سەرەکی » وتار » دەیەیەك لە كوردستانی نوێ

دەیەیەك لە كوردستانی نوێ

رۆژێكی ساردی زستانی ساڵی 1992، رێك بیست‌و حەوت ساڵ پێش ئێستا، لە خزمەتی دایكمدا، لە شەقامی مەولەوی سلێمانی، سەرقاڵی كڕینی پێداویستییەكانی رۆژانەی ماڵەوەمان بووین. ئەو كات قوتابی پۆلی پێنجی سەرەتایی بووم. لەو سەروەختەدا، بەهۆی خوێندنەوەی هەندێك رۆمانی نووسەرانی وەك خوسرەو جاف، ڤیكتۆر هۆگۆ، یەشار كەمال، رۆمانی كەمانچەژەن و بێ سەرپەرشتان كە ناوی نووسەرەكانیم لەیاد نییە، لەگەڵ كتێبێك بەناوی چیرۆكەكانی بەر ئاگردان، ئاشنایەتیم لەگەڵ خوێندنەوە زیاتر دەبوو. بۆیە لەو تەمەنە كەمەدا، بەهۆی حەزی خوێندنەوەوە، بیرمە لەسەر پردەكەی شەقامی مەولەوی بۆ یەكەمینجار رۆژنامەیەكی كوردستانی نوێ-م كڕی. كڕینی رۆژنامە لەو كاتەدا زۆر ئاسان نەبوو، چونكە نزیكەی ساڵێك بوو راپەڕینی خەڵكی كوردستان روویدابوو، دوو گەمارۆی ئابووری، یەكێكی رژێمی بەعس‌و یەكێكی نێودەوڵەتی، لەسەر خەڵكی كوردستان بوو، لەتاو بێ مووچەیی خەڵكی دەرگاو پەنجەرەی ماڵەكانیان دەفرۆشت، بۆ نەگبەتی كورد زستانی ئەو ساڵەش زۆر ساردو تەڕوتوشی بوو، لەو كاتەدا كە هەموو دەرگاكان بەڕووی هاووڵاتیاندا داخرابوون، خەڵكی بیریان لە كڕینی نان‌و پێداویستی تر دەكردەوە نەك كتێب‌و رۆژنامە.
دوازدە ساڵ دوای كڕینی ئەو ژمارەیەی كوردستانی نوێ ئیشكردن لە رۆژنامە بووە یەكێك لە خولیاكانم. رۆژێكی ساڵی 2004، كە خوێندكاری كۆلێژی زانستە سیاسییەكان بووم لە زانكۆی سەڵاحەددین، وتارێكم لەبارەی سیستمی فیدراڵیی لە عیراقی نوێ نووسی‌و بە مەبەستی بڵاووبوونەوە لەگەڵ چەند برادەرێك سەردانی كاك عوسمان دەشتی-مان كرد كە ئەوكات بەرپرسی نووسینگەی كوردستانی نوێ بوو لە هەولێر (پێموابێت دواتر چووە ریزەكانی بزووتنەوەی گۆڕانەوە). بڵاوبوونەوەی بابەتەكە هاندانێكی باش بوو بۆ ئەوەی لەسەر نووسینی وتار بەردەوام بم‌و حەزی ئیشكردنیش لە رۆژنامەدا زیاتر چەكەرەی ئەكرد لەلام. هەر ئەو ساڵەو لە هاوینی 2004 وەك خۆبەخش بۆ ماوەی سێ مانگ لە رۆژنامەی ئاسۆ دەستم بە كار كرد. ئەزموونی ئەو سێ مانگە نە باش‌و نە خراپ بوو. ئیشەكەم بریتیی بوو لە ئامادەكردنی گۆشەیەك بەناوی (بەڵێ نەخێر). دیارە دەبوو بۆچوونی دوو كەس وەربگیرێت لەسەر مەسەلەیەك كە بیروڕای هیچیان لەیەك نەچێت‌و بگرە دژی یەك‌و پێچەوانە بن. لەبەر ئەوەی ئاسۆ هەفتانە بوو لە ماوەی ئەو سێ مانگەدا نزیكەی 12 بابەتی (بەڵێ نەخێر)م ئامادەكرد واتە خستنەڕووی بۆچوونی 24 كەس. بیروبۆچوونەكان هەمەچەشنە بوون. بەشداربووان خەڵكانی باكگراوند ئیسلامی خاوەن بۆچوونی وشك، عەلمانی عەیارە بیست‌و چوار، كەڵە نووسەرو كۆلكە نووسەر، شاعیری ناسراوی گەلەكەمان، خەڵكی خۆ بە ئەكادیمیزانی لەخۆبایی هیچ لەبارا نەبوو، كەسانی دەم بە خەندە، سیاسی مڕومۆچ… بوون. بەو ئەزموونە كەمەی كاری رۆژنامەنووسییەوە هەر زوو زانیم ئێمە لە چ كۆمەڵگەیەكدا ئەژین.
دوای تەواوكردنی كۆلێژ لە هاوینی 2005 بە نامەیەكی پشتگیریی مەڵبەندی سێی هەولێرەوە لەگەڵ برادەرێكی تر خۆمان كرد بە مەڵبەندی یەكی سلێمانیدا بۆئەوەی لە مەكتەبی راگەیاندن دەست بكەین بە ئیشكردن. كارگێڕ مەڵبەندێكی وشك‌و برینگ‌و مڕومۆن، ئێستا لەناو بزووتنەوەی گۆڕاندایە، بەبێ سەیركردنی نامەكەو هەر لەبەردەم ژوورەكەی‌و بەپێوە بەدەم هەڵمژینی دووكەڵی جگەرەوە، بە شێوەیەكی زۆر ناشرین وەڵامی داینەوەو وتی ئەوان ناتوانن هیچمان بۆ بكەن. هەر لەو ماوەیەدا، جگە لەوەی سی ڤی خۆمان لە ژووری سەرنووسەری رۆژنامەكە دانابوو، هانامان بۆ خاتوونێك برد كە لە مەڵبەندی رێكخستن ئیشی دەكرد، ئەو ئێستا لەناو بزووتنەوەی گۆڕاندایە، بە پێچەوانەی كابرای كارگێڕ مەڵبەند، بێ ئەوەی نامەكەی مەڵبەندی سێی هەولێری پیشان بدەین، دەستبەجێ نووسراوێكی پشتگیریی بۆ كردین بۆ بەرپرسی مەكتەبی راگەیاندنی یەكێتی بۆ ئەوەی كارمان پێ بدەن. بەڵام هەر لە یەكەم بینینی كاك ئازاد جندیانیش بێ هیوا بووین‌و بە دڵشكاوی گەڕاینەوە.
پاش چەند مانگێك‌و لە سەرەتای ئەیلولی 2005 ئەوەی چاوەڕێمان نەدەكرد روویدا. لە كوردستانی نوێوە پەیوەندییەكی تەلەفۆنیمان پێوە كراو پێمان راگەیەندرا كە دەتوانین دەست بە كار بكەین. چەند رۆژی سەرەتا لە بەشی سیاسەت دانراین. لەبەرئەوەی بەشەكە یەك لاپەڕەبوو بەڵام زیاد لە پێنج كەس كاری تێدا دەكرد هەرزوو نێردرامە بەشی هەواڵ‌و وەك هەواڵسازی لاپەڕەكانی 1 و 2 خەباتی رۆژنامەوانیم دەستپێكرد. كاتی ئیش كردن تا بڵێی ناقۆڵاو نارەحەت بوو. لە سەعات 4ی عەسرەوە تا سەعات 1 یان 2ی نیوەشەوی دەخایاندو هەندێك جاریش لەگەڵ بانگی بەیانی دەگەیشتینە ماڵەوە. زوو زوو گۆڕینی هەواڵ، درەنگ گەیشتنی هەواڵەكانی بەڕێز مام جەلال، درێژەكێشانی كۆبوونەوەكانی مەكتەبی سیاسی‌و چاوەڕێی گەیشتنی هەواڵەكەی‌و جاروباریش روودانی هەواڵێكی گرنگ لە هۆكارەكانی درەنگ مانەوەی بەردەواممان بوون. هەواڵەكان بەشێكیان لەسەرچاوەی جیاوازەوە وەردەگیران‌و دەكران بە كوردی‌و بەشێكیشیان لەو لێدوانانەوە دروستمان دەكردن كە وەرماندەگرتن. پاشان دەبوو بە دیار رەحمەتی دیزاینەرێكەوە دابنیشین تا لاپەرەكە ئامادە دەبوو. بەهۆی راستكردنەوەی هەڵە‌و چەند جارێك هاتن‌و چوون كات دەبوو بە نیوەشەو.
دوای دوو ساڵ كاركردن لە بەشی هەواڵ هەلی ئەوەم بۆ رەخسا ببمە بەرپرسی لاپەڕەی یەكەمی كوردستانی نوێ. وەرگرتنی بەرپرسیارێتییەكی ئاوها ئاسان نەبوو بۆ ئەو تەمەنە كورتەی كاركردنم لە رۆژنامەدا. لاپەڕەی یەكەم وەك دڵی رۆژنامەكە وابوو. لە هەموو لاپەڕەكانی تر هەستیارترو گرنگترو كاركردنیش تێیدا سەختتر بوو. زۆرێك لە رۆژنامەنووسانی رۆژنامەكە نەیان دەوێرا خۆیان لە قەرەی بەرپرسیارێتییەكی وا بدەن چونكە لەلایەك كاتی ئیشكردنی زۆرتری دەویست‌و شەو مانەوە تا درەنگی تێدابوو، لەلایەكیش تێپەڕینی بچووكترین هەڵە دوور نەبوو ببێتە هۆی وەدەرنان لە رۆژنامەكە.
دوای دوو ساڵی تریش كاركردن وەك بەرپرسی لاپەڕەی یەك، پێشنیازی كردنەوەی لاپەڕەیەكی نوێم كرد بەناوی شیكاری سیاسی‌و خۆشبەختانە پێشنیازەكە قبوڵكراو بووم بە بەرپرسی لاپەڕەكە. سروشتی ئیشكردن لەم لاپەڕەیە خۆشترو ئاسانتر بوو. شەو مانەوەی تێدا نەبوو. بابەتەكان زوو ئامادە دەكران. بواری خوێندنەوەو نووسینم زیاتر بوو. جگە لەمانەش لاپەڕەكە بووە شوێنی كردنەوەی چەندین مەلەفی گرنگی رۆژانەو لە رێگەیەوە چەندین نووسەری تر بوونە وتارنووسی بەردەوامی كوردستانی نوێ.
دوای وازهێنانی كاك كاوە محەمەد لە سەرنووسەری كوردستانی نوێ لە 2009، واتە دوای دروستبوونی بزووتنەوەی گۆڕان، كاك ستران عەبدوڵڵا بووە سەرنووسەری نوێی رۆژنامەكەمان. لەو ماوەیەدا هەندێك گۆڕانكاریی روویانداو ئەو لاپەڕەیەی من سەرپەرشتیم دەكرد لابراو بەشی بیروڕا بووە شوێنی نوێی كاركردنم. ئەم قۆناغە لە رووی ئیشی رۆژنامەنووسییەوە بە بەراورد بە 4 ساڵی پێشتری كاركردنم جیاوازی هەبوو. بەهۆی دروستبوونی بزووتنەوەی گۆڕان، بردنی دەنگەكانی یەكێتی‌و كەمبوونەوەی ژمارەی كورسی یەكێتی لە پەرلەمانی كوردستان جۆرێك لە شەڕی راگەیاندن لەنێوان هەردوولادا دروستبوو. تا دوای رووداوەكانی 17ی شوباتیش ئەم شەڕی راگەیاندنە نەك هەر بەردەوام بوو بەڵكو زۆرجار دەگەیشتە لوتكە. پێش دروستبوونی بزووتنەوەی گۆڕان‌و ئەو كاتەی كۆمپانیای وشە رۆژنامەی رۆژنامەی دەردەكرد، لەسەر پێشنیازی كاك نەوشیروانی رەحمەتی‌و لەلایەن كاك عەدنان عوسمانەوە پەیوەندیم پێوەكرا بۆ ئەوەی گۆشەیەك لە رۆژنامەكەیاندا بكەمەوە‌و چیم ویست تێیدا بینووسم، بەڵام كوردستانی نوێ بەم پێشنیازە رازی نەبوو.
لەو كاتەی لە بەشی بیروڕای كوردستانی نوێ كارم دەكرد، جگە لە شەڕی راگەیاندنی نێوان یەكێتی‌و گۆڕان، رووداوەكانی بەهاری عەرەبیش لە تەشەنەسەندندابوون. لەو ماوەیەدا جگە لە چەندین مێزگردو پاشكۆ تەنانەت كتێبێكیشمان دەركرد. لەپاڵ كارەكانی بەشی بیروڕادا، سەرپەرشتی پاشكۆی (دووڕیان)و بەشێكی زۆری ئەو مێزگردو چاوپێكەوتنانەشم دەكرد كە لەمبارەیەوە رێكدەخران‌و ئەنجامدەدران.
ئیشكردنم لە بەشی بیروڕا زۆری نەخایاندو بە بڕیاری كاك ستران عەبدوڵڵا بوومە بەرپرسی بەشی هەواڵ‌و ئەندامی دەستەی نووسەرانی كوردستانی نوێ. بەشەكە لە 5 تا 6 لاپەڕە پێكهاتبوو. لە رۆژێكدا نزیكەی 15 سەعات كارمان دەكرد. ئیشكردن لە بەشی هەواڵ، وەك لە سەرەتاوە ئاماژەم پێدا، تایبەتمەندی خۆی هەبوو. لە هەواڵسازییەوە بوومە سەرپەرشتیاری گرووپێكی 5 تا 6 رۆژنامەوان ئەمە جگە لە راسپاردنی بەردەوامی پەیامنێرەكان. بڕیاری بە پەلە، دیزاینی جوان، جێكردنەوەی زۆرترین هەواڵی باش، هەڵوەشانەوەی بەردەوامی لاپەڕەكان‌و كۆنتاكتی بەردەوام بەشێك بوون لە خاسیەتەكانی بەشی هەواڵ. ئەم ئەزموونە بەرپرسیارێتییەكی گەورەو گران‌و هیلاكبوونێكی زۆری تێدابوو.
مانەوەم وەك بەرپرسی بەشی هەواڵ‌و دەستەی نووسەران تا شوباتی 2013 خایاند، پاشان بەهۆی بەرنامەی تواناسازییەوە بە خێزانەوە روومان لە دەرەوە كردو دوای تەواوكردنی خوێندنی باڵا، لە هاوینی 2015ەوە تا شوباتی 2016 وەك سەرپەرشتیاری لاپەڕە 3 دیسان لە كوردستانی نوێ بەردەوام بووم لە كاركردن.
10 ساڵ كاركردن لە رۆژنامەیەكی رۆژانەدا كەڵەكەكردنی ئەزموونێكی باش بوو بۆ شارەزابوون لە هەموو كایەكانی رۆژنامەنووسیدا. هەواڵسازیی، لێدوان وەرگرتن، وەرگێڕانی هەواڵ‌و وتارو راپۆرت، ئامادەكردنی راپۆرتی رۆژانە، نووسینی سەدان وتار، یەك دوو جار نووسینی سەروتار كە تەعبیر بوو لە رای یەكێتی، سەرپەرشتی دەیان مێزگرد، سەرپەرشتی چەندین پاشكۆ، چاككردنی سەدان وتارو بابەتی رۆژنامەوانی خەڵكانی تر، نووسینی گۆشەی جێگیر، سەرپەرشتی‌و ئەنجامدانی دەیان مەلەفی سیاسی‌و ئەنجامدانی دەیان چاوپێكەوتن بەشێك بوون لە ئەزموونی كاری رۆژنامەنووسی لەم 10 ساڵەدا.
لە راستیدا لە كۆی هەموو ئەو كارە رۆژنامەوانیانەدا بۆ یەكەمجار لە كایەی رۆژنامەنووسی كوریدا، لەگەڵ چەند هاوڕێیەكدا، توانیمان سەرمەشق بین لە هێنانە ناوەوەی خەڵكانی بەناوبانگ بۆ ناو میدیای كوردی. لەو ماوەیەدا هەندێك چاوپێكەوتن كراون كە نەك تەنیا لە كوردستان، بەڵكو لەسەر ئاستی خۆرهەڵاتی ناوەڕاستیش كەم وێنە بوون. بۆ نموونە، چاوپێكەوتن لەگەڵ تۆماس فریدمان رۆژنامەنووسی ناوداری ئەمریكا، نوام چۆمسكی بیرمەندی ناسراوی جیهان، فوئاد عەجمی بیرمەندی ئەمریكی بە رەگەز لوبنانی، هاشم ساڵح بیرمەندی ناسراوی عەرەب، پاولۆ كۆیلۆ رۆماننووسی ناسراوی بەرازیلی و دەیانی تریش بەشێكی زۆر كەمن لەو چاوپێكەوتنە گرنگانەی لە هیچ میدیایەكی تری كوردیدا بەدی نەكراون. لەكاتێكدا رۆژنامەو رۆژنامەنووسی میدیا جیهانییەكان هەزاران دۆلار سەرف ئەكەن بۆ ئەنجامدانی چاوپێكەوتنێك، بەتایبەت لەگەڵ یەكێك لەو كەسانەی لەسەرەوە ئاماژەیان پێدرا، بەڵام ئێمەمانان تەنیا لە رێی پەیوەندییە تاكە كەسییەكانی خۆمانەوە ئەو كارانەمان ئەنجام دەدا.
ململانێ بەشێكی دانەبڕاوی سروشتی كاركردنە لە هەموو دامودەزگایەكدا تەنانەت لە وڵاتە پێشكەوتووەكانیشدا. دیوێكی باشی ململانێ ئەوەیە كە هانی خەڵكی دەدات بۆ كاری باش‌و پڕ دەسكەوت بەردەوام لە ركابەریدا بن. بەڵام ئەگەر ململانێكە ناشەریفانە بێت ئەوا كاریگەری خراپی لەسەر تاكەكان‌و شوێنی كاركردنەكەش دەبێت. كاركردن لە كوردستانی نوێ وەك هەر دەزگایەكی تری هەرێمی كوردستان بێبەش نەبوو لە بەربەست‌و ئاستەنگ‌و قۆرت. لەم رووەوە چەند ئەزموونێكی ناخۆش‌و تاڵم هەیە كە دیارترینیان رێگریكردنم بوو لەوەی ببمە نوێنەری راگەیاندنی یەكێتی لە ئەمریكا. لە ساڵی 2008، واتە زۆر پێشتر لەو دەزگایانەی كە ئێستا نوێنەرو پەیامنێریان لە ئەمریكا هەیە، بیرم لەوە كردەوە كارێكی ئاوها بكەم. سەرەتا كارەكان باش رۆیشتن، هەموو شتێك بڕێنرایەوەو كاتی چاوپێكەوتنی ڤیزام دیاریكرد لە عەممانی پایتەختی ئوردن. بەڵام لە دوا ساتدا و بەهۆی بەغیلی و حەسوودی هەندێك كەسەوە سەرنووسەرو بەرپرسی مەكتەبی راگەیاندنی یەكێتییان لەوە پەشیمان كردەوە كە پشتیوانی من بكەن‌و ئەوانیش لە هەموو بەڵێنەكانیان پاشگەز بوونەوە.
ئەزموونی 10 ساڵەی كاری رۆژنامەوانی بەندە لە كوردستانی نوێ واتە ئەزموونی ١٠ ساڵ كاركردن لەگەڵ دوو سەرنووسەری جیاوازدا كە ئەوانیش كاك كاوە محەمەد و كاك ستران عەبدوڵڵا-ن. لە 2005 تا 2009 مامەڵەی من لەگەڵ كاك كاوە محەمەددا بووە كە تا بڵێی سەرنووسەرێكی بە دیقەت‌و وردو خاوەن رێز بوو. لەو ماوەیەدا كە كاك كاوە سەرنووسەر بووە، ئیشی هەواڵسازیی، نووسین، بەرپرسی لاپەڕەی یەكەم‌و دواتر بەرپرسی لاپەڕەی شیكاری سیاسی بووم. ئەزموونی كاركردنی دواترم لەگەڵ كاك ستران عەبدوڵڵا لە 2009 تا 2013 و دواتر لە 2015 و سەرەتای 2016دا بووە. لەو ماوەیەدا لە بەشی بیروڕا، پاشان بەرپرسی هەواڵ‌و ئەندامی دەستەی نووسەران بووم. بە شایەتی ئەو كەسانەی ئیشیان لەگەڵ كردووە، كاك ستران عەبدوڵڵا یەكێكە لەو سەرنووسەرانەی كە حەز بە پێشكەوتنی رۆژنامەنووسی بەتواناو دابەشكردنی ئیش دەكات‌و هاوكارێكی باشیشە لەم رووەوەو بگرە چانسی زۆر دەدات بەو كەسانەی لەگەڵیدا كاردەكەن. ئەتوانم بڵێم لە 2005 تا 2009 ئەو ئیشانەی كردوومن هەموو بە هەوڵی تاكەكەسی بوون، بەڵام لە 2009 تا 2013 لە وەرگرتنی پۆستی نوێ‌و سەرپەرشتی پاشكۆو مێزگردو زۆرجار بیرۆكەی وتاریش كاك ستران هاوكارێكی سەرەكی بووەو نەك لە كوردستانی نوێ بەڵكو لە میدیای بینراویشدا هەوڵی داوە زۆرتر دەربكەوم‌و بێمە پێشەوە.
لە راستیدا نكوڵی لەوە ناكرێت لەو ماوەیەی لە كوردستانی نوێ بووم، جگە لە شارەزا بوون لە كاری رۆژنامەنووسی، چەندین بابەتی تر هەن كە ناكرێت باس نەكرێن. بۆ نموونە، ناسینی سەدان رۆژنامەنووس‌و هاوڕێی تر كە تا ئێستا پەیوەندیمان ماوە. دروستكردنی نێتۆركێكی فراوان لەگەڵ دەیان كەسی بیانی‌و بەرپرسی حزبی‌و حكومی كە تا ئێستاش هەندێك لەو پەیوەندییانە هەر ماون. لە هەموو ئەمانەش گرنگتر فێربوونی جۆرێك لە كاری رۆژنامەنووسیی وردو بەرپرسیارانە كە لە زۆرێك لە میدیاكانی تردا ئەمە نابینرێت.
لە كۆتاییدا، سەرەڕای پیرۆزبایی لە هاوكارەكانم كە بەشێكیان تا ئێستاش لە كاركردن لە كوردستانی نوێ بەردەوامن، دەمەوێت سوپاسی هەموو ئەو هاوڕێیانە بكەم كە رۆژێك لە رۆژان هاوكاربوون‌و هەڵەو كەموكورتییەكانیان بۆ راست كردوومەتەوە. دەمەوێت سوپاسی هەردوو سەرنووسەر كاك كاوە محەمەد و كاك ستران عەبدوڵڵا بكەم، كە بەدەر لە كاری رۆژنامەنووسی، لە زۆر بابەتی تردا هاوكار بوون. بەهیوای بەردەوامی رۆژنامە ئازیزەكەی كوردستانی نوێ.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

پێداگریی یەكێتی و بەرژەوەندیی هاونیشتمانیان

كاروان عەلی شامار (١) هیچ كات هەنگاوەكانی یەكێتی بارتەقای ئێستای ...

freier porno porno gratis
doğubayazıt escort afşin escort afyon escort afyon escort alanya masaj salonu afyon masaj salonu efeler masaj salonu polatlı masaj salonu merzifon masaj salonu afyon masaj salonu akhisar masaj salonu akçakale escort