ناپاكیی هاوسەری لە لاى پیاوان زیاترە
ناپاكیی هاوسەری لە لاى پیاوان زیاترە ‌ 7/8/2017
ئا: ئازاد جەلال
لە ماوەی شەش مانگدا 19 پیاو 13 ژن سەردانی سەردانی سەنتەرێكی خێزانیان كردووە دۆسیەی كێشەكانیان ناپاكی بووە.
بەشێك لە جیابوونەوەی هاوسەرەكان بە وتەی خۆیان ناپاكی هاوسەرییە، شارەزایانی بواری كۆمەڵایەتی‌و دەروونی دەڵێن: خیانەت تەنها بە مانای پەیوەندی جنسی لەگەڵ ڕەگەزی بەرامبەردا نییە.
سێ منداڵم قوربانین
عومەر (40) ساڵ، پیشەی كاسپە.  بە كوردستانی نوێی وت: ماوەیەك گومانم لە ژنەكەم هەبوو، بەڵام تا ئەو كاتەی پێیانوتم كاتێك دەچیتە دەرەوە بۆ ئیش سەیرێكی دوای خۆت بكە، گومانەكەم زیاتر بوو.
عومەر یەكێك لە منداڵەكانی خۆی ڕادەسپێرێت كە بزانێت  كێ دێت بۆ ماڵیان، كاتێك ئەم دەچێتە دەرەوە، لە بەرامبەردا عومەر جبس‌و  دۆندرمە‌و هەموو یارییەكی بۆ دەكڕێ‌و ڕۆژی دواتر منداڵەكەی ژمارەی  ئەو كەسانە بە باوكی دەڵێت كە ڕۆژانە دێتە ماڵیان، لێرەوە گومانەكەی عومەر دەبێتە یەقین و چەند ڕۆژێك دواتر  خزم ‌و كەس ‌و كارەكەی كۆدەكاتەوە و مەجلیس دەگرن. ژنە دەمی دەبێتە تەڵەی تەقیو، ناتوانێت هیچ بەرگرییەك لە خۆی بكات، بەڵام لە تۆڵەی ئەو ئاشكرابوونەدا ناوی هەموو ئەو خزمانەی مێردەكەی عومەر دێنێت كە پەیوەندی لەگەڵیدا هەبوو. 
عومەر وتی: وەڵایی لە هیچ شتێكمان كەم نەبوو، نازانم بۆچی ئەمەی كرد!
بۆچی ژنەكەی ناپاكی كرد؟
لە بەرامبەردا ڕۆزەی هاوسەری گلەیی لە مێردەكەی ئەوەبوو كە نایباتە پارك و شوێنی بازاڕكردن‌و لە رقی مێردەكەی پەنای بۆ خیانەت بردووە. وتی: مێردەكەم كەمتەرخەم بووە‌و هەستم بە كەمیكردووە لە چاو دش و هێوەرەكانم.
سوڵح!!
مەجلیس بڕیاریدا منداڵەكان بدەنەوە بە عومەر و بڕێك پارەیش بدەن بە ڕۆزە و لەسەر ڕەزامەندی هەردوولا دادگا بڕیاری جیابوونەوەیان بدات...
پیاوان زۆرتر ناپاكی دەكەن..
بە پێی ئامارە جیهانیەكان پیاوان زیاتر لە مەسەلەی خیانەتی هاوسەرییەوە تێوە گلاون...
ژنان دەڵێن: ناپاكی دەردەسەری‌و ماڵوێرانی بە دواوەیە‌و ئێستاش زۆر بووە.  
خۆزگەم بە قاپی ئایسكریم
ژینۆ عەبدوڵڵا لە سەنتەری ڕاهێنانەوەی منداڵی لێكترازاو بە كوردستانی نوێی وت: زەمانی نەنكم شتێك نەبوو بە ناوی خیانەت، بەڵام ئێستا مۆبایل ‌و تەكنەلۆجیا بوونەتە نەخۆشی‌و خێزان لە بنەوە هەڵدەتەكێنن. خۆزگە وەك سەردەمی منداڵی بە قاپی ئایسكریم قسەمان لەگەڵ یەك بكردایە. وتی: ئەو منداڵانە بەشێكیان بەرهەمی خیانەتن، كە ئێستا باری دەروونیان تەواو نییە‌و ئەها سەیر ئەم منداڵانە ئەڵێی جوجكی مەسڵەحەن.
شارەزایانی بواری دەروونیش دەڵێن: خیانەت پەتێكە سەرێكی بە بێوەفاییەوە بەستراوە‌و سەرەكەی تری بە خیانەتە جنسیەكان كۆتایی دێ.
ناچاركردن بە خیانەت
بەشێك لەو كچە تازە پێگەیشتوانەی لە سەردەمی كچێنیدا كەوتوونەتە داوی خۆشەویستەكانیانەوە. لە ڕێگەی ڤایبەر و ماسنجەر و مۆبایلەوە دەنگ و ڕەنگیان تۆمار كراوە، دوای ئەوەی بۆ خۆشەویستەكانیان نەبوون.  بەشێك لە كوڕان ئەم دەنگانە وەك داو بەكاردێنن بۆ ناچاركردنی كچان تا تەسلیمیان بن، هەر دوای شووكردنی كچەكە بە چەند مانگێك ئەو كوڕەی دەنگی كچەكەی لایە. پەیوەندی پێوە دەكات‌و ئەو دەنگە وەك كارتی فشار بەكاردێنێت ‌و هەڕەشەی بڵاوبوونەوەی دەنگەكە دەكات ئەگەر خۆی تەسلیمی نەكات. 
لە ئێستادا پێنج حاڵەتی لەو شێوەیە لە سەنتەرێكی  خێزانی تۆمار كراوە ‌و بەرپرسانی  سەنتەرەكە پەیوەندییان بە كەسەكانەوە كردووە تا هاوكاری ئەو ژنە تازە شووكردوانە بكەن‌و دەنگەكان وەرگرنەوە لە بەرامبەر بڕێك پارە... بەڵام دوان لەو كچانە بە وتەی خۆیان بۆ ئەوەی دەنگەكانیان بڵاونەكەنەوە‌و ژیانیان تێكنەچێت  بە ناچاری ملكەچ كراون بۆ خیانەتی هاوسەری.
خیانەتی هاوسەری بریتییە لە دروستكردنی پەیوەندیی ژن‌و مێردی هاوسەردار لەگەڵ كەسێك لە دەرەوەی چوارچێوەی خێزان، جا ئەو پەیوەندیە سۆزداری بێت، یان پەیوەندی جنسی. شارەزیان دەڵێن خیانەت جۆری هەیە.
عومەر محەمەد، توێژەری دەروونی بە كوردستانی نوێی وت: خیانەتی هاوسەری «موشتەققات»ی هەیە‌و تەنیا پەیوەندی سەرجێی نییە لەگەڵ كەسێك لە دەرەوەی چوارچێوەی خێزان وەك ئەو وتی: خیانەتی سۆزداری لە نێو هەندێك لە خێزانەكان بڵاوە.
ئەمجۆرە خیانەتە بریتییە لەوەی یەكێك لە هاوسەرەكان پەیوەندی لەگەڵ كەسێك لە دەرەوەی خێزان دەبەستێت‌و كەسێكی نەناسراوە ئەو كەسە دەبێتە سەرچاوەی ڕاز و نیازی، ئەمجۆرە زیاتر لە شوێنی كار و پەیوەندییە تەلەفونیەكاندا هەیە.
بە بڕوای ئەو خیانەتی جنسی لە جۆرە قورسەكەیەتی‌و بە واتای هەبوونی پەیوەندی جنسی ژن، یان پیاوی هاوسەردار لەگەڵ كەسێك لەڕەگەزی بەرامبەر دێ. ئەم خیانەتە لەهەمو كولتوورەكاندا بە ناپەسەند دانراوە.
ئەو توێژەرە زیاتر وتی: بە داخەوە بەهۆی زۆربونی بەكارهێنانی تەكنەلۆژیاو پەخشكردنی ئەو فیلم‌و زنجیرانەی كە  باس لەبوونی پەیوەندی لەگەڵ ڕەگەزی بەرامبەردا دەكەن جۆرێك لە ناپاكی بە شتێكی  ئاسایی سەیر دەكرێت.
بەو هۆیەوە ڕێژەی خیانەتەكانی نێوان هاوسەران بەتایبەت لەلای ژنان وەك لە جاران زۆر بەرز بۆتەوە.
لە كۆتاییدا وتی: ئەو گۆڕانە خێرایەی لەژیانی كۆمەڵایەتیدا هەیە هۆكار بووە بۆ ئەنجامدانی خیانەتی هاوسەری.. لە بەرمبەردا هەندێك لە ژنان بە خەیاڵیشیاندت نەهاتووە بیر لە ناپاكی بكەنەوە.
سەمیرە (33) ساڵ، ژنی ماڵەوە بە كوردستانی نوێی وت: هەرگیز بە خەیاڵیش بیرم  لێنەكردۆتەوە، ئەگەر هەزار كێشەیشمان هەبێت. بە بڕوای سەمیرە هۆكاری زۆربوونی ناپاكی  لە دین دووركەوتنەوەیە. وتی: ژن ترسنۆكە دین زۆر كاریگەری هەیە بۆ ئەوەی بترسێت ‌و ناپاكی نەكات، بەڵام ئەم پێشكەوتنە بووە هۆی ئەوەی كە نەترسێ‌و گوێ بە ئەخلاق نەدات.
بەشێكی تر لە شارەزایان پێیانوایە كە تێرنەبوونی حەزی جنسی ژنان هۆكارە ‌و ژنانیش ناتوانن وەك پێویست بە دەم پیاوەكانیانەوە بچن. هەندێك لە ژنان شەكوای حاڵی خۆیان لە دەست كەمتەرخەمی مێردەكانیان كردووە.
وەك لە بەسەرهاتەكەی ڕۆزادا ئاماژەی پێدراوە
زۆربەی پیاوان مافی ژنەكان لە رووی سەرجێیەوە نادەن ‌و لێیان ناپرسنەوە. وەك دەڵێن دوای چەند ساڵێك لە ژن‌و مێردایەتی دەبنە خوشك برا. ئێ ژن مێردی دەوێ لە ئامێزی بگرێ، كاتێك ئەو مێردە بەو ئەركە هەڵناستێ  رەنگە بیر لەخیانەت بكاتەوە.
تۆڵەسەندنەوەیە
بەشێك لەو كەیسانەی لە سەنتەرە خێزانیەكان هەن لە دانپیانانەكانیان باسیان لە هۆكاری خیانەتەكە كردووە و دەڵێن وەك تۆڵە سەندنەوەیەك لە مێردەكانیان خیانەتیان كردووە، چونكە ناتوانن لێیان جیابنەوە، یان بەدڵی خۆیان شوویان نەكردووە‌و بێزارن. 
ئارینا (19) ساڵ یەكێكە لەو ژنانە بە كوردستانی نوێی وت: بە قەناعەتی تەواوە خیانەت دەكەم و مێردەكەم ناوێ و بە زۆر منیان پێداوە.
بژێویی ژیانیش هۆكارە
وەك ژنان دەڵێن هۆكاری ئابووریش بەدەر نییە. زۆر لە ژنان بەهۆی بژێوی ژیانیانەوە پەنایان بۆ خیانەت و بردووە ‌و هاوسەرەكانیشیان ئاگادارن، بەڵام چونكە سەرچاوەی داهاتیان نییە، گوێی خۆیان لێ خەواندووە.
بە پێی توێژینەوەكان زۆربەی ئەو كەسانەی ناپاكیان كردووە نەگەیشتوونەتە قۆناغی پەیوەندی جنسی كۆتایی، تەنیا سۆزدارییانكردووە.
بەڵام لە كۆتاییدا بە هەر شێوە و هۆكارێك بێت خیانەت كارێكی بێزراو و ناپەسەندەو هیچ ژنێك بەهیچ بەڵگەیەك نابێت دامێنی پاكی خۆی بكاتە جۆلانەی كەسانی تر
ڕێنمایی توێژەری كۆمەڵایەتی
لە گرنگترین ڕێنماییەكان:
1ـ دروستكردتی خێزان لەسەر بنەمای هاوسەنگی ڕۆشنبیری‌و تەمەن‌و ئاینی.
2ـ گرنگیدان بە ژەمە خواردنەكان ئامادەبوون لە سەر سفرەی خواردن بە شێوەیەك  21 ژەمی هەفتەیەك لە 15 جار كەمتر نەبێت.
3ـ گرنگیدان بە یەكتری، هەم ژن گرنگی بە پیاو بدات و هەست‌و  پێداویستیە فسیۆلۆجیەكانی دابین بكات‌و قێز و بێزی لێنەكاتەوە. هەم پیاویش باوەشی گەرم بۆ ژنەكەی بكاتەوە‌و گرنگیپێدات.
4ـ لە كاتی هاتنی پەیوەندی تەلەفونی كاتێك پێكەوەن كەستان  نەچێتە دەرەوە بۆ وەڵامدانەوەی پەیوەندییەكە. ژنیش كە ژمارەیەكی هەڵەی بۆ هات باشتر وایە ئەگەر ژمارەكەی نەناسی هەڵینەگرێت. هەموو مۆبایلێك سیستەمی ترو كەڵەری تیایە و دەتوانێ لە ژمارەكە دڵنیابێتەوە جاهەڵیبگرێت، یان بۆی بكاتەوە. 
5ـ بە هەر هۆیەكەوە بێت ئەگەر ژن‌ومێرد قسەیان لەیەك دابڕا باشتر وایە پیاو دەستپێشخەری بكات و ژنەكەی ئاشت بكاتەوەو سارد ساڕی نێوانیان نەهێڵێت.

سەرنج: ناوی یەكەمی بەسەرهاتەكە خوازراوە


ناو:  
ئیمه‌یل:    
سه‌رنج:  

#7397
23/10/2017
ئه‌رشیف
وه‌رزش
‌ بێڵد چاره‌سه‌ره‌ ئه‌فسوناوییه‌كه‌ی‌ یۆب هاینكس ئاشكرا ده‌كات 23/10/2017
‌ كۆنتا كۆتایی به‌ وه‌رزی یاریكردنی ده‌هێنێت 23/10/2017
زانست
‌ سوودی پشوویەكی كورت لە كاتی كاردا 23/10/2017
‌ تایبەتمەندییەكانی نۆكیا 8 23/10/2017
‌ دانانی بۆیلەری ژێر حەمام گونجاوە؟ 23/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP