دیمەنەكە لەوە ئاڵۆزتر نابێت دۆخی لە باری بابەتی‌ و پێشبڕكێی هێزەكان بۆ تەوەللا بوون
دیمەنەكە لەوە ئاڵۆزتر نابێت دۆخی لە باری بابەتی‌ و پێشبڕكێی هێزەكان بۆ تەوەللا بوون ‌ 11/7/2017
بەدواداچوونی: هەواڵ و سیاسەت
باوكە دامەزرێنەرەكانی كوردایەتی بەو هیوا‌و ئاواتەوە دەژیان كە رۆژێك بێت‌و ئیقبالی بەختی كوردایەتی وا بێت كە هەلومەرجی بابەتی گونجاو‌و لێبڕاو بێت لە خزمەتی مەسەلەی كوردستان‌و پێشكەوتنی بەو جۆرەی هەموو ئاواتەكانی گەلی كوردستان بێتەدی.روومان لە مافی چارەنووس‌و سەربەخۆیی بێت.
زەمەن ئەو ئیقبالەی هێناوە لێ لە رۆژگارێكدا هاتووە كە دۆخی خودی كوردایەتی‌و ماڵی كوردەواری وا شێواوە دوژمن بۆ جبرانی خاتری لەدەستدانی تەگبیری بندەستكردنی مەسەلەی كورد هەر ئەم دۆخەی دەویست. دوعاشی بكردایە هەر ئەم تێكستەی دەنووسی كە ئێستا لەسەر كوردی دەخوێنینەوە: ترازاوی كوردایەتی‌و بیماری كوردەواری.تەنگژەی فرە رەهەند كە كۆدی چارەسەریمان پێ نادۆزرێتەوە.
كێشە ئەوەیە ئەوی دەنگی زۆر بەرزە لەسەر حاڵی یەكریزی‌و یەك هەڵوێستی خۆی سیاسەتەكانی وا دادەرێژێ كە كەمەندكێش نەبێ. پەرتكەر‌و ئاڵۆز‌و شەمزاو بێت لە حاڵی وادا گرنگ نییە ئەمە بە ئەنقەست دەكات یان هەر ئەوەندەی لێ دەزانێ. دەرەنجام هەریەكە لە داڕزاندنی فاكتەری ناوخۆیی‌و هێنانەخوارەوەی ئەندازەی توانستی كوردستانیی بۆ راپەڕاندنی ئەركەكانی سەرشانی لەم دۆخەدا كە لە هەمووان دیارە دۆخی بابەتی بۆ كوردستان لەبارەو بانگمان دەكات. لە دیمەنێكی كاریكاتێریدا وا دەبینین پارتی كە دەنگە بەرزەكەی پرسی ریفراندۆمە‌و ئەمەی كردووە بە تایتڵی هەموو جوڵە سیاسییەكانی، لە پشت ئەم تایتڵە گەورەوە سەدان هەڵە‌و پەڵەی ناونیشانی كێشەكانی تری وڵاتی شاردۆتەوە. كە سەرەداوی بەشی زۆری ئەم كێشانە دەچنەوە سەرخۆی، لەجیاتی ئەوەی ئەم بەلەمی ریفراندۆمە دوا كەشتی نەجاتی بێت وەك پوش‌و پەڵاشی لێكردووە كە خەوشەكانی سێ كەڕەت‌و چوار جار دەكات.
ڕاگەیاندنی پارتی سەرمەشقی ئەم جوڵە سیاسییەی پارتییە كە دیمەنەكە بە هەڵگیراوی پیشانی پارتی دەدات. لە عەكسی ئاوێنەی ڕاگەیاندنی پارتیدا دەموچاوەكان هەڵگێراون، مەسافەی نێوان ڕەهەندێك‌و ئەویتر ڕاستەقینە نین. سەری زل بچووك‌و هی بچووك زل. لوتەكان پان‌و درێژ دەردەكەون، چاوەكان زەقن یان ئەبڵەقن. كۆی دیمەنەكەش كاڵ‌و تەڵخن‌و هیچ ئەدگارێكی ورد نیشانی سەركردایەتی پارتی نادەن تا دارێژەری سیاسەتیان كەڵكی لێوەربگرێت. دیمەنەكە چەواشەكارییە، دۆست‌و دوژمنی تێكەڵ ‌و پێكەڵ كردووە. دۆستی بە پارتییەوە نەهێشتووە‌و بێ لایەنی لێ كردۆتە دوژمن‌و دوژمنی بەرجەستەشی بێ ئەرك‌و زەحمەتكێشان كردووە مادام ڕاگەیاندنی پارتی خۆی ئەم ئەركە دژی پارتی رادەپەڕێنێ. سێبەرەكانیش بە دڵی ئەو دەكەن لەجیاتی ئەوەیە دیمەنێكی فراوانتری پێ نیشان بدەن.
پارتی بەو دامەزراوە سنووردار‌و كەم حەوسەڵەی جارانەوە كە دامودەزگای زەمانی حوكمی زاتییە شانی داوەتە بەر ئەركێكی گەورە كە بە ئیدعا ریفراندۆمە‌و بە كردەوەش لەتوپەتكردنی ریزەكانی كوردە كە ئەو یەك ریزییە بۆ ئەو ریفراندۆمە پێویستە. لە ئاوێنەی سیاسەتی ئیعلامی پارتیدا كورد‌و پارتی دۆستیان نییە‌و هەر یەكەشیان بە جیا دۆستی یەكتر نین مادام كۆی حزبەكانی تر لە بەرامبەر پارتیدا زۆرینەی كورد پێكدێنن. چونكە پارتی زۆرینەیە لە بەرامبەر هەر حزبە‌و بە تەنیا، نەك هەموو حزبەكان بە كۆیی. ئەم سیاسەتە قەرەباڵەغە زۆرجار زوڵم لە پارتیش دەكات كە مەرج نییە ڕاستییەكەی ئەو دیمەنە بێت كە بەهۆی لوتبەرزی‌و تەوەللابوون‌و سەرچیغچوونی ڕاگەیاندنەكەی لە پارتی دەبینرێت.
زمانی تەخوین‌و بە سووك تەماشاكردنی خەڵكی تر، حزبی تر، رووناكبیر‌و رۆژنامەوانیی تر كارێكی كردووە قین‌و بەغزێك لەسەر پارتی پەرە پێدەدات كە مەگەر هەر دابڕان‌و دووركەوتنەوە لەهەموو مامەڵەیەك لەگەڵ پارتی چارەسەری بكات. كۆبوونەوەیەكی پارتی نییە كە لە جیاتی نزیكایەتی‌و پێكەوەیی لە دواجاردا مێزەكە بەسەر دانووستانكاری پارتی قڵپ نەكاتەوە.
خۆی لە بنچینەدا پرۆسەی سیاسیی كوردستان‌و هەڵسوڕانی حزبەكانی بەگرفت‌و كێشەیە. هەڵسوكەوتی پارتی لەگەڵ دۆخی حزبەكاندا وا تەماوی‌و گومانبەرە كە حزبەكان لێیان دەوەشێتەوە كەموكوڕی خۆشیان بدەنە پاڵ چەوتی سیاسەتەكانی پارتی. تەنانەت ئەگەر واش نەبێت پارتی وا شانی ئارداوی بووە بچووكترین گوزارشتی سۆشیال میدیا‌و پروپاگەندەش سەدای  سەد قات دەبێتەوە‌و كاری تیرێكی كوشندە دەكات. گوتاری ڕاگەیاندنی پارتی‌و كاراكتەرە دیارەكانی گۆشتی نەیارەكانی لە بنا دەبڕێ. تەشهیر‌و سووكایەتیكردنەكەیان حزب‌و حزبایەتی تێدەپەرێنێ‌و گاڵتە بە شارەكان (نموونەی شاری سلێمانی)، بە مێژووی سیاسیی‌و بە بەها كۆمەڵایەتییەكان دەكات. ڕاگەیاندنكارەكانی پارتی سووكایەتی بە مردوو، بە نەریتی سیاسیی، دەنگی هاووڵاتیان‌و بژاردەی مۆدێلی سیاسییان دەكات. داگیركەران لە دژی ناوچەكانی وەكو سلێمانی‌و گەرمیان گاڵ دەدات. تەنها لەبەرئەوەی چیتر زۆنی سیاسەتی ئەوان‌و پێگەیان نەماوە. هەموو ئەو شتانە دەكات كە لە مێژوودا وەك پروپاگەندەی دوژمنان ناسراوە. كە جاران لای ئینگلیز كورد بە كۆمۆنیست‌و لای سۆڤێت كورد بە ئیستیعماری‌و ئیمیریالی‌و لای عەرەب كورد بە زایۆنیم لە قەڵەم دەدرا. ئێستاش ڕاگەیاندنی پارتی زۆنی سلێمانی لای توركیا وەك زۆنی پەكەكە‌و لای ئەمەریكا وەك زۆنی ئێران‌و لای عیراق وەك زۆنی بێ قەراری سیاسیی‌و لای ئێرانیش وەك زۆنی حەشاردەری كۆمەڵە‌و دیموكرات دەناسێنێ.
لای جەماوەریش موخالیفەكانی خۆی بە كوردی مالكی‌و عەبادی دەناسێنێ. بە خەڵك دەڵێ عیراقچی كەچی خۆشی لە گەرمەی ریفراندۆمدا مۆڵەتی حزبایەتی خۆی لە عیراق نوێدەكاتەوە. فراكسیۆنەكانی كورد لە بەغدا سووك دەكا‌و خۆشی لەژێرەوە لەگەڵ عەبادی كەینوبەین دەكات. بۆ سووككردنی پەرلەمانی كوردستانیش ئەركەكە رێك بە فراكسیۆنی پەرلەمانی خۆی دەسپێرێ تا نوێنەرایەتی گەل بە نوێنەرایەتی گەل سووك بكات. دوای هەموو ئەم سیاسەتە پەرتەوازكەرە داوای یەكێتی‌و یەك ریزی لە حزبەكان دەكات‌و مەجبوری كۆبوونەوی هاتنەسەر خەتیانە. جا رەنگە یان پێی وابێ بە لاوازكردن‌و پەرتكردنی حزبەكان‌و دەستوەردان لە كار‌و كردەوەیان‌و لێكترازانی ریزەكانیان دەتوانێ مەجبور‌و ملكەچی سیاسەتی خۆیان بكات. یان لە بنچینەدا هەموو ئەم سیاسەتەی ناوی ریفراندۆمە بۆ لێدان لە وزە‌و توانای هێزەكانی كوردستان بێت. كە هەر دەبێ ئەمان وزەی حەریفانەی جەماوەری كوردستان بن مادام دەنگی ئەوانیان بە ئەمانەت وەرگرتووە. كەسێكیش نییە گوێگرێ‌و پێیان بگوترێ ئەوی دەیكەن كوردستانتان لێ تەرە دەكات لە جیاتی ئەوەی لەسەر پرسی نەتەوەیی كۆیان بكاتەوە.
حەفەتی گەورەش ئەوەیە لە گەرمەی كێشەكانی یەكێتی‌و گۆران‌و حزبەكانی تردا پارتی لەبەر ستراكچەرەكەی كە ڕای جیاواز‌و ئاراستەی هەمەڕەنگی تێدا نییە بەهێزترین‌و رێكخراوترین هێزی كوردستانە، كەچی ئەم هێز‌و توانستە لە ئامانجی نارەوا‌و لابەلا بەكار دێنێت لەجیاتی ئەوەی لەژێر ئەو تایتڵە گەورەیەی ریفراندۆمدا بیانخاتە گەڕ لە تەنیشت ئەم گرتەیەشەوە گرتەی تر هەیە كە هی كێشە ناوخۆییەكانی یەكێتییە. ئەم كێشانە یەكێتیان وا لاواز‌و ناكارا كردووە كە ڕەنگدەرەوەی كێشە گەورەكەی كوردستانە. دۆخی یەكێتی دۆست‌و دوژمنی تووشی شۆك‌و سەراسیمە كردووە كە بۆ دەبێ رجا‌و ئومێدی خەڵكی كوردستان‌و خەزێنی تێكۆشان‌و ئەزموونیان كە لە یەكێتیدا  بەرجەستەیە ئا وای لێ بێت‌و لێ بكرێت؟ بە ئاڵۆدەبوونەی یەكێتییەوە گۆرانیش هەیە كە ئەم بزووتنەوەیە ئەگەرچی تازەترینە بەڵام ئەویش تووشی هەژانی چەقبەستنی سیاسەتەكان‌و كۆچی رابەرەكەی بووە. دۆخێكی وا دژوار بەڵێن‌و سوێندی درێژەدان بەهێزداری‌و تەوژمی گۆران لەدوای كۆچی بەرێز نەشیروان مستەفا ناتوانێت متمانەی پێ بداتەوە. ئاخر یەكێتییەكانیش هەروایان وت كە دوای نەخۆشكەوتنی مام جەلال پابەندی بەڵێن‌و عەهدی یەك ریزی بن. كەچی وایان نەكرد. ئەم جووت خراپیەی یەكێتی‌و گۆران كاریگەری لەسەر سیاسەتی كوردستانیش داناوە، ئارەزووی تەماعكاری لە ویستی پاوانخوازی پارتی زیاتر كردووە‌و بۆتە دەردی سەرباری دەردەكانی پارتی كە پێشتر لەسەری دواین. 
هەڵبەتە ئەم دۆخە زاتییە خراپەی كوردایەتی كە لێناگەڕێ دۆخی بابەتی بۆ بقۆزرێتەوە مادام لە دەورانی سەڵتەنەتی پارتییە هەردەبێ لەسەر پارتی حسێب بكرێت‌و ئەو گوناهەكەی لە ئەستۆ بگرێت..
بەڵام هەڵبەتە یەكێتی‌و گۆران‌و لەولاتریشیانەوە جووت حزبە ئیسلامییەكە بێ تاوان نین. بەڵام لەكاتێكدا حزبەكان پێشبڕكێیانە كێ زۆرترین تاوانی كەموكوڕی بەردەكەوێت نەیارانی كورد پێشبڕكێی قودرەتمەندی خۆیان دەكەن كە كێ زیاتر دۆخە بابەتییەكەی كورد، ئەوی جێی حەسرەتی سەدساڵەی باوكە دامەزرێنەكانی كوردایەتی بوون، بنكوڵ بكەن‌و لە ناوەوە دایرزێنن.
حەیف‌و مەخابن.


ناو:  
ئیمه‌یل:    
سه‌رنج:  

#7320
21/7/2017
ئه‌رشیف
وه‌رزش
‌ نه‌یمار هه‌رگیز ناچێته‌ پاریس سانجێرمان 20/7/2017
‌ جۆ هارت چووه‌ وێستهام 20/7/2017
زانست
‌ دەریا: من و فۆتۆ و کامێرا هاوڕێی هەمیشەیین 21/7/2017
‌ لە بارەی ڕێکخراوی ״کوردستان فۆتۆ״ 21/7/2017
‌ رەسوڵ خوڕڕەم: ده‌مه‌وێ به‌ فۆتۆ جوانییەکانی کوردستانێکی ئارام پێشانی ئه‌وروپیەکان بدەم 21/7/2017

© 2009 KURDISTANY NWE, All RIGHTS RESERVED. | CREATED BY AVESTA GROUP