سه‌رهه‌ڵدان ‌و چالاكییه‌كانیان
قاعیده‌ و داعش سه‌رهه‌ڵدان ‌و چالاكییه‌كانیان ‌ 1/5/2017
به‌شی‌ چوارەم
ڕا‌وبۆچونه‌كان له‌سه‌ر ڕاستی‌ ڕێكخراوی‌ قاعیده‌‌و شوێن‌و چۆنیه‌تی‌ ده‌ستپێكردنی‌ چالاكیه‌كانی‌ ئه‌و ڕێكخراوه‌ جیاوازبوون، تا ئه‌و كاته‌ی‌ چووه‌ ڕیزبه‌ندی‌ سه‌ره‌وه‌ی‌ لیستی‌ ڕێكخراوه‌ تیرۆریسته‌كان كه‌ له‌ئێستادا له‌سه‌ر ئاستی‌ جیهان داوای‌ بنه‌بڕكردن و ڕیشه‌كێشكردنی‌ ده‌كرێت.
 لێره‌دا هه‌وڵده‌ده‌ین به‌شێوه‌یه‌كی‌ كورت چاو به‌مێژووی‌ ڕێكخراوی‌ قاعیده‌دا بخشێنین كه‌ له‌لایه‌ن ئوسامه‌ بن لادنه‌وه‌ سه‌ركردایه‌تی‌ ده‌كرا و له‌دوای‌ كوژرانیشیه‌وه‌، ئه‌یمه‌ن زه‌واهیری‌ به‌ جێگره‌وه‌ی‌ ده‌ستنیشانكرا و دواتر رێكخراوی‌ ده‌وڵه‌تی‌ ئیسلامی‌ كه‌ به‌ داعش ده‌ناسرێت له‌ڕووی‌ هه‌ژمونی‌ به‌هێزترین رێكخراوی‌ توندڕه‌وی‌ ئیسلامییه‌وه‌ جێگه‌ی‌ گرته‌وه‌، وێڕای‌ مانه‌وه‌ی‌ لقه‌كانی‌ قاعیده‌ له‌ چه‌ند وڵاتێك كه‌ زۆرێكیان ده‌كه‌ونه‌ ژێر كاریگه‌ریی‌ داعش و  چه‌كدار و ئه‌ندامه‌كانی‌ ریزی‌ رێكخراوه‌كه‌ جێده‌هێڵن و به‌یعه‌ت ده‌ده‌ن به‌ «خه‌لیفه‌ی‌ رێكخراوی‌ ده‌وڵه‌تی‌ ئیسلامی‌» و رێكخراوه‌ كۆنه‌كه‌یان جێده‌هێڵن.
       
كوژرانی‌ سه‌رانی‌ ده‌وڵه‌تی‌ ئیسلامی‌ 
نوری‌ مالیكی‌ سه‌رۆك وه‌زیرانی‌ عیراق له‌ 19/4/ 2010 كوژرانی‌ ئه‌بو عومه‌ر ئه‌لبه‌غدادی‌‌و ئه‌بو ئه‌یوب ئه‌لمیسری‌ له‌ ڕێی‌ پرۆسه‌یه‌كی‌ هه‌واڵگری‌ له‌ ناوچه‌ی‌ (الپرپار)ی‌ پارێزگای‌ سه‌ڵاحه‌دینی‌ باكووری‌ به‌غدا، ڕاده‌گه‌یه‌نێت.  
له‌وباره‌یه‌وه‌ مالیكی‌ له‌ كۆنفرانسێكی‌ ڕۆژنامه‌وانیدا وتی‌: «هێزێكی‌ عیراقی‌‌و ئه‌مریكایی‌ له‌ ناوچه‌ی‌ (پرپار) ماڵێكییان كرده‌ ئامانج كه‌ ئه‌بو عومه‌ر ئه‌لبه‌غدادی‌‌و ئه‌بو ئه‌یوب ئه‌لمیسری‌ تێدابوو».
سوپای‌ ئه‌مریكاش لای‌ خۆیه‌وه‌ ته‌ئكیدی‌ له‌ كوژرانی‌ دوو سه‌ركرده‌ گه‌وره‌كه‌ی‌ قاعیده‌ كرده‌وه‌ له‌ عیراقدا. 
هێزه‌كانی‌ ئه‌مریكا له‌ به‌یاننامه‌یه‌كیاندا له‌و باره‌یه‌وه‌ ئاماژه‌یان به‌ كوژرانی‌ دوو تیرۆریست كرد كه‌ به‌گوته‌ی‌ به‌یاننامه‌كه‌، گورزێكی‌ گورچكبڕه‌ بووه‌ له‌ ڕێكخراوی‌ قاعیده‌ له‌ عیراق. 
مالیكی‌ له‌ كۆنفرانسه‌ ڕۆژنامه‌وانیه‌كه‌دا، وێنه‌ی‌ به‌غدادی‌‌و ئه‌بو ئه‌یوبی‌ میسری‌ به‌ كوژراوی‌ نمایشكرد. 
سه‌رۆك وه‌زیرانی‌ عیراق وتی‌: «شانه‌یه‌كی‌ هه‌واڵگری‌ توانی‌ چه‌ند ئه‌ندامێكی‌ ڕێكخراوی‌ قاعیده‌ ده‌ستگیربكات‌و له‌ڕێی‌ ئه‌و ده‌ستگیركراوانه‌وه‌ توانرا شوێنی‌ ئه‌بو عومه‌ر ئه‌لبه‌غدادی‌‌و ئه‌بو ئه‌یوب ئه‌لمیسری‌ بدۆزرێته‌وه‌». 
له‌و پرۆسه‌یه‌دا به‌ قسه‌ی‌ مالیكی‌ بێت، زۆربه‌ی‌ سه‌ركرده‌ سه‌ربازیه‌كانی‌ ئه‌و ڕێكخراوه‌ ده‌ستگیركران كه‌ له‌و ده‌مه‌دا سه‌رقاڵی‌ ئاماده‌كاری‌ بوون بۆ ئه‌نجامدانی‌ كارێكی‌ تاوانكاری‌ كه‌ به‌نیازبوون ژماره‌یه‌كی‌ زۆر له‌ كڵێساكانی‌ عیراق بكه‌نه‌ ئامانج. 
مالیكی‌ وتی‌: «له‌و پرۆسه‌یه‌دا توانرا ده‌ست به‌سه‌ر چه‌ندین كۆمپیوته‌ر‌و ئه‌و نامانه‌دا بگیرێت كه‌ له‌گه‌ڵ‌ تیرۆریستانی‌ جیهان‌و ئه‌یمه‌ن زه‌واهیری‌‌و ئوسامه‌ بن لادندا ئاڵوگۆڕكرابوون». 
هه‌روه‌ها وتی‌: «هێزێكی‌ عیراقی‌ به‌پێی‌ زانیارییه‌ هه‌واڵگرییه‌ دیایكراوه‌كان له‌ ناوچه‌ جاجیاكانی‌ عیراقدا بڵاوه‌یانكرد‌و ده‌ستییانكرد به‌ لێدانی‌ ئامانجه‌كان». 
مالیكی‌ له‌ درێژه‌ی‌ قسه‌كانیدا ئاماژه‌ی‌ به‌ لاوازبوونی‌ قاعیده‌ كرد له‌دوای‌ ئه‌و لێدانه‌ و وتی‌: «كاتێك قاعیده‌ شه‌كه‌ت ده‌بێت، سه‌ركرده‌كانی‌ به‌وشێوه‌یه‌ ده‌كه‌ون‌و هه‌موو زانیاری‌‌و تۆڕ‌و درێژبوونه‌وه‌‌و په‌یوه‌ندییه‌كانییان به‌ لاوازترین حاڵه‌ت ده‌كه‌ونه‌ به‌رده‌ستمان». 
وێڕای‌ ئه‌و لێدانه‌ كه‌مه‌رشكێنه‌، مالیكی‌ وتی‌: «پێویسته‌ زیاتر به‌ئاگابین‌و به‌رده‌وامبین له‌سه‌ر  به‌ره‌وپێشبردنی‌ پرۆسه‌كان تا ئه‌و كاته‌ی‌ به‌ته‌واوه‌تی‌ ڕیشه‌كێشكردنی‌ قاعیده‌ له‌ عیراقدا زامنده‌كه‌ین، پێویستمان به‌ خۆڕاگری‌‌و په‌یوه‌ستبوونی‌ زیاتره‌». 
 مالیكی‌ ته‌ئكیدی‌ له‌سه‌ر یارمه‌تیدانی‌ لایه‌نی‌ ئه‌مریكا كرده‌وه‌ له‌ لێكۆڵینه‌وه‌كان‌و هاوبه‌شی‌ ئه‌مریكای‌ له‌ پرۆسه‌كانی‌ وردبینی‌ زانیارییه‌ هه‌واڵگرییه‌كانی‌ تایبه‌ت به‌ ڕێكخراوه‌ توندڕه‌وه‌كان، به‌هه‌ند هه‌ڵسه‌نگاند. 


ئوسامه‌ بن لادن (30 ته‌مموز 1957)  
ناوی‌ ئوسامه‌ بن محه‌مه‌د بن عه‌وه‌ز بن لادنه‌، دامه‌زرێنه‌ر‌و سه‌ركرده‌ی‌ ڕێكخراوی‌ قاعیده‌بوو كه‌ به‌ گه‌وره‌ترین ڕێكخراوی‌ تیرۆریستی‌ ده‌ناسرێت. 
ولایه‌ته‌ یه‌كگرتووه‌كان به‌ هۆكاری‌ ڕاسته‌وخۆی‌ ته‌قینه‌وه‌كانی‌ ئه‌لخوبه‌ر‌و نه‌یرۆبی‌‌و دار ئه‌لسه‌لام‌و (ڕوداوه‌كانی‌ 11 سێبته‌مبه‌ری‌ 2001) تۆمه‌تباری‌ كرد كه‌ ته‌نیا له‌و ڕوداوه‌دا 2997 كه‌س كوژران. 
ناوی‌ له‌ ڕیزبه‌ندی‌ یه‌كه‌می‌ لیستی‌ داواكراواندا بوو له‌ جیهاندا (له‌سه‌ر لیستی‌ ئینته‌رپوڵ‌)، ماوه‌یه‌ك به‌ر له‌ كوژرانی‌ شوێنه‌كه‌ی‌ له‌له‌لایه‌ن ده‌زگای‌ هه‌واڵگری‌ ئه‌مریكاوه‌ دۆزرایه‌وه‌.    
ئوسامه‌ بن لادن له‌ شانشینی‌ عه‌ره‌بی‌ سعودیه‌ له‌دایك بووه‌‌و كوڕی‌ محه‌مه‌د بن لادنه‌ كه‌ پیاوێكی‌ ده‌وڵه‌مه‌نده‌ بووه‌‌و له‌ بواری‌ به‌ڵێنده‌رایه‌تی‌‌و بیناسازیدا كاری‌ كردووه‌‌و په‌یوه‌ندیه‌كی‌ به‌هێزی‌ له‌گه‌ڵ‌ خانه‌واده‌ی‌ ئال سعودی‌ فه‌رمانڕه‌وای‌ سعودیه‌دا هه‌بووه‌. 
ڕیزبه‌ندی‌ ئوسامه‌ له‌نێو خوشك‌و براكانیدا 17 بووه‌ له‌كۆی‌ 52 خوشك‌و برا. 
خانه‌واده‌كه‌ی‌ بن لادن به‌ ڕه‌چه‌ڵه‌ك خه‌ڵكی‌ حه‌زره‌مه‌وتی‌ یه‌مه‌نن. 
له‌ زانكۆی‌ «الملك عبدالعزیز» له‌ جه‌ده‌ خوێندویه‌تی‌‌و بڕوانامه‌ی‌ به‌كالۆریۆسی‌ له‌ له‌ ئابوریدا به‌ده‌ستهێناوه‌‌و دواتر سه‌رپه‌رشتی‌ ئیداره‌ی‌ كۆمپانیای‌ بن لادنی‌ كردووه‌‌و هه‌ندێك به‌رپرسیارێتی‌ به‌ڕێوه‌به‌ردنی‌ كۆمپانیاكه‌ی‌ باوكی‌ له‌ئه‌ستۆگرتووه‌. 
دوای‌ مردنی‌ محه‌مه‌د بن لادنی‌ باوكی‌ ئوسامه‌، سه‌روه‌تێكی‌ له‌دوا جێده‌مێنێت كه‌ به‌ 300 ملیۆن دۆلار مه‌زه‌نده‌ ده‌كرا. 
ئوسامه‌ به‌ سه‌ره‌وه‌ت‌و سامانه‌كه‌ی‌ توانی‌ ئامانجی‌ خۆی‌ به‌دیبهێنێت كه‌ پشتیوانیكرن بوو له‌و چه‌كدارانه‌ی‌ كه‌ به‌ موجاهیده‌كانی‌ ئه‌فغانستان ده‌ناسران‌و له‌ ساڵی‌ 1979وه‌ دژ به‌ داگیركاری‌ سۆڤیه‌ت له‌ ئه‌فغانستان شه‌ڕیان ده‌كرد. 
له‌ ساڵی‌ 1984، بن لادن ڕێكخراوێكی‌ بانگواز به‌ناوی‌ «مركز الخدمات»‌و بنكه‌یه‌ك بۆ مه‌شقكردن له‌سه‌ر هونه‌ره‌كانی‌ جه‌نگ‌و پرۆسه‌ چه‌كداریه‌كان به‌ناوی‌ «معسكر الفاروق» بۆ كۆمه‌كی‌ هه‌وڵه‌كانی‌ جه‌نگی‌ «موجاهیده‌ ئه‌فغانیه‌كان» دادمه‌زرێنێت كه‌ دواتر له‌لایه‌ن (موجاهیده‌ عه‌ره‌ب‌و بیانیه‌كانه‌وه‌) به‌كارده‌هێنرێت. 
ئه‌و (ڕێكخراو و سه‌ربازگه‌)یه‌ له‌لایه‌ن هه‌ریه‌ك له‌ ئه‌مریكا‌و پاكستان‌و عه‌ره‌بی‌ سعودیه‌وه‌ به‌ كۆمه‌كی‌ ماددی‌‌و مه‌شقی‌ سه‌ربازی‌‌و ئه‌منی‌ پشتیوانی‌ ده‌كرێت‌و ته‌نانه‌ت به‌پێی‌ ئێستگه‌ی‌ BBC بێت، له‌لایه‌ن ده‌زگای‌ هه‌واڵگری‌ ئه‌مریكاوه‌ له‌و سه‌ربازگه‌یه‌دا مه‌شق به‌ «موجاهیده‌كان» كراوه‌. 
له‌ ساڵی‌ 1988، ئوسامه‌ بن لادن گه‌شه‌ی‌ به‌ كاره‌كانیدا له‌ ئه‌فغانستان‌و چه‌ند تۆمارێكی‌ بۆ قاعیده‌ دامه‌زراند بۆ تۆماركردنی‌ ناوی‌ موجاهیده‌كان‌و له‌و نێوه‌نده‌شدا خۆبه‌خشه‌كانی‌ «مركز الخدمات» ئه‌وانه‌ی‌ پسپۆڕ بوون له‌ بواری‌ سه‌ربازی‌‌و ڕاهێنانی‌ سه‌ربازیدا چونه‌ پاڵ‌ هه‌وڵه‌كانی‌ بن لادنه‌وه‌ كه‌ له‌دواتردا ئه‌و تۆمارانه‌ بوونه‌ ناوێك بۆ ڕێكخراوی‌ موجاهیده‌كان. 
به‌ كشانه‌وه‌ی‌ هێزه‌كانی‌ سۆڤیه‌ت له‌ ئه‌فغانستان، بن لادن له‌لایه‌ن عه‌ره‌بی‌ سعودیه‌وه‌ به‌ پاڵه‌وان وه‌سفكرا، به‌ڵام ئه‌و پشتیوانیه‌ به‌شێوه‌یه‌كی‌ خێرا ڕووی‌  له‌ نه‌مان كرد كاتێك بن لادن له‌ سه‌رده‌می‌ داگیركردنی‌ عیراق بۆ كوه‌یت له‌ ساڵی‌ 1990، هێرشی‌ كرده‌ سه‌ر  جێگیركردنی‌ هێزه‌كانی‌ ئه‌مریكا له‌ سعودیه‌، بگره‌ هێرشی‌ كره‌ سه‌ر ده‌سه‌ڵاتی‌ سعودیه‌ش كه‌ ڕێگه‌ی‌ به‌ هێزه‌كانی‌ ئه‌مریكا دابوو بێنه‌ نێو خاكی‌ سعودیه‌وه‌ كه‌ له‌لایه‌ن بن لادنه‌وه‌ به‌ « ماددی‌»‌و «خراپه‌كار» وه‌سف ده‌كران. 
به‌ سه‌فه‌ركردنی‌ بۆ سودان له‌ هه‌مان ساڵ‌‌و دامه‌زراندنی‌ ناوه‌ندێك بۆ پرۆسه‌ نوێیه‌كان،  پشتگیری‌‌و پشتیوانی‌ سعودیه‌ بۆ بن لادن كۆتایی‌ هات.
بن لادن سه‌ركه‌وتوو بوو له‌ هه‌نارده‌كردنی‌ بیرۆكه‌كانی‌ خۆی‌ بۆ باشووری‌ خۆرهه‌ڵاتی‌ ئاسیا، ولایه‌ته‌ یه‌كگرتووه‌كان، ئه‌فریقا، ئه‌وروپا. 
به‌هۆی‌ په‌یوه‌ندی‌ توندوتۆڵی‌ له‌گه‌ڵ‌ گروپی‌ «تاڵیبان» كه‌ حوكمی‌ ئه‌فغانستانی‌ ده‌كرد، له‌ ساڵی‌ 1996دا بن لادن سودانی‌ جێهێشت‌و ڕوه‌و ئه‌فغانستان به‌ڕێكه‌وت‌و له‌وێوه‌ جه‌نگی‌ دژ به‌ ولایه‌ته‌ یه‌كگرتووه‌كانی‌ ڕاگه‌یاند.
له‌ ساڵی‌ 1998دا هه‌وڵه‌كانی‌ بن لادن‌و ئه‌یمه‌ن زه‌واهیری‌ سكرتێری‌ گشتی‌ ڕێكخراوی‌ جیهادی‌ ئیسلامی‌ له‌ میسر یه‌كده‌گرن‌و پێكه‌وه‌ فه‌توا له‌سه‌ر شه‌ڕكردن‌و كوشتنی‌ ئه‌مركاییه‌كان‌و هاوپه‌یمانه‌كانییان ده‌ده‌ن له‌ هه‌موو شوێن‌و جێگه‌كان‌و بانگه‌شه‌ بۆ ده‌رپه‌ڕاندنییان ده‌كه‌ن له‌ مزگه‌وتی‌ ئه‌قسا‌و مزگه‌وتی‌ ئه‌لحه‌رام. 

ستایشی‌ ئه‌نجامده‌رانی‌ په‌لاماره‌كان ده‌كات 
دوابه‌دوای‌ ڕوداوه‌كانی‌ یانزه‌ی‌ سێپته‌مبه‌ریش، ولایه‌ته‌ یه‌كگرتووه‌كان په‌نجه‌ی‌ تۆمه‌تی‌ بۆ ئوسامه‌ بن لادن‌و قاعیده‌ درێژكرد. 
ئوسامه‌، ستایش‌و پیرۆزبایی‌ له‌ ئه‌نجامده‌رانی‌ په‌لاماره‌كانی‌ سێپته‌مبه‌ری‌ 2001 كرد، ولایه‌ته‌ یه‌كگرتووه‌كان كاسێتێكی‌ ڤیدیۆیی‌ ده‌سته‌به‌ر 
ده‌كات كه‌ تێیدا بن لادن له‌گه‌ڵ‌ ژماره‌یه‌ك له‌ لایه‌نگرانی‌ باس له‌ سه‌رسوڕمانی‌ خۆی‌ ده‌كات به‌رامبه‌ر به‌ قه‌باره‌ و بڕی‌ ئه‌و كاولكاری‌‌و قوربانیانه‌ی‌ كه‌ به‌هۆی‌ داڕمانی‌ هه‌ردوو سه‌نته‌ری‌ بازرگانی‌ جیهانیه‌وه‌ له‌ نیۆیۆرك دروست بوو. 
بن لادن ئاماژه‌ به‌وه‌ ده‌كات كه‌ زیانه‌كان له‌سه‌ر‌و پێشبینیكردنی‌ ئه‌وه‌وه‌ بوون. 
ئه‌و كاسێته‌ وه‌ك یه‌كێك له‌ به‌ڵگه‌ ئاشكراكان به‌كارده‌هێنرێت له‌سه‌ر بن لادن كه‌ پێشتر ئاگاداری‌ ورده‌كاری‌ ئه‌و ڕوداوه‌ بووه‌، به‌ڵام له‌گه‌ڵ‌ ئه‌وه‌شدا هه‌ندێك به‌ڵگه‌ی‌ دیكه‌ له‌به‌ر هۆكاره‌كانی‌ ئاسایشی‌ نه‌ته‌وه‌یی‌‌و جه‌نگ دژ به‌ تیرۆریزم ڕانه‌گه‌نران‌و به‌ نهێنی‌ مانه‌وه‌. 
ئوسامه‌ بن لادن له‌وده‌مه‌دا شوێن‌و جێگه‌ی‌ نادیاربوو، نه‌ده‌زانرا له‌ژاینداماوه‌ یان نا. 
بن لادن له‌ ساڵی‌ 2001دا بۆ دوایین جار له‌ شاری‌ قه‌نده‌هاری‌ ئه‌فغانستان بینرا. 
ولایه‌ته‌ یه‌كگرتووه‌كان له‌و ده‌مه‌دا داوا له‌ تاڵیبان ده‌كات ئوسامه‌ بن لادنی‌ ڕاده‌ست بكات، به‌ڵام ئه‌فغانستان  داوای‌ به‌ڵگه‌ له‌ ولاته‌ یه‌كگرتووه‌كان ده‌كات سه‌باره‌ت به‌ تێوه‌گلانی‌ بن لادن له‌ ڕوداوه‌كانی‌ یانزه‌ی‌ سێپته‌مبه‌ری‌ 2001. 
به‌وهۆیه‌وه‌ ولایه‌ته‌ یه‌كگرتووه‌كان ئه‌فغانستان داگیر ده‌كات‌و حكومه‌ته‌كه‌ی‌ تاڵیبان ده‌ڕوخێنێت، به‌ڵام ولایه‌ته‌ یه‌كگرتووه‌كان دوای‌ ڕوخانی‌ تاڵیبان‌و داگیركردنی‌ ئه‌و وڵاته‌ش ناتوانێت بن لادن ده‌ستگیر بكات‌و ناشزانێت ئایا له‌ بۆردومانی‌ فڕۆكه‌كانیدا بۆ چیاكانی‌ «تۆرابۆرا» بن لادن پێوه‌ بووه‌ یان نا. 
پێشبینی‌ ده‌كرا بن لادن به‌هۆی‌ نه‌خۆشی‌ گورچیله‌وه‌ كه‌ پێویستی‌ به‌ چاودێریه‌كی‌ پزیشكی‌ به‌رده‌وامه‌ و بۆ ئه‌و بارودۆخه‌ی‌ ئه‌و ده‌ست نادات، گیانی‌ له‌ده‌ستدابێت.
(زۆرێك له‌ ڕاپۆرته‌كان له‌و ده‌مه‌دا ئه‌وه‌یان ڕه‌تده‌كرده‌وه‌ بن لادن گورچیله‌كانی‌ له‌كاركه‌وتنبن‌و له‌ چاوپێكه‌وتنی‌ پزیشكی‌ تایبه‌تی‌ ناوبراویشدا ئه‌و مه‌سه‌له‌یه‌ یه‌كلابووه‌وه‌)، به‌ڵام دوای‌ ئه‌وه‌ ده‌ماوده‌م كاسێتی‌ وێنه‌یی‌‌و ده‌نگی‌ بن لادن ده‌رده‌كوێت‌و تێیدا باس له‌ كێشه‌ گه‌رماوگه‌رمه‌كان ده‌كات، ته‌ئكیدكردنه‌ بوو بۆ ئه‌وه‌ی‌ كه‌ تا ئه‌و ده‌مه‌ بن لادن له‌ژیاندابوو.  
له‌ 7 ئایاری‌ 2004دا كاسێتێكی‌ ڤیدۆیی‌ ده‌رده‌كه‌وێت، ده‌نگۆی‌ ئه‌وه‌ بڵاوده‌بێته‌وه‌ كه‌ ده‌نگی‌ بن لادنه‌ و تێیدا هانی‌ كوشتنی‌ پۆڵ‌ برێمه‌ر سه‌رۆكی‌ كاتی‌ ده‌سه‌ڵاتی‌ كاتی‌ هاوپه‌یمانان ده‌دات‌و خه‌ڵاتێكی‌ زێڕینیش بۆ ئه‌و كه‌سه‌ ته‌رخان ده‌كات كه‌ ئه‌و كاره‌ ئه‌نجام ده‌دات.  
بن لادن له‌و كاسێته‌دا داوای‌ كوشتنی‌ فه‌رمانده‌ی‌ سه‌ربازی‌ هێزه‌كانی‌ ئه‌مریكا له‌  عیراق‌و جێگره‌كه‌ی‌‌و كۆفی‌ ئه‌نانی‌ سكرتێری‌ گشتی‌ ئه‌و ده‌مه‌ی‌ نه‌ته‌وه‌ یه‌كگرتووه‌كان‌و ئه‌خزه‌ر ئیبراهیمی‌ نێرده‌ی‌ تایبه‌تی‌ نه‌ته‌وه‌ یه‌كگرتووه‌كان ده‌كات.


ناو:  
ئیمه‌یل:    
سه‌رنج:  

#7280
30/5/2017
ئه‌رشیف
وه‌رزش
‌ كیربیر ماڵئاوایی كرد 30/5/2017
‌ به‌ڵێنه‌كه‌ی‌ ده‌باته‌ سه‌ر 30/5/2017
زانست
‌ خواردنه‌وه‌ی دوو كوپ قاوه‌ له‌ ڕۆژێكدا به‌سووده‌ 30/5/2017
‌ به‌ر له‌ به‌كارهێنانی بۆنخۆشكه‌ری هه‌وا ده‌بێت ئه‌م ڕاپۆرته‌ بخوێنینه‌وه‌ 30/5/2017
‌ كیوكن هۆف، سه‌رچاوه‌ی نان به‌ گوڵ 28/5/2017

© 2009 KURDISTANY NWE, All RIGHTS RESERVED. | CREATED BY AVESTA GROUP