دكتۆر جەمال ئەحمەد رەشید نیو سەدە لە خزمەتكردنی منداڵان – knwe.org
سەرەکی » راپۆرت » دكتۆر جەمال ئەحمەد رەشید نیو سەدە لە خزمەتكردنی منداڵان

دكتۆر جەمال ئەحمەد رەشید نیو سەدە لە خزمەتكردنی منداڵان

دوای زیاتر لە 45 ساڵ لە خزمەتكردنی منداڵانی نەخۆش، دكتۆر جەمال ئەحمەد رەشید پسپۆڕی نەخۆشییەكانی منداڵان پاش ململانێیەكی زۆر لەگەڵ نەخۆشیی شێرپەنجەدا، بەرەبەیانی 4/9/2018 لەتەمەنی 73 ساڵیدا لەئەڵمانیا كۆچی دوایی كرد.
دكتۆر جەمال ئەحمەد رەشید چەند ساڵێك لەمەوبەر تووشی نەخۆشیی شێرپەنجە بوو، جگە لە نەخۆشخانەی هیوا لە سلێمانی، چەندجارێك بۆ چارەسەر سەردانی دەرەوەی وڵاتی كردووە، بەڵام نەتوانراوە چارەسەر بكرێت. پاش كۆچی دواییشی لەڕۆژی 4/9، شەوی 6/9 تەرمی دكتۆر جەمال لەڕێگەی فڕۆكەخانەی نێودەوڵەتیی سلێمانییەوە گەیەنرایەوە كوردستان‌و لەلایەن كەسوكار‌و بەرپرسانی حكومی‌و حزبی‌و وەزیرو بەڕێوەبەران‌و پزیشك‌و كارمەندانی تەندروستی‌و جەماوەرێكی زۆرەوە پێشوازیی لە تەرمەكەی كرا، بەرەبەیانی 7ی مانگیش تەرمەكەی لەمزگەوتی ئەحمەدی حاجی عەلییەوە لەڕێوڕەسمێكی تایبەتدا بەڕێكرا بۆ نەخۆشخانەی فێركاریی منداڵان‌و لەوێشەوە بەرەو گۆڕستانی سەیوان‌و لەتەنیشت ئەندامانی خانەوادەكەیەوە بە خاك سپێردرا.

خەڵاتی پزیشكانی پێشەنگ
دكتۆر جەمال، یەكێك بوو لە پزیشكە ناسراوو دیارەكانی شاری سلێمانی‌و كوردستان لە بواری نەخۆشییەكانی منداڵان، بەهۆی كاركردنی بەشێوەیەكی دڵسۆزانە‌و بێ دابڕان لە چارەسەركردنی منداڵان‌و ئەنجامدانی چەندین كاری خێرخوازی، هەروەها هەرزانیی نرخی پسووڵەی كلینیكەكەیەوە، ساڵی 2016 لە هەڵبژاردنی پزیشكی ساڵ‌و پزیشكانی پێشەنگدا، خەڵاتی پزیشكانی پێشەنگی پێبەخشرا.

پزیشكێكی نموونەیی
وەزارەتی تەندروستی هەرێمیش بەو بۆنەیەوە، لەڕاگەیەنراوێكدا، ئەوەی دووپاتكردۆتەوە كە دكتۆر جەمال، یەكێك بوو لە پزیشكە هەرە سەركەوتوو و دڵسۆز‌و ماندوونەناس‌و بە ئەزموونەكان، هەمیشە خۆی‌و تواناو كاتەكانی تەرخان دەكرد بۆ خزمەتی منداڵانی نەخۆش‌و كەمكردنەوەی ئازارەكانیان. هەروەها پزیشكێكی نموونەیی بوو لەڕەوشت بەرزیی پزیشكییدا، پیشەكەی خستبووە سەروو هەموو بەرژەوەندییەكانەوە.

نەخۆشخانەی منداڵان كرا بەناوی دكتۆر جەمالەوە
وەك وەفایەكیش بۆ دڵسۆزی‌و ماندووبوونی لەخزمەتكردنی منداڵانی نەخۆشدا، دكتۆر رێكەوت حەمەڕەشید وەزیری تەندروستیی هەرێم، رایگەیاند: لەپای خزمەت‌و ماندووێتی‌و دڵسۆزیی دكتۆر جەمال بۆ منداڵانی سلێمانی‌و كوردستان، دوای راوێژ لەگەڵ تەندروستیی سلێمانی، بڕیارماندا ناوی نەخۆشخانەی فێركاری منداڵانی سلێمانی بگۆڕین بۆ نەخۆشخانەی دكتۆر جەمال ئەحمەد رەشید، كە ئەوە زۆر كەمترە لەبەرامبەر خزمەتەكانی دكتۆر جەمال‌و پێویستە زۆر زیاتری بۆ بكرێت.
پاش كۆچی دواییشی، هاووڵاتیان بەگشتی‌و بەتایبەتیش لە تۆڕە كۆمەڵایەتییەكاندا، بەشێوازی جۆراوجۆر گوزارشتیان لە نیگەرانیی خۆیان دەكردو هاوخەمییان دەردەبڕی‌و نموونە جوانەكان‌و خزمەتە پڕماناكانی دكتۆر جەمال-یان دەهێنایەوە یاد.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

كار بۆ ده‌كردنی‌ ئه‌و یاسا و بڕیارانه‌ ده‌كه‌ین كه‌ ئه‌مرۆ كۆمه‌ڵگای‌ كوردستان پێویستیەتی

ته‌ها عه‌بدوڵڵا كاندیدانی‌ لیستی‌ 105ی یه‌كێتی‌ نیشتمانی‌ كوردستان به‌ڵێن دووپات ...