‌نوسسازه‌كان‌و له‌سه‌ر كێشه‌ هه‌ڵپه‌سێنراوه‌كان بكه‌ین، هه‌روه‌ها ریپۆرتاژ له‌سه‌ر كۆمه‌ڵێك پرۆژه‌ی به‌سود بكه‌ین‌و راپۆرت له‌سه‌ر ئه‌و پرۆژانه‌ بكه‌ین كه‌ تائێستا ته‌واو نه‌كراون‌و هه‌روه‌ها كار له‌سه‌ر داهاتی كه‌ركوك بكه‌ین».

بینه‌ری كه‌ناڵه‌كه‌ رواوه‌ته‌وه‌
هونه‌رمه‌ندی موزیسیان رزگار حه‌مه‌ڕه‌ئوف لێپرسراوی به‌شی دۆبلاژ به‌كوردستانی نوێ-ی راگه‌یاند: «پیرۆزبایی له‌سه‌رجه‌م كارمه‌ندانی ئێستاو رابردو ده‌كه‌م‌و سه‌ری رێزو نه‌وازش بۆ سه‌رجه‌م شه‌هیدان‌و شه‌هیدانی كه‌ناڵی ئاسمانیی كه‌ركوك داده‌نوێنم، هیوادارم له‌ساڵی ئاینده‌دا بتوانین كارو به‌رهه‌مه‌كانمان له‌ئاستی چاوی بینه‌ره‌كانمان بێت، خۆشبه‌ختانه‌ ئێستا بینه‌ری كه‌ناڵی ئاسمانیی كه‌ركوك تاراده‌یه‌ك رواوه‌ته‌وه‌و له‌گه‌ڵ ئه‌وه‌شدا گله‌ییان هه‌یه‌و مافی خۆیانه‌، چونكه‌ بینه‌ری ئه‌م كه‌ناڵه‌ چاوی به‌ به‌رهه‌م‌و به‌رنامه‌ی جوان راهاتبوو كه‌ئێستا به‌رهه‌می كه‌ناڵه‌كه‌ كه‌م بۆته‌وه‌ هۆكار زۆرن، یه‌كێك له‌و هۆكارانه‌ قه‌یرانی داراییه‌، به‌ڵام له‌به‌رامبه‌ریشدا ده‌بێ بینه‌ر ماف به‌ئێمه‌ش بده‌ن كه‌تووش ئه‌و قه‌ریرانه‌ داراییه‌ هاتووین‌و له‌دوای كۆچی سه‌رۆك مام جه‌لالیشه‌وه‌ ئه‌م كه‌ناڵه‌ فه‌رامۆش كراوه‌و به‌بێ كه‌سی له‌م شاره‌ ماوینه‌ته‌وه‌».
وتیشی: «تائێستا سێ درامای بیانیمان دۆبلاژكردوه‌ بۆ سه‌ر زمانی كوردی، به‌ڵام به‌داخه‌وه‌ له‌ئێستادا ناتوانین ئه‌و كاره‌ بكه‌ین، ئه‌ویش بۆ هۆكاری قه‌یرانی دارایی ده‌گه‌ڕێته‌وه‌».

ئومێده‌وارین بگاته‌ ئاستی خۆی
هه‌وراز فواد لێپرسراوی به‌شی هونه‌ری كه‌ناڵی ئاسمانیی كه‌ركوك به‌كوردستانی نوێ-ی راگه‌یاند: «له‌م به‌شه‌دا سه‌رجه‌م كاره‌ هونه‌ریه‌كان ده‌كه‌وێته‌ سه‌ر ئه‌ستۆمان‌و كاری SNGیش، واته‌ په‌خشی راسته‌خۆو تا ئێستا چه‌ندین بۆنه‌مان گواستوته‌وه‌ له‌م دواییه‌شدا گواستنه‌وه‌ی ساڵیادی شه‌هیدی سه‌ركرده‌ ئازاد هه‌ورامی له‌م به‌شه‌ جێبه‌جێی كردو له‌ئێستادا سه‌رقاڵی ئه‌وه‌ین كه‌ كۆمه‌ڵێك به‌رنامه‌ بۆ كه‌ناڵه‌كه‌ زیاد بكه‌ین وه‌كو به‌رنامه‌ی سیاسی، هونه‌ری، ته‌ندروستی، هاتوچۆ». وتیشی: «ئومێده‌وارم كه‌ناڵه‌كه‌ بگاته‌ ئاستی كه‌ناڵه‌ باشه‌كانی هه‌رێمی كورستان.

بۆته‌ ماڵی وه‌رزشكارانی
ئه‌زهه‌ر سه‌مه‌د په‌یامێنری یه‌كه‌ی وه‌رزشی له‌كه‌ناڵی ئاسمانیی كه‌ركوك به‌كوردستانی نوێ-ی راگه‌یاند: «یه‌كه‌كه‌ بۆته‌ جێگه‌ی ره‌زامه‌ندی وه‌رزشكارانی شاری كه‌ركوك ئه‌ویش به‌هۆی ئه‌وه‌ی به‌پێچه‌وانه‌ی كه‌ناڵه‌كانی دیكه‌وه‌ گرنگی‌و تایبه‌تی به‌هه‌واڵه‌كانی ناوخۆ ده‌دات». وتیشتی: «له‌ماوه‌ی رابردوو یه‌كه‌ی وه‌رزشی به‌بێ جیاوازی حیزبی‌و نه‌ته‌وایه‌تی روماڵی رووادو چالاكییه‌ وه‌رزشیه‌كانی شارو شارۆچككه‌كانی كوردستانی كردووه‌و بۆته‌ ماڵی وه‌رزشكارانی شاره‌كه‌».
باسی له‌وه‌شكرد له‌ماوه‌ی رابردوودا سه‌رۆكی لیژنه‌ی ئۆلۆمپی كوردستان سه‌ردانی كردین‌و پێی راگه‌یاندین كه‌كه‌ناڵی كه‌ركوك ته‌نیا كه‌ناڵه‌ كه‌گرنگی به‌هه‌واڵه‌ وه‌رزشیه‌ ناوخۆیه‌كان ده‌دات به‌جۆرێك هیچ كه‌ناڵێكی دیكه‌ هینده‌ی وه‌رزشی كه‌ركوك خزمه‌تی وه‌رزشكارانی ناوخۆی نه‌كردووه‌.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

five − 5 =

x

هەواڵێ هاوشێوە

پۆپۆلیستی‌ جیهان ده‌گرێته‌وه‌‌و هه‌ڕه‌شه‌ له‌ به‌ها مه‌زنه‌كان ده‌كات

ئه‌بوبه‌كر ئه‌لعه‌یادی‌ له‌م ساڵانه‌ی‌ دواییدا دیموكراسی‌ بۆته‌ بابه‌تی قسه‌‌و باسی‌ ...