بـژێویی لـە قـوڕگی سـروشتدا
بـژێویی لـە قـوڕگی سـروشتدا ‌ 11/5/2017
یەکەی ئابووری
حەپسە، لە شوێنی دانیشتنی خۆیەوە لەگەڵ هاوسەرەكەی، رۆژانە 50 كیلۆمەتر دەبڕێت، بۆئەوەی ئەو گژو گیایانەی لە دەشت چنیویانە لە بازاڕی شاری سلێمانی بیفرۆشێت، لەلایەن بەشێك لە هاووڵاتیانیشەوە خواستی زۆری لەسەرە، پسپۆڕێكی بواری خۆراكی سرووشتیش ئاماژە بە سوودەكانی دەكات.
حەپسە لەگەڵ هاوسەرەكەی هەموو رۆژێك دوای نوێژی بەیانی دەچنە دەشت بۆ ئەوەی ئەو سەوزەو بەروبوومە بەهارییانە لەگەڵ خۆیان بهێننەوە، تا بیفرۆشن كە لە ئێستادا خواستێكی زۆری هاووڵاتیانی لەسەرە، بەوەش توانیویەتی بەشێك لە بژێویی خێزانەكەی دابینبكات.
بەشێك لەو كەسانەی ئەو كارە دەكەن، باسی ئەوە دەكەن، لەسەرەتای بەهار بەو بەرهەمانە زۆرجار رۆژانە زیاتر لە 30 هەزاریان دەست دەكەوێت، بەڵام دواتر، كاتێك بەرهەمەكان وردە وردە بەرەو پیربوون دەچن، لە نێوان 15 بۆ 25 هەزاریان دەست دەكەوێت.
حەپسە عەلی 48 ساڵ، یەكێك لەو ژنانەی لە نێو بازاڕی سلێمانیدا هاوشێوەی چەندین ژنی دیكە خەریكی فرۆشتنی سەوزەو بەروبومی بەهارییە، ئەو خەڵكی قەزای سەیدسادقەو رۆژانە بە چەندین بەروبوومەوە دێتە شاری سلێمانی، كە نزیكەی 50 كیلۆمەتر لە شوێنی خۆیەوە دوورە.

بەروبوومە سرووشتییەكان
ئەو ژنە، زیاتر لە سێ ساڵە خەریكی ئەو كارەیەو وەك خۆشی باسی دەكرد، هەموو رۆژێك دوای بەرەبەیان لەگەڵ هاوسەرەكەی دەچێتە دەشت‌و ئەو شوێنانەی ئەو بەرهەمە سرووشتیانەی تێدایە، دوای فرۆشتنی بەرهەمەكانیشی ئێوارە دەگەڕێتەوە بۆ شوێنی نیشتەجێ بوونی.
لە ئێستادا، وەرزی بەهارە لە كوردستان چەندین بەروبوومی سرووشتی هەن بوونەتە خۆراكی رۆژانەی هاووڵاتیان‌و خواستێكی زۆر بۆ كڕینی ئەو بەرهەمانە هەیەو بەشێكیشە لە كەلتووری كورد، ئەوەش بەهۆی بوونی چەندین سوودی گرنگی ئەو بەرهەمانە بۆ تەندروستی هاووڵاتیان.
بەشێك لەو هاووڵاتیانەی سەرقاڵی كڕینی ئەو بەرهەمانەبوون باسیان لەوە دەكرد، لە سێ وەرزەكەی دیكەی ساڵدا زۆرجار خۆراكی پڕ لە پرۆتینیان خواردووە، بۆیە ئێستا دەیانەوێت بەو خۆراكە سرووشتییانە پشوویەك بە جەستەیان بدەن‌و لەخۆراكی هاوشێوەی گۆشت دوور بكەونەوە.
بەروبوومە سرووشتییەكان جۆریان زۆر بوو، بەڵام ئەوانەی زۆرتر خواستیان لەسەر بوو، بریتی بوون لە (چوالە، رێواس، كنگر، دوومەڵان، تۆڵەكە، پەڵپینە، تاڵیژك، گەڵامێو، كوزەڵە)و چەندین جۆری تر كە هەر یەك لەوانە نرخی تایبەت بەخۆی هەبوو.
حەپسە عەلی دەڵێ: «خەڵك زۆر حەزیان بەم خواردنانە هەیەو لە هەموو چین‌و توێژەكان دێنە لامان‌و داوای دەكەن بەتایبەت كنگرو تۆڵەكەو گەڵامێو، داواكاریی زۆر زۆری لەسەرە».

فرۆشتنی بەرهەمەكانیان
باسی لەوەشكرد، هەندێك كەس بەهۆی نەخۆشییەوە ناتوانن هەندێك خۆراكی قورس بخۆن، بۆیە زۆرتر ئەمانە دەكڕن‌و دەڵێن زیانی بۆ تەندروستیان نییە.
بەشێكی زۆر لەو سەوزەو بەروبوومە بەهارییانەی ئەو ژن‌و پیاوانەی دەیانفرۆشن، لە ناوچەكانی شارەزوورو قەرەداغ‌و شارباژێڕو ناوچەكانی تری نزیك لە شاری سلێمانییەوە دەهێنرێنە ناو شارو هەندێك لەو كەسانە خۆیان لەبازاڕدا بەرهەمەكانیان دەفرۆشن هەشیانە كە دەیهێنێتە شار بەشێوەی كۆ بەو كەسانەی دەفرۆشن كە دوكان یان عەرەبانەیان هەیە، ئەمە وەك ئەوەی خۆیان ئاماژەیان بۆ كرد.

خواستی زۆری لەسەرە
بەشێك لەو بەرهەمانە چەند رۆژێكی كەم دەمێننەوەو دواتر ماوەیان بەسەر دەچێت، بۆیە ئەو كاتانەی كە سەرەتا دێنە بازاڕەوە خواستی زۆریان لەسەرەو نرخیشیان بەرزە، بەڵام دواتر نرخیان دادەبەزێت.
بەكر عەلی 46 ساڵ یەكێك بوو لەو كەسانەی لە بازاڕی حەوزەوشكەكەی سلێمانی سەرقاڵی كڕینی هەندێك لەو بەرهەمانە بوو، ئەو وتی: «هەر شتێك لەو بەرهەمانە سەرەتا بێنە بازاڕەوە من دەیكڕم، چونكە كاتی مانەوەیان كەمە بۆیە نامەوێت هیچیانم لەدەست بچێت، هەریەكەشیان چێژێكی تایبەتی هەیەو سوودی زۆریان بۆ مرۆڤ هەیە».
بەكر، ئەو كاتەی قسەی دەكرد دوو عەلاگەی بەدەستەوە بوو كە یەكێكیان چوالەو ئەویتریشان كنگر بوو، وەك خۆی هێمای بۆ كرد، هەوڵ دەدات لە وەزری بەهاردا كەمتر گۆشت‌و بەروبوومەكانی تر بخوات كە تاڕادەیەك ماندووبوون بۆ گەدەی مرۆڤ درووست دەكەن، بۆیە ئەو ماوەیە زیاتر روو لە خواردنی ئەو بەرهەمە سرووشتیانە دەكات تا پشوویەك بە گەدەی بدات.
بۆ تەندروستی مرۆڤ بە سوودە
پسپۆڕانی بواری خۆراك ئاماژە بە چەندین سوودی گرنگی ئەو بەرهەمانە دەكەن‌و رێنمایی هاووڵاتیانیش دەكەن بەوەی زیاتر روو لە خواردنیان بكەن، بەڵام بە رێگەیەكی تەندروست ئامادەیان بكەن، تا بتوانن زۆرترین سوودی لێوەربگرن.
دكتۆرە زەینەب سەباح پسپۆڕی رووەكی پزیشكیی‌و مامۆستا لە بەشی باخداریی لەكۆلێژی كشتوكاڵی زانكۆی سلێمانی باس لەوە دەكات، هەریەك لەو بەروبوومانە چەندین سوودو تایبەتمەندیی گرنگیان هەیەو هەموویان بەشێوەیەكی گشتی بەسوودن بۆ تەندرووستی مرۆڤ.
وتیشی: «باشترە ئەو بەرهەمانە بە كاڵی یان بەكوڵاوی بخورێت، چونكە بەوشێوەیە سوودی زۆرترە، بەڵام واباشترە هیچكام لەو بەرهەمانە لە رۆندا سوور نەكرێنەوە، لەبەرئەوەی بەشێكی گرنگ لە سوودەكەی ناهێڵێت».
ئەو چەند خولەكەی حەپسە قسەی دەكرد، چەندین كڕیار دەهاتنە لای‌و هەریەكەیان داوای جۆرێك لەو بەرهەمانەی لێ دەكرد، ئەو وتی: «هەندێك رۆژ هەیە زۆر باشەو زووتر شتەكانم دەفرۆشم، بەڵام هەندێكجاریش هەیە بۆم تەواو ناكرێت، بۆیە دەیفرۆشم بەو كەسانەی عەرەبانە یان دوكانیان هەیە، چونكە دەبێت بگەڕێمەوە بۆ سەیدسادق كە بە ئۆتۆمبێل 40 خولەك لە سلێمانییەوە دوورە».
سەرچاوە: ماڵپەڕی ئاژانس


ناو:  
ئیمه‌یل:    
سه‌رنج:  

#7325
27/7/2017
ئه‌رشیف
وه‌رزش
‌ یۆرۆی كچان دوا هه‌نگاوی یه‌كه‌م قۆناغی ده‌نێت 27/7/2017
‌ مباپی له‌ مه‌دریده‌ 27/7/2017
زانست
‌ دووباره‌ به‌كارهێنانه‌وه‌ی بوتڵی ئاو مه‌ترسیداره‌ 27/7/2017
‌ شه‌قامی چه‌تره‌كان 27/7/2017
‌ توێژینه‌وه‌یه‌ك: مانگی له‌ دایك بوونت، ته‌ندروستیت دیاری ده‌كات 27/7/2017

© 2009 KURDISTANY NWE, All RIGHTS RESERVED. | CREATED BY AVESTA GROUP