ئەمڕۆ ئەڵمانیـا بڕیار ده‌دات
ئەمڕۆ ئەڵمانیـا بڕیار ده‌دات ‌ 24/9/2017
ئامادەکردنی: بورهان ئەمین

ئەمڕۆ لەهەر شانزەهەرێمەکەی ئەڵمانیای فیدڕاڵ هەڵبژاردنی گشتی پەرلەمانی دەکرێ و دەیان پارت و قەوارەی سیاسی بۆ هێنانی زۆرترین کورسی لەکۆی ٦٣٠ کورسیدا ململانێی یەکتر دەکەن،هەر هەرێمەو بەپێی ڕێژەی دانیشتوانەکەی ژمارەیەک کورسی بۆتەرخانکراوەو هاوڵاتیان نوێنەرەکانیان دەستنیشان دەکەن، پرۆسەکە بەهێمنی و لەژێرچاودێریەکی توندی پۆلیس‌ودەزگا ئەمنیەکان بەڕێوە دەچێت، ئه‌وه‌ی جێگه‌ی سه‌رنجه‌ ئه‌مجاره‌ ئەڵمانەکان  لە خولەکانی پێشتر زیاتر بایەخی پێ دەدەن، ئەویش بەهۆی هەندێ دۆسیەی گەرماوگەرم کە پارتەکان کێبڕکێی لەسەردەکەن، لەوانە دۆسیەی کۆچەران‌و باری ناوخۆی ئەمنی وڵات و بژێوی ژیانی خەڵک.

ڕکابەرە سەرەکیەکان
لەنێو کاندیدەکانی پۆستی ڕاوێژکاری ئەڵمانیا شەش کاندیدی سەرەکی هەن کە ڕکابەری یەکتردەکەن، کێبڕکێیەکەش لەنێوان دوو کاندیدی سەرەکی « ئەنجێلا مێرکل»  و «مارتین شۆڵز» ە، بەپێی هەموو راپرسیەکان تائێستا مێرکل لەپێشەوەیەو بەخت یاوەریەتی،بەڵام ئەمڕۆ بەدەردەکەوێت کە کامیان دەبنە ڕاوێژکار،ئەوەی زۆرینە بێنێت ئەوا ڕادەسپێردرێت بۆ گفتوگۆکردن لەگەڵ لایەنەکانی دی بۆ پێکهێنانی ئیئتیلافی حکومی،لەم هەڵبژاردنە دەنگدەر بۆی هەیە دوو دەنگ بدات یەکیان بۆ نوێنەری هەرێمەکەی لەپەرلەمان و دووەمیش بۆ ئەو پارتەی کە دەیەوێت، هەر پارتێکیش پێیوستی بەهێنانی ڕێژەی ٥٪ یە تا لەپەرلەمان کورسی وەربگرێت.

جیاوازتر لەجاران
جیاوازی هەرەگرنگی ئەم خولە لەوەدایە کە بۆیەکەمین جارە لەمێژووی ئەو وڵاتەو لەدوای هەرەسی بیری نازیەت و توندڕەوی لەساڵی ١٩٤٥ ەوە سەرلەنوێ پارتێکی نازیپەرست بەناوی «پارتی جیگرەوە بۆئەڵمانیا» دروست بۆتەوەولەماوەی ئەو سێ ساڵەی دروستنبونیدا، لەژمارەیەک هەرێمی ئەڵمانیا کورسی پەرلەمانیان بەدەستهێناوەو لەنێو کۆمەڵگەی ئەڵمانیا جۆرێک ڕەواجیان پەیدا کردوە بە تایبەتیش لەدوای پرۆسەی وەرگرتنی زیاتر لەملیۆنێک کۆچەر لەلایەن کابینەکەی مێرکل و دروستبونی دەنگی ناڕەزایی لەدژی ئەم هەڵوێستەی حکومەت،ئەوپارتە دوژمنداری ئیسلام و خەڵکی بیانی وهەموو کۆچەران دەکاو ئەگەر لەدەستیان بێت میللەتە بێگانەکانی ناو کۆمەڵگەی ئەڵمانی تەفروتونادەکەن و شیرازەی تێک دەدەن،بۆیە هەندێ ناوەند لەوە دەترسن ئەگەر فراکسیۆنێک لەناو پەرلەمان پێک بێنن ئاژاوەبنێنەوەو وڵات بەرەو دۆخێکی خراپ ببەن.

تورکیاهیچ رۆڵی نابێت
جیاوازیەکی تری ئەو خولە لەگەڵ ئەوانەی پێش خۆی دروستبونی ئەو کیشەو ئاڵۆزیەیە کەلەنێوان ئەڵمانیاو دۆستەکۆنەکەی «تورکیا» لەئەنجامی ناکۆکی لە کۆمەڵێک دۆسیەدا دروست بوەو ڕەجەب تەیب ئەردۆغانی سەرۆکی تورکیا داوای لە ڕەوەندی خۆی لەو وڵاتەکردووە کە دەنگ بەو پارتە دەسەڵاتدارانەی ئێستا نەدەن و ئیدانەیان بکەن،لەبەرامبەریشدا مێرکل‌و حکومەتەکەی و زۆربەی پارتە سیاسیەکان  هەرچەندە پەیوەندی لەگەڵ تورکیا بەگرنگ دەزانن، بەڵام سەرکۆنەی هەڵوێستی سیاسەتمەدارانی ئەو وڵاتە دەکەن و داوایان لە تورکەکانی دانیشتوی ئەڵمانیا کردووە کە گوێ بە سەرۆکی وڵاتی زگماکی خۆیان نەدەن و سۆزو وەلایان بۆ ئەو وڵاتە هەبێت کە خزمەتیان دەکاو تیایدا نیشتەجێن و بەئارامی وسەربەرزی تیایدا دەژین، چاودێرانیش پێیان وایە کە ئەو ئامۆژگاری و رێنماییانەی ئەردۆغان هیچ کاریگەریەکی بەسەر ئەنجامی ئەو هەڵبژاردنەوە نابێت. 

بایەخی بۆ ئەوروپا
لەدوای چونە دەرەوەی بەریتانیا لەناو یەکێتی ئەوروپاو دروستبونی تەوژمی دژ بە مانەوەی ئەو یەکێتیەو دروستبونی مەترسی لەسەری، بەتایبەتیش لەدوای سەرهەڵدانی چەندین پارتی ڕاستڕەو لەسەرتاسەری وڵاتانی ئەندام لەناو یەکێتیەکەو پەیدابونی جموجۆڵەکانیان،پارتە پارێزگار و سۆسیالدیموکرات و چەپەکان توانیان بەرگەی ئەو تەوژمە بگرن و بەرگری لە مانەوەی ئەو یەکێتیە بکەن، ئێستاش ئەو بزوتنەوە دژانە هەرماون و هەرڕۆژێک بێنە سەر حوکم یەکێتی ئەوروپا تێکدەشکێنن و بەرنامەی خۆیان جێبەجێ دەکەن، بۆیە سەرکەوتنی ئەو پارتی لیبرال و پارێزگارانە لەپێناو پێکەوەژیان گەلانی ناو وڵاتانی یەکێتیەکەو تێکەڵاوی شارستانیەتەکان و پاراستنی بەها مرۆڤایەتیەکان گرنگن و ئەو پارتانەش لەکێبڕکیی یەکتردان و مانەوەی یەکێتی ئەوروپا یەکێکە لە دروشمەکانیان.
بۆ ئەمریکا
سیاسەتی «دۆناڵد ترامپ» سه‌رۆکی ئه‌مریکا  تائێستا لەدژی خواستەکانی ئەوروپاو ئامانجەکانیەتی، لەزۆر دۆسیەی جیهانیدا ناکۆکیان هەیە بەتایبەتیش لەبازرگانی جیهانی ومەسەلەی کۆچ و ژینگەو ئاوهەوا، مانەوەی مێرکل لەپۆستەکەیدا گەرەنتی بە‌هێزمانەوەی یەکێتیەکە دەردەخات لەبەرامبەر ئەو سیاسەتەی ئەمریکاو هەوڵەکانی بۆ پەرتەوازەکردنی هەڵوێستی وڵاتانی ناو ئەو یەکێتیە، وەک دیارە هەردوو پارتی سەرەکیش پارتەکەی مێرکل وسۆسیالدیموکراتەکان لەئاست ئەمریکاو کێشەکانیان هەڵوێستان یەکگرتوە. 

دروشمی سەربەخۆیی کوردستان
لەناو زیاتر لە ٣٠ پارتی سیاسیدا جۆرەها پارت لەژێر ناوو دروشمی جۆراجۆر هەیە یەکێک لەوانە پارتێکی شیوعیە بەناوی»پارتی مارکسی لینینی ئه‌ڵمانیا MLPD « و لەهەندێ لە دروشم و پۆستەرەکانیدا داوای ئازادی وسەربەخۆیی کوردستان دەکات و نوسیویانە» بەڵێ بۆ ئازادی وسەربەخۆیی کوردستان»ئەو پارتە، پارتێکی سیاسیی چه‌پ و مارکسییه‌، داوای سەربەخۆیی بۆ هەموو گەلەچەوساوەو ژێردەستەکانی جیهان و نەمانی ڕژێمە سەرمایەدارەکان دەکاو خەبات دەکات بۆ بەدیهێنانی ئاواتەکانی پرۆلیتاریا و خۆشکردنی ژیانیان، ئەو پارتە هەرچەندە بەژمارە کەمن و چەند هەزار ئەندامێکیان هەیەوبەختی وەرگرتنی کورسی پەرلەمانیان کەمە، بەڵام ئەو دروشمانە بۆ کورد بەتایبەتیش لەپارتێکی گەورەترین وڵاتی ئەوروپیدا بایەخدارن. 


سه‌رچاوه‌:ئاژانسه‌کان


ناو:  
ئیمه‌یل:    
سه‌رنج:  

#7392
17/10/2017
ئه‌رشیف
وه‌رزش
‌ رۆجێر فێدره‌ر بۆ جاری چواره‌م له‌م وه‌رزه‌دا له‌ نادالی برده‌وه‌ 17/10/2017
‌ دۆڤیزیسیۆ قۆناغی ژاپۆنی مۆتۆ جی پی برده‌وه‌ 17/10/2017
زانست
‌ ته‌كنیكی نوێ بۆ نووسینی نامه‌ بێ ده‌ستدان له‌ كیبۆرد 17/10/2017
‌ ئه‌ندۆنیزیا چاوه‌ڕوانی هه‌ڵپژانی گڕكانێكه‌ 17/10/2017
‌ زرێبار هه‌ورامی: ژیان جه‌نگه‌، له‌گه‌ڵ خۆت و له‌گه‌ڵ بارودۆخه‌كه‌ت 16/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP