ئیسرائیل پڕۆگرامه‌ نوێیه‌كه‌ی‌ حه‌ماس ره‌تده‌كاته‌وه‌
سنووری‌ 1967 له‌خۆده‌گرێت ئیسرائیل پڕۆگرامه‌ نوێیه‌كه‌ی‌ حه‌ماس ره‌تده‌كاته‌وه‌ ‌ 8/5/2017
كوردستانی‌ نوێ‌- ره‌وته‌كان
دااڤید كیز وته‌بێژی‌ سه‌رۆك وه‌زیرانی‌ ئیسرائیل، بزوتنه‌وه‌ی‌ حه‌ماسی‌ به‌ هه‌وڵدان بۆ فێڵكردن له‌ جیهان تۆمه‌تبار كرد له‌ڕێی‌ پرۆگرامه‌ نوێیه‌كه‌ی‌ كه‌ له‌م چه‌ند رۆژه‌ی‌ دواییدا رایگه‌یاند، ره‌تیشیكرده‌وه‌ بزوتنه‌وه‌كه‌ بتوانێت له‌و كاره‌یدا سه‌ركه‌وتوو بێت.      
 هه‌ر له‌و چوارچێوه‌یه‌دا ده‌سته‌ی‌ كاروباری‌ خاكه‌ داگیركراوه‌كان له‌ وه‌زاره‌تی‌ به‌رگری‌ ئیسرائیل رایگه‌یاند»بزوتنه‌وه‌ی‌ تیرۆریستی‌ حه‌ماس گاڵته‌ به‌ جیهان ده‌كات له‌ڕێی‌ هه‌وڵدانی‌ بۆ پێشكه‌شه‌كردنی‌ به‌ناو پرۆگرامی‌ نوێ‌، وه‌ك بڵێیت رێكخراوێكی‌ كراوه‌ و په‌ره‌سه‌ندووه‌».  
به‌ وته‌ی‌ دااڤید كیز:»حه‌ماس ده‌یه‌وێت جیهان هه‌ڵبخه‌ڵه‌تێنێت، به‌ڵام له‌و كاره‌یدا سه‌ركه‌وتوونابێت، چونكه‌ تونێل بۆ كاریی‌ تیرۆریستی‌ لێده‌دات و به‌ هه‌زاران موشه‌ك مه‌ده‌نییه‌ ئیسرائیلییه‌كانی‌ بۆردومان كردووه‌، ئه‌وه‌ رووی‌ راستی‌ حه‌ماسه‌». 
له‌یلا سورا توێژه‌ر له‌ سه‌نته‌ری‌ توێژینه‌وه‌ نێوده‌وڵه‌تییه‌كان له‌و باره‌یه‌وه‌ ده‌ڵێت: «مه‌سه‌ی‌ پوچه‌ڵكردنه‌وه‌ی‌  پرۆگرام و به‌ڵێننامه‌ی‌ ساڵی‌ 1988ی‌ حه‌ماس، بۆ چه‌ندان ساڵ ده‌چێت له‌نێو بزوتنه‌وه‌كه‌دا مشتومڕی‌ له‌سه‌ره‌، بۆ خۆلادان له‌ هه‌ڵوه‌شاندنه‌وه‌یشی‌، ئه‌و پرۆگرامه‌ ئاماده‌كراوه‌ تا هه‌ڵوێسته‌ نوێیه‌كانی‌ حه‌ماسی‌ لێوه‌ پێشكه‌ش بكرێت»، ره‌تیشكرده‌وه‌ داننان به‌ سنوری‌ ساڵی‌ 1967 مانای‌ داننان به‌ ئیسرائیل بگه‌یه‌نێت.  

خاڵه‌ سه‌ره‌كییه‌كانی‌ نێو پڕۆگرامه‌كه‌ی‌ حه‌ماس 
له‌م چه‌ند رۆژه‌ی‌ دواییدا بۆ یه‌كه‌مجار له‌ مێژووی‌ خۆیدا، بزوتنه‌وه‌ی‌ حه‌ماس هه‌مواركردنی‌ به‌رنامه‌ی‌ سیاسی‌ بزوتنه‌وه‌كه‌ی‌ راگه‌یاند و لێوه‌ی‌ رازیی‌ بوو ده‌وڵه‌تی‌ فه‌له‌ستینی‌ به‌ سنوره‌كانی‌ ساڵی‌ 1967 دابمه‌زرێت، به‌بێ‌ ئه‌وه‌ی‌ دان به‌ مافی‌ بوونی‌ ئیسرائیلدا بنێت، هاوكات ره‌تیشكردبووه‌وه‌ ده‌ست له‌ مافی‌ مقاوه‌مه‌كردن له‌ دژی‌ ئیسرائیل هه‌ڵبگرێت و ته‌ئكیدیشی‌ له‌سه‌ر «سازش نه‌كردن له‌سه‌ر قودس وه‌ك پایته‌ختی‌ فه‌له‌ستین» كردبووه‌وه‌.  
هه‌ر له‌ پرۆگرامه‌ نوێیه‌كه‌دا ته‌ئكید له‌سه‌ر مافی‌ گه‌ڕانه‌وه‌ی‌ په‌نابه‌ره‌ فه‌له‌ستینییه‌كان كرابووه‌وه‌ بۆ زێدی‌ خۆیان كه‌ پێشتر ده‌ركرابوون، جا له‌و ناوچانه‌بن كه‌ له‌ ساڵی‌ 1948 داگیركرابوون یان له‌ ساڵی‌ 1967.   

دان به‌ ئیسرائیلدا نانێت 
له‌ پرۆگرامه‌كه‌دا هاتووه‌: «دان به‌ شه‌رعیه‌تی‌ قه‌واره‌ی‌ زایۆنیزمدا نانرێت و سازش له‌سه‌ر هیچ پارچه‌كی‌ خاكی‌ فه‌له‌ستین ناكرێت، ئیتر داگیركاریی‌ چه‌ند درێژه‌بكێشێت و هۆكار و دۆخ و فشاره‌كان هه‌رچۆنێكبن. حه‌ماس ره‌تیكردبووه‌وه‌ هیچ ئه‌لته‌رناتیڤێك بۆ رزگاركردنی‌ ته‌واوه‌تی‌ فه‌له‌ستینی‌ هه‌بێت، له‌ رووباره‌كه‌یه‌وه‌ تا ده‌گاته‌ ده‌ریاكه‌ی‌- به‌و مانای‌ كه‌ هه‌رگیز دان به‌ ئیسرائیلدا نانێت و سازش له‌سه‌ر هیچ مافێكی‌ فه‌له‌ستینی‌ ناكات- حه‌ماس پێیوایه‌ كه‌ ده‌بێت ده‌وڵه‌تی‌ فه‌له‌ستینی‌ سه‌ربه‌خۆ به‌ ته‌واوی‌ سه‌روه‌رییه‌وه‌ كه‌ پایته‌خته‌كه‌ی‌ قودسه‌، سنوره‌كه‌ی‌ هیڵه‌كانی‌ حوزه‌یرانی‌ 1967 بێت و په‌نابه‌ر و ئاواره‌كانیش مافی‌ گه‌ڕانه‌وه‌یان هه‌بێت بۆ زێدی‌ خۆیان، ئه‌وه‌ش به‌ شێوازێكی‌ ته‌وافوقی‌ نیشتیمانی‌ هاوبه‌ش داده‌نێت. 

مقاوه‌مه‌ی‌ چه‌كداریی‌ رێگه‌چاره‌ی‌ ستراتیژی‌ حه‌ماسه‌ 
حه‌ماس له‌ پرۆگرامه‌ نوێیه‌كه‌یدا، رێككه‌وتنه‌كانی‌ ئۆسلۆ و پاشكۆكانی‌ ره‌تده‌كاته‌وه‌ و پێیوایه‌ ئه‌و رێككه‌وتنانه‌ پیچچه‌وانه‌ی‌ یاسا نێوده‌وڵه‌تییه‌كانن و مقاوه‌مه‌ی‌ چه‌كداریش به‌ رێگه‌چاره‌ی‌ ستراتیژی‌ خۆی‌ داده‌نێت بۆ «پاراستنی‌ پره‌نسیپه‌كان و گێڕانه‌وه‌ی‌ مافه‌كان بۆ گه‌لی‌ فه‌له‌ستینی‌». 
شاره‌زایان پێیانوایه‌، ئامانج له‌و هه‌ڵوێسته‌ نوێیه‌ی‌ حه‌ماس، چوونه‌ نێو گه‌مه‌ی‌ دانوستانه‌ نێوده‌وڵه‌تییه‌كانی‌ تایبه‌ت به‌ كێشه‌ی‌ فه‌له‌ستینه‌.    
راگه‌یاندنی‌ پرۆگرامه‌كه‌ش، دوو رۆژ به‌ر له‌ چاوپێكه‌تنی‌ نێوان مه‌حمود عه‌باس سه‌رۆكی‌ ده‌سه‌ڵاتی‌ فه‌له‌ستینی‌ و دۆناڵد تره‌مپ سه‌رۆكی‌ ئه‌مریكا بوو له‌ كۆشكی‌ سپی‌. 
ئیسرائیل و ولایه‌ته‌ یه‌كگرتووه‌كان و یه‌كێتی‌ یه‌وروپا، بزوتنه‌وه‌ی‌ حه‌ماس به‌ رێكخراوێكی‌ «تیرۆریستی‌» داده‌نێن.   
به‌ڵام به‌ وته‌ی‌ خالید مشعه‌ل سه‌رۆكی‌ مه‌كته‌بی‌ سیاسی‌ بزوتنه‌وه‌ی‌ حه‌ماس، پرۆگرامی‌ نوێی‌ بزوتنه‌وه‌كه‌ ده‌رگاكان ئاواڵا ده‌كات تا حه‌ماس له‌سه‌ر ئاستی‌ عه‌ره‌بی‌ و نێوده‌وڵه‌تی‌ په‌سه‌ندكراوبێت، بۆیه‌ پێشبینی‌ ده‌كه‌ن په‌یوه‌ندییه‌كانیان له‌گه‌ڵ میسر و وڵاته‌ عه‌ره‌بیه‌كان و وڵاتانی‌ خۆرئاوا باش ببێت كه‌ زۆرێكیان بزوتنه‌وه‌كه‌ به‌ رێكخراوێكی‌ «تیرۆریستی‌»داده‌نێن. 
هه‌روه‌ها حه‌ماس له‌ پرۆگرامه‌ نوێیه‌كه‌یدا پێیوایه‌ «ململانێ‌ له‌گه‌ڵ پرۆژه‌ی‌ زایۆنیزم، ململانێ‌ نییه‌ له‌گه‌ڵ جوله‌كه‌ به‌هۆی‌ ئاینه‌كه‌یان و حه‌ماس ململانێی‌ له‌ دژی‌ جوله‌كه‌ له‌سه‌ر ئه‌وه‌ نییه‌ كه‌ جوله‌كه‌ن، به‌ڵكو له‌ دژی‌ زایۆنیزم و داگیركاریی‌ و دوژمنكارییه‌». 
له‌گه‌ڵ هه‌موو ئه‌وانه‌شدا، پێشتر نوسینگه‌ی‌ بنیامین نتانیاهۆ سه‌رۆك وه‌زیرانی‌ ئیسرائیل، پرۆگرامه‌ نوێیه‌كه‌ی‌ حه‌ماسی‌ به‌ «درۆ» له‌قه‌ڵه‌مدابوو. 

خاڵه‌ سه‌ره‌كییه‌كانی‌ پرۆگرامی‌ سیاسی‌ نوێی‌ حه‌ماس 
خاڵه‌ سه‌ره‌كییه‌كان له‌ «پرۆگرام و پره‌نسیپی‌ سیاسه‌ته‌ گشتییه‌كانی‌ حه‌ما» وه‌ك خالید مشعه‌ل سه‌رۆكی‌ مه‌كته‌بی‌ سیاسی‌ بزوتنه‌وه‌كه‌ له‌ پرێس كۆنفرانسێكدا له‌ ده‌وحه‌ی‌ پایته‌ختی‌ قته‌ر ئاماژه‌ی‌ پێكردن له‌مانه‌ پێكدێن: 
«-بزوتنه‌وه‌ی‌ مقاوه‌مه‌ی‌ ئیسلامی‌ «حه‌ماس» بزوتنه‌وه‌یه‌كی‌ رزگاریخوازی‌ مقاوه‌مه‌ی‌ نیشتیمانی‌ فه‌له‌ستینی‌ ئیسلامییه‌، ئامانجی‌ رزگاركردنی‌ فه‌له‌ستین و رووبه‌ڕبوونه‌وه‌ی‌ پرۆژه‌ی‌ زایۆنیزمه‌، مه‌رجه‌عی‌ ئیسلامه‌ له‌ كارو ئاراسته‌ و ئامانج و ئامرازه‌كانی‌». 
«-فه‌له‌ستین به‌ سنوره‌كه‌ی‌ له‌ روباری‌ ئوردن له‌ خۆرهه‌ڵاته‌وه‌ بۆ ده‌ریای‌ ناوه‌ڕاست له‌ خۆرئاوا و له‌ ره‌ئسولناقوره‌ له‌ باكوور بۆ ئوم ره‌شراش له‌ باشووره‌وه‌ هه‌رێمێكی‌ یه‌كگرتووی‌ دانه‌بڕاوه‌». 
«-فه‌له‌ستینیه‌كان هاوڵاتی‌ عه‌ره‌بن و تا ساڵی‌ 1947 دانیشتووی‌ فه‌له‌ستین بوون، جا له‌نێو خاكه‌كه‌یدا مابنه‌وه‌ یان ده‌ركرابن، هه‌ركه‌سێك له‌ باوكێكی‌ فه‌له‌ستینی‌ بێت له‌پاش ئه‌و مێژووه‌وه‌، له‌ ناو فه‌له‌ستیندا بێت یان له‌ ده‌ره‌وه‌، فه‌له‌ستینییه‌». 

«-ئیسلام دژ به‌ هه‌موو شێوازه‌كانی‌ توندوتیژی‌ و ده‌مارگیری‌ ئاینی‌ و نه‌ژادی‌ و تایه‌فه‌گه‌رییه‌». 
«-قودس پایته‌ختی‌ فه‌له‌ستنیه‌ به‌ هه‌موو شوێنه‌ پیرۆزه‌ ئیسلامی‌ و مه‌سحییه‌كان، مافێكی‌ چه‌سپاوی‌ گه‌لی‌ فه‌له‌ستین و نه‌ته‌وه‌ی‌ عه‌ره‌بی‌ و ئیسلامین و به‌هیچ شێوه‌یه‌ك سازشیان له‌سه‌ر ناكرێت». 
«-مزگه‌وتی‌ ئه‌قسای‌ پیرۆز مافی‌ ته‌واوه‌تی‌ گه‌ل و نه‌ته‌وه‌كه‌مانه‌، داگیركار هیچ مافێكی‌ تێدا نییه‌». 
«-مافی‌ گه‌ڕانه‌وه‌ی‌ په‌نابه‌ر و ئاواره‌ فه‌له‌ستنینییه‌كان بۆ زێدی‌ خۆیان و بۆ ئه‌و ناوچانه‌ی‌ كه‌ له‌ ساڵی‌ 148 یان له‌ ساڵی‌ 1967 داگیركراون، ئه‌و مافه‌ش هیچ كه‌س و لایه‌نێك بۆی‌ نییه‌ سه‌ودای‌ له‌سه‌ر بكات». 
«-پرۆژه‌ی‌ زایۆنیزم پرۆژه‌یه‌كی‌ ره‌گه‌زپه‌رستی‌ و دوژمنكارانه‌یه‌، قه‌واره‌ی‌ ئیسرائیلی‌ ئامرازێكه‌ بۆ پرۆژه‌ی‌ زایۆنیزم و بنكه‌ دوژمنكارییه‌كه‌ی‌».
«-حه‌ماس چه‌وساندنه‌وه‌ی‌ هه‌موو مرۆڤێك یان كه‌مكردنه‌وه‌ی‌ مافه‌كانی‌ له‌سه‌ر بنه‌مای‌ نه‌ته‌وه‌یی‌ یان ئاینی‌ یان تایه‌فه‌گه‌ریی‌ ره‌تده‌كاته‌وه‌، پێوایه‌ پرسی‌ جوله‌كه‌ و دژایه‌تیكردنی‌ سامی‌ و چه‌وساندنه‌وه‌ی‌ جوله‌كه‌، دیارده‌یه‌كن له‌ بنه‌چه‌دا په‌یوه‌ستن به‌ مێژووی‌ ئه‌وروپاوه‌، نه‌ك به‌ مێژووی‌ عه‌ره‌ب و مسوڵمانان». 
«-حه‌ماس ململانێی‌ له‌گه‌ڵ پرۆژه‌ی‌ زایۆنیزم به‌ ململانێ‌ له‌گه‌ڵ جوله‌كه‌ به‌هۆی‌ ئاینه‌كه‌یانه‌وه‌ نابینێت، حه‌ماس ململانێ‌ له‌ دژی‌ جوله‌كه‌ ناكات له‌به‌ر ئه‌وه‌ی‌ جوله‌كه‌ن، به‌ڵكو ململانێی‌ له‌ دژی‌ زایۆنیزمی‌ داگیركه‌ر و دوژمنكارانه‌». 
«-دان به‌ شه‌رعیه‌تی‌ قه‌واره‌ی‌ زایۆنیزمدا نانێت، هه‌ر چوارچێوه‌یه‌كیش له‌سه‌ر خاكی‌ فه‌له‌ستین بكرێته‌وه‌، به‌ داگیركاریی‌ یان نیشته‌جێكردن، یان به‌جوله‌كه‌كردن، یان گۆڕینی‌ دیموگرافی‌، یان شێواندنی‌ راستییه‌كان، به‌ پوچه‌ڵ داده‌نرێت». 
«-چه‌ند داگجیركاریی‌ درێژه‌ بكێشێت، سازش له‌سه‌ر هیچ به‌شێكی‌ خاكی‌ فه‌له‌ستین ناكرێت، ئیتر هۆكار و دۆخ و فشاره‌كان هه‌رچییه‌كبن، بۆیه‌ حه‌ماس هه‌موو ئه‌لته‌رناتیڤێكی‌ تر جگه‌ له‌ رزگاركردنی‌ ته‌واوه‌تی‌ فه‌له‌ستین له‌ رووباره‌وه‌ بۆ ده‌ریا ره‌تده‌كاته‌وه‌». 
«-بزوتنه‌وه‌ی‌ حه‌ماس رێككه‌وتنه‌كانی‌ ئۆسلۆ و پاشكۆكانی‌ به‌ پێچه‌وانه‌ی‌ یاسا نێوده‌وڵه‌تییه‌كان داده‌نێت و ئه‌و رێككه‌وتنانه‌ ره‌تده‌كاته‌وه‌». 
«مقاوه‌مه‌ی‌ چه‌كداریی‌، رێگه‌چاره‌ی‌ ستراتیژییه‌ بۆ پاراستن و پارێزگاریی‌ له‌ بنه‌ماكان و گێڕانه‌وه‌ی‌ مافه‌كان بۆ گه‌لی‌ فه‌له‌ستین». 
«-حه‌ماس ره‌تیده‌كاته‌وه‌ مقاوه‌مه‌ی‌ چه‌كداریی‌ له‌كه‌داربكرێت و ته‌ئكید له‌سه‌ر مافی‌ گه‌لی‌ فه‌له‌ستین ده‌كاته‌وه‌ بۆ په‌ره‌پێدانی‌ ئامرازه‌كانی‌ مقاوه‌كه‌ و میكانیزمه‌كانی‌». 
«-حه‌ماس بڕوای‌ به‌ به‌ڕێوه‌بردنی‌ په‌یوه‌ندییه‌ فه‌له‌ستینییه‌كان هه‌یه‌ له‌سه‌ر بنه‌مای‌ فره‌یی‌ و رێڕه‌وه‌ دیموكراتییه‌كان». 

واقیعی‌ فه‌له‌ستینی‌ و نێوده‌وڵه‌تی‌ هۆكاریی‌ گۆڕانكارییه‌كانن
دوای‌ سی‌ ساڵ له‌ ده‌ستپێكردنی‌ چالاكییه‌كانی‌ «بزوتنه‌وه‌ی‌ مقاوه‌مه‌ی‌ ئیسلامی‌» ناسراو به‌ حه‌ماس، بزوتنه‌وه‌كه‌ رووبه‌ڕووی‌ واقعێكی‌ فه‌له‌ستینی‌ و نێوده‌وڵه‌تی‌ نوێ‌ بووه‌ته‌وه‌ كه‌ پێویستبوو گۆڕانكاریی‌ له‌ په‌یڕه‌و و پرۆگرامی‌ سیاسی‌ خۆیدا بكات. 
پێشتر ئه‌حمه‌د یوسف سه‌ركرده‌ له‌ بزوتنه‌ی‌ حه‌ماس رایگه‌یاندبوو:»په‌یڕه‌وی‌ سیاسی‌ نوێی‌ بزوتنه‌وه‌ی‌ حه‌ماس، به‌ روونی‌ ئه‌و فشارانه‌ی‌ توركیای‌ پێوه‌ ده‌رده‌كه‌وێت كه‌ بۆ ئه‌و مه‌به‌سته‌ كرانه‌ سه‌ر بزوتنه‌وه‌كه‌، تا  ده‌ستبه‌رداری‌ هه‌ندێك ئامانج و دروشمی‌ پێشینه‌ی‌ خۆی‌ ببێت». 
بزوتنه‌وه‌ی‌ حه‌ماس به‌ په‌یڕه‌وه‌ سیاسییه‌ نوێیه‌كه‌ی‌، ئه‌و په‌یڕه‌وه‌ سیاسییه‌ تێده‌په‌ڕێنێت كه‌ له‌ ساڵی‌ 1987دا په‌سه‌ندكرا كه‌ سه‌باره‌ت به‌ هه‌ڵوێسته‌كانی‌ له‌باره‌ی‌ ململانێی‌ فه‌له‌ستینی‌- ئیسرائیلی‌ و جوله‌كه‌ به‌شێوه‌یه‌كی‌ گشتی‌ مشتومڕی‌ له‌سه‌ربوو، وێڕای‌ ره‌هه‌نده‌كانی‌ تایبه‌ت به‌ په‌یوه‌ندی‌ بزوتنه‌وه‌ی‌ حه‌ماس به‌ رێكخراوی‌ دایكه‌وه‌ كه‌ ئیخوان موسلیمینه‌. 
هه‌ر له‌و چوارچێوه‌یه‌دا خه‌لیل شاهین، نوسه‌ر و شرۆڤه‌كاریی‌ سیاسی‌ راگه‌یاندبوو» په‌یڕه‌وی‌ سیاسی‌ نوێی‌ حه‌ماس، په‌ره‌سه‌ندنێكی‌ زیاتر عه‌قڵانییه‌ له‌گه‌ڵ واقعی‌ ئێستا و پێشهاته‌ سیاسییه‌كان، به‌جۆرێك كه‌ بزوتنه‌وه‌ی‌ حه‌ماس زیاتر میانڕه‌وتر ده‌خاته‌ڕوو، چونكه‌ سه‌باره‌ت به‌پێی‌ ئامانجه‌ نیشتیمانییه‌كان له‌ به‌رنامه‌ و پرۆگرامی‌ هێزه‌كانی‌ نێو رێكخراوی‌ رزگاریخوازی‌ فه‌له‌ستینی‌ نزیكده‌بێته‌وه‌، له‌ڕووی‌ قبوڵكردنی‌ دامه‌زراندنی‌ ده‌وڵه‌تی‌ فه‌له‌ستینیش له‌چوارچێوه‌ی‌ سنوره‌كانی‌ چواری‌ حوزه‌یرانی‌ ساڵی‌ 1967، له‌گه‌ڵ پابه‌نبوون به‌ مافی‌ گه‌ڕانه‌وه‌ی‌ ئاواره‌ فه‌له‌ستینییه‌كان به‌بێ‌ داننان به‌ ئیسرائیل، هه‌ڵوێستی‌ حه‌ماس هیچ جیاوازییه‌كی‌ له‌گه‌ڵ بزوتنه‌وه‌كانی‌ تری‌ فه‌له‌ستینی‌ هاوشێوه‌ی‌ بزوتنه‌وه‌ی‌ فه‌تح نابێت، به‌ڵام به‌بێ‌ دیاریكردنی‌ هه‌ڵوێستی‌ ستراتیژی‌ خۆی‌ به‌رانبه‌ر به‌ چاره‌سه‌ری‌ ململانێی‌ نێوان فه‌له‌ستین و ئیسرائیل». 
په‌یڕه‌وه‌ی‌ نوێی‌ بزوتنه‌وه‌كه‌ كه‌ به‌ ره‌سمی‌ ئاماژه‌ی‌ به‌ بوونی‌ په‌یوه‌ندی‌ رێكخراوه‌یی‌ له‌نێوان حه‌ماس و بزوتنه‌وه‌ی‌ ئیخوان موسلیمین نه‌كردووه‌، به‌ خاڵێكی‌ بنه‌ڕه‌تی‌ و گرنگ داده‌نرێت و لێوه‌ی‌ حه‌ماس خۆی‌ وه‌ك به‌شێك له‌ بزوتنه‌وه‌ی‌ نیشتیمانی‌ فه‌له‌ستینی‌ ده‌خاته‌ڕوو، هه‌رچه‌نده‌ له‌ڕووی‌ فكرییه‌وه‌ بزوتنه‌وه‌یه‌كی‌ ئیسلامیه‌ و له‌ په‌یڕه‌وه‌ نوێیه‌كه‌شیدا ته‌ئكید له‌سه‌ر ده‌ستوه‌رنه‌دانی‌ بزوتنه‌وه‌كه‌ له‌ كاروباری‌ ده‌وڵه‌تان ده‌كاته‌وه‌، ئه‌وه‌ش وه‌ك هه‌وڵێكی‌ حه‌ماسه‌ بۆ گه‌یاندنی‌ په‌یامی‌ خۆی‌ به‌ ژماره‌یه‌ك له‌ وڵاتانی‌ عه‌ره‌بی‌ و  وڵاتی‌ میسر به‌تایبه‌تی.


ناو:  
ئیمه‌یل:    
سه‌رنج:  

#7280
30/5/2017
ئه‌رشیف
وه‌رزش
‌ كیربیر ماڵئاوایی كرد 30/5/2017
‌ به‌ڵێنه‌كه‌ی‌ ده‌باته‌ سه‌ر 30/5/2017
زانست
‌ خواردنه‌وه‌ی دوو كوپ قاوه‌ له‌ ڕۆژێكدا به‌سووده‌ 30/5/2017
‌ به‌ر له‌ به‌كارهێنانی بۆنخۆشكه‌ری هه‌وا ده‌بێت ئه‌م ڕاپۆرته‌ بخوێنینه‌وه‌ 30/5/2017
‌ كیوكن هۆف، سه‌رچاوه‌ی نان به‌ گوڵ 28/5/2017

© 2009 KURDISTANY NWE, All RIGHTS RESERVED. | CREATED BY AVESTA GROUP