سەرەکی » راپۆرت » مه‌لا به‌ختیار: به‌قوڵایی‌ به‌رپرسیارێتی‌ مێژووییه‌وه‌، یه‌كه‌مین چركه‌ ساتی‌ په‌خشی‌ ئێزگه‌كه‌م ده‌ستپێكرد

مه‌لا به‌ختیار: به‌قوڵایی‌ به‌رپرسیارێتی‌ مێژووییه‌وه‌، یه‌كه‌مین چركه‌ ساتی‌ په‌خشی‌ ئێزگه‌كه‌م ده‌ستپێكرد

*به‌و پرسیاره‌ی‌، ئه‌گه‌ر بگه‌ڕێینه‌وه‌، بۆ ئه‌و چركه‌ساته‌ی‌، وه‌ك یه‌كه‌م بێژه‌ری‌ ئیزگه‌ی‌ ده‌نگی‌ گه‌لی‌ كوردستان، په‌خشی‌ رادیۆكه‌تان ده‌ستپێكرد، ئێزگه‌ی شۆڕشی‌ نوێ‌، چ هه‌ستێكتان هه‌بوو؟ هه‌ست به‌رامبه‌ر ئه‌و هێزو باوه‌ڕه‌ نه‌بینراوه‌ی‌ شۆڕشی‌ نوێ‌، كه‌ له‌و چركه‌ساته‌وه‌، ده‌تانویست به‌وشه‌و به‌ده‌نگ، به‌كۆمه‌ڵانی‌ خه‌ڵكی‌ كوردستانی‌ رابگه‌یه‌نن؟ هه‌ڤاڵ‌ مه‌لا به‌ختیار، لێپرسراوی‌ ده‌سته‌ی‌ كارگێڕی‌ مه‌كته‌بی‌ سیاسی‌ یه‌كێتیی‌ نیشتمانیی‌ كوردستان، وه‌ڵامی‌ دایه‌وه‌و رایگه‌یاند:
-نه‌ورۆزی‌ ساڵی‌ (1979) بوو، نامه‌یه‌كی‌ خوالێخۆشبوو د.كه‌مال خۆشناو-م پێگه‌یشت، ئه‌وكاته‌ ئه‌ندامی‌ مه‌كته‌بی‌ سیاسی‌ و لێپرسراوی‌ ئیداره‌ی‌ مه‌كته‌بی‌ سیاسی‌ بوو، له‌نامه‌كه‌دا هاتبوو كه‌ (جه‌نابی‌ مام جه‌لال ئه‌مری كردووه‌، سه‌رپه‌رشتی‌ ئێزگه‌كه‌ بكه‌ن، تا دوا بڕیاری‌ لێده‌درێت).
كاتێك كه‌ چووم، كاك (ته‌ڵعه‌ت گلی‌) له‌(كوێت)ه‌وه‌ به‌نهێنی‌ هاتبوو، سه‌رجه‌م كاره‌ ته‌كنیكییه‌كانی‌ ته‌واو كردبوو، كه‌ بۆ چه‌ند رۆژێك به‌ڕێز (د.خدر)یشی‌ له‌گه‌ڵدا بوو، ماندوو ببوو، ئێزگه‌كه‌ش له‌ئه‌زموون ده‌رچوو بوو، په‌خش ئاماده‌بوو.
كاتێك گه‌یشتمه‌ ئه‌وێ‌، ده‌زگای‌ ئێزگه‌كه‌ له‌سه‌ر به‌رد دانرابوو، له‌خێمه‌یه‌كی‌ زۆر په‌ڕپوت له‌ (نۆكان)، پێشمه‌رگه‌یه‌كیشیان له‌گه‌ڵدا بوو به‌ناوی‌ (حه‌مه‌ سوور)، وتیان ئێزگه‌كه‌ ئاماده‌یه‌ بۆ په‌خش.
منیش نه‌ خۆم ئاماده‌كردبوو، نه‌هیچیشم نوسیبوو، پرسیم (ئێزگه‌كه‌، چۆن ئاماده‌یه‌ بۆ په‌خش؟)، وتیان (ئێستا كه‌ ئێوه‌ قسه‌ ده‌كه‌ن، سه‌رجه‌م كوردستان گوێی‌ لێتده‌بێت! بڵاویشكرابۆوه‌ كه‌ فڵانه‌ سه‌عات، ئێزگه‌، په‌خشه‌كانی‌ ده‌ستپێده‌كات).
بۆیه‌ منیش مایكرۆفۆنه‌كه‌م گرته‌ ده‌ست، (كه‌مێك بێده‌نگ بوون)، به‌هه‌ستێكی‌ ئێجگار پڕ له‌لێپرسراوێتی‌، به‌وه‌ی‌ یه‌كه‌مجاره‌ له‌ڕێگه‌ی‌ ئێزگه‌وه‌، له‌شۆڕش‌و له‌دوای‌ دوو ساڵ‌ قوربانیدان‌و پارتیزان‌و هه‌موو ئه‌و به‌دبه‌ختییانه‌ی‌ كه‌ هه‌بوو، به‌وه‌ی‌ له‌پێشتردا، به‌ته‌ته‌ر و هه‌زار ئه‌ملاوئه‌ولا، نامه‌یه‌ك ئه‌گه‌ر به‌هه‌فته‌یه‌ك بگه‌یشتایه‌، یاخود نه‌گه‌یشتایه‌، به‌ڵام ئێستا راسته‌وخۆ، قسه‌مان، وتارمان، هه‌واڵه‌كانمان په‌خشده‌كرێت، هه‌ستێكی‌ زۆر سه‌یر له‌رۆحما كۆببۆوه‌، هه‌ستمده‌كرد ئه‌و چركه‌ ساته‌یه‌ كه‌ خه‌ڵك به‌ره‌و سه‌ركه‌وتن له‌گه‌ڵمان دێت، هه‌ستمده‌كرد هه‌ر كاتێك بمانه‌وێت له‌ڕێگه‌ی‌ ئه‌م ئێزگه‌یه‌وه‌ زۆرترین خه‌ڵك تێبگه‌یه‌نین، زۆرترین خه‌ڵك ئاراسته‌ بكه‌ین‌و بڕیاره‌كانمان كاریگه‌ری‌ قوڵی‌ خۆیان، له‌سه‌ر كۆمه‌ڵانی‌ خه‌ڵكی‌ كوردستان هه‌بێت.
ئه‌وكاته‌شی‌ مایكرۆفۆنه‌كه‌م گرت به‌ده‌سته‌وه‌، زۆر به‌حه‌ماسه‌وه‌، به‌قوڵایی‌ به‌رپرسیارێتی‌ مێژووییه‌وه‌، وام هه‌ستده‌كرد، هه‌موو نه‌ته‌وه‌ی‌ كورد سه‌یرم ده‌كه‌ن، به‌و هه‌سته‌وه‌، هه‌ستی‌ ئه‌وه‌ی‌ هه‌موو نه‌ته‌وه‌كه‌م، زوومی‌ كامێرای‌ له‌سه‌ر منه‌و سه‌یرم ده‌كه‌ن و دڵیان به‌وه‌ خۆشه‌، من له‌وێوه‌ قسه‌ده‌كه‌م. به‌و هه‌سته‌وه‌و بۆ ماوه‌ی‌ نیو سه‌عات قسه‌م كرد.
هه‌ر له‌درێژه‌ی‌ وه‌ڵامه‌كه‌یدا، بۆ ئه‌و پرسیاره‌، هه‌ڤاڵ‌ لێپرسراوی‌ ده‌سته‌ی‌ كارگێڕی‌ مه‌كته‌بی‌ سیاسی‌، وه‌ك یه‌كه‌م بێژه‌ری‌ ئێزگه‌ی‌ ده‌نگی‌ گه‌لی‌ كوردستان، وتی‌:
هه‌ر ئه‌وكاته‌ هه‌واڵێك گه‌یشتبوو، كه‌ شه‌ڕێك روویداوه‌‌و پێشمه‌رگه‌ سه‌ركه‌وتنێكی‌ باشی‌ به‌ده‌ستهێنابوو، ئه‌و هه‌واڵه‌شم خوێنده‌وه‌. دواتر چه‌ند سروودێكمان به‌ته‌سجیلی‌ كۆن و كاسێتی‌ په‌ڕپووت لێداو ئه‌و رۆژه‌، هه‌ر ئه‌وه‌نده‌ ئێزگه‌كه‌ ئیشی‌ كردو داخرا.
به‌یانییه‌كه‌شی‌، ئێزگه‌كه‌ كرایه‌وه‌و به‌خوێندنه‌وه‌ی‌ هه‌ندێك هه‌واڵ‌ و نوسین، په‌خشمان ده‌ستپێكرد، كه‌ به‌بێ‌ كاغه‌ز‌ هه‌ندێك شتمان ده‌نووسی‌، به‌رده‌وام بووین. كه‌ له‌سه‌ره‌تاشدا به‌و شێوه‌یه‌ی‌ ده‌مانوت (ئێره‌ ئێزگه‌ی‌ شۆڕشی‌ عیراقی‌ هه‌ڵگیرساوه‌ له‌شاخه‌كانی‌ كوردستانه‌وه‌)، ناوی‌ ئێزگه‌كه‌مان ده‌هێنا.
له‌وه‌ڵامه‌كه‌یدا جه‌ختیشیكرده‌وه‌ كه‌:
هه‌رگیز ئه‌و چركه‌ساتانه‌م له‌بیر ناچێته‌وه‌، چونكه‌ چركه‌ ساتێكی‌ مێژوویی‌ بوو، هه‌ستمده‌كرد شتێك له‌دایك ده‌بێت، كه‌ له‌هیچ ئه‌و شتانه‌ ناچێت كه‌ له‌وه‌وبه‌ر هه‌مانبوو.
دواتریش كه‌ نامه‌مان بۆ ده‌هات و خه‌ڵك و كه‌سوكاری‌ پێشمه‌رگه‌ سه‌ردانیان ده‌كردین و ده‌یانوت گوێمان له‌قسه‌و هه‌واڵ‌ و نوسینه‌كانتانه‌، مایه‌ی‌ خۆشحاڵیمان بوو. به‌مشێوه‌ بۆ چه‌ند رۆژێك به‌رده‌وامبووین و پاشان كاك (پشكۆی‌ سه‌عید ناكام)مان برد بۆ ئه‌وێ‌.
بۆ مێژوو ئه‌وه‌ ده‌ڵێم، كه‌ یه‌كێك له‌وانه‌ی‌ رۆڵی‌ بنه‌ڕه‌تی‌ گێڕا له‌داڕشتنی‌ هه‌واڵ‌، له‌نوسین، له‌ته‌علیق، له‌هه‌موو ئه‌و شتانه‌ی‌ تری‌ له‌ئێزگه‌كه‌وه‌ په‌خشده‌كرا، بۆ مێژوو رایده‌گه‌یه‌نم كه‌ (پشكۆی‌ سه‌عید ناكام) بوو. هه‌ر ئه‌وكاته‌ شه‌هاب عوسمان، نه‌رمین، فریشته‌خان، دڵگیری‌ هاوسه‌ره‌كه‌ی‌ كاك سالار، رۆڵی‌ باشیان گێڕا.
پاشان ئێزگه‌كه‌ ته‌سلیم به‌هه‌ڤاڵ‌ د.ئه‌رسه‌لان باییز كراو به‌ڕێزیان به‌ته‌واوی‌ رێكیخست، به‌رنامه‌ی‌ باشی‌ بۆ داناو بوو به‌ به‌شێك له‌ده‌زگای‌ راگه‌یاندن، كه‌ ئه‌وكاته‌ هه‌ڤاڵ‌ مامۆستا جه‌عفه‌ر لێپرسراوی‌ بوو، پاشان ئێزگه‌ سه‌ربه‌خۆیی‌ خۆیشی‌ پێدرا.
*سه‌باره‌ت به‌و پرسیاره‌شی‌ كه‌ ئایا، ئه‌و چركه‌ ساته‌ی‌ ده‌ستپێكی‌ ئێزگه‌كه‌، كه‌ یه‌كێكه‌ له‌شانازییه‌كانی‌ شۆڕشی‌ نوێ‌، ده‌توانین وه‌ك به‌شێكی‌ تر له‌شانازییه‌كانی‌ مێژووی‌ خه‌باتی‌ نه‌ته‌وه‌یی‌ به‌ڕێزتان ئاماژه‌ی‌ پێبكه‌ین؟ هه‌ڤاڵ‌ مه‌لا به‌ختیار، وه‌ڵامیدایه‌وه‌و وتی‌:
ناتوانم به‌ته‌نها بڵێم شانازی‌، به‌ڵام ئه‌گه‌ر به‌مشێوه‌یه‌ پێناسه‌ی‌ بكه‌م، ده‌ڵێم: یه‌كێك له‌چركه‌ساته‌ هه‌ره‌ خۆشه‌كانی‌ ژیانم بوو له‌خه‌باتی‌ سیاسیدا، خۆشییه‌كی‌ زۆر تایبه‌تی‌ پێبه‌خیشم، چونكه‌ باوه‌ڕم وابوو، كه‌ هه‌رواشبوو، ئه‌م چركه‌ساته‌، ده‌بێته‌ شتێكی‌ زۆر تازه‌ سه‌باره‌ت به‌شۆڕش.

لە کوردستانی نوێ ژمارە (6032) رۆژی ٢٠ / 3 / 2013 بڵاوکراوەتەوە

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

twenty + twenty =

x

هەواڵێ هاوشێوە

شێخ حسێن گه‌ڕایه‌وه‌ گوندی هه‌زاركانی‌

له‌ 31 ساڵه‌ی‌ ئه‌نفالی شێخ حسێنی هه‌زاركانی‌ و خێزانه‌كه‌یدا، له‌ ...