لە (مەككە) ش هەر ژن سێبەری پیاوە
کەمین پۆڵەتیک لە (مەككە) ش هەر ژن سێبەری پیاوە ‌ خەڵەف غەفور‌ 11/9/2017
كاتێك مسوڵمان بۆ بەجێگەیاندنی فەریزەی حەج روو لە شاری مەككە دەكات یەكێك لە ئەركەكانی سەرشانی لە خۆكردنەوەی غرور و بەها رەگەزییەكەیەتی، دەبێت لەوێ پیاو ببێتە مرۆڤ و غروروی نێرایەتی فڕێ‌ بدات، لەگەڵ ژن یەكسان بێت و پێكەوە ببنە سێبەری یەكتر.
ئەوەی دەبینرێت بەهای ژن بە شێوەیەكی گشتی لای پیاوی رۆژهەڵاتی هەمان بەهایە لە ماڵەكەی، لەنێو حەرەمی مەككە و تەنانەت دوای گەڕانەوەشی، بۆ ئەوەش دەیان بیانووی هەیە لەوێنەی پێویستی ئاگابوون لە ژن و ملكەچبوونی بۆ فەرمانەكانی پیاوەكەی و پەیوەستبوون بە بڕیارەكانی باوكی و مانەوەی لە چوارەچێوە شەرعیەكەدا.
لێرە ئەگەر چەقی قسەكردن وێنەكەی رائید حەیانی وێنەگری سعودی بێت كاتێك بە كامێراكەی دیمەنی پیاوێك دەگرێت كە ژنەكەی سێبەری بۆ كردووە لەكاتی نوێژكردنیدا و تایتڵی وێنەكەش ئەوەیە «گوزارشتی خۆشەویستی ژنێكە بۆ مێردەكەی»، ئەوا دیسانەوە بابەتی خۆشەویستی و ملكەچبوون و پەیوەستداریی رەهای ژن بۆ پیاوەكەی لەبەردەمماندا قوت دەبێتەوە.
رەنگە بۆ من ئەو دیمەنە كاتێك كارەكتەرەكان پێچەوانە بوونایەتەوە راستتر بووایە، ئەوكاتەی پیاوێك سێبەری بۆ ژنەكەی لەكاتی نوێژكردندا بكردایە، بەڵام كە ئەو وێنەیە بوونی نییە و بەپێی ئەوەشی لەبەردەستە لە داهاتوویەكی نزیكدا بوونی نابێت، ئیتر قسەكردن لەسەری دەبێتە پێویستییەكی بەردەوام.
ژن و پیاو وەكو دوو كارەكتەری سەرەكی لەو ململانێیەدا زۆرینەیان دەستبەرداری شوناسی كۆنینەی خۆیان نابن، دەرەنجامی ئەوەش هاوكێشەیەكە كە وێنەی «قوربانی» بە ژن بەخشیوە بێ ئەوەی هەوڵی كرداری ژن ببینرێت و ئەوەش دەرفەتە بۆ ئەوەی پیاوسالاریی بەردەوامی هەبێت.
لەو دیمەنەدا دەبینیت هەردوو كارەكتەركە پەیوەندییەكی بەردەوامیان هەیە، بەڵام بەوردبوونەوە لێی پەیوەندییەكە لاسەنگە، پیاویش وەكو هەمیشە هێزی زیاتری خۆی لەو لاسەنگییەوە وەرگرتووە بۆ بەهێزتربوونی زیاتری پێگەكەی.
غیابی ژن لە هەوڵدان بۆ گۆڕینی دیمەنەكە لەوەی بەناوی خۆشەویستییەوە بووەتە سێبەری پیاو بۆ ئەوەی كە بەناوی خۆشەویستییەوە لەگەڵ پیاو بەشێوەیەكی دادپەروەرانە سێبەری یەك بن وایكردووە مێژووی نێرسالاری بەشێوەیەكی رەها لەئێستاشدا بەردەوامی هەبێت، خۆ راستە ئەگەر ئەوەش بێژین لەئاستی رووخساردا هەندێك گۆڕانكاری لە پیاودا روویداوە یان بەناچاری پێی رازییە، بەڵام شێوەی گشتی ژیانی نێوان پیاو و ژن هێشتا هەر بە فۆرمە كۆنەكەی پیاوسالاری بەڕێوەدەچێت .
كەین و بەینی پەیوەندیی نێوان ژن و پیاو ئاڵۆزە، لە ژینگەی رۆژهەڵاتی سادە ناكرێتەوە، بەڵكو بەردەوام بەهۆی ئامادەیی ئایین و دابونەریتی كۆنینەوە تازە دەبێتەوە، لەگەڵ ئەوەشدا بزووتنەوەیەكی ژنانەی كاریگەر بۆ گۆڕینی دیمەنەكە نییە.
رازیبوونی زۆرینەی ژنان بەوەی بەناوی خۆشەویستییەوە ببنە سێبەری پیاوەكانیان ئەوەی بەرهەم هێناوە كە هەوڵی جدی نابێت بۆ تێپەڕبوونی قۆناغی بەسێبەربوونیان، هۆكار و بیانووەكانی پیاو بۆ باڵادەستبوونی بەردەوام خۆی تازە دەكاتەوە بێ ئەوەی لای ژنان ئەو خۆ تازەكردنەوەیە بەشێوەیەكی كاریگەر ئامادەیی هەبێت.
ئەمە بۆ ئەوە نییە هەوڵە سەرەتاییەكانی ژنان بێ بەها بكەم، بەڵام بۆ تێپەڕبوونی قۆناغی بەسێبەربوونی ژن لە ماڵ، سەیران و كەیف و سەفا، لە مەككە و هەر شوێنێكی تریش هاتنەكایەی بزووتنەوەیەكی ژنانە پێویستە، لەئێستادا من رەشبینم و هیچ هیوایەكی لەو شێوەیە نابینم.


ناو:  
ئیمه‌یل:    
سه‌رنج:  

#7367
19/9/2017
ئه‌رشیف
وه‌رزش
‌ ئایا شه‌ڕی ئه‌ستێره‌كان له‌ پاریس سانجێرمان ده‌ستیپێكرد؟ 19/9/2017
‌ نه‌فرەتی خیتافی به‌رده‌وامه‌ 19/9/2017
زانست
‌ كاسینی شۆڕشێك له‌ زانیاری ده‌رباره‌ی زوحه‌ل 19/9/2017
‌ رۆبۆته‌كان ده‌بنه‌ جووتیار 19/9/2017
‌ لە هەر ١٠ كەسێك، یەكێكیان خواردنی پێویستی نییە 18/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP