3/8 زامی ساڕێژنەبووی ئێزیدییەكان
کۆچۆ کوردستانی نوێ 3/8 زامی ساڕێژنەبووی ئێزیدییەكان ‌ 6/8/2017
دووتوێیەکی كوردستانی نوێ-ی تایبەتە بە چیرۆکەکانی جینۆسایدی ئێزدیان و کۆمەڵکوژیی و بەکەنیزەک کردنی کچان و ژنانی گوندی کۆچۆ
دوو قسە..
پاش ئەوەی چاپی یەكەمی كتێبی «جینۆسایدی ئێزدییەكان-نووسین و دۆكۆمێنت» بڵاوبوویەوەو بۆ سەرزمانی فارسی وەرگێڕدراو لەكەمترین ماوەدا دووجار چاپ و بڵاوكرایەوە. كتێبی دووەم «جینۆسایدی ئێزیدییەكان-گووندی كۆچۆ» چاپی یەكەم بڵاوكرایەوەو ساڵی و سەرەتای ئەمساڵ 2017 چاپی دووەمی بڵاوكرایەوەو كاتێك ئەم دێرانەش دەنووسین كورتەو پوختەكەی بە «ئینگلیزی» لەژێرچاپدایە. هەر لەم ماوەیەدا كۆمەڵێك ستۆری پڕ ئازاری قوربانییەكانی ئێزدییەكان لە رێگای هاوڕێ و برای رۆژنامەنووس و توێژەری مێژوویی «داود موراد خەتاری» گەشتە دەستم و بەشێكی تریشیان لە رێگای واڵاكەیەوە بەدەستم هێناون.
لەو ماوەیە هەموو ستۆرییەكانم لە زمانی عەرەبیەوە بۆ كوردی ئامادەكردوونەتەوەو لێرەدا چەردەیەكیان كە بۆ كوردستانی نوی و تایبەت بە یادی سێ ساڵەی تاوانەكانی داعش ئامادەكراوە، دەخەینە بەردەست بە ئومێدی ئەوەی كەلەبەرێك لە دۆكۆمێنتكردنی شوێنەوارو كاریگەرییەكانی تاوانەكانی داعش پڕ بكاتەوە. 
وەرگێڕان و ئامادەكردنی: تەها سلێمان
قوربانیی یەكەم 
خوێن لە سكمەوە رژایە سەر عەرز
 «ع ش ا» لەدایكبووی 1996، دانیشتووی كۆجۆو یەكێك لە دەربازبوەكان، بەم شێوەیە بەسەرهاتی خۆی دەگێڕێتەوەو دەڵی: بە ئۆتۆمبێلێكی دێری سپی باوكمیان برد، دوای ئەوەش پیاوەكانی گوندیان بە ئۆتۆمبێلەكانی گووندەكە برد، كاتێك لە نهۆمی دووەمی قوتابخانەكە هاتینە دەرەوە، بینیم باپیرم بەتەنیا لەناو قوتابخانەكە ماوەتەوەو داعشەكانی بانگ كردو لەگەڵیان رۆشت.
ئەم ئافرەتە خوێندكاری شەشەمی زانستی بوەو دەڵی: ئێمە 15 ئافرەت بووین، وایان هەڵبژارد ئێمە جوانترین كچی گوندی كۆجۆین و بردینیان بەرەو پەیمانگای گوندی سۆلاغ، لە رێگا پرسیاریان لە ئەمیرەكەیان «ئەبو حمزە حەمیدی» كرد، ئافرەت و منداڵەكان بۆ چ لایەك دەبەین؟ بۆ پەیمانگای سۆلاغ. دوای ئەوە ئەو خانەوادانەی مابوونەوە هەمویان كۆكردەوەو لە پەیمانگاكە پێمان وتن: چارەنووسی پیاوەكان چیە؟ ئێمە گوێمان لە دەنگی تەقە بوو؟ یەكێكیان كە سعودی بوو، وتی: وەڵاهی هەمویانمان كوشت. داعشێكی عیراقی وتی: باوەڕ بەقسەی ئەم سعودیە مەكەن، تەنها گولەمان بە هەوادا تەقان بۆ خۆشی سەركەوتنی دەوڵەتی ئیسلامی.
هەروەها دەڵی: كاتژمێری 11ی شەو، ئێمە «114» ئافرەت لە گەڵ «70» منداڵ لە تەمەنی «3 بۆ 10» ساڵ، بەسی ئۆتۆمبێلی گەورە پاسی «44» چل و چوارنەفەری، رەوانەی تەلعەفەریان كردین، كاتێك گەیشتینە ئەوێ، منداڵەكانیان نارد بۆ مەركەزی گەڕەكی كیفاح لەناو تەلعەفەر، بەڵام ئێمە بۆ موسڵ و لەوێش لەناو ماڵی قایمقامی موسڵ. لەم ماڵە 10 ئافرەتی تری ئێزدی لی بوو، لێیان سك پڕبوون و نەیانیان فرۆشتبوو، سێیان لە ئافرەتەكان هەوڵی خۆكوشتنیان دابوو، لە دۆخێكی خراپدا بوون.
داوایان لە ژنەكان كرد سەرپۆشەكانیان لابەرن..
دوای دوو رۆژ والی موسڵ «ئەبو لەیس» لە عەشەرەتی «تی»  لەگەڵ قازی «حەجی عەبدوڵڵا ئەل عەفەری» و وەكیلی خەلیفەی موسل «حەجی مومتز ئەل عەفەری – ئەبو موسلم توركمانی» و كۆمەڵێكی تر هاتن و داوایان لە ئافرەتەكان كرد سەرپۆش «رووپۆش»كانیان لەسەر دەم و چاو لابەن و دەستیان بەدابەشكردن كرد. 
ئێمە «37» ئافرەت بەسەر ئەو ماڵە مەسیحیانەی هەڵاتبوون دابەشیانكردین، منیان هەڵبژارد بۆ ماڵی والی موسل «ئەبو لەیس –رزوان تالیب حەمدوون»، دوو ژنی هەبوو، من خوشكەكەم لەگەڵم بوو، چوار رۆژ ماینەوەو داعشەكان بەمەبەستی كڕین دەهاتنە تەماشامان، ئەمیرێك هات ناوی «شاكر» بوو، داوای لە پاسەوانەكان كرد سەرم بخەنە سەر ئۆتۆمبێلەكەی. بەڵام پێیان وت: ئەمە گیراوە بۆ والی موسڵ. دواتر خوشكەكەمی هەڵبژارد، سلوكیان نائەخلاقی بوو، منیش رێگریم لێكردن لە بردنی خوشكەكەم، بە كێبڵ زۆر خراپی لێدام و خوێن لەناو سكمەوە كەوتەڕی. والی هات و سكاڵام كرد، ئەویش من و خوشكەكەمی برد بۆ ماڵێكی تر، لەگەڕەكی ئەندازیاران كە كۆمەڵێك ئافرەتی تری ئێزدی لێبوو لەوانە «ر، ن، ف، ه»، و هتد لە كۆی «44» ئافرەت تەنها «10» ئافرەت ماینەوە. 
داوام لێیان كرد با هەموومان ئینتحار بكەین..
هەروەها دەڵی: داوام لێیان كرد با هەموومان ئینتحار بكەین، بەڵام یەكێكمان داوای كرد كەمێك راوەستم لەم بڕیارە، چونكە ئێمە كەوتینەتە ژێر دەسڵاتی تاوانكاری ئەوان، پێویستە سەبرمان هەبی و بەرگەی ئەمە بگرین تا كاتی دەرچونمان. والی موسڵ داوای لێم كرد: بچم بۆ ژوورە تایبەتەكەی، من رەدم كردەوە، بۆیە بۆ ماوەی یەك مانگ بە شێوەیەكی بەلێدان و توندوتیژی مامەڵەی لەگەڵم دەكرد. زۆر جار پرسیارم لێكرد، بۆچی بەم شێوەیە مامەڵەمان لەگەڵ دەكەن و دەتانەوی دەست درێژیمان بكەنە سەر؟ وڵامی دامەوەو وتی: خوای گەورە ئافرەتە ناموسڵمانەكانی بۆ ئێمە حەڵاڵ كردوە بە ئیغتساب و فرۆشتنیشەوە، دەبێت هەموو جیهان بزانێ‌ دەبێت شەریعەتی ئیسلام تەتبیق بكرێت لەسەر گۆی زەوی و لەنزیكترین وەختاو بە پەلە دەگەینە رۆماو دەیكەینەوەو موسڵمانان سەیتەرە دەكەن بەسەر ئەورپاداو رۆژ دوای رۆژ ژمارەی موسڵمانان روو لە زیادبوون دەكەن تیایدا، لە دایكبوونی هەموو ئاینەكانی رادەگرین و شەریعەتی ئیسلامی بەسەر هەموو جیهاندا بەرجەستە دەكەین و هیچ مەجالێكی تیا نیەو  تا دەگەینە سین و رۆما. 
دەشڵی: بە زۆر وەسیلە هەوڵمدا ئیقناعی بكەم لە زانیاری پێدان دەربارەی چارەنووسی كەس و كارەكانمان لە كۆجۆ، بەڵام ئەو یاری دەكردو نەیدەویست نهێنی دەوڵەتی ئیسلامی بدركێنی. پاش یەك مانگ پێی وتم یان شووم پێبكە یان دەتنێرم بۆ زیندانی رەقە لە سوریا، بەناچاری و بەمەرجی قبوڵم كرد كە خوشكەكەم لام بمێنێتەوەو نەیدەن بەكەس، ئیتر بۆ ماوەی سی مانگ لەوی ماینەوە، دەیەویست من لێی حەمل بم، وەكاتێكیش كە دەیبینی لەنوێژكردن دوا دەكەوم بە شێوەیەكی تووڕەو غەزەباوی تەماشای دەكردم. ئەبو لەیس دەیوت لەسەرەتای درووستبوونی قاعیدە لەعیراق من پەیوەندیم پێیانەوە كردوەو دواتر بووین بە دەوڵەتی ئیسلامی و بۆ زانیاری ئەبو لەیس هەڵگری بڕوانامەی سەرەتایی بوو.
ئێمە، من و «ن» لەگەڵ «ئەبو لەیس» و خوشكەكەم «ش»  لەگەڵم بوو، «ر» لە گەڵ «سەدام» و لەم ماوەیە هەموو ئافرەتەكان هەموو ئافرەتەكان هەڵهاتین تەنها «7» كەس مانەوە. 
خەبەریان لێمانداو دەستگیركراین..
دەشڵی: جارێك كە هەڵهاتین، زۆر شەقام گەڕاین، دواتر چوینە ماڵێك و ئەوانیش خەبەریان لێمانداو دەستگیركراین و لەناو تەوالیتی پاسەوانەكان رایانگرتین. والیش ئەبو سەعدی ئاگادار كردبوەوە، كە دەستگیرمان بكەن، كاتێك هات لەگەڵ جێگرەكانی ئەبو بەكر ئەوانیش «حەجی موعتەز ئەل عەفەری و ئەبوحارس» بوون، گەڕاندمانیانەوە.
بە كێبڵ ئەشكەنجەیەكی زۆریانداین تا هۆشمان لەدەستداو خوێن لە دەممانەوە تا پەنجەی پێمان رێی دەكرد، كاتێك حاجی موعتەز بینی خوێنمان لەیەر دەچۆڕی داوای كرد لێدان بەسە، ئێستاش ئاسەواری برینی لێدانەكە بە گیانمەوەیە. دەیانەویست پێیان بڵێین كی خاوەنی بیرۆكەی هەڵهاتنەكە بوە؟  وە چۆن دەستمان گەشتوە بە مۆبایل و سیمكارت؟ بەڵام هەموومان رەدمان كردەوە بە پێدانی زانیاری لە بارەی پرۆسەی هەڵهاتنمان، پێمان وتن: مۆبایلمان لەماڵەكەدا دۆزیوەتەوەو كەس و كارمان لە دهۆك ئاگادار كردوەتەوە.
حاجی موعتەز پرسیاری لێكردم و وتی: بۆچی دەتانەوی هەڵبێن، ئەوەتانی ئێمە خواردنتان بۆ دابین دەكەین. پێم وت: ئێوە سوود مەندن و لێرەوە هیچ خواردنێكمان مەدەنی، دووان كە لەگەڵی بوون هێرشیان بۆ هێنام و لێیاندام و هۆشم لە دەستدا.
دوای ئەوە چوار رۆژ نانیان پێنەداین، والی پێی وتم: ئەگەر تۆ لە خێزانێكی ناسراو موحتەرەم نەبوایت كە ناسراون لای خەڵكی موسڵ و ئێمەش پەیوەندیمان هەبوە لەگەڵیان، دەتم نارد بۆ سوریا. پێم وت: بەڵی كاتی خۆی لەنێوان ئێمەو ئێوە خزمایەتی خوێن هەبوو، بەڵام ئێستا لەجیاتی ئەوەی داكۆكی لەو خزمایەتیە بكەن دێن و ئیغتسابی دەكەن؟ ئایا ئەمە قیمەتی ئێوەیە؟ ئەمەیە رەسەنایەتی و كەرامەت و غیرەتی ئیوە؟ ئایا سەیری خۆتان ناكەن تەنها بەدوای شەهوەتەكانتانەوەن وەك وەحش؟ بیر لەوە ناكەنەوە ئیغتسابكراو بەدوای هەموو ئامرازێكدا دەگەڕی بۆ وەڵام تەنانەت ئەگەر زەمەنیش درێژبێتەوە؟ ئایا لەناوتانا پیاوێك نیە بیر لە ئایندەی شەرەفتان بكاتەوە؟ باش دەزانم ئەوەی دەست درێژی بكاتە سەر شەرەفی خەڵك، دەست درێژی دەكرێتە سەر شەرەفی زوو یان درەنگ؟ مومكین نیە كەس و كارەكانمان بێدەنگ بن لە بەرامبەر لەدەستدانی شەرەفیان، بەڵام مرۆڤایەتی ئێوەی ناسی چۆن و بەچ شێوازێكی وەحشیگەرییانە مامەڵە دەكەن، كە نەپەیوەندی بە مرۆڤایەتی و نە بەخواوە هەیە.
دەشڵی: دواتر بەزۆر ناردمیانە پەیمانگای قورعان و زۆر ئایەت و حەدیسیان پی لەبەركردم، كە بەدرێژایی كاتژمێرێك و زیاتر دەمانخوێند.
بارەگای والی «ئەبو لەیس»یان بۆردومان كردو كوشتیان
ئەو باسی ئەوەش دەكات و دەڵی: رۆژی 19/11/2014 فڕۆكەكان بارەگای والی «ئەبو لەیس»یان بۆردومان كردو كوشتیان، كاتێك هەواڵەكەم بیست زۆر دڵخۆش بووم، بەڵام لەهەمانكاتدا دڵتەنگیش بووم، چونكە دەموت داعشەكان رادەستی یەكێكی ترم دەكەن لەو پیستر، خوشكەكەشم هەر لەگەڵمدایەو تا ئێستا نەیانبردوەو ئەویش دەدەنە داعشێك و لەیەكتر جیامان دەكەنەوە. خوایە گیان ئەم موسیبەتە لە هەموو موسیبەتێك گەورەترە، لە گەورەوە بۆ یەكێكی تر! ئەبو لەیس لە گۆڕستانی گوندی ژنەكەی نێژرا. 
دوای یەك هەفتە حاجی موعتەز هات و داوای لێمكرد: شووی پێبكەم. ئەوەم رەت كردەوە، بەڵام زۆری لێكردم و لەگەڵی مامەوەو خوشكەكەمی رادەستی داعشێك كرد.
باسی ئەوەش دەكات كە زۆر جار رایان كردووەو بەڵام دەستگیركراونەتەوەو دەڵی: لەكۆتاییدا رۆژێك هەموو داعشەكان رۆیشتن بۆ نوێژ، دەرگا سەرەكیەكانیان قفڵ كرد. رۆشتمە سەربانی خانووەكە نهۆمی دووەم، چۆنێتی شوێنەكەو هەڵهاتنم تاقیكردەوە، بۆیە بانگی هاوڕێكانم كرد، كە سێ كەس بوون، داوام لێكردن بە یەكەوە بچینە خوارەوە، یەكەمجار من رۆشتمە خوارەوە، ماوەی نێوان سەرەوەو خوارەوە نزیك بوو.  
شتێكی كەم لەنێوان من و عەرزەكە مابوو، خۆم خستە خوارەوەو ئازارم پێنەگەیشت، یەكێكی تریان هاتە خوارەوەو پێش ئەوەی بكەوێت من گرتم و بەو شێوەیەو ئەو شەوە هەڵهاتین و پەیوەندییمان بە كەسوكارمانەوە كردو رزگارمان بوو. 
تێبینی: «حاجی موعتەز- فازل ئەحمەد ئەل حیالی»، ئەو یەكێك بوو لە یاریدەرەكانی ئەبو بەكر بەغدادی و راسپێرابوو بە سەرپەرشتی كردنی كارو چالاكییەكانی داعش لە عیراق، لە قەزای تەلعەفەر لەدایك بوە، پێشووتریش لە سوپای عیراق پلەی عەقیدی هەبوە تا رووخانی بەعس لە 2003، لە 18-8-2015 لە ئاكامی بۆردومانەكانی هاوپەیمانان كوژراوە. 
قوربانیی دووەم
لەسەرەتادا جوانەكانیان هەڵدەبژارد
لویزا سەبری لەدایكبووی 1996، باس لە چیرۆكی ئازارەكانی لە بن دەستی داعش دەكات. ئەو بەبێ‌ ئەوەی مەبەستی بێت، بە ئاسانی و سادەیی دەمانكاتە پارچەیەك لە خۆی و لەوە دەست پێدەكات كە رۆشتوە بۆ ماڵی پورەكەی بۆ یەك شەو مانەوە، بۆ ئەوەی لەوێوە چاودێری دۆخەكەو رووداوەكان بكات. بەڵام بەداخەوە دراوسێكەیان كە مەیتوتی بوە، خەبەریان لێدەدەن و دەستگیر دەكرێن و دەیانبەنە فەرمانگەی باری شارستانی و هەر لەوێ‌ پیاوەكانیان لێ جیا دەكەنەوەو بەرەو قەزای تەلعەفەریان دەبەن و بۆ ماوەی سێ‌ رۆژ لەوێ‌ دەمێننەوە. وەك خۆشی تەئكید دەكاتەوە لەوێ‌ لە دۆخێكی ئەمەندە دژواردا بوونە ئاوی ناو «حەمام»ەكانیان خوردوەتەوە.
كاتێك ئەم چیرۆكانەی جینۆسایدی ئێزدییەكان، بە تایبەتتر چیرۆكی ئەو كچ و ژنانەی داعش بە دلڕەقانەترین شێوە مامەڵەی لەگەڵ كردوون، بیناییم تەڵخ دەبن و بارێكی گەورەو قورس لە سەر رۆحم دەنشنەوە. ئیتر لێرەوە چیرۆكەكان دەبنە بەشێك لە بوونم و بەردەوام بەناو زیهنما دێن و دەچن و كاریگەری خۆیان جێدڵن؟! 
سەرەتا جوانەكانیان هەڵبژارد
لویزا لە درێژەی گێڕانەوەی بەسەرهاتەكەیدا باسی ئەوە دەكات بەردەوام گێچەڵ بە كچ و ژنەكان كراوەو باسی ئەوەش دەكات كە جارێكی تر گەڕێنراونەتەوە بۆ هۆڵی كلاكسی لە موسڵ و هەمدیس بۆ تەلعەفەر!!
ئەوەتانێ‌ لویزا بە نیگەرانی و ناخێكی پڕ حەسرەتەوە باسی ئەوە دەكات، سەرەتا جوانەكانیان هەڵبژارد، خوشكەكەم «عەزیزە سەبری» یەكێك بوو لەنێوانیاندا. رۆژی دووەم ئەمیرەكەیان هات و دابەشمانی كرد، هەروەها ئەمیرێكی تر بە ناوی «ئەبو موسا- ئەزهر عەلی حسێن خاتونی» لەگەڵ ئەمیرێكی تر هاتن و كۆمەڵێكمانیان هەڵبژاردو بردمانیان بۆ قەزای بەعاج. ئەوەش بە وردی باس دەكات كە ئەوان «لیزا سەبری، جیلان برجس، جیهان برجس، نوفا عەمو، بفرین عەمو، غزاڵ، رویدە، ئینتزار كۆ، نەجلا سەعید، عالیە سەعید لە تەل قەسەب، فخریەو شەیما خیرۆ لە شەنگال، حەنان لە بەعشیقە، بەهارو خوشكێكی جوانی لە تەلعوزێر»بوون.
لویزا باسی ئەوەش دەكات كاتێك كە «جیلان» خۆی كوشت و ئینتحاری كرد، ئەم داعشانە لەوێ‌ بوون «ئەبو هیلال، ئەبو عەبدوڵڵا، ئەبو غفران «عید مشعل»، ئەبو موسا «ئەزهر عەلی حوسین خاتوونی». هەر دوای ئەوە ئەبو موسا دێت و لویزاو پورەكەی و خوشكەكەی دەبات بۆ گوندی «رامبوسی و بە قسەی لویزا خۆی كە دەڵێ‌»: لەوێ‌ ئیغتسابی كردم و دوو مانگ لای مامەوە»و ئەمانەشی لەگەڵ بوە «شەیما خیرۆ، فخریە لە تەل قەسەب. دیارە ئەم ئەمیرەی داعش بەرپرس بوە لە بەعاج و لە یەكێك لە شەڕەكاندا كوژراوە.
ئەبو غوفران و ئەبو رەقە دێن و دەیبەن بۆ كۆمەڵگای تەل بەنات
چیرۆكی لویزا سەخت و پڕ ئێشتر دەبێ‌، ئەوەتا پاش ئیغتسابكردنی و دوای كوژرانی ئەبو موسای جەلادو دڕندە، دەیگەڕێننەوە بۆ كەس و كارەكەی لە «حسێبە-سوریا»و سەرباری ئەم هەموو چەرمە سەرییە داوای لێدەكەن رۆژو بگرێ‌ و نوێژبكات، و وەك بێوەژن لە ماڵەكەیان بمێنێتەوە». ئەمیش وەك خۆی باسی دەكات بەچ شێوازێك بوە نازانم بەڵام دەڕواتەوە بۆ لای ئەو كەس و كارانەی كە لە تەلعەفەر بوون بۆ ماوەی یەك مانگ لەوێ‌ دەبێ‌ و دواتر داعشێك لە بەعاجەوە دێت و دەیبات.
سەیربكە بنواڕە لە دڕندەیی داعش، دوای ئەوە ئەبوغفران و ئەبو رەقە دێن و دەیبەن بۆ كۆمەڵگای تەل بەنات و لەوێشەوە بۆ موسڵ و لە هەمان رۆژدا دەیانەوێ‌ بیفرۆشن، بەڵام ئەم بەشەڕ دێت لەگەڵیان و ئیتر دەیبەن بۆ ماڵێك»: بردمیان بۆ ماڵێك دە كچی كەس و كاری خۆی لە شەنگاڵ لەوێ‌ دەبن بۆ ئەوەی فێری قورعان خوێندنیان بكەن». ئەو دەڵێ‌»: من بەردەوام لە گەڵ پاسەوانەكان بەبەردەوامی شەڕم دەكرد بۆیە رەوانەی رەقەیان كردم لە سوریا». تۆ سەرنج بدە لەلایەك ئیغتساب كردن و لەلایەك قورعان خوێندن بە كچێك كە تەمەنی ئەوكاتە لە نێوان 18 بۆ بیست ساڵ بوە؟ چ نەفرەتیەكە دەوڵەتی ئیسلامی «داعش» و جەلادەكانیان؟
لەوماڵەی كە لێی ماونەتەوە، شەوێك یەكێك لە پاسەوانەكان پێی دەڵێ‌ ئەگەر دەتەوێ‌ هەڵ بێی یارمەتیت دەدەم؟ ئەویش تێدەگات لەوەی پاسەوانەكە دەیەوێ‌ بزانێ‌ ئایا نیەتێكی وای هەیە لەژێردەستی دەوڵەتی ئیسلامی رابكات؟ بۆیە پێیان دەڵێ‌»: لەخوا بەزیاد بێت من بووم بە موسڵمان و نامەوێ‌ لە خاكی خەلافەتی ئیسلامی دەربچم. پاسەوانەكەش پێی دەڵێ‌»: سوپاس بۆ متمانەت بە ئیسلام و دەوڵەتی ئیسلامی. 
پاسەوانەكە هەموو دەرگاكانی ژوورەكانی داخست
لویزا باسی ئەوەكات كە شەوی دووەم، من تەنیا بووم.. پاسەوانەكە هەموو دەرگاكانی ژوورەكانی داخست بە دەرگای سەرەكی ماڵەكەشەوەو رۆشت. ئەمیش لەم كاتە دەرفەت دەقۆزێتەوەو لە رێگای بۆشاییەكەوە دێتە دەرەوەو بە دیواری حەوشەكەدا هەڵدەگژێ‌ و دێتە دەرەوە. خۆیشی ئاوا دەڵێ‌»: دابەزیم و رووپۆشەكەم دا بەسەرماو بە شەقامەكەدا كە كەشێكی باراناوی بوو رێم دەكرد. تەكسییەكم راگرت و داوام لێكرد بگەیەنێتە حەسەكە یان دێر زوور؟ ئەویش پێی دەڵێ‌»: من تەنها لەناو داخلی رەقە كار دەكەم، بەڵام ئیمكان هەیە بتگەیەنمە حەسەكە؟
لویزا سەردەكەوێتە سەر تاكسیەكەو شۆفێرەكەش داوای كرێی لێدەكات؟ ئەویش پێی دەڵێ‌: ئەمەوێ‌ زۆر راستگۆبم لە گەڵت من هیچ پارەیەكم پێنیە چونكە من ئێزدیم و داعش هێنامیانە بۆ ئێرەو لە خێزانەكەم دابڕاوم؟ شۆفێرەكەش پێی دەڵێ‌»: بەبێ‌ كرێ‌ ناتوانێ‌ بیگەیەنێ‌؟
گەر پێم بزانن ماڵەكەم بەسەرمدا دەڕوخێنن؟ 
شەوەو دینا ساردە، باران دەبارێ‌ و ئافرەتێك تەنیاو كەس شك نابا، زۆر دەپاڕێتەوە بۆ ئەوەی بەم شەوە جێی نەهێڵێ‌ و لە دەست زاڵمانی داعش رزگاری بكات؟ دیارە شۆفێرەكەش باسی ئەوە دەكات كە ناتوانێ‌ تەحەدای پیاوەكانی دەوڵەتی ئیسلامی بێتەوە؟ ئەویش داوای تیلەفۆكەی دەكات بۆ ئەوەی پەیوەندی بكات بە كەس و كاری لە كوردستان؟ شۆفێرەكەش دەڵێ‌ تیلەفۆنەكەم شەحنی تێدا نیە، ئەمەش وەك پاساوێك بۆ هاوكاری نەكردنی؟ لویزی پێی دەڵێ‌ بمگەیەنە شوێنكێك لە دەرەوەی دەوڵەتی ئیسلامی، ئەوكاتە خێزانەكەم ئەو مەبلەغەی دەتەوێ‌ دەتدەنێ‌؟ شۆفێرەكەش دەڵێ‌ ناتوانم سنور ببەزێنم چونكە نایاساییە لەلایەن دەوڵەتی ئیسلامیەوە؟ پێی دەڵێ‌ بمبە بۆ ماڵەكەت؟ شۆفێرەكەش دەڵێ‌»: گەر پێم بزانن ماڵەكەم بەسەرمدا دەڕوخێنن؟ 
ئیتر لویزی چیبكات؟ بۆ كوێ‌ بڕوات؟ ناچار روودەكاتە شۆفێرەكەو پێی دەڵێ‌»: برا چارەیەكم بۆ بدۆزەوە؟ شۆفێرەكەش دەڵێ‌»: كوردی دەزانی؟ دەتبەم بۆ ماڵی كەسێكی كورد لەدرەوەی شار، بە هێچ شێوەیەك لە دەرگا نەدەی تا ئەوكاتەی من لێت دوور دەكەومەوە؟
لویزی دەڵێ‌»: بۆ چەند جارێك لەدەرگامدا، بەڵام نەیانكردەوە؟ ئەو باسی ئەوەش دەكات هیچ چارەیەكی تری نەبوە تەنها كردنەوەی دەرگاكە نەبێت؟ بۆیە دەرگاكە دەكاتەوەو ئەوانیش پێشوازی دەكەن و پێی دەڵێن كێشەت چیە یان چیت دەوێ‌؟ ئەویش رووپۆشەكە لەسەر دەم و چاوی لادەبات و دەڵێ‌ من ئێزدیم و چیرۆكەكەی خۆی بۆیان باس دەكات. 
ئەوەش باس دەكات، كە بردویانەتە ماڵێك و لێیان پرسیوە چۆن ماڵی ئێمەت هەڵبژارد؟ كاتێك زانیان شۆفێری تاكسییەكە گەیاندویەتی یان ناو نیشانەكەی داوە، ترساون لەوەی خەبەری داعش بدات، چونكە شۆفێری تاكسیەكان زۆربەیان ئیشی جاسوسی بۆ دەوڵەتی ئیسلامی دەكەن؟ 
بۆیە لویزی دەبەن بۆ ماڵێكی داڕووخاو، حەوت رۆژ لەوێ‌ دەمێنێتەوەو لەم نێوانەدا پەیوەندی بە كەس و كارییەوە دەكات و دواتر دەگاتە حەلەب و لەوێ‌ موبایل و سیم كارت دەكرێ‌ و پەیوەندی دەكاتەوە. ئیتر بۆ هەمیشە رزگاری دەبێت.
قووربانیی سێیەم
پاش نۆ جار فرۆشتن؟
عیشان یەكێكە لە قوربانیانی دەستی داعش و دوای رزگاربوونی ئاوا باسی مەینەتیەكانی لە بن دەستی داعش دەكات»: دوای ئەوەی خێزانەكەمانیان ئیبادە كرد، لە مەزرعەكەی باوكمەوە لە گرعوزێر بردمانیان بۆ سیپا شێخ خدرو دواتریش بۆ بەعاج و موسڵ. دوای یەك مانگ دابەشمانیان كردو بۆ ماوەی یەك ساڵ و نێو لای كەسێك مامەوە».
باسی ئەوەش دەكات كەئەوان بیست و سێ‌ ئافرەت بوون لەناو كۆمەڵێكی زۆردا هەڵیانیان بژارد لەناو هۆڵی «كلاسی-موسڵ» بۆ ناو سەربازگەی شارەكەو لەوێش كۆمەڵێك داعش هاتوون و داویانن بەوان یان راستتر ئەوەیە بڵێین بۆ ئەوانیان كرد بەدیاری وەك سەبی.
دەبێت لەدۆخێكی ئاوادا هەستی ئەم ئافرەتانە چۆن بوبێ‌؟ كە چاوەڕێی دڵڕەقترین ساتەكانی سەوداكردن بوون پێیانەوە؟ بێگومان هەتا بڵێی ئەم ساتەوەختە قورس و پڕئازارو ئێشە. ئەوەتا عایشان ئاوا وێنای دەكات. كاتێك كە ئەمیرێكی دەوڵەتی ئیسلامی بەناوی «رەسوڵ عەبدوڵڵا عەلی» كە بە «موهەندس» ناسراو بوە لە گوندی «سیتا»ی رۆژئاوای موسڵ بۆ خۆی دیاریكردوە، بە شێوەیەكی زۆر وەحشیانە مامەڵەی لەگەڵ كردوە تەنانەت خێزانەكەیشی. ئەوەش روون دەكاتەوە كە ئەو زانیویەتی ئەمانە بوون باوكی و مامەكانیان كوشتوەو خوشكەكانیان هەتیوكردوەو دەست درێژییان كردوەتە سەر شەرەفی، بۆیە بەردەوام بە چاوی رق تەماشایانی كردوە. 
عایشان ئەوەش روون دەكاتەوە كە دواتر بردویانە بۆ ماڵێك بارەگای ژمێریاری بوەو دوو پاسەوانی لێبوەو بۆ ماوەی سێ‌ رۆژ لەوێ‌ بوە. لە شەوی دەست درێژی كردنە سەریدا، ویستویەتی بە هەر شێوەیەك بێت بەرگری لە خۆی بكات، بەڵام داعشەكە زۆری لێداوە تا هۆشی لە دەستداوەو ئیتر ئاگای لە هیچ شتێك نەماوە یان هیچی نەزانیوە، تا ئەو كاتەی بە ئاگا هاتوەتەوە دەبینێ‌ خوێن بە گیانیەوەیەتی و ئەوكات دەزانێ‌ دەستدرێژییان كردوەتە سەری. 
بەناو كۆڵانەكاندا رێدەكات....
خۆ كاتێك مرۆڤ دەگاتە لوتكەی چەشتنی ئازار بیر لە رێگای سەخت دەكاتەوە. رێگای سەخت چۆنە؟ كاتێك تۆ سور بزانی چوار دەورت بە جەلادو دڕندە گیراوەو هەوڵی هەڵهاتن بدەیت؟ عایشان باسی ئەوە دەكات ئەو كاتەی لە بارەگاكەی داعش بوە هەوڵی هەڵهاتنی داوەو بەڵام دەرگاكەی لە دوای خۆی كڵۆم نەداوەو هاوكات ترسی لەوەش هەبوە پاسەوانەكان لەكاتی بیستنی دەنگدا پێی بزان. ئەو بەناو كۆڵانەكاندا رێدەكات، بەبێ‌ ئەوەی بزانێ‌ لەكام ناوچە یان گەڕەكی شاری موسڵدایە، چونكە پێشووتر سەردانی موسڵی نەكردوەو شارەزا نەبوە تابزانێ‌ لە كوێی شارەكەدایە؟ بۆیە شانسی رزگاربوونی نابێت و دوای یەك كاتژمێر پاسەوانەكان دەستگیری دەكەنەوە.
دڵڕەقی داعش و داعشەكان هەر بە خۆیانەوەیەو زۆربەی جاریش تەنیا لە خۆیان دێت. ئەوەتا عیشان باسی ئەوە دەكات كە وێڕای ئەوەی بوە بە ئیسلام، بەڵام هەمیشە وەك كافرو سەبایا مامەڵەیان لەگەڵ كردوە. بۆیە عایشان ناوەستێ‌ و جارێكی تر هەوڵی هەڵهاتن دەداتەوە. دوای سێ‌ كاتژمێر لە رێكردن دەرگای زۆر ماڵ دەكوتێ‌، بەڵام دوای ئەوەی كەدەزانن ئیزدییەو هەڵهاتوە، رەدی دەكەنەوە داڵدەی بدەن. وەك عیشان باسی دەكات دواجار ئافرەتێك دەرگای لێدەكاتەوەو دەیكاتە ژورێكەوەو بۆ بەیانیەكەی مەفرەزەیەكی داعش دەستگیری دەكەنەوەو ئیتر لێرەوە غەزەب بەسەریدا دەڕشێنن و دواتریش رادەستی «موهەندیس»و ژنەكەی دەكەنەوەو ئەوانیش بێدرێخ لێی دەدەن و ئازاری دەدەن. 
عایشان هەست بەوە دەكات كە موهەندیس دزی لە داعش دەكات بەو پێیەی ژمێریاری دارایی بوە، كاتێك ئەمە ئاشكرا دەبێت بڕیاری دەستگیركردنی دەدەن و زیندانی دەكەن و دەست بەسەر هەموو سەروەت و سامانەكەی دەگرن. عایشانیش دەبێتە بەشێك لە سەروەت و سامانەكەی چونكە سەبیە. بۆیە لەگەڵ موهەندیس بۆ ماوەی دوومانگ زیندانی دەكرێ‌، بەڵام ئەو لە ژووری تایبەت بە ئافرەتان دەبێت لە هەمان شوێن یانی بینایەی زیندانیەكە. 
پێشكەشی داعشێكی دەوڵەتی ئیسلامی لە سوریا دەكەن
سەیربكە داعشەكان چەند بەد فەساڵ و بەد رەوشت و بەد ئاكارن، لەكاتی دادگاییكردن، عایشان وەك دیاری پێشكەشی داعشێكی دەوڵەتی ئیسلامی لە سوریا دەكەن. ئەمە دوای ئەوەی بڕیاری كوشتنی موهەندیس بە تێوەگلانی لە دزی كردن لە داعش.
ئیتر عایشان دەبێتە پشكی «ئەبو عبێدە ئەنساری لە مەیادین و ئەویش دوای سێ‌ رۆژ دەیفرۆشێ‌ بە «ئەبو خەتاب عیراقی» كە بەرپرسی فرۆشتنی نەوت بوە. دیارە ئەویش لە مەیادین دانیشتوەو دوو ژنی تری هەبوە، یەكەمیان لە مەیادین و دووەمیان لە رەقەو هاوكات چوار سەبایایەی تری هەبوە كە ئەوانیش ئێزدی بوون و ئەمانە بوونە «عاسمە لە تەل قەسەب، ئیناس، حەنان لە تەل بەنات و جەمیلە لە سۆلاغ» و لەگەڵ هەمووان وەحشی بوو. سەبایەی دەكڕیوەو دەفرۆشتوە، لەو ماوەی عایشان لەوێ‌ بوە نزیكەی 100 ئافرەتی ئێزدی كرێوەو دەست درێژی كردوەتە سەریان و دواتر بە پیسترین خەڵكی فرۆشتوە. ئەوەتانێ‌ دوای مانگ و نیوێك لە فرۆشتنی بە ئەبو عوبێدە، ئەویش دەیفرۆشێتەوە بە ئەبو خەتاب. 
چیرۆكی نۆجار فرۆشتن؟
سەیربكە چەند دڵرەق و دڵ رەش و پیس و هیچ و پوچ بوون داعشەكان، دوای دوومانگ ئەبوخەتاب عایشان بە كەسێكی تر بەناوی ئەبو مشعل ئەل جەزراوی دەفرۆشێ‌ و دوای یەك هەفتە ئەویش بە ئەبو رباح ناوێكی دەفرۆشێ‌ و دوای دە رۆژ ئەبو رباح بە ئەبو جهادی دەفرۆشێ‌ و دوای دوومانگ ئەبو جهاد بە ئەبو خالد ناوێكی دەفرۆشێ‌ و دوای سێ‌ رۆژ ئەبو خالد بە ئەبو مازن ناوێكی دەفرۆشێ‌ و دوای چوار رۆژ ئەبومازن بە ئەبو ئەحمەد ناوێكی دەفرۆشێ‌ و دوای ئەم هەموو دەردیسەری و دەستدرێژیكردن و ئازارو ئەشكەنجەدانە، ئەبو ئەحمەد بە خێزانەكەی دەفرۆشێتەوە؟ ئەویش نەك لە رووی مرۆڤ بوون و رێزگرتن لە بەها مرۆییەكان، بەڵكو لەبەرامبەر مەبلەغێك پارە كە خۆی واتە ئەبو ئحمەد دیاری دەكات و دەیەوێ‌، بۆ ئەوەی عایشانیان پێ‌ بفرۆشێتەوە؟
قوربانیی چوارەم
دەیفرۆشم بە یەكێك لە داعشەكان
زەهورە حوسێن حاجی، تەمەن 28 ساڵ، دانیشتووی شەنگال، گەڕەكی شەهیدان، لەبەسەرهاتی جینۆسایدی شەنگال لەسەردەستی دەوڵەتی تیرۆریستی داعس و ئەوەی بەسەریاندا هاتوە، چیرۆكێكی دڵ تەزێن و لێوان لێولەخەم دەگێڕێتەوە. 
سەرەڕای مكوڕیمان لە مێردەكەم، رۆژی یەكەم لە ماڵەوە ماینەوەو وتی:» من فەرمانبەرێكی ئاساییم، پەیوەندیم بە هیچ لایەنێكی سیاسی یان سەربازییەوە نیە. باوەڕناكەم كەسێك هەبێ‌ دەست لەكاروباری ئێمە وەربدات». 
بەڵام ئەم بۆچونەی هاوسەرەكەی زەهورە بۆ كاتێك راست و دروستە، كە ئەوەی بەرەو ڕوت دێت كەمێك مرۆڤبونی تیا هەبێت و بزانێ‌ بەهاكانی مرۆڤایەتی چین و چۆن رێزیان لێدەنرێ‌!
زەهورە دەگێڕێتەوەو دەڵێ‌»: ماڵمان بەرامبەر ماڵی دكتۆر ماجد بوو، داعشەكان بە هەل هەلە و دروشم وتنەوە چونە ناوماڵەكەیانەوە، بینیانمان و سەرنجیانمان دەدا، ترساین و نەماندەزانی چارەنوسمان چی دەبێ‌».
ترس لە نادیاربوونی چارەنووس لای زۆربەی ئەو ئێزدییانەی دەیاندوێنێ‌ یان دوێندراون و دیداریان لەگەڵ كراوە، یەكێكە لە خاڵە جەوهەرییەكان. كەواتە ئەگەر هەر تاكێك لە ئێزدییەكان لە سەرەتادا بڕوای بەخۆی هێنابێت كە «داعش» كاری بەسەر ئەوانەوە نیە، ئەوە راستیەكی حاشا هەڵنەگر لەناخیاندا پێی وتبون ئێوە لە بەردەم مەترسیدان!
ئیتر كە لێت قەوما ئاوایە
زەهورە دەڵێ‌»: لە رۆژی دووەم خاڵۆی هاوسەرەكەم «عەلی كیجۆ ئەلعزیری» هات بۆلامان لە گوندی كۆچۆوە. نەمانتوانی بەرەو چیا بڕۆین، بۆیە بەرەو گوندی كۆچۆ رۆشتین «من و هاوسەرەكەم حسن عەلی ساڵەح، دایكی و خوشكەكەی و منداڵەكەمان، بە هاوڕێیەتی عەلۆ لەگەڵ هاوسەرو كچەكەیان».
ئیتر كە لێت قەوما ئاوایە، ئەوان چوزانن گوندی كۆچۆ دەكرێتە گۆڕستانی دانیشتوانەكەی؟ لە كوێ‌ ئەوە بزانن داعش خۆی لە بۆسەیەكی پیس و ترسناك بۆ دانیشتوانی كۆچۆ مەڵاس داوەو پاش راگرتنیان بۆ ماوەی نزیكەی پازدە رۆژ بەربەریانەترین تاوانیان لەدژ ئەنجام دەدا؟ 
زەهورە دەڵێ‌: ئەوەی رویدا ڕویدا لە گوندی كۆچۆ لە 15-8-2014 رۆژی هەینی. خێزانەكانیان رەوانەی پەیمانگای سۆلاغ كرد. لەوێ‌ ئافرەتە بەتەمەنەكانیان بردو تا ئێستاش چارەنوسیان نادیارە؟ لەناویاندا دایكی هاوسەرەكەم فاتم حەجی ملحم». 
ئاوا درێژە بە گێڕانەوەكەی دەداو دەڵێ‌: ئێمەیان رەوانەی تەلعەفەركرد، چەند مانگێك لە گوندی قزل قێو ماینەوەو دوای ئەوە رەوانەی رەقەیان كردین لە سوریا. هەموو رۆژێك دەهاتن و ئافرەتیان دەبرد. جارێك لەگەڵ چوار ئافرەتی تر بردمیان بۆ بارەگاكەیان لە حەمس لە مانگی تەشرینی دووەم 2014. لێرە هەر كەسێك یەكێكمانی برد لە گەڵ منداڵەكانی». ئەبو مەحمەد سوری منی برد بۆ شاری «تەبەقە» و بۆ ماوەی نۆ مانگ لە ماڵەكەی وەك خزمەتكاری هاوسەرەكەی مامەوە.
رێنماییمان بۆ هاتوە لە دەوڵەتی ئیسلامیەوە
زەهورە دەڵێ‌: پێی وتم تۆ ماوەی نۆ مانگە لە ماڵەكەمی و هاوسەرگیریم لەگەڵتا نەكردوە؟ منیش پێم وت: سوپاست دەكەم و من خزمەتكاری هاوسەرەكەتم و هیچ درێخیم لە كارەكەم لەبەرامبەری نەكردوە. پێی وتم: بەڵام رێنماییمان بۆ هاتوە لە دەوڵەتی ئیسلامیەوە جەخت لەسەر هاوسەرگیری لە گەڵ سەبایا دەكاتەوە كە لێرەن، لەبەر ئەوەی بەنوێژو رۆژوو نابنە ئیسلام تەنها بە هاوسەرگیریكردن نەبێ‌. پێم وت: مەبەستت چیە لە قسەكانت ئەبو مەحمەد؟ وتی: هاوسەرگیرت لەگەڵ دەكەم. پێم وت: دوای هاوسەرەكەم هاوسەرگیریم لەخۆم حەرام كردوە. پێی وتم: هاوسەرەكەت لە كۆچۆ كوژرا. پیم وت: هیچ شتێك لە بارەی چارەنوسییەوە نازانم و تەنانەت ئەگەر كوژراش بێت دوای ئەو شوو ناكەمەوە. 
تەماشا لەم بەد رەفتاری و بەد مرۆڤە، نۆ مانگ ژنێكی ئێزدی وەك خزمەتكاری هاوسەرەكەی خۆی بەكارهێناوەو دواتریش دێت و بەناو رێنمایی دەوڵەتی تیرۆریستی داعش، دەیەوێ‌ هاوسەرگیری لەگەڵ بكات؟ چۆن هاوسەرگیرییەك؟ ئەوەتانێ‌ پێی دەڵێ‌: تۆ ئەگەر نوێژو رۆژوش بگریت و بكەیت نابیتە موسڵمان تەنیا بەوە نەبێ‌ كە بێیت و خۆت رادەستی غەریزە پیسەكانی من بكەیت!!
سەیربكە چی پێدەڵێ‌: بەڵام ئەمە ڕێنماییە لە سەرچاوەكانمانەوە ئەبێ‌ هاوسەرگیریت لەگەڵ بكەم یان بتفرۆشم بە كەسێك و ئەویش هاوسەرگیریت لەگەڵ بكات یان دەتگەڕێنمەوە بۆ یەكێك لە بارەگاكان و لەوێش تەعدات لێدەكەن و لەلایەن هەموو پاسەوانەكانەوە كە لەوێن رۆژنە دەست درێژیت دەكرێتە سەر؟
كاتێك مرۆڤ گوێ‌ بیستی ئەم چیرۆكانە دەبێت، مرۆڤبونی خۆی لە پێش چاو دەكەوێ‌. هەست بەوە دەكات لە پێش چاویدا مرۆڤایەتی ئەتك دەكرێ‌ و كەچی ئەمیش بێدەنگ و بێدەسڵات كڕ لێی دانیشتوە! ئاخر خۆ كۆمەڵگای مرۆڤایەتیش بەجۆرێك لە جۆرەكان بە بێدەنگ بوونیان بوون بە هاوڕێی تاوانەكانی داعش!!
ئەتوانی بمكوژی بەڵام من ناتوانم هاوسەرگیری لەگەڵ پیاوی موسڵمان بكەم؟
تەماشا چۆن زەهورە بە زەلیلی و داماوییەوە دەڵێ‌: ئەتوانی بمكوژی بەڵام من ناتوانم هاوسەرگیری لەگەڵ پیاوی موسڵمان بكەم؟ هاوسەرەكەی پێی وت: بەو شێوەیە وازی لێبێنەو پێیان بڵێ‌ هاوسەرگیریم لەگەڵی كردوە؟ كەچی لەبەرامبەردا دەڵێ‌: ناتوانم درۆ لەگەڵ دەوڵەتی ئیسلامی بكەم و من یەكێكم لەوان!! دیارە داعشەكە مەبەستی بوە هەرچۆنێك بێت بەناوی هاوسەرگیرییەوە غەریزە نا مرۆییەكانی تیا بەتاڵ بكاتەوە، ئەگەر پێشنیاری هاوسەرەكەی دروست و لەجێ‌ بوە. 
زەهورە دەڵێ‌: لێم نزیك نەدەبوەوە.. دوای ئەوەی ساڵێكم تەواو كرد، هاوسەرەكەی داوای لێكرد بمفرۆشێ‌، چونكە منداڵەكانم ئیزعاجیان دەكەن و خۆشی پێویستی بە خزمەتكارنیە؟ لەماوەكانی كۆتایشدا هاوسەرەكەی رۆژانە بە تووندی لە ماڵەكانی دەدا، جارجار خوێن لە لوتیان دەهاتە خوارو كاتێكیش پرسیارم لێدەكرد بۆ؟ توڕە دەبوو لە پێشی خۆی دەرمی دەكرد بە قسەی سوك. بەڵام تەحەمولم دەكرد تەنها لە پێناوی ئەوەی پیاوەكەی نەمفرۆشێ‌ و پارێزگاری لە شەرەفم بكەم.
بێگومان ئەبو مەحمەد واز ناهێنێ‌ و ئەوەتا دەڵێ‌: دەیفرۆشم بە یەكێك لە داعشەكان و ئەم منداڵە جوانە بۆ خۆمان! لێرەوە دەرفەتێك بۆ زەهورە رێك دەكەوێ‌. چۆن؟ دەڵێ‌: بۆ رۆژی دوای پەیوەندی كرد بە شەڕەوەو بیرم لەوە كردەوە كاتێك بگەڕێتەوە بە داعشێكم دەفرۆشێ‌ و هاوسەرگیرم لەگەڵ دەكات بەبێ‌ ویست و ئیرادەی خۆم و هاوكات منداڵەكانیشم دەبەن، بۆیە بڕیارمدا هەڵبێم. 
كاتژمێر حەوتی بەیانی منداڵەكانم هەڵگرت و دەرچوم.. بەدوای خێزانێك دەگەڕام داعش نەبێت و لە ماڵی داعشەكان دوور كەوتمەوە كە لە خانوی سێ‌ نهۆمی باشدا دەژیان. بەرەو سێ‌ خێزان چوم و داوای هاوكاریم لێكردن، بەڵام رەتیان كردەوە لەبەر ئەوەی لە دەسڵاتی داعش دەترسان. بەردەوام بوم لە رۆشتن، ئافرەتێك رایگرتم و پێی وتم: وەرە بۆ ماڵی ئێمە چیمان لێدێت با بێت.
ژمارەی برای یەكێك لە خوشكە ئێزدییەكانم لابوو
لێرەوە دەرویەكی خێر بۆ زەهورە دەكرێتەوەو پێدەچێ‌ ببێتە هۆكاری رزگاربوونی. خۆیشی دەڵێ‌»: ژمارەی برای یەكێك لە خوشكە ئێزدییەكانم لابوو كە لە رەقە لەگەڵم بوو. پەیوەندیم پێوە كرد. پێی وتم: وەڵا خوشكە زەهورە من ناتناسم بەڵام دوان لە خوشكەكانم رفێنراون و لە سوریان. ئەویش پێی دەڵێ‌: بەڵێ‌ ژمارەكەتم لە خوشكەكانت مقبولەو ئامینە وەرگرت. تكام لێی كرد پەیوەندی بە برای هاوسەرەكەم بكات و ئاگاداری بكاتەوە بەم ژمارەیە پەیوەندیم پێوە بكات.
دەرگا لە زەهورە دەكرێتەوەو پەیوەندی پێوە دەكەن. ئەوەی پەیوەندی پێوە دەكات برای هاوسەرەكەیەتی «حوسێن». زەهورە تۆ لە كوێ ؟ من هەڵهاتم لە دەست دەوڵەتی ئیسلامی داعش و لە ماڵێكی زۆر باش و بەڕێزم. منداڵەكانت لەگەڵە؟ بەڵێ‌ لەخوا بەزیاد بێت لەگەڵمن. ناونیشانم بۆبنێرە بۆئەوەی پەیوەندی بكەم و رزگارم بكەن. بەڵێ‌ باشە هەر ئێستا بە نامە بۆت دەنێرم. تكا دەكەم پەلە بكەن لە كارەكە چونكە گەر پێم بزانن دەمكوژن و ئازاری ئەم خێزانەش دەدەن كە لانیانداوم و یەك دەقە نرخەكەی زۆر بەرزە. 
دوای شەش رۆژ بریانم بۆ كۆبانی و لەخودا بەزیاد بێت نەیانتوانی تەعدا لەسەر شەرەفم بكەن و رۆژی 2-12-2015 رزگارم بوو. 
قوربانیی پێنجەم
بۆچی لە چیا هاتینە خوارەوەو چیان بەسەرهات؟
دانی پێدەنێم لە ناسینی زیاتری جینۆسایدی ئێزدییەكاندا، قەرداری نووسەرو توێژەر «داود موراد خەتاری»م. ئەو نەبا ئەم هەموو چیرۆكە پڕ ئێش و ئازارەم بەردەست نەدەكەوت. ئەزانم ئەویش كاتێك ئەم چیرۆكانە ئامادە دەكات، ئازار لەناو چاوانیدا چۆڕاوە دەبەستی؟ بەڵام خۆ ناتوانی دەستبەرداریان بێت و هەرچۆنێك بێت دەبێت بیانوسێتەوە.
كەس داوای ئەوەم لێنەكات ئەم ساتە وەختە یان پاش گوێگرتن لەم چیرۆكە بۆی پێبكەنم؟ وەرن لەگەڵ من دەست پێبكەن، بزان مەودای ئەم ئازارە دەگاتە كوی؟ ئایا تۆ حەوسەڵەت هەیە لەگەڵم بێی و گوێبگری؟ 
ئەوەتا  باران ئیسماعیل باسی ئەوە دەكات كەچۆن بەهۆی تێكچونی باری تەندروستی دایكی هاوسەرەكەم لە چیا هاتینە خوارەوە. دوای شەوێك مانەوە لەگەڵ خەڵكەكەی تر لەماڵ دەرچون لە رۆژی 3-8-2014 و دواتریش لەناو شەنگال دەستگیركراون و دواتریش پیاوەكانیان لە ئافرەت جیاكردوەتەوەو ژمارەیان نزیكەی «40» كەس دەبوون، هاوكات ئافرەتەكانیان رەوانەی تەلعەفەر كردوەو لەوێوەشەوە بۆ گرتوخانەی بادوش و دوای ئەوەش گەڕاندویانەتەوە بۆ تەلعەفەرو «كەسر میحراب» و قزل قێو.
ئەم رزگار بوەی بن دەستی رەشی داعش باسی ئەو ساتە وەختە دەكات كاتێك لە «بێزار» خوشكی هاوسەرەكەی دادەبڕی، لە 10ی تەشرینی دووەمی 2014 لە قزل قێو، دەڵی: كاتێك كە كچەكانیان برد لەنێویاندا كچەكەم «ایفا»، داوام لێیان كرد منیش لەگەڵیان بم. بەڵام ئەمیرە داعشیەكە رەدی كردەوەو وتی: ئێمە تەنها كچەكان دەبەین، تۆ تەمەنت گەورەیە؟ 
دەتفرۆشین بە نرخی « بازاڕی كەنیزەك «.
ئەوەتا باران پێیان دەڵی لە گەڵ كچەكانم دێم هەرچەندی تێبچی «گوزارشتەكە داڕشتنەوەی بۆكراوە»؟ ئەوانیش پێی دەڵێن: تەمەنت چەندە؟ ئەویش پێیان دەڵی 1976؟ پێی دەڵێن لە گەڵ كچەكانت سەربكەوە سەر ئۆتۆمبیلەكەو لەوی  دەتفرۆشین بە نرخی « بازاڕی كەنیزەك «.
باران ئاوا باسی چیرۆكەی دەكات، دوای نۆ كاتژمێر لە رێكردن بەبی وەستان گەشتینە سوریا. ئێمە 250 كەس بوین لە ماڵێكی گەورەدا. 
لە رۆژی دووەمی مانەوەیان لەوماڵەدا كچەكەی باران  «ایفا» منداڵێكی كوڕی دەبی و كچەكانی كۆچۆ خوێنی پێشكەش دەكەن و لە نەخۆشخانەش ناوی كوڕەكی دەنێن «خەتاب»؟ ئەمەیان بەبی ویستی «ایفا»و بارانی دایكی دەبێت؟! ئیتر ناوی كوڕەكەی «ایفا»، «خەتاب» دەبێت و بەباڵایدا دەبڕی؟ نەفرەت لەم ناوە كە داعشەكان پێوەی دەبەستن!! ئاخر ئەگەر ئەو لێرە منداڵی نەبوایە كوا ناوی كوڕەكەی دەنێت «خەتاب»؟
ئیتر چیرۆكەكە سەخت و پڕ ئێشتر دەبێت، چۆن؟ باران باسی ئەوە دەكات كە چۆن لە دوای پێنجەمین رۆژی مانەوەیان بە كەسێكی دەفرۆشن و بەڵام ئەو رەتی دەكاتەوە، بەبی ئەوەی سۆزانی كچی كە تەمەنی حەوت ساڵ بوو لەگەڵی بێت؟! بەڵام كوا ئەو داعشانە گوێ بۆ سۆزو باوشی دایكێك بۆ كچە تەمەن حەوت ساڵانەكەی دەدەن؟! ئەگەر ئەوان شتێكی وایان بوایە، دەبێت مسقاڵە زەڕەیەك مرۆڤبونیان تیا بوایە؟!
ئەوان كە ژمارەیان 10 ئافرەت دەبێت لەگەڵ منداڵەكانیان دەیانبەن بۆ ماڵێك و رۆژی دوای ئەوە حەوت كەسیان لێدەبەن و بارانیش لە گەڵ «ایفا»و ژنێكی كۆچۆیی دەمێننەوەو دەیانخەنە ناو كۆگایەكەوە كە لەژێرەوەی باڵەخانەیەكی هەشت نهۆمیدا بوەو وەك نەخۆشخانە بەكاریان هێناوە!
باران باسی ئەوەش دەكات كە كەسێك هاتوە بە ناوی «عەبدل رەحمان» كە لە لەگەڵی بڕوات بۆ ماڵ وەك خزمەتكار، بەڵام ئەو رەدی كردوەتەوە تەنها بە مەرجێك كچەكەی لەگەڵ بێت. دیارە لەم كاتە «صما‌و و خرسا‌و»یان لەگەڵ بوە.
هەوڵی داوە چەكەكە لە پاسەوانەكە وەربگری بۆ ئەوەی خۆی بكوژی
 باسی ئەوەش دەكات كە هەوڵی داوە چەكەكە لە پاسەوانەكە وەربگری بۆ ئەوەی خۆی بكوژی. بەڵام داعشەكان بەوە تۆمەتباریان كردوە بەوەی هەوڵی كوشتنی ئەوی داوە، لەبەر ئەمە بەتوندی دەكەونە لێدانی و ئەویش دەچێتە ژورێكەوەو دەرگاكە لەسەر خۆی دادەخات و بۆ رۆژی دووەم سكاڵایەكی لەسەر بەرز دەكەنەوەو لەگەڵ سۆزان دەیبەن و بۆ ماوەی پێنج رۆژ زیندانی دەكەن بەبی خواردن. لە رۆژی دووەمی زیندانی كردنەكەدا وەك باسی دەكات تۆزێك شەكرو خوی و یەك دەبەئاوی پێدەدەن و دوای ئەوەش سۆزانی كچی لەو جیا دەكەنەوە یان دەیبەن.
هەروەها باران ئەوەش باس دەكات، كە كەسێك بەناوی «ئەبو عەبدلرەحمان توركی» لە مەنبج بردویەتی و پێشی وتوە»: كەباپیری ئێزدی بوە لە توركیا، لە ئاكامی یەكێك لە پرۆسەكانی ئیسلام یان شاڵاوەكان بۆ سەر ئێزیدیەكان ناچاریان كردوە دەسبەرداری ئاینەكەی بێت. 
ئەوەش باس دەكات كە داوایان لە سەهرەو منداڵەكەی كردوە پەیوەندی بە دەوڵەتی ئیسلامییەوە بكەن، ئەوانیش رەدیان كردوەتەوەو لەبەرامبەریشدا لە زیندانیان كردون.
دوای تێپەڕبوونی مانگێك منداڵێكی ئێزدی هات و ئاگاداریان كردم كە لە عەبدلرەحمان دەپاڕێتەوەو ئەویش بە مۆبایل لەگەڵ كەسێكی سینی قسەی دەكرد. ئیتر لێرەوە چیرۆكەكەی باران بە سوێترو سەختتر دەبێت و  رۆژێك دواتر خۆی و كچەكەی دەبەن بۆ بارەگایەكی داعش و كەسە سینیەكە دێت و بە ئۆتۆمبێلەكەی خۆی دەیبات. 
پەنجاو پێنج رۆژ لەوی ماینەوە
باران ورد دەچێتە ناو چیرۆكی تاڵی بن دەستی داعش و دەڵی»: پەنجاو پێنج رۆژ لەوی ماینەوە، لە شەوێكی باوو بۆراندا، عەبدل رەحمان هات و بە سینیەكەی وت، كچێكی باران لە رەقە بوەو بەرەو لای كافرەكان هەڵهاتوەو گەشتوەتە لایان، پێویستە وریای بیت، لەگەڵ كچەكەی ئەوانیش هەڵدێن. پەیوەندییان كرد بە دووكەسەوەو ئەوانیش هاتن ویستیان كچەكەم «سۆزان» ببەن. هەوڵمان دا قەناعەتیان پێبكەم دەرفەتمان بدەن و رۆژێكی تر بیبەن. پاشان بە وردی باسی ئەوە دەكات كەكچەكەی داوای لێكردوە ئامادەكاری بكەن بۆ راكردن. بۆ رۆژی دواتر بە مادەی سیرامیك ناو ژورەكان دادەپۆشی، كاتێك ماندوبوون نوستن.
باران دەڵی لەگەڵ كچەكەم بەسەر سیاجی ماڵەكەدا هەڵهاتین، لە شەوێكی تاریك و باراناوی و بادا. لە دەرگای ماڵێكماندا بەڵام رەفزیان كرد بیكەنەوە. باسی ئەوەش دەكات لەم كاتە بیریان لای سینیە موجرمەكە بوە، كە دەچێت تەحقیق دەكات و هیچ بەزەییەكی نیە.. چۆن بتوانم لە دەستی هەڵبێم؟ ئەگەر دەستگیرت بكات پارچە پارچەت دەكات «ئەم تاوانبارە سینیەی ناو داعش، باسی دەكەن ناسراو بوە بە دڕندەیی و دڵرەقی و خوێنڕێژی».
باران باسی ئەوەش دەكات كە سی گەڕەك یان «كۆڵان « دوور كەو تونەتەوەو لە دەرگای ماڵێكی تریان داوەو كە گەنجێك دەرگاكەی بۆ كردونەتەوەو بە دۆخەكەیانی زانیوە داوای لێبوردنی كردوەو وتویەتی»: كوڕی مامەكەم پەیوەندی بە دەوڵەتی ئیسلامیەوە هەیەو گەربزانی خەبەرمان لەسەردەدا». ئەویش پێی دەڵی»: كوڕەكەم بەم بارانە چارەسەرێكمان بۆ بدۆزەرەوە؟ كوڕەكەش پێیان دەڵی»: لێرە گەڕەكی دوور هەیە پەیوەندییان بە دەوڵەتی ئیسلامییەوە نیە، ئەتوانی بچیت بۆ لایان؟ دەڵی لەو گەڕەكە لە دەرگای ماڵێكمانداو دەرگایان بۆ كردینەوەو هێشتیان بچینە ژوورەوەو فەرمویان لێكردین بۆ ژورێك. پێیەكانمان نەتڵ بوون لە قوڕو جل و بەرگمان تەڕبوو، پێمان وتن لێمان گەڕێن با لە بەرهەیوانەكە دانیشین. یەكسەر پیرێژنی ماڵەكە پێی وتن: بیانكەنە حەمامەوەو جل و بەرگیان بۆ ئامادەباكەن و هەزار نەعلەت لەو سینیە پیسە. ئەوانیش سوپاسیان دەكەن و دەڵێن جلەكانمان لەناو جانتاكەماندایە.
 دوای خۆشتنیان، پیرێژنی ماڵەكە بە یەكێك لە كوڕەكانی دەڵی»: بیانبەن بۆ ماڵی (..) لە گوند، چونكە كابرای چینی لەناو شار بەدوایاندا دەگەڕی. كوڕەكەش بە دایكی دەڵی: بەڵی دایكە ئەیانبەم بەم شەوە باراناوییە. باران دەڵی»: دوو گەنج لە گەڵمان هاتن و ئەوان چەقۆی دەستیان هەڵگرتبوو. دوای یەك كاتژمێر رێكردن بەپێ، بە هەرحاڵ گەیشتینە ماڵەكە. لە رێگا باسی ئەم چینیەیان دەكرد، كە چۆن بە شێوەیەكی ناشرین تەعەدای لە خەڵكی منبەچ كردووەو بە زۆر منداڵەكانیان بردوەتە ناو دەوڵەتی ئیسلامی و هەركەسێكیش لەگەڵی نەبوایە بە هەڵگەڕأوە لە ئیسلام لە قەڵەمی دەداو دەیكوشت و هیچ بەزەییەكی نەبوو. هیچ كەسێك لە خەڵكەكە نەیدەتوانی روو بەڕووی بێـتەوە یان لەم شارە دووری بخاتەوە، دەیكوشت و غەزەبی لێ هەڵدەگرت.  
پارچەیەك قوماشی دڕاویان تێكرد  بۆ ئەوەی گەرممان بكاتەوە
باران باسی ئەوەدەكا،  گەیشتنەتە گوندەكەو چونەتە ماڵەكە، ماڵێكی هەژاری لێبوو، تەنانەت نوێن و شت و مەكی نوستنیان نەبوو. ماڵەكەیان یەك ژوور بوو، سەقفەكەی بە ئاسن و چینكۆ راگیرابوو، لە حاڵێكی خراپدا بوون. ویستیان گەرمكەرەوەكە داگرسێنن، پارچەیەك قوماشی دڕاویان تێكرد بۆ ئەوەی گەرممان بكاتەوە، چونكە نەوتیان نەبوو، هیچیان نەبوو. سەڕەڕای ئەوەی بەسەرماندا هاتبوو، زۆر بۆ حاڵی ئەوانیش گریام و بەخۆمم وت یەئس و میحنەتمان لەگەڵ ئەم هەژارانە كۆی كردینەوەو موسیبەتێكی گەورەسشیان بەسەردێت ئەگەر بزانن لێرین؟
پرسیارو وڵام دەكەوێتە نێوانیان و باران دەپرسی: بۆچی حاڵتان وایە؟ ئەوانیش دەڵێن ئێمە خەڵكی سەفیریەین و پێش سی ساڵ بارمان كردوە بۆ ئێرە؟ بۆ بەیانیەكەی باران داوا دەكات لێرە بڕۆن؟ ئەوانیش پێی دەڵێم نا خوشكم بەم بەیانیە ناتوانی لێرە بڕۆی؟ ئەم سینیە پیسە بێگومان هەموو سایق سەیارەكانی ئاگادار كردوەتەوە كە لە گەراجن و دەستگیرت دەكەن، كەمێك سەبربكەو حاڵت حاڵی ئێمە.
ژنی ماڵەكە نیوەڕۆكەی لە ماڵ دەچێتە دەر بۆ بازاڕ، بۆ ئەوەی دەنگ و باس و دۆخەكە چۆنەو پێش خۆرئاوابوون دەگەڕێتەوە. دیارە لەم دەرچونەیدا ئەوەی زانیوە كە جەلادە سینیە داعشەكە، حاڵەتی ناكاوی لەناوچەكەدا راگەیاندوە، كە ژنێكی سەبی و كچەكەی هەڵهاتوون و دەیانەوی بگەنە كافرەكان و هەرچی زانیاری هەیە بیدەنە دووژمنەكان. بۆیە پێویستە دەستگیربكرێن و زۆربەی خەڵكەكەش باسی هەڵهاتنی ئەمانیان كردوە.  باران پێی دەڵی: ئەی چارە چیە خوشكم؟ 
مرۆڤی باش لە هەموو جێگایەك بوونی هەیە، بۆیە پێی دەڵێن شەو دەتانبەین بۆ ناوچەیەكی تر، ئەوان ئۆتۆمبێلیان هەیەو لەتوانیاندایە بتانگەیەننە ناوچەیەكی ئەمین. بەلایەنی كەم دوور لەم داعشە سینیە پیسە. باران باسی ئەوە دەكات شەو دەرچووە بۆ ناوچەیەكی ترو لە دەرگای ماڵێكی داوە. ژنێكی مام ناوەند هاتوەو پێی وتوە ئێمە كوردین؟ دەستم دامێنتان. ئەویش پێی وتوە بەخوا هەشت خێزان لەم ماڵەدان. باران پێی دەڵی: تەنها ئەمشەو؟ ئەویش پێی وتوە ئەتوانی بڕۆی بۆ مزگەوت چونكە ئەو ماڵی خوایە؟ پێی دەڵی نامەوێت بڕۆم بۆ مزگەوت! ژنەكەش پێی دەڵی: لەوی ئەو دوكانانە هیچی تیا نییە، دەتوانی تا بەیانی لەوێ دابنشی؟!
دەترسم لە سەبایەی ئێزدی و مەسیحی بن و لە ماڵی موجاهیدەكان هەڵهاتبن؟
دادەبەزنە ناو دوكانە چۆڵەكە، دوای چەند خولەكێك دوو گەنج دێن و پرسیاری گەیشتنیان بۆ ئێرە دەكەن؟ بارانیش دەڵی»: كوڕم من خەڵكی سەفیرییەم و ئەوەی هەمانبوو لە پارەو بەڵگەنامە، بەو ئۆتۆمبێلەی پێی هاتین لێمان بە جێما. ناتوانین بڕۆین و ئەمشەو لێرە دەمێنینەوە تا بەیانی. گەنجەكە پێیان دەڵی: ئێستا كچەكەم دەبەم بۆ نەخۆشخانە بۆ تەلقیح و دوای دەتبەمەوە بۆ ماڵ. باران دەڵی: دوای نیوكاتژمێر گەنجە هاتەوەو وتی: تكا دەكەم ئەگەر كێشەیەكت هەیە پێم بڵی؟ ئەویش پێی دەڵی وەك پێتم وت، ونم كردو نیمەو بەیانی لێرە دەردەچم و دەگەڕێمەوە بۆ ماڵەكەم. گەنجەكەش پێی دەڵی: دەترسم لە سەبایەی ئێزدی و مەسیحی بن و لە ماڵی موجاهیدەكات هەڵهاتبن؟ باران پێی دەڵی: ئەگەر من سەبایەی هەڵهاتووبم بۆچی هاتوومەتە ئەم دوكانە چۆڵە؟ گەنجەكەش دەڵی لەسەرمە باوكم ئاگاداربكەم و ئەویش بێت بتبات بۆ ماڵەوە؟ 
 باوكی كوڕەكە دێت و وەك باران دەڵی»: دەیبات بۆ ئەو ماڵەی كە لەدەرگایانی داو پرسیاری لێدەكات: خوشكم تۆ خەڵكی كوێی؟ خەڵكی عەفرینم.. ئێمەش خەڵكی عەفرینین، لەكام گەڕەك و لەكام عەشیرەتی؟ بۆیە باران دەڵی: هیچم لە بارەی عەفرینەوە نەدەزانی، بۆیە بە سەراحەت پێم وت، من ئێزدیم و لە دەست دەوڵەتی ئیسلامی هەڵهاتووم. خاوەن ماڵەكەش پێی دەڵی: بەخێربێی كچەكەم.
هەمووان سەردەبڕن و من 12 سەرخێزانم؟
كاتێك كوڕەكەی ئەمەی زانی، پێنج گەنجی تر دانیشتبوون، هەمویان سوێندا كەكەس بەم بابەتە نەزانی؟ بەڵام سوێندیان نەخواردو وتیان: ئەگەر دەوڵەتی ئیسلامی بەمە بزانی، هەموو خێزانەكەمان سەردەبڕی. دەڵی بە كچەكەمم وت، با لەم ماڵە دەربچین، مادام سوێندیان نەخوارد خەبەرمان لێدەدەن و هیچ مەجالی تیانیە؟ داوای لە یەكێك لە پیاوەكان كردو وتی سویند بخۆ، تا بەیانی پێش خۆركەوتن لانیان بدەین، چۆن ئەم ژن و منداڵە بڕۆن بەم بارانە؟ ئەویش پێی وت: برام ئەگەر دەسلاتدارانی دەوڵەتی ئیسلامی بەمە بزانن، هەمووان سەردەبڕن و من 12 سەرخێزانم؟
 باران بەم بارانە چی بكات؟ خاوەن ماڵەكەش چاری نیەو كەس بە قسەی ناكات؟ بۆیە ناچار پێی دەڵی: فەرموو خوشكم با لەماڵ دەرچین؟ بارانیش راستی ئەوە دەزانی ئەوانیش لەسەر هەق بوون و لە داعش ترساون. دەڵی: دەرگاكەم كردوە، باوو زریانەكە بەهێزبوو، باران دەباری و لێمانی دەدا، شەوەزەنگ بوو، نەماندەتوانی پێشی خۆمان ببینین، منداڵەكەم ترساو قیژاندی، بەڵام من رامكێشاو تفم كردە رووی، نازانم بۆ كوی دەڕۆم!
بگەڕێوە خوشكم تا باوو زریانەكە هێور دەبێتەوە؟
گەنجەكە پێی دەڵی: بگەڕێوە خوشكم تا باوو زریانەكە هێور دەبێتەوە؟ سوپاس دووبارە ناگەڕێمەوە! باوو زریانەكەش خۆشی نەكرد، بەناو گەڕەكەكانا گەڕاین، لە سی دەرگاماندا، كەسیان نەیانكردەوە؟ لە كۆتایی كۆڵانەكە عەرەبانەیەكمان بینی لە تەنیشت ماڵێكەوە؟ سۆزانی كچم وتی: دایە ئەم ماڵە ساحیبی ئەم عەرەبانەیەن، لە توانایاندایە بەم رزگارمان بكەن ئەگەربیانەوی؟ دەلی وتم لە دەرگایان دەدەین، بەڵكو یەكەمجار بەلایەنی كەم پەنامان بدەن؟ لە دەرگا دەدەن و ئافرەتێكی باڵاپۆش دەرگا دەكاتەوەو دەگەڕێتەوە بۆ ئەوەی باوكی ئاگادار بكاتەوەو باوكیشی فەرمووی چونە ژوورەوەی لێكردین و لەو شەوە ئەنگوستە چاوەدا پەنای داین. ژنەكە بە رووخسارمان هەستی كرد كە من ئێزیدیم و هەڵهاتووم بۆ دەربازبوون؟
تا ئێرەو بۆ ئەمشەو دەروەكەی لێیان كراوەتەوە باشە، خاوەن ماڵەكە دار دەكاتە ناو سۆپاكەو داوایان لێدەكات نزیك بنەوە، بۆ ئەوەی گەرم بنەوەو جلەكانیان وشك بێتەوە. ژنی ماڵەكە پرسیار دەكات و دەڵی مەبەستت چی بوو، بەم شەوی بارانەو زریانە هاتی بۆ ئێرە؟ باران بە بیپێچ و پەنا پێی دەڵی: بەخوا راستیت پێدەڵێم من ئێزدییەكی هەڵهاتووم؟ ژنەكەش پێی دەڵی بەخێر بێیت، تۆ خەڵكی كوێی؟ باران دەڵی شەنگال و بە كوڵ دەگری؟ چای و خواردنێكی سادەیان بۆ ئامادەكەن، بەڵام ئەوان رەدی دەكەنەوە. كوڕە گەورەكەیان دەڵی: من شۆفێری ئۆتۆمبێلی كرێم، ئەگەر ئۆتۆمبێلەكەم دوێنە نەفرۆشتایە، بەداخەوە دەتانم گەیاندە شارێكی دەرگای ئەمین.
شۆفێرێك دەتگەیەنی بە «1000» دۆلار
باران دەڵی، بۆ بەیانیەكەی داوام لێكرد ئۆتۆمبێلێكم بە كری بۆ بگری. خۆشم مەبلەغێك پارەم بە دیناری عیراقی پێبوو، كە «3» ملیۆن دینار بوو، لە شەنگال لەناو جلەكانمدا شاردبوومەوە. ئەوكاتە بۆ یەك ملیۆن دینار «700» دۆلار بوو، مەبلەغەكەم تەسلیم كرد بۆ ئەوەی بۆم بگۆڕێتەوە لە منبچ لای ئەوانەی پارە دەگۆڕنەوە. گەڕایەوەو وتی: شۆفێرێك دەتگەیەنی بە «1000» دۆلار، بۆیە «1400» ملیۆنێك و چوارسەد هەزارم تەسلیمی دەستی كرد وەك كری و وتی شەو دەتانباو باقیەكەی پێدامەوە.  سوپاسم كرد بۆ هەڵوێستە جوانەكەی و بە هێمنی چاوەڕێی شەوم كرد. نیوەی شەو شۆفێرەكە هات و مەبلەغی پارەكەی پێدامەوەو وتی» ببورە وەڵڵا  ترسم لە چارەنووسم هەیە».
پیاوەكە لە بەیانیەوە بەدوای شۆفێرێكی تردا گەڕا، بەڵام هەموویان رەتیان كردەوەو هاوكات هەموو ئەوانەی پارەیان گۆڕیوەتەوە رەتیان كردوەتەوە پارەكەی بۆ بگۆڕنەوەو داوای پارەی سورییان كردووە. پێشی وتوە بەداخەوەم نەمتوانی قەناعەت بەهیچ شۆفێرێك بكەم ، بۆ ئەوەی بتگەنێتە شوێنێكی ئەمان؟
دوای نیوەڕۆ یەكێكیان دێت و داوای مەبلەغێكی خەیاڵی دەكات. باران باسی ئەوە دەكات كە كچەكەی جوتێك گوارەی لە گوێدابوە، بیریشی لای ئەوە بوە بیكاتە دیاری بۆ كچی ئەو ماڵەی كە میواندارییان كردبوو، بەڵام لە كۆتایدا شۆفێرەكە لەسەر 3 ملیۆن دینارەكەو گوارەی گوێی كچەكەی رێك دەكەوی بیگەیەنێتە دەروازەیەكی ئەمین لە سنوری توركیا.
لە گەراج رادەوەستن، هەموو موسافیرەكان سەردەكەونە سەر ئۆتۆمبیل، باران بە شۆفێرەكە دەڵی یەك دینارم پێنیە، بۆیە ئەویش رێگەی نادا سەربكەوی.. كاتێك موسافیرەكان گوێیان لێدەبێت؟ یەكێك لە گەنجەكان بە هەمویان دەڵی: ئەم ئافرەتە پارەی كری رێگای پێنیە، بۆیە تكاتان لێدەكەم كرێكەی لە نێوان خۆمانا بۆ كۆبكەینەوە.. بەم شێوەیە لەگەڵیان سەركەوتم.. لە سنوری توركیا خەندەقێكی درێژو قوڵ هەبوو، ناتوانی بپەڕێتەوە، یەكێك لە گەنجەكان دادەبەزی و هاوكاری دەكات بۆ پەڕینەوە. لەوێشەوە ئامرازی گەیاندن چاوەڕێیان دەكات و سەردەكەون و گەنجەكان جارێكی تر هاوكارییان دەكەن بۆ پێدانی كرێی گەیاندنیان تا دەگەنە شاری «كلس»ی توركیا. ئەو كاتەی دەگەن كاتژمێر نۆی شەو دەبێت و لەوێشەوە بۆ شاری غازی عەنتاب و دوای دوو كاتژمێر هەموویان جیا دەبنەوەو ئەمیش نازانی بۆ كوی بڕوات؟ 
دیسان گەنجێك دێتە لای و پێی دەڵی: ئایا شوێنێكت هەیە تیای بمێنیتەوە؟ باران پێی دەڵی نابرام تكا دەكەم هاوكاریم بكەی.. گەنجەكەش پێی دەڵی دەتبەم بۆ مزگەوت تا بەیانی.. بارانیش سوپاسی دەكات و باسی ئەوەش دەكات كە دەگەنە مزگەوت، دەردەكەوی هەموو دەرگاكانی داخراوەو تەنانەت پاسەوانیشی لێنیە؟ بەم دەردەوە كەمێك رێدەكەن و مێرد منداڵێك دەبینن لە دەرگای ماڵێك دانیشتوە، ئەو گەنجەی لەگەڵیان بوە پرسیاری لێدەكات ئایا دەتوانن پەنای ئەم ئافرەتە بدەن ئەمشەو تا بەیانی و دواتر رۆشتنی بۆ سلوپی؟
لە ماڵەكە دەمێننەوەو بۆ رۆژی دووەم دەیگەننە گەراجی عەنتاب و داوا لە شۆفێرەكە دەكەن بیانگەیەننە سلوپی؟ بەڵام شۆفێرەكە داوای كرێكەیان دەكات؟ ئەویش پێی دەڵی واللە 1000 هەزار دیناری عیراقیم پێیە؟ شۆفێرەكەش پێی دەڵی ئەو مەبلەغە ناكاتە كرێكە!! باران پێی دەڵی من لە دەستی دەوڵەتی هەڵهاتووم و لەمە زیاترم پێنیە؟ شۆفێرەكە پێی دەڵی سەركەوە یەك نەفەرمان ماوە. 
وەك خۆی «باران» باسی دەكات، لە كاتژمێری 10ی شەو تا كاتژمێری 9ی بەیانی ئەوكات گەشتوونەتە سلوپی و كاتێك گەشتوونەتە گەراج زۆر قەرەباڵغ بوە، چونكە ئاوارەكانی كۆبانی ئەوكاتە دەیانەویست بگەنە خاڵی سنووری ئیبراهیم خەلیل لە هەرێمی كوردستان. بۆیە ناتوانن ئۆتۆمبێلیان دەست بكەوی، تا دەگاتە رۆژی دووەم و ئەوكات سەردەكەون و دەگەنە ئیبراهیم خەلیل.
وەرە تەماشای ئەم دیمەنە بكە، لە پرسگەی پێشمەرگە داوای جەواز سەفەرو بەڵگەنامە لە باران و كچەكەی دەكەن؟ كاتێك پێیان دەڵی وەاللە نیمە؟ پێی دەڵێن تۆ لە كوێوە دێی؟ خۆ ئەوانیش هەقیانە داوا بكەن؟ بەڵام كاتێك پێیان دەڵی من خەڵكی شەنگالم و رفێنراوم و لە دەستیان رزگارم بوە، پێی دەڵێن: بەخێر بێی .. پێڵاوی منداڵەكەت بەرامبەر دەوڵەتە پیسەكەیانە.
قوربانیی شەشەم
كە ئاوەكە گەشتە دەمم هۆشم لە دەستدا؟
وەك روونە لە 3ی ئابی 2014 داعش بە تەواوی قەزای شەنگالی داگیركرد، ئەم هێرش و پەلامارە دڕندانەی داعش پێشووتر لەلایەن زۆر سیاسی و شارەزاو چاودێرەوە پێشبینی كراوبوو. ئەگەرچی زۆری تریش، تەنانەت هەندێ‌ حزبی سیاسیش لە هەرێمی كوردستان، دڵنیایی ئەوەی دەدا كە داعش پەلاری هیچ ناوچەیەكی كوردستانی نادا. با لەمە گەڕێین و بێین پێكەوە ئەم چیرۆكەی « رافد سەعید حمۆ»، كە یەكێكە لە دەربازبوەكانی كۆمەڵكوژكردنی دانیشتوانی گوندی كۆچۆ، بخوێنینەوە. 
كاتێك كە داعش دێنە گوندی كۆچۆو رافدیش لەوێ‌ دەبێت و خۆیشی دانیشتووی گوندەكەیە، بەم شێوەیە دەگێڕێتەوەو دەڵێ‌»: لە رۆژی 3ی ئاب، داعش دەستیان گرت بەسەرشەنگالدا، عەرەبی ناوچەكە دژی ئێزدییەكان هاوكارییانیان كردو هەموو گوندە ئێزدیدی نیشینەكانیان لەقەزای شەنگال موحاسەرەكرد. ئێمە لەوكاتەدا لە ئەركدا بووین، لەكاتژمێری حەوتی بەیانی، دوای كەوتنی شەنگال، موختاری گوندەكە داوای لێمانكرد پاشەكشێ‌ بكەین. بەشێك لە ئۆتۆمبێلەكانمان كەوتەڕێ‌، بەڵام نەیانتوانی رزگاریان بێت. بەشێكیان لەلایەن داعشەوە لێیاندراو ئێمەش موحاسەرە بووین. هەرلەم كاتە بەپێی قسەی رافد پەیوەندییەكی تەلەفۆنی بۆ «ئەحمەد جاسۆ»، موختاری گوندی كۆچۆ دێت لەلایەن یەكێك لە عەرەبەكانی ناوچەكەوەو پێی دەڵێ‌»: ئەمیری ناوچەكە لای ئەوانەو دەیەوێ‌ قسە لەگەڵ موختار بكات». 
دیارە لە پەیوەندییە تەلەفۆنیەكەدا، ئەبو حەمزە خاتوونی «حەمیدی»، بە ئەحمەد جاسۆی وتوە، دوای كەوتنی شەنگال روو بەڕووی ئیزدییەكان نابینەوە، بە مەرجێك بەڕاستی لەگەڵمان بێن و پێشی وتوە سبەی دێت بۆ ئەوەی لەگەڵمان رێك بكەوێت. دوای ئەم پەیوەندیە تەلەفۆنیە، ئەحمەد جاسۆی موختار بڕیاری پاشەكشێكردنی چەكدارەكانیان دەدا لە هەموو نوقتەكان و دانانی چەكەنیان و تەسلیمبوون.
رافد دەڵێ‌»: لە ئێوارەی هەمان رۆژدا، داعشەكان رۆشتن بۆ گوندی حاتەمیە كە ئەوانیش كەس و كاری ئێمە بوون، دواتر هاتن بۆ لای ئێمەو بە ئەحمەد جاسۆیان وت: هیچ كێشەیەك لە نێوانماندا نیە، یەك كەس لە ئێوە ئازار نادەین، بە تایبەت ئەوانەی چەكیان لە دژمان هەڵنەگرتوە، ئیتر موختاریش رەزامەندی لەسەر ئەمە دەربڕی». 
هەروەها رافد سەعید حمۆ، بەوردی باسی ئەوەش دەكات، كە رۆژی دواتر پەیوەندیان كرد، چەكەكان كۆبكەینەوەو ئەوانیش دێن دەیبەن، هاتن و بە یەك پیكاب كە چەكەكانی تێدا باركرابوو، بردیان و موختاریش بەڵێنی پێدان یەك فیشەك نابینن لە گوندەكەی ئێمەوە بتەقێنرێ‌.
دوای دوو رۆژ گەڕانەوە بۆ گوندەكە
رافد درێژە بە چیرۆكە ژانی كۆچۆ دەدات و دەڵێ‌»: دوای دوو رۆژ گەڕانەوە بۆ گوندەكە، یەكێك لە هونەرمەدە ناودارەكانیان لەگەڵ بوو بە ناوی «دەخیل كوتی»، پێش چەند ساڵێك موسڵمان ببو، هاتبوو گوایە لە بەردەم مەزگەوتی جەزیرە خۆی پاك دەكاتەوە؟ داوایان لە موختار «ئەحمەد جاسۆ» و موختاری گوندی حاتەمیە كرد، بۆ ئەوەی دانیشتوانی گوندەكان لە ئاینی ئێزدیەوە ببنە موسڵمان. هەردوولا «واتە دانیشتوانی گوندی كۆچۆو حاتەمیە»، داوایان كرد دەرفەتێكیان بدەنێ‌، چونكە مەسەلەكە زۆر سەختە بۆ شێخەكان و خەڵك بە گشتی. ئەوانیش لەسەر دوو رۆژ مۆڵەت رەزامەندییاندا. دانیشتوانی گوندی حاتەمیە لە رۆژی 10ی ئاب دەرچوون. 
دیارە دەرچوونی دانیشتوانی گوندی حاتەمیە لە ماڵەكانیان، بۆ ئەوە بوە بەرەو چیا بڕۆن. ئەوەتا رافد ئەمەمان بۆ پشڕاست دەكاتەوەو دەڵێ‌»: لە رۆژی دەیەمدا، ریش سپیەكانی گوندی حاتەمیە هاتن بۆ گوندەكەی ئێمە، وتیان ئێمە ئامادەین بۆ دەرچوون لە گوند بۆ چیا. كێشەمان ئەوە بوو رێكنەكەوتبوین لەسەر ئەوەی لەنێوانماندا بوو، جارێكی تر دووخاڵی پاسەوانیمان لەناو گوند دانا.
لێرەوە كۆچۆ بەرەو چارەنوسی نادیارو تاوانێكی دڕندانە دەبرێ‌، یان راستتر وایە بڵێین قەتڵ و عام دەكری؟ ئاماژەكان باش نین و بۆنی خراپیان لێدێ‌؟ جەلادەكەی داعش «ئەبو حەمزە خاتوونی- حەمیدی»، دێتەوە بۆ گوند، بەڵام چۆن؟ رافد باسی ئەمەمان بۆ دەكات و دەڵێ‌»: لە رۆژی 13ی ئاب، ئەمیر ئەبو حەمزە خاتونی هات و وتی (ئەو لە موسڵ بوەو والی موسڵ وتویەتی نابێت تەعدا لە دانیشتوانی كۆچۆبكەن و نابێت بەزۆر بیانهێننە سەر ئاینی ئیسلام). بێگومان ئەم هەواڵ و پەیامە بۆ دانیشتوانی گوندی كۆچۆ زۆر دڵخۆشكەر بوەو بڕێكی باش دڵنیایی داونەتێ‌ و هێمنی كردونەتەوە؟ بەڵام ئایا ئەمە تا سەر دەڕواو وا دەبێت؟ 
ئەوەتا رافد دەڵێ‌»: تا رۆژی 15ی ئاب لەگوند ماینەوە. رۆژی هەینی هێزێكی گەورەی داعش هاتن بۆ گوند، رێك لە كاتژمێری 10ی بەیانی. ئەمیرەكەیان داوای لە موختار «ئەحمەد جاسۆ» كرد، كە كەس و كارەكەی لە قوتابخانەكە كۆبكاتەوەو پێی وت»: كۆتان دەكەینەوەو سەرپشكتان دەكەین، لە نێوان مانەوەتان و پارێزگاری لەسەروەت و سامانتان یان دەرچونتان و دەستگرتن بەسەر سەروەت و سامانتان».
بەقسەی شاهێدحاڵەكە، هەموو خەڵكەكە تەنانەت ئەوانەشی بەتەمەن بوون و توانای رێكردنیان نەبوە، لەرێگای ئۆتۆمبێل ناو قوتابخانەكە كۆدەكەنەوەو هەرچی مۆبایل و پارەو زێڕ هەیە لەخەڵكەكە وەری دەگرن و ئەوانەی تریش هەر وادەڵێن، كە دەیكەنە ناو جانتایەكی رەشەوەو هەروەها شاهێد حاڵەكە باسی پلانە جەهەنمیەكەی ئەبو حمزە خاتوونی دەكان و دەڵێ‌: ئەبو حەمزە خاتوونی ووتاریداو وتی»: بأن الژی یرید أن یقبل اڵاسلام دینا، سیعیش معززا مكرما وسنعگیه بیته وماله، ولا نمانع أن لا تتحولوا الی الاسلام. وكان معه أحد المترجمین الكورد یتحدپ اللهجە البهدینانیە مپلنا». ووتەكەی خاتونیمان دەقاو دەق وەك خۆی داناوەو چەندین شاهێدحاڵێ‌ تریش مكوڕێ‌ لەسەر دەكەنەوەو هەشیانە دەڵێن خاتوونی وتویەتی «یان ببنە ئیسلام یان دەرچن بۆ چیا». ئەمە ئەگەر جیاوازییەك بێت لە قسەی شاهێدحاڵەكاندا، سروشتیەو هیچ لە دڕندەیی داعش و ئەبو حمزە خاتوونی ناگۆڕن، كە كۆچۆیان خەڵتانی خوێنكرد. 
دوای قسەكانی ئەبو حەمزە خاتوونی، ئەحمەد جاسۆ روودەكاتە خەڵكەكەو پێیان دەڵێ‌»: ئەو رێگر نیە خەڵك بیەوێ‌ ببێتە ئیسلام و بەڵام خۆی چیا هەڵدەبژێرێ‌». بەڵام هەموو خەڵكەكە رەتی دەكەنەوەو داوایان كردوە لە گوندەكەو ژێر دەسەڵاتی داعش رزگاربكرێن. جگە لە رافد، شایەتحاڵی تریش هەن دەڵێن ئەحمە جاسۆ لە كەس و كارەكەی وتوە كە ئەو خۆی چیا هەڵدەبژێرێ‌ و ئەوانیش ئازادن مانەوە یان چیا هەڵبژێرن؟ بەڵام خەڵكەكە وتویانە ئێمەش لەگەڵت دێین بۆ چیا. 
سەركەوتینە سەر چوار ئۆتۆمبێل و من لە وەجبەی یەكەم بووم
رافد دەڵێ‌»: دوای ئەوە ئۆتۆمبێلەكانیان ئامادەكرد، گوایە لە ژێر دەسڵاتی خۆیان دەرمان دەكەن، ئێمە سەركەوتینە سەر چوار ئۆتۆمبێل و من لە وەجبەی یەكەم بووم. بردمانیان بۆ رۆژهەڵاتی گوندەكە بە دووری نیوكیلۆمەتر تەقریبەن. لەوێ‌ حەوزێكی ئاوی كشت و كاڵی هەبوو. كاتێك هەر چوار ئۆتۆمبێلەكە گەیشتن، دەستیان كرد بە تەقەكرد بە نێوان قاچمانا، بۆ ئەوەی ببینە یەك ڕیز، بۆ ئەوەی پێكانمان ئاسانتربێت. لەكاتی تەقەكردندا قاچێكم بەركەوت و فیشەكێكیش لە شوێنێكی ترمەوە دەرچوو. كاتێك بووین بە دوو ریز، یەكێكیان بە مۆبایل وێنەی دەگرتین و چواركەسیان دەستڕێژیان لێدەكردین بە چەكی كڵاشینكۆف و لەدواوە. دوای دەستڕێژەكە هاتنە سەر تەرمەكان بۆ ئەوەی پرۆسەكە تەواو بكەن و لەگەڵ ئەم وەحشیەتەدا هیچ كەسێكمان تەنازولمان بۆیان نەكردو هەمووان شایەتمانیان بە « تاوس مەلك» دەهێنا، تا دوا هەناسە.
رافد ئەڵێ‌»: ئەو دەستڕێژانەی دوای كەلێمیانكرد، بەردەست و قاچم كەوت، وەك مردوو نواندنم كردو زۆرم تەحەمولكرد، بۆ ئەوەی هیچ ئاماژەیەكی زیندویی نەبینن». دەبێت رافد لەم كاتە لەچ دۆخێكدا بووبێت؟ كاتێك داعشەكان سەیریان دەكەن و لاشەكان ئەمدیوو ئەو دیودەكەن؟ دەیانەوێ‌ بزانن كامیان زیندوەو هاوكات بە دەمانچە فیشەك دەنێنە سەریانەوە وەك ئەو باسی دەكات؟
لەم كاتەدا هیچ جوڵەیەكم نەدەكرد
رافد دەڵێ‌»: لەم كاتەدا هیچ جوڵەیەكم نەدەكرد، مامەوەو تەحەمولم كرد، تا ئەوكاتەی رۆشتن، بیرم دێتەوە كە گوێم لە دەنگی فڕۆكەی هاوپەیمانان بوو كە بەسەر ناوچەكەوە بوون، بۆیە ئەوان پەلەیان كرد لە كارەكەیان لە ترسی فڕۆكەكان، گوێم لە سەركردەكەیان بوو دەیوت، داوای لێیان دەكرد كوژراوەكان بشارنەوە، زۆر شت بە مێشكما دەهات كە ئەوانە لەژێر گڵدا بشارێنەوە دەبێتە هۆكاری مردنیان؟ هەروەها گوێشم لێبوو یەكێكیان داوای كرد شوێنەكەیان بگۆڕن بۆ هێنانی وەجبەی دووەم؟ 
رافد ئەڵێ‌»: كاتێك سەركەوتنە سەر ئۆتۆمبێلەكانیان و رۆشتن، داوام لە زیندوەكانكرد هەڵسن؟ شەش كەس لە ژیاندا مابوون، بریندارەكان داوای ئاویان لێدەكردین، مامە كجی عەمۆ ئەو ئاوەی پێدان كە لەناو بوتڵەكاندا مابوەوە. سێ‌ كەس لە زیندوەكان پێش من لەنێو كوژراوەكاندا دەرچوون. منیش بە سكە خشێ‌ دەرچووم تا گەیشتمە كۆتایی حەوزەكە، لەسەر پەنجەكانم رۆیشتم تا گەشتمە ماڵی یەكەم لە گوندەكەو كەسێكی تیا بوو بەناوی «سەعد» بە فیشەكێك بەركەوتبو، داوام لێكرد كە هەڵبێین. بەڵام وتی ناتوانم هەڵسم و لەهەمان ماڵدا گیانی لەدەستدا. رافد درێژەی پێدەداو دەڵێ‌»: دەرچوم بۆ ناو رەزو باخ، لەوێ‌ «ئەدریس بەشار سلۆ»م بینی، ئەویش قاچی پێكرابوو، بەڵام توانیبووی تەداوی بكات. داوام لێكرد دەست بەرێكردن بكات، بەڵام دیاربوو نەیدەتوانی ئەوە بكات. دوای ئەوە تەنیا بوومەوە، تا ئەوكاتەی گوێم لێبوو یەكێك بانگم دەكات، ناوی «ئەسمە ئەلیاس ساڵەح» بوو، ئەویش قاچی بە سوكی برینداربوو، وە خۆیشی یاریدەدەری پزیشك بوو، داوای كرد لەگەڵ ئەو بڕۆین چونكە شارەزای ناوچەكە نیەو كورێكی تریشمان بینی ناوی «خدر حەسەن ساڵەح» بوو، ئەویش برینداربوو.
لەنێوان گوندەكاندا بەدوای بریندارەكاندا دەگەڕان
رافد دەڵێ‌: بەم حاڵەمانەوەو لەكاتی هەڵهاتنمان، دەورییاتەكانی داعش لەنێوان گوندەكاندا بەدوای بریندارەكاندا دەگەڕان، ئێمەش خۆمانمان دەشاردەوە بۆ ئەوەی نەمانبینن. دوای ئەوەش لە یەكێك لە ماڵەكاندا خۆمان حەشاردا بۆ ئەوەی شەودابێ‌ و بتوانین لە گوندەكە دەربچین. لەم كاتەدا دۆخم زۆر خراپ بوو، بە تایبەت دەستم خوێنی زۆری لەبەر دەڕیشت. ئەلیاس چەند كلینكسێكی پێدام كە پێی بوو، منیش خستمە سەربرینەكە تا خوێن لەبەر رۆیشتنەكەی وەستا. ئێمە لە كیڵگەیەكی پەلەوەردابووین، كە هی یەكێك لە كەسە نزیكەكانمان بوو. هێزەكانی داعش لە سەرەوەمان بوون، كاتێك كە نزیك بووینەوە سەگەكان دەستیان بە وەڕینكرد، ئەوانیش رۆشناییەكانیان هەڵكرد، هەوڵماندا خۆمان نەوی بكەین بەرەو شوێنەكە، بۆ ئەوەی رۆشناییەكە لێمان نەداو سەگەكانیش بێدەنگ بن. بۆیە بەرەو گردەكانی پشت گوندی تەل قەسەب رۆیشتین و لە شەقامەكە نزیك بوینەوە كە بەرەو تەل قەسەب دەهات. 
دوای ئەوە دەرچوم و حەوزێكی گەورە كە 3000 هەزار لیتر ئاوی دەگرت بینیەوە
رافد وردتر دەبێتەوەو دەڵێ‌: یەكێك لە ئۆتۆمبێلەكانی دەوریاتەكانیان هات، دوای ئەوەی رۆیشت ئێمەش لە شەقامەكە پەڕیمانەوە، تا گەیشتینە دۆڵێكی نزیك لە گوندی حاتەمیە. لە نەتیجەی تینوێتی لەسەر زەوییەكە كەوتم و هەستم بە وشكبوونی زمان و قوڕگم دەكرد. داوام لە ئەلیاس كرد ئاوم بۆ بێنێ‌، بەڵام ئەو وتی ئەترسێ‌ هێزەكانی داعش بیبینن؟ بۆیە لە دۆڵەكەوە بە سكەخشێ‌ رۆیشتم بۆ ئەو ماڵانەی لە ئێمەوە نزیك بوون. لە ژورەوە گەڕام، هەموو شتێك و خواردنی لێبوو، بەڵام ئاوم نەدۆزییەوە بۆ خواردنەوە! دوای ئەوە دەرچوم و حەوزێكی گەورە كە 3000 هەزار لیتر ئاوی دەگرت بینیەوە، ئاوەكە بە تیشكی خۆر گەرم ببوو، ئاوەكە بۆ من باش نەبوو، تەنانەت پاكیش نەبوو! ئەم حەوزی ئاوە لە یەكێك لە حەوشەكاندا بە چیمەنتۆ چاككرابوو. لەژێر حەوزەكە راكشام و بۆڕی ئاوەكەم راستەوخۆ لەسەر سەرم كردەوە، كە ئاوەكە گەشتە ناودەمم هۆشم لەدەستدا!!
پاشان دەڵێ‌: نازانم كات چەند رۆشت!! بەڵام كاتێك چاوم كردەوە، ئەو كوڕە «خدر»م بینی لەسەر سەرم و دەگریا، چونكە وای گومان كردبوو كە من مردبووم!! تا ئەم كاتە بۆڕی ئاوەكە كرابوەبوو، حەوشەكە پڕ ببوو لە ئاو لەگەڵ ئەو خوێنەی لە من رۆشتبوو!! پێم وت «بەخدری وتوە» ئاو دەخۆم و دەڕۆین! بە زەحمەت گەیشتینە دۆڵەكەو تا ئەم كاتەش ئەلیاس لە شوێنی خۆی بوو. ئەویش لەگەڵ كوڕەكە چوو ئاو بخواتەوەو گەڕایەوەو لێرە دەرچوین و گەیشتینە شەقامێك كە لە بلێرو تەل بەناتەوە دێت و لێرە باخێكمان بینی، ئەم كاتە كاتژمێر نزیكەی 10ی شەو بوو. باخەكە شوتی لێبوو، هەندێكمان لێخوارد چونكە ئێمە هیچمان نەخواردبوو لە بەیانیەكەیەوە. نەشم دەتوانی بۆ ماوەیەكی درێژ بڕۆم، هەموو كاتێك من كەمێك دادەنیشتم و دواتریش چاودێری رێگاكەم دەكرد. 
تەماشا، دەچنە ماڵێك كە لەنزیك باخەكەوە دروستكرابوو، سەلاجەكەیان یەك چۆڕ ئاوی تێدا نابێ‌! حەوزی ئاوەكەشی هەر بەتاڵ بوە! دەچنە ناو حەمامەكەوە، بۆڕی ئاوە گەرمەكەمان دەشكێنن!ئاوەكەش گەرم گەرم دەبێت! بەڵام ئەوان وادەزانن كە ئەم ئاوە هەڵدەگرن لە رێگا سارد دەبێت!! سەیری ئەم هیوایە بكە!! كە دواتر بەتاڵ دەبێت و وادەرناچێ‌!! پاشان ئەوان لە ماڵەكە دەردەچن و لەكاتی دەرچونیانیا، كۆمەڵێك سەگ هێرشیان بۆ دێنن و بەتایبەت سەگەكان لە رافد نزیك دەبنەوەو ئەویش هێمنیان دەكاتەوەو دوای ئەوە دەردەچن و بە وردی تەماشایەكی شەقامەكە دەكەن و هیچ جوڵەیەك نابینن و لەوێشەوە دەپەڕنەوە بۆ ئاراستەیەكی تر.
خوێنەری ئازیزو خۆشەویست، ئەزانم حەوسەڵەت لەگەڵ ئەم چیرۆكە ژانە هەندێ‌ جار دەبچڕێ‌؟ بەڵام تۆ پەلە مەكەو كەمێك سەبر! بزان رافد چی ترمان بۆ باس دەكات؟ ئەو دەڵێ‌: گوێمان لە كەسێك بوو لە نزیك تەل قەسەب بانگی دەكردین؟ هات و پێوەندی پێوەكردین، ئەویش «خەلەف خدێدا خەڵەف»بوو، كە یەكێك بوو لە رزگاربوەكانی وەجبە كۆمەڵكوژكراوەكانی دوایی بوو یەك بوتڵ ئاوی ساردیشی پێبوو كە پێنج لیتر دەبوو!! بەردەوام بووین لە ڕێكردن تا گەیشتینە گوندی حەمدان. هاورێكانمان وتیان با بەرێگەی سۆلاخ بڕۆین؟ من بڕوام وابوو داعشەكان لەوێ‌ ئامادەبونیان هەیە؟ بۆیە بڕیارمدا، بە ئاراستەی رۆژهەڵاتا بڕۆین؟ كاتێك لە باخێكی درختی زەیتون نزیك بوینەوە؟ جارێكی تر سەگەكان هێرشیان بۆ هێناین؟ پیاوەكانی داعش «ئەگەر گوزارشتەكە راست بیت» لایتەكانیان پێكرد!! بە جەماعەتم وت هەر یەكێك لە بن داریكی زەیتون دانیشی تا دۆخەكە هێور دەبێتەوە؟
دوای تێپەڕبوونی كات، جوڵەكان هێمن دەبنەوە. ئەوانیش لەو شوێنە دەردەچن و دەگەنە یەكێك تاوەرەكان و ئۆتۆمبێلێكی داعشەكان دێت بەبێ‌ هەڵكردنی رۆشنایی، بەڵام شەوەكەی تاریك دەبێت و ئەوانیش خۆیان لەگەڵ خاك نەوی دەكەن بۆ ئەوەی نەیانبینن؟ دوای تێپەڕبوونی كات، ئۆتۆمبێلی داعشەكان دەڕۆن و دەگەنە كۆتایی پردەكە!! ئەوانیش هەڵدەستن بە پشكنینی رێگاكە «ژێرەوەی پردەكە»و لێرە كەمێك رادەوەستن؟ كاتێك لە ژێر پردەكەوە دەپەڕنەوە؟ ئەو شوێنەی پێی دەڵێن «قەنێ‌»؟ كە شوێنێكی سەلامەتەو دەریچەیە بۆ شەنگال ؟ ئەوان لە یەكێك لە ماركێتەكان لادەدەن بۆ كڕینی ئاوو لەوێ‌ دەنوون؟
سەیركە چۆن ئاو دەردەكەن و لەم دیمەنە دڵ تەزێنە؟
رافد دەڵێ‌»: بەیانیەكەی هەستام و بینیم هاوڕێكانم نوستوون. هەڵیانم ساندو ماوەیەكی كورت دەستمان بە رۆشتن كردو لەبەر من وەستاینەوە. دواتر گەیشتینە «ئاو گەرمك»، ئێمە بەهیوای ئەوەبووین ئاوی تیا بدۆزینەوە، چونكە بیرێكی تێدا بوو؟ بەڵام یەك قەترە ئاوی تێدا نەبوو! بەردەوام بووین لە رۆشتن و گەیشتینە جێگایەك دانەوێڵەو ئۆتۆمبێلی لێبوو، ئێمە تەنیا ئامانجمان ئەوە بوو ئاوی خواردنەوەمان دەست بكەوێ‌؟! پاشان گەیشتینە بیرێكی ترو من پێش هەموان گەیشتمێ‌ و توانام نەماو لە تەنیشت بیرەكە بۆ ماوەیەك كەوتم!! دواتر دەستمان پێكردو بیرەكە حەوت مەتر قوڵ بوو، ئاویشی تێدابوو. 
سەیركە چۆن ئاو دەردەكەن و لەم دیمەنە دڵ تەزێنە؟ پێڵاوەكانی پێیان دادەكەنن، بەشێك لە جل و بەرگەكانی لە جیاتی حەبل پێوە دەكەن، بۆ ئەوەی چەند چۆڕێك بهێننە سەرەوەو بیخۆنەوە!! چونكە هیچ سەتڵ و حەبلێك نادۆزنەوە تا ئاوی پێبێننە سەرەوە!! دواتر خەڵەفی هاوڕێیان دەنێرنە خوارەوە بۆ نیوەی بیرەكە بۆ ئەوەی هەرچۆنێك بێت ئاو بێننە سەرەوە. ئەمانیش تێكڕا لە ئەو پەڕی تینۆتیدان. كە ئاوەكەیان پێدەگات ئەوەنە دەخۆنەوە لە لوتیانەوە دێتەوە دەرەوەو وەك رافد وەسفی دەكات خوێن و ئاو تێكەڵ بوون!!
رافد ئەوەش روون دەكاتەوەو دەڵێ‌»:بەردەوام بوینەوە لە رۆیشتن، تا گەیشتینە «كلی میركا»، چەند خێزانێكی لێبوو، رۆیشتین بۆ لایان و تا ئێوارە لایان ماینەوە، بە رێگای مۆبایلەكانیان پەیوەندیمان بە زۆر كەسەوەكرد، بەڵام نەهاتن بە پیریمانەوە. هاوڕێكانم داوایان لێم كرد بڕۆین، بەڵام قاچەكانم سڕببون و نەمدەتوانی بجوڵێم؟! من لەوێ‌ مامەوەو سێ‌ هاوڕێكەی ترم رۆشتن. 
تەنیا خۆم مامەوە بۆ ماوەی پێنج رۆژ
دەرویەك لە رافد دەكرێتەوەو هەمان شەو كاتژمێر نزیك 10 دوو كەس دێن و كۆمەڵێك چارەسەری سەرەتاییان پێدەبێت. ئەوەتا خۆی دەڵێ‌»: ئەوان گومانی ئەوەیان كردبوو كە یاریدەدەرێكی پزیشكیمان لەگەڵ بوە، بەڵام ئەو رۆشتبوو. پێم وتن داوو دەرمانەكان دابنێن، خۆم تەداوی و چارەسەری خۆم دەكەم. لێرە تەنیا خۆم مامەوە بۆ ماوەی پێنج رۆژ. تا براكەم لە زاخۆەوە هات و بە سواری گوێدرێژێك كە لەگەڵ خۆی هێنابووی، گوێدرێژەكە لاوازبوو، بە ئاستەم رێی دەكرد، كەوتینە رێ‌، دوای ماوەیەك گوێدرێژێكی لەمە باشترمان بە سوتفە بینی، ئەوەی یەكەممان جێهێڵاو ئەمەی ترمان بەكارهێنا، تا گەیشتینە شوێنێك ئاوی لێبوو، لەوێ‌ لامانداو ماینەوەو بۆ بەیانیەكەی گەیشتینە مەزاری شەرەفەدین. لەوێ‌ جەماعەتی قاسم شەشۆی لێبوو، خواردن و ئاویان پێداین لەگەڵ كۆمەڵێك پێداویستی پزیشكی كە هی پارتی كرێكاران بوو، هەروەها هەستان بە تیماری برینەكەم.
دوای ئەوە ئۆتۆمبێلێك هات بۆ ئەوەی پێی بپەڕینەوە بۆ سوریاو لەوێشەوە بۆ زاخۆ. گەیشتینە نزیك رەبیعە، داعشەكان دامانیانە بەرفیشەك و هەمووان هەڵهاتن بۆ پشت ساترەكەو من و براكەم دواتر بەسكە خشی خۆم گەیاندە پشت ساترەكە. ماوەیەك بە پێ‌ رۆشتین و گەیشتینە لای جەماعەتێك كە ئۆتۆمبێلیان پێ بوو، خەڵكی خانسۆربوون. لەگەڵیان سەركەوتین تا گەیشتینە خابوورو لەوێشەوە ئۆتۆمبێلێكی فریاكەوتن گەیاندمیە نەخۆشخانەی فریاكەوتنی دهۆك؟
قوربانیی حەوتەم
چاوی پیاوەكانیان بەستەوە؟
 رەنگە برادەرێك بێت و بڵی، ئەری ئەمە چیە؟ یان رەنگە بڵی تۆش بەشتێكتەوە گرت ئیدی كۆڵ نادەی؟ پێش بیستن و خوێندنەوەی چیرۆكی ئەم ئازارە، پێویستە باسی ئەوەبكەم كە كاتێك سەرقاڵی تۆماركردنی چیرۆكی بە جێماوەكانی ئەنفال بووم، زۆربوون دەیانوت تۆ هەر خەریكی كۆكردنەوەی ئازارو خەمی؟ بۆ دەست بۆ شتێكی تر نابەی؟ 
ئەم رزگاربوە ناوی بە پیتەكانی «ر، ا، خ» تۆماركراوەو لە بەسەرهاتی خێزانەكەی و ئەوەی لە چوارچێوەی تاوانەكانی داعش بینیونی، بەم شێوەیە دەگێڕێتەوە»: لە گوندی عەین زالەی عەرەبی كردمانیانە ئامانج، لەوی جەنگێكی خوێناوی بوو، وەك باران گولەیان بەسەرماندا باران. هەڵهاتین بۆ گوندی هەمەدان و لەكاتژمێر 2ی پاش نێوەڕۆش بەوی دەرچوین. لەم كاتەدا لەلایەن داعشەوە چواردەورمان گیرا، دوان لە كوڕەكانی عەلی شیرۆیان بە پێش چاوی خەڵكەكەوە كوشت، كە دانیشتوی كۆمەڵگای تەل قەسەب بوون و ئەمەش بۆ ترساندنی ئەودوای خەڵكەكە بوو.
رەوانەی قەسر جەردۆیان كردین و پیاوەكانیان لێمان دابڕی
دواتر  رەوانەی قەسر جەردۆیان كردین و پیاوەكانیان لێمان دابڕی. بینیم  چاوی مێردەكەم «ر، ا، ج» و كوڕەكەم «ی، ر، ا»و چاوی ئەودوای پیاوەكانیش كە ژمارەیان 100 كەس دەبوو بەستەوە، كە تا ئێستا چارەنوسیان نادیارە. بۆ شەوەكەی شەش شاحینەی گەورەیان هێناو ئافرەت و منداڵەكانیان لێباركردو كاتژمێر 2ی نیوەشەو گەیشتینە موسڵ. دەستیان كرد بە نەفرەت و تف بەخۆمان و لە ئاینمان.
پیاوێك كە ریشێكی پڕو درێژی هەبوو، ناوەكانی تۆمار دەكردو پرسیاری پیاوەكانمانی دەكرد. كچەكانیان جیاكردەوەو كچەكەی منیشیان برد. دواتر ناردمانیان بۆ قوتابخانەیەك لە تەلعەفەر، كە بچوكترین خزمەتگوزاری لێنەبوو. لە دۆخێكی خراپدا، نزیكەی پەنجا شەو لەوی ماینەوەو دوای ئەوە بردمامیان بۆ گوندی «كسر محراب» كە دەكاتە باشوری تەلعەفەرو دوای ئەوەش بۆ گوندی قزل قێو كە نزیك بوو لێییەوە. دوای ماوەیەك دیسان بۆ موسڵ و یەك مانكیش لەوی ماینەوەو پاشان بۆ شاری رەقە لە سوریا. 
پاش ماوەیەك زیندانی كردن، رەوانەی شوقەكانی شاری حەلەبیان كردین و هەر كۆمەڵە ئافرەتێك و منداڵەكانیان لە شوقەیەكدا. لە یەكێك لە شەوەكاندا، كاتی نوێژی عیشا، خۆم و سییان لە منداڵەكانم دەرچوین، هیچمان پێنەبوو جگە لە دەبەیەك ئاوو كەمێك نان و جلی دوومنداڵەكە. 
دوای ئەوەی رێمانكرد، چوینە یەكێك لە ماڵەكانەوە، داوامان لێكردن داڵدەمان بدەن و رزگارمان بكەن لەم تەنگانەیەو سوپاسی هاوكارییانمان كرد بەرامبەرمان.
دەگەنە كۆبانی و لەلایەن شەڕڤانەكانەوە پێشوازیان لێدەكری 
دیارە ئەو خێزانەی ئەمان روویان لێناون، هاوكارییان دەكەن و رۆژی 24-2-2015 دەگەنە كۆبانی و لەلایەن شەڕڤانەكانەوە پێشوازیان لێدەكری و دواتر رەوانەی قامیشلۆ دەكرێن و دوای ئەوەش بۆ توركیاو لەوێشەوە بۆ هەرێمی كوردستان. 
لەم خێزانە تەنیا ژنەكەو سییان لە منداڵەكانی دەربازدەبن و ئەوانی تر كە حەوت كەسن تا ئێستا چارەنوسیان نادیارە.
 *ئەم ستۆریانە لە بنەڕەتدا «داود موراد خەتاری» بە زمانی عەرەبی ئامادەی كردوون و ئێمەش كاری وەرگێڕان‌ و ئامادەكردن‌ و داڕشتنەوەمان بۆ كردوون.

جینۆسایدی‌ ئێزدییه‌كان: ناوی‌ تۆمه‌تبارو تاوانبارانی‌ ئه‌نجامده‌ری‌ كۆمه‌ڵكوژی‌ كۆچۆ
له‌ رۆژی‌ 15-8-2014 ده‌وڵه‌تی‌ تیرۆریستی‌ ئیسلامی‌ «داعش»، كاتژمێری‌ 11ی‌ پێش نیوه‌ڕۆ دڕندانه‌ترین تاوانیان له‌ دژی‌ دانیشتوانی‌ ئێزیدی‌ نشینی‌ گوندی‌ كۆچۆ ئه‌نجامدا، به‌بڕیاری‌ تاوانباری‌ داعش والی‌ موسڵ به‌ناوی‌ «ئه‌بو له‌یس»، كه‌ ناوی‌ راسته‌قینه‌ی‌ «رزوان تالب حه‌مدون»ه‌و به‌ ره‌چه‌ڵكیش خه‌ڵكی‌ موسڵه‌. له‌تاوانی‌ كۆمه‌ڵكوژكردنی‌ دانیشتوانی‌ كۆچۆ نزیكه‌ی‌ «500» گه‌نج و پیرو لاو له‌ ره‌گه‌زی‌ نێر له‌ چه‌ند شوێنێكی‌ جیاجیا كۆمه‌ڵكوژكراون و ژێده‌رو سه‌رچاوه‌كانیش باس له‌وه‌ ده‌كه‌ن له‌ «16» گۆڕی‌ به‌ كۆمه‌ڵدا ژێرخاك كراون. ئه‌مه‌ جگه‌ له‌ رفاندن و به‌سه‌بایه‌كردنی‌ سه‌دان له‌ ژن و كچه‌كانیان و ده‌ستدرێژیكردنه‌ سه‌ریان و فرۆشتن و سه‌وداكردنی‌ نامرۆڤانه‌ پێیانه‌وه‌ له‌ بازاڕه‌كانی‌ موسڵ و سوریادا.
ئه‌مه‌ی‌ خواره‌وه‌ كه‌ ناوی‌ به‌شێك له‌و تۆمه‌تبارو تاوانبارانه‌یه‌، له‌ واڵای‌ تایبه‌تی‌ توێژه‌ر داود موراد خه‌تاری‌ هاتوه‌و بڵاوكراوه‌ته‌وه‌و ئێمه‌ش وه‌ك خۆی‌ دایان ده‌نه‌ینه‌وه‌. پێشووتریش رۆژنامه‌ی‌ كوردستانی‌ نوێ‌ و ماڵپه‌ڕی‌ جینۆساید كورد له‌ رێگای‌ بڵاوكردنه‌وه‌ی‌ گێڕانه‌وه‌ی‌ شایه‌تحاڵه‌كانه‌وه‌ به‌شێك له‌م ناوانه‌ی‌ له‌سه‌ر زاری‌ شایه‌تحاڵه‌كانه‌وه‌ به‌ شێوه‌ی‌ پچڕ پچڕ بڵاوكردوه‌ته‌وه‌. به‌ڵام به‌شێوه‌ی‌ ئێستا كه‌له‌به‌رده‌سته‌ نه‌بوه‌و ئه‌مه‌ی‌ ئێستا ده‌توانێ‌ یارمه‌تیده‌رێكی‌ باش بێت بۆ ناسینه‌وه‌و شوێن پێهه‌ڵگرتنی‌ تاوانبارو تۆمه‌تباره‌كانی‌ كۆمه‌ڵكوژی‌ ئاوایی‌ كۆچۆ. 
ناوه‌كان:
1-ئه‌بو حمزه‌ حمیدی‌، به‌رپرسی‌ شه‌رعی‌ بلیج، جێگره‌كه‌ی‌ ئه‌بوئایا، یاریده‌ره‌كه‌ی‌ ئه‌بو مه‌سعب به‌رپرسی‌ ئه‌منی‌ بلیج.
2-ئه‌بوهاجر «حاكم جمال سه‌لامی‌»، له‌ عه‌ره‌به‌كانی‌ شه‌نگاله‌و حاكمی‌ به‌عاج بوه‌و ئه‌م كه‌سه‌ بڕیاری‌ كۆمه‌ڵكوژی‌ كۆچۆی‌ داوه‌، دوای‌ ئه‌وه‌ی‌ بڕیاری‌ له‌ والی‌ موسڵه‌وه‌ وه‌رگرتوه‌.
3-  ئه‌بوعه‌بدوڵا جه‌عفه‌ری‌
4-نافیع مه‌یتوتی‌، ناوی‌ راسته‌قینه‌ی‌ «حسن سولیع» خه‌ڵكی‌ ئاوایی‌ «عه‌ین فحی‌ باكور».
5-ئه‌بو مرێم، والی‌ قاتعی‌ به‌عاج
6-ئه‌بوعه‌دنان، به‌رپرسی‌ ده‌سته‌ی‌ گوله‌بارانكردن و به‌رپرسی‌ راسته‌وخۆی‌ كۆچۆ.
7-هه‌یسم برغلی‌ 
8-سالح برغلی‌ 
9-ئه‌حمه‌د برغلی‌
10-ئه‌بو سه‌رحان مه‌یتوتی‌، ناوی‌ راسته‌قینه‌ی‌ «ئه‌ركان ئه‌حمه‌د عه‌باس»
11-ئه‌بو ساله‌ح خاتوونی‌
12-ئه‌بو هلال خاتوونی‌
13-ئه‌بو ئه‌نس زبیداتی‌ 
14-ئه‌بو كرم –به‌رپرسی‌ عه‌سكه‌ری‌ 
15- ئه‌بو عه‌لی‌ خاتوونی‌
16-ئه‌بو غفران-به‌ڕێوه‌به‌ری‌ ئه‌منی‌ قاتعی‌ به‌عاج، ناو راسته‌قینه‌ی‌ «عید مشعل عواد زبیدی‌»
17-حاجی‌ مه‌هدی‌ عه‌فه‌ری‌، ناوی‌ راسته‌قینه‌ی‌ «عباس سالح عرب» سه‌رۆكی‌ مافیاكانی‌ ته‌لعه‌فه‌ر 
18- مدالله‌ شورتی‌ مه‌یتوتی‌، له‌ ئاوایی‌ بسكی‌، شۆفێری‌ شۆفه‌ڵ و یه‌كێك له‌ له‌وانه‌ی‌ رووفاته‌كانی‌ كردوه‌ته‌ ژێر خوڵه‌وه‌.
19-ئه‌حمه‌د سالح حسن له‌یله‌ مه‌یتوتی‌، ناسراو به‌ «دعلج»، ئه‌م كه‌سه‌ یه‌كێكه‌ له‌ داواكراوه‌كان له‌ لایه‌ن پۆلیسی‌ ئه‌نته‌رپول، له‌به‌ر ئه‌وه‌ی‌ تاوانبارێكی‌ ترسناكه‌و به‌ده‌ستی‌ خۆی‌ شوێنی‌ گۆڕه‌ به‌كۆمه‌ڵه‌كانی‌ ئاوایی‌ كۆچۆی‌ هه‌ڵكه‌ندوه‌و له‌گه‌ڵ شۆفێری‌ شۆفه‌ڵه‌كانی‌ تردا، هه‌ڵساوه‌ به‌ ده‌فنكردنیان. 
20-نواف ئه‌حمه‌د علوان له‌گه‌ڵ براكانیدا
21-ئه‌بو ده‌حام به‌نا مه‌یتووتی‌
22-ئه‌حمه‌د حه‌سۆ مه‌یتووتی‌ «ئه‌بوفراس»
23-مدرس مه‌حمه‌د ئه‌بو عه‌بدل ره‌حمان «مامۆستا بوه‌ له‌ قوتابخانه‌ی‌ سه‌ره‌تایی‌ شه‌نگال، له‌دوای‌ كۆمه‌ڵكوژی‌ دانیشتوانی‌ ئاوایی‌ كۆچۆ، له‌ میوانخانه‌كه‌ی‌ قوربانی‌ ئه‌حمه‌د جاسۆ وانه‌ی‌ قورئانی‌ به‌ رفێنراوه‌كان وتوه‌ته‌وه‌. 
 24-ئه‌بو ئه‌نس «شۆفێری‌ تایبه‌تی‌ ئه‌بو حمزه‌»
25-نه‌واف زبیدی‌ ناسراو به‌ «ئه‌بو زیاب»، ئه‌م تاوانباره‌ دوایه‌مین كه‌س ئه‌حمه‌د جاسۆی‌ موختاری‌ كۆچۆی‌ كوشتوه‌و دوای‌ ئه‌وه‌ش باوكی‌ هاتوه‌ میوانخانه‌كه‌و سامانه‌كه‌ی‌ و سه‌یاره‌كه‌ی‌ ئه‌حمه‌د جاسۆی‌ تاڵانكردوه‌و دوای‌ ئه‌وه‌ش له‌نێوان به‌عاج و بلیجدا میوانخانه‌یه‌كی‌ بۆخۆی‌ درووست كردوه‌. 
26-سه‌یفوڵا شیشانی‌ 
27-ئه‌بو كره‌م حه‌دیدی‌ 
28-ئه‌بو مه‌سعه‌ب به‌رپرسی‌ ته‌ل به‌نات 
29-سالم عه‌سكه‌ری‌ كه‌سه‌رپه‌رشتی‌ داگیركردنی‌ حاتمیه‌ی‌ كردوه‌
 30-ئه‌بو وسام شمری‌، پێشی‌ ده‌ڵێن «ئه‌بو حمودی‌ شه‌مری‌»، كه‌ دواتر بوه‌ به‌به‌رپرسی‌ قه‌زای‌ شه‌نگال.
 31-ئه‌بو عادل دانیشتووی‌ قه‌زای‌ شه‌نگال 
32-ئه‌بو به‌كر دانیشتووی‌ قه‌زای‌ شه‌نگال 
33-كرومی‌ ئه‌بو حمودی‌ دانیشتووی‌ عیوناتی‌ ره‌بیعه‌. 
34-ئه‌بوهارون، پێشووتر له‌ ته‌ندرووستی‌ شه‌نگال فه‌رمانبه‌ر بوه‌، واته‌ پێش 3-8-2014
35-مسعه‌ب ساله‌ح لیله‌، به‌رپرسی‌ راگه‌یاندن و برای‌ «ئه‌حمه‌د ساله‌ح حسن لیله‌ «دعلج»
36-یوسف سالح مه‌حمه‌د خزر سایر مه‌یتووتی‌ و براكه‌ی‌ سلێمان ئاوایی‌ «عامودیه‌»
37-شێخی‌ عه‌سره‌تی‌ مه‌یتووته‌ «جارالله‌ محمه‌د عه‌لی‌ جارالله‌» یه‌كه‌م ئۆتۆمبێل بوه‌ له‌ناو كاروانی‌ ئۆتۆمبێله‌كانی‌ داعش كه‌ به‌ره‌و قه‌یره‌وان و له‌وێشه‌وه‌ بۆ شه‌نگال رۆشتوون و ره‌نگی‌ ئۆتۆمبیله‌كه‌ی‌ سوور بوه‌و پیكاب بوه‌.
38-فالح مه‌حمه‌د عه‌لی‌ جارالله‌ خه‌ڵكی‌ بلیج بوه‌و مه‌یتووتی‌ بوه‌. به‌رپرسی‌ ده‌سته‌ بوه‌و برای‌ شێخی‌ مه‌یتووت جارالله‌ بوه‌ محمه‌د عه‌لی‌ جارالله‌ بوه‌. 
39-علا‌و حساوی‌ عیسا مه‌یتووتی‌، به‌شداری‌ كردوه‌ له‌ كۆمه‌ڵكوژی‌ كۆچو، ئه‌و یه‌كه‌م كه‌س بوه‌ كه‌ده‌ست رێژی‌ گوله‌ی‌ له‌ رفێنراوه‌كان كردوه‌. 
40-تاریق حساوی‌ عیسا مه‌یتووتی‌، به‌شداری‌ كردوه‌ له‌ هێرش بۆ سه‌ر شه‌نگال و كۆمه‌ڵكوژی‌ كۆچۆو و به‌رپرسی‌ شاره‌وانی‌ قه‌یره‌وان بوه‌. 
41-به‌دران عوید مه‌حمود عه‌لی‌ مه‌یتووتی‌، به‌شداری‌ له‌ كۆمه‌ڵكوژی‌ كۆچۆكردوه‌و هاوكات هه‌ڵساوه‌ به‌ تاڵانكردنی‌ دووكان و بازاره‌كانی‌ ته‌ل به‌نات و ته‌ل قه‌سه‌ب.
42-عكله‌ خلف خزر علیوی‌ ورده‌ مه‌یتووتی‌، به‌شداری‌ له‌ هێرش بۆ سه‌ر شه‌نگال و كۆمه‌ڵكوژی‌ كۆچۆ كردوه‌. 
43-خلیف عائید مه‌یتووتی‌
44-نوفل حین یولیع موختار مه‌یتووته‌ 
45-عه‌بدل ره‌حیم حمد ته‌ها مه‌یتووتی‌
46-مسرق عه‌بدل داود مه‌یتووتی‌ 
47-فلاح مه‌حمه‌د عه‌لی‌ جارالله‌ سه‌رۆكی‌ عه‌شره‌تی‌ مه‌یتووتات
 48-قه‌حتان هلوش مه‌یتووتی‌ 
49-ئه‌حمه‌د فازل عبید زبیدی‌ 
50-ئه‌میر ئه‌بو زیا‌و «شهاب احمه‌د علوان»
51-موئه‌ید مه‌حمه‌د حمیدی‌، ئاوایی‌ بسكی‌ جنوبی‌ 
52-عه‌بدل ره‌حمان عه‌بدل ره‌حیم ئاوایی‌ «عه‌ین فتحی‌ شمالی‌»
53-زیاد ئه‌حمه‌د مه‌یتووتی‌، پێشووتر یه‌كێك بوه‌ له‌ پاسه‌وانه‌كانی‌ پۆلیسی‌ سنوور عه‌قید عه‌لی‌ مه‌یتووتی‌».

تێبینی‌: 
سه‌رچاوه‌ی‌ ساغكردنه‌وه‌ی‌ ناوی‌ ئه‌م تۆمه‌تبارو تاوانبارانه‌ «داود موراد خه‌تاری‌، زیاد خه‌ڵه‌ف، مستۆ حسن، سه‌میره‌ حاونج، به‌شار حه‌لۆ، دانیشتوانی‌ كۆچۆ»یه‌.


ناو:  
ئیمه‌یل:    
سه‌رنج:  

#7346
21/8/2017
ئه‌رشیف
وه‌رزش
‌ له‌ وه‌رزی نوێی NBA -دا (1230) یاریی دەکرێت 21/8/2017
‌ شاراپۆڤا داوه‌تنامه‌ی‌ گراندسلامی ئه‌مریكای پێشكه‌ش كرا 20/8/2017
زانست
‌ هەسارەیەك لە زەوی نزیك دەبێتەوە 21/8/2017
‌ نۆكیا 8 ركابەریی ئایفۆن و گالاكسی دەكات 21/8/2017
‌ پێنج هەڵەی باو لەكاتی راكردندا 21/8/2017

© 2009 KURDISTANY NWE, All RIGHTS RESERVED. | CREATED BY AVESTA GROUP