سەرەکی » کەلتوور » زمانی نووسین لە شرۆڤەی سیاسیدا

زمانی نووسین لە شرۆڤەی سیاسیدا

ستران عەبدوڵڵا

ئینگلیز ‌و ئیفره‌نج كه‌ ده‌نووسن له‌وانه‌یه‌ په‌ند ‌و گوزارشتی ولیه‌م شكسپیر به‌كاربهێنن، یان گوته‌ی دانتی ئه‌لگیری له‌ دۆزه‌خی «كۆمیدیای خوداوه‌ند» بخوازن.
لێكۆڵینه‌وه‌ هه‌یه‌ له‌سه‌ر ئه‌و جار‌وبارانه‌ی كارڵ ماركس بۆ شرۆڤه‌كردنی بیرۆكه‌كه‌ی له‌سه‌ر سه‌رمایه‌ ‌و زێده‌بایی ‌و ململانێی چینایه‌تی ناچار بوو گوته‌ ‌و ده‌سته‌واژه‌ له‌ ئه‌ده‌بیاتی شكسپیره‌وه‌ بگوازێته‌وه‌. ئه‌وێك كه‌ جوله‌كه‌یه‌كی كراوه‌ بوو ته‌نانه‌ت كاركته‌ری شایلۆكی جوله‌كه‌شی به‌ په‌ند هێناوه‌ته‌وه‌.
عه‌ره‌ب له‌ كتێبی موسڵمانان، قورئان، كه‌نز ‌و خه‌زینی له‌بن نه‌هاتوو هه‌ڵده‌گۆزن، خۆ چاكتره‌ كورد كه‌ بۆ بابه‌تی زمان نه‌ قورئان ‌و نه‌ شكسپیر ‌و نه‌ شانامه‌ی فیردۆسی هه‌یه‌ له‌دیوانی شاعیرانه‌وه‌ بخوازێت ‌و ببا.
ئه‌م خه‌زێنه‌ ده‌وڵه‌مه‌نده‌ی ئه‌ده‌بیاتی كورد له‌به‌رده‌ست دایه‌، به‌كه‌ڵك دێت ته‌نانه‌ت بۆ نووسینی رۆژنامه‌وانی ‌و سیاسیش، زۆر كه‌س وا ده‌زانێ ئه‌م ده‌سته‌واژه‌ ئه‌ده‌بییانه‌ هه‌ر بۆ نووسینی ئه‌ده‌ب، یان خه‌م‌و په‌ژاره‌ی رووناكبیری، ده‌ست ده‌ده‌ن.
به‌ڵام ده‌ستپێداهێنانێكی ئه‌ده‌بی له‌كاتی نووسینی سیاسی، یان داڕشتنی بیرۆكه‌ی سیاسی ‌و فیكری دا، كارێكی گه‌لێك باشه‌:
1-باگراوه‌ندی ئه‌ده‌بی ‌و رۆشنبیری نووسه‌ر ‌و رۆژنامه‌نووس ده‌رده‌خات كه‌وا ده‌كات خوێنه‌ر متمانه‌ی پێبكات ‌و رێز له‌ پاشخانی فه‌رهه‌نگی ‌و له‌وێشه‌وه‌ رێز له‌ بیرۆكه‌كانیشی بگرێت.
2-جوانكاری ‌و رازاندنه‌وه‌ ده‌باته‌ ناو نووسینی وشك ‌و برنگی سیاسییه‌وه‌ كه‌ عاده‌ته‌ن نووسینی سیاسه‌ت ‌و فه‌زای ناجۆری سیاسه‌ت لای خه‌ڵكی ‌و لای خوێنه‌ران خۆشه‌ویست نین له‌چاو بواره‌كانی دیكه‌ی نووسین ‌و رۆژنامه‌دا.
3-ئه‌و ده‌ربڕین ‌و گوزارشتانه‌ كه‌ له‌ دیوانه‌كان هه‌یه‌ ‌و هی ده‌سته‌بژێرن په‌خش ‌و په‌رێشان ده‌كات به‌ناو خه‌ڵكدا، بره‌ویان پێ ده‌دا ‌و له‌ ئاستی میللی ‌و رۆژنامه‌وانیدا سه‌رله‌نوێ به‌ خه‌ڵكیان ده‌ناسێنێته‌وه‌.
شاعیره‌كان ‌و ره‌خنه‌گران ‌و ئۆگرانی ئه‌ده‌ب هه‌قی خۆیانه‌ وا له‌گه‌ڵ ده‌قه‌ شیعرییه‌كانی شاعیرانی كۆتایی سه‌ده‌ی نۆزده‌ ‌و ده‌یه‌ جیاجیاكانی سه‌ده‌ی بیست مامه‌ڵه‌ بكه‌ن كه‌ ده‌قی شیعریین ‌و به‌ پێی پێوه‌ره‌كانی جوانكاری شیعری ‌و فه‌زای ئه‌ده‌بی مامه‌ڵه‌ی له‌گه‌ڵدا بكه‌ن، به‌ڵام له‌ڕاستیدا سه‌باره‌ت به‌ تایبه‌تمه‌ندی فه‌زای رووناكبیری كوردستان كه‌ كایه‌ رووناكبیری، فه‌رهه‌نگی ‌و رۆژنامه‌نووسییه‌كانی لێك جیا نه‌كراونه‌ته‌وه‌ زه‌حمه‌ته‌ ته‌نیا وه‌ك ده‌قی جوانكاری ‌و شیعری لێی بڕوانرێ.
له‌و ده‌قه‌ شیعریانه‌دا كه‌ وه‌ك پاشكۆ له‌م نووسینه‌دا نموونه‌ی لێ ده‌هێنینه‌وه‌ هه‌موو توخمه‌كانی وتاری سیاسیی ‌و بگره‌ سه‌روتاری سیاسی رۆژنامه‌ ‌و هه‌ڵوێستی سیاسیی بزووتنه‌وه‌ ‌و ئۆرگانی سیاسیش ده‌بینرێنه‌وه‌. ئه‌م نموونانه‌ بۆیه‌ له‌ پاشكۆ داده‌نێین چونكه‌ وه‌ك ده‌ق ‌و وه‌ك ئاراسته‌ی نووسین ‌و وه‌ك وێستگه‌كانیش ئه‌وه‌نده‌ روونن له‌رووی مانای سیاسیی ‌و شه‌رحی حاڵه‌وه‌ كه‌ روونكردنه‌وه‌ی زیاتریان ناوێت ‌و خۆیان نموونه‌ی وتاری سیاسیین. ئه‌مه‌ش بۆ كه‌مكردنه‌وه‌ی به‌های ئه‌ده‌بیان ناڵێم، به‌ڵكو نرخێكی رۆژنامه‌وانیی سیاسیشیان پێ ده‌ده‌م له‌پاڵ نرخه‌ ئه‌ده‌بییه‌كەیان.
بۆیه‌ له‌م وتاره‌دا زیاتر ته‌ركیز ده‌كه‌ینه‌ سه‌ر نموونه‌ی ئه‌و په‌ند ‌و ده‌سته‌واژه‌ ‌و دێڕانه‌ی له‌ناو شیعر ‌و په‌خشانی جیاجیای كوردیدا هه‌ن ‌و ده‌ست ده‌ده‌ن له‌ نووسینی وتاری سیاسیدا ته‌وزیفی رۆژنامه‌نووسی بكرێن ‌و بگره‌ هه‌ندێك جار مانای تریش به‌مانا سنوورداره‌كانیان ببه‌خشرێت.
نموونه‌كان:

-تازه‌ ئه‌چێ بۆ به‌سره‌، به‌عده‌ خرابی به‌سه‌ره‌
شێخ ره‌زای تاڵه‌بانی

-مه‌سه‌له‌ی كورده‌ ‌و له‌ كورد قه‌وماوه‌
هه‌ژار موكریانی

-ناوی له‌ناوا ده‌ركه‌وێ
كاكه‌ی فه‌لاح

-ده‌وڵه‌تێكی موفت ناته‌وێ.
كوردی

-هه‌تا بمێنم له‌رێی ئازادیا خه‌بات ئه‌نوێنم
گۆران

-وا ره‌ز ئه‌سوتێ
دیلان

-شوشه‌ له‌ سه‌د لاوه‌ شكاوه‌.
-برینم كارییه‌
نالی

-به‌قسه‌م ده‌كه‌ن زه‌ریفه‌، ناكه‌ن به‌ڵا له‌ خۆتان.
حاجی قادر

له‌ گۆرانی كوردییه‌وه‌.
-ئێمه‌ ئاشت ده‌بینه‌وه‌ حه‌سوود ماڵ وێران بێ
حه‌سه‌ن زیره‌ك

-هیچی من ‌و هیچی تۆ
خالقی
پاشكۆ:
نموونه‌ شیعرییه‌كان
له‌م شیعره‌(وتاره‌دا) قانعی بیرسوشیالیستی ‌و خاوه‌ن ئه‌ندێشه‌ی كوردستانیی بناغه‌ سه‌ره‌كییه‌كانی وتاره‌كه‌ی باش داده‌رێژێ كه‌ هه‌واڵ ‌و حاڵ ده‌گێرێته‌وه‌. به‌كورد ده‌ڵێ وه‌زعه‌كه‌ چۆن ‌و كام وڵات خه‌ریكی كۆنگره‌ی سه‌عه‌د ئابادن. ئینجا تیروتوانج له‌ داگیركه‌ران ده‌دات كه‌ هه‌م پیلانگێڕن، هه‌م مه‌ستی ڕازاندنه‌وه‌ی مێزن ‌و هه‌م مه‌ستی هه‌ژاركوژی ‌و كوردكوژین. ئینجا ده‌ڵێ به‌ڵام مژده‌ هه‌یه‌ كه‌ شۆرشێكی كوردستانیی دێته‌كایه‌وه‌ ‌و ئه‌و شۆرشه‌ ئه‌م پلانه‌ له‌گۆر ده‌نێ، وتار هه‌موو ژانه‌ره‌كانی هه‌واڵ ‌و زانیاری، شه‌رحی مه‌ترسی ‌و رێوشوێنی كۆبونه‌وه‌ی پلانگێرانی تێدایه‌. تا كورد قه‌باره‌ی مه‌ترسییه‌كه‌ بزانن. ئینجا به‌ خوێنه‌ری كورد ده‌ڵێ ئه‌مه‌ واقیعه‌كه‌یه‌ كه‌ باسی ده‌كه‌ین ‌و ئه‌مه‌ پیلانی دوژمنانه‌ كه‌ ئێمه‌ی كورد لێی بێ ئاگاین ‌و ئه‌مه‌ش موژده‌ی وه‌ڵامی شۆرشگێری كورد كه‌ ئه‌وانی دوژمن لێی بێ ئاگان. واتا له‌به‌رده‌م ئاگایی ‌و داتا ‌و زانیاری سه‌رمێزی ڕازاوه‌ی ئه‌وان كه‌ زۆرینه‌ی میلله‌ت لێی بێ ئاگان ته‌گبیری جێی ئومێدی كورد هه‌یه‌ كه‌ میلله‌تی به‌له‌نگازی كورد لێی به‌ئاگان ‌و دوژمنانه‌یش پیلان ده‌گێرن. به‌س عه‌زمی به‌تینی كورد نازانن.
قانع شاعیری چه‌وساوه‌كان له‌جێی رۆژنامه‌نووس ده‌ڵێ:
دوژمنان له‌م ڕۆژه‌دا فیكری چه‌په‌ڵیان خسته‌ كار
كه‌وته‌ خۆ، كۆنه‌ په‌رستی بۆ قه‌لاچۆی كورده‌وار
ڕێ بڕانه‌، كورد قڕانه‌، كێوو كه‌ژ خوێناوییه‌
فیتنه‌ وه‌ك ئاگر ئه‌بارێ، بۆ گلانی شۆڕه‌ سوار
چه‌ك له‌شان بوو، میله‌تی كورد، بۆیه‌ دوژمن كه‌وته‌ خۆ
كه‌وته‌ جرت و فرت و په‌یمان به‌ستنێكی نا له‌بار
شاری سه‌عد ئابادی به‌دفه‌ڕ بوو به‌ مۆڵگه‌ی دوژمنان
كونده‌ بوو، شمقاڕه‌ كوێرو كه‌متیاری لا نزار
سێ به‌ سێ كۆ بوونه‌وه‌ وا ئه‌نجومه‌ن ڕازایه‌وه‌
بۆ قڕانی میلله‌تی كورد مۆركرا عه‌هد و قه‌رار
پاڵه‌ په‌ستۆی مه‌ینه‌ته‌ ئه‌مڕۆ به‌سه‌ر كوردا گلا
نیشتیمانی كوردی كرده‌ جێگه‌ی ڕاو كاروزار
عه‌هدی سه‌عد ئابادی شووم بوو، حوكمی پۆلیسی ڕزیو
مه‌زبه‌حه‌ی خوێن ڕشتنی، بۆ كوردستان، هێنایه‌ كار
میلله‌تی كورد چه‌نده‌ها پیلانی وای نا گۆڕه‌وه‌
چاوی ناترسێ له‌ نێزه‌ و هایو هوتی بێ شومار
ئه‌نقه‌ره‌ و تاران و به‌غدا، مه‌نبه‌عی زوڵم و سته‌م
قوڕ به‌سه‌رتان،میله‌تی كورده‌ ئه‌تانكا یه‌خته‌ سار
هێزی میله‌ت شۆڕشێكی هه‌ق ڕه‌وا دێنێته‌ ڕوو
تۆڵه‌ وه‌ر ئه‌گرێ، له‌ سه‌عدئابادی لانه‌ی گورگه‌ هار
قوڕ بپێوێ دوژمنی سێ قۆڵی بۆ دواڕۆژی خۆی
ته‌خت و تاراجی ده‌رێنێ، لاوی كوردی هۆشیار
نموونه‌ی خواره‌وه‌ بژارده‌یه‌ له‌ هزری فایه‌ق بێكه‌س.
شیعرێكی ته‌نزه‌ كه‌ وه‌ك ستونێكی ته‌نز ئامێزی ره‌خنه‌یی ده‌ست ده‌دات بۆ دوالاپه‌ڕه‌ی رۆژنامه‌یه‌كی هاوچه‌رخ. ئه‌گه‌ر ئه‌وكاته‌ كورد رۆژنامه‌كانی به‌ش ‌و ستوون ‌و ژانره‌كانی فریای هه‌موو كایه‌كان بكه‌وتبایه‌.
سه‌نعه‌ت و عیلم و مه‌عاریف، زه‌ڕڕه‌یه‌ك باوی نییه‌
پیاوه‌تی لایان، به‌ته‌نها جه‌فته‌و جامانه‌یه‌
بۆ قسه‌ی زل بێ قسوورن، باسی كوردییه‌ت ئه‌كه‌ن
كوردییه‌ت خورمایه‌، بۆچی یان، قسه‌ی شێتانه‌یه‌
میلله‌تی بێ عیلم و ئه‌خلاق، چۆن به‌ئیستقلال ئه‌گا!
واسیته‌ی به‌رزی ته‌ره‌ققی، هیمه‌تی مه‌ردانه‌یه‌!
به‌ڵام هه‌ر خودی فایه‌ق بێكه‌س وتارێكی هه‌یه‌ كه‌ بۆ سه‌روتاری هه‌مان رۆژنامه‌ له‌لاپه‌ڕه‌ یه‌ك ‌و له‌ شوێنێكی دیار ‌و به‌رچاو ده‌ست ده‌دات
قه‌ومی كورد ئیسپاتی كرد بۆ عاله‌می سه‌ر ڕووی زه‌مین
میلـله‌تێكی قاره‌مانن هه‌ر ئه‌بێ سه‌ربه‌ست بژین
میلـله‌تێ لاوی له‌ ڕێگه‌ی سه‌ربه‌خۆیی نیشتمان
بێته‌ به‌ر سێداره‌، بێ ترس، ده‌م به‌خه‌نده‌ و پێكه‌نین
قه‌ومی وا نامرێ، ئه‌ژی، با دوژمنی هه‌ر شه‌ق به‌رێ
ساحێبی ڕۆڵه‌ی نه‌به‌رده‌ خاوه‌نی عه‌زمی مه‌تین
ئه‌و كه‌سه‌ی گیانی له‌ ڕێگای نیشتمانا به‌خت ئه‌كا
پێی مه‌ڵێن مردوو، شه‌هیده‌ وا له‌ فیرده‌وسی به‌رین
لاوی كورد مه‌رده‌ له‌ مردن قه‌تعییه‌ن باكی نییه‌
په‌ندی پێشینانه‌، ڕاسته‌ (به‌رخی نێر بۆ سه‌ربڕین)
وا وه‌ته‌ن دیسان به‌مه‌حزوونی ئه‌ڵێ ئه‌ی لاوه‌كان
بۆچی وا مات و مه‌لوولن، به‌سیه‌تی شین و گرین
ڕۆژی تێكۆشانه‌ سا ده‌ی هیمه‌تێ تاكو زووه‌
به‌شكو له‌م حاڵه‌ نه‌جاتمان بێ و له‌ دیلی ده‌ربچین
دوای پیاهه‌ڵدان به‌ توێژێك له‌ كورد ‌و خه‌باته‌كه‌یان، له‌سه‌ر توێژێكی تریش قسه‌ی هه‌یه‌:
گه‌رچی هه‌ندێ كه‌س خه‌ریكن ورگ و گیرفان پڕ ئه‌كه‌ن
شه‌و به‌بێ خه‌م سه‌ر ئه‌نێنه‌ سه‌ر سه‌رین، هه‌ر سه‌رسه‌رین
پیاو ئه‌بێ دائیم خه‌می قه‌وم و وڵاتی خۆی هه‌بێ
ئه‌و كه‌سانه‌ی بێ خه‌من حاشا نه‌وه‌ی ئه‌م خاكه‌ نین…

لێره‌وه‌ به‌دوا با سه‌یرێكی ئه‌م شیعره‌ وتاره‌ی ئەحمەد موختار جاف بكه‌ین كه‌ پڕه‌ له‌ ئه‌ندێشه‌ی سیاسیی ‌و بیرۆكه‌ی جوان:
دێته‌ گوێم ده‌نگێ به‌ سۆز و شیوه‌ن و گــــریانه‌وه‌
ناڵه‌ی دڵمـــه‌ له‌ حــــه‌سره‌ت خاكی كوردســـتانه‌وه‌
لانه‌واز و بێكه‌س و مه‌زڵوومن ئێسته‌ قه‌ومی كورد
گا به‌ده‌ستــی تــوركه‌كان و گـــا به‌ده‌س ئێــرانـه‌وه‌
هێنده‌ حیـــزه‌ به‌ختی كـــورد بۆ كوشتن و تـاڵانیان
كۆمه‌ڵێ هــاتوون به‌ ســـواریی وشــتری پێـــپانه‌وه‌
حاڵی كورد ئێستا له‌ به‌ینی تورك و ئێران و عه‌ره‌ب
بێچــووه‌ ته‌یــرێـــــكه‌ كه‌ كه‌وته‌ داوی مـــنداڵانه‌وه‌

ئه‌م گوڵبژێره‌ له‌ شیعری مامۆستا هێمن ده‌ڵێی سه‌روتاری رۆژنامه‌ی (كوردستان)ی زمانحاڵی كۆماری كوردستانی له‌مه‌هاباد. ئه‌و (هێمن) ه‌ی دواجار وه‌ك شاعیرێكی هه‌ست ناسك ‌و رووناكبیرێكی خاوه‌ن خه‌می به‌رزی فه‌رهه‌نگی ده‌قه‌كانی وه‌ك (بۆسه‌ی رۆژگار) ‌و (شه‌وگاری ته‌نهایی) ده‌نووسێ. له‌ گرمه‌ی راپه‌ڕینی بۆكان له‌ كوردستانی رۆژهه‌ڵات ئه‌هلی بانگه‌وازی رۆژنامه‌وانێكی سیاسیی ناو كۆمه‌ڵ ‌و میلله‌تە یان وه‌كو سه‌لاحودینی موهته‌دی له‌ په‌سه‌ندی حاجی قادر دا ده‌ڵێ وه‌ك كادیرێك، نه‌ك وه‌ك شاعیرێك، ئه‌م شیعر، یان ئه‌و ده‌قی، گرتووه‌. هێمن له‌م سه‌روتاره‌ شیعره‌ موژده‌ ده‌دا كه‌ كورد چیتر هه‌ڵه‌ ناكات، باوه‌ڕ به‌دوژمن ناكات ‌و ناخه‌ڵه‌تێ، بۆیه‌ وه‌كو جاران نییه‌ كه‌ هه‌ڵه‌ی رابردوو دوباره‌ ناكاته‌وه‌، مه‌علومه‌ كه‌وا نه‌بوو، مه‌علومه‌ كه‌ سه‌روتار ئه‌گه‌ر به‌ باوه‌ڕ به‌خۆبونه‌وه‌ نه‌نووسرا بۆ جێی وتاری سه‌ره‌كی لاپه‌ڕه‌یه‌ك ده‌ست نادات. سه‌روتار هه‌ڵوێست ‌و كه‌مێكیش شرۆڤه‌ ‌و مژده‌یه‌، به‌ڵام فه‌له‌سه‌فه‌ ‌و دڵه‌راوكێی تێدا نییه‌. ئەما كه‌وابوو له‌و حاڵه‌دا لاپه‌ڕه‌ی ئازاد جێی ده‌بێت نه‌ك سه‌روتاری ره‌سمی رۆژنامه‌یه‌ك.
ئاواتی به‌رز
لاگری سوڵحه‌ ته‌واوی ڕه‌نجبه‌ری وشیاری كورد
چاوه‌نۆڕی ده‌رفه‌تێكه‌ خه‌ڵكی لادێ و شاری كورد
ده‌ستی دا ده‌ستی برای و هاته‌ ناو كۆڕی خه‌بات
كیژی نه‌شمیل و له‌بار و شۆخ و گوێ به‌گواری كورد
كورد گوتوویه‌ سوار هه‌تاكوو نه‌گلێ قه‌ت نابێ به‌سوار
ئێسته‌ چابوك سواره‌، چونكه‌ زۆر گلاوه‌ سواری كورد
فێری زۆر ده‌رسی به‌كه‌ڵك و باشی كردین تێشكان
جا ببینه‌ ڕاپه‌ڕین و شۆڕشی ئه‌م جاری كورد!
به‌یت و بالۆره‌ی هه‌زار جار بۆ بڵێ كۆنه‌په‌رست
تازه‌ وێژینگێكی نادا دیده‌كه‌ی بێداری كورد
ڕۆژ به‌ڕۆژ قایمتره‌، مه‌حكه‌متره‌، بڕوایه‌كه‌ی
ده‌م به‌ده‌م چاكتر ده‌بێ، باشتر ده‌بێ، ئاكاری كورد
بێ وچان ده‌ڕواته‌ پێش و ڕێگه‌ ده‌بڕێ بۆ هه‌ده‌ف
زۆر له‌ ساڵان ڕوونتره‌ ئه‌و ساڵه‌كه‌، ئه‌فكاری كورد
كورد به‌زینی بۆ نه‌بوو ده‌ستی نه‌دا، با دوژمنیش
ڕانه‌وه‌ستابێ له‌ تاڵان و بڕۆ و كوشتاری كورد
ئه‌و له‌ ئازار و شكنجه‌ی قه‌ت نه‌بوو خافڵ، به‌ڵام
كوردی كردۆته‌ سماته‌ جه‌زره‌به‌ و ئازاری كورد
مافی كوردی هه‌رده‌بێ بستێنده‌رێ، بستێنده‌رێ
دوژمنی كورد تێ گه‌یشتووه‌، ناكرێ باشاری كورد
وا گزینگی دا به‌یانی جوانی ئازادی به‌شه‌ر
ڕۆژی ڕووناكه‌، نه‌ماوه‌ زوڵمه‌تی شه‌وگاری كورد
نایه‌وێ یاریده‌دان و كۆمه‌گی ئه‌سڵی چوار
جووجه‌ڵه‌ی ئاغای ترۆمن وێی كه‌وت پللاری كورد
هه‌ر كه‌ تووشی بوو ده‌ڵێ: «یانكی گۆ هۆم یانكی گۆ هۆم»
تازه‌ ده‌ستی ئه‌جنه‌بی ناتوانێ بگرێ زاری كورد
دێته‌ سه‌ر ڕێبازی راست و دێته‌ ناو كۆڕی خه‌بات
خواره‌پێچه‌ی لێ بڕاوه‌ پیاوی خێچ و خواری كورد
هێزی بێگانه‌ی له‌پشت خۆی دیبوو، بۆیه‌ وای ده‌كرد
باری هێلكان نابزێوێ خاینی لاساری كورد
دانه‌نیشێ گه‌ر له‌سه‌ر ئه‌و په‌تك و سینگه‌ بێگومان
تۆ له‌ ئه‌ستۆیدا ده‌بینی په‌تك و گوێله‌وساری كورد
تێك ده‌ده‌ن كۆشكی بڵیندی مفته‌خۆری زگ زه‌لام
پاڵه‌ و جووتیاری برسی، كارگه‌ری بێكاری كورد
خۆی له‌به‌ر لافاوی قینی توندی گه‌ل ڕاناگرێ
دوژمنی وه‌حشی و دڕنده‌ و زاڵم و زۆرداری كورد

ده‌چته‌ سه‌ر دارێ له‌ ڕۆژی ئینتیقام و تۆڵه‌دا
ئه‌و كه‌سه‌ی كوشتی به‌ ناهه‌ق پێشه‌وا و سه‌رداری كورد
نایه‌ڵن ئادار به‌سه‌ر پاداری ئه‌و ده‌رباره‌وه‌
چونكه‌ ده‌یگوت نایه‌ڵم ئاداری كورد، پاداری كورد
«پاش قڕانی موده‌عی ده‌س پێ ده‌كه‌ن ته‌عمیری موڵك»
دێته‌ دی ئاواتی به‌رزی «ئه‌حمه‌دی موختاری كورد»
«ڕێگه‌یی ئاسن ده‌چێته‌ شاخی هه‌ورامانه‌وه‌»
هه‌ر كه‌ كه‌وته‌ ده‌ستی كوردی چاره‌نووس و كاری كورد
مه‌دره‌سه‌ و دانیشكه‌ده‌ بۆ شار و لادێ داده‌نێن
خوێنده‌واربێ تاكوو ڕۆڵه‌ی زیره‌ك و نازداری كورد

ئه‌و زمانه‌ شیرنه‌ی ئێمه‌ په‌ره‌ی ده‌گرێته‌وه‌
نادڕێ چیدی كتێب و ده‌فته‌ری ئه‌شعاری كورد
بێ بره‌و نابێ مه‌تاعی كورده‌واریمان ئیتر
ڕه‌ونه‌قی په‌یدا ده‌كا ئه‌و جاره‌كه‌ بازاڕی كورد
داده‌مه‌زرێنن له‌ گشت شاری وڵات كارخانه‌یه‌ك
تا به‌ده‌ستی خۆی ڕه‌نێو بێ به‌رهه‌م و كرگاری كورد
به‌ر ده‌ده‌ن گاجووتی له‌ڕ، سواری ته‌ڕاكتۆران ده‌بن
دێته‌ ده‌ر بووره‌ و به‌یار و به‌نده‌ن و نیساری كورد
كشتوكاڵ و جووت و گامان دێته‌ سه‌ر باری له‌بار
پڕ ده‌بێ تێڕ و جه‌واڵ و مشت ده‌بێ عه‌مباری كورد
خه‌سته‌خانه‌شمان ده‌بێ، دوكتۆر و ده‌رمانیش فره‌
ناكه‌وێ تازه‌ له‌ كووچان خه‌سته‌ و بیماری كورد
به‌ختیار و خوێنده‌وار و ساغ و تێر و پڕ ده‌بێ
دێته‌ ده‌ر ماكه‌ی نه‌هاتی و نه‌گبه‌تی و ئیدباری كورد
ده‌ست له‌ ئه‌ستۆی یه‌ك ده‌كه‌ن ئازاد و شاد و به‌خته‌وه‌ر
كیژ و كوڕ، لاو و گراوی، دڵبه‌ر و دڵداری كورد

بەشێکە لە نووسینێکی ناو کتێبی لە غەزەتەوە بۆ غەزای سۆشیال میدیا.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

5 − 2 =

x

هەواڵێ هاوشێوە

کۆماری خودا، ئاسمانێکی بونگەرایی

لەدووتوێی 416 لاپەڕەدا کتێبی (کۆماری خودا، ئاسمانێکی بونگەرایی) کە یەکێکی ...