ئێواره‌یه‌ك له‌ ماڵی مام جه‌لال
ئێواره‌یه‌ك له‌ ماڵی مام جه‌لال ‌ 11/10/2017
بڕوا به‌رزنجی
چه‌ند هه‌فته‌یه‌ك دوایی ڕوداوه‌كانی ١٧ی شوبات و ڕۆژانی دوایی له‌ سلێمانی و ده‌وروبه‌ری، كه‌ هاوكات شۆڕشی وڵاتانی عه‌ره‌بی كه‌ ناونرا»به‌هاری عه‌ره‌بی»، گه‌یشتبوه‌ سوریا. مام جه‌لال سه‌رۆك كۆماری ئه‌وكاتی عێراق و سكرتێری گشتی یه‌كێتی، له‌ به‌غداوه‌ گه‌ڕایه‌وه‌ ماڵه‌كه‌ی خۆی له‌ گردی ده‌باشانی سلێمانی.
ڕۆژێك دوای گه‌ڕانه‌وه‌ی له‌ ئێواره‌یه‌كی سه‌ره‌تای به‌هاردا، ژماره‌یه‌ك نوسه‌ر و ڕۆژنامه‌نوسی ده‌زگاو ناوه‌نده‌ ڕاگه‌یاندنه‌كانی نزیك له‌ یه‌كێتی، سه‌ردانی مام جه‌لال_مان كرد، له‌ ده‌باشان، كه‌ من وه‌ك نوێنه‌ری ده‌زگای ڕۆشنگه‌ری چاودێر به‌شداربووم.
له‌گه‌ڵ گه‌یشتنمان مام جه‌لال له‌به‌رده‌م ده‌رگای ژوره‌كه‌یدا چاوه‌ڕێی ده‌كردین، كاتێك ته‌وقه‌م له‌گه‌ڵ كرد به‌ته‌واوی هه‌ستم به‌ ماندویی و پیرێتی كرد، به‌ڵام له‌ قسه‌كردن و یاده‌وه‌ریی و بیرتیژیدا هه‌ر ئه‌و مام جه‌لاله‌ بو كه‌ له‌ منداڵییه‌وه‌ له‌ خه‌ێاڵمدا بو. هه‌ندێك له‌و نوسه‌رانه‌ی هاتبون پێشتر كتێبی خۆیان بۆ ناردبو، به‌شێكیانی خوێندبوه‌وه‌و به‌ده‌م به‌خێرهێنانه‌وه‌ سه‌رنجی خۆی ده‌وت. له‌به‌رامبه‌ر ماڵه‌كه‌ی گه‌نجێكی زۆر ده‌یانخوارده‌وه‌و گۆرانیان ده‌گووت، به‌پێچه‌وانه‌ی ئێستاوه‌ كه‌ قه‌ده‌خه‌یه‌ ، بێجگه‌ له‌ چه‌ند پاسه‌وانێك كه‌سم نه‌بینی له‌ماڵی سه‌رۆك كۆمار، به‌جۆرێك له‌ ماڵی به‌رپرسێكی گه‌وره‌ی كوردی نه‌ده‌چوو!
دوایی «چا» خواردنه‌وه‌یه‌ك،وتی یه‌كه‌مین دیداری ئه‌م جاره‌م له‌ سلێمانی له‌گه‌ڵ ئێوه‌دایه‌، من هه‌میشه‌ گفتوگۆ و دانیشتن له‌گه‌ڵ نوسه‌ران و ڕۆژنامه‌نوسانم پێخۆشه‌ و به‌ زه‌روریه‌تی ده‌زانم، ئینجا فه‌رموی لێكردین بۆ ژوری كۆبونه‌وه‌، سه‌ره‌تای قسه‌كان، د.شێركۆ عه‌بدوڵا قسه‌ی كرد، وه‌ك سه‌رۆكی لقی سلێمانی یه‌كێتی نوسه‌ران، كه‌ قسه‌كانی دوو به‌شبون، به‌شێكی له‌باره‌ی ناڕه‌زایی و ڕه‌خنه‌ی شه‌قام له‌بارامبه‌ر دۆخی ئه‌وكاتی دوای ڕواداوه‌كانی ١٧ی شوبات و ڕۆژانیی دوایی، كه‌ تا ڕاده‌یه‌كی زۆر ئازایانه‌ ڕه‌خنه‌ی خه‌ڵكی گه‌یانده‌ مام جه‌لال، به‌شی دووهه‌می قسه‌كانی له‌باره‌ی داوای یه‌كێتی نوسه‌ران و نوسه‌رانی ڕێكخراوه‌كه‌یان بوو.
دوایی ئه‌و كۆمه‌ڵێك نوسه‌ر و ڕۆژنامه‌نوسیتر قسه‌یان كرد، كه‌ هه‌ندێكیان داوای تایبه‌ت و بچوك بون، یان ته‌نها خۆشحاڵی ده‌ربڕین به‌ بینینی مام جه‌لال، له‌به‌رئه‌وه‌ی من گه‌نجترینیان بوم، له‌ دوایی ئه‌وان نۆره‌ی قسه‌كردنم به‌ركه‌وت، پرسیار و قسه‌م زۆربو، هه‌وڵمدا زیاتر پرسیار بكه‌م، پرسیم چاره‌سه‌ری ئێوه‌ بۆ داوای خۆپیشانده‌ران چییه‌؟چونكه‌ ئه‌وه‌ی ڕوده‌دات له‌ناوچه‌ی ژێر ده‌سه‌ڵاتی یه‌كێتیدایه‌ و به‌ڕێزت به‌رپرسی یه‌كه‌میت لێی؟، وتی:»پێش هه‌موشتێك ده‌مه‌وێت بڵێم شه‌هیده‌كانیان به‌ شه‌هیدی خۆمان ده‌زانم و چیش پێویست بێت بۆ برینداره‌كان ده‌یكه‌ین، هاتومه‌ته‌وه‌ تا له‌ نزیكه‌وه‌ گوێم له‌داوای خۆپیشانده‌ران بێت، ئێمه‌ ئاماده‌ین به‌ده‌م زۆرینه‌ی داواكانیانه‌وه‌ بچین، به‌ڵام بیرتان نه‌چێت ئێمه‌ به‌شێكین له‌م حكومه‌ت و ده‌سه‌ڵاتدارییه‌ نه‌ك هه‌موی، بۆیه‌ به‌ته‌نها ناتوانین داواكان جێبه‌جێ بكه‌ین، داوای خۆپیشانده‌ران ڕه‌وایه‌، ئه‌گه‌ر گۆڕان و دوو حزبه‌ ئیسلامییه‌كه‌ یاریی سیاسی به‌ داواكانیانه‌وه‌ نه‌كه‌ن، دوێنێ ئێواره‌ پێش گه‌ڕانه‌وه‌م نوری مالیكی هه‌ندێ به‌ڵگه‌ی بۆ ناردوم، كه‌ ئاگاداری ته‌داخولی ده‌ره‌وه‌ هه‌ین، بۆیه‌ نوسخه‌یه‌كم داناوه‌ بۆ مامۆستا عه‌لی باپیری بنێرم». من ویستم بپرسم بۆ عه‌لی باپیر و مام وتی ئه‌وه‌م لێمه‌پرسه‌.
هه‌ر ئه‌وكات، هه‌فته‌یه‌ك ده‌بوو زاوایه‌كی ئه‌سه‌د كوژرابو، مام جه‌لال نامه‌یه‌كی بۆ خوشكی به‌شار نوسی بوو، پرسیم، « به‌ڕێز مام جه‌لال، هه‌موو ئازادی خوازێك چاوه‌ڕیی كه‌وتنی به‌شاره‌، چی واده‌كات له‌م كاته‌دا نامه‌ بۆ خوشكی به‌شار بنوسیت»، وتی:» بابه‌تێكی باشت باسكرد، یه‌كه‌مین ئێمه‌ دۆستایه‌تیه‌كی كۆنمان هه‌یه‌و ڕۆژانێكی زۆر ئێمه‌یان له‌ ماڵی خۆیاندا پاراستوه‌و هاوكاری شۆڕشه‌كه‌یان كردوین، منیش واناسراوم به‌ وه‌فام بۆ دۆسته‌ كۆنه‌كانم به‌ پێكه‌نینه‌وه‌ ، دوهه‌مین ئێستایش كۆمه‌ڵێك شۆڕشگێری كوردانی باكور له‌ ماڵی ئه‌سه‌د بێنه‌ ده‌ره‌وه‌ له‌ هه‌ر كوێی دنیابن ده‌یانگرن و ڕاده‌ستی توركیایان ده‌كه‌نه‌وه‌، سێهه‌مینیش كه‌ حه‌زده‌كه‌م ڕای خۆمتان پێبڵێم، ئه‌وه‌یه‌ كه‌ به‌شار ناڕوخێت. له‌وانه‌یه‌ تا نزیكی دیمه‌شقیش بكه‌وێته‌ ده‌سته‌ هێزه‌كانیتر، تیرۆرو ته‌قینه‌وه‌و جه‌نگی زۆر ڕوبات، به‌ڵام به‌شار ده‌مێنێته‌وه‌و حاڵه‌تی سوریا وه‌ك هیچ وڵاتێكیتر نییه‌و مه‌حاڵه‌ ڕۆیشتنی به‌شار».
مام جه‌لال، وه‌ك ئه‌وه‌ی پێشتر حه‌زیكردبێت یه‌كێك ئه‌و پرسیاره‌ی لێبكات، درێژه‌ی به‌ قسه‌كانیدا له‌وباره‌یه‌وه‌و به‌وردی باسی ئه‌و هۆكاره‌ ناوخۆیی و ده‌ره‌كیانه‌ی سوریایی كرد، كه‌ واده‌كات به‌شار نه‌ڕوخێت و وتیشی ئه‌وه‌ له‌ به‌رژه‌وه‌ندی كورده‌ كه‌ به‌شار لاوازده‌بێت به‌ڵام ناڕوخێت، «برایانی كورد له‌وێ ده‌توانن سود له‌و بۆشاییه‌ ببینن و كیانێك بۆخۆیان دروست بكه‌ن و ئێمه‌ له‌سه‌ر خه‌تین له‌گه‌ڵیان و له‌وانه‌یه‌ بتوانن تا فیدڕاڵی به‌ده‌ست بێنن».
پرسیم، ئایا بۆم هه‌یه‌ سود له‌ وته‌كانت ببینم بۆ بڵاوكردنه‌وه‌؟، وتی:»نه‌خێر، تكایه‌ ئه‌وه‌ی ده‌یڵێم ته‌نها بۆ خۆتانه‌ نه‌ك بلاوكردنه‌وه‌».
ئێستا له‌م وتاره‌دا، وا هه‌ندێك له‌ قسه‌كانی ئه‌و ئێواره‌، كه‌ له‌ یادمدا ماون، ده‌یگێڕمه‌وه‌، چونكه‌ له‌ ئێستادا مام جه‌لال له‌ پۆستی سه‌رۆك كۆماریدا نییه‌و تا ڕاده‌یه‌كی زۆر له‌ دنیایی سیاسی و به‌رپرسیارێتی دوركه‌وتۆته‌وه‌.
مام جه‌لال له‌ نێو شه‌مه‌نده‌فه‌ری میزۆپۆتامیادا
ساڵی پار، كتێبی «شه‌مه‌نده‌فه‌ری میزۆپۆتامیا» كه‌ یاده‌وه‌ری نوسه‌ر و ڕۆژنامه‌نوسی به‌ناوبانگی توركیا» جه‌نگیز چاندار»ه‌، له‌ سلێمانی و به‌ ئاماده‌بونی خۆی بڵاوكرایه‌وه‌.
چاندار، كتێبه‌كه‌ی پێشكه‌شی مام جه‌لال كردوه‌و وه‌ك له‌ كتێبه‌كه‌یدا باسی ده‌كات له‌ ١٩٦٤ وه‌ یه‌ك ده‌ناسن و بون به‌ هاوڕێ. یاده‌وه‌رییه‌كانی چاندار، پڕ زانیارین و به‌شێكن له‌ مێژووی خه‌باتی سیاسی كورد، كه‌ به‌ دیدێكی مێژووی و به‌ زمانێكی ڕۆژنامه‌نوسانه‌ نوسراوه‌. ئه‌وه‌ی لێره‌دا بۆ من گرنگه‌، چاندار باسی بینینی مام جه‌لال و گفتوگۆكردن له‌باره‌ی ئاینده‌ی سوریاوه‌ ده‌كات له‌ هه‌مان ئه‌و ڕۆژانه‌ی كه‌ له‌ به‌غداوه‌ گه‌ڕایه‌وه‌ بۆ سلێمانی، كه‌ دواتر مام جه‌لال چوه‌ هه‌ولێر.
ئه‌و ڕۆژنامه‌نوسه‌ توركه‌، كه‌ هه‌میشه‌ ده‌وری گرنگی هه‌بوه‌ له‌ كۆشكی چان كایه‌، بۆ ڕاوێژكردن له‌باره‌ی چاره‌سه‌ری پرسی كورده‌وه‌، ده‌ڵێت، ئه‌وكاته‌ی «به‌هاری عه‌ره‌بی» گه‌یشتبوه‌ سوریاو چاوه‌ڕیی كه‌وتنی به‌شاربوین، ڕۆژێك له‌ هه‌ولێر میوانی نێچیرڤان بارزانی بوم، خۆم ئاماده‌كردبو بچم به‌ره‌و فڕۆكه‌خانه‌و بگه‌ڕێمه‌وه‌ بۆ توركیا، نیچیرڤان بارزانی وتی، مام جه‌لال و كاك مه‌سعود كه‌مێكیتر كۆبونه‌وه‌یان هه‌یه‌و منیش ده‌چم بۆ ئه‌وێ، بۆ نایه‌یت ئه‌وانیش ببینیت و ئه‌وكات بڕۆیت، منیش به‌خۆشحاڵییه‌وه‌ چوم.
به‌گوته‌ی جه‌نگیز، له‌گه‌ڵ چا خواردنه‌وه‌یه‌ك مام جه‌لال پرسیوێتی هه‌واڵی لای ئێوه‌ چییه‌؟ چۆن ده‌ڕواننه‌ دۆخی سوریا؟.
چاندار ده‌ڵێت: وتم ئێمه‌ له‌ توركیا، سه‌رۆكایه‌تی و حكومه‌ت و هێزه‌ ئپۆزسیۆنه‌كان و نوخبه‌ی ڕۆشنبیر و میدیاكارانیش چاوه‌ڕێی ڕوخانی به‌شارین و ئه‌وه‌ شتێكی حه‌تمییه‌ كه‌ ده‌ڕوخێت و له‌ به‌رژه‌وه‌ندی توركیا كۆتایی دێت.
ئه‌و ده‌ڵێت، كاك مه‌سعود ته‌واو هاوڕام بوو هه‌مان قسه‌ی منی هه‌بو، به‌ڵام مام جه‌لال توڕه‌بو، وتی ئه‌وه‌ی تۆ ده‌یڵێیت هه‌موتان به‌ هه‌ڵه‌یا چون، سوریا ناڕوخێت، ئێوه‌ به‌ چاوی میسر و لیبیا و تونس سوریایش ده‌بین، ده‌كه‌ونه‌ هه‌ڵه‌وه‌.
چاندار ده‌ڵێت، له‌ دڵی خۆمدا وتم، من و مام جه‌لال هاوڕێین، قه‌یچێكا با ئه‌و وابیربكاته‌وه‌، دواتر بیكردنه‌وه‌ هه‌ڵه‌كه‌ی خۆی ده‌بینێت.
به‌ڵام ئه‌و كاته‌ی من له‌ هۆڵه‌كه‌ دانیشتبوم و ێشتا كتێبه‌كه‌م نه‌خوێندبوه‌وه‌و چاندار خۆی ئه‌م قسانه‌ی ده‌گێڕایه‌وه‌، بیرم له‌ دانیشتنی ئه‌و ئێواره‌یش بوو، كه‌ له‌باره‌ی سوریاوه‌ زۆر به‌ وردی هه‌مان قسه‌ی بۆ ئێمه‌یش كرد، تاڵه‌بانی بابه‌تی ئاینده‌ی سوریایی زۆر لاگرنگ بوو، ڕای وابو، ئاینده‌ی سوریا ڕاسته‌وخۆ په‌یوه‌ندی به‌ كێشه‌ی كوردیشه‌وه‌ هه‌یه‌، ئه‌و نه‌یده‌شارده‌وه‌ كه‌ تا به‌شار لاوازبێت قازانجی كورده‌ به‌ڵام نه‌كه‌وێت، چونكه‌ ده‌یزانی ئۆپۆزسیۆنی سوری كێن !
نه‌خشه‌ڕێگای ئازادكردنی ئۆجه‌لان
مام جه‌لال دوای پرسیار و قسه‌ی ئاماده‌بوان بێجگه‌ له‌ وه‌ڵامدانه‌وه‌، شیكردنه‌وه‌یه‌كی بۆ دۆخی سیاسی ڕۆژهه‌ڵاتی ناوه‌ڕاست و دۆخی كورد له‌و گۆڕانكارییانه‌دا كرد، یه‌كێك له‌و پرسانه‌ی جێی بایه‌خ بوو بۆ من، باسی نه‌خشه‌ ڕێگایه‌ك بوو بۆ ئازادكردنی عه‌بدوڵا ئۆجه‌لان، كه‌ هه‌ر له‌و دانیشتنه‌دا كه‌سایه‌تی سیاسی نزیك له‌ په‌كه‌كه‌ و دۆستی تاڵه‌بانی، محه‌مه‌د ئه‌مین پێنجوێنی هاتبوو، سه‌رۆك كۆمار ڕوو له‌ پێنجوێنی وتی پێكه‌وه‌ سه‌رقاڵی ئاماده‌كاری نه‌خشه‌ ڕێیه‌كین بۆ چاره‌سه‌ری پرسی كورد له‌ باكوری كوردستان، كه‌ كاریگه‌ری گه‌وره‌ی له‌سه‌ر ڕۆژئاوای كوردستانیش ده‌بێت، بۆ ئه‌وه‌یش هه‌وڵی ئازادكردنی ئۆجه‌لان ده‌ده‌ین به‌ سێ قۆناخ، قۆناخی یه‌كه‌م ئۆجه‌لان له‌ ئیمراڵییه‌وه‌ بهێنرێته‌ ئه‌سته‌مبوڵ و ده‌ستبه‌سه‌ر بێت، قۆناخی دووهه‌م ئازادبێت له‌ ئۆفیسێكدا كاری سیاسی و كۆبونه‌وه‌ و بینینی ڕۆژانه‌ بكات بێ ده‌رچون له‌و ئۆفیسه‌، قۆناخی سێهه‌م كه‌ قۆناخی ئاشتی ته‌واوه‌تیه‌، ئۆجه‌لان ئازادبكرێت.
ئاماژه‌ی به‌وه‌یشكرد، بۆ ئه‌و مه‌به‌سته‌ له‌ هه‌وڵی دروستكردنی كۆمیته‌یه‌كی ئاشته‌وایدان، كه‌ مام جه‌لال و سه‌رۆكی ئه‌مریكاو سه‌رۆكی نه‌ته‌وه‌یه‌كگرتوه‌كان و یه‌كێتی ئه‌وروپاو ئه‌گه‌ر پێویستیكرد ڕوسیاو چینیش به‌شداربن تێیدا، وتیشی قسه‌م له‌گه‌ڵ سكرتێری گشتی نه‌ته‌وه‌یه‌كگرتوه‌كاندا كردوه‌ و ئاماده‌باشی پیشانداوه‌.
تاڵه‌بانی بیرێكی زیره‌ك و خه‌یاڵی گه‌وره‌ی سیاسی هه‌بو، سیاسییه‌ك خه‌ون و خه‌یاڵه‌كانی له‌ هاوسیاسییه‌كانی گه‌وره‌تربوو، كه‌ ئێستا یه‌كێتی به‌ده‌ردی بێ ئامانجی و بێ خه‌ونی سیاسییه‌وه‌ ده‌ناڵێنێت، كه‌ خه‌ونه‌كان له‌ دێگه‌ڵه‌ ده‌رناچن و له‌ هه‌نێ پۆست و بیره‌نه‌وته‌كاندا ژه‌نگی كردوه‌، به‌ڵام ئه‌وه‌ی تاڵه‌بانی باش بیری لێنه‌ده‌كرده‌وه‌، كات بوو، ئه‌و كه‌ قسه‌یده‌كرد، بیری لای گۆچانه‌كه‌ی ده‌ستی نه‌بوو، كه‌ ئه‌وه‌ گۆچانه‌كه‌ی سه‌رده‌می شاخ و شۆڕش نییه‌، كه‌ ترسێكی گه‌وره‌بوو بۆ به‌رپرسانی حزبه‌كه‌ی، به‌ڵكو ئێستا گۆچانی پیری و كۆتایی ڕێیه‌.!
ئه‌و ساته‌ بیری وتارێكی خۆمم كه‌وته‌وه‌، كه‌ ساڵی ٢٠٠٩ له‌ ڕۆژنامه‌ی چاودێر بڵاومكرده‌وه‌ به‌ ناوی «تاڵه‌بانی و مێژوو»، كه‌ خۆكاندیدنه‌كردنه‌وه‌ی مام جه‌لال_م بۆ پۆستی سه‌رۆك كۆمار، به‌ زه‌رورییه‌ت زانیبوو، تا ببێته‌ نمونه‌یه‌كی دیموكراسی بۆ مێژووی نوێی عێراق و كوردستان، هه‌روه‌ك یاداشته‌كانی بنوسێت، كه‌ به‌شێكی گه‌وره‌یه‌ له‌ مێژووی عیراق و كوردستان، كه‌ زیاتر له‌ نیو سه‌ده‌ ئاماده‌بونێكی دیار و گه‌وره‌ی هه‌یه‌ له‌نێو ئه‌و مێژووه‌دا.
گفتوگۆیه‌كی نه‌كراو، نانێكی نه‌خوراو
له‌ كۆتایی ئه‌و بینینه‌دا، ویستم داوای گفتوگۆیه‌كی تایبه‌ت له‌ تاڵه‌بانی بكه‌م، له‌باره‌ی مه‌رگ و بیركردنه‌وه‌ی سه‌رۆكێك له‌و بابه‌ته‌ فیكریی و بێ وه‌ڵامه‌، كه‌ دوای كتێبی «مردن به‌ڕێوه‌» كه‌ گفتوگۆم له‌گه‌ڵ ده‌سته‌بژێرێك له‌ ئه‌دیبان كردبو له‌وباره‌یه‌وه‌،ده‌مویست له‌گه‌ڵ ده‌سته‌بژێرێكی سیاسیش گفتوگۆ بكه‌م، به‌ڵام به‌هۆی وێنه‌گرتنی زۆر و هه‌نێ داواو و قسه‌یتری ئاماده‌بوانه‌وه‌ نه‌متوانی ئه‌و به‌ڵێنه‌ له‌ مام جه‌لال وه‌ربگرم.
به‌ڵام ئومێدێكیترم هه‌بو كه‌ ئه‌و گفتوگۆیه‌ بڕه‌خسێنم، ئه‌ویش تاڵه‌بانی داوای لێبوردنی كرد، له‌وه‌ی بۆ نانی ئێواره‌ میوانداری میوانه‌كانی ناكات، كه‌ به‌هۆی ڕێگری دكتۆره‌كانی و هێرۆخانه‌وه‌، ناتوانێت ئێواران نان بخوات و ئه‌گه‌ر میوانیشی هه‌بێت ناتوانێت نانی باشیان له‌گه‌ڵ نه‌خوات، به‌ڵام په‌یمانیدا له‌ گه‌ڕانه‌وه‌ی داهاتویدا میوانییه‌كی تایبه‌ت بۆ رۆژنامه‌نوسان و نوسه‌ران ڕێكبخات. له‌قسه‌كه‌ی خۆیه‌وه‌ قسه‌یه‌كی ڕۆماننوسی كۆچكردو محه‌مه‌د موكری_م بیركه‌وته‌وه‌، كه‌ جارێك گێڕایه‌وه‌، له‌ شاخ باره‌گای نوسه‌ران نزیك بوه‌ له‌ مام جه‌لاله‌وه‌، ئه‌ویش زوو زوو «ده‌عوه‌ت»ی كردون، وتویه‌تی حه‌زده‌كه‌م گفتوگۆ بكه‌ین، به‌ڵام دواتر هێرۆخان پێیان ده‌ڵێت، ئه‌وه‌ی له‌به‌ر خۆیه‌تی و ده‌یه‌وێت به‌هۆی میوانداری ئه‌وانه‌وه‌ نانی چه‌ورو به‌ دڵی خۆی بیخوات. به‌ڵام ئه‌وه‌ دوا بینین بوو، ته‌ندروستی مام جه‌لال كۆتایی به‌ گفتوگۆكه‌ و «ده‌عوه‌ته‌كه‌یش هێنا.!


ناو:  
ئیمه‌یل:    
سه‌رنج:  

#7396
22/10/2017
ئه‌رشیف
وه‌رزش
‌ گه‌وره‌ترین پاڵه‌وانی بازی به‌رز وازهێنانی راگه‌یاند 22/10/2017
‌ ئه‌ندام په‌رله‌مانێكی به‌ریتانیا به‌هۆی كاری ناوبژیوانی هه‌را ده‌نێته‌وه‌ 22/10/2017
زانست
‌ هه‌سارۆكه‌یه‌ك سڵاوی له‌ زه‌وی كرد و رۆیشت 19/10/2017
‌ چه‌ند خۆراكێكی گرنگ بۆ وه‌رزی پایز 19/10/2017
‌ كاریگه‌ری‌ ته‌له‌فزیۆن له‌ دروستكردنی‌ ترس لای‌ بینه‌ر 19/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP