كورد له‌به‌غدا ״ئه‌و كتێبانه‌ی‌ لە شه‌قامی موته‌نه‌بی قه‌ده‌غه‌بوون، له ‌كوردستان به ‌ئاشكرا ده‌فرۆشرێن״
كورد له‌به‌غدا ״ئه‌و كتێبانه‌ی‌ لە شه‌قامی موته‌نه‌بی قه‌ده‌غه‌بوون، له ‌كوردستان به ‌ئاشكرا ده‌فرۆشرێن״ ‌ سه‌رتیپ جه‌وهه‌ر‌ 26/7/2017
به‌شی سیانزە

هه‌ر ئه‌و رۆژه‌ ویستم سه‌رێكی بازاڕ بده‌م، حه‌زمده‌كرد ئێواره‌ی‌ هه‌ینییه‌و كه‌مێك بازاڕیی بكه‌م، پێشتر هاتبوومه‌ چه‌ند بازاڕێكی به‌غدا، ده‌مزانی له‌كه‌ڕاده‌ جل‌و به‌رگی باش‌و جوانی پیاوانه‌ی‌ لێیه‌، هێواش هێواش به‌به‌رده‌م دوكانه‌كان پیاسه‌م ده‌كرد، بازاڕی ئه‌وێ هه‌ر وه‌كو بازاڕی خۆمانه‌، ئه‌گه‌رچی هه‌روه‌ك بازرگانه‌كانی لای خۆمان زۆربه‌ی‌ جلوبه‌رگ له‌توركیا دێنن، كه‌چی هه‌رزانترو باشتره‌!.

 دەمێ ساڵە لێرە دەژین
سه‌رم به‌دوكانێكدا کرد مامه‌ڵه‌ی‌ جلوبه‌رگم كرد، كابرای دوكاندار ماندووی نه‌كردم، به‌كوردییه‌كی زۆر ره‌وان وه‌ڵامی دامه‌وه‌، به‌لامه‌وه‌ سه‌یربوو چۆن خێرا زانی كوردم، وتم: له‌وه‌ده‌چێت خه‌ڵكی سلێمانی بیت، وتی‌ به‌ڵێ‌، به‌ڵام كورد نیم! ئه‌وه‌نده‌ی‌ دیكه‌ حه‌په‌سام، وتم: ئه‌ی‌ چۆن ئه‌و كوردییه‌ ره‌وانه‌ ده‌زانیت، وتی‌ خه‌ڵكی سلێمانیم، به‌ڵام مه‌سیحیم‌و ده‌مێ ساڵه‌ لێره‌ ده‌ژین.
ده‌رفه‌ت بوو باسی ژیانی خۆی‌و مه‌سیحییه‌كانی به‌غدای له‌گه‌ڵدا بكه‌م، زوو وتم: رۆژنامه‌نووسم‌و هاتووم باسی كورد له‌به‌غدا بكه‌م، داینیشاندم‌و حه‌زی لێبو قسه‌ بكات، پیاوێكی خوێنده‌واری له‌سه‌رخۆبوو، به‌ئاگابوو له‌بارودۆخی سیاسی‌و كۆمه‌ڵایه‌تیی كوردستان‌و به‌غدا.
پێی‌ وتم: كوا، نه‌ كوردو نه‌ مه‌سیحی له‌به‌غدا نه‌ماون، خه‌ڵكێكی زۆر كۆچیان كردووه‌، به‌غدا به‌غدای جاران نییه‌، له‌لایه‌ك وه‌ك كۆی عیراقییه‌كان ئازادنین، له‌لایه‌كی دیكه‌وه‌، وه‌كو مه‌سیحیی هیچ ئازادنین.
جه‌رجیس ته‌مه‌نی په‌نجاو پێنج ساڵ بوو، تا تافی لاوی له‌ سلێمانی ژیابوو، ئه‌یوت شه‌ش مانگه‌ دوكانه‌كه‌م خستۆته‌ڕوو ده‌یفرۆشم‌و، ده‌گه‌ڕێمه‌وه‌ سلێمانی، ئێره‌ جێی‌ ژیان نییه‌و، به‌كه‌ڵكی ئێمه‌مانان نایه‌ت، ئێره‌ بووه‌ به‌دۆزه‌خ، تا دێت بارودۆخ خراپتر ده‌بێت‌و، كه‌سمان لێره‌ نه‌ماوه‌، یان رۆیشتون بۆ ئه‌وروپاو ئه‌مریكا، یان له‌كوردستان نیشته‌جێ بوون.
کەمبوونەوەی مەسیحییەکان
ژماره‌ی‌ كلدۆ ئاشوریی‌و ئه‌رمه‌ن (مه‌سیحییه‌كان) له‌عیراق روون نییه‌، له‌ هه‌شتاكانی سه‌ده‌ی‌ رابردوودا ژماره‌یان له‌عیراق به‌ زیاتر له‌ نیو ملیۆن كه‌س هه‌ژمارده‌كرا، به‌ڵام سه‌رباری زیاتربوونیان به‌هۆی زیادبونی ژماره‌ی‌ دانیشتوان، به‌ڵام به‌پێی‌ قسه‌ی‌ خۆیان له‌ 80% یان كۆچیان كردوه‌ بۆ ئه‌وروپاو ئه‌مریكا، به‌پێی‌ دوا ئاماری ناڕه‌سمیی ئێستا ژماره‌ی‌ مه‌سیحییه‌كان له‌هه‌موو عیراق ناگاته‌ 250 هه‌زار كه‌س.
له‌دوای‌ 2003 مه‌سیحییه‌كان به‌شێوه‌یه‌كی گشتیی‌ كه‌وتنه‌ به‌ر دوو هه‌ڵمه‌تی زۆر توندی ترساندن‌و كوشتن‌و بڕین‌و ده‌ركردن، یه‌كه‌میان له‌دوای‌ 2003 راسته‌وخۆ له‌لایه‌ن گروپه‌ توندڕه‌وه‌ ئیسلامییه‌ سوننه‌و شیعه‌كان له‌به‌غداو موسڵ و ناوچه‌ جیاجیاكانی عیراق، ئه‌مه‌ وایكرد ژماره‌یه‌كی زۆریان روو له‌ده‌ره‌وه‌ی عیراق‌و به‌شێكیشیان روو له‌كوردستان بكه‌ن، دووه‌میشیان دوای‌ داگیركردنی موسڵ‌و ناوچه‌كانی دیكه‌ی‌ سوننه‌ نشین له‌لایه‌ن تیرۆرستانی داعش، ئه‌مه‌ وایكرد راسته‌وخۆو به‌شێوه‌یه‌كی رێكخراوو، ئاشكرا زۆربه‌ی‌ مه‌سیحییه‌كانی موسڵ‌و ناوچه‌كانی داعش داگیریكرد، رابكه‌ن‌و روو له‌ كوردستان بكه‌ن‌و، له‌كوردستانیشه‌وه‌ راسته‌وخۆ به‌ره‌و ئه‌وروپا بڕۆن، یه‌كێك له‌ ئه‌گه‌ره‌ هه‌ره‌ به‌هێزه‌كان ئه‌وه‌یه‌ تا ساڵی 2030 یه‌ك مه‌سیحی له‌عیراق نه‌مێنێت، هه‌روه‌ك چۆن له‌دوای‌ ساڵی 1951ه‌وه‌ جگه‌ له‌نزیكه‌ی 100 جوله‌كه‌ی‌ پیرو په‌ككه‌وته‌، هه‌رچی جوله‌كه‌ بوو عیراقیان جێهێشت.
له‌به‌غدا ئه‌و گه‌ڕه‌كانه‌ی‌ مه‌سیحییه‌كان لێی‌ نیشته‌جێن بریتیه‌ له‌: كه‌مپ سارا، به‌تاوین، شه‌قامی 52، وه‌حده‌، گه‌راج ئه‌مانه‌..تد.
 
 ئەبو نەواسی ئێستاو، ئەوی جاران
هه‌ر ئه‌و رۆژه‌ سه‌ردانی چه‌ند شوێنێكی دیاری به‌غدام كرد، له‌وانه‌، ئه‌بو نه‌واس، ئه‌عزه‌مییه‌، شه‌قامی موته‌نه‌بی..تد ئه‌و شوێنانه‌ ناوچه‌ی‌ دیارو ناسراوی شاری به‌غدا-ن.
ئه‌بو نه‌واس، شه‌قامێكه‌ ده‌كه‌وێته‌ سه‌ر رووی رۆژهه‌ڵاتی روباری دیجله‌ له‌به‌ری ره‌سافه‌، درێژ ده‌بێته‌وه‌ له‌گه‌ڵ پردی جمهوریه‌، یان مه‌لیكه‌ عالیه‌ی‌ پێشوو تا ده‌گاته‌ ناوچه‌ی‌ باب شه‌رجی‌و پردی بێستون له‌ كه‌ڕاده‌، یه‌كێك له‌ ناسراوترین ئه‌و شوێنانه‌ی‌ كه‌ خه‌ڵك تا دره‌نگی شه‌وان لێی‌ ده‌مێنێته‌وه‌، پڕه‌ له‌قاوه‌خانه‌و خواردنگه‌، ماسی سوره‌وه‌كراوی ئه‌وێ‌ ناسراوه‌، شێوه‌ی‌ سوركردنه‌وه‌كه‌ی‌ پێی‌ ده‌ڵین مه‌سگوف‌و به‌سووركردنه‌وه‌ی‌ عیراقی ناسراوه‌، ئه‌مه‌ جگه‌ له‌ تكه‌و كه‌باب‌و خواردنی دیكه‌ی وه‌كو سه‌روپێ، ئیدی له‌وێ‌ گۆرانییه‌كانی نازم غه‌زالی‌و ئوم كه‌لسوم‌و هه‌ندێجار فه‌رید ئه‌تره‌ش‌و كازم ساهیرو تیپی مه‌قامی عیراقی ده‌بیستی، به‌ڵام بێگومان ئه‌بونه‌واسی ئێستا ئه‌وه‌ی جاران نییه‌، كه‌ له‌زه‌ین‌و بیری ئه‌وانه‌ی‌ پێشتر سه‌ردانی به‌غدایان كردووه‌ هه‌یه‌.
ئه‌عزه‌مییه‌م بینی‌، مزگه‌وتی ناسراوی ئه‌عزه‌مییه‌و، گۆڕستانی مه‌له‌كی‌و سه‌عاتی ئه‌عزه‌مییه‌ی‌ لێیه‌، بێگومان دوكان‌و بازاڕی كۆن‌و گۆڕی ئه‌بو حه‌نیفه‌ی‌ نوعمان‌و ..تد
له‌هه‌مووی گرنگتر بۆمن بینینی شه‌قامی موته‌نه‌بی بوو، ئه‌و شه‌قامه‌ شوێنی‌ كۆبونه‌وه‌و به‌یه‌كگه‌یشتنی نووسه‌رو رۆشنبیرانی به‌غدایه‌، هه‌موان له‌خۆده‌گرێت، هه‌ر له‌ رۆژنامه‌نووسانه‌وه‌ بگره‌ تا ده‌گاته‌ سینه‌ماكارو شانۆكارو هونه‌رمه‌ندانی دیكه‌و خه‌ڵكی جیاوازی به‌غدا.
ناوچه‌یه‌كی زۆر گه‌وره‌و فراوان نییه‌، به‌ڵام ناو ناوبانگێكی زۆری هه‌یه‌، ئه‌وێ‌ شوێنی كتێب فرۆشتن‌و دیداری رۆشنبیرانه‌، به‌تایبه‌ت به‌یانیانی رۆژی هه‌ینی، ئیدی مه‌پرسه‌ چ قه‌ره‌باڵغییه‌ك له‌وێ هه‌یه‌، ئه‌و به‌یانییه‌، هه‌رچی كتێب‌و بڵاوكراوه‌و چاپكراوی نوێ‌ هه‌یه‌ ده‌خرێته‌ڕوو، رۆشنبیران‌و خوێنده‌واران ده‌وری كتێبه‌كان ده‌ده‌ن‌و، به‌شه‌وقه‌وه‌ لاپه‌ڕه‌كان هه‌ڵده‌ده‌نه‌وه‌و ده‌یكڕن، به‌ڵام حه‌یف ئه‌وێش وه‌كو جاران نه‌ماوه‌.
     
  شەقامی موتەنەبی
شه‌قامی موته‌نه‌بی به‌ناوی ئه‌بی ته‌یبی موته‌نه‌بی كراوه‌ (915- 965 ز) كه‌ له‌سه‌رده‌می عه‌باسییه‌كاندا ژیاوه‌، ئه‌و شاعیره‌ له‌ته‌مه‌نی 50 ساڵی كۆچی دواییكردووه‌، یه‌كێكه‌ له‌شاعیره‌ هه‌ره‌ به‌ناوبانگه‌كانی عه‌ره‌ب، شیعره‌كانی هه‌م په‌سندان بووه‌ به‌كاربه‌ده‌ست‌و میرزاده‌كان، هه‌میش هه‌ندێجار هه‌جوو هێرش بووه‌، ئه‌ستێره‌یه‌كی دره‌وشاوه‌ی‌ زمانی عه‌ره‌بی بووه‌.
شه‌قامی موته‌نبی ده‌كه‌وێته‌ به‌ری ره‌سافه‌ له‌سه‌ر روباری‌ دیجله‌ له‌ ساڵی 1932 دروستكراوه‌، قشڵه‌ی سه‌رده‌می حوكمی عوسمانییه‌كانی لێیه‌، له‌ناوچه‌ی‌ مه‌یدان‌و شه‌قامی ره‌شید له‌ناوه‌ڕاستی به‌غدا نزیكه‌، دیوی رۆژئاوای ده‌كه‌وێته‌ سه‌ر رووباری دیجله‌، له‌وێ‌ په‌یكه‌رێكی گه‌وره‌ی‌ موته‌نه‌بی شاعیر دروستكراوه‌و، رووی له‌ باشوور كردووه‌، شیعرێكی به‌ناوبانگی خۆی له‌سه‌ر په‌یكه‌ره‌كه‌ نوسراوه‌ (أنا الـذي نظـر الأعمى إلى أدبــي ... وأسمعـت كلماتـي مـن بـه صمـم).
له‌و شه‌قامه‌ نه‌ك ته‌نها كتێب، به‌ڵكو هه‌ندێجار شانۆ یان پیشانگه‌ی وێنه‌، یان كاریكاتێر ده‌كرێته‌وه‌، هه‌ندێجار له‌گه‌ڵ چاپكردنی كتێبی نووسه‌رێكی دیاریكراو سیمینار له‌وێ‌ پێشكه‌شده‌كرێت. به‌شێك له‌ نووسه‌ران‌و رۆژنامه‌نووسان‌و رۆشنبیرانی به‌غدا له‌وێ‌ یه‌كتر ده‌بینن، ئه‌وانه‌ی‌ له‌وێ‌ بوون ده‌یانگوت دیداری ئێره‌ تامێكی تایبه‌تی هه‌یه‌، بۆیه‌ هه‌موو كات لێره‌ كۆده‌بینه‌وه‌، نه‌خاسمه‌ به‌یانیانی رۆژی هه‌ینی.
له‌شه‌قامی موته‌نه‌بی مه‌دره‌سه‌ی‌ ره‌شیدی سه‌ربازیی لێیه‌، ئێستا كراوه‌ به‌سه‌نته‌ری‌ رۆشنبیری به‌غدا، ئه‌مه‌ جگه‌ له‌چه‌ند چایخانه‌یه‌ك كه‌ هه‌ریه‌كه‌یان مێژوویه‌كی تایبه‌تی خۆیان هه‌یه‌و رۆشنبیران‌و، خوێنده‌وارانی به‌غدا له‌ڕابردوو ئێستا لێی‌ كۆده‌بنه‌وه‌.
ئه‌و چایخانانه‌ ئێستاش هه‌ر كه‌له‌پوریی‌و كلتورییه‌كه‌ی‌ جارانیان له‌ده‌ستنه‌داوه‌و، دانیشتن‌و چاخواردنه‌وه‌ لێیان هه‌مان تامی رابردوویان هه‌یه‌، بۆ نموونه‌ به‌ده‌م گۆرانییه‌كانی ئوم كه‌لسوم‌و سه‌عد حلی‌و زهوره‌ حسێن‌و وه‌حیده‌ خه‌لیل‌و ..تد. ئینجا وێنه‌ی‌ نووسه‌ران‌و رۆشنبیران‌و گۆرانیبێژان‌و خوێنده‌واره‌ ناسراوه‌كانی به‌غداو عیراقی لێ هه‌ڵواسراوه‌، كه‌شێكی تایبه‌تیان هه‌یه‌. ده‌نگی یاری تاوڵه‌و باسوخواسی، شار دیمه‌نێكی دیكه‌ی‌ نێو چایخانه‌كانه‌.
بۆنمونه‌ چایخانه‌ی‌ شابه‌نده‌ر كه‌ ده‌كه‌وێته‌ ناوه‌ڕاستی شه‌قامی موته‌نه‌بی، یان چایخانه‌ی‌ زه‌هاویی كه‌ له‌ساڵی 1917 دروستكراوه‌، به‌ر له‌دروستبوونی شه‌قامی موته‌نه‌بی رۆشنبیران‌و خوێنده‌وارانی به‌غدا لێی‌ دانیشتوون.

چایخانەکانی کوردستان
ده‌توانین بڵێین له‌كوردستان دوو چایخانه‌ هه‌یه‌ هاوشێوه‌ یان نزیكن له‌و جۆره‌ چایخانانه‌، یه‌كێكیان له‌هه‌ولێره‌ (مه‌چكۆ)، به‌ڵام ئێستا وه‌ك جاران نه‌ماوه‌و، زیاتر شكلی چایخانه‌یه‌كی كلتوریی گه‌شتوگوزاریی له‌خۆگرتووه‌، ئه‌وانه‌ی‌ له‌وێ‌ داده‌نیشتن به‌شێكیان میوان‌و گه‌شتیارانی عه‌ره‌بی باشوورو ناوه‌ڕاستی عیراقن، نرخی چاخواردنه‌وه‌ لێی‌ گرانتره‌ له‌شوێنی دیكه‌، به‌وپێیه‌ی‌ گه‌شتوگوزارییه‌، كه‌متر رۆشنبیران لێی‌ كۆده‌بنه‌وه‌. 
ئه‌ویدیكه‌یان چایخانه‌ی‌ شه‌عب-ه‌ له‌سلێمانی كه‌ رۆشنبیران‌و نووسه‌ران، هه‌ندێجار گه‌نجان‌و ژنان‌و كچانیشی لێ‌ كۆده‌بنه‌وه‌، له‌وێش وێنه‌ی‌ ده‌یان كه‌سایه‌تیی‌و رۆشنبیرو شاعیرو  نووسه‌رانی سلێمانی و كوردستانی لێ‌ هه‌ڵواسراوه‌.
ئێواره‌ی‌ هه‌مان رۆژ له‌گه‌ڵ هێرش حه‌بیب جێگری مه‌ڵبه‌ندی به‌غدا، پیاسه‌یه‌كی درێژمان بۆ شه‌قامی موته‌نه‌بی كرد، له‌چایخانه‌ی‌ شابه‌نده‌ر كه‌ یه‌كێكه‌ له‌چایخانه‌ هه‌ره‌ كۆنه‌كانی به‌غدا،  له‌ساڵی 1917 دروستكراوه‌، دانیشتین‌و به‌ده‌م چاخواردنه‌وه‌ی‌ به‌غدایی گفتوگۆی گه‌رممان له‌باره‌ی‌ شه‌قامی موته‌نه‌بی‌و رۆشنبیرانی به‌غداو بارودۆخی كورد له‌به‌غدا كرد. كوڕێكی تا بڵێی رۆشنبیرو شاره‌زابوو له‌بارودۆخی كورد له‌به‌غداو باری كۆمه‌ڵایه‌تی شاره‌كه‌.
شه‌قامی موته‌نه‌بی وه‌كو هه‌ر شوێنێكی دیكه‌ گازنده‌و گلله‌یی خۆی هه‌یه‌، به‌شێك له‌گلله‌ییه‌كه‌ی ئه‌وه‌یه‌ كه‌ خوێنه‌ر له‌به‌غدا كه‌مبۆته‌وه‌و وه‌كوجاران نه‌ماوه‌و ئه‌وانه‌ی‌ روو له‌و شه‌قامه‌ ده‌كه‌ن كه‌متر گه‌نجه‌كانن، ئه‌مه‌ش به‌هۆی گه‌شه‌كردنی ته‌كنه‌لۆژیاو شێوه‌ی‌ گه‌یشتنی زانیاریی به‌خه‌ڵك به‌شێوه‌یه‌كی گشتیی، هه‌روه‌ها گۆڕانی بارودۆخی كۆمه‌ڵایه‌تیی‌و كاریگه‌ریی له‌سه‌ر خوێندنه‌وه‌ به‌شێوه‌یه‌كی گشتیی.
  
 ئەو کتێبانەی قەدەغە بوون
گلله‌ییه‌كی دیكه‌ی‌ شه‌قامی موته‌نه‌بی ئه‌وه‌بوو كه‌ جاران‌و له‌سه‌رده‌می سه‌دام ژماره‌یه‌كی زۆر كتێب قه‌ده‌غه‌ بوون، بگره‌ گرتن‌و له‌سێداره‌دانی له‌سه‌ربوو، بۆیه‌ خه‌ڵك‌و رۆشنبیران چاوه‌ڕێی‌ ئازادبونیان ده‌كرد له‌ده‌ستی ئه‌و رژێمه‌ بۆ ئه‌وه‌ی‌ به‌ئازادی بنووسن‌و بخوێننه‌وه‌، له‌دوای‌ 2003 و روخانی سه‌دام شه‌قامی موته‌نه‌بی به‌ڕووی زۆربه‌ی‌ ئه‌و كتێبانه‌ی‌ قه‌ده‌غه‌كرابوو كرایه‌وه‌، نووسه‌ران ئازادانه‌تر ده‌ستیانكرد به‌نووسین‌و چاپكردنی به‌رهه‌مه‌كانیان، به‌ڵام ئه‌وه‌ مانای ئه‌وه‌نه‌بوو كه‌ به‌ته‌واوی ئازادبوون‌و هه‌موو شت ئازادبووه‌ له‌ چاپكردن‌و فرۆشتنی كتێب.
به‌شێك له‌و كتێبانه‌ی‌ قه‌ده‌غه‌كرابوو له‌سه‌رده‌می سه‌دام هی نووسه‌رانی علمانیی بوو، كه‌باسیان له‌بارودۆخی سیاسی‌و پرسی دیموكراسی‌و رزگاربونی خه‌ڵكی عیراق ده‌كرد له‌ده‌ست رژێمی به‌عس، به‌شێكیشیان ئه‌و كتێبانه‌ بوون كه‌ نووسه‌ره‌كانیان گه‌وره‌ مه‌رجه‌ع‌و پیاوه‌ ئاینییه‌ شیعه‌ مه‌زهه‌به‌كان بوون.
ئێستا دیسان هه‌ندێ‌ كتێب‌و سه‌رچاوه‌و به‌رهه‌م به‌جۆرێك له‌ جۆره‌كان قه‌ده‌غه‌یه‌، یان كتێبفرۆشه‌كان لێی‌ دورده‌كه‌ونه‌وه‌و نایفرۆشن، نه‌بادا به‌هۆیه‌وه‌ تووشی كێشه‌و گرفت بن، له‌وێ پرسیاری چه‌ند كتێب‌و سه‌رچاوه‌یه‌كم كرد، وتیان: لێره‌ نافرۆشرێت‌و نییه‌، ته‌نانه‌ت یه‌كێك له‌كتێبفرۆشه‌كان كه‌مێك به‌گرژییه‌وه‌ پێی‌ وتم: ئێره‌ شوێنی ئه‌و كتێبانه‌ نییه‌!

کتێبەکانی شەقامی موتەنەبی
هه‌ندێك له‌وێ‌ ئیشی ئه‌و كتێبه‌ قه‌ده‌غانە ده‌كه‌ن كه‌ لە بازاڕ به‌ئاسانی ده‌ستناكه‌وێت، به‌نرخی گران ده‌یفرۆشنه‌وه‌ خه‌ڵك، یه‌كێك وتی‌: به‌ڵێ‌ كتێب هه‌یه‌ قه‌ده‌غه‌یه‌و كێشه‌ی‌ گه‌وره‌ دروستده‌كات بۆ هه‌ركه‌سێك بیفرۆشێت، هاوڕێیه‌كم وتی: جارێكیان یه‌كێك داوای‌ لێكردم كتێبێك هه‌یه‌ به‌ناوی (شه‌خسیه‌ محه‌مه‌دییه‌، كه‌ هی مه‌عروف ره‌سافییه‌) بۆم په‌یدا بكه‌، منیش له‌هه‌ر كێم ده‌پرسی ده‌یوت نییه‌ یان به‌ساردییه‌كه‌وه‌ وڵامی ده‌دامه‌وه‌، نه‌مده‌زانی بۆ به‌وشێوه‌یه‌ وڵامم ده‌ده‌نه‌وه‌، تا كتێبفرۆشێك به‌كه‌مێك توڕه‌ییه‌وه‌ پێی‌ وتم: چییه‌ ده‌ته‌وێ‌ بكوژرێی‌؟! له‌وه‌وه‌ زانیم ئه‌و كتێبه‌ قه‌ده‌غه‌یه‌و مه‌ترسیداره‌ مامه‌ڵه‌كردنی.
ئه‌و كتێبانه‌ به‌ڕه‌سمیی له‌لایه‌ن حكومه‌ته‌وه‌ قه‌ده‌غه‌ نه‌كراون، به‌ڵكو له‌ڕووی كۆمه‌ڵایه‌تییه‌وه‌و به‌هۆی زاڵبونی تێگه‌یشتنی ئاینییه‌وه‌، خوازراو نییه‌، به‌تایبه‌تی‌ ئه‌و كتێبانه‌ی‌ باسی دین‌و مێژووی ئیسلام ده‌كه‌ن!، ئه‌و كتێبانه‌ی‌ له‌وێ‌ قه‌ده‌غه‌یه‌، به‌شێكیان ساڵانه‌ له‌مانگی نیسان كه‌ پیشانگه‌ی‌ نێوده‌وڵه‌تی كتێب له‌هه‌ولێر ده‌كرێته‌وه‌، به‌ئاشكرا ده‌فرۆشرێن، به‌شێكیان له‌لاین عه‌ره‌به‌كانی به‌غدا یان خاوه‌ن كتێبخانه‌كان ده‌كڕدرێته‌وه‌و دواتر به‌نرخی گران ده‌یفرۆشن.
هه‌وڵمده‌دا شوێنه‌كه‌ وه‌كوخۆی ببینم، پرسیاری زۆرم ده‌كردو به‌دواداچونم بۆ هه‌مووشت ده‌كرد، تا بتوانم له‌گێڕانه‌وه‌و وێناكردندا وردبم‌و شتێكم بیرنه‌چێت دواتر بگه‌ڕێمه‌وه‌ سه‌ری.


ناو:  
ئیمه‌یل:    
سه‌رنج:  

#7344
18/8/2017
ئه‌رشیف
وه‌رزش
‌ له‌ نێو لیستی باشترین 10 یاریزانی ئه‌وروپادا ناوی نه‌یمار نییه‌ 17/8/2017
‌ یاریزانانی سلێمانی پێشه‌نگ بوون 17/8/2017
زانست
‌ لەسەر زمانی ئێمەیە‌و لەسەر پەنجەی كەڕولاڵەكانیشە 18/8/2017
‌ ئه‌وانه‌ی‌ ئاره‌زوو ده‌كه‌ن ببن به‌ دایك ئه‌م بابه‌ته‌ بخوێننه‌وه‌ 18/8/2017
‌ منداڵ هه‌ستی‌ حه‌وته‌میشی‌ هه‌یه‌ 18/8/2017

© 2009 KURDISTANY NWE, All RIGHTS RESERVED. | CREATED BY AVESTA GROUP