سەرەکی » دۆسێ » لاپەڕەی شەهیدان و سەروەران لە رۆژنامەوانی كوردیدا

(كوردستانی نوێ‌- وەك نموونە)

لاپەڕەی شەهیدان و سەروەران لە رۆژنامەوانی كوردیدا

محەمەد مێرگەسۆری

به‌شی چواره‌م و کۆتایی
باسی چوارەم: لاپەڕەی شەهیدان و سەروەران لە ڕۆژنامەی «كوردستانی نوێ».
بەهۆی بەڕەنگاری و بەرخودانی گەلی كورد لە دژی ڕژێمە داگیركەرەكانی كوردستان و بەردەوامی زوڵم و زۆرداری، هەمیشە و بەردەوام هاوڵاتی و رۆلەكانی گەلی كورد لەپێناو مانەوە و ئازادی خۆیان و گەلەكەیان، لە پێشەوەی سەنگەری بەرەنگاریدا بەرووی داگیركەری وەستاوەنەتەوە هەندێكیان گیانی خۆیان بەختكردوە و شەهید بوون و هەندێكیشیان لە ئەندامێك زیاتری جەستەیان لەدەستداوە.
بۆیە ی.ن.ك، وەك حزب و لایەنێكی سیاسی كوردستان، كە نزیكەی چارێكە سەدەیەك پێشەنگایەتی بزاڤی ڕزگاریخوازی گەلی كوردستانی لە باشووری كوردستان كردووە.هەروەها لە دژوارترین قۆناغدا جاڕی شۆڕشی نوێدا.بۆیە بە درێژایی ئەو ماوەیەو مێژووە، چەندین ڕۆڵەی گەلی كورد لەنێو ریزەكانی ی.ن.ك،دا بوونە پێشمەرگە و لە شەڕ و چالاكی و رووبەڕووبونەكانیان لەگەڵ ڕژێمی بەعس شەهید بوون ، كە سەرمەشقی ئەو شەهید و سەروەرانەش، شەهیدان خاڵە شیهاب و جەعفەر عەبدولواحید و ئەنوەر زۆراب بوون. لە قۆناغەكانی دواتریشدا چەندین سەركردە و پێشمەرگەش بوونە قوربانی و ناویان چووە ناو لیستی شەهادەتەوە.
بۆیە هاوتا لەگەڵ هەموو ئەو ڕۆڵە و هاوڵاتیانەی، لەساڵی 1975هەتا راپەڕینی 1991 گیانی خۆیان بەختكرد و چوونە ریزی سەروەران، یەكێتی بە مافی خۆی زانی كە وەك رێزگرتن و بەرزراگرتنی خوێنی پیرۆزی ئەو شەهیدانە، ئەگەر وەك یادكردنەوەیەكیش بێت، بۆ ئەو مەبەستە لە دەرچوونی یەكەم ژمارەوە لاپەڕە و گۆشە و بابەتی تایبەت لەناو رووپەری یەكەمین ڕۆژنامەی ڕۆژانەی راپەڕیندا جێی بۆ كردنەوە. لەبەر ئەوە ڕۆژنامەی كوردستانی نوێ‌، هانی هەموو بنەماڵە وكەسوكاری شەهیداندا، كە دەستكراوەن و ڕاسپێردران، كە لە یادی شەهیدكردنی ئازیزانیان، بە نوسین و بابەتی جیا یادیان بكەنەوە. لەگەڵ كەمی توانای مرۆیی و تەكنیكی لە سەرەتایی دەركردنی ڕۆژنامەیەكی رۆژانە، بەڵام ئەم لایەنە و سۆزە فەرامۆش نەكراوە.
لێرەدا بە پێویست دەزانرێ‌، كە لە پێناو دەستكەوتنی بەڵگە وسەرچاوەی ووردو ڕوون لەوبارەییەوە، ئەبێ‌ لە دەروازە و كەناڵی پرسیاركردنێكی جەوهەرییەوە بچینە ناو ئەو باسەوە، چۆن بتوانین بەدوای سەرچاوەی روون و ووردی دەستپێكی ئەم لاپەڕەیە و گۆشەیە لە ڕۆژنامەی كوردستانی نوێ‌ بگەڕێین؟
لەبەر ئەوەی پێشتر لەو بارەییەوە و لەسەر لاپەڕەی تایبەتمەند و تایبەت بە شەهیدان و سەروەران لێكۆلینەوە و توێژینەوەی لەو چەشنەی لەبەردەستماندایە، نەكراوە. ناچارین بە شێوەیەكی پراكتیكی و مەیدانی لەسەر ئەو لاپەڕەیە و گۆشەیە درێژە بەو باسە و توێژینەوەیە بدەین.
بۆ ئەو مەبەستە هەر لە ژمارە سفرەوە دەستمان كرد بە گەڕان و توێژینەوە، بۆمان دەركەوت، كە شوێن وگۆشە ولاپەڕەی تایبەت بە شەهیدان و سەروەران گۆڕانكاری بەسەر هاتووە. دەكرێ‌ بەمشێوە ییەی خوارەوە لە سەرەتا و قۆناغی بەرایی دەرچوونی ئەو ژمارانە بكەین، كە بۆ جاری یەكەم و لە ساڵی یەكەمی تەمەنیدا لاپەڕەیی شەهیدان و سەروەرییان تێدا هەبووە بڵاوكراونەتەوە، بە ووردی باسی لێوە بكەین:

ژمارە (سفر)ی رۆژی 12/1/ 1992.
جگە لەوەی ئەم ژمارەیە ئەزمونی بووە، بەڵام زۆربەی ژمارەكانی بە رێكوپێكی بەسەر بەشەكان دابەشكراون، وەك: هەواڵ، كاروباری سیاسی، لێكۆڵینەوە، ڕێپۆرتاژ، كاروباری ناوخۆ، ڕۆشنبیری گشتی، ئاگاداری…ئیتر».سەرجەمی ژمارەكانی 8 لاپەڕەی تابلۆید بووە. لەو ژمارەیەدا بابەتێك لە لاپەڕە 2یدا، لەسەر شەهیدبوونی شەهید عەبدولرەزاق، بەناونیشانی شەهید عبدالرزاق لە لوتكەی هەڵوێستیدا» نوسراوە. شایانی باسە عەبدولرەزاق لەدوای ئازادكردنی شاری كەركوك لە راپەڕینی ساڵی 1991، دوای پەلاماردانەوەی لەلایەن رژێمی عێراق، لە شەڕێكی بەرگریی كردن لەو شارەدا شەهید كرا.

ژمارە (9)ی ڕۆژی 4/2/1992.
لەو ژمارەیەدا لە لاپەڕە 4یدا، كە تایبەت كراوە بە لاپەڕەی ڕێپۆرتاژ وكاروباری ناوخۆ، بابەتێك لە گۆشەیەكیدا بەناوی یادی نەمران، یادی شەهید سەردار سەعید سۆفی كراوەتەوە.

ژمارە (34)ی ڕۆژی 4/3/1992.
ئەم ژمارەییە، لە هەموو روویەكەوە، لەگەڵ ژمارەكانی پێشتریدا جیادەكرێتەوە.بەوەی كە تایبەت كراوە بە یادی یەك ساڵەی راپەڕینی ساڵی 1991ی جەماوەری كوردستان. بەمەش بۆ جاری یەكەم لە جیاتی 5ی ئادار،لە رۆژی 4ی ئادار یادی راپەڕین، لەلایەن ڕۆژنامەیەكی رۆژانەی دوای قۆناغی راپەڕین بكرێتەوە. هەروەها یەكەمجارە كە لە ڕۆژنامەیەكی ڕۆژانەدا، باس لە راپەڕینی جەماوەری ئۆردوگای «خەبات- كەلەك»ی سەر بە پارێزگای هەولێر بكرێ‌، كە راپەڕین لەوێ‌ دەستی پێكردووە.
جگە لەوەش ئەو ژمارەییەی ڕۆژنامەی كوردستانی نوێ‌، یەكەم ژمارە و ڕۆژنامەی ئەوكاتەی باشووری كوردستانە، كە لە یادێكی ئەوادا لە یەكەم لاپەڕەیدا بە مانشێتێكی گەورە یادی سەروەری و شەهیدێك بكاتەوە و بەرزی رابگرێ‌. لە لاپەرەی یەكەمی ئەو ژمارەیە بە مانشێتێكی گەورە نوسراوە (شەهید بەختیار یەكەمین شەهیدی راپەڕینەكانە)و وێنەكەشی لە هەمان لاپەڕە دانراوە و بڵاوكراوەتەوە.

ژمارە (35) ی ڕۆژی 5/3/1992.
دیسان ئەو ژمارەیەش هەر بۆ یادی یەك ساڵەی راپەڕین تەرخانكراوە و زۆربەی بابەت و تەوەرەكانی لەسەر ئەو یادەن. جگە لەوەش سەرتاپای لە لاپەڕە 5ی بە وێنەو ناوی كۆمەڵێك شەهیدی راپەڕین پڕ كردۆتەوە.
هەروەها لەژمارە 36ی رۆژانی 6/3/1992، لەلاپەڕەی 3یدا و لە لاپەڕەی 5ی ژمارەی37ی، ڕۆژی 7/3/1992، تەرخانكراون بۆ یادی شەهیدانی راپەڕینی گەلی كورد لە شارو شارۆچكەكانی كوردستان.
بە شێوەیەكی گشتی زۆربەی ژمارەكانی كوردستانی نوێ‌، لە مانگی ئاداردا، چەند لاپەڕەیەكی بۆ یادی شەهیدانی راپەڕین تەرخانكراوە. هەر بۆ ئەو مەبەستە بۆ ئەو یادە، ژمارە 48ی ڕۆژی 20/3/1992 پاشكۆیەكی تایبەت بە یادی راپەڕین و رزگاركردنی شاری كەركوك دەركراوە بە مانشێتێكی گەورە لە لاپەرەی یەكەم نوسراوە» شەهید ماكی سەركەوتنە» و سەرتاپای لاپەڕەكە بە وێنە و ناوی كۆمەڵێك شەهید پڕ كراوەتەوە.

ژمارە (52)ی ڕۆژی 26/3/ 1992.
دیسان لە لاپەرەی یەكەمی ئەم ژمارەیەدا، بە مانشێتێكی گەورە نوسراوە(ی.ن.ك شەهیدان لە بیر ناكات)ئەو مانشێتەش لە ووتارێكی مام جەلال وەرگیراوە، كە لە ڕۆژی 25/3/ 1992 لە جەولەیەكی بۆ ناوچەی پشدەر و بتوێن پێشكەشی كۆمەڵێك بنەماڵە و كەسوكاری شەهیدان كردبوو.
بۆیە لەو ژمارەیە بە دواوە، كوردستانی نوێ‌ بایەخێكی زۆری بە شەهیدان و سەروەران داوە و لە قۆناغی و سالانی دواتر و هەتا دەگاتە ئەمرۆش پاشكۆ و لاپەڕە و گۆشەی تایبەتی بۆ ئەو مەبەستە تەرخانكردووە و بەردەوامیشە.

گۆشەیەك بۆ شەهیدان و سەروەران
وەك لە پێشەوە باسمان لێوەكرد، دوای تێپەربوونی سالێك بەسەر یادی راپەڕینی گەلی كورد لە باشووری كوردستان. ڕۆژنامەی كوردستانی وەك ڕۆژنامەیەكی ڕۆژانە دەستپێشخەری كرد لە كردنەوەی گۆشەیەكی تایبەت بە نوسینی بابەت و یادكردنەوەی شەهیدان بەناوی لە (دەفتەری سەروەرییەوە). ئەم گۆشەیە لە ژمارە 105ی ڕۆژی 31/5/1992 لە لاپەڕە 5دا كراوەتەوە. بەڵام تەمەنی ئەم گۆشەیە كورت بوەو چەند مانگێكی خایاندوە و دواترە گۆڕاوە بۆ لاپەڕە تایبەت بە شەهیدان.

لاپەڕەیەك بۆ یادكردنەوەی شەهیدان
هەر لە سەرەتایی ساڵی 1993 تا 1994، لە بەشێكی زۆری ژمارەكانی كوردستانی نوێدا، لە لاپەڕە 4، 5دا، یادی شەهید وسەروەرانی شۆڕش كراوەنەتەوە و هەندێجاریش بابەتیان لەسەر نوسراوە. جگە لەوەش لە هەندێ ژمارەدا سەرتاپای ئەو دوو لاپەڕەیە، بۆ ئەو مەبەستە تەرخان كراوە.

دیسان پاشكۆ
لە ژمارە 1333ی ڕۆژی 12/ 7/ 1996 پاشكۆیەكی دوو لاپەڕەیی تایبەت بە شەهیدان و سەروەران بەناوی پاشكۆی (نەمران) دەرچووە. ئەو پاشكۆیەكی بە شێوەیەكی ڕێكوپێك دیزاینكراوە و تێیدا یادی شەهیدانی شۆڕشی نوێ‌ و راپەڕین و شەڕی ناوخۆ كراوەتەوە. لەوانە یادی شەهیدانی بنەماڵەی مام عوسمان گۆمەشینی، كە سێ‌ كەس لە بنەماڵەكەیان بە دەستی ڕژێمی عێراق شەهید كراون. ئەو پاشكۆیەش تەمەنێكی درێژی نەبوو، چەند ژمارەیەكی لێدەرچوو، دواتر بەهۆی ڕووداوی 31ی ئاب، ڕۆژنامەی كوردستانی نوێ‌ چەند هەفتەیەك وەستا و پاشكۆی دیكە دەرنەچوو.

وەستانێكی كەمی كوردستانی نوێ‌
بەهۆی درێژبوونەوەی تەمەنی شەرشی ناوخۆ و فراوانبوونی لێكەوتەكانی و پەلاماردانەوەی شاری هەولێر لەلایەن پارتی دیموكراتی كوردستان و ڕژێمی عێراق لە ڕۆژی 31ی ئابی 1996و داگیركردنەوەی، كە ماوەی سالێك زیاتر بوو، یەكێتی تێیدا باڵادەست بوو، دواژمارەی لە ڕۆژی 30ی ئابی 1996 دەرچوو. پاشان بەهۆی گرتنی شاری سلێمانی لەلایەن پارتی دیموكراتی كوردستان وپاشەكشێی هێزەكانی ی.ن.ك بۆ سەر سنور كوردستانی نوێ‌، بەمەش بۆ ماوەیەك كوردستانی نوێ‌ دابرا و لە دەرچوون وەستا. بەڵام دوای گەڕانەوەی یەكێتی بۆ ناو شاری سلێمانی و دەركردنی پارتی لەو شارە لە ڕۆژی 1ی تشرینی یەكەمی 1996 جارێكی تر دەستی كردەوە بە دەرچوون و بڵاوبوونەوە. ئیتر لەو كاتەوە بارەگا و ئوفیسی سەرەكی كوردستانی نوێ‌ لە شاری سلێمانیە. بۆیە لەو ڕۆژگار و ڕووداوە بە دواوە، كوردستانی نوێ‌ دەكەوێتە قۆناغێكی تر.بەوەی كە لە زۆربەی ژمارەكانیدا لاپەڕە 4،5 و هەندێجاریش لە لاپەرەی تردا، لەبارەی شەهیدان بابەت و یادكردنەوەیان دەنوسرێت و بڵاوكراوەتەوە، كە لەو قۆناغەدا یادكردنەوەی شەهیدانی شەڕی ناوخۆ ڕووبەرێكی زۆری داگیر دەكەن.ئەم فۆڕم و شێوەیە درێژە دەكێشێ‌ و لە پاڵشیدا شەڕی توند و قوربانی زیاتریان لێدەكەوێتەوە، بە تایبەت هەڵمەتی گەردەلوڵی تۆڵەی دووەم لە سەرەتایی مانگی تشرینی یەكەمی ساڵی 1997. بەمەش ڕووبەرێكی زیاتر لە جاران بۆ قوربانیانی ئەو ڕووداوانە تەرخانكراوە. چونكە ئەوانە بە شەهید دانراون، لەبەر ئەوەی ئەو بابەتە، ببووە پێویستیەكی قۆناغەكە و كەسوكاری شەهیدان خوازیاری یادكردنەوەی ڕۆڵەكانیان بوون.

ئەلبومێك بۆ شەهیدان
لە ساڵی 1998دا، كوردستانی نوێ‌ هەنگاوێكی پراكتیكی بە ئاڕاستەی كردنەوەی ئەلبومێك یان كردنەوەی گۆشەیەك بۆ شەهیدان و سەروەران هاوێشت. لە ژمارە 1532ی ڕۆژی 5/1/ 1998دا، لە لاپەڕە 4دا، كە تایبەت بوو بە كاورباری ناوخۆ، گۆشەیەك بەناوی (ئەلبومی شەهیدانی گەردەولولی تۆڵە) كردەوە.
ئەم ئەلبومەش، تەمەن درێژ نەبوو، تا ژمارە 1565ی ڕۆژی 26ی شوباتی 1998 بڵاوكرایەو و دواتر وەستا.بەڵام لە ژمارە 1568ی ڕۆژی 3/3/1998، گۆشەیەك بەناوی (كاروانی سەروەری) لە لاپەڕە 4ی تایبەت بە كاروباری ناوخۆ كرایەوە.ئەم گۆشەیە بە تەمەنترین گۆشە وئەلبومی شەهیدان و سەروەران دەژمێردرێت، كە تا كۆتایی ساڵی 1999 درێژەدەكێشێ‌.

كوردستانی نوێ‌ كرایە 12 لاپەڕە.
دوای ئەوەی كوردستانی نوێ‌، لەرووی چەندایەتی وچۆنایەتی گەشەی هەمەلایەنە بە خۆییەوە دەبینێ‌ و ئەرك وكارەكانی زیاتر دەبن و ئەو سەردەمە و قۆناغەكەی پێیدا تێپەر دەبێ‌ وخواستی دیكە دەخەنە سەرشانی كوردستانی نوێ‌. لە ژمارە 1797ی ڕۆژی 7/2/1999 ئەو ڕۆژنامەیە لە 8 لاپەڕەوە دەبێتە 12 لاپەڕە. گۆشەی (كاروانی سەروەری) كە پێشتر لە لاپەڕە 4دا جێی بۆ كرابوەوە، لە كاتی زیاتر بوونی ژمارەی لاپەڕەكانی چۆتە لاپەڕە7، كە ئەو لاپەڕەیەش بەشێوەكی گشتی بۆ كاروباری ناوخۆ تارخانكراوە.بەڵام لە هەندێ‌ ژمارەیدا ئەو گۆشەیە ڕۆیشتۆتە لاپەڕە 9.
لەلایەكی تر لە ژمارە 1876ی ڕۆژی 7/6/1999وە تا كۆتایی ئەو ساڵە،دووبارە گۆشەی كاروانی سەروەری لە لاپەرە 4دا بڵاوكراوەتەوە. ئەوەی جێی باسكردنە لە هەندێ‌ ڕۆژو یادەدا، سەرتاپای لاپەڕەكانی 4- 7 بۆ یادی شەهیدان و سەروەران تەرخانكراوە.
بۆیە بەشێوەیەكی گشتی بە درێژایی ساڵی 1999 تا ژمارە 2009 ی ڕۆژی 23/12/ 1999دا، گۆشەكە هەر ماوەتەوە و لە لاپەڕە 4 و هەندێجار لاپەڕە 7 بووە.

ساڵی 2000 و سەرنجێك
بەهۆی هاتنەئارای هەلومەرجێكی تایبەتی ودورستبوونی شەڕ لە نێوان ی.ن.ك و پ.ك.ك، لە مانگی ئەیلولی 2000دا، رووبەڕێكی زۆری لاپەڕەكانی كوردستانی نوێ‌ بۆ بابەت و تەوەرەی تایبەت بەو پرس ورووداوە تەرخانكرا.بەمەش بۆماوەی دوو مانگ زیاتر هیچ گۆشە و پاشكۆی تایبەت بە یادی شەهیدان و سەروەران بڵاونەكرانەوە.بەڵام بە شێوەیەكی گشتی گۆشەی كاروانی سەروەری لەساڵی 2000یش درێژەی هەبووە و بە زۆریش 4دا بڵاوبۆتەوە. هەروەها هەر لەو ساڵەدا هەندێجار لە لاپەڕە 5ی تایبەت بە ڕێپۆرتاژ بڵاوبۆتەوە و جاری واش هەبووە لە لاپەڕەكانی 6،7 و هەندێجار لە 9دا بڵاوبۆتەوە، كە لاپەڕە 6،7 تایبەت بوون بە كاروباری سیاسی.

ساڵی 2001
ساڵی 2001دا، ئەم گۆشەی كاروانی سەروەری بەردەوامی هەبووە و كەوتۆتە لاپەڕە 4 لە سەرەوەی ئەو لاپەڕەیە و بە لای دەستە چەپی جێگیر كراوە.بەڵام گۆشەكە بە گشتی وەك ساڵانی پێشتر زوو بە زوو دانەبەزیوە، مەودایەك لە نێوانیاندا هەبووە.

ساڵی 2002 و قۆناغێكی نوێ‌.
لەگەڵ ئەوەی هەر لە سەرەتایی ئەو ساڵەدا، بەهەمان شێوەی پێشتر كاروانی سەروەری هەر لە لاپەڕە 4دا درێژەی بە تەمەنی خۆی داوە ولە شوێنەكەی خۆی بەلای لەلای سەرەوە بە دەستە چەپ بە جێگیری ماوەتەوە. واتە هەر لە ژمارە 2648ی رۆژی 1/1/2002 بە هەمان شێوە و لۆگۆی ساڵی یەكەمی تا ئەوكاتە ماوەتەوە ولۆگۆیەكەی نەگۆڕاوە، كە لەسەر دەفتەرێك نوسراوە»كاروانی سەروەری»و قردێلەیەك لە خوارەوە بە لەلای دەستەچەپی دانراوە. بەڵام لەو ساڵەدا و لە لاپەڕە 4دا، لە هەمان شوێن لە ڕۆژی 24/1/2002دا گۆڕانكاری لە لۆگۆیەكە دەكرێ‌ و دەگۆڕێت بە نوسێنكی قەبارە گەورە بە ناوەكەی خۆی بەناوی كاروانی سەروەری دەنوسرێ‌. بەڵام لە ژمارە 2753ی ڕۆژی 12/5/ 2002 گۆڕانكاری بەسەر ئەو گۆشەیە دێت و گۆشەی كاروانی سەروەری نامێنێ‌.

پاشكۆی سەروەران.
دوای كۆتایی هاتن بە درێژترین گۆشەی تایبەت بە یادكردنەوەی شەهیدان بەناوی كاروانی سەروەری).لەساڵی 2002دا، وەك وەفایەك بۆ شەهیدان و كەسوكاریان پاشكۆی (سەروەران) لەگەڵ ژمارە 2753ی ڕۆژی 12/5/2002ی كوردستانی نوێ‌، یەكەم ژمارەی ئەو پاشكۆیە لە دووتوێی 4 لاپەڕە دەرچووە.
بە فۆنتێكی گەورە نوسراوە پاشكۆی سەروەران و لە ژێرەوەی بە فۆنتێكی بچوكتر نوسراوە: «پاشكۆی سەروەران پێشكەشە بە گیانی پاكی شەهیدانی بەرگری لە حكومەتی هەرێم».
ئینجا بەمشێوەیە پاشكۆیەكەی ناساندوە ونوسراوە: وەك بەجێهێنانی ئەركێكی نیشتمانیی و نەتەوەیی، كوردستانی نوێ‌ لە بەرنامەی گەشەپێدانی نوێیدا، بڕیاریداوە پاشكۆیەكی تایبەت بە شەهیدە نەمرەكان ورێزلێنان لە سەروەرییەكانیان و كەسوكارە خۆراگرەكانیان بەناوی (سەروەران) دەربكات». جگە لەوەش ناوی ستافی كارای پاشكۆش دوالاپەرەی نوسراوە و ستافی كارای ژمارە 1 ئەمانەن: ئاودێر شێخ عومەر، مەریوان مەسعود، بەهار خوارەحم، عومەر حسێن. هەروەها لە كۆتایی لاپەڕەدا نوسراوە»پاشكۆیەكی تایبەتە بە ژیان وسەروەری شەهیدە نەمرەكان وكەسوكارە سەربەرزەكانیان، هەفتەی جارێك دەردەچێت.
ژمارە 2 ی ئەو پاشكۆیە لەگەڵ ژمارە 2802ی لە ڕۆژی 8/7/2002 لە دووتوێی 4 لاپەڕە دەرچووە.تەنها ناوی ستافی كارای گۆڕانكاری بەسەردا هاتووە ، كە ئەمانەن: خوالێخۆشبوو محەمەد نوری تۆفیق، تەلعەت مەلا سلێمان، دڵشاد ئەحمەد».بەڵام ئەگەر تێبنی بكەین، كە مەودای دەرچوونی نێوان ئەو ژمارەیەی پاشكۆ، لە مانگێك زیاترە، لە كاتێكا ئەبوایە هەفتانە دەربچوایە؟! ژمارە 3ی لەگەڵ ژمارە 2814ی لە ڕۆژی 22/7/2002 لە دووتوێی 4 لاپەڕە دەرچووە.
بەمشێوەیە ئەم پاشكۆیە هەر بەو ناوە ، نەك هەفتانە، بە شێوەیەكی نارێك ومەودا جیاواز لە نێوان ژمارەكاندا دەرچووە.بەڵام لە ژمارە 6دا، كە لەگەڵ ژمارە 2857ی لە ڕۆژی 9/9/2002ی كوردستانی نوێ‌ دەرچووە، ناوەكەی لەو ژمارەیەوە لە پاشكۆی (سەروەران) گۆڕاوە بۆ پاشكۆی (سەروەری) و تا ژمارە 10، كە دواژمارەیەتی كە ڕۆژی 11/11/ 2002دەرچووە، هەر بەو ناوە بووە.
بۆیە بە گشتی لە ساڵی 2002دا:
(5) ژمارەی پاشكۆی «سەروەران» لە دووتوێی 4 لاپەڕە دەرچووە.
(5) ژمارەی پاشكۆی «سەروەری» لە دووتوێی 4 لاپەڕە دەرچووە.
هەر لەو ساڵەدا، جگە لەو پاشكۆیانەی سەرەوە، ژمارەی تایبەتی كوردستانی نوێ‌ بۆ یادكردنەوەی شەهیدان و سەروەران دەرچووە. لەوانە ژمارەیەكی تایبەت بۆ یادی چواردەهەمین ساڵەی شەهید ئازاد هەورامی لە ژمارە 2849 ی لە ڕۆژی 31/8/2002.
ئەوەی ئەم ژمارەییەی كوردستانی نوێ‌ لەگەڵ هەموو ژمارە و سەرتاپای تەمەنی زیاتر لە بیست ساڵەی جیای دەكاتەوە، ئەوەیە كە لە سەرەوەی لاپەڕەی (1)ی لە گۆشەیەكی دەستە چەپیدا نوسراوە (چاپی ئێوارە). سەرجەمی لاپەڕەكانی 8 لاپەڕەیە و هەموو تەرخانكراوە بۆ یادكردنەوەی شەهید ئازاد هەورامی.ناوی هیچ ستاف و دەستەی نوسەران و ئامادەكرانی بەسەرەوە نیە.

ساڵی 2003
لە سەرەتایی ئەو ساڵەدا، لە مانگی شوباتی 2003دا، و لە ژمارە 2978یدا، پاشكۆیەكی تایبەت بە یادی بیست وپێنج ساڵەی شەهیدكردنی ئارام لە دووتوێی 8 لاپەڕەدا بڵاوكراوەتەوە. بۆیە بەشێوەیەكی گشتی بە درێژایی ئەو ساڵە، بەشێوەیەكی پچرپچر یادكردنەوەی شەهیدان كراوەتەوە و بابەت و وتار لە لاپەڕەكانی 4،5،6،7،دا لەوبارەییەوە نوسراون و بڵاوبونەتەوە. واتە پاشكۆ یان گۆشە یان لاپەڕەی تایبەت بۆ ئەو مەبەستە نەبووە.

ساڵی 2004
لە سەرەتای ئەو ساڵەدا، بەهۆی ئەنجامدانی كردەوەیەكی خۆتەقاندنەوە لە ڕۆژی 4/2/2004 لە بارەگای مەڵبەندی 3ی یەكێتیی نیشتمانیی كوردستان و لقی 2ی پارتی دیموكراتی كوردستان لە شاری هەولێر، كە ژمارەیەكی زۆر كوژرا و برینداری لێكەوتەوە. بۆ ئەو مەبەستە ژمارەیەكی تایبەتی كوردستانی نوێ‌ لە دووتوێی 24 لاپەڕە، لە ڕۆژی 6/2/2004 دەرچووە.
لە ناوەڕاستی مانگی ئاداری ئەو ساڵەش، (لاپەڕەی سەروەران) كراوەتەوە و لاپەڕە 6ی بۆ تەخانكراوە، كە تایبەت بووە، كە یادكردنەوەی شەهیدان وسەروانی گەلی كورد و هەفتانە بڵاوكراوەتەوە. بەڵام لە هەندێكاتدا وەك مانگی تشرینی یەكەم، پێش هەفتەیەك ئەو لاپەڕەیە دووبارە بۆتەوە و چەند ڕۆژێ جارێك دەرچووە، وەك ڕۆژانی 8/10 و 12/10 و 19/10 و 24/10 و 28/10 و 31/10/2004. جگە لەوەش هەندێجار لاپەڕەی سەروەران لە جیاتی لاپەڕە 6، لە لاپەڕە 4 و 5 و 8 بڵاوبۆتەوە.دیسان هەر لەو ساڵەدا چەند پاشكۆیەكی جیا بە یادی شەهیدان و سەروانی دەرچوون، ئەوانیش:

– پاشكۆی (كوێستانی) كوردستانی نوێ‌.
ئەم پاشكۆیە، تایبەت بە یادی شەهید حەسەن كوێستانی و هاوڕێیەكانی لە دووتوێی 4 لاپەڕە لەگەڵ ژمارەی 3368ی كوردستانی نوێ‌ لە ڕۆژی 17/5/2004 چاپ و بڵاوكراوەتەوە.

– پاشكۆی ئەستێرەیەكی گەش.
ئەم پاشكۆیە، تایبەت بە یادی بیستەمین ساڵەی شەهیدكردنی ملازم سەید كەریم و هاوڕێیەكانی، كە كوردستانی نوێ‌ بە هەماهەنگی لەگەڵ مەڵبەندی 6ی سۆران دەریكردووە. لە دووتوێی 4 لاپەڕە لەگەڵ ژمارە 3473ی كوردستانی نوێ لە ڕۆژی 15/9/2004 بڵاوكراوەتەوە.

– پاشكۆی كەم ژیان و كەل ژیان
ئەم پاشكۆیە بەمشێوەیە ناسێنراوە: پاشكۆیەكی تایبەتە ،كوردستانی نوێ‌ بۆ یادی بیست و هەشت ساڵەی لە سێدارەدانی شەهیدان خاڵە شیهاب و جەعفەر عەبدولواحید و ئەنوەر زۆراب بڵاویدەكاتەوە.
ئەم پاشكۆیە لەگەڵ ژمارە 3526ی كوردستانی نوێ‌ لە ڕۆژی 21/11/2004دا لە دووتوێی 4 لاپەڕە دەرچووە.
ئەم پاشكۆیە جیا لەگەڵ دوو پاشكۆی سەرەوە، ستافی ئامادەكەرەی خۆی هەبووە و پێكهاتوە لە:
«مەریوان عەلی، لوقمان غەفور، هاونیاز سامی، ئاراس شەریف، راز عوسمان، نیاز عەلی، كۆسار عوسمان».

ساڵی 2005
لەو ساڵەشدا لاپەڕەی شەهیدان و سەروەران درێژەی هەبووە و بە هەمان شێوە لە لاپەڕە 6دا ماوەتەوە و هەفتانە دەرچووە. بەڵام لە هەندێكاتدا چۆتە لاپەڕە 5 و جاری واهەبوو لە چەند ڕۆژێكی مانگێكدا بە دوای یەك دەرچووە،وەك ڕۆژی 4 و 5 و 7/ 8 / 2005.
هەروەها لەو ساڵەدا تەنها پاشكۆیەكی تایبەت بۆ چلەی مامۆستای خوالێخۆشبوو مەحمودی مەلا عزەت لە دووتوێی 4 لاپەڕە بەناوی پاشكۆی (كاروانی بێ كۆتایی) لەگەڵ ژمارە 3698ی ڕۆژی 15/6/2005 ی كوردستانی نوێ‌ دەرچووە.

ساڵی 2006
بەهەمان شێوەی ساڵانی پێشتر، لاپەڕەی سەروەران لە لاپەڕە 6 دا ماوەتەوە و هەفتانە دەرچووە. بەڵام جاری واهەبووە لە مانگێكدا چەند ڕۆژێك دەرچووە، وەك مانگی شوبات. هەروەها لەو ساڵەدا لە یادی بۆردومانكردنی قەڵادزی لە 24/4/1974دا، بۆ ئەو یادە و شەهیدانی ئەو بۆردومانە پاشكۆیەكی تایبەت لەگەڵ ژمارە 3951ی كوردستانی نوێ‌ لە دووتوێی 4 لاپەڕە دەرچووە.
ئەوەی جێی باسە، سەرپەشتیاری لاپەڕەی سەروەران، ئاوات كۆكۆیی، كە لە ساڵی 2006 هەتا ئیسَتاش سەرپەرشتیاری ئەو لاپەڕەیە دەكات، وتی:»لە ناوەڕاستی ساڵی 2006ەوە، سەرپەرشتیاری ئەو لاپەڕەیەم و هەتا ئێستاش هەفتانە دەردەچێ‌، و لە هەندێ حاڵەتدا زووتر و درەنگتر، یادی شەهیدان و سەروەران و بۆنە و یادە تایبەتیەكان لەو لاپەرەیەدا دەكەینەوە.بە شێوەیەكی گشتی لاپەرەی 9 بە تایبەتی و سەربەخۆ بۆ لاپەڕەی سەروەران تەرخانكراوە، كە پێشتر ناوەناوە و بەشێوەیەكی پچرپچر لە لاپەڕەی كاروباری ناوخۆ و ڕێپۆرتاژ دەردەچوو.
هەر لەوبارەییەوە وتی:» جاری واهەبووە بۆ لە یەك ڕۆژ و لاپەڕەدا یادی زیاتر لە 40 شەهید كراوەتەوە».وتشی : هەتا ئێستا ئەو لاپەڕە ماوە و بەناوی لاپەڕەی سەروەرانە و زۆرجاریش جگە لەو لاپەڕەی بۆی دیاریكراوە، لە هەموو لاپەڕەكانی ڕۆژنامەی كوردستانی نوێدا، یادی شەهیدان كراوەتەوە و بابەت و وتاریان لەسەر نوسراوە». ( )
لەژێر رۆشنایی ئەو بەدواداچوون و گەڕانە مەیدانیە، دەركەوت، كە هەتا ئێستاش ئەو لاپەڕەیە لە ڕۆژنامەی كوردستانی نوێ‌ ماوەو ستاف و سەرپەرشتیاری خۆی هەیە و هەفتانە بابەت و تەوەرەی تایبەت بە یادی شەهید و سەروەران بڵاودەكاتەوە و لە هەندێ حاڵەتیشدا، بابەتی جیا لەو بارەییەوە دەنوسێ‌ و بڵاویان دەكاتەوە.

گرنگی رەگەز و تەمەن لەو لاپەڕەیەدا.
لە میانەی گەڕان و لێكۆلینەوە مەیدانیەكانمدا، دەركەوت، كە لەو لاپەڕەیەدا بەبێ‌ جیاوازی ڕەگەز ( نێر ومێ‌) تەمەن (منداڵ، گەنج، بەساڵاچوو، پیر)، بە پێی دەرفەت و بەبێ‌ جیاوازی، لە رۆژ شەهیدبوون و كۆچی دواییان یادیان كراوەتەوە و لە هەندێ كاتیشدا، جیا لە ڕۆژ و یادەكانیان، بابەتیان لەسەر نوسراوە. تەنانەت لە هەندێ كاتدا پاشكۆ و ژمارەی تایبەتیان لەبارەوە دەرچووە و بڵاوكراونەتەوە.
بەمەش دەردەكەوێ‌، كە شەهید پلەیەكی مەزنە و ئەو كەسەی ئەو شهادەتەی وەرگرتووە، لە هەر ڕەگەز و تەمەن و پلە و پۆستێك بووبێ‌ و ببێت، جێی خۆیەتی یادێكی شایستەی بۆ بكرێتەوە .

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

sixteen − fourteen =

x

هەواڵێ هاوشێوە

ناوەڕۆكی سەردانەكەی عەبدولمەهدی بۆ ئێران

سەرۆك وەزیرانی عیراق ڕایدەگەیەنێت، لە زۆر ڕەهەندی ئابووری و ئەمنی ...