گروپە چەكدارەكانی ئۆپۆزسیۆنی سوریا یەكدەگرن – knwe.org
سەرەکی » دۆسێ » گروپە چەكدارەكانی ئۆپۆزسیۆنی سوریا یەكدەگرن

چاوەڕوانی هێرشی سوپا دەكەن

گروپە چەكدارەكانی ئۆپۆزسیۆنی سوریا یەكدەگرن

چەند گروپێكی چەكداریی ئۆپۆزسیۆن لە پارێزگاكانی ئیدلیب و حەمما و حەلەب لە باكووری سوریا، لە هاوپەیمانییەكی نوێ‌ و بە سەرپەرشتی توركیا لەژێر ناوی «بەرەی رزگاریی نیشتمانی| یەكیان گرت، ئەمەش بە مەبەستی پێكهێنانی «بنەمای سوپایەكی شۆڕشگێڕ» لە ئایندەدا.
ئەم راگەیاندنە دوای «وتوێژەكانی سوچی» بوو كە لەم ماوەیەی دواییدا لە روسیا سەبارەت بە رەوشی سەربازیی لە سوریا سازكرا. ئەمەش هاوكاتە لەگەڵ لێدوانی بەرپرسانی سوریا كە دەڵێن، ئامانجی داهاتووی ئۆپەراسیۆنە سەربازییەكانی داهاتوو، باكووری سوریا كە ئەو گروپانە تێیدا لەنگەرییان گرتووە.
سێ‌ گروپ دەستییان گرتووە بەسەر ناوچەكانی باكووری سوریا كە لەدەرەوەی دەسەڵاتی حكومەتی سوریایە. دوو ناوچە لەلایەن دوو گروپی سەر بە توركیاوە كۆنترۆڵ كراوە، ناوچەی سێیەم لەژێر دەستی گروپە ئۆپۆزسیۆنە جیهادییە توندڕەوەكاندان.

«قەڵغانی فورات» و «چڵە زەیتون»
ناوچەكانی قەڵغانی فورات و ئەو شارۆچكانەن كە كەوتوونەتە باكوور و خۆرئاوای پارێزگای ئیدلیب، شاری جەرابلوس لە خۆرهەڵاتەوە بۆ ئەعزاز و باب لە باشوورەوە لەخۆدەگرێت.
گروپەكانی ئۆپۆزسیۆن كە لەلایەن توركیاوە پشتیوانی دەكرێن، دەستییان گرت بەسەر ئەو ناوچانەی پێشتر لەژێر دەستی « رێكخراوی دەوڵەتی ئیسلامی»دا بوون و دواتر لە كۆتایی ساڵی 2016 و سەرەتاكانی ساڵی 2017 لەیەن ئەو گروپانەوە كۆنترۆڵكران.
ئەو گروپە سەرەكییانەی لەو دەمەدا بەشدارییان لە ئۆپەراسیۆنەكەدا كرد «فیرقەی سوڵتان موراد» و «فیرقەی حەمزە» و «لیوای موعتەسەم» بوون.
هەموو گروپە چەكدارەكان لە پارێزگای حەلەب لە مانگی كانوونی یەكەمی ساڵی 2017، پێكهێنانی «سوپای نیشتمانی»یان راگەیاند كە 20 هەزار چەكداری لەخۆگرت و لەو پرۆسەیەشدا زیاتر لە 30 گروپ بەشدارییان كرد. ئەو «سوپای نیشتمانی»یە سەر بە وەزارەتی بەرگری حكومەتی ئۆپۆزسیۆنە كە بارەگاكەی لە توركیایە.
سوپاكە لەنێوان ئەو هێزانەدا بوو كە بەشدارییان لە ئۆپەراسیۆنی «چڵە زەیتون»دا كرد و بە كۆنترۆڵكردنی ناوچە كوردییەكان لەلایەن سوپای توركیا و گروپەكانی سەر بەو وڵاتە لە مانگی ئاداری 2018، كۆتایی هات.
عەفرین بەر لەوە لەژێر دەستی یەكینەكانی پاراستنی گەلی كورد «یەپەگە»دا بوو.

ئیدلیب، حەما و حەلەب
ئەو ناوچانەی لەلایەن ئۆپۆزسیۆنەوە كۆنترۆڵكراون لە پارێزگای ئیدلیب و ناوچە خۆرئاواییەكانی پارێزگای حەلەب و ناوچەكانی باكووری حەمما ئاڵۆزن، چونكە زۆربەی ناوچەكانی پارێزگای ئیدلیب لە ئێستادا لەژێر كۆنترۆڵی هاوپەیمانی جیهادی هەیئەی تەحریری شامە (بەرەی نوسرەی پێشوو) لەگەڵ گروپە چەكدارەكانی تری سەر بە توركیا.
لە سەرەتای ساڵی 2018، دوو گروپی ركابەری هەیئەی تەحریری شام كە ئەحرار شام و نورەدین زەنكی بوونن لەگەڵ چەند گروپێكی بچوكی تردا یەكیان گرت و «بەرەی رزگاری سوریا»یان دروستكرد، ئەو بەرەیە بۆ ماوەی دوو مانگی چەند شەڕی لە دژی هەیئەی تەحریری شامدا كرد لەو ناوچانەی دەكەونە نێوان ئیدلیب و حەلەب.
بەپێی ماڵپەڕی «عنب بلدی»ی ئۆپۆزسیۆن، لە كۆتایی ئایاری 2018، 11 گروپی چەكداری تر یەكیان گرت و «بەرەی نیشتمانی بۆ رزگاری»یان دروست كرد.
ئەو گروپە سەرەكیانەی چوونە بەرەكەوە، فەیلەقی شام و سوپای ئیدلیب و ئیدلیبی ئازاد و سوپای نەسر بوون.
لەدوای وتوێژەكانی ئەم دواییەی سوچی لەنێوان توركیا و روسیا و ئێران، سەبارەت بە رەوشی سەربازی لە سوریا لە سەرەتای مانگی ئابی رابردوو، پێنج گروپی سەرەكی تر لە ئیدلیب و حەلەب كە «بەرەی رزگاریی سوریا» لەنێوانیاندا بوو لەگەڵ هەندێك گروپی تری ركابەری هەیئەی تەحیری شام لەوانە، هەڵۆكانی شام و سوپای شام، چونە بەرەكەوە.

هەیئەی تەحریری شام
تائێستاش ژمارەیەك گروپی جیهادی سەرەكی هەن كە بونێكی بەهێزیان هەیە لە پارێزگای ئیدلیب و ناوچەكانی دەوروبەری. دوای بەرپابوونی شەڕی ناوخۆ لەگەڵ هاوپەیمانی پێشووی (ئەحرار الشام)، هەیئەی تەحریری شام لە هاوینی ساڵی 2017، دەستی گرت بەسەر زۆربەی ناوچەكانی پارێزگای ئیدلیب، بە كاروبارە مەدەنی و سەربازییەكانیش لە پارێزگاكە.
زۆرێك لە میدیاكانی سوریا، پێشبینیان كردبوو توركیا لە ئیدلیب پشتیوانی لە كۆتایی هێنان بە بوونی هەیئەی تەحریری شام بكات، بەڵام ئەمە روینەدا، بگرە چەكدارانی هەیئەی تەحریری شام هاوشان لەگەڵ كاروانە سەربازییەكانی توركیادا چونە ئیدلیب و باكووری حەلەب و حەمما بۆ دامەزراندنی خاڵی چاودێری سەربازی، ئەمەش لە چوارچێوەی رێكەوتنی هێوركردنەوە كە لە مانگی ئەیلولی 2017 لەنێوان روسیا و ئێران و توركیا، ئیمزاكرا.

«حراس الدین»
گروپی «حراس الدین» لە كۆتایی شوباتی 2018 دامەزرا، و چەند گروپێكی پەیوەست بە رێكخراوی قاعیدەی لەخۆگرت. ئەو گروپانە لە هەیئەی تەحریری شام جیابوونەوە بەهۆی بڕیاری هەیئەكە كە پەیوەندی لەگەڵ قاعیدەدا پچڕاند لە تەمموزی 2016.
دەگوترێت ئەو گروپە لە ناوچەكانی ژێر دەسەڵاتی ئۆپۆزسیۆن لەنێوان پارێزگاكانی ئیدلیب و لازقیە و حەمما بڵاوبونەتەوە. گروپەكە لە كۆتایی مانگی نیسانی رابردوو، یەكەم ئەپەراسیۆنی سەربازی لە دژی هێزەكانی سەر بە حكومەت لە باكووری پارێزگای حەمما ئەنجامدا.

حزبی توركستانی ئیسلامی
گروپێكە لە چەكدارە كۆنەكانی سەر بە رێكخراوی قاعیدە پێكهاتووە، لە ناوچەكانی شنگیانگی باكووری خۆرئاوای چینەوە سەریهەڵداوە، بەڵام لە سەرەتای سەرهەڵدانی تەنگژەكانی سوریا، گروپەكە بونێكی چەسپاوی هەیە لە باكووری سوریا و نزیكە لە هەیئەی تەحریری شام، بێلایەنی هەڵبژاردووە لەو ململانێیەی لەنێوان گروپە ئۆپۆزسیۆنەكاندا رویداوە.
حزبەكە لە سوریادا چالاكی هەیە و بۆتە جێگەی رێزی هەموو جیهادییەكان و ئۆپۆزسیۆنی سوریا، لەگەڵ لایەنە جیهادی و ئۆپۆزسیۆنەكان بەبێ‌ جیاوازیی لە دژی هێزەكانی حكومەت شەڕی كردووە.
میدیای تایبەت بە خۆی هەیە و لە تیلیگرامەوە بڵاوكراوە ریكلامییەكان و دیمەنە ڤیدیۆییەكانی خۆی كە پڕوپاگەندەن بۆ چالاكییەكانی لە سوریا، پەخش دەكات.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئەنقەر هاوڵاتییەكی بەریتانی بە حەوت ساڵ زیندانی سزادەدات

توركیا سزای زیندانی دەسەپێنێت بەسەر سەربازێكی پێشووی سوپای بریتانیا كە ...