په‌یاما پاراستنا سترانا كوردى یاره‌سه‌نن
عه‌لى مه‌ردان ـ عیسا به‌روارى ـ یوسف عه‌بو خورتا په‌یاما پاراستنا سترانا كوردى یاره‌سه‌نن ‌ حه‌سه‌ن بیبو‌ 24/7/2011
ب هه‌لكه‌فتنا سالیادا ڤان هونه‌رمه‌ندان (كوردستانى نوىَ) سه‌رىَ رێز و حورمه‌تىَ دچه‌مینیت و هزاران سلاڤا ل گیانىَ وان دبارینیت.
·•یوسف عه‌بو خورتا  16/7/2003
·•عیســـــا بــــه‌روارى  19 /7/2002
·•عـه‌لــى مــــــــه‌ردان   24/7/1981
ره‌وشه‌نبیر ب شێوه‌یه‌كىَ گشتى و هونه‌رمه‌ند ب شێوه‌یه‌كىَ تایبه‌تى روویىَ گه‌شىَ مه‌ده‌نیه‌ت و پێشكه‌فتنا شارستانیه‌تا گه‌لانه‌ و دهه‌مى كاودانێن مێژوویێن ئالووز و ئارام دا كومه‌لگه‌هه‌كىَ مه‌ده‌نیه‌. یائاشكه‌رایه‌ هونه‌رىَ موزیكىَ پارچه‌یه‌كا سه‌ره‌كى یه‌ ژ له‌شىَ هونه‌رى و دكه‌ڤندا ڤى هونه‌رى روله‌كىَ كاریگه‌ر گێرایه‌ ژبو بلندكرنا وره‌یێن مروڤى و سڤكرنا گه‌له‌ك نه‌خوشیێن ده‌رونى، له‌وما ئه‌م دشیێن بێژین ئه‌ڤ هونه‌ره‌ ستوینه‌كا سه‌ره‌كییا شارستانیه‌تا هه‌ر ملله‌ته‌كى یه‌ و په‌یاما گوهه‌رین و پێش ئێخستنا هه‌ر جڤاكه‌كى یه‌. هونه‌رمه‌ندێن مه‌ یێن كه‌ڤن نه‌خاسمه‌ ئه‌وێن دبوارىَ ستران و موزیكىَ دا خه‌بات كرین و هه‌تا گه‌هشتینه‌ په‌یسكا بلندا داهێنانىَ، ب دیتنامن ئه‌ڤه‌ژى دڤه‌گه‌رن بوَ (هه‌ستىَ مروڤایه‌تى) و (ئاستىَ ره‌وشه‌نبیریا هونه‌رى) ل ده‌ف وان پێتڤیه‌كا گرنگ بویه‌ دژیانا وان دا. وه‌ك (نێرینا مروڤایه‌تى) : سه‌ره‌راى وان كاودانێن سه‌خت و ده‌راڤێن ته‌نگ و زوڵم و زوردارییا دوژمنان، مروڤىَ كورد ژ ره‌وشت و تیتالێن كورده‌وارى دویر نه‌كه‌فتیه‌ و هه‌رده‌م هه‌ولدانا پاراستنا كه‌لتور و فلكلورىَ كوردى یىَ ره‌سه‌ن كریه‌ نه‌خاسمه‌ پاراستنا سترانا فلكلورى ژلایىَ وان هونه‌رمه‌ندێن ژیانا خوه‌ ته‌رخانكرین بوَ ڤىَ چه‌ندىَ . ژ لایىَ (ره‌وشه‌نبیری) ڤه‌ دیسان مروڤىَ كورد ب گشتى و هونه‌رمه‌ند ب تایبه‌تى دگه‌ل نویخازییا جیهان تێدا دبوریت  ژیانا خوه‌ ده‌رباسكریه‌ و مفایه‌كىَ مه‌زن ژىَ وه‌رگرتى یه‌. هه‌ر هونه‌رمه‌نده‌كى د شێوازىَ خوَدا هژماره‌كا سه‌خله‌تێن گرنگ لده‌ف هه‌بوینه‌، ئه‌و سه‌خله‌ت ژ وارا بوینه‌ سه‌ركه‌فتن و روپه‌لێن ژیاناخوَ پىَ خه‌ملاندینه‌، هه‌لبه‌ت ره‌نج و خزمه‌تا وان جهىَ رێزگرتن و شانازیىَ یه‌ و ناڤێن خوَ د به‌رپه‌رێن مێژوویىَ دا ب پیروزى ل قه‌له‌مداینه‌. ژ لایه‌كىَ دیڤه‌ ب شێوه‌یه‌كىَ گشتى وه‌ك نێرینه‌كا مروڤایه‌تى دویر ژ (هونه‌ر و ئه‌ده‌بیاتا) ئه‌گه‌ر بچینه‌ دناڤ  ژین و ژیارا هونه‌رمه‌ند و نڤێسه‌رو هه‌لبه‌ستڤان و ره‌وشه‌نبیر و كه‌سانێن داهێنه‌ر ئه‌وێن به‌رهه‌مێن وان بووینه‌ ژێده‌رىَ شوره‌شێن هونه‌ر و ئه‌ده‌بیاتا كورد و كوردستانىَ، دێ بینین به‌هرا پتریا ژین و ژیارا وان ب ده‌ردىَ هه‌ژارى و ده‌رده‌سه‌رى و ده‌ستكورتیىَ بووراندینه‌ و پتریا وان دبنیاتدا به‌له‌نگاز و هه‌ژار بووینه‌، ب دیتنا من ئه‌ڤ چه‌نده‌ بویه‌ ئێك ژ ئه‌گه‌رێن داهێنانا وان و ئه‌ڤه‌ژى دهێته‌ هژمارتن خاله‌كا گرنگ بوَ پویته‌پێدانا وان بوَ ڤى بوارىَ مروڤایه‌تىَ . خاله‌كادى یا گرنگ ئه‌و بویه‌ كو هونه‌رمه‌ندێن كه‌ڤن پشتبه‌ستنا ژیارا خوه‌ یا روژانه‌ نه‌ كرینه‌ ل سه‌رداهاتیىَ هونه‌رىَ خوه‌ به‌لكى ب ئه‌ركه‌كىَ نیشتیمان په‌روه‌رى رێك شه‌قاندینه‌ و گه‌له‌ك جاران كه‌فتینه‌ دبن زێره‌ڤانى و گه‌فێن دوژمنان و هاتینه‌ زیندانكرن و ئیشكه‌نجه‌دان. له‌وما ڤان كه‌سان رێزگرتن و بهایىَ خوه‌ هه‌یه‌ دناڤ جڤاكىَ كورده‌وارى دا و ناڤێن وان د به‌رپه‌رێن مێژوویىَ دا ب پیروزى هاتینه‌ ل قه‌له‌مدان. ب ڤىَ هه‌لكه‌فتنىَ مه‌ ب فه‌رى زانى كو روپه‌لێن ژیانا ڤان نه‌مران وه‌ك وه‌فادارى بوَ خزمه‌تا وان چه‌نده‌كىَ ژ ژیانا وان بوَ خوانده‌ڤانێن به‌رێز ب ده‌ینه‌ به‌رچاڤكرن.
یوسـفـىَ عـه‌بـو خـورتـا (1931 ـ 16/7/2003)
گومان تێدا نینه‌ ل هه‌رچوار پارچێن كوردستانىَ سترانبێژێن مللى رولىَ خوه‌ هه‌بویه‌ دپاراستنا چیروك و سه‌رهاتى و داستانێن فولكلورىَ یێن كوردى دا، برێكا سترانبێژێن كوچك و دیوانا و قوناغ بوَ قوناغىَ  گوهدار و حه‌ژێكه‌رێن ڤان سترانا په‌یدابوینه‌، گه‌له‌ك كه‌سان ژیانا خوه‌ ته‌رخانكریه‌ ژبو پاراستنا سترانا كوردى یا ره‌سه‌ن ژبه‌رزه‌بونىَ،
سترانبێژى مللى (یوسف عبدالله) ئێك ژ وان ده‌نگبێژا بویه‌ كو ب رێكاوى گه‌له‌ك سترانێن فولكلورى هاتینه‌ پاراستن، ل سالا (1931) ىَ ل گوندىَ (سندور) سه‌ر ب باژێرىَ دهوك هاتى یه‌ دنیایىَ، دده‌مىَ خودا گه‌نجه‌كىَ زیره‌ك و خورت بویه‌ له‌وما هاتیه‌ بناڤكرن بناڤىَ (یوسفىَ عه‌بو خورتا). ل ده‌ستپێكىَ سترانێن (كاویس ئاغاى) گوتینه‌ و سترانا (شێخ مه‌حمودىَ) نه‌مر دهێته‌ هژمارتن ئێكه‌مین ستران بده‌نگىَ خوَ گوتى، دیسان هه‌ژماره‌كا سترانێن (حه‌سه‌ن جزیرى) مینا سترانا (مێڤانو و كنىَ و سوسن و زه‌ینه‌ب)،هه‌روه‌سا سترانێن (حه‌یده‌ر باجلورى) مینا سترانا (سارا دوتمام و هوستا حه‌نه‌)، دگه‌ل ڤىَ چه‌ندىَ سترانێن ده‌ڤه‌را شنگالىَ مینا سترانا (مستویىَ مل قوتى و عه‌دولىَ و زاڵم) گوتینه‌.
(یوسفىَ عه‌بو خورتا) پشتى شه‌هره‌زاهیه‌یا به‌رفره‌ه لده‌ف په‌یدادبیت  شێوازه‌كىَ تایبه‌ت ب خوه‌ڤه‌ دگریت، دژیىَ خوه‌ یىَ هونه‌رى دا ب گه‌له‌ك ره‌نگا و رویدانا ستران گوتینه‌.
 ·•دسترانێن شه‌راندا، رولىَ عه‌گید و مێرخاسێن كوردا داینه‌ دیاركرن و ب قه‌هره‌مانى داینه‌ نیاسین .
·•دسترانێن ئه‌ڤینداری دا، په‌سنا ئه‌شق و دلداریا  دناڤبه‌را خورت و كچێن كوردا  لدیڤ ره‌وشت و تیتالێن كورده‌وارى ب جوانى داینه‌ به‌رچاڤكرن .
·•دسترانێن فولكلورى دا، ب وژدان و ب دلسوزى ئه‌ڤ ئه‌ركه‌ ل سه‌ر ملێت خوه‌ راگرتیه‌ و بئه‌مانه‌ت په‌یاما خوه‌ گه‌هاندیه‌ .
(یوسف عه‌بو خورتا) كه‌ساتیه‌كىَ به‌رچاڤ و دیار بویه‌، ناڤ و بهایىَ خوه‌ دناڤ جڤاكىَ كورده‌وارى دا هه‌بویه‌، سه‌ركرده‌ و ماقیل و كه‌سانێن ناڤدارێن كورد رێزگرتنه‌كا تایبه‌ت ددایىَ، هه‌رووسا په‌یوه‌ندیێن وى دبه‌رفره‌ه بون دگه‌ل زانا و ئه‌دیب و ره‌وشه‌نبیر و هونه‌رمه‌ندێن كورد. شیانێن مه‌زن هه‌بوینه‌ دگوتنا سترانان دا، د كوچكێن كورده‌واریدا ب شه‌ڤ هه‌تا سپێده‌ ستران گوتینه‌ بێ سترانه‌كىَ دوباره‌بكه‌ت یان سترانبێژه‌ك دگه‌لداهه‌بیت .لسه‌ر ئاستىَ عیراقىَ ب گشتى و یىَ كوردستانىَ ب تایبه‌تى دگه‌له‌ك ئاهه‌نگ و فێسته‌ڤالێن فولكلورى دا به‌شداربویه‌، ل زوربه‌یا ده‌ڤه‌ر و باژار و باژاروك و گوندێن كوردستانىَ ستران گوتینه‌. پشتى سه‌رهلدانا (1991)ىَ ته‌له‌فزیونا كوردستان (دهوك) ژلایىَ وێنه‌گر (ره‌مه‌زان سندورى) هژماره‌كا سترانان بوَ كلیب دكه‌ن، ئه‌ندامىَ كارا یىَ سه‌ندیكا هونه‌رمه‌ندێن كوردستانىَ بویه‌ د هه‌لكه‌فتنێن كوچك گه‌رییا دهوك به‌شدارى  گه‌له‌ك بزاڤ و چالاكیێن فلكلورى بویه‌، هه‌روه‌سا به‌شدارى چه‌ندین ئاهه‌نگێن هونه‌رىَ مللى بویه‌ ل ژده‌رڤه‌ى كوردستانىَ. ب چه‌ند ساله‌كان و به‌رى مرناوى، هه‌ڤركیه‌كا دوژوار دگه‌ل پیراتى و نه‌ساخیىَ دكه‌تن و ل روژا (16/7/2003)ىَ دچیته‌ به‌ر دلوڤانیا خودىَ و ل گورستانا (گوندىَ سندورىَ) ب ته‌نیشت باژارىَ دهوك جه‌نازىَ وى ڤه‌شارتی نه‌.

عیسا به‌روارى (1933 ـ 19/7/2002)
هونه‌رمه‌ندىَ كوردىَ ناڤدار (عیسا به‌روارى) كورىَ گوندىَ (كاره‌ڤا) ل سالا (1933) ژدایك بوویه‌، ناڤىَ وى یىَ دروست (عیسا حسێن یونس ئه‌حمه‌ده‌)، ژبه‌ر چه‌ند ئه‌گه‌رێن جڤاكى و كومه‌لایه‌تى مالباتاوى به‌ره‌ف باژێرىَ (میسل) دچن و لوێرىَ ئاكنجى دبن.
عه‌شقا سروشتىَ كوردستانىَ هه‌رزیكا دناڤ جانێ ویدا بوونه‌ بوهاره‌كا پرى په‌یڤ و ئاوازێن ره‌سه‌ن و ل به‌ر ده‌ستىَ مامىَ خوه‌ (محه‌مه‌د یونس) فێری گوتنا سترانان و بویه‌ل سه‌ر ده‌ستىَ (محه‌مه‌د عارف جزیرى) ده‌ست ب ژه‌نینا ئامیرىَ ته‌مبورىَ كریه‌ و داخبارى ده‌نگىَ (كاویس ئاغا و حه‌سه‌ن جزیرى و مریم خان) بویه‌، بڤى ئاوایى ده‌ست ب په‌یاما خوه‌ یا پیروزكریه‌. ل سالا (1950) ب رێكا هه‌ڤالىَ وى یىَ هونه‌رى (محمد عارف جزیرى) دچیته‌ (ئێزگىَ كوردى ل به‌غدا) و ئێكه‌مین ستراناخوَ ب ناڤىَ (گولىَ) توماردكه‌ت، ژبه‌ر بابىَ خوَ ڤىَ سترانىَ ب ناڤه‌كى ئاشوپى به‌لاڤدكه‌ت. ل سالا (1957)ىَ سترانا (مه‌دینایىَ) دگه‌ل هژماره‌كادى یا سترانا بناڤىَ خوه‌ یىَ دورست به‌لاڤدكه‌ت، ب ڤىَ پێنگاڤا سه‌ركه‌فتى ناڤ و ده‌نگىَ وى ل هه‌رجهه‌كى به‌لاڤه‌ دبن و جه‌ماوه‌ره‌كىَ زور ل خوه‌ كومدكه‌ت. هه‌ر ژده‌ستپێكا كارىَ خوه‌ پاراستنا سترانا فولكلورى وه‌ك ئه‌ركه‌كىَ نیشتمان په‌روه‌رى لسه‌ر ملێن خوه‌ راگرتیه‌ و ئێك ژ ئارمانجێن وى یێن سه‌ره‌كى بویه‌، روله‌كىَ به‌رچاڤ هه‌بویه‌ دگوره‌پانا سترانا كوردى دا، پویته‌كىَ مه‌زن دایه‌ كه‌لتورىَ كوردى و دهه‌مى فیسته‌ڤال و ئاهه‌نگ و چالاكیێن هونه‌رى دا گرنگى دایه‌ ل به‌ركرنا جلوبه‌رگێن كوردى وشانازى ب كه‌لتورىَ نه‌ته‌وا كورد دكر. د ژیىَ خوه‌ یىَ هونه‌ریدا نێزیكى (300) سترانێن توماركرى وه‌ك به‌رهه‌م ئه‌نجامداینه‌، پرانیا وان په‌سنا داستانێن فولكلورىَ كوردى كرینه‌ و تێدا سه‌رهاتى و ره‌شت وتیتالێن ژیارا كورده‌وارى داینه‌ دیاركرن ، هه‌رووسا بوَ گه‌له‌ك سترانێن خوَ په‌یڤ و ئاواز داناینه‌ زوربه‌یا به‌رهه‌مێن خوه‌ ل رادیویا كوردى ل به‌غدا توماركرینه‌ و زێده‌بارى ئه‌و به‌رهه‌مێن ل كومپانێن (به‌شیرفون و چه‌قماقچى ل به‌غدا) و كومپانیا ( موریكو لبه‌یروت) و كومپانیا (ئه‌سینا ل یونان) ل سه‌ر قاوه‌نا توماركرین.

هونه‌رمه‌ند (عیسا به‌روارى) ژیانا خوه‌ دگه‌له‌ك قوناغادا ده‌رباسكریه‌ :-
·•ل سالا(1952)ىَ هاتیه‌ دامه‌زراندن ل رێڤه‌به‌ریا شینوارا ل میسل وه‌ك فه‌رمانبه‌ر.
ل سالا (1957)ىَ دبیته‌ خودان خێزان و دگه‌ل كچا خالىَ خوه‌ خێزانداریىَ دكه‌تن.
·•ل سالا (1974)ىَ دبیته‌ ئه‌ندامىَ سه‌ندیكا هونه‌رمه‌ندێن عیراقىَ.
·•ل سالا (1975)ىَ دبیته‌ سه‌روكىَ به‌شىَ ستران و موزیكىَ ل رادیویا كوردى ل به‌غدا.
·•ل سالا (1973)ىَ دگه‌ل هونه‌رمه‌ندان (محه‌مه‌د عارف جزیرى و گولبهار)ىَ به‌شداریىَ دڤیسته‌ڤالا نه‌وروزىَ دا دكه‌ن ل به‌یروت.
        ل سالا (1977)ىَ (عیسا به‌روارى و گولبهار) دگه‌ل شاندىَ كه‌لتورىَ عیراقىَ به‌شداریىَ دفێستیڤالا له‌نده‌ن یا كه‌لتورێن جیهانىَ دا دكه‌ن.
        ل سالا (1978)ىَ (عیسا به‌روارى و گولبهار) دگه‌ل گروپه‌كىَ كوردى یىَ موزیكىَ ل ڤیسته‌ڤالا پاریس و ڤییه‌نا به‌شداردبن و دهێته‌ خه‌لاتكرن ژلایىَ موختارىَ پاریس ڤه‌ و دهێته‌ دانان بالیوزىَ سترانا فولكلورىَ كوردى ل جیهانىَ.
·• دده‌سپێكا سالێن (80)یاندا تا دوماهیكا سالێن (90) تاندا بزاڤ و چالاكێن وى به‌رده‌وام دبن.
·•ل سالا (2000) دچیته‌ (حه‌جىَ) و ده‌نگىَ خوه‌ دكه‌ته‌ دخزمه‌تا بانگیدا ل مزگه‌فتێن باژێرىَ میسل.
        ل شه‌ڤا 19لسه‌ر 20/7/2002 ل نه‌خوشخانا مویسل دچیته‌  به‌ر دلوڤانیا خودىَ و هه‌ر ل مویسل جه‌نازىَ وى ڤه‌شارتینه‌.

(عــه‌لـى مــه‌ردان) (1904 ـ 24/7/1981)
هونه‌رمه‌ندىَ كوردىَ ناڤدار (عه‌لى مه‌ردان) ناڤىَ وى یىَ دروست (عه‌لى مه‌ردان قادر ئوسمانه‌). ل سالا (1904)ىَ ل باژێرىَ (كه‌ركوك) ژدایك بویه‌. دناڤ ماله‌كا كورد په‌روه‌ر و ئاینداردا هاتیه‌ په‌روه‌رده‌كرن، زاروكینیا خوه‌ دناڤ (ته‌كیا شێخ عه‌لى تاڵه‌بانى) ب خواندنا (قورئانا پیروز) و وانێن ئاینى بوراندیه‌، رێكێن خواندنىَ وه‌ك ته‌جوید و سه‌لیقه‌ و تام و چاوانیا بكارئینانا ده‌نگى و گوهه‌رینا مه‌قام بوَ مه‌قامىَ كارتێكرنه‌كا مه‌زن دهه‌ست و بیرێن ویدا كرنه‌. ل به‌ر ده‌ستىَ هه‌ردوو ده‌نگبێژان (خدر بارام چاوش ـ كامل ته‌پوله‌یى) ل دیوانا (شێخ حه‌سیب تاله‌بانى) فێرى مه‌قامێن (ئه‌ڵا وه‌یسى ـ ئاى ئاى ـ خاوكه‌ر ـ خورشیدى) و چه‌ندین مه‌قامێن دى یێن ده‌ڤه‌را گه‌رمیان دبیتن، بڤىَ چه‌ندىَ حه‌ز و ڤیانا وى دچیته‌ گوتنا مه‌قامێن كوردى و ده‌نگى وى دبیته‌ جهىَ دلخوشیا خه‌لكىَ ده‌ڤه‌رىَ. پشتى مرنا بابىَ وى (عه‌لى مه‌ردان) دچیته‌ ناحیا (له‌یلان) و بو ماوه‌یه‌كى دكه‌ڤیته‌ ل بن سته‌ما خالىَ خوه‌ (عارف)ى. ژبو په‌یداكرنا نانىَ ژیانىَ به‌ره‌ف باژێرىَ به‌غدا دچیت و كارىَ كرێكاریىَ دكه‌تن، د روینشتنێن تایبه‌ت و روژێن بهێن ڤه‌دانىَ دناڤ هه‌ڤالێن خوه‌ دا خه‌م و ژانێن غه‌ریبیىَ ب گوتنا مه‌قام و سترانێن كوردى دره‌ڤینیت. ل سالا(1921) ىَ و ب رێكا ئه‌ندازیاره‌كىَ ئینگلیزى یه‌كه‌م به‌رهه‌مىَ خوه‌ ل كومپانیا (أبو الكلب) لسه‌ر
قاوه‌نا توماردكه‌ت شێوىَ گوتنا مه‌قام و سترانێن وى دبنه‌ سه‌ره‌نج راكێشا خه‌لكه‌كى و بتایبه‌تى هونه‌رمه‌ندێن عه‌ره‌بێن به‌غدا یێن ل وى ده‌مى. دژیىَ ژیانا خوه‌ یا پرى به‌رهه‌م و داهێنان دا نێزیكى (730) مه‌قام و په‌سته‌ وه‌ك به‌رهه‌م توماركرینه‌، بو هه‌مى به‌رهه‌مێن خوه‌ په‌یڤ و ئاواز داناینه‌ و زیده‌بارى (3) ئاوازدانه‌ر و هوزانڤانا ب (4) سترانان به‌شدارى دگه‌لدا كرینه‌.ل سالا (1932) دگه‌ل شاندىَ هونه‌رمه‌ندێن (عیراق)ىَ دچیته‌ وه‌لاتىَ (مێر)ىَ ژبو به‌شداریكرن دكونگرىَ ئێكىَ یىَ موزیكا عه‌ره‌بى دا ل قاهیره‌، لیژنا ئاماده‌كاریا كونگره‌یى ئاسته‌نگ كرنه‌ درێكا ویدا ئه‌وبو كو سترانا بزمانىَ عه‌ره‌بى بێژیت یان ناڤىَ وى دناڤ لیستا كونگره‌ى دىَ هێته‌ لادان به‌شدارنابیت،د روژانێن كونگره‌ى دا گه‌له‌ك گه‌ف لىَ هاتنه‌ كرن كو داخوازیا وان بجه بینیت دا به‌شداربیتن، ل ڤێرىَ هزرا نه‌ته‌وایه‌تى خوه‌ ل مه‌ژیێ وى دده‌ت و نه‌رازیبوناخوه‌ رادگه‌هینیت و گه‌ف و به‌رتیلێن وان چ كارتێكرن لسه‌ر هه‌ست و سوزێن وى نه‌كرن و ژ هه‌لویستىَ خوه‌ یىَ پرى باوه‌رى لێڤه‌ نه‌بو، د ئه‌نجامدا وه‌ك مێهڤانىَ ڤیسته‌ڤالىَ ب هژماره‌كا مه‌قامێن كوردى به‌شداریىَ دكه‌ت، ل (قاهیره‌) خوه‌ دگه‌هینته‌ هوزانڤانىَ مه‌زن ئه‌وىَ دبنیاتدا كورد (ئه‌حمه‌د شه‌وقى) و برێكاوى نیاسیبونه‌ك دناڤبه‌را وى و هونه‌رمه‌ندێن مه‌زنێن عه‌ره‌ب وه‌ك (محه‌مه‌د عبدولوه‌هاب و ئوم كه‌لسوم) و هژماره‌كادی دا په‌یدادبیت و (6) قاوه‌نا بوَ كومپانیا (سود واى) توماردكه‌ت. ماموستا (عه‌لى مه‌ردان) دهێته‌ هژمارتن ئێكه‌مین هونه‌رمه‌ندىَ كورده‌ ل سالا (1939)ىَ ستران ل رادیویا كوردى ل به‌غدا گوتین. ژئه‌گه‌رىَ ره‌وشه‌نبیرى یا وى دبوارىَ هونه‌رى دا ل ئێزگه‌ و ته‌له‌فزیونا عیراقىَ دهێته‌ دانان وه‌ك (شاره‌زایىَ مه‌قامێن عیراقى) و ل وه‌زاره‌تا راگه‌هاندنىَ دهێته‌ دانان وه‌ك (راوێژكارىَ هونه‌رى) و پاشى دهێته‌ دامه‌زراندن وه‌ك ماموستایىَ موزیكىَ ل په‌یمانگه‌ها نه‌بینان ل به‌غدا. هونه‌رمه‌ندىَ مه‌زن (على مه‌ردان) دهژماره‌كا زورا ئاهه‌نگ و فێستیڤالاندا به‌شداربویه‌ ل (فه‌له‌ستین ـ لبنان ـ ئوردن ـ ئیران ـ قاهیره‌) ، ئه‌ڤه‌و زێده‌بارى به‌شداریێن وى ل به‌غداو كه‌ركوك و سلیمانى و هه‌ولێر و میسل و گه‌له‌ك باژێرێن دى. چه‌ندین ئاهه‌نگ و رینشتنێن هونه‌رى دگه‌ل هژماره‌كا زورا هونه‌رمه‌ندێن كورد ل كوردستانىَ سازكرینه‌. دگه‌ل هه‌مى هونه‌رمه‌ندێن كوردستانىَ هه‌ڤال ودوست بویه‌ و ستران و ئاواز داینه‌ گه‌له‌ك هونه‌رمه‌ندان، هه‌روه‌سا په‌یوه‌ندیێن وى یێن هونه‌رى دگه‌ل هونه‌رمه‌ندێن مه‌زنێن عیراقى دبه‌ر فره‌ه بون وه‌ك (نازم ئه‌لغه‌زالى ـ داخل حسن ـ حزێرى عزیز ـ خلیل ئه‌لرفاعى ـ محه‌مه‌د قوبانچى ـ ره‌شید قونده‌رچى...هتد). ل سالا (1972) دوماهیك به‌رهه‌م توماردكه‌ت، روژ ب روژ بارىَ وى یىَ ته‌ندورستى به‌ره‌ف خراب بونىَ دچیت. پشتى خانه‌نشین دبیت ده‌ست بنڤێسینا بیرهاتنێن خوه‌ دكه‌ت و چیروكا ژیاناخوه‌ دپه‌رتوكا (گه‌لاى پاییز)دا كومدكه‌ت  ئه‌وا كورىَ وى (عه‌بدولقادر)ى ئاماده‌كرى.
یادا وه‌ ب خێر

ناو:  
ئیمه‌یل:    
سه‌رنج:  

#19
15/10/2011
ئه‌رشیف
 
‌ یانا دهوك چ سه‌ربور ژ یاریكرنا چوونىَ وه‌رنه‌گرتن راپورت : كمال محمد شریف‌ 16/10/2011
‌ جون سینا سه‌ركه‌فت لسه‌ر زه‌روك کوردستانی نوێ‌ 16/10/2011
 
‌ كارتێكرنا درامایێن ته‌له‌ڤزیونى لسه‌ر جڤاكى ئاواز داود‌ 16/10/2011
‌ خێزانا كوردى و په‌روه‌رده‌كرنا كجان عه‌بدوللا مشه‌ختى‌ 16/10/2011
‌ شۆره‌ش ب ئاوایێ ژنێن عه‌ره‌بستانێ سیما مسته‌فا‌ 16/10/2011

© 2009 KURDISTANY NWE, All RIGHTS RESERVED. | CREATED BY AVESTA GROUP