مینۆ رایۆلا
مینۆ رایۆلا ‌ 12/7/2017
مینۆ رایۆلا، ئەو ناوەیه‌ كە سەرۆك و خاوەنی یانەكان لێی دەترسن، ئەو ناوەیه‌ كاتێك دێتە نێو گفتوگۆیەكەوە هەمیشە زیان بە یانەیەك دەگەیەنێت و خۆی و بریكارەكەشی بە قازانجی زۆری دارایی سودمەن دەبن.
لە زۆرینەی ئەو كاتانەی مینۆ رایۆلا بە نوێنەرایەتی یاریزانەكانی گفتوگۆ لەگەڵ یانەكان دەكات، سەركەوتووانە بەڕە لەژێر پێی ئیدارەی یانەكان دەردەهێنێت و ناچاریان دەكات مەرجەكانی لەبەرژەوەندی بریكارەكەی قبوڵ بكەن، ئەمەی دواییش که‌ لەگەڵ یانەی میلان روویدا دواین كاریەتی كە رۆسۆنێری ناچار كرد بە مەرجەكانی دۆنارۆما قایل بن.
رایۆلا یەكێكە لە بەناوبانگترین بەڕێوەبەری كارەكانی یاریزانان، ئێستا بەڕێوەبەری ژمارەیەكی زۆری ئەستێرە جیهانییە ناوداره‌کانه‌ لەسەرو هەمووشیانەوە ئیبراهیمۆڤیچ و پۆگبا، ئەمەش وای كردووە یانەكان لێی بترسن، چونكە توانایەكی باشی هەیە لە سەپاندنی مەرجەكان بەسەریاندا.
رایۆلا لەهەموو نوێ كردنەوەی بۆندی بریكارێكی پارە وەردەگرێت، بەڵام قازانجەكەی لەكاتی گواستنەوەی بریكارەكەی بۆ یانەیەكی تر زیاتر دەبێت، بەجۆرێك وەرزی رابردوو تەنیا لە رێگەی گواستنەوەی پۆڵ پۆگباو هینریك میختاریان بۆ مانچستەر یونایتد، بڕی 50 ملیۆن یۆرۆی دەستكەوت.
زۆرێك لە یانەكان كە رایۆلا بەڕێوەبەری كارەكانی یاریزانێكێ  بێت یاخود ببێتە بەڕێوەبەری یاریزانێكیان ترسی زۆریان لێدەنیشێت، چونكە ئەو ئارەزوی زۆری لە شوێنگۆڕكێی یاریزانەكانی هەیە، باشترین نموونەش بۆ ئەمە كەیسی هنریك مخیتاریانە كە رایۆلا هەموو هەوڵێكی خستە گەڕ بۆ ئەوەی بیگوازێتەوە بۆ پریمەرلیگ.
یانەی بروسیا دۆرتمۆند دوای ئەو بۆندە جارێكی تر مەترسی رایۆلای چۆتەوە سەر بەتایبەت كە رایۆلا زۆر نزیكە لەوەی ببێتە بەڕێوەبەری كارەكانی عوسمان دیمبلی ئەستێرەی لاوی یانەكە، بۆیە شێرەكانی فێستیڤاڵیا لەوە دەترسن هەمان سیناریۆی میختاریان دووبارە بكاتەوە.
بەپێی پێگەی (فیلت) ی ئەڵمانی رایۆلا خۆی بەشی خۆی لە بۆندەكان دیاری دەكات، وەكو خۆشی رایگەیاندوە ئەو گوێ بە لەسەدا دەی بەش نادات، چونكە زۆر بۆند هەیە بەشی ئەو گەیشتۆتە 50%.
رایۆلا لەنێو رۆژنامەنووساندا بە رێوی بانگ دەكرێت، ئەمەش بەهۆی زیرەكی لە مامەڵە كردن و قایل كردنی یانەكان بۆ ئەوەی بەمەرجەكانی قایل بن، لەبەرامبەردا بەڕێوەبەری كاری یاریزانانی تر خۆشیان ناوێت و پێیان وایە رەفتارەكان و شێوازەكانی رایۆلا پیشەكەی ئەوانیشی ناشرین كردووە.
رایۆلا لە تەمەنی یه‌ک ساڵیەوە لەگەڵ خێزانەكەی كۆچی كردووە بۆ هۆڵەندا، لە تەمەنی لاوێتیدا لە چێشتخانەیەكی پیتزا كاری كردووە، بەهۆی ئەمەشەوە زۆرێك لە بەڕێوەبەرەكان بۆ ئەوەی لە توانای كەم بكەنەوە بە پیتزا دروستكەر ناوی دەبەن.
لەوەڵامی ئەمەشدا رایۆلا ده‌ڵێت: ئەو لەو چێشتخانەیە هەموو كارێكی كردووە، بەڵام هەرگیز كاری دروستكردنی پیتزای نەكردووە، بەڵام لەو چێشتخانەیە رایۆلا هەموو شتێك فێربووە، ئەمڕۆ لە كاری بەڕێوەبەری كاری یاریزانان سوودی لێوەرده‌گرێت، بەجۆرێك تا ئەمڕۆش كاتێك لەگەڵ یانەیەك گفتوگۆ دەكات لەسەر ویستی ئەو گفتوگۆكە لە چێشتخانەیه‌ک دەكرێت و رەتی دەكاتەوە بچێتە بارەگای ئەو یانانە.
رایۆلا هەمیشە بە چاویلكەیەكی رەش و تیشێرتێكی سپی پۆلۆ دەردەكەوێت و ئەو شێوازی جل و بەرگەش بۆتە سیمبول بۆی، یەكەم بۆندیشی لە جیهانی تۆپی پێدا دەگەڕێتەوە بۆ ساڵی 1993 كاتێك دینیس بێرگكامپی هۆڵەندی لە ئەیاكسەوە گواستەوە بۆ ئینتەرمیلان.
رەفتارەكانی رایۆلا لای هەندێك بەجۆرێك قێزەونە كە نایەڵن رایۆلا نزیكی یانەكەیان بکه‌وێته‌وه،‌ئه‌وه‌تا یانەی ریاڵ مەدرید بڕیاری داوە هیچ بۆندێكی لەگەڵدا ئیمزا نەكات و رێگە نادات لە ریاڵ نزیك بکه‌وێتەوە یاخود نێوەندگیری بكات لە بۆندێك كە یانەكە بیەوێت ئیمزای بكات.


ناو:  
ئیمه‌یل:    
سه‌رنج:  

#7372
25/9/2017
ئه‌رشیف
وه‌رزش
‌ بارسێلۆنا بۆندی چه‌ند یاریزانێكی نوێ ده‌كاته‌وه‌ 24/9/2017
‌ ئه‌ندریه‌ واردی پاڵه‌وانی جیهان وازهێنانی راگه‌یاند 24/9/2017
زانست
‌ 12 ساڵ دوای‌ هاوسه‌رگیری چی‌ ڕوو ده‌دا؟ 22/9/2017
‌ باوه‌ڕت به‌ خه‌ونه‌كه‌ت هه‌بێت، وه‌ك ئه‌وه‌ی‌ به‌كرده‌وه‌ به‌ده‌ستت هێنابێ 22/9/2017
‌ كێش كاریگه‌ری‌ له‌سه‌ر ناكۆكی‌ خێزان هه‌یه‌ 22/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP