سەرەکی » ئابووری » قەیرانی یەكێتیی ئەوروپا و ئابووریی بریتانیا

قەیرانی یەكێتیی ئەوروپا و ئابووریی بریتانیا

فەیسەل عەلی*

دوای ئەوەی بۆ جاری دووەم پلانەكەی تێرێزا مای بۆ دەرچوون لە یەكێتیی ئەوروپا لە ئەنجومەنی گشتیی بریتانیا شكستی هێنا، بژاردەی زۆری لەبەردەستدا نەماوە، لە راستییدا جگە لە دوو بژاردە هیچی تری نییە، یەكەمیان، دەرچوونی بریتانیایە لە یەكێتیی ئەوروپا بەبێ هیچ رێككەوتنێك، دووەمیان، دەنگدانی ئەنجومنی گشتیی بریتانیایە لەسەر درێژكردنەوەی ماوەی دەرچوونیان لەو یەكێتییە، واتە سڕكردنی بەندی (50) پەیماننامەی لشبۆنەیە.

بەدەستهێنانی زەماناتی نوێ
شكستی لە ئەنجومەنی گشتیی بریتانیا بۆ مای زۆر قورس كەوتەوە، بەتایبەتی هەندێك لە مێدیاكانی بریتانیا بە ئابڕووچوون ناویان برد، چونكە رێژەی ئەوانەی پلانەكەیان رەتكردەوە زۆر بوو، ئەگەرچی رێژەكە لە رێژەی رەتكردنەوەی یەكەمی رێككەوتنەكە كەمتر بوو. لەم كاتەدا لەسەر گۆڕەپانی بریتانیا پشێوییەكی سیاسیی هەیە، تەنانەت ناكۆكییەكانی ئەم پرسە گەیشتۆتە ناو خودی حكومەت، كە دەبوو یەك هەڵوێست بێت.
وەك بەرپرسەكانی یەكێتیی ئەوروپا دەڵێن، لەوەیان زیاتر نییە كە بە بریتانییەكانی بدەن، لەسەر ئەو بنەمایە، میشێل بارنێیەی گەورە دانوستكاری ئەوروپییەكان زۆر روون بوو، كاتێك لە دوای شكستی پلانەكەی مای لە ئەنجومەنی گشتیی بریتانیا گوتی، كێشەكە لە لەندەن چارە دەبێت نەك لای ئێمە. واتە دەبێ تێزێزا مای جاریكی تر بیر لەوە نەكاتەوە بگەڕێتەوە برۆكسل بۆ دانوستان یان بۆ بەدەستهێنانی زەماناتی نوێ، بەتایبەتی كە یەكێتیی ئەوروپا چەند مانگێكە لەبەر هەر هۆكارێك ئامادە نییە جارێكی تر دۆسێی دانوستان بكاتەوە، چونكە ئەوەی لەسەری رێككەوتون لەگەڵ بریتانیا گۆڕانی تێدا ناكرێت، پێویستە لەندەن خۆی كێشە سیاسی و حزبییەكانی لە وڵاتەكەی خۆی چارەسەر بكات.

(10 %) بەهاكەی لە دەست بدات
یەكێتیی ئەوروپا پێی وایە ئەو زەماناتانەی ئەم دواییە بە لەندەن دراون بەسن بۆ ئەوەی رێككەوتنەكەی نێوانیان لە ئەنجومەنی گشتیی بریتانیا تێپەڕێنرێت، بەڵام ئەنجومەنەكە رەتیكردەوە.
حكومەتی بریتانیا هیچ رێگەیەكی تری لەبەردەم نەماوە، تەنیا دوو هەفتە ماوە بۆ كاتی كشانەوەی بریتانیا لەو یەكێتییە، بەپێی ئەو ئاگاداریییەی لەسەر ئاستی بزنس و خودی بەرپرسانی بریتانی بە حكومەتیان داوە، كشانەوە بەبێ رێككەوتن كارەساتێكی راستەقینە دەبێت بۆ بریتانیا، تەنانەت مەزندەكانی وەزارەتی دارایی بریتانیا ئاماژە بۆ ئەوە دەكەن، ئەگەری هەیە ئابووریی بریتانیا (10 %) بەهاكەی لە دەست بدات ئەگەر هاتوو بەبێ رێككەوتن لەو یەكێتییە بكشێتەوە. واتە كشانەوە بەبێ رێككەوتن بە دوور دەزانرێت، دوور لە دەنگی هەندێك لە نوێنەران بەتایبەتی پارتی پارێزگاران كە داوای كشانەوە دەكەن بە هەر رێگەیەك بێت، چونكە لای ئەوان گرنگ ئەوەیە لەكاتی خۆیدا جیا ببنەوە تا پابەندبن بە داوای زۆرینەی بریتانییەكان كە دەنگیان بۆ كشانەوە دابوو.

ئەگەری ئەنجامدانی هەڵبژاردنی پێشوەختە
حكومەتەكی تێرێزا مای لاوازە، تەنانەت هەندێك لە نوێنەرانی حزبەكەیشی ئاماژەیان بۆ ئەوە كردووە كە مای ناتوانێ كۆنترۆڵی گۆڕەپانەكە بكات، لەگەڵ ئەوەشدا لەم كاتەدا باس لە گۆڕینی ناكەن، بەوەی رەوشەی ئێستا نائاساییە، ئەمەش ئەگەری ئەنجامدانی هەڵبژاردنی پێشوەختە بەدوور دەزانرێت. بەگشتی هەرچییەك بێت، جارێكی تر گەمەكە هاتەوە یاریگای بریتانیا، هێشتا گرێی ئیرلەندە چارەسەر نەبووە، لەم رووەوە ئەوروپا هیچ زەمانەتێكی نەداوە تا حكومەتەكەی مای بتوانێ رێككەوتنەكە بخاتە دەنگدانەوە لە ئەنجومەنی گشتیی بریتانیا، ئەگەر ناڕازییەكانی پلانەكەی مای كەمتریش بووبن، بەڵام هیچ شتێك لەسەر گۆڕەپانی سیاسیی بریتانیا بۆ قۆناغی داهاتوو مسۆگەر نییە، واتە ئەو دۆسێیە لە حكومەت وەردەگیرێتەوە، ئەمەش ئاماژەیەكی تری لاوازی ئەو حكومەتەیە كە بە هاوپەیمانێتیی پارتێكی بچوكی ئیرلەندەی حوكمڕانی دەكات، ئەمە راستەوخۆ دەبێتە هۆكارێكی راستەوخۆی پەكخستنی بەدەستهێنانی دەنگی پێویست بۆ پلانەكەی مای بۆ دەرچوون لە یەكێتیی ئەوروپا.

* سەرۆكی مونتەدای ئابووریی كوردستان

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

fifteen − six =

x

هەواڵێ هاوشێوە

گواستنه‌وه‌ی گه‌نم له‌ نێوان پارێزگاكاندا قه‌ده‌غه‌ ده‌كرێت

سه‌رۆك وه‌زیرانی عیراق، بڕیاریدا به‌ قه‌ده‌غه‌كردنی گواستنه‌وه‌ی گه‌نم له‌ نێوان ...