سەرەکی » ئاراستە » پیاوێكی هەڵەبجەیی چیرۆكی ناولێنانی منداڵەكانی بۆ كوردستانی نوێ‌ دەگێڕێتەوە

پیاوێكی هەڵەبجەیی چیرۆكی ناولێنانی منداڵەكانی بۆ كوردستانی نوێ‌ دەگێڕێتەوە

مەحمود نامۆ – هەڵەبجە

كات پێشنوەڕۆی رۆژی 16ی 3ی 1988ە، شوێن هەڵەبجەیە، رژێمی بەعس هەوڵی سڕینەوەو لەناوبردنی ناسنامەی نەتەوەیەك دەدات، لەسەروبەندی ژیانكردنی هەڵەبجەییەكاندا بوو، كاتێك بەعسییە فاشستەكان پیلانی بۆمب بارانكردنی ئەو شارەیان-دا، ئەوان بێ‌ ئاگا لەوەی كە پیلانی لەناوبردنیان دڕێژراوەو دەست بۆ هەناسەی ساردیان دەبرێت‌و قوڕگیان لە تەڕی ژیانكردن بێ‌ بەش دەكرێت‌و وشك دەبێت.
زۆر دڕندانەو بێ‌ باكانە بە بەهاكانی مافی مرۆڤ و بە قێزەونترین شێوەی جینۆساید، هەڵەبجەیان خەڵتانی خوێن‌و بۆنی سێو كرد، دوای 31 ساڵ هەر رۆژەو چیرۆكێكی نوێ‌، بەسەر هات‌و گێڕانەوەیەكی ئازار بەخش دەبیستین.
پیاوێك دوای بۆردومان‌و كیمیابارانكردنی هەڵەبجەی شەهید، ناوی منداڵەكانی پێش بۆردومانەكە لە ناوی منداڵەكانی دوای كیمیابارانكردنەكە دەنێت، وەك خۆی دەڵێت: «دەمەوێت هەمیشە منداڵەكانم لەبەر چاوم بن‌و گوێم بەناوەكانیان بزرنگێتەوە».
حەیدەر سەید محەمەد، ئەو پیاوەی كە لەكاتی كیمیابارانكردنی هەڵەبجەی شەهید، خێزانەكەی بەر بۆردومانەكە كەوتن‌و هاوسەرەكەی‌و چوار منداڵەكەی بەناوەكانی (كۆچەر، تاڤگە، تەلار و دلێر) شەهید بوون‌و بوون بە قوربانی، بەڵام دوای گەڕانەوەی هەناسە بۆ هەڵەبجەو ژیان‌و گوزەران بۆ ئەو شارە، ئەو پیاوە دووبارە بڕیاری هاوسەرگیری دەدات، لەگەڵ کچێکی دیكەی هەڵەبجەییدا، دوای ئەوەی هاوسەرگیری دەكەن، هاوسەرە نوێیەكەی چیرۆكی ژیانی (حەیدەری سەید محەمەد) دەزانێت، كاتێك یەكەم منداڵیان دەبێت حەیدەری سەید بە راوێژ لەگەڵ خێزانەكەی بڕیار دەدەن هەرچی منداڵیان بوو بەناوی منداڵە شەهیدەكانی كیمیابارانەكەوە ناوبنێن، لەئێستاشدا ناوەكانی (كۆچەر و تاڤگە و تەلار و دلێر) زیندوو بوونەتەوەو بەردەوام باوكیان لە ئامێزیان دەگرێت.
حەیدەری سەید محەمەد چیرۆكەكە بۆ ئێمە دەگێڕێتەوەو دەڵێت: «هەرگیز ئەو دیمەنەم بیرناچێت خێزانەكەم دووگیان بوو، كاتێك شەهیدبوو دوای سێ‌ رۆژ دەمبینی هێشتا منداڵەكەمان لەناو سكیدا دەجوڵێت، بەڵام هەرچەندە بیرم كردەوە كەسم نەماوەو هیچ كەسێكیش نییە چاودێری بكات، بۆیە بڕیارمدا هەر بەو شێوەیە خێزانم بەخاك بسپێرم».
سەبارەت بەوەی لەئێستادا چ هەستێكی هەیە بەرامبەر بەمنداڵە هاوناوەكانی كاتێك سەردانی مەزاری شەهیدان دەكات، ئەو پیاوە وتی: «بەڕاستی هەستێكی زۆر ناخۆشە، بەڵام لەگەڵ ئەوەشدا خۆشەویستی ئەم منداڵانە تا بێت زیاتر دەبێت، خۆشەویستی مردوو و زیندوو بەیەكەوە، لەڕاستیدا مەرگەساتێكی زۆر جەرگبڕ بوو، ئەوەتا ئێمە دوای 31 ساڵ لە مەرگەساتەكە، تەنها ئومێدمان بەدوا رۆژی ئەم منداڵانەی ئێستامان هەیە، بەتەنها سەبورییەكیشە كە دوای كیمیابارانكردنی هەڵەبجەی شەهید بۆ من مابێتەوە، ئەم منداڵانەی ئێستاشم سوپاس بۆ خوا زۆر ساغ‌و تەندروست باشن‌و بۆشایی منداڵە شەهیدەكانیشمیان بۆ پڕكردوومەتەوە».
دلێر حەیدەری سەید هەڵگری ناوی كوڕە گەورە شەهیدەكەی باوكێتی، ئەو خۆشحاڵی خۆی بەوە دەردەبڕێت كە هەڵگری ناوی برا گەورەكەیەتی‌و بۆتە هۆی ئارامی‌و سەبوری باوكی، ئەو دەڵێت: «زۆر سوپاسی باوكم دەكەم كە ئەو متمانەیەی بەمن بەخشیوەو هاوناوین لەگەڵ برا گەورەكەم، زۆریش ئاسوودەو دڵخۆشم كە لەگەڵ باوكم دێمە مەزاری شەهیدان و دێمە سەر گۆڕی برا شەهیدە هاوناوییەكەم، هەندێكجاریش خۆم بەتەنها دێمە ئێرە»، ئەوەشی نەشاردەوە كە هێندە نابێت لەو راستییە تێگەیشتوون كە باوكیان چەندین ساڵە زەحمەتی‌و ناخۆشی دەكێشێت.
تەلار حەیدەری سەید هەستێكی زۆر ناخۆشی هەیە كە هەڵگری ناوی یەكێكی دیكەی منداڵەكانی باوكێتی، ئەو وتی: «هەستێكی زۆر ناخۆشە، بەڵام شانازییەكی زۆر گەورەشە بۆ من كە توانیومە هەڵگری ئەو ناوەبم، ئێمە زوو زوو سەردانی ئەم مەزارگەیە دەكەین و دڵی باوكم دەدەینەوە، من دوای كۆچەرو تاڤگە لەدایك بووم‌و سێیەم منداڵی باوكمم لە دوای بۆردومانكردنی هەڵەبجە».

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

four × 3 =

x

هەواڵێ هاوشێوە

گێرانه‌وه‌ی‌ چیرۆكی‌ دووخۆپیشاندانی‌ جەماوەری و قوتابیانی‌ كۆیه‌

رزگار سەلیم به‌شی دووه‌م و کۆتایی كه‌واته‌ توانیمان گیان پاكی‌ ...