كه‌مالی حاجی ئاغا، یه‌كه‌م فه‌رمانده‌ی باڵای شه‌هـید له‌ شه‌ڕی دژی داعشدا
‌سێیه‌م ساڵیادی پیاوه‌ به‌ژن زراڤـه‌كه‌ی كوردایه‌تی و باڵه‌كایه‌تی كه‌مالی حاجی ئاغا، یه‌كه‌م فه‌رمانده‌ی باڵای شه‌هـید له‌ شه‌ڕی دژی داعشدا ‌ ئاوات كۆكه‌یی‌ 24/8/2017
گله‌یی و گازانده‌ی جه‌ماوه‌رو ئه‌ندامانی ی.ن.ك له‌ كاتی شێنه‌یی و دۆخی ئارامدا، بۆ كه‌سانی نه‌شاره‌زاو نا ئاشنا به‌ واقیعی یه‌كێتی، خوێندنه‌وه‌ی نه‌رێنی بۆ ده‌كرێت. راستییه‌كه‌ی به‌ ته‌نیا وه‌رگرتنی ورده‌ بۆڵه‌ی ئه‌ندامان و ره‌خنه‌كان به‌بێ ره‌چاوكردنی ئه‌و پانتاییه‌ ئازادییه‌ی كه‌ یه‌كێتی فه‌راهه‌می كردووه‌و له‌ درووشمه‌وه‌ كردوویه‌تی به‌كردار، هه‌ڵه‌یه‌.
چونكه‌ كاتێك كه‌ حزب پێویستی  به‌ ئه‌ندامان و جه‌ماوه‌رەکەی ده‌بێت، ئه‌وا ره‌خه‌نه‌و بۆڵه‌بۆڵه‌كان ده‌پێچرێنه‌وه‌و هه‌مووان ده‌چنه‌وه‌ دۆخی ئاماده‌باشی و چاوه‌ڕێی فه‌رمان و بڕیارن.
ئیدی ئه‌مه‌ سروشتی یه‌كێتی و هێزو جه‌ماوه‌ره‌كه‌یه‌تی كه‌ كاتێك دنیا كشوماته‌و نه‌حزب و نه‌ وڵاتمان له‌ مه‌ترسیدا نییه‌، قسه‌ ده‌كه‌ن و له‌هیچ نا پرینگێینه‌وه‌، به‌ڵام كه‌ نیشتمان ده‌كه‌وێته‌ به‌ر مه‌ترسی و ئه‌زموونی به‌خوێن ره‌خساوی كوردستان رووبه‌ڕووی هه‌ڕه‌شه‌ جۆربه‌جۆره‌كان ده‌بێته‌وه‌، هه‌موو ده‌بنه‌وه‌ به‌ پێشمه‌رگه‌كه‌ی حوزه‌یران و ... ئینجا له‌هیچ زه‌حمه‌تێك و ته‌نانه‌ت له‌ گیان به‌خشینیش ناپرینگێنه‌وه‌.
شه‌ڕی سه‌پاو و هه‌ڵتۆقیوی داعش، هه‌موو ئه‌وانه‌ی پێشتریش، راستی ئه‌و قسه‌یه‌ ده‌سه‌لمێنن، ئه‌وه‌تا له‌شه‌ڕی دژ به‌ تیرۆیستانی داعش هێزه‌كه‌ی یه‌كێتیی نیشتمانیی كوردستان كه‌ دواجار هێزی كوردایه‌تی و كوردستانییه‌، پۆل پۆل له‌ پێشمه‌رگه‌و ئه‌فسه‌رو فه‌رمانده‌ باڵاكان خۆیان به‌شه‌هید كردندا و به‌ خوێنی خۆیان زۆرترین ژماره‌ی شه‌هیدیان بۆ كوردو یه‌كێتی له‌و شه‌ڕه‌ نه‌گریسه‌دا تۆماركرد.
پێشمه‌رگه‌ و فه‌رمانده‌باڵا شه‌هیدو بریندارو كه‌مئه‌ندامه‌كانی یه‌كێتی، سه‌ركه‌وتنه‌كانی ئه‌وان له‌م شه‌ڕه‌دا، جارێكی تر سه‌لماندنی ئه‌وهه‌قیقه‌ته‌یه‌ كه‌ یه‌كێتی باسكی به‌هێزی پاراستنی گه‌ل و وڵاته‌.

تازه‌كردنه‌وه‌ی نه‌ریتی شۆڕشگێڕانه‌
شه‌هیدی فه‌رمانده‌ لیوا كه‌مال حاجی ئاغا، نموونه‌یه‌كی زیندوو و تازه‌یه‌ له‌ گیانبه‌ختكردنی فه‌رمانده‌باڵاو سه‌ركرده‌كانی ی.ن.ك، خوێنی ئه‌و، ئه‌بده‌یتكردنه‌وه‌ی ئه‌و رۆحه‌ گیانبازییه‌ی یه‌كێتی بوو كه‌ هه‌ر له‌سه‌ره‌تای شۆڕشی نوێوه‌ تا قۆناغه‌كانی دواترو ئێستاش، هه‌بووه‌و ده‌شبێت.
شه‌هید لیوا كه‌مال، كه‌ ئه‌مڕۆ یادی سێ ساڵه‌ی شه‌هیدبوونه‌كه‌ی ده‌كه‌ینه‌وه‌، یه‌كه‌م (فه‌رمانده‌ی باڵا)ی پێشمه‌رگه‌یه‌ كه‌  له‌ شه‌ڕی دژ به‌تیرۆیستانی داعشدا شه‌هید بووه‌،  ئه‌گه‌رچی ئه‌و پیاوه‌ هه‌ر له‌ سه‌ره‌تای سه‌رهه‌ڵدانی ئه‌و شه‌ڕه‌ شه‌هیدكراو نه‌گه‌یشته‌ ئه‌وه‌ی تۆماری سه‌ركه‌وتن و سه‌روه‌رییه‌كانی به‌ره‌و هه‌ڵكشانی زیاتر به‌رێت، به‌ڵام ئه‌و ماوه‌كه‌مه‌ی ژیانی له‌و شه‌ڕه‌دا، پڕه‌ له‌سه‌روه‌ری و شانازیی به‌رگریی كوردستانیانه‌، شه‌هیدبوونه‌كه‌شی لوتكه‌ی راستگۆیی و خۆ به‌قوربانیكردن و گه‌وره‌یی ئه‌و پیاوه‌مان بۆ ده‌رده‌خات.
شه‌هید لیوا كه‌مال پیاوێك بوو نمونه‌ی ئازایه‌تی و نمونه‌ی وره‌و گوڕو تین بوو بۆ هێزه‌كه‌ی خۆی و بۆ باقی هێزی پێشمه‌رگه‌، ئه‌و پیاوه‌ نه‌ریتی شۆڕشگێڕانه‌ی شه‌هیدبوونی سه‌ركرده‌و فه‌رمانده‌ باڵاكانی تازه‌ كرده‌وه‌و دوای ئه‌ویش چه‌ندین فه‌رمانده‌ی باڵاو پله‌داری كاریگه‌ر خۆیان كرده‌ قوربانی خاك و تاجی پڕ شانازیی شه‌هیدبوونیان له‌سه‌ر نا.

تۆماری جوامێری
شه‌هیدی فه‌رمانده‌ لیوا كه‌مال حاجی خزر ناسراو به‌ كه‌مالی حاجی ئاغا، ساڵی ١٩٥٦ له‌گوندی (ئێنه‌)ی سه‌ر به‌قه‌زای چۆمان، له‌ بنه‌ماڵه‌یه‌كی خانه‌دان‌و كوردپه‌روه‌ر له‌ بناری كۆدۆ و حه‌ساری سه‌كران و باڵه‌كایه‌تی له‌دایكبووه‌، له‌ رێگه‌ی حاجی ئاغای ئێنێ-ی باوكییه‌وه‌ به‌ بیروباوه‌ڕی كوردایه‌تی و فیداكاری و خۆشه‌ویستی بۆ خاك و نیشتمان ئاشنابووه‌، هه‌ر بۆیه‌ له‌هه‌ڕه‌تی لاوێتیدا، جیاواز له‌ هه‌مووان شه‌هید كه‌مال بوو به‌ جێگای سه‌رنج و ئومێدی هه‌مووان.
بنه‌ماڵه‌ی شه‌هید كه‌مالی فه‌رمانده‌ له‌ رووی خه‌بات و به‌شدارییان له‌ بزووتنه‌وه‌ی رزگاریخوازی گه‌لی كوردستاندا، له‌ ریزی پێشه‌وه‌ی بنه‌ماڵه‌ تێكۆشه‌ره‌كانه‌ و رۆڵ و پێگه‌یان له‌و رووه‌وه‌ ئاشكراو به‌رچاوه‌، تێكۆشانی ئه‌وان به‌هه‌موولایه‌ك ئاشناو ئاشكرایه‌وه‌و خاوه‌نی چه‌ندین شه‌هیدو قوربانین، هه‌ربۆیه‌ش به‌ر له‌خۆیان، بۆ یه‌كێتی و بۆ هه‌موو خه‌ڵكی كوردستان جێگه‌ی شانازین.  
شه‌هید كه‌مالی حاجی ئاغا گه‌نجێكی هه‌ڵكه‌وتوو، تێكۆشه‌رێكی ئازاو بوێر، خه‌باتی له‌ پێناوی ئازادی ئه‌م وڵاته‌دا كردووه‌، هاوكار و هاوبه‌ش بووه‌ له‌ به‌دیهێنانی ئازادی ئه‌مڕۆی كوردستاندا
شه‌هید كه‌مال ساڵی ١٩٧٦ له‌ سه‌ره‌تای شۆڕشی نوێ و له‌ دروستكردنی مه‌فره‌زه‌ سه‌ره‌تاییه‌كاندا، بۆته‌ ئه‌ندام و خه‌مخۆری رێكخستن، هه‌ر ئه‌وساڵه‌ به‌نهێنی له‌گه‌ڵ جه‌باری برایدا، له‌ گوندی ئێنه‌وه‌ ده‌چێته‌ بناری قه‌ندیل‌و به‌شداری كۆبوونه‌وه‌یه‌كی مه‌فره‌زه‌ سه‌ره‌تاییه‌كانی شۆڕشی نوێ‌ ده‌كات، هه‌ر به‌ نهێنیش ده‌گه‌ڕێته‌وه‌ گونده‌كه‌ی خۆیان، له‌و كۆبوونه‌وه‌یه‌دا، زیاتر به‌ بیرو فه‌لسه‌فه‌ی هه‌ڵگیرسانی شۆڕشی نوێ‌ ئاشنا ده‌بێت.
ئیدی لێره‌وه‌ كه‌مالی حاجی ئاغا ده‌بێته‌ ئه‌ندامێكی چالاكی رێكخستنه‌كان و كاره‌ گه‌وره‌و زه‌حمه‌ته‌كانی خه‌باتی نهێنی ئه‌نجام ده‌دات، هاوكارو هاوده‌ستێكی گرنگی پێشمه‌رگه‌ی مه‌فره‌زه‌ سه‌ره‌تاییه‌كانی شۆڕشی نوێی گه‌لی كوردستان بوو، هه‌ندێكجاران له‌سه‌روو توانای خۆشییه‌وه‌ كاروباره‌كانی رێكخستنی له‌ ئه‌ستۆ ده‌گرت و به‌بێ كه‌موكوڕیش ئه‌نجامی ده‌دا، ئه‌و پیاوه‌ وه‌ك ده‌روازه‌ی هیوای رزگاریی له‌شۆڕشی نوێ و یه‌كێتیی نیشتمانیی كوردستانی ده‌ڕوانی، ئیدی بۆیه‌ هیچ كاتێك گوێی به‌ مه‌ترسییه‌كانی ئاشكرابوون و ماڵوێرانی و ته‌نانه‌ت گرتن و سێداره‌ش نه‌ده‌كرده‌وه‌، لای ئه‌و ته‌نیا و ته‌نیا سه‌ركه‌وتن و سه‌رگرتنی شۆڕشه‌ نوێیه‌كی حوزه‌یران گرنگ بوو.
دوای ئه‌نجامدانی چه‌ندین كاری گرنگ و مه‌ترسیداری رێكخستن، بڕیاری به‌شداریكردن له‌ شۆڕشی چه‌كداری ده‌دات، بۆیه‌ له‌ ساڵی ١٩٧٨ په‌یوه‌ندی به‌هێزی پێشمه‌رگه‌ی كوردستانه‌وه‌ ده‌كات، چه‌كی شه‌ره‌ف هه‌ڵده‌گرێت و ده‌بێته‌ پێشمه‌رگه‌یه‌كی ئازاو ناسراوی شۆڕشی نوێ، پێشمه‌رگه‌یه‌كی خاوه‌ن بیروباوه‌ڕی كوردانه‌و شۆڕشگێڕانه‌ی خۆڕاگرو وره‌ پۆڵایین، له‌ ده‌رئه‌نجامی كاره‌وچالاكییه‌كانیشیدا، نیشانه‌ی فه‌رمانده‌ییكردن له‌و پیاوه‌ كه‌ڵه‌گه‌ته‌دا ده‌رده‌كه‌وێت و فه‌رمانده‌كانی سه‌رووخۆی به‌زوویی هه‌ستبه‌وه‌ ده‌كه‌ن كه‌ ئه‌م پیاوه‌ توانای ئه‌نجامدانی ئه‌رکی گرانترو فراوانتری هه‌یه‌، هه‌ر بۆیه‌، ئازایه‌تییه‌كه‌ی، جوامێرییه‌كه‌ی، خۆڕاگری و بیروباوه‌ڕه‌كه‌ی و هه‌موو خه‌سڵه‌ته‌جوانه‌كانی، واده‌كات له‌ ١٩٨١ ببێته‌ فه‌رمانده‌و فه‌رمانده‌ییكردنی كه‌رتی ٢ی تیپی ٧٤ی باڵه‌كی پێده‌سپێرن.
لێهاتوویی و جه‌ربه‌زه‌یی و زۆری  چالاكییه‌كانی شه‌هید كه‌مال، رژێمی به‌عس ته‌نگه‌تاو ده‌كات و ناچاری ده‌كات  داوا له‌ مام حاجی ئاغای باوكی بكرێت كه‌مالی كوڕی والێبكات ده‌ستبه‌رداری پێشمه‌رگایه‌تی ببێت و بگه‌ڕێته‌وه‌، به‌ڵام حاجی ئاغای به‌هه‌ڵوێست، به‌و داوایه‌ی پیاوانی به‌عس ڕازی نابێت، نه‌ك هه‌ر رازیش نابێت، به‌ڵكو له‌ هه‌ڵوێستێكی جوامێرانه‌ی خۆی ئاسادا، بڕیای بوون به‌پێشمه‌رگه‌ی به‌كۆمه‌ڵی بنه‌ماڵه‌كه‌ی ده‌دات، بۆیه‌ هه‌مان ساڵی ١٩٨١ خۆی و سه‌رجه‌م كوڕه‌كانی‌و بنه‌ماڵه‌ تێكۆشه‌ره‌كه‌یان تێكڕا به‌یه‌كه‌وه‌ په‌یوه‌ندی به‌ هێزی پێشمه‌رگه‌ی كوردستانه‌وه‌ ده‌كه‌ن، سه‌نگه‌ری شۆڕشی نوێی كوردایه‌تی و یه‌كێتیی نیشتمانیی كوردستان تۆكمه‌و توندتر ده‌كه‌ن. 
هه‌مان ساڵ له‌ تۆڵه‌ی ڕاگواستنی ناحیه‌ی گه‌ڵاڵه‌، كه‌رتی 5 ی گه‌ڵاڵه‌ زه‌برێكی كوشنده‌ له‌ ڕژێمی به‌عس ده‌ده‌ن، هه‌ر بۆ هه‌مان مه‌به‌ست ده‌سته‌یه‌كی تر له‌ پێشمه‌رگه‌كانی هه‌رێمی ٧ی باڵه‌ك به‌ سه‌رپه‌رشتی فه‌رمانده‌ ئازاو نه‌مره‌كان ( قادر خه‌بات، كه‌مالی حاجی ئاغا، برایمی حاجی كوێخا، ئه‌حمه‌د مه‌ولود، عه‌زیز داود)بۆسه‌یه‌كیان له‌ زینی ماویلیان بۆ قافڵه‌یه‌كی سه‌ربازی ڕژێمی به‌عس داناو تێكوپێكیان شكاند، ته‌واوی چه‌ك و كه‌ره‌سته‌كانیان به‌ده‌ستهێناو پێشمه‌رگه‌كانیش بێ زیان بوون.
ساڵی ١٩٨٥ ده‌بێته‌ جێگری فه‌رمانده‌ی تیپی ٧٤ی باڵه‌ك، له‌ ١٩٨٦ به‌هه‌مان پله‌ ده‌گوازرێته‌وه‌ بۆ تیپی ٩٩ی بیتوێن و هه‌ر له‌ ١٩٨٦ له‌ هیران‌و نازه‌نین داستانی 72 سه‌عاته‌ی قۆپی (داره‌به‌نی) تۆماركردووه‌، دیسان هه‌مانساڵ قاره‌مانانه‌ به‌شداریی داستانی قه‌یوان-ماوه‌تی كردووه‌.
دوای شه‌هیدبوونی برایم حاجی كوێخای فه‌رمانده‌ی تیپی ٧٤ی باڵه‌ك، له‌ سه‌ركردایه‌تییه‌وه‌ داوای لێكرا فه‌رمانده‌یی ئه‌و تیپه‌ بگرێته‌ ئه‌ستۆ، به‌ڵام له‌ خۆشه‌ویستیی بۆ شه‌هید برایم، ئه‌و داوایه‌ی ره‌تكرده‌وه‌.
ساڵی ١٩٨٧ وه‌ك سه‌رپه‌رشتیاری تیپی ١٢ی سۆران، به‌شداری داستانی به‌ناوبانگی رزگاریی كردووه‌، هه‌ر له‌وساڵه‌دا له‌گوندی (بله‌)ی دۆڵی (مه‌له‌كان) خۆی‌و بنه‌ماڵه‌ی كه‌وتنه‌ به‌ر هێرشی گازیی كیمیایی رژێمی به‌عس ، له‌ئه‌نجامدا  (هه‌ڵكه‌وت)ی برازای  شه‌هید ده‌بێت و ئه‌وانی تریش زۆر به‌ سه‌ختی بریندار ده‌بن،  دوای وه‌رگرتنی چاره‌سه‌ر له‌ وڵاتی ئێران، ده‌گه‌ڕێنه‌وه‌.
شه‌هید كه‌مال له‌ ساڵی ١٩٨٨دا ئه‌ركی گواستنه‌وه‌ی چه‌كی له‌ (قه‌ڵاتووكان)ه‌وه‌ بۆ (مه‌له‌كان) پێ ده‌سپێردرێت و به‌باشی ئه‌ركه‌كه‌ی ئه‌نجام ده‌دات، هه‌مانكات به‌شداریی كاریگه‌رانه‌ی شه‌ڕی (مۆته‌)ی كردووه‌.
 شه‌هیدی نه‌مر وه‌ك فه‌رمانده‌یه‌كی ئازاو شاره‌زاو به‌ ئه‌زموون، له‌ به‌رنامه‌و نه‌خشه‌و پلانی راپه‌ڕینی ١٩٩١و دواتریش له‌ ڕزگاركردنی شارو دێهاته‌كانی كوردستاندا به‌شداری كردووه‌. ئه‌گه‌رچی له‌كاتی ئازادكردنی شاری هه‌ولێر له‌ باره‌گای (مه‌نزومه‌) برینداركرا، به‌ڵام رازینه‌بوو به‌دانیشتن و  تا ئازادكردنی شاری كه‌ركوك به‌رده‌وام بوو.
ساڵی ١٩٩٢ ده‌كرێت به‌جێگری فه‌رمانده‌ی فه‌وجی سنوور له‌ده‌ڤه‌ری سیده‌كان. له‌كۆتایی ساڵی ١٩٩٣ له‌ شه‌ڕێكی نه‌خوازراودا له‌ دۆڵی شاورێ به‌سه‌ختی بریندار ده‌بێت، به‌گشتی چه‌ندینجار به‌سه‌ختی برینداربووه‌.
 ساڵی ١٩٩٧ له‌سه‌ر بڕیاری هه‌ڤاڵ مام جه‌لال كراوه‌ به‌ سه‌رله‌شكری باڵه‌ك، له‌ ١٩٩٩ ده‌بێته‌ فه‌رمانده‌ی فه‌رمانده‌یی (پارێزگاری) و له‌ ٢٠٠١یش كرایه‌ فه‌رمانده‌ی فه‌رمانده‌یی باڵه‌ك، ساڵی ٢٠٠٣ به‌شداریی كاریگه‌ری هه‌بووه‌ له‌ ڕووبه‌ڕووبوونه‌وه‌و ده‌ركردنی تیرۆریستانی (انصار الاسلام) له‌ هه‌ڵه‌بجه‌و ناوچه‌ی هه‌ورامان، ساڵی ٢٠٠٥یش كراوه‌ به‌فه‌رمانده‌ی لیوای بیتوێن.

خۆپه‌روه‌رده‌كردن به‌ چه‌كی زانست
شه‌هید ده‌رچووی خولی یه‌كی فه‌رمانده‌یی بوو له‌كۆلێژی سه‌ربازی قه‌ڵاچوالان‌، هه‌روه‌ها به‌شداریی چه‌ندین خولی ئه‌كادیمی‌و زانستیی سه‌ربازی كردووه‌، ئه‌ندامی هه‌ردوو كۆنگره‌ی  دووه‌م و سێیه‌می یه‌كێتیی نیشتمانیی كوردستان بووه‌، هه‌روه‌ها به‌شداریی سه‌رجه‌م كۆنفرانس‌و پلنیۆمه‌كانی كردووه‌.
دواپله‌ی (لیوا) و فه‌رمانده‌ی لیوای ١٢٢ی بیتوێن بوو.
هه‌ر له‌سه‌ره‌تای شه‌ڕی رووبه‌رووبوونه‌وه‌ی تیرۆیستانی داعشدا به‌شداری قاره‌مانه‌ی كردووه‌ و ببوه‌ مایه‌ی هێزو گوڕێكی زۆر بۆ هێزی پێشمه‌رگه‌و به‌رپه‌رچدانه‌وه‌ی تیرۆیستان.
به‌داخه‌وه‌، ئه‌م لیوا پڕزانست و زانیارییه‌ سه‌ربازییه‌ی هێزی پێشمه‌رگه‌ی كوردستان، ئه‌م پیاوه‌ تێكۆشه‌رو ئه‌م پێشمه‌رگه‌ خاوه‌ن چه‌ندین ساڵه‌ی خه‌باتی سه‌رده‌می شارو شاخ،  له‌ ڕۆژی هه‌ینی ٢٢/٨/٢٠١٤ له‌ پێناو پاراستنی خاكی كوردستان له‌ دژی چه‌ته‌كانی  داعش، له‌میحوه‌ری جه‌له‌ولا شه‌هیدكراو گه‌یشته‌ كاروانی هه‌میشه‌یی نه‌مرانه‌وه‌.
وانه‌ی شه‌هید بوونی لیوا كه‌مال، له‌ چیا سه‌ركه‌شه‌كانی باڵه‌كایه‌تیه‌وه‌ بۆ پێده‌شته‌كانی گه‌رمه‌سێرو گه‌رمیان، خۆی له‌ خۆیدا وانه‌ی سه‌روه‌ری وئازایه‌تی و جه‌نگاوه‌رێتییه‌، درێغی نه‌كردنه‌ له‌ قوربانیدان و خه‌باتكردن بۆ ئازادی ئه‌م وڵاته‌.
ماوه‌ته‌وه‌ بڵێین شه‌هیدی فه‌رمانده‌ لیوا كه‌مالی حاجی ئاغا له‌ ساڵی 1983دا ژیانی هاوسه‌ری له‌گه‌ڵ خاتوو (سه‌عدیه‌ مه‌لا ئه‌حمه‌د) پێكهێناوه‌ و به‌رهه‌می ئه‌و هاوسه‌رگیریه‌ش  كچێك‌و سێ‌ كوڕە به‌ ناوه‌كانی ( سیڤه‌ر، توانا، تۆڵه‌، دانا).


ناو:  
ئیمه‌یل:    
سه‌رنج:  

#7367
19/9/2017
ئه‌رشیف
وه‌رزش
‌ ئایا شه‌ڕی ئه‌ستێره‌كان له‌ پاریس سانجێرمان ده‌ستیپێكرد؟ 19/9/2017
‌ نه‌فرەتی خیتافی به‌رده‌وامه‌ 19/9/2017
زانست
‌ كاسینی شۆڕشێك له‌ زانیاری ده‌رباره‌ی زوحه‌ل 19/9/2017
‌ رۆبۆته‌كان ده‌بنه‌ جووتیار 19/9/2017
‌ لە هەر ١٠ كەسێك، یەكێكیان خواردنی پێویستی نییە 18/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP