دوای‌ تێكشكانی‌ داعش، عیراق پێویستی‌ به‌ ئه‌مریكایه‌
دوای‌ تێكشكانی‌ داعش، عیراق پێویستی‌ به‌ ئه‌مریكایه‌ ‌ 15/7/2017
د. خالد علێوی‌ ئه‌لعه‌رادی‌*
و: كورده‌وان محه‌مه‌د سه‌عید

دانوستان به‌غدا له‌گه‌ڵ ئه‌مریكا بۆ هه‌ر بابه‌تێك بێت، پێویسته‌ هه‌ڵه‌كانی‌ رابردوو دووباره‌ نه‌كاته‌وه‌، پێویستی‌ به‌ تێگه‌یشتنی‌ به‌رژه‌وه‌ندییه‌كانی‌ هه‌ردوولاش هه‌یه‌، چونكه‌ رێكه‌وتن‌و مامه‌ڵه‌ خراپه‌كان هه‌میشه‌ سه‌رچاوه‌ی‌ كێشه‌ن‌و به‌ره‌نجامه‌كانیشیان پێچه‌وانه‌ ده‌بنه‌وه‌‌و مه‌ترسیدارن. گۆڤاری‌ ئه‌تڵه‌نتیك به‌م دواییانه‌ راپۆرتێكی‌ به‌ ناونیشانی‌ (راپۆرتی‌ كۆمه‌ڵه‌ی‌ كار بۆ داهاتووی‌ عیراق) بڵاو كرده‌وه‌، كه‌ تیمێك له‌ لێكۆڵیاران سه‌رپه‌رشتی‌ ئاماده‌ كردنیان كردووه‌، له‌سه‌رو هه‌مووشیانه‌وه‌ رایان كرۆكه‌ر باڵیۆزی‌ پێشوو له‌ عیراق، هه‌روه‌ها زیاتر له‌ 60 پسپۆڕی‌ جیاجیا بۆ ماوه‌یه‌كی‌ زۆر كاریان تێدا كردووه‌‌و سه‌ردانی‌ مه‌یدانیشیان بۆ عیراق‌و ئه‌مریكا‌و ئه‌وروپاش كردووه‌‌و له‌گه‌ڵ به‌رپرسان كۆبوونه‌ته‌وه‌، ژماره‌یه‌كی‌ زۆر له‌ كه‌سایه‌تی‌ سیاسی‌‌و مه‌ده‌نی‌‌و رێكخراوی‌ ره‌سمی‌‌و چالاكوانانیان بینیوه‌ بۆ ئه‌وه‌ی‌ دۆسێیه‌كی‌ ته‌واو كراو بخه‌نه‌ به‌رده‌ستی‌ ئیداره‌كه‌ی‌ دۆناڵد تره‌مپ-ی‌ سه‌رۆكی‌ ئه‌مریكا، تا به‌رچاوی‌ روون بێت سه‌باره‌ت به‌ عیراق‌و به‌رژه‌وه‌ندییه‌كانی‌ وڵاته‌كه‌ی‌ له‌ عیراقدا.

ئاماژه‌ باشه‌كانی‌ ناو راپۆرته‌كه‌
راپۆرته‌كه‌ زۆرێك له‌ ئاماژه‌ی‌ باشی‌ تێدایه‌ بۆ عیراق، هه‌ر به‌وه‌ش ده‌ست پێ ده‌كات كه‌ ئامانجی‌ ئه‌مریكا خوازیاره‌ عیراق سه‌ربه‌خۆ‌و سه‌قامگیر‌و گه‌شه‌كردوو بێت، له‌ ناو سنووری‌ خۆیدا‌و له‌گه‌ڵ دراوسێكانیشیدا به‌ ئاشتی‌ بژی‌، ره‌نگدانه‌وه‌ی‌ ده‌سه‌ڵاتێكی‌ ره‌وا‌و كارا بێت، په‌یوه‌ندی‌‌و هاوكاری‌ له‌گه‌ڵ ئه‌مریكادا له‌ خۆرهه‌ڵاتی‌ ناوه‌ڕاست پته‌و بێت. هه‌ر ئه‌و ئاماژه‌یه‌ ئه‌وه‌ش له‌ خۆ ده‌گرێ كه‌ بنیاتنانی‌ حكومه‌تێكی‌ عیراقی‌ پته‌‌و‌و چالاك بۆ كۆتایی هێنان به‌ شكستی‌ ده‌وڵه‌ت‌و به‌ده‌ست هێنانی‌ متمانه‌ی‌ گه‌لی‌ عیراق گرنگه‌، له‌گه‌ڵ رێگرتن له‌ ده‌ركه‌وتنه‌وه‌ی‌ توندڕه‌وی‌، هه‌روه‌ها سه‌قامگیریی عیراق گرێ دراوه‌ته‌وه‌ به‌ سه‌قامگیریی هه‌موو خۆرهه‌ڵاتی‌ ناوه‌ڕاست‌و جیهانیشه‌وه‌، نه‌كه‌ هه‌ر ئه‌وه‌ش بگره‌ هه‌ڵكه‌وته‌ی‌ جوگرافی‌ عیراق له‌ نێوان ئێران‌و سعودیه‌دا، له‌وانه‌یه‌ هه‌ر داڕمانێكی‌ ئه‌م وڵاته‌ ببێته‌ هۆی‌ هه‌ڵایسانی‌ جه‌نگێكی‌ راسته‌وخۆ له‌ نێوان ئه‌و دوو ده‌وڵه‌ته‌دا‌و ئه‌گه‌ر ئه‌وه‌ش روو بدات، ده‌ره‌نجامه‌كه‌ی‌ كاره‌ساتێكی‌ نادیاره‌.
له‌به‌ر ئه‌وه‌ ئاماده‌كارانی‌ راپۆرته‌كه‌ پێشنیاز ده‌كه‌ن هاوكاری‌ به‌غدا بكرێت له‌ جێبه‌جێ كردنی‌ به‌رنامه‌ چاكسازییه‌كه‌یدا، ئه‌ویش له‌ رێگه‌ی‌ گرتنه‌به‌ری‌ چه‌ندان میكانیزمه‌وه‌ بۆ دامه‌زراندنی‌ فه‌رمانڕه‌وایه‌كی‌ باش، پێشكه‌ش كردنی‌ خزمه‌تگوزارییه‌كی‌ باش، مسۆگه‌ر كردنی‌ سه‌روه‌ریی یاسا‌و كاری‌ روون‌و ئاشكرای‌ حكومه‌ت، ملكه‌چبوون بۆ لێپێچینه‌وه‌، به‌گژداچوونه‌وه‌ی‌ گه‌نده‌ڵی‌، پێشخستنی‌ كاری‌ دامه‌زراوه‌ ئه‌منی‌‌و سه‌ربازییه‌كان به‌ مه‌شق‌و پڕچه‌ك كردنیانه‌وه‌، به‌هێز كردنی‌ توانای‌ حكومه‌تی‌ فیدڕاڵ له‌ گواستنه‌وه‌ی‌ ده‌سه‌ڵاته‌كانی‌ بۆ حكومه‌ته‌ خۆجێییه‌كان، پێشكه‌ش كردنی‌ خشته‌ی‌ قه‌رزه‌كانی‌ كه‌ڵه‌كه‌ بووه‌كانی‌ سه‌ر عیراق به‌ قازانجی‌ هاوپه‌یمانه‌كانی‌ ئه‌مریكا له‌ كه‌نداو، باشتر كردنی‌ ژینگه‌ی‌ وه‌به‌رهێنان‌و پێشخستنی‌ سیسمی‌ باج. له‌سه‌رو هه‌موو ئه‌وانه‌شه‌وه‌ چاكسازی‌ له‌ دادوه‌ریدا بكرێت‌و به‌ كاری‌ روون‌و راشكاوانه‌ متمانه‌ بۆ خۆی‌ بگێڕێته‌وه‌، له‌گه‌ڵ پته‌وكردنی‌ پێكه‌وه‌ ژیانی‌ نیشتمانیی، ئه‌ویش له‌ رێگه‌ی‌ چه‌سپاندنی‌ ئارامی‌، ئاشته‌وایی، ئاوه‌دان كردنه‌وه‌ی‌ ئه‌و ناوچانه‌ی‌ له‌ ده‌ستی‌ داعش رزگار كراون، نێوبژیوانیی واشنتۆن بۆ چاره‌سه‌ری‌ كێشه‌كانی‌ نێوان به‌غدا‌و هه‌رێمی‌ كوردستان، له‌گه‌ڵ ئه‌وه‌شدا ده‌بێ ئه‌وه‌نده‌ی‌ له‌ توانادا بێت یارمه‌تی‌ لایه‌نه‌كان بدرێت بۆ پێكانی‌ ئامانجه‌كانیان.

هیچ شتێك بێ به‌رامبه‌ر نییه‌
به‌ پێی‌ ئه‌و راپۆرته‌ ئه‌و هانده‌رانه‌ی‌ ئه‌مریكا پێشكه‌شی‌ به‌غدای‌ ده‌كات، به‌ خۆڕایی‌و بێ به‌رامبه‌ر نییه‌، ئه‌وه‌ی‌ ئه‌م راپۆرته‌ له‌وانی‌ دیكه‌ جیا ده‌كاته‌وه‌، ئه‌وه‌یه‌ كه‌ راشكاوانه‌‌و راستگۆیانه‌ ئه‌و په‌یامانه‌ ئاشكرا ده‌كات كه‌ پێویسته‌ له‌لایه‌ن ئیداره‌كه‌ی‌ تره‌مپ-ه‌وه‌ ئاراسته‌ی‌ بڕیار به‌ده‌ستانی‌ عیراق بكرێت، ئه‌گه‌ر ویستی‌ كار به‌ پێشنیازه‌كانی‌ ئه‌م راپۆرته‌ بكات. 
له‌و په‌یامه‌ راشكاوانه‌ش، داوا له‌ عیراق ده‌كرێت رێگه‌ به‌ ئێران نه‌دات یاریزانی‌ سه‌ره‌كی‌ بێت له‌ عیراق له‌سه‌ر حسابی‌ به‌رژه‌وه‌ندییه‌كانی‌ ئه‌مریكا. ئه‌م په‌یامه‌ له‌ ئاماژه‌ یه‌ك له‌ دوای‌ یه‌كه‌كانیدا باس له‌ مه‌ترسی‌ هه‌ژموونی‌ ئێران ده‌كات له‌ عیراقدا، كه‌ له‌ به‌رژه‌وه‌ندی‌ ئه‌مریكا نییه‌، چونكه‌ ئێران عیراق به‌ هێڵی‌ یه‌كه‌می‌ به‌رگری‌ خۆی‌ ده‌زانێت‌و ئه‌و هه‌ژموونه‌ی‌ هه‌شیه‌تی‌ له‌سه‌ری‌ به‌كاری‌ ده‌هێنێت بۆ به‌ده‌ست هێنانی‌ چه‌ند ده‌ستكه‌وتێك له‌ ناوچه‌كه‌دا. راپۆرته‌كه‌ ئاماژه‌ بۆ ئه‌وه‌ ده‌كات كه‌ به‌رژه‌وه‌ندییه‌كانی‌ ئه‌مریكا له‌ خۆرهه‌ڵاتی‌ ناوه‌ڕاست به‌ هۆی‌ ئه‌و ناسه‌قامگیرییه‌ی‌ ئێران ناویه‌ته‌وه‌ ده‌كه‌وێته‌ مه‌ترسییه‌وه‌، هه‌ندێك جار راسته‌وخۆ ژیانی‌ ئه‌مریكاییه‌كان كه‌ له‌و ناوچه‌یه‌ن ده‌خاته‌ مه‌ترسییه‌وه‌. له‌به‌ر ئه‌وه‌ له‌ رێگه‌ی‌ هاوسه‌نگ كردنی‌ خواسته‌كانی‌ ئێران‌و سه‌قامگیربوونی‌ عیراقه‌وه‌ واشنتۆن باشتر له‌ توانایدا ده‌بێت كاریگه‌ری‌ له‌سه‌ر گۆڕانكارییه‌كانی‌ ناوچه‌كه‌ دروست بكات، ئه‌وه‌ش به‌ گرێبه‌ست‌و رێكه‌وتن له‌گه‌ڵ وڵاته‌ گرنگ‌و ستراتیژییه‌كان ده‌كات‌و وا ده‌كات ئه‌مریكا هاوبه‌شێكی‌ باشتر بێت بۆ عیراق وه‌ك له‌ ئێران، چونكه‌ گرنگی‌ به‌و ده‌ستكه‌وتانه‌ ده‌دات كه‌ ئه‌و هاوبه‌شییه‌ به‌دی‌ ده‌هێنێت‌و ئێران ناتوانێ پێشكه‌شی‌ عیراقی‌ بكات.
خاڵێكی‌ تر ئه‌وه‌یه‌ كه‌ ئه‌مریكا ئاماده‌ نییه‌ دوای‌ تێكشكانی‌ داعش عیراق جێ بهێڵێت، ئه‌م ئاماژه‌یه‌ش به‌ روونی‌ ده‌رده‌كه‌وێ كاتێك ئیداره‌ی‌ ئه‌مریكا داوا ده‌كات ستراتیژی‌ دیپلۆماسی‌ گشتی‌ به‌هێز بكات، بۆ ئه‌وه‌ی‌ بڕوا به‌ دانیشتوانی‌ عیراق بهێنێت، كه‌ ئه‌مریكا ئاماده‌یه‌ پشتیوانی‌ له‌ سه‌قامگیریی‌و گه‌شه‌كردنی‌ ئه‌و وڵاته‌ بكات، له‌ هه‌مان كاتدا بڕوا به‌ گه‌لی‌ ئه‌مریكاش بهێنێت كه‌ ئامانج له‌ هه‌وڵه‌كانی‌ ئه‌مریكا له‌ عیراقدا بنیاتنانی‌ نه‌ته‌وه‌كان نییه‌، به‌ڵكو هاوبه‌شی‌ كردنێكی‌ ستراتیژییه‌ بۆ پاراستنی‌ به‌رژه‌وه‌ندییه‌ ئه‌منییه‌كانی‌ ئه‌مریكا، هه‌ر له‌م خاڵه‌دا ئیداره‌ی‌ ئه‌مریكا داوا ده‌كات ئه‌و هاوپه‌یمانییه‌ نێوده‌وڵه‌تییه‌ی‌ دژی‌ داعش دروست كراوه‌، له‌ دوای‌ نه‌مانی‌ داعشیش هه‌ر به‌رده‌وام بێت‌و درێژه‌ی‌ پێ بدرێت، چونكه‌ واشنتۆن نایه‌وێ هه‌مان ئه‌زموونی‌ كشانه‌وه‌كه‌ی‌ 2011ی‌ له‌ عیراق دووباره‌ بكاته‌وه‌، له‌به‌ر ئه‌وه‌ی‌ له‌و باوه‌ڕه‌دایه‌ كشانه‌وه‌ی‌ وا ده‌كات به‌غدا‌و باشووری‌ عیراق له‌ده‌ست ده‌دات‌و بۆ ئێران‌و بریكاره‌كانی‌ ده‌بێت، ئه‌و كات باكوور‌و خۆرئاوای‌ عیراقیش له‌ده‌ست ده‌دات‌و بۆ رێكخراوی‌ داعش ده‌بێت، هه‌روه‌ها دووباره‌ كردنه‌وه‌ی‌ كشانه‌وه‌ هه‌مان ده‌ره‌نجامی‌ پێشووی‌ ده‌بێت سه‌باره‌ت به‌ به‌رژه‌وه‌ندییه‌كانی‌ ئاسایشی‌ نه‌ته‌وه‌یی ئه‌مریكا.
یه‌كێكی‌ تر له‌ په‌یام‌و ئاماژه‌كانی‌ ئه‌و راپۆرته‌ ئه‌وه‌یه‌ كه‌ ده‌یه‌وێ به‌ به‌غدا بڵێ ئه‌مریكا هه‌ست به‌ ئارامی‌ ناكات، چونكه‌ تێكشكاندنی‌ داعش له‌ رووی‌ سه‌ربازییه‌وه‌ كۆتایی هه‌ڕه‌شه‌كان نییه‌، به‌ڵكو له‌ هه‌ڕه‌شه‌ی‌ سه‌ر زه‌وییه‌وه‌ بۆ هه‌ڕه‌شه‌ی‌ ژێر زه‌وی‌، كه‌ ئامانجی‌ تێكدانی‌ ئاسایشی‌ وڵات ده‌بێت، هه‌ر بۆیه‌ له‌به‌رچاو نه‌گرتنی‌ به‌رژه‌وه‌ندییه‌كانی‌ ئه‌مریكا‌و ناچار كردنی‌ به‌ كشانه‌وه‌، مانای‌ گه‌ڕانه‌وه‌ی‌ هه‌ڕه‌شه‌كانه‌، ئه‌ویش له‌ رێگه‌ی‌ گێمێكی‌ تری‌ شه‌ڕی‌ ناوخۆوه‌، كه‌واته‌ تێكشكاندنی‌ داعش بۆ هه‌میشه‌ پێویستی‌ مانه‌وه‌‌و ئاماده‌بوونی‌ ئه‌مریكا هه‌یه‌ له‌ رووی‌ دیپلۆماسی‌‌و سه‌ربازیشه‌وه‌‌و له‌سه‌ر ئاستی‌ ئه‌و هاوكارییه‌ی‌ پێشكه‌شی‌ عیراقی‌ ده‌كات.
یه‌كێكی‌ تر له‌و ئاماژانه‌ ده‌ڵێ دابه‌شبوونی‌ عیراق به‌دوور نازانرێت، ئه‌م په‌یامه‌ له‌وه‌دا ده‌رده‌كه‌وێ كه‌ راپۆرته‌كه‌ هه‌ڵوێستێكی‌ روون‌و دیاریكراوی‌ نییه‌ به‌رامبه‌ر به‌ نیازی‌ جوداخوازانه‌ی‌ هه‌ندێكی‌ عیراقی‌، جگه‌ له‌وه‌ش راپۆرته‌كه‌ داوا له‌ واشنتۆن ده‌كات بێلایه‌ن بێت له‌و مه‌سه‌لانه‌دا‌و لێی‌ گه‌ڕێ تا لایه‌نه‌كان خۆیان ئامانجی‌ خۆیان ده‌ستنیشان بكه‌ن، ئه‌مه‌ش ئه‌و ئاماژه‌یه‌ له‌خۆ ده‌گرێت كه‌ ئه‌مریكا كارت‌و شێوازی‌ زۆری‌ هه‌یه‌ بۆ دروست كردنی‌ كاریگه‌ریی له‌سه‌ر عیراق‌و رێز گرتن له‌ به‌رژه‌وه‌ندییه‌كانیشی‌ جێی‌ مشتومڕ نییه‌.

مه‌رجه‌كانی‌ رێكه‌وتنی‌ سه‌ركه‌وتوو
هه‌رچه‌نده‌ ئه‌و راپۆرته‌ نوێنه‌رایه‌تی‌ لایه‌نێكی‌ ره‌سمی‌ ناكات، به‌ڵام ئه‌وه‌ ده‌ستنیشان ده‌كات كه‌ ئه‌مریكا چی‌ له‌ عیراق ده‌وێ‌و ئاماده‌یه‌ چی‌ بداتێ، یان چی‌ له‌ده‌ست دێ، به‌مه‌شدا وا ده‌رده‌كه‌وێ كه‌ ئه‌م ئیداره‌ تازه‌یه‌ی‌ ئه‌مریكا ئاماده‌یی زیاتری‌ تێدایه‌ تا دان به‌ گرنگی‌ عیراقدا بنێت له‌ رووی‌ جیۆپۆله‌تیكه‌وه‌، بوێریی زیاتریشی‌ تێدایه‌ بۆ جموڵی‌ جۆراوجۆر له‌ پێناو پاراستنی‌ به‌رژه‌وه‌ندییه‌كانی‌ له‌ هه‌ر مه‌ترسییه‌كی‌ هه‌رێمیی‌و نێوده‌وڵه‌تی‌، هه‌ژموون‌و كاریگه‌ریشی‌ له‌سه‌ر هاوپه‌یمانه‌ هه‌رێمییه‌كانی‌ روو له‌ هه‌ڵكشانه‌، به‌مه‌ش ده‌توانێ مه‌رجه‌كانی‌ خۆی‌ زیاتر بسه‌پێنێت، وه‌ك له‌ ئیداره‌كه‌ی‌ ئۆباما، هه‌روه‌ها تێكشكانی‌ داعش‌و گه‌ڕانه‌وه‌ی‌ سه‌روه‌ری‌ بۆ حكومه‌تی‌ عیراق‌و ره‌فتاری‌ ژیرانه‌ی‌ كه‌ وا ده‌كات زیاتر له‌ نێو كۆمه‌ڵی‌ نێوده‌وڵه‌تیدا جیی‌ بێته‌وه‌، هانده‌رن بۆ ئه‌وه‌ی‌ بڕیار به‌ده‌ستانی‌ عیراق به‌ره‌و گرێبه‌ست‌و رێكه‌وتنێكی‌ سه‌ركه‌وتوو له‌گه‌ڵ ئه‌مریكادا هه‌نگاو بنێن، به‌ڵام هه‌ندێك مه‌رج هه‌ن كه‌ عیراق ده‌یه‌وێ ئه‌مریكا پابه‌ند بێت پێیانه‌وه‌ به‌رامبه‌ر به‌ عیراق‌و ئه‌گه‌ر ئه‌و مه‌رجانه‌ نه‌بێت، هیچ گرێبه‌ست‌و رێكه‌وتنێك سه‌ركه‌وتوو نابێت‌و ناكرێ خۆی‌ له‌قه‌ره‌ بده‌ی‌، مه‌رجه‌كانیش بریتین له‌:
پێویسته‌ عیراق هاوبه‌شێكی‌ كارا بێت له‌ ئاماده‌ كردن‌و جێبه‌جێ كردنی‌ هه‌ر ستراتیژێكی‌ ئه‌مریكادا كه‌ تایبه‌ت بێت به‌ عیراق‌و ناوچه‌كه‌، چونكه‌ ناكرێ به‌رنامه‌ی‌ كار ته‌نها له‌لایه‌ن ئه‌مریكاوه‌ دابنرێت.
ده‌بێ ئه‌مریكا گره‌نتی‌ بدات، كه‌ به‌رژه‌وه‌ندییه‌ باڵاكانی‌ ده‌وڵه‌تی‌ عیراق مسۆگه‌ر بكات، له‌ پێش هه‌مووشیانه‌وه‌ پاراستنی‌ یه‌كێتیی‌و سه‌روه‌ریی‌و سه‌ربه‌خۆیی عیراق.
نابێ ئه‌مریكا هیچ رێكه‌وتنێك بكات له‌سه‌ر حسابی‌ سه‌ربه‌خۆیی عیراق له‌ ژینگه‌ هه‌رێمیی‌و نێوده‌وڵه‌تییه‌كه‌یدا، چونكه‌ عیراق هاوبه‌شی‌ ئه‌مریكایه‌‌و له‌ هه‌ڵوێسته‌ نێوده‌وڵه‌تییه‌كاندا سه‌ر به‌ ئه‌مریكا نییه‌.
پێویسته‌ ئه‌م په‌یوه‌ندییه‌ نوێیه‌ی‌ نێوان هه‌ردوو لا به‌كار بهێنرێت بۆ هێزی‌ ده‌وڵه‌تی‌ عیراق‌و پێشخستنی‌ ئابوورییه‌كه‌ی‌‌و بنیاتنانی‌ دامه‌زراوه‌ ده‌ستووری‌‌و ئه‌منییه‌كانی‌‌و هه‌روه‌ها بۆ به‌هێز كردنی‌ توانای‌ به‌رگری‌.
ده‌بێ واشنتۆن فشار بخاته‌ سه‌ر هاوپه‌یمانه‌كانی‌ خۆی‌ له‌ ناوچه‌كه‌دا بۆ پێداچوونه‌وه‌ به‌ هه‌ڵوێستیان به‌رامبه‌ر به‌ عیراق‌و گه‌له‌كه‌ی‌‌و رێگه‌شیان لێ بگرێت له‌ هه‌ر جۆره‌ ده‌ستێوه‌ردانێك له‌ كاروباری‌ ناوخۆی‌ عیراق، هه‌روه‌ها هان بدرێن بۆ هه‌نگاونانی‌ جددی‌ به‌ره‌و پته‌و كردنی‌ په‌یوه‌ندییه‌كانیان له‌گه‌ڵ عیراق‌و تێپه‌ڕاندنی‌ كێشه‌كانی‌ نێوان هه‌ردوولا.
نابێ بوونی‌ ئه‌مریكا له‌سه‌ر خاكی‌ عیراق، هیچ جۆره‌ سوكایه‌تییه‌كی‌ تێدا بێت بۆ ناسنامه‌‌و سه‌روه‌ریی هاووڵاتیانی‌ عیراق، له‌ هه‌مان كاتدا ده‌بێ هه‌ردوولا پلانیان هه‌بێت بۆ مامه‌ڵه‌ كردن له‌گه‌ڵ هه‌ر رووداوێكی‌ ناخۆش‌و نه‌ویستراو، به‌ شێوه‌یه‌ك كه‌ سه‌قامگیریی ده‌سه‌ڵاتی‌ عیراق مسۆگه‌ر بكات.
پێویسته‌ به‌غدا بكرێته‌ گۆڕه‌پانی‌ په‌یوه‌ندی‌‌و هێور كردنه‌وه‌ی‌ دۆخه‌كان له‌ نێوان لایه‌نه‌ هه‌رێمیی‌و نێوده‌وڵه‌تییه‌كاندا، نه‌ك گۆڕه‌پانی‌ سنگ ده‌رپه‌ڕاندن‌و یه‌كتر له‌ عه‌رزیدان.
ده‌بێ ئه‌و رێكه‌وتنه‌ چه‌ند به‌ندێكی‌ تێدا بێت، بۆ ئه‌وه‌ی‌ واشنتۆن‌و به‌غداش هه‌وڵ بده‌ن فشار بخه‌نه‌ سه‌ر لایه‌نه‌ هه‌رێمیی‌و نێوده‌وڵه‌تییه‌كان، تا بریكاره‌كانیان له‌ عیراق هێور بكه‌نه‌وه‌، ئه‌ویش له‌ پێناو پته‌و كردنی‌ سه‌ربه‌خۆیی عیراق‌و بارودۆخی‌ ئاسایشه‌كه‌ی‌.
نابێ كه‌سی‌ دانوستانكاری‌ عیراقی‌ وه‌ك كڕیارێك ده‌ربكه‌وێت، كه‌ هاتووه‌ خزمه‌تگوزارییه‌كانی‌ خۆی‌ ده‌دات به‌ واشنتۆن له‌سه‌ر حسابی‌ نه‌یاره‌كانی‌، به‌ڵكو ده‌بێ وه‌ك دانوستانكارێك ده‌ربكه‌وێت كه‌ هه‌وڵی‌ قازانج ده‌دات به‌و جۆره‌ی‌ كه‌ هه‌موو لایه‌ك سوودیان وه‌رگرتبێت.
*به‌رێوه‌به‌ری‌ سه‌نته‌ری‌ فورات بۆ گه‌شه‌پێدانی‌ توێژینه‌وه‌ی‌ ستراتیژی‌


ناو:  
ئیمه‌یل:    
سه‌رنج:  

#7367
19/9/2017
ئه‌رشیف
وه‌رزش
‌ ئایا شه‌ڕی ئه‌ستێره‌كان له‌ پاریس سانجێرمان ده‌ستیپێكرد؟ 19/9/2017
‌ نه‌فرەتی خیتافی به‌رده‌وامه‌ 19/9/2017
زانست
‌ كاسینی شۆڕشێك له‌ زانیاری ده‌رباره‌ی زوحه‌ل 19/9/2017
‌ رۆبۆته‌كان ده‌بنه‌ جووتیار 19/9/2017
‌ لە هەر ١٠ كەسێك، یەكێكیان خواردنی پێویستی نییە 18/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP