سەرەکی » دۆسێ » مردنێک، وەک مردنی پشیلەکەی ئێوارە

لەیادەوەری بەندیخانەوە

مردنێک، وەک مردنی پشیلەکەی ئێوارە

بورهان قەرەداخی –هانۆفەر- ئەڵمانیا

(4)

(خۆدواندن) لەیادەوەریەکانی زیندانەوە:
دەنگی میاوە میاوی پشیلەیەک دێت ، کە دڵنیام لانەوازەو لە دەست سەرماو برسێتی بەم شەوە نازانێت بەم پەنا دیوارو ژێر پاسارانەدا ڕوبکاتە کوێ!! هێندە بە بێهێزی و کوڕوزانەوەوە دەمیاوێنێت ، هەر دەڵێی لەبری ئێمە گوزارشت لەبرسێتی و ئازارو سەرماو تەنهایی دەکات.
دەنگی کڕوزانەوەی پشیلەکە هەست و ناخی مرۆڤ هەلا هەلا دەکات. ئەم دەنگە بەخێرایی خستمییە نێو بیرکردنەوەو خەیاڵێکی قوڵەوە. بیرم لەخۆم دەکردەوە کەلەم ژوورە بچوکە ساردو پڕ شێیەدا ، لەتاو ئازارو سەرماو برسێتی گڵۆڵە بووم و باوەشم بەتەنهایی و ئازارو ئەژنۆی خۆماکردوە. بیرم لەوە دەکردەوە کەهێشتا پشیلەکە لەمن ئازادترە ؛ خۆ هیچ نەبێت دەتوانێت بڕوات و بمیاوێنێت و هاوارکات . دەتوانێت کوێی بوێت بۆی بڕوات و لێی بمرێت.بەڵام من هەر دەبێت لەم ژوورە تاکە کەسیەدا ، بەتەنها ئازارو برسێتی و سەرماو برینی لەشی خۆم ڕاژەنم. سەرێکم لەسەر ئەژنۆم بەرزکردەوەو هەناسەیەکی کورتم هەڵمژی و چاوێکم بەدیوارو بنمیچ و تەواوی ژورەکەدا گێڕا . هیچم نەبینی ، نەشوێن تەونی جاڵجاڵۆکەیەک، یاخود شوێن خۆڵی مێرولەیەک ، بەتەنها پەڵەی خوێن و پەڵەی بۆری تەڕوشێی دیوارەکە نەبێت هیچ نابینرێت. لێرەوە بۆم دەرکەوت کەهیچ زیندەوەرێکی بچکۆڵەی وەک قالۆنچەو مێرولەو مێش و جاڵجاڵۆکە، نەیانتوانیوەو ناتوانن تیایدا بژین.
خۆم لە بیرکردنەوەی ئەم بابەتانە دابڕی و ویستم بزانم پشیلەکە دەنگی ماوە!؟ گوێم بۆ دەنگی پشیلەکە هەڵخست و ڕاگرت، بەڵام بەداخەوە هیچ دەنگێکی نەدەهات و نەدەبیسترا . بوو بە مەراقی دڵم .تۆبڵێی ئێستا لەپەنایەکدا بێهۆش لێ نەکەوتبێ و لەگیانەڵادا نەبێت ؟! تۆبڵێی دەستێکی سپی و پڕ سۆز ڕزگاری نەکردبێت؟!
بەنەمانی دەنگی پشیلەکە، بێ دەنگی وخەمێکی قوڵ دایگرتم. بەندیخانەکەش کش و مات و بێدەنگ ، هەر دەڵێی خوڵی‌ مردویان كردوە بەسەریدا.
ئیتر دەبێت لەچاوەڕوانی هاتنی جەلادەکاندا بم بۆ بەرنامەی شەو ئەشکەنجە.
هیچ شتێک هێندەی چاوەڕوانی ، ئارامی مرۆڤ تێکنادات . جا چ چاوەڕوانیەک کەبزانی بەرئەنجامەکەی ئەشکەنجەو ئازاربێت ؛ چاوەڕوانیەکی وا مرۆڤ وردوخاش دەکات ، دەتکا بە گەرد ؛ دەتکا بەدوژمنی زەمەن ، چ نەهامەتیەکە چاوەڕوانی دەستپێکردنی لێدان و ئەشکەنجەدان بیت!!
هاکا لەدوورەوە دەنگی تەپە تەپی پۆستاڵ و زڕە زڕی کلیل و تەقەتەقی کەلەپچەو کردنەوەی قوفڵ و ڕاکێشانی کێلونەکان سەرجەم بەندییەکان بەئاگابێنێت.
ئەوە سێ هەفتەیە ، هەموو شەوێک لەنزیک کاتژمێر( 8 ی شەو تا 4 ی بەیانی) دێن و دەمبەن بۆ ئەشکەنجەدان، ئەمە بەرنامەیەکەو هەموو شەوێک دووبارە دەبێتەوە . ناهێڵن برینەکانم قەتماغە بکا، بەڵکو هەموو شەوێک دەکولێتەوەو برینی نوێ لەسەر لاشەم دروست دەکەن.
تابێت لەشولارم بێهێزو لاواز دەبێت ؛ بەرگری لەشم بەتەواوەتی کەم دبێتەوە.
ئێستا كاتی‌ خۆیانە کە بێن وەک گەلە گورگێکی برسی ناو بەفر ، چۆن پەلاماری نێچیرێک دەدەن ، ئاوا هەریەک لەلایەکەوە بێن و پەلامارم بدەن و لێمبدەن.
ئەوەتا ئێستا بۆنی دوکەڵی جگەرەکەیان دێت ، ئەوا لوتم بە بۆنی‌ جگەرەی‌ سۆمەری‌ ڕەش كزە كزی‌ پێكەوت ، تابێت بۆنی ئەم جگەرە نەعلەتییە بڵاو دەبێتەوەو منیش نازانم بۆ حەز بەهەڵمژینی بۆنەکەی دەکەم!؟ من هەرگیز پێشتر حەزم لە دوکەڵ و بۆنی جگەرە نەبووە ، بگرە زۆریشم ڕق لێ بووە ؛ بەڵام ماوەی چەند ڕۆژێکە خۆشم نازانم ، بۆچی خۆشی ئەبەخشێت بەلوت و مێشکم و گیانم!؟ بەڕاستی نازانم بۆ هێندە سەرمەست و ئالودەم بەبۆن و بەرامەی ئەم توتنە!؟ تۆ بڵێ هی ئەوە بێت ئەمباتەوە بۆلای بۆنی توتنەکەی باوکم !؟ ئەو توتنەی هەموو هاوینەکانی مناڵیم لە گوێ چەمی دێوانەی قەرەداخ لەگەڵیا دەبردە سەر (ئەمە بەسەرهاتێکی ترە ، باشترە لەکات و شوێنێکی تردا بۆتان بگێڕمەوە).
لەپڕ شریخەی‌ كێبڵێك هەر بەوێنەی هەوری بەهار ڕام دەچڵەكێنێ. زرمە لە دەرگاكە هەڵدەسێنرێت و بەدەنگێگی‌ پڕ لەڕق وکینەوە : ( بورهان غفور ).
بەوێنەی پشیلەیەکی ترساوی ناو کایەنێکی تاریک لە سوچێکەوە بە هێواشی وەڵام دەدەمەوەو دەڵێم:
(بەڵێ ) ، خۆم چاک دەزانم ئەم بەڵێیە چەند جەلادەکان توڕە دەکات.
هەر لەگەڵ ڕاکێشان و کردنەوەی قوفڵ و کێلونی دەرگاکەدا ، جەلادەکان هەر وەک گەلە کەمتیارێک دەست دەکەن بەحەچە حەچ و جنێودان. دەرگاکە دەکەنەوەو دوانیان پەلامارم دەدەن و خێرا کەلەپچەم دەکەن ، منیش بەوپەڕی بێهێزی لاشمەوە خۆمبەدەستەوە دەدەم و بەتەنها تەماشایان دەکەم. ئیتر دەبێ بەتەواوەتی دەستبەرداری ئازارو برینی جەستەم بم . لەپڕ هەر وەك ئەوەی سەقفەکە ڕوخابێت بەسەرما ، یاخود كەوتبمە ژێر هەرەسی‌ تاشەبەردو بەفرەوە ، دەکەومە ژێر ئازاری کێبڵ و دارو شەقەوە. لەدەرەوەش چەند جەلادێک لەژێر ڕەنگی زەردی گڵۆپە خڕە(٦٠ وات) یەکەدا ، چەند مەترێک نزیک دەرگاکە بەکێبڵ و دارەوە ڕاوەستاون . دەمووچاوی گرژو توڕەیان لەژێر ڕووناکیە زەردو کزەکەدا هێندەی تر ترسناک دەردەکەوێت . سمێڵی درێژو لچی شۆڕیان ، چاوی سوورو دەرپۆقیوویان ، ناوچەوانی پڕچرچ و لۆچیان ، برۆی ئەستورو ڕەشیان، موی ڕەش و درێژی سەر پەنجەکانیان ، لەگەڵ هەر مژێکی جگەرەکانیان ، هەر دەڵێی لەکانە خەڵوزەوە هاتونەتە دەرێ و وەک گای ئیسپانی چاوەڕێی هێرشکردنن .
هەر لەدەرگای ژوورە تاکە كەسیەکە هێنامیانە دەرێ ، هێندەمزانی لەهەموو لایەکەوە بەجنێودان و قسەی سوکەوە بۆم هاتن . یەکێک بەکێبڵ و یەکێکی تر بەشەق و دار ، یەکێکی تریان بەبۆکس و زلە، یەکێکی تریش بەزنجیر.
ئیتر هەر ئەوەندەمزانی بزیسکەو قرچە بوو لە لەشم هەڵدەساو برینی کۆن و نوێم دەبوون بەیەک. من هیندە بێهێز بووم هیچ هێزی هاوارکردنم نەبوو، بەڵام زرمەو تەپەی کێبڵ و دەنگی جنێو و دارو شەقی ئەوان ڕۆژەڕێیەک دەڕۆی و تێکەڵ بە شەوی ساماڵ و پڕ لە سەرمای زستان دەبوو .
خۆشم نەمدەزانی چۆن لەناوەڕاستی هەموویاندا کەوتووم !؟ من بەتەنها هەردارو کێبڵ و شەق و زنجیرم دەدی کە دائەباری بەسەرما . دڵۆپەی ئارەقی دەست و دەموچاوی ئەوان ، تێکەڵ بەو دڵۆپە خوێنانەی من دەبوون کەدەڕژان و دەکەوتنە سەر کۆنکرێتی حەوشەکە . من لەبێهێزی خۆما نەمدەتوانی بجوڵێم .ئازارو ژانێکی زۆر سەختیش لەهەموو لەشمەوە دەهاتەدەرێ. ئیتر ئەوەندایان لێدام تاتەواو ماندووبوون .ئینجا دەستیان هەڵگرت.
پاشان دوانیان هات تا بەرزم بکەنەوەو بەپێوە ڕابوەستم ، بەڵام خۆم بەپێوە بۆڕانەگیراو کەوتم. ئەتوت هەموو لەشم بەرچەقۆو خنجەر دراوە. هەستم دەکرد لاشەم هەلا هەلاو هەنجن هەنجنکراوە. هەرچی ئێسقانی لەشیشمە هەمووی شکاوە ، هەرچی دەماری گیانم هەیە هەمووی بچڕاوە ، وام هەستم دەکرد پێستی لەشم داماڵراوە.بەتەواوی وام هەست دەکرد پرۆمیسیۆسم و کۆتکراوم، هەموو ڕۆژێک هەڵۆیەک دێت جگەرم دەخواو سەرلەنوێ دروست دەبێتەوە. توشی ئازارێکی بێبڕانەوە بووم. چاویشم وەک ئۆدیبی پاشا هەڵکۆڵراوە . تادەهات سەرم گێژی دەخواردو ئەم دونیایە بۆمن بچوک و تاریک دەبوو.
زۆربە خێرایی و بەتوندی پەلیانگرتم ، بەڕاکێشان بەرەو لای دار سنەوبەری ناو حەوشەکە بردیانم. بە قەدی دار سنەوبەرەکەوە کۆتیانکردم و بەستمیانەوە. پاشان بە پەڕۆیەكی‌ ڕەش و بۆگەن توند چاوەکانیان بەستمەوە. لەپڕ هێندەمزانی دوو سەتڵ ئاوی ساردیان کرد بەسەرما .وەک ئاسنی سوورەوەبووی ناوکورە ، چۆن سەتڵێک بەفراوی پێدابکەی و قرچەی بێت، ئاوا قرچە لە لەشم هەڵساو دانەجیڕەم پێکەوت. خێرا لەسەرمادا وەک پەیکەر ڕەقبووم. پێکانم کە ڕووت و پڕ برین بوون ، بەکۆنکرێتەکەوە نوساو بەستی. جل و قژم وەک شەختە ڕەق بوون. وردەوردە شین هەڵدەگەڕام و خوێنم دەمەی وزمانیشم لەدەممدا ڕەق دەبوو. لەخەیاڵی خۆمدا دەمگوت ئەمە جوانترین و ڕۆمانسی ترین و شۆڕشگێڕانەترین مردنە. مردنێک لەبەردەم دوژمندا وەک پەیکەرێکی بەردین ڕەق ببیت و هیچ نەڵێیت. مردنێکە وەمردنی پشیلەکەی ئێوارە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

16 − ten =

x

هەواڵێ هاوشێوە

ناوەڕۆكی سەردانەكەی عەبدولمەهدی بۆ ئێران

سەرۆك وەزیرانی عیراق ڕایدەگەیەنێت، لە زۆر ڕەهەندی ئابووری و ئەمنی ...