كۆچەران دەگەڕێنرێنەوە بۆ یۆنان
كۆچەران دەگەڕێنرێنەوە بۆ یۆنان ‌ 26/12/2016
كۆمسیۆنی یەكێتیی ئەوروپا، پێشنیازێكی ئاراستەی وڵاتانی ئەندام كرد كە رێگەیان دەدات ئەو كۆچەرانەی لە دوای مانگی ئاداری ساڵی 2017ەوە روو لە وڵاتەكانیان دەكەن، رەوانەی یۆنانیان بكەنەوە.
ئەگەر ئەم پێشنیارە پەسەند بكرێت، كۆتایی بە حاڵەتی تایبەتی یۆنان دێت كە ماوەی نزیكەی شەش ساڵە پەیڕەو دەكرێت بە هۆی ئەو قەیرانە داراییەی تووشی هاتووە.
ئەم هەنگاوەی یەكێتی ئەوروپاش گوشارەكان لەسەر ئەسینا زیاد دەكات بۆ ئەوەی ژمارەیەكی زیاتری كۆچبەران دیپۆرتی توركیا بكاتەوە.
ساڵی 2011 دادگای باڵای ئەوروپا رایگەیاند، سیستەمی خزمەتگوزاریی كۆچەران‌و پەنابەرانی یۆنان بە هۆی قەیرانی داراییەوە گونجاو نییە، بۆیە لەو ساڵەوە یۆنان وەكو حاڵەتێكی تایبەت سەیر كراوەو ئەو كۆچەرانەی بەو وڵاتەدا تێدەپەڕین‌و ناویان تۆمار دەكرا، لە دوای دەرچوونیان لە یۆنان بەرەو وڵاتێكی دیكەی ئەوروپی، رەوانەی یۆنان نەدەكرانەوە.
بەڵام بە گوێرەی دوایین زانیارییەكان لە كۆمیسیۆنی یەكێتی ئەوروپاوە، یۆنان پێشكەوتنی بەرچاوی بەدەستهێناوە. كۆمیسیۆنەكە لە مانگی شوباتی ئەمساڵەوە هەوڵی داوە بزانێت بە چ شێوازێك سیستەمی كۆچەریی یۆنان باشتر بكرێت بۆ ئەوەی بەشێك لە كۆچەران بۆ ئەم وڵاتە بنێرنەوە.
سەرەڕای ئەم پێشكەوتنە بەرچاوەش، كۆمسیۆنی كۆچەران و كاروباری ناوخۆیی ئەوروپا، بە سەرۆكایەتی دیمیتریس ئاڤرامۆپۆڵس رایگەیاندووە كە هێشتا كەموكورتی زۆر لە سیستەمی كۆچەرانی یۆناندا هەیە، بۆیە دەبێت پڕۆسەی گەڕاندنەوەی كۆچبەران بۆ یۆنان هەنگاو بە هەنگاو بێت. 
لە پێشنیازەكەی كۆمیسیۆنی یەكێتی ئەوروپادا هاتووە، دەبێت یۆنان دڵنیایی بداتە كۆچەرە گەڕاوەكان كە لە یۆنان كەرامەتیان پارێزراو دەبێت. پێشنیازەكە وڵاتانی ئەندام لە كۆمسیۆنەكە سەرپشك دەكات لە گەڕاندنەوەی كۆچەرەكان بۆ یۆنان.
بە وتەی بەرپرسانی كۆچەریی یۆنان و یەكێتی ئەوروپا، هەفتانە 500 كۆچبەر لە سنوورەكانی باكووری رۆژهەڵاتی یۆنانەوە ئاودیوی ئەم وڵاتە دەبن، جگە لەمە هەفتانە 400 كۆچبەر لە رێگەی دوورگەكانی یۆنانەوە لەسەر دەریای ئیجە، دەگەنە ئەو وڵاتە. بەم پێیەش ئەگەر لە وڵاتانی باكووری ئەوروپاش كۆچبەری بۆ بنێرنەوە، ئەوە گوشارێكی زۆر دەكەوێتە سەر حكومەتی یۆنان.
بۆ كەمكردنەوەی ئەم گوشارەش كۆمسیۆنی یەكێتی ئەوروپا داوای لە وڵاتانی ئەندام كردووە پشكی خۆیان لەو كۆچەرانە وەربگرن كە بڕیار بوو لە چوارچێوەی پرۆگرامی نیشتەجێكردنی كۆچبەراندا لە یۆنان و ئیتاڵیا و ماڵتا وەربگیرێن. 
بەگوێرەی ئەم پرۆگرامە كە لە 2015 پەسەند كراوە، 162 هەزار كۆچەر لە ئیتاڵیا و یۆنانەوە بۆ وڵاتانی دیكەی ئەوروپا دەنێردرێن، لەم ژمارەیەش 65 هەزاری بەر ئەو كۆچبەرانە دەكەوێت كە لە یۆنان ناونووس كراون، بەڵام هەتا ئێستا ئەم پرۆگرامە تەنیا 8200 كۆچبەری لە ئیتاڵیا و یۆنانەوە گواستووەتەوە. پرۆگرامەكە لە مانگی ئەیلوولی ساڵی داهاتوو كاتی جێبەجێكردنی بەسەردەچێت.
دوو ساڵە لێشاوی كۆچەران لە رۆژهەڵاتی نێوەڕاست و باكووری ئەفریقاوە یەكێتی ئەوروپای تووشی كێشەی ئیداری، سیاسی و ئەمنیی گەورە كردووە. قەیرانی كۆچەران لە لایەكەوە مەترسی لەسەر بنەما سەرەتاییەكانی یەكێتی ئەوروپا دروست كردووە.
ئەوەی وڵاتانی ئەوروپی نیگەران كردووە، پەیوەندی بە دزەكردنی چەكدارانی گرووپە توندڕەوە ئیسلامییەكان لە نێو كۆچەرانەوە هەیە، وەك چۆن لە هێرشەكانی 13ی تشرینی دووەمی 2015 لە پاریس، دەركەوت بەشێك لە ئەنجامدەران و پلانداڕێژەرانی هێرشەكان ئەو كەسانە بوون كە لە سوریاوە هاتبوون.


ناو:  
ئیمه‌یل:    
سه‌رنج:  

#7204
26/2/2017
ئه‌رشیف
وه‌رزش
‌ نه‌ورۆز، شیروانه‌، كه‌ركوك، پ.هه‌ولێر بۆ چوارگۆشه‌ی زێڕین 26/2/2017
‌ پێكانه‌كه‌ی‌ كازۆرلا تا كۆتایی وه‌رز درێژه‌ی ده‌بێت 26/2/2017
زانست
‌ هۆكاری خه‌وتنی مرۆڤ و زینده‌وه‌رانی تر ئاشكرا بوو 22/2/2017
‌ میكانیزمێكی نوێ بۆ وه‌ستاندنی خوێنبه‌ربوونی مێشك 22/2/2017
‌ كونێكی ڕه‌ش له‌ گه‌له‌ ئه‌ستێره‌كه‌ماندا خۆی شاردووه‌ته‌وه‌ 22/2/2017

© 2009 KURDISTANY NWE, All RIGHTS RESERVED. | CREATED BY AVESTA GROUP