بەڵێ‌و نەخێر.. گەمەکە وانابێت
روانگە بەڵێ‌و نەخێر.. گەمەکە وانابێت ‌ سۆران علی‌ 10/8/2017
كار وابڕوات مەسەلەی كورد كە تاكە ئامانجی ستراتیجی شۆڕشە یەك لەدوای یەكەكان‌و خەونی لەمێژینەی هەر تاكێكە‌و دەیان ساڵە خەباتی گەورە‌و بچووك بۆ سەرخستنی درێژەی هەیە‌و روبارێك خوێن لەپێناو بە ئاكام گەیاندنیدا دەڕژێ‌و قوربانی‌و ماڵوێرانییەكی زۆری چووەتە پێناو، هەر بەدەستی خودی كورد لە ئاڕاستەی راستەقینەی بەلاڕێدا دەبرێ‌و تێكەڵ بە گەمەی سیاسی (بەڵێ‌و نەخێر) دەكرێت، دوور نییە سەرەنجامیش بەرەو هەڵدێر نەبرێ‌و نەگەڕێینەوە چوارگۆشەی یەكەم.
بەشێكی زۆری بەرپرسیارێتییەكە لە ئەستۆی سیاسیە دەستڕۆیشتووەكاندایە كە كاتێكی نەگونجاو‌و دۆخێكی سیاسی ناهەموار‌و بێ پشت‌و پشتیوان‌و زەمینە سازییەكی ناتەواو‌ و هەلومەرجێكی ئابووری دژواریان بۆ گەرمكردنی باسی نامەدروسانەی بابەتی ریفراندۆم‌و سەربەخۆیی هەڵبژارد، ئەو كەلێنانەش بوارێكی ئەوتۆیان رەخساند خەڵك ئومێدێكی زۆری بە هاتنەدی خەونە گەورە‌و دێرینەكەی نەمێنێت، هەر ئەوەشە وای كردووە دەنگی «نەخێر»‌و رەتكردنەوە‌و لەدژ وەستانەوە ئاسایی وەربگیرێ‌و بگرە لایەنگریشی هەبێت‌و بەئاشكرا‌و چاوقایمانە بانگەشەی بۆ بكرێت‌و خەڵكی بۆ هان بدرێت.
نەنگییە بۆ سەركردایەتییەكی سیاسی تەمەن زیاتر لە نیو سەدە، لە پرسێكی وا هەستیار‌و چارەنووسسازدا نەتوانێت بەحیكمەت‌و دانایی‌و دووربینی بڕیارێكی ژیرانە بدات چین‌و توێژە جیاجیاكانی كۆمەڵ لە دەورەی دۆزە رەواكەی كۆبكاتەوە‌و ئاڕاستەیەكی راست‌و دروستیان بكات، هەستنەكردنی ئەو سەركردایەتیەیە بە بەرپرسیارێتی كە سەركێشی بە مافی چارەنووسی میللەتێكەوە بكات‌و بیخاتە نێو گێژاوی ركابەرییەكی نابەرابەری ئایندە ناڕوونەوە كەس نازانێت چارەنووسی بە چی دەگات‌و لە كوێدا دەگیرسێتەوە، چونكە هۆكاری سەرهەڵدانی (نەخێر)ەكان لەخودی سەربەخۆیی وەك خواست‌و ئامانج سەرچاوەی نەگرتووە، بەڵكو میكانیزمەكان‌و بارودۆخ‌و چۆنێتی دەستبردنە بۆ بابەتەكە لەگەڵ ویست‌و پێداویستی هەنووكەیی خەڵكدا یەكناگرێتەوە.    
پەرەسەندنەكانی ئەم دواییەی پەیوەست بە پرسی ریفراندۆم‌و دابەشبوونی تێڕوانینەكان بەسەر (دژ ‌و لەگەڵ)دا چاوەڕوانڕوانكراوبوون لەسایەی نەبوونی كۆدەنگییەكی بەهێز‌و سووربوونێكی پتەو بۆ ئەو هەنگاوە كە بە دوو كۆڵكەی سەرەكی هەر بڕیارێكی نەتەوەیی‌و نیشتمانی گشتگیر دادەنرێن، كاتێك بەبێ لێكۆڵینەوەیەكی ورد‌و بەرنامەیەكی تۆكمە‌و پشتیوانییەكی ناوخۆیی بەهێزەوە دەرگا بەڕووی یەكێك لە هەرە گرنگترین پرسە هەستیارەكان دەكرێتەوە‌و بەبێ ئەجێندایەكی روون‌و رەوان بڕیاری لەبارەوە دەدرێت، بەرزبوونەوەی دەنگی ناڕەزایی‌و نەخێر دەرئەنجامێكی ئاسایی پێشبینیكراوە كە نەدەبوو سیاسیە ئەزمووندیدەكان رێگە بدەن بەو ئاقارە بگات.
دابەشبوونی خەڵك بەسەر دوو بەرەی (بەڵێ‌و نەخێر)دا بەر لە هەر شتێك گومان خستنەسەر مافێكی رەواو‌و شەرعی‌و یاسایی گەلێكە، دواتریش زیانگەیاندنە بە مەسەلەیەكی رەوا‌و مێژوویی بەڵگەنەویست، ئینجا هۆكارێكیشە بۆ لێكدووركەوتنەوە‌و لێكترازان‌و تێكچوونی یەكڕیزی نیشتمانی‌و لاوازبوونی باوەڕی هاونیشتمانیان بە سەربەخۆیی‌و مافی چارەی خۆنووسینیان. هەروەك هێنانە خوارەوەشە لە شكۆ‌و پایەی تێكۆشانی بێ پسانەوەی زیاتر لە یەك سەدەی گەلێكی ستەمدیدە‌و چەوساوە‌و مافخوارو كە ئەوەی هەیبوو لەپێناویدا بەختی كردووە‌و دەكات.
 ئێستاش نەچووە بچێت، كات‌و دەرفەت ماوە‌و درەنگ نییە بۆ فریاكەوتنی رەوشەكە، پێویستە بەهەر نرخێك بێت رێ لەم گومڕایی‌و سەرلێشێواویە بگیرێت‌و سەنگ‌و قورسایی بۆ ئەو پرسە نەتەوەییە بگێڕدرێتەوە‌و نەهێڵرێت هەندێك كەس‌و لایەن بیكەنە كەرەستەی یاریكردن‌و بیقۆزنەوە بۆ خەڵك فریودان‌و گەیشتن بە مەرامە شاراوەكانیان. سەركردایەتی سیاسی كوردستان ئەركیەتی هەرچی زووە بە دانایی مامەڵە بكات‌و بڕیارێكی یەكلاكەرەوەی دەستەجەمعی‌و كۆدەنگی لەسەركراو بۆ دەربازبوون لەو دۆخە نەخوازراوە بدات، تا چیتر خەونە گەورەكەی سەربەخۆیی بەهای خۆی لەدەست نەدات‌و نەبێتە قوربانی یاریەكی نەزانانە.
*تێبینی: ماوەی ساڵێكە بەم گۆشە هەفتانەیە لەخزمەتی خوێنەرانی ئازیزداین، ئێستاش كاتی هاتووە لێرەدا بوەستین‌و ماڵئاوایی بكەین. بەڵێنیش بێت لە ئایندەدا بەشێواز‌و كاری نوێوە لە كوردستانی نوێ درێژە بە ئەركەكەمان بدەین.


ناو:  
ئیمه‌یل:    
سه‌رنج:  

#7347
22/8/2017
ئه‌رشیف
وه‌رزش
‌ جارێكی تر هالیپ شكستی هێنا بچێته‌ پێشه‌نگی ریزبه‌ندییەوە 22/8/2017
‌ ریاڵ مه‌درید گرێبه‌ستی كه‌ریم بنزیمه‌ نوێ ده‌كاته‌وه‌ 22/8/2017
زانست
‌ هەسارەیەك لە زەوی نزیك دەبێتەوە 21/8/2017
‌ نۆكیا 8 ركابەریی ئایفۆن و گالاكسی دەكات 21/8/2017
‌ پێنج هەڵەی باو لەكاتی راكردندا 21/8/2017

© 2009 KURDISTANY NWE, All RIGHTS RESERVED. | CREATED BY AVESTA GROUP