سه‌فه‌رێك بۆ ئێزدیخان و ئیستێك له‌ ئاستی مەرگەساتێکدا
سه‌فه‌رێك بۆ ئێزدیخان و ئیستێك له‌ ئاستی مەرگەساتێکدا ‌ سه‌رتیپ جه‌وهه‌ر‌ 29/8/2017

سه‌رنووسەر: میوانانی ساڵۆنی كوردستانی نوێ هه‌موو لایه‌كتان به‌خێربێن، وه‌ك نه‌ریتێكی ئه‌زمونی ساڵۆنه‌كه‌مان هه‌ر جاره‌ی كتێبێك ده‌ناسێنیین كتێبی ئم جاره‌مان سه‌فه‌رێك بۆ ئێزدیخان له‌ نووسینی هه‌ڤاڵی رۆژنامه‌نووس سه‌رتیپ جه‌وهه‌ر ئه‌ندامی ده‌سته‌ی نووسه‌رانی كوردستانی نوێ، سه‌فه‌رێك بۆ ئێزیدخان ریپۆرتاژێكی رۆژنامه‌وانی دوورو درێژه‌ كاك سه‌رتیپ ماوه‌یه‌ك پێش ئێستا له‌ناوجه‌رگه‌ی كاره‌ساتی شه‌نگالدا به‌ به‌شداری خۆی گفتوگۆو دیداره‌كانی خۆی له‌گه‌ڵ ده‌ربازبووانی كاره‌ساته‌كه‌‌و لایه‌نه‌كان ئه‌نجامداوه‌ ئه‌م كتێبه‌ بایه‌خه‌كه‌ی ئه‌وه‌یه‌ هیوادارم له‌ نیو رۆژنامه‌نوسانی كوردا په‌ره‌ی پێبدرێت ئه‌ویش ئه‌وه‌یه‌ رۆژنامه‌نوس خۆی سه‌ره‌ڕای ئه‌وه‌ی چه‌ند زانیاری هه‌بێـت له‌سه‌ر رووداوه‌كان بچێته‌ شوێنی رووداوه‌كان، ئه‌م كتێبه‌ی كاك سه‌رتیپ ئه‌مڕۆ مه‌راسیمی بۆ سازده‌كه‌ین دووه‌م فه‌رهه‌نگی كاك سه‌رتیپ وه‌ك كتێب له‌سه‌ر كوردستانی رۆژئاوا سه‌فه‌رێكی مه‌یدانی خۆی بوو وه‌ هه‌ردوو كتێب چ ئه‌مه‌‌و چ ئه‌وه‌ی پێشتریش كاتی خۆی له‌ كوردستانی نوێ به‌ حه‌له‌قات بڵاوبوونه‌وه‌ یه‌كه‌میان ئێمه‌ چاپمان كرد رێك نه‌كه‌وت مه‌راسیمی بۆ سازبكه‌ین ئه‌و كاته‌ ساڵۆنمان نه‌بوو موناسه‌به‌ی بۆ رێك بخه‌ین نه‌چووه‌ بچی بۆ ئه‌م كتێبه‌یان له‌سه‌ر ئه‌ركی خۆی چاپكراوه‌، ئێستاش زنجیره‌ وتاری هه‌یه‌ سه‌فه‌رێك بۆ به‌غدا، هه‌ر سێ سه‌فه‌ر ئه‌وه‌ی رۆژئاواو ئێزیدخان‌و به‌غدا بڕواناكه‌م قاتێكی هه‌زار‌و پێنچ سه‌د  دۆلاری تێچوبێت، ره‌نگه‌ ئێمه‌ له‌گه‌ڵ به‌شێكی ئه‌م بیرۆكانه‌ی ئه‌م كتێبه‌دا بێن ره‌نگه‌ له‌گه‌ڵ به‌شێكیشی نه‌بین به‌ڵام ئه‌وه‌ی كه‌ شایه‌نی ده‌ستخۆشییه‌ كاك سه‌رتیپ وه‌ك رۆژنامه‌نوسێكی مه‌یدانی چۆته‌ شوێنی رووداوه‌كه‌ خۆی، با كاك سه‌رتیپ خۆی كتێبه‌كه‌مان پێبناسێنێت‌و پاشانیش گفتوگۆی له‌سه‌ر ده‌كه‌ین.
سه‌رتیپ جه‌وهه‌ر:
خۆشبه‌ختانه‌ ئه‌مڕۆ 20/ی ئاب، یه‌كساڵی ته‌واو تێده‌په‌ڕێت به‌سه‌ر سه‌فه‌ره‌كه‌م بۆ شنگال و ده‌وروبه‌ری، له‌م كاته‌دا به‌ڕێگاوه‌بووم به‌ره‌و ناوچه‌كه‌ بۆ بینینی ناوچه‌كه‌و تۆماركردنی راستیی روداوه‌كانی ئه‌وێ‌.
ئاماده‌بوانی ئازیز، به‌خێربێن، ئه‌ركتان كێشا، ماندومان كردن، لێره‌دا من ده‌مه‌وێ‌ كتێبه‌كه‌ی‌ خۆم (سه‌فه‌رێك بۆ ئێزیدخان) به‌ئێوه‌ی‌ ئازیز بناسێنم.
 سه‌فه‌رێك بۆ ئێزیدخان، گه‌شتێكی رۆژنامه‌وانییه‌ بۆ گێڕانه‌وه‌و وێنه‌گرتن و پێشاندانی ئازاری ئێزیدیان، وێنه‌كیشان به‌خستنه‌ رووی راستیی رووداوه‌كانی ناوچه‌كه‌و پێشاندانی ئه‌و رووه‌ی‌ تائێستا راگه‌یاندنی كوردیی، یان ده‌ستی‌ نه‌گه‌یشتۆتێ، یان به‌هۆی باری‌ سیاسییه‌وه‌ خۆی لێ‌ پاراستووه‌و نه‌یویستوه‌ باسی بكات.
ئه‌م گه‌شته‌، هه‌موو ئه‌و راستییانه‌ ده‌خاته‌ روو كه‌ پێویسته‌ هه‌موومان، سه‌باره‌ت به‌نه‌هامه‌تیی ئێزیدیان و ئه‌و ململانێ سیاسی و سه‌ربازییه‌ی‌ له‌ناوچه‌كه‌یان هه‌بووه‌و هه‌یه‌، بیزانین.
ئێزیدخان، خاكی ئێزیدیانه‌، ئه‌وه‌ی‌ ئه‌وێ‌ نه‌یبینێت نازانێت ئه‌م میلله‌ته‌ له‌چ ئازارێكدا ده‌ژین، به‌هه‌زارانیان لێ‌ شه‌هیدكراو هه‌زارانیشیان لێ‌ دیل گیرا، ئێستاش زۆربه‌ی‌ ناوچه‌كه‌یان سه‌رباری رزگاركردن، به‌ڵام وێرانه‌و هیچ ئاوه‌دانییه‌كی بۆ نه‌گه‌ڕاوه‌ته‌وه‌.
سه‌فه‌رێك بۆ ئێزیدخان، قۆناغێكی دیاریكراوی مێژویی ئێزیدخانه‌، گێڕانه‌وه‌ی‌ چیرۆكی سه‌رده‌مێكی دیاریكراوی ناوچه‌كه‌یه‌، وێناكردنی ساته‌وه‌ختێكی پڕ مه‌رگه‌ساتی خه‌ڵكی شنگال و ئێزیدیاتییه‌، بۆئه‌وه‌ی‌ ون نه‌بێت و به‌زمانێكی دیكه‌و به‌نیه‌تێكی دیكه‌ نه‌نوسرێته‌وه‌و راستیی رووداوه‌كانی ناوچه‌كه‌ ون نه‌كرێت.
له‌م كاره‌ رۆژنامه‌وانییه‌مدا، هه‌م به‌شێك یان قۆناغێكی مێژوویی شنگال و ئێزیدییه‌كانم تۆماركردووه‌ تاوه‌كو راستیی رووداوه‌كان وون نه‌بێت و رۆژانی داهاتوو، نه‌وه‌ی‌ داهاتووی كوردستان و ئێزیدییه‌كان راستییه‌كان وه‌كوخۆی بزانن، هاوكات ویستم به‌م كاره‌ رۆژنامه‌وانییه‌م به‌شداربم له‌خه‌م و كول و برینی خاك و خه‌ڵكی شنگال و ده‌وروبه‌ری، كه‌ به‌هۆی هێرشی دڕندانه‌ی‌ تیرۆرستانی ده‌وڵه‌تی ئیسلامیی ئه‌م كاره‌ساته‌یان به‌سه‌رهات.
له‌م كتێبه‌دا هه‌وڵمداوه‌ دروست مامه‌ڵه‌ له‌گه‌ڵ زانیارییه‌كان بكه‌م و ووردكاریی له‌زانیارییه‌كاندا بكه‌م، دڵنیام زانیاریی زۆر زیاترو پێشكه‌وتنی زۆرتر هاتۆته‌ دی له‌دوای‌ ده‌ستپێكردنی هه‌ڵمه‌تی رزگاركردنی موسڵ له‌ده‌ست ئه‌و دڕندانه‌، به‌ڵام ئه‌وه‌ی‌ من په‌یوه‌ندی به‌قۆناغێكی دیارییكراوه‌وه‌ هه‌یه‌و هیوادارم به‌ئه‌مانه‌ته‌وه‌ ئه‌وه‌ی‌ كه‌وتبێته‌ به‌رچنگ و چاوم گواستبێتمه‌وه‌.
هه‌وڵمداوه‌ له‌گه‌ڵ خوێنه‌ر هاوسه‌فه‌رم بێت، له‌ڕێی‌ ووشه‌ بكه‌مه‌ كامیراو وێنه‌ی‌ لێ‌ دروستبكه‌م، له‌گه‌ڵ خۆمدا به‌مێژووی ناوچه‌كه‌و پێكهاته‌ی‌ كۆمه‌ڵایه‌تیی و كێشه‌و گرفته‌كانی ناوچه‌كه‌ی‌ پێ‌ بناسێنم، وابكه‌م هه‌ندێجار هه‌ست به‌ئازاری ئێزیدییه‌كان بكات، بیبه‌مه‌ ناو داعش و له‌وێ‌ ئازاری كچ و جوانمه‌ردانی كورد هه‌ست پێبكات.
له‌و كتێبه‌دا، ململانێ سیاسی و ئه‌گه‌ره‌كانی داهاتووی ناوچه‌كه‌م له‌بیر نه‌كردووه‌، پێكهاته‌ی‌ هێزه‌ چه‌كدارییه‌كان و گرژی ناوچه‌كه‌م خستۆته‌ روو، ریشه‌ی‌ گرفته‌كان و ئاینده‌ی ململانیكانم شیكردۆته‌وه‌، هه‌روه‌ك كه‌مته‌رخه‌می و تێكه‌ڵبونی میدیای كوردی به‌باری سیاسیم رونكردۆته‌وه‌ كه‌ به‌وهۆیه‌وه‌ گرنگی به‌مه‌رگه‌ساتی ئێزیدییه‌كان ناده‌ن.
پردی سحێلاو قاچاخی ئه‌و سنورانه‌و ده‌ستڕۆیشتوی لێپرسراوانی حزب و ئاوه‌داننه‌كردنه‌وه‌ی‌ شارو دێهاته‌كان و له‌ده‌ستدانی ناوچه‌كانی باشوری شنگالم باسكردووه‌، بۆئه‌وه‌ی‌ سبه‌ی‌ رۆژێ‌ ئه‌م كتێبه‌ ببێته‌ سه‌رچاوه‌یه‌كی گرنگ بۆ زانینی چه‌ند راستییه‌ك كه‌ ره‌نگه‌ هه‌وڵی شێواندنی بدرێت.
پردی سحێلاو رێگرییه‌كانی ئه‌و رێگایه‌و گرانی خۆراك و سنورداخستن به‌رووی‌ رۆژئاواو گوشار خستنه‌ سه‌ر خه‌ڵكی ناوچه‌كه‌م وه‌كوخۆی باسكردووه‌، له‌گه‌ڵ ئه‌وه‌شدا چومه‌ته‌ سه‌رشاخی شنگال و باسی كێشه‌و گرفت و ئازاره‌كانی ئاواره‌كانی سه‌رده‌شتێم كردووه‌.
من دڵنیام كتێبێك و ده‌رهێنه‌رێك و رۆمانێك ناتوانێت ئازاری ئێزیدییه‌كان وه‌كوخۆی بخاته‌ڕوو، به‌ڵام ده‌كرێت به‌یه‌كه‌وه‌ هه‌موومان به‌نوسین و وێنه‌و فلم و ده‌نگ، له‌هاواربده‌ین و ئازاره‌كانیان بگه‌ینینه‌ هه‌موو وێستگه‌و شوێنێك، ئه‌وه‌ی‌ من له‌م سه‌فه‌ره‌ تێیگه‌یشتم، هاوڵاتیانی شاره‌كانی دیكه‌ی‌ كوردستان ئاگاداری ئازاری ئێزیدییه‌كان نین، هۆكاره‌كه‌یشی روونه‌، ده‌سه‌ڵاتی لایه‌كی كوردستان نایه‌وێت هه‌قیقه‌تی ئه‌و مه‌رگه‌ساته‌ بكه‌وێته‌ گۆڕێ، چونكه‌ لێی‌ زیانمه‌ند ده‌بێت، بۆیه‌ پێویسته‌ هه‌موومان، هه‌ره‌یه‌كه‌ له‌شوێنی خۆی و به‌پێی‌ توانای خۆی، له‌پێناو ناساندنی ئه‌و تاوانه‌ كاربكات..
له‌بری ئێمه‌، ده‌بوو حكومه‌تی هه‌رێم، هه‌موو به‌ڵگه‌كانی تاوانی شنگال كۆبكاته‌وه‌و هه‌وڵبدات له‌ نێو كۆمه‌ڵگای‌ نێوده‌وڵه‌تی وه‌ك تاوانی جینۆساید بیناسێنێت، هاوكات قه‌ره‌بوی ماددی و ده‌رونیی خه‌ڵكی ناوچه‌كه‌ی‌ كردبایه‌وه‌، گوشاری بخستبایه‌ سه‌ر حكومه‌تی عیراق هاوكاربێت له‌م پرۆژه‌یه‌، به‌ڵام به‌داخه‌وه‌، نه‌ك ئه‌وه‌ نه‌كراوه‌، به‌ڵكو هه‌ندێك له‌ گۆڕه‌ به‌كۆمه‌ڵه‌كانی تاوانی ده‌ستی داعش خه‌ریكه‌ شوێنه‌واره‌كانیان وون ده‌بێت، چونكه‌ ئیشی له‌سه‌ر نه‌كراوه‌.
بیرم نه‌چێت وێنه‌ی‌ سه‌ر به‌رگی كتێبی سه‌فه‌رێك بۆ ئێزیدخان، هی فۆتۆگرافه‌ر كاك زمناكۆ ئیسماعیل خالد-ه‌ كه‌ وێنه‌گرێكی به‌توانایه‌و ئه‌م وێنه‌یه‌ ئه‌وه‌نده‌ی‌ دیكه‌ خزمه‌تی كتێبه‌كه‌ی‌ كردووه‌، لێره‌وه‌ سوپاسی ده‌كه‌م.
ته‌ها سلێمان:
 سوپاس بۆ ساڵۆنه‌كه‌... بۆ كوردستانی نوێ و بۆ كاك سه‌رتیپ-یش، كه‌ له‌ ده‌رفه‌تێكی وادا هه‌موومان كۆبووینه‌ته‌وه‌.. بێگومان ئه‌مه‌ دووباره‌ش ده‌بێته‌وه‌.
له‌ راستیدا من به‌ده‌ر له‌ قۆپی كردن، پێش ئه‌وه‌ كتێبه‌كه‌م برد، له‌به‌ر ئه‌وه‌ی تاڕاده‌یه‌ك له‌ پسپۆڕییه‌كه‌ی خۆمه‌وه‌ نزیكه‌، كتێبه‌كه‌م زۆر به‌وردیی خوێنده‌وه‌و من ده‌ستخۆشیت لێ ده‌كه‌م.
 وه‌كو كارێكی رۆژنامه‌وانی  كه‌ كاك سترانیش باسیكرد و خۆشت هه‌ندێك لایه‌نیت باسكرد، گومانم نییه‌ له‌وه‌ی یه‌كێكه‌ له‌و كاره‌ پرۆفیشناڵانه‌ی كه‌ ده‌كرێت ده‌یان و سه‌دان نموونه‌ی كاری دیكه‌ی وامان هه‌بێت.. ده‌یان رووداوو وێستگه‌ی مێژووی دوورو نزیكی ئێمه‌ پڕن له‌و رووداوانه‌، بۆیه‌ من به‌ چه‌ند تێبینییه‌ك ده‌ستپێده‌كه‌م، یه‌كه‌میان بۆ ساڵۆنه‌كه‌و هه‌م بۆ جه‌نابیشتان كه‌ لێره‌ ئاماژه‌ت پێكردووه‌ تكایه‌ با به‌ تاوان نه‌ڵێین كاره‌سات، چونكه‌ كاره‌سات بۆ رووداوێكی سروشتیی، بۆنموونه‌ ده‌كرێت بۆ ئه‌وه‌ی سه‌ر چیای شنگال كه‌ خه‌ڵك له‌برسانداو له‌ تینوواندا مردن بڵێین كاره‌سات، به‌ڵام ئه‌نجامدانی تاوانه‌كه‌ و كرده‌وه‌كه‌ له‌لایه‌ن داعشه‌وه‌ ئه‌وه‌ تاوانه‌، تاوانیش یاساو رێساو بنه‌مای خۆی هه‌یه‌، نه‌ك هه‌ر له‌سه‌ر ئاستی لۆكاڵی، به‌ڵكو له‌سه‌ر ئاستی نێوده‌وڵه‌تیش بنه‌ماو یاساو رێسای خۆی هه‌یه‌ بۆ ناسینه‌وه‌ی. بۆ نموونه‌ رێكه‌وتننامه‌ی نه‌ته‌وه‌ یه‌كگرتووه‌كان له‌ ساڵی  1948 و یاساو بنه‌مای 1998 مان هه‌یه‌، له‌به‌رئه‌وه‌ داوا ده‌كه‌م بۆ جارێكی تر ئه‌گه‌ر ئه‌م كتێبه‌ چاپكرایه‌وه‌، هیوادارم ده‌سته‌واژه‌ی كاره‌ساتی تێدا هه‌ڵبگیریت و له‌بری ئه‌و ده‌سته‌واژه‌یه‌ له‌جیاتی تاوانه‌كانی داعش تاوانی جینۆساید دابنرێت كه‌ پڕ به‌پێست ئه‌م تاوانه‌ به‌پێی هه‌موو ئه‌و یاساو رێسایانه‌ی كه‌ هه‌یه‌ تاوانی جینۆسایده‌.
بێگومان ئه‌مه‌ش ده‌قۆزمه‌وه‌ بۆ ده‌رفه‌تێكی تر كه‌ دوێنێش له‌گه‌ڵ كاك كاروان باسمكرد، به‌ڕاستی له‌م یه‌ك دوو رۆژه‌ی رابردوودا ئیبراهیم جه‌عفه‌ری وه‌زیری ده‌ره‌وه‌ی عیراق له‌هه‌وڵێكی له‌و جۆره‌دایه‌و نامه‌یه‌كیشی ئاراسته‌ی نه‌ته‌وه‌ یه‌كگرتووه‌كان كردووه‌ كه‌ تێیدا ده‌ڵێت: ئه‌و تاوانه‌ی كه‌ داعش ئه‌نجامیداوه‌، تاوانێكی لۆكاڵییه‌، ده‌كرێت به‌پێی یاسا لۆكاڵییه‌كان مامه‌ڵه‌ی له‌گه‌ڵدا بكرێت و ده‌ڵێت: ئێوه‌ هاوكارمان بن بۆ ئه‌وه‌ی ئێمه‌ وه‌كو تاوانی تیرۆر یان وه‌كو تاوانی دژی مرۆڤایه‌تی بیناسێنین.
بێگومان ئه‌گه‌ر بێت و ئه‌مه‌ بكرێت، ئه‌مه‌ مه‌ترسییه‌كی زۆر زۆر گه‌وره‌یه‌ له‌لایه‌ن حكومه‌تی عیراقییه‌وه‌، چونكه‌ ده‌بێته‌ به‌ربه‌ست كه‌ له‌لایه‌ن حكومه‌تی عیراقه‌وه‌ داده‌نرێت بۆ ئه‌وه‌ی تاوانی جینۆسایدی ئێزدییه‌كان له‌سه‌ر ئه‌و ئاسته‌ نێوده‌وڵه‌تییه‌ و ئه‌و كۆده‌نگییه‌ی له‌سه‌ر ئاستی نێوده‌وڵه‌تی بۆی دروست بووه‌، له‌بارببرێت.
تێبینی دووه‌مم ئه‌وه‌یه‌ كه‌ گومانم نییه‌ له‌ هه‌وڵه‌كه‌ی جه‌نابتان، به‌ڵام سه‌رنجم له‌سه‌ر كۆمه‌ڵێك بابه‌ت راوه‌ستا له‌وانه‌: له‌هه‌ندێك شوێن ئاماژه‌ت به‌ هه‌ندێك ئامار كردووه‌، ژماره‌ی ئێزدییه‌كان له‌ ده‌ره‌وه‌ی وڵات ئه‌وه‌نده‌یه‌، له‌ ناوخۆی وڵات ئه‌وه‌نده‌یه‌، له‌ ئێران، توركیا یان له‌ رۆژئاوا ئه‌وه‌نده‌یه‌.. له‌ڕاستیدا هه‌ستم كرد ئه‌و ژمارانه‌ دیقه‌تی تێدا نه‌كراوه‌، چونكه‌ من زیاتر له‌ سه‌رچاوه‌یه‌كم لایه‌ باس له‌و ئامارانه‌ ده‌كه‌ن. 
بۆ نموونه‌ له‌ باكوور پێش روودانی تاوانی بێ پیشینه‌ی داعش دژ به‌ ئێزدییه‌كان، هه‌مووی 500 خێزان نه‌ماونه‌ته‌وه‌ له‌ باكووری كوردستان، ئه‌ویش له‌ ئه‌نجامی زوڵم و سته‌می ده‌سه‌ڵاته‌ یه‌كله‌دوای یه‌كه‌كانی توركیا كه‌ ئێزدییه‌كان ره‌ویان كردووه‌ بۆ ده‌ره‌وه‌، ته‌نانه‌ت رۆژئاواش ژماره‌یه‌كی ئه‌وتۆیان نه‌ماوه‌ته‌وه‌.
بۆیه‌ ئه‌و ژماره‌یه‌ی كه‌ باسكراوه‌، كه‌ گوایه‌ نزیكه‌ی 100 هه‌زار ئێزدیی ده‌كات له‌ باكوور هه‌ستده‌كه‌م ئه‌و ژماره‌یه‌ ده‌قیق نییه‌، ته‌نانه‌ت ئه‌وه‌ی رۆژئاوا. تااه‌نانه‌ت ئه‌كه‌ر له‌سه‌ر ئاستی روسیاشه‌وه‌ بیگریت تا ده‌گاته‌ ئه‌وروپاو ئه‌مریكا كه‌ ئێزدییه‌كانی به‌سه‌ردا دابه‌ش بوون وه‌ك جۆرجیا، ئه‌رمینیا، ئه‌وا من ژماره‌ی وردم له‌لایه‌ كه‌ ئێستا نامه‌ێت كاتی پێ بكوژم، دواتر سه‌رچاوه‌ت ده‌ده‌مێ، چونكه‌ دڵنیام تۆش له‌ سه‌رچاوه‌یه‌كه‌وه‌ وه‌رت گرتووه‌، به‌ڵام من له‌ چه‌ند سه‌رچاوه‌یه‌كم لایه‌ كه‌ واده‌كات  ئه‌و ژمارانه‌ كه‌مێك دیققه‌تی زیاتریان ده‌وێت.
تێبینی سێیه‌م: بۆنموونه‌ له‌ لاپه‌ڕه‌ 151 باسی ستۆریی یه‌كیك له‌و ژن و كچانه‌ ده‌كه‌یت كه‌ مه‌ینه‌تییه‌كانی خۆیان و ئه‌وه‌ ده‌گێڕنه‌وه‌ كه‌ له‌ژێر ده‌ستی داعشدا به‌سه‌ریان هاتووه‌، له‌وێدا باس له‌ ژنێك ده‌كه‌یت كه‌ مانداڵه‌كانیان بردووه‌و ده‌ڵێیت كاتێك بۆ سبه‌ینێ هه‌ڵده‌ستێت ده‌بینێت هه‌رسێ منداڵه‌كه‌ی مردووه‌...، ئه‌م رووداوه‌ بۆ زانیاریت وانییه‌، من له‌ كتێبی «جینۆسایدی ئێزدییه‌كان نموونه‌ی گوندی كۆچو» ناوی ئافره‌ته‌كه‌ به‌ پیت هاتووه‌ له‌به‌ر ئه‌وه‌ی ئێستاشی له‌گه‌ڵدا بێت ئافره‌ته‌كه‌ ناتوانێت ناوی خۆی به‌ راشكاوان بڵێت. ئه‌و كه‌سه‌ش كه‌ تاوانه‌كه‌ی كردووه‌ «ئه‌بو وه‌لید»ه‌، بێگومان ئه‌م چیرۆكه‌ زۆر پڕ ئازاره‌، چیرۆكه‌كه‌ به‌م جۆره‌یه‌: «ئه‌م ژنه‌ پێنج منداڵی ده‌بێت، پێش ئه‌وه‌ی ببرێن بۆ ره‌ققه‌، كجه‌ گه‌وره‌كه‌ی كه‌ ته‌مه‌نی ١٣ ساڵه‌ هه‌ر لێی ده‌به‌ن و ده‌ڕوات، ده‌مێنێته‌وه‌ چوار منداڵی، چۆنیش ده‌بێته‌ چوار منداڵ، له‌یه‌كێك له‌ زیندانه‌كانی داعشدا منداڵی پێنجه‌می ده‌بێت، كه‌ ته‌مه‌نی ٣٦ رۆژ ده‌بێت، منداڵه‌ ٣٦ رۆژه‌كه‌ی له‌گه‌ڵ سێ منداڵه‌كه‌ی تری ئه‌سیرو مه‌نارو ئه‌وه‌ی تریان، لای ئه‌و ئه‌بو وه‌لیده‌ی كه‌ كڕیوێتی و كه‌كای ئه‌و ده‌ژین، منداڵه‌كان ده‌بات بۆ بازاڕ، به‌و منداڵه‌ ٣٦ رۆژه‌شه‌وه‌، پاش كه‌متر له‌ سه‌عاتێك كه‌ دێنه‌وه‌ هه‌ست ده‌كات سیماو روخساری منداڵه‌كان تادێت ده‌گۆڕێن، ده‌ستبه‌جێ ده‌یانبات بۆ نه‌خۆشخانه‌، له‌وێ منداڵی یه‌كه‌می ده‌مرێت، پێی ده‌ڵێن منداڵه‌كانت ده‌رمانخوارد كراون، ناگاته‌ نیو سه‌عات، منداڵی دووه‌می ده‌مرێت، ناگاته‌ سه‌عاتێك ئه‌وه‌ی سێیه‌میشی ده‌مریت. ئینجا پێی ده‌ڵێت: ئه‌م منداڵانه‌ تاوانیان چی بوو كه‌ تۆ به‌م ده‌رده‌ت بردن؟ ئه‌م ئێواره‌ی رۆژی نه‌ورۆزه‌، ئه‌ویش له‌وه‌ڵامدا ده‌ڵێت ئه‌مه‌ په‌یامی ئێمه‌یه‌ بۆ كورده‌كان كه‌ ئاگری نه‌ورۆز ده‌كه‌نه‌وه‌، له‌به‌رئه‌وه‌ی ئاگری نه‌ورۆز حه‌رامه‌ له‌ ئایینی ئیسلامدا، بۆ ئه‌وه‌ی ئه‌مه‌ ببێته‌ په‌ند بۆیان»  دواتر وێنه‌ی منداڵه‌كان له‌ ئینته‌رنێت-یش بڵاو ده‌كه‌نه‌وه‌، بۆیه‌ من نازانم ئه‌مه‌ی تۆ چیرۆكه‌كه‌ت له‌ كێ وه‌رگرتووه‌؟ چونكه‌ دڵنیام ئه‌وه‌ی تۆ نه‌قڵه‌ له‌ گێڕانه‌وه‌ی خه‌ڵكه‌وه‌، به‌ڵام من ده‌قی چاوپێكه‌وتنه‌كه‌م له‌ كتێبی «جینۆسایدی ئێزدییه‌كان و نموونه‌ی گوندی كۆچۆ»دا هه‌یه‌و حه‌زده‌كه‌م پێیدا بچیته‌وه‌. 
تێبینیی چواره‌مم باسی نادیه‌-ت كردووه‌، باسی ئه‌وانی تر ناكه‌م، به‌ڵام هه‌ندێك ئافره‌ت له‌وانه‌ی كه‌ ده‌ربازیان بووه‌، ده‌ڵێیت: «ئافره‌تێك وای وت»م ئه‌م ئافره‌ته‌ گومناوه‌، ناوی نییه‌ نه‌ به‌ پیت نه‌ به‌ ناوی ئاشكرا، نه‌ ته‌مه‌ن. بۆ نموونه‌ من ستۆریی (٥٠ -٦٠) ئافره‌تی ئێزدیم لایه‌، ئه‌گه‌ر ناوه‌كه‌شیمان نه‌وتبێت له‌به‌ر حاڵه‌تی ئه‌منی، به‌ڵام ده‌ڵێین (ا،ب) یان یه‌كه‌م پیتی ناوه‌كه‌یمان نووسیووه‌. بۆ نموونه‌ نادیه‌ پێش ئه‌وه‌ی ئاشكرا ببێت و ببێته‌ ئه‌و كه‌سایه‌تییه‌ نێوده‌وڵه‌تییه‌، ئێمه‌ دیداریمان له‌لایه‌ به‌ پیت ناوی هێنراوه‌، بۆ نموونه‌ «ن. م»و ته‌مه‌نه‌كه‌شیمان دیاریكردووه‌، له‌به‌رئه‌وه‌ ئه‌وه‌ی كه‌ ده‌ڵێت ئافره‌تێك وای وت، ئه‌گه‌ر ناوه‌كه‌ی ئاساییه‌ بووترێت، با بووترێت، ئه‌گه‌رنا با به‌ پیت ئاماژه‌ی پێ بكرێت، یان ته‌مه‌نی چه‌نده‌؟ بۆ ئه‌وه‌ی كه‌ خوێنه‌ر ئازاری ئافره‌تێك ده‌خوێنێته‌وه‌ بزانێت بۆ نموونه‌ ئه‌وه‌ 14 ساڵ بووه‌ یان 20 ساڵ بووه‌ یان 30ساڵ كه‌ ده‌ستدرێژیی كراوه‌ته‌ سه‌ر.
بۆ نموونه‌ من چیرۆكێكم لایه‌، ئافره‌تێك ده‌ڵێت: نۆ جار فرۆشراوم و سه‌ری نۆیه‌مین جار به‌ 2500 دۆلار ده‌یفرۆشنه‌وه‌ به‌ خێزانه‌كه‌ی خۆی.
قسه‌كه‌م له‌سه‌ر ئه‌وه‌یه‌ كه‌ ده‌كرێت ئه‌م تێبینییانه‌ له‌ چاپی دووه‌مدا ره‌چاو بكرێت.
دوا تێبینیشم ئه‌وه‌یه‌ زۆر به‌جوانی باسی ململانێی كورد- كورد، كورد- عه‌ره‌ب، شیعه‌- سوننه‌ت كردووه‌، به‌ڵام تێبینییه‌كه‌م ئه‌وه‌یه‌ كه‌ چه‌مكی جینۆسایدت له‌ناو ئه‌و ململانێیانه‌دا كوشتووه‌، واته‌ یه‌كێك ئه‌گه‌ر ئه‌م كتێبه‌ بخوێنێته‌وه‌، ئه‌وه‌نده‌ی ته‌ركیزی ده‌ڕوات بۆ سه‌ر ئه‌و ململانێیانه‌ی كه‌ له‌ناوچه‌كه‌دا هه‌یه‌، كه‌متر ته‌ركیزی له‌سه‌ر تاوانێكه‌ كه‌ پیی ده‌وترێت جینۆساید له‌سه‌ر ده‌ستی ررێكخراوێكی تیرۆریستی. دووباره‌ ده‌ستخۆش و سوپاس و ماڵئاوا.             
سه‌رتیپ جه‌وهه‌ر: 
بۆ وه‌ڵامی پرسیاره‌كان یه‌كه‌م: ده‌ستواژه‌ی كاره‌سات‌و مه‌رگه‌سات، فعله‌ن كاره‌سات به‌كارده‌هێنین له‌به‌ر ئه‌وه‌ی وشه‌یه‌كی مه‌جازییه‌ باشتره‌ بڵێین مه‌رگه‌سات له‌م قسه‌یه‌ زیاتر كاره‌ساتم به‌كارهێنا، له‌سه‌ر گیڕانه‌وه‌ی قسه‌ی ئه‌و ئێزیدیانه‌ی توشی ئه‌و كاره‌ساته‌ بوون من زۆربه‌یانم نه‌بینیووه‌ زۆر زه‌حمه‌ته‌ بینییان له‌ شوێنێكی زۆر تایبه‌تن ریعایه‌ت ده‌كرین، هه‌موو چیرۆكه‌كان مه‌یدانی وه‌رگیراوه‌ به‌ڵام رێكخراوه‌كه‌ ناتوانی ناوه‌كان ئاشكرا بكات، له‌ رووی یاساییه‌وه‌ ناتوانرێت ناوه‌كان بهێنرێت، ره‌نگه‌ ئه‌و چیرۆكه‌ی تۆ باسیده‌كه‌یت دانه‌یه‌كی تربێت ته‌دقیقم كردووه‌ له‌و كه‌سانه‌ی كه‌ نزیكن لێیانه‌وه‌ ئه‌و ژنه‌ی كه‌ منداڵه‌كه‌ی ده‌رخوارد ده‌ده‌ن من پێشتر بیستبووم به‌ نوسراو ئه‌و چیرۆكه‌م خوێنده‌وه‌ هه‌وڵمدا كه‌سێك ببینم ژنه‌كه‌ بناسێت توانیم هه‌ندێك زانیاریم ده‌ست بكه‌وێت پیشاندانی ئه‌و كچانانه‌ی كه‌ ئه‌و كاره‌ساتانه‌یان به‌سه‌ر هاتووه‌ به‌شێكی كه‌مه‌ له‌و كتێبه‌، به‌ڕاستی ئه‌وه‌نده‌ی سیاسیییه‌‌و ته‌ركیزم كردۆته‌ سه‌رسیاسه‌ت، فعله‌ن كه‌متر ته‌ركیز كراوه‌ته‌ سه‌ر جینۆساید ئه‌گه‌ر بته‌وێت باسی جینۆسایدی ئیزیدیه‌كان بكه‌یت ئه‌وه‌ قسه‌یه‌كی دیكه‌یه‌ كه‌سێكی تر بێت باس له‌وه‌ بكات ئه‌و مه‌رگه‌ساته‌ به‌جینۆساید بناسێنێت كاری تری له‌سه‌ر بكات، مه‌سه‌له‌ی ئامار ئێزیدیه‌كان گرفتێكی گه‌وره‌یان هه‌یه‌ هیچ ئامارێكیان له‌به‌ر ده‌ست نییه‌ هه‌م له‌ عیراق‌و ده‌ره‌وه‌ی عیراق، شتێكتان بۆ باس بكه‌م به‌لاتانه‌وه‌ ئاسایی بێت من چوم بۆ به‌غدا وتم یه‌ك ملیۆن كورد له‌ به‌غدا هه‌یه‌، ته‌ماشا ده‌كه‌یت 200 هه‌زار كورد له‌ به‌غدا هه‌یه‌ ئه‌و فه‌رقه‌ زۆر زۆره‌ بۆ خۆم ته‌سه‌ورم نه‌ده‌كرد بۆیه‌ ئێزیدكان له‌ رووی نه‌ته‌وه‌‌وئاینه‌وه‌ چه‌وسێنراونه‌ته‌وه‌ هه‌موو ئیزیه‌كانی موسڵ به‌عه‌ره‌ب دراون له‌ قه‌ڵه‌م ئێستا میر ته‌حسین له‌ ته‌سكه‌ره‌ عه‌ره‌به‌ بۆیه‌ هه‌مووی ته‌خمیناته‌ ره‌نگه‌ ئه‌و ته‌خمیناته‌ی من له‌گه‌ڵ تۆدا جیاوازبێت سه‌باره‌ت به‌  توركیا‌و ئیران‌و سوریا به‌هه‌مان شێوه‌ ئه‌و پارچانه‌ی كوردیان به‌ركه‌وتووه‌‌و له‌ناویشیاندا ئێزیدی هه‌یه‌ هه‌ر چی وتراوه‌ ته‌خمیناته‌ هیچ ژماره‌یه‌كی ده‌قیقمان نییه‌ سه‌باره‌ت به‌ ئیزیدیه‌كان.
كاروان ئه‌نوه‌ر:
پێشتر به‌دزییه‌وه‌ سه‌یرێكی ئه‌و كتێبه‌م كردووه‌‌و هه‌ندێك باسمان لیوه‌كردووه‌، به‌راستی ئه‌وه‌ی من له‌م كتێبه‌دا خوێنمه‌وه‌ به‌حسێك نییه‌ توێژینه‌وه‌یه‌ك نییه‌ گه‌شتێكی رۆژنامه‌وانییه‌ كاتێك رۆژنامه‌وان روو ده‌كاته‌ شوێنێك ئه‌وه‌ی كه‌پێیه‌تی كامێره‌یه‌كه‌ ریكۆرده‌رێكه‌ له‌گه‌ڵ زاكیره‌ی خۆی به‌ڵام باحیسێك بو نونمونه‌ باسی هه‌ر بابه‌تێك ده‌كات ده‌چێته‌ بنج‌و بناوانی ئه‌وه‌ی كه‌ سه‌رتیپ كردی موجازه‌فه‌یه‌كی به‌ ژیانی خۆی كردووه‌ جێگای ده‌ستخۆشییه‌ یه‌زیدیه‌كان هه‌تا ئێستا نه‌ك هه‌ر ژماره‌كه‌یان كاك ته‌ها دینه‌كه‌شیان لای ئێمه‌ ئاشكرا نییه‌ هه‌ندێكیان خۆیان به‌ عه‌ره‌ب ده‌زانن هه‌ندێكیان خۆیان به‌ كورد ده‌زانن خۆیان به‌ یه‌زیدی ده‌زانن ئه‌وه‌ ئیشی كه‌سێكی رۆژنامه‌نوس نه‌بووه‌ به‌ ته‌نها له‌ كۆجۆ‌و شه‌نگال به‌ دواوه‌ 73 جینۆساید كراون ئه‌وه‌ روون‌و ئاشكرایه‌ بۆ رۆژنامه‌نوسێك كه‌ ده‌ڕواته‌ شه‌نگال ناتوانی مێژووی 73 جار جینۆسایدی شه‌نگال تۆماربكات له‌ماوه‌ی 100 ساڵدا ته‌نها یه‌ك لایه‌ن وه‌رده‌گرێت تراژیدیایه‌كی 10 رۆژ ماوه‌ته‌وه‌ له‌و شاره‌ وێرانه‌یه‌دا زانیاریش كه‌ به‌ده‌ست خه‌ڵك ده‌گات هه‌ندێكی راسته‌‌و هه‌ندێكی هه‌ڵه‌یه‌ له‌به‌ر ئه‌وه‌ی ئه‌م نه‌یتوانییوه‌ له‌و ماوه‌یه‌دا بڕوا به‌حس‌و توێژینه‌وه‌یه‌ك بكات ئه‌وه‌ی كه‌ كردویه‌تی هه‌ندێك شتی یه‌كاڵا كردۆته‌وه‌ له‌سه‌ر سفره‌یه‌ك دایناوه‌ بۆ ئێوه‌‌و مانان كه‌ جینۆساید‌و مه‌وزوعتانه‌ ئه‌و نوسه‌رانه‌ی به‌داخه‌وه‌ كه‌م تا زۆر خۆیان له‌ جینۆساید ده‌دزنه‌وه‌ هه‌ندێكیان به‌سه‌ر پێوه‌ باسی ده‌كه‌ن هه‌ندێكیان ده‌چنه‌ بنجوبناوانی بابه‌ته‌كه‌وه‌ ئه‌مه‌ی به‌سه‌ر یه‌زیدیه‌كانه‌وه‌ هاتووه‌ له‌ مێژوودا شتی وا رووی نه‌داوه‌ كه‌س ناتوانی هه‌قی خۆی بداتی بابه‌ته‌كه‌ تێربكات ئیشی رۆژنامه‌وانیش هه‌ر ئه‌وه‌نده‌ی پێده‌كرێت وه‌ك رۆژنامه‌نوسێك ئه‌وه‌نده‌ی ژیانی خۆی له‌ خه‌ته‌را ده‌بێت ئه‌بێ زانیاری كۆبكاته‌وه‌ نان‌و ئاو په‌یدا بكات ده‌بێت بزانی چیده‌كات‌و چیناكات دوایش به‌م شێوه‌یه‌ ده‌رده‌چێت بێ خه‌ل‌و خه‌ش نیه‌ یه‌عنی له‌ سه‌دا سه‌د زانیارییه‌كان ته‌واو نیه‌ راسته‌ ئه‌م وه‌ك لێكۆڵه‌رێك كاری نه‌كردووه‌ وه‌ك رۆژنامه‌نوسێك هه‌موو شتێكی باسكردووه‌ ته‌نانه‌ت ئه‌وه‌ی كه‌ ده‌مێنێتـه‌وه‌ ئێمه‌ كۆمه‌ڵێك گه‌شتی رۆژنامه‌نوسی كۆمه‌ڵێك رۆژنامه‌نوس سه‌ردانی هه‌ورامان كردووه‌ ته‌نها ئه‌وه‌یان باسكردووه‌ كه‌ خه‌ڵكی چۆن ده‌ژیت دوای لێكۆڵه‌ر هاتووه‌ خاڵ به‌خاڵ باسیكردووه‌ گه‌شته‌كانی شاكر فه‌تاح هه‌مومان له‌ بیرمانه‌ كه‌ سه‌تحین به‌ڵام بۆ ئێستا هه‌ر ئه‌وه‌ندویه‌ كه‌ ئه‌و پیاوه‌ له‌ خه‌یاڵیدا بووه‌ ئه‌وه‌ی سه‌رتیپ كارێكی زۆر باشه‌ ده‌ستخۆشی لێده‌كه‌م هیوادارم هه‌ر رۆژنامه‌نوسێك ئه‌وه‌نده‌ جه‌رائه‌ت بكات بڕوات ده‌رگا له‌سه‌ر بابه‌تێك بكاته‌وه‌ ئه‌وه‌ی تری جێبهێڵێت بۆ لێكۆڵه‌ره‌كان ئێمه‌ تا ئێستا مێژووی خۆشمان له‌سه‌ر هه‌ڵه‌بجه‌ نه‌نوسراوه‌ له‌سه‌ر ئه‌نفال نه‌نوسراوه‌ ئینجا ئێستا شه‌نگال به‌ سه‌دان كیلۆمه‌تر له‌ ئێمه‌وه‌ دووره‌ به‌داخه‌وه‌ ده‌ڵێم نه‌ توێژه‌ری تیرو ته‌واو جینۆسایدمان هه‌یه‌ ئه‌توانم بڵێم موئه‌ساتی خۆمان به‌ ده‌ره‌وه‌ بگه‌ێنین ئێمه‌ ته‌نها بۆ خۆمانی باس ده‌كه‌ین زۆر به‌داخه‌وه‌ ئه‌و ته‌جروبه‌ی تۆ‌و ئه‌وه‌ی كریستینا نه‌بێت به‌زمانی ئینگلیزی له‌سه‌ر جینۆساید كراوه‌ باوه‌ڕناكه‌م كه‌سێك هه‌بێـت به‌ دێڕێك ئه‌وه‌ی له‌سه‌ر ئێمه‌ هاتووه‌ بیگه‌ێنی به‌ده‌ره‌وه‌ی خۆی كه‌واته‌ ئێمه‌ له‌ بازنه‌یه‌كی داخراودا ده‌هۆڵی خۆمان ده‌كوتین جینۆساید كراوین جارێك دووجار ده‌جار تا باسی خۆشت بكه‌یت كه‌سی باوه‌ڕت پێناكات به‌ڵام ئه‌گه‌ر به‌حسێكت هه‌بێت له‌سه‌نته‌رێكی ده‌ولیدا باسی جینۆسایدی شه‌نگال بكات ئه‌وه‌ راستیه‌كه‌یه‌تی ئێمه‌ له‌رێگه‌ی ئه‌نفال‌و هه‌ڵه‌بجه‌‌و شه‌نگاله‌وه‌ ده‌توانین جینۆسایدی خۆمان به‌ دونیا بناسێنیین تۆ 100 ساڵ باسی مێژووی كورد بكه‌یت كه‌س به‌لایه‌وه‌ گرنگ نییه‌ من جارێكی تر ده‌ستخۆشی له‌ ساڵۆنی كوردستانی نوێ ده‌كه‌م.     
هۆزان عه‌فرینی: 
سه‌ره‌تا سوپاس‌و بۆ نوسه‌ری خۆمان، به‌راستی كارێكی جوانی كردووه‌، ده‌رباره‌ی ئه‌و كاره‌ساته‌ی كه‌ به‌سه‌ر شه‌نگالدا هات، كوردی ئێزیدی هه‌ر له‌ دێرزه‌مانه‌وه‌ بونه‌ته‌ ئامانجی دوژمنانی گه‌لی كورد، ئێزیدی كوردی ره‌سه‌نن‌و له‌سه‌ر ئاین‌و دینی خۆیانن، بۆیه‌ هه‌میشه‌ بونه‌ته‌ ئامانج، كوردانی ئێزیدی به‌هۆی نه‌ته‌وه‌ییه‌وه‌، هێرشیان كراوه‌ته‌ سه‌ر، هه‌روه‌ها له‌ رووی ئاینییشه‌وه‌ ده‌چه‌وسێنرێنه‌وه‌و هێرشیان كراوه‌ته‌سه‌ر، ئه‌وان دووجار چه‌وسێنراونه‌ته‌وه‌، واته‌ نه‌ته‌وه‌یی و دینی، به‌ڵام ئه‌وه‌ی‌ ده‌بینرێ خه‌مساردییه‌كی زۆر له‌ لایه‌ن رۆشنبیران‌و نوسه‌رانی ئێمه‌وه‌ هه‌یه‌ به‌رامبه‌ر به‌ شنگال. كاره‌ساتی شنگال زۆر گه‌وره‌یه‌‌و له‌ قه‌تڵ‌و عامه‌كه‌ی ئه‌رمه‌ن گه‌وره‌تره‌،  ئه‌و تاوانه‌ی‌ ئێزیدییه‌كان وڵاتانی دونیا گرنگیان پێنه‌دا، له‌به‌ر ئه‌وه‌ی كه‌ كوردن‌و عه‌ره‌ب‌و ئیسلامی بایه‌خیان نه‌دا به‌و تاوانه‌، له‌به‌رامبه‌ردا كورده‌یش بێده‌نگ‌و خه‌مساردبووه‌، ئه‌وه‌ی به‌رامبه‌ر ئه‌وان كراوه‌ شتی زۆر گه‌وره‌ بووه‌ من له‌ رۆژئاوای كوردستان بووم، له‌ مونبج بووم، كه‌ پایته‌ختی داعش بوو، خه‌ڵكی خۆیان ئه‌و راستییه‌یان ئاشكراكرد، له‌ عه‌ره‌ب‌و توركمان‌و كورده‌كان، ده‌یانوت هه‌ر ماڵێكی میری داعش زیاتر له‌ 5 كچی جوانی شنگالی لێبو، ئه‌مانه‌ هه‌م بۆ كاری ماڵ‌و هه‌م بۆ كاری دیكه‌ به‌كارده‌هێنران، به‌ڕاستی كاتی ئه‌وانه‌ ده‌بینیت نه‌فره‌ت ده‌كه‌یت ده‌ڵێیت ئه‌گه‌ر ئێمه‌ كوردین چۆن شنگالمان نه‌پاراست، به‌ڕاستی پێشنیارێك ده‌كه‌م بۆ نوسه‌ران، هه‌ر كه‌سێك ده‌یه‌وێـت كتێبێك بنوسێت با بچێت بۆ رۆژئاوای كوردستان، به‌تایبه‌ت مونبج، ره‌قق، ته‌ل حه‌میس، ته‌ل به‌ڕاك. له‌و ناوچانه‌دا داعش كچی ئێمه‌ی فرۆشتووه‌، ئه‌و كاته‌ كتێبه‌كه‌یان ده‌وڵه‌مه‌ندتر ده‌بێت، بۆیه‌ من ده‌ستخۆشی له‌ كاك (سه‌رتیپ جه‌وهه‌ر) ده‌كه‌م كه‌ هه‌وڵی داوه‌ یان  كاك زمناكۆ به‌ وێنه‌كانی دونیای تێگه‌یاند، دووباره‌ ده‌ستخۆشی له‌ ساڵۆنی كوردستانی نوێ ده‌كه‌م.
زمناكۆ جه‌لال:  
زۆر سوپاس، به‌ڕاستی من ده‌ستخۆشیتان لێده‌كه‌م هه‌موو كارێكی مه‌یدانی قورسایی خۆی هه‌یه‌‌و منیش یه‌كێكم له‌و رۆژنامه‌نوسانه‌ی كه‌ به‌مه‌یدانی توانیومه‌ بچمه‌ ئه‌و جێگایانه‌‌و رۆژئاوای كوردستان‌و شه‌ڕه‌كانی دژی داعش، ئه‌وه‌ی به‌لای منه‌وه‌ گرنگه‌ ناساندنی كه‌یس شنگاله‌ به‌جینۆساید كه‌ به‌داخه‌وه‌ كه‌م ئیشی بۆ كراوه‌ ته‌نها یه‌ك جار نه‌بێـت په‌رله‌مانی كوردستان چونه‌ دادگای لاهای كه‌ منیش به‌ كۆمه‌ڵێك وێنه‌‌و ڤیدیۆ به‌شداریم تێاكرد، ئێستاش خه‌ریكی فیلمی دووه‌مم‌و سێ ساڵه‌ خه‌ریكی كاركردنم له‌سه‌ر كچانی ئێزیدی، كه‌ به‌هۆی بێپاره‌ییه‌وه‌ نه‌متوانیوه‌ كاره‌كان ته‌واو بكه‌م.
 بابه‌تی جینۆساید براده‌ران ئاماژه‌یان پێدا، به‌داخه‌وه‌ به‌هۆی ململانێوه‌ بووه‌ ژێره‌وه‌، چه‌ند ساڵێك پێش ئێستا كار له‌سه‌ر ئه‌وه‌كرا یه‌كێك له‌وانه‌ كاك سه‌عید كاكه‌یی كاری له‌سه‌ر كردووه‌، لایه‌نێك له‌ لایه‌نه‌كان بچنه‌ به‌رده‌م دادگا، دوولایه‌نی سه‌ره‌كی دیارنه‌بوون له‌ كاره‌ساتی شنگال، ئه‌ویش لایه‌نی یه‌كه‌م هێزه‌كه‌ی پارتی دیموكراتی كوردستان بوو، كه‌ شوێنه‌كانی خۆیان جێشتو رویانكرده‌ عه‌ین زاله‌‌و بیره‌نه‌وتیه‌كانیان داگیركرد، لایه‌نی دووه‌میش هێزی سوپای عیراقییه‌ كه‌ به‌ فه‌رمانی نوری مالكی‌و پارێزگاری ئه‌وسای موسڵ بوو كه‌ نه‌یانتوانی موسڵ بپارێزن‌و به‌داخیشه‌وه‌ په‌رله‌مانتاران نه‌یانتوانی شكاتیان لیبكه‌ن، ئه‌وه‌ی كه‌ گرنگه‌ ره‌نگه‌ به‌ كاری كاك سه‌فین‌و من‌و كاك ته‌ها نه‌توانین خزمه‌تیان بكه‌ین بۆیه‌ داوا له‌ سه‌نته‌ره‌كانی لێكۆڵینه‌وه‌ ده‌كه‌م كه‌ هه‌وڵبده‌ن كاره‌ساتی شه‌نگال به‌ دونیا بناسێنن، خاڵێكی تر له‌ نزیك عه‌فرین شارۆچكه‌یه‌ك هه‌یه‌ پێی ده‌ڵێن شنگال، كاتێك چومه‌ نزیك رۆژئاوا ناوچه‌ی تربه‌سپی كه‌مترین ئێزیدی لێماوه‌، له‌نزیك عه‌فرینیش یه‌ك په‌رستگا ماوه‌ بۆ ئه‌وه‌ی بتوانیین جێ پێیی ئێه‌زیدیه‌كان هه‌ڵبگرین، بۆیه‌ ده‌بێت زیاتر هه‌وڵ بده‌ین چونكه‌ كه‌مترین بابه‌تمان كراوه‌ به‌ زمانه‌كانی دونیا‌و سوپاس بۆ كوردستانی نوێ.
سه‌رتیپ جه‌وهه‌ر: 
ئێمه‌ گرفتمان هه‌یه‌ ئه‌ویش سیاسییه‌ ره‌نگه‌ لایه‌نێك نه‌یه‌وێـت ته‌واوی تاوانی راستی رووداوه‌كانی ئه‌و ناوچه‌یه‌ ده‌ربكه‌وێـت، واته‌ حه‌زناكات، لایه‌نه‌كه‌ی‌ دیكه‌ش، مه‌به‌ستم زۆنی سه‌وزه‌، كه‌ ناوچه‌ی سلێمانییه‌ له‌ گرنگی ئه‌و ناوچه‌یه‌ یان تێنه‌گه‌یشتون‌و یان نه‌یانتوانییوه‌ هاوكاری پێویستی بكه‌ن، له‌ناو حكومه‌تیش به‌هۆی ئه‌و ململانییه‌ سیاسییه‌وه‌ نه‌یاتوانیوه‌ خزمه‌تی ئه‌و ناوچه‌یه‌ بكه‌ن. له‌ماوه‌ی رابردودا وه‌زاره‌تی شه‌هیدان‌و كاروباری كۆمه‌ڵایه‌تی فه‌رمانگه‌ی په‌یوه‌ندییه‌كانی ده‌ره‌وه‌، پێكه‌وه‌ كاریان ده‌كرد بۆ به‌جینۆساید ناساندنی تاوانه‌كانی داعش ده‌رهه‌ق به‌ئێزیدییه‌كان، راپۆرتێكیان ته‌واو كردبوو بیبه‌ن بۆ ئه‌وروپا، له‌ پڕ فه‌لاح مسته‌فاو كه‌سێكی دیكه‌ راپۆرتێكی تریان پێشكه‌شی دادگای‌ نێوده‌وڵه‌تی تاوانه‌كان كرد، به‌بێ‌ گه‌ڕانه‌وه‌ بۆ وه‌زاره‌تی شه‌هیدان، له‌لایه‌كی تریشه‌وه‌ چونكه‌ عیراق په‌یماننامه‌ی‌ یان رێككه‌وتنی دروستكردنی دادگای‌ تاوانه‌كانی (لاهای) ئیمزا نه‌كردووه‌و، ناتوانرێ هیچی له‌گه‌ڵ  بكرێت.
ئێزیدیه‌كان بۆ خۆشیان گرفتیان هه‌یه‌، له‌نێوخۆیاندا‌و له‌ت له‌تن، ئه‌و رێكخراوه‌ی كاری كردووه‌ به‌ناوی یه‌زدا له‌باتی ئه‌وه‌ی كاره‌كانیان بۆ پێشه‌وه‌ به‌رێت له‌هه‌ندێك جێگادا زه‌ره‌ری لێداون، ئه‌وان ده‌یانه‌وێت ئه‌وه‌نده‌ی بڵێن ئێزیدین نایانه‌وێـت بڵێن كوردین، ئه‌وه‌ یه‌كیكه‌ له‌ گرفته‌گه‌وره‌كان، له‌به‌ر ئه‌وه‌ی لایه‌نی دینیان زۆر زاڵتره‌، ئێمه‌ وه‌ك كورد‌و وه‌ك حوكمڕانانی كوردستان، ناتوانین پشتیوانی ئه‌و گروپه‌ بكه‌ین، ئه‌گه‌ر بڵێن ئێمه‌ كورد نین! 
ئه‌و رێكخراوه‌و ئه‌و گروپه‌ی‌ زیاتر باری‌ دینی به‌سه‌ریان زاڵه‌و له‌ئینتیمای‌ نه‌ته‌وه‌یی دوركه‌وتونه‌ته‌وه‌، له‌ ناو ئێزدیه‌كان، ئه‌و گروپه‌ پشتیوانییه‌كی زۆریان له‌عیراقه‌وه‌ هه‌یه‌، مالیكی زۆر پشگیریان ده‌كات، بۆ ئه‌وه‌ی نیو ماڵی كورد له‌و ناوچه‌یه‌ له‌ت له‌ت بكات، بۆ ئه‌وه‌ی كورد نه‌توانێ یه‌ك ده‌نگ بێت له‌سه‌ر جینۆساید ناساندن، یه‌ك له‌ ره‌گه‌زو بنه‌ما سه‌ره‌كیه‌كان به‌جینۆساید ناساندن ئه‌وه‌یه‌، گروپێكی دیاریكراو له‌ناو بچن، یه‌كێك له‌ گرفته‌كان ئه‌وه‌یه‌، نادیه‌ موراد له‌ هیچ لێدوانێكیدا ناڵێ من كوردم، له‌به‌ر ئه‌وه‌ پێیان وایه‌ ئه‌گه‌ر بڵێن كوردین له‌ قیمه‌تی بونی هۆكاری جینۆسایده‌كه‌ كه‌م ده‌بێته‌وه‌. بۆیه‌ ئه‌وه‌ یه‌كێكه‌ له‌ كێشه‌كان، ده‌بێت حكومه‌ت ئه‌و كاره‌ بكات خه‌ڵكی قانونی‌و پسپۆر به‌و كاره‌ هه‌ستن و به‌ڵگه‌نامه‌كانیان كۆبكردایه‌ته‌وه‌، هه‌روه‌ك دوتوانن راوێژكاری بیانی بێنن و سودیان لێببینین، راپۆرتێك ئاماده‌ بكه‌ن، لانیكه‌م له‌ هه‌ندێك په‌رله‌مانی دونیا وه‌ك جینۆساید بیناسێنن.
محه‌مه‌د ساڵح توفیق: 
ئه‌م لێكۆڵینه‌وه‌ی رۆژنامه‌وانییه‌ كاك (سه‌رتیپ جه‌وهه‌ر) نه‌یوتووه‌ له‌سه‌ر جینۆساید ده‌كۆڵمه‌وه‌، راستیه‌كه‌ی من ئه‌و نوسینه‌ی ئێزیدخان چه‌ند ئه‌ڵقه‌یه‌كم له‌ (كوردستانی نوێ) خوێندۆته‌وه‌ هه‌مویم نه‌خۆێندۆته‌وه‌، ده‌كرێـت من له‌ روانگه‌ی سه‌فه‌ره‌كه‌ی رۆژئاوای من ده‌سخۆشییه‌كی زۆری لێده‌كه‌م سه‌ركێشیه‌كی زۆری له‌و بوواره‌دا كردووه‌، ته‌نانه‌ت له‌ راپۆرته‌كه‌ی رۆژئاوادا، تیشك ده‌خاته‌ سه‌ر ئه‌و عاره‌بانه‌ی كاتی خۆی له‌ پرۆژه‌ی پشتێنی سه‌وزدا رژێمی سوریا نیشته‌جێی كردون.
 ئێستا له‌وی بزوتنه‌وه‌یه‌ك هه‌یه‌ كه‌ ناوی ناوچه‌كانی ناوه‌ فیدرالیه‌تی شیمالی سوریا، به‌ پێی ئه‌مری واقیع كاری له‌گه‌ڵ ده‌كات، تیژكردنه‌وه‌ی ئه‌و ململانێیه‌ ره‌نگه‌ به‌زه‌ره‌ری كورد بشكێته‌وه‌، ئه‌و باش تیشكی خستۆته‌ سه‌ر ئه‌و بواره‌، من نازانم ئه‌گه‌ر باسیكردبێت، هه‌ندێ زانیاریم هه‌یه‌ له‌ سه‌ر ئه‌و ناوچه‌یه‌ و خوێندومه‌ته‌وه‌،  حاكم قاسم، كه‌ هاوڕێمه‌ له‌م شاره‌یه‌ زانیارییم لێ‌ وه‌رگرتووه‌. 
ئه‌وه‌ی له‌شنگال كراوه‌ له‌ لایه‌ن دووخێڵی عه‌ره‌به‌وه‌ به‌تایبه‌تی متێوت و خاتونی زۆر به‌ سه‌ختی كاریان كردووه‌، ئه‌و ئازاره‌ ده‌رونییه‌ی لای ئێزیدییه‌كانه‌، زیاتر له‌داخی ئه‌و عه‌ره‌بانه‌یه‌ كه‌ دۆستبوون، ته‌نانه‌ت تێكه‌ڵێه‌كی زۆریان هه‌بووه‌، به‌ڵام كاك سه‌رتیپ، لێره‌دا دیسانه‌وه‌ ناكرێت هه‌مووان تاوانبار بكه‌ین و بیگشتێنین، له‌م مه‌جاله‌دا ناكرێت به‌هۆی متێوت و خاتونییه‌وه‌ بڵێین هه‌موو عه‌ره‌ب خراپن، گه‌لێك چیرۆك هه‌ن له‌ موسڵدا چ له‌ رووی ئاینی‌و ئینسانییه‌وه‌ بێت، خه‌ڵك هه‌بووه‌ رۆڵی زۆر مرڤدۆستانه‌یان بینییوه‌ له‌ رزگاركردنی خه‌ڵكدا، ئه‌م چیرۆكانه‌ دیسانه‌وه‌ له‌ ئه‌نفالدا هه‌بووه‌، بۆنمونه‌ ئه‌و ماڵه‌ی له‌ سه‌ماوه‌ ته‌یموریان رزگاركرد، ئه‌و كه‌ سانه‌ی له‌ شه‌رقات یونس‌و حسێن كه‌ فڕێندران‌و ویستیان بیكوژن‌و ئه‌مانه‌ چیرۆكی زیندووه‌ كه‌ هه‌موو عه‌ره‌ب دوژمنی ئێمه‌ نین، ئه‌وه‌ ئایدیایه‌كه‌ له‌ عه‌ره‌بدا هه‌یه‌، كه‌ وه‌كو ده‌ڵێن هه‌رده‌م چیرۆكه‌كان توند‌وتیژ ده‌كاته‌وه‌، من ده‌خوازم ئه‌و چیرۆكانه‌ هه‌ر براده‌رێكی وه‌ك كاك سه‌رتیپ جه‌وهه‌ر بكات و له‌و ته‌مومژ‌و دوكه‌ڵه‌دا كاری جوان‌و ئینسانی بكات، ئێمه‌ قازانجمانه‌ كه‌ ئیبرازی بكه‌ین، زۆرجار كه‌ باس له‌و ده‌كرێت ئێزیدیه‌كان ژن‌و كچه‌كانیان ئه‌تك كراون، ئه‌وه‌ راستییه‌‌و كه‌ كارێكی خراپیان له‌گه‌ڵكراوه‌، ئێمه‌ تاكه‌ نمونه‌ نیین ئێزیدی تاكه‌ نمونه‌ نییه‌، دیسانه‌وه‌ ده‌بێت ئه‌و زانیاریانه‌ باسبكه‌ین، بۆنمونه‌ ده‌بینین له‌ڕواندا له‌به‌ینی هۆتۆ‌و توتسیدا زۆر به‌ سامناكی كرا، ئه‌م مه‌سه‌له‌یه‌ له‌دارفورا كه‌ عه‌ره‌به‌كانی جه‌نجه‌وید  به‌ سواری حوشتر ده‌چون بۆ خێڵه‌كانی زغاوه‌‌و مه‌سالیت‌و فور، دنیایه‌ك ئه‌تكردنی ژن رویدا، كۆمه‌ڵێك منداڵ له‌و ژنه‌ ئه‌تكراوانه‌ كه‌وته‌وه‌ ناویان ناون منداڵانی جه‌نجه‌وید كه‌ ئێستا گه‌وره‌ بوون، چونكه‌ له‌ 2004 وه‌ بوو، تا ئێستا ئه‌وه‌ كیشه‌یه‌كه‌ هێشتا له‌دارفوره‌ ماوه‌، مه‌وزعی ئه‌تكردن نادیه‌ موراد ته‌عبیرێكی ته‌واوی هه‌زاران ژنه‌ ئێزیدی بوو كه‌ ویلێكراوه‌، جا له‌به‌ر ئه‌وه‌ ئێمه‌ی كوردیش له‌م مه‌سه‌له‌یه‌ نابێ‌ سڵ بكه‌ینه‌وه‌، له‌گه‌ڵ هه‌ر لێكۆڵینه‌وه‌یه‌كی رۆژنامه‌وانی پێویسته‌ هه‌نگاوێك بڕۆینه‌ دواوه‌، ئێمه‌ هه‌موو جارێك ده‌ڵێین 74 فه‌رمانی كوشتنی ئێزیدی، ئه‌سڵه‌ن میری ره‌واندوز له‌سه‌ر‌و وه‌ختێكدا له‌ عوسمانییه‌كان زۆر خراپتریشی كردووه‌، كار گه‌شتۆته‌ ئه‌تكردن‌و كوشنێكی زۆریش یه‌عنی به‌ده‌ره‌جه‌یه‌كی زۆر، با ئێمه‌ په‌ڕۆیه‌ك له‌ یه‌خه‌ی ئێزیدی خۆی دادڕین، ناهه‌قیان نییه‌ ئه‌م ئاینه‌ یان باتنیه‌ كه‌ له‌ ژێر هه‌زار‌و یه‌ك په‌رده‌ خۆی حه‌شارداوه‌، تۆ ئێستا بڕۆیته‌ لالش كێوی عه‌ره‌فه‌ی هه‌یه‌، نازانم چی هه‌یه‌، هه‌موشته‌كان ته‌عبیره‌ له‌ خۆشاردنه‌وه‌ی ئاینێك كه‌ نه‌یتوانییوه‌ به‌رگه‌ی‌ دینی زاڵ بگرێت، هه‌ندێك جار ئێزیدی ناهه‌قی نییه‌ هه‌ر، ئێزیدییه‌ك ده‌ربازی ده‌بێت ده‌گاته‌ ئه‌ڵمانیا ده‌ڵی من كوردنیم، چونكه‌ ئه‌وه‌نده‌ له‌سه‌ر مه‌سه‌له‌ی دین ده‌چه‌وسێنرێنه‌وه‌، له‌ بادینان له‌ چایخانه‌‌و ئوتێله‌كاندا كاریان ناده‌نی ده‌ڵێن خواردنی ده‌ستیان حه‌رامه‌.
 كۆنترین ئاینن ده‌بێ‌ رێزی لێبگرێت، هه‌ندێك جار ده‌سه‌ڵات هه‌یه‌ له‌په‌نای دینه‌وه‌ كار بۆ سڕینه‌وه‌ی‌ نه‌ته‌وه‌ی كورد ده‌كات، ده‌بینین له‌ ئه‌رمینیا ئه‌و ده‌سه‌ڵاته‌ی‌ دروستبووه‌، ده‌سه‌ڵاتێكه‌ زۆر پاڵپشتی ئه‌وه‌ ده‌كات ئێزیدی كوردنین، من چومه‌ته‌ رێیا تازه‌،  چومه‌ته‌ 11 دێی ئێزیدی، یه‌عنی هانی ئه‌وانه‌ ده‌ده‌ن بڵێن ئێزیدین نه‌ك كوردین، ئه‌گه‌ر بڵێن كوردین هاوكاریان ناكه‌ن، ئه‌و ئێزدیانه‌ی من له‌ ئه‌رمینیا بینیومن ئێستاش وه‌ك ره‌مزێك بۆ لالش له‌به‌ینی ئاڤه‌شین‌و سیپانا په‌یكه‌رێك بۆ لالش كراوه‌، پێی ده‌ڵێن ریوی رێگا ئه‌وه‌ نه‌زرێكه‌ كابرایه‌كی ئێزیدی ده‌وڵه‌مه‌ند كردویه‌تی، له‌به‌ر ئه‌وه‌ مه‌سه‌له‌كان ره‌هه‌ندی جیاوازو ره‌هه‌ندی مێژوویی و كه‌لتوری هه‌یه‌، من ده‌سخۆشیت لێده‌كه‌م من هه‌مان شێوه‌ نوسینت (كورد له‌ به‌غدا) ئێستا له‌ كوردستانی نوێ بڵاوده‌بێته‌وه‌ ده‌یخوێنمه‌وه‌، شێوه‌یه‌كه‌ پڕ له‌ زانیاریه‌و نه‌فه‌س درێژیی پێوه‌دیاره‌و زۆر ده‌ستخۆشیت لێده‌كه‌م.
ره‌وشه‌ن قاسم: 
من زۆر كارمكرد له‌سه‌ر مه‌سه‌له‌ی ئێزیدكان بۆ گۆڤاری له‌نده‌نی، ئه‌و كچانه‌ زۆر گرفتیان نه‌بوو له‌باسكردنی كێشه‌كانیان، ئه‌وان كێشه‌یان نه‌بوو پێناسه‌ بكرێـت به‌جینۆساید، من پێم باشه‌ پرسی ئێزیدی له‌ناو خۆماندا بناسێنیین‌و بیكه‌ینه‌ قه‌زێیه‌كی كوردی، با نه‌ڵێین ئه‌وه‌ی به‌سه‌ر ئێزیدییه‌كاندا هات ته‌نها شه‌ره‌فی ئێزیدییه‌، ئه‌وه‌ شه‌ره‌فی هه‌موو كورده‌، نابێ‌ بچینه‌ سه‌ر هه‌ندێ تێگه‌یشتنی كۆن كه‌ گوایه‌ له‌ئیسلامدا هه‌یه‌، له‌وێ‌ كورد كو به‌ نه‌وه‌ی‌ جن ناسراوه‌، یه‌عنی موشكله‌یه‌كی زۆر كۆنمان هه‌یه‌ پێویسته‌ باس بكرێت، پێویسته‌ رۆشنبیران و نوسه‌ران باسی بكه‌ن، ئه‌ركێكی نه‌ته‌وه‌ییه‌ له‌سه‌ر ئه‌و بابه‌ته‌ بنوسرێت، له‌ناو عه‌ره‌بدا كه‌س ناتوانێت بڵێن داعش تیرۆرسته‌، من پێموایه‌ هه‌ر سه‌له‌فییه‌ك داعشێكه‌، ئه‌وه‌ بۆچونی شه‌خسی خۆمه‌، چونكه‌ به‌حه‌دیس‌و ئایه‌ت قسه‌ت بۆ ده‌كه‌ن، پێویسته‌ كتێبی ئێزیدی له‌ هه‌موو ماڵێكدا هه‌بێت، كورد هه‌بووه‌ كوڕی چووه‌ بووه‌ به‌ داعش و كوژراوه‌ ده‌ڵی شه‌هیده‌، ئێمه‌ موشكیله‌ی قه‌ومیمان هه‌یه‌، لۆبیه‌كی ئێزیدی هه‌یه‌ كار له‌سه‌ر ئه‌وه‌ ده‌كات ئیزیدی له‌ كورد داببڕن، له‌ راگه‌یاندنه‌كانی خۆمان فكری عه‌ره‌بی وه‌رده‌گێڕین بۆ زمانی كوردی.. زۆر سوپاس.
سه‌رتیپ جه‌وهه‌ر: 
ده‌مه‌وێ‌ پێتان بڵێم  به‌جلیسه‌ربازیی چوومه‌ ناوچه‌كه‌،  له‌به‌رئه‌وه‌ی‌ ناوچه‌كه‌ كه‌سی لێنه‌بوو، كه‌ چومه‌ ناو شاری شنگال به‌جلی ئاسایی چوم، چونكه‌ هێزی په‌ككه‌‌و یه‌كه‌ی حه‌فتای یه‌كێتی،  لێبوو ئارام تر بوو، به‌ڵام ناوچه‌كانی تر ده‌بوایه‌ به‌ جلی سه‌ربازیووه‌ بچومایه‌، چونكه‌ هه‌ر كه‌سێك تۆی ببینیایه‌ جێی‌ پرسیار بوو، ئه‌وناوچانه‌ جگه‌ له‌ خه‌ڵكی سه‌ربازی، خه‌ڵكی دیكه‌ی‌ مه‌ده‌نی لێنه‌بوو، ناوچه‌یه‌كی زۆر وشك‌و بێ ئاو داربوو نازانم چۆن ژیان له‌وی گوزه‌ره‌راوه‌.
به‌ڕاستی خاڵێكی گرنگ هه‌یه‌ ده‌مه‌وێ‌ باسی بكه‌م، ئه‌ویش راگه‌یاندنی یه‌كێتیی گرنگی به‌و ناوچانه‌ نه‌داوه‌، راگه‌یاندنی پارتیش ئه‌نقه‌ست گرنگی پێنادات، هاتن و چونی ناوچه‌كه‌ زۆر زه‌حمه‌ت بوو ئه‌وكاته‌، ئه‌گه‌ر رووداو كه‌ی بیست‌و چوار بشچێت ده‌بێت به‌ نوسراوی ره‌سمیی بچنه‌ ناوچه‌كه‌، باوه‌ڕتان بێت قاسم شه‌شۆ كه‌ فه‌رمانده‌ی‌ فه‌رمانده‌یی شنگاله‌و شه‌ش هه‌زار پێشمه‌رگه‌ی‌ له‌ژێر ده‌سته‌، چه‌ندین سه‌یاره‌كه‌ی پشكێنراوه‌، ئێستا ده‌ڵێن تۆزێك باشتر بووه‌.
سه‌یاره‌ به‌ بلۆكه‌وه‌ هاتووه‌ پییان هه‌لڕشتووه‌! ئه‌گه‌ر هاوڵاتیه‌ك ئاژه‌ڵێكی پێبووایه‌ بیبردایه‌ بۆ دهۆك ده‌بوایه‌ سه‌ری ببڕایه‌! بارێكی ناخۆش هه‌بووه‌ له‌و ناوچانه‌ ده‌بوایه‌ راگه‌یاندن ده‌نگی ئێزیدییه‌كانی وه‌ك خۆی بگه‌یاندایه‌، به‌ڵام مخابن رێگه‌ ناده‌ن، ئێستا له‌ كه‌مپه‌كان خه‌ڵكی به‌ كۆمه‌ڵ ده‌گه‌ڕێته‌وه‌ یه‌كێك له‌ هۆكاره‌كان ئه‌وه‌یه‌ ده‌ترسن نه‌گه‌ڕێنه‌وه‌و دواتر رێیان پێنه‌درێت، له‌وێ وشه‌ی باشوری كوردستانیان به‌كارده‌هێنا، نه‌یانده‌وت سلێمانی‌و دهۆك، دیاره‌ ئه‌وه‌ مانای هه‌یه‌. 
كۆراڵ نوری: 
ده‌ستخۆشی بۆ كاك (سه‌رتیپ جه‌وهه‌ر) بۆ ئه‌و كتێبه‌. هه‌رچه‌ند قسه‌ له‌سه‌ر له‌وه‌ ده‌كرێـت  ئه‌وه‌ لێكۆڵینه‌وه‌یكی رۆژنامه‌وانییه‌، به‌ڵام گرنگیه‌كه‌ی له‌وه‌دایه‌ دۆكیومێنتی ئه‌و قه‌زیه‌و كه‌یسانه‌ ده‌كه‌ین، گرنگی خۆی هه‌یه‌، من ده‌مه‌وێـت شتێك بڵێم كاتێك ئه‌و كاره‌ساته‌ روویدا، هه‌ندێك له‌ كچه‌كان گه‌ڕانه‌وه‌ زۆر باش كاریان له‌سه‌ر نه‌كرد، میدیای‌ كوردی ئه‌وه‌نده‌ی گرنگیان به‌لایه‌نی سێكسی ئه‌دا بۆ ئه‌وه‌ی خوێنه‌ریان زۆر بێت گرنگیان به‌ كاره‌ساته‌كه‌ نه‌دا، خۆی كه‌یسه‌كه‌ زۆر گرنگ بوو راگه‌یاندنه‌كانی بیانی راپۆرتی زۆر جوانیان ده‌كرد، كه‌یسه‌كه‌ی ده‌هێنا خۆیان قسه‌یان ده‌كرد، راگه‌یاندنی ئێمه‌ زۆر به‌داخه‌وه‌ كاری باشیان له‌سه‌ر نه‌كرد‌و دووباره‌ ده‌ستت خۆشبێت كاك (سه‌رتیپ جه‌وهه‌ر).
مه‌ریوان مه‌سعود: 
كاتی خۆی ئه‌و جۆره‌ كتێبانه‌ كاك مه‌لا یاسین لێره‌یه‌ ئه‌و قسه‌یه‌ ده‌كه‌م كاتی خۆی هه‌م ره‌فعه‌ت سه‌عید هه‌م فه‌ره‌ج كتێبه‌كانیان وه‌رگێردرا بۆ ئینگلیزی‌و دواتر فه‌ره‌نسا خۆی كتێبه‌كانی كرد به‌ فه‌ڕه‌نسی وڵاتانی ئه‌مریقی‌و فه‌ڕه‌نسی سودی لێببینن من هیوادارم ئه‌و كتێبه‌ كاك سه‌رتیپ خۆشی لێره‌یm هه‌وڵ بده‌ین ئه‌گه‌ر نه‌كرێت به‌ ئینگلیزی بكرێت به‌ عه‌ره‌بی كاریگه‌ری زۆر زۆره‌ ئێستا ئه‌و به‌ڕێزه‌ وتی هه‌قه‌ له‌ هه‌موو ماڵیكدا هه‌بێت به‌ڵام من ده‌ڵێم هه‌قه‌ له‌هه‌موو كتێبخانه‌ عه‌ره‌بیه‌كاندا هه‌بێـت زۆر سوپاس.
زانا حه‌سه‌ن: 
سوپاستان ده‌كه‌م شت زۆره‌ له‌سه‌ر ئێزیدیه‌كان ده‌مه‌وێت قسه‌یه‌ك بكه‌م له‌سه‌ر راگه‌یاندن ئێمه‌ وه‌ك ده‌زگای میدیایی كوردسات له‌وی بووین به‌ڵام ئه‌گه‌ر داعش زوڵمێكی گه‌وره‌ی له‌ ئێزیه‌كان كردبێت ئه‌وا پارتی رۆژانه‌ زوڵم له‌ ئیزیدیه‌كان ده‌كات ئێمه‌ به‌ قوه‌تی سێ ئه‌ندامی سه‌ركردایه‌تی تا ده‌مانتوانی به‌سه‌حێلا بپه‌ڕینه‌وه‌ به‌رده‌وام چاودێریان ده‌ركردین ئه‌رقه‌له‌یان بۆ دروست ده‌كردین ئه‌گه‌ر قوه‌تی ئه‌و براده‌رانه‌ نه‌بوایه‌ نه‌مان ده‌توانی كامیره‌یه‌ك بپه‌ڕێنینه‌وه‌ من له‌ فه‌یس بووكه‌كه‌ی خۆمدا ره‌سمی په‌یمانێرێكی خۆمانم داناوه‌ له‌ سه‌حێلا چه‌كدارێك به‌سه‌ر سه‌ریانه‌وه‌ وه‌ستاوه‌ وه‌ك ئه‌وه‌ بڵێی كه‌ تاونێكی زۆر گه‌وره‌یان كردووه‌ وه‌ك كوردسات ئه‌خیر جار بۆمان نه‌بووه‌ به‌ نوسراوی ره‌سمی بچینه‌ كه‌مپه‌كانیشه‌وه‌ ئاخیر جار له‌ كه‌مپی شاریا 16 خێمه‌یان سوتاند بۆ ئه‌وه‌ی خه‌ڵككه‌ نه‌ێته‌ موقابه‌له‌وه‌ هه‌تا ئه‌م ده‌قه‌یه‌ په‌یوه‌نم له‌ گه‌ڵ  گه‌نجه‌كانیان هه‌یه‌ ئه‌وان ده‌ڕۆن له‌به‌ر ئه‌وه‌یه‌ كه‌سیان نییه‌ كه‌س نییه‌ ده‌رگایان بۆ بكاته‌وه‌ ئه‌وان رۆشتون‌و به‌ڵام وه‌زعیان باش نییه‌ كوردسات زمانحاڵ‌و لۆگۆی ئیزیدیكان بوو وه‌ك دوژمن سه‌یریان ده‌كرد براده‌ران ده‌یان زانی چۆن مامه‌ڵه‌یان له‌گه‌ڵ ده‌كرد ده‌یانوت ئێوه‌ ده‌چن هاواری ئیزدیه‌كان ده‌گه‌ێنن، چۆن وه‌ختی خۆی پارتی ویستویه‌تی به‌ مه‌به‌ست سودی له‌ده‌نگه‌كانیان بینیوه‌ وه‌ داوتریش چۆن فرۆشتونی‌و سودی لێبینی به‌داخه‌وه‌ ئه‌و حاڵه‌كه‌یه‌.
ستران عه‌بدوڵڵا:
 ئه‌وه‌ كاك مه‌لا یاسین نوێنه‌ری یه‌كێتیی له‌ قاهیره‌ وه‌كاك شوان فه‌وزی  نوێنه‌ری یه‌كێتیی له‌ به‌یروت هه‌ردوكیان لێره‌ن دڵنیام ئه‌و قسانه‌ له‌سه‌ر دیوه‌ ناساندنه‌كه‌ی گوێی لێده‌گرن‌و كاری له‌سه‌ر ده‌كه‌ن.
 سه‌رتیپ جه‌وهه‌ر: 
كاك مه‌ریوان تێبینیه‌كه‌ت زۆر راسته‌ هه‌وڵمدا په‌یوه‌ندیم به‌ هه‌ندێك براده‌ره‌وه‌ كرد له‌ ناوچه‌كه‌ بوون، به‌ڵام وه‌خته‌كه‌ زۆر نزیك بوو نه‌كرا. 


ناو:  
ئیمه‌یل:    
سه‌رنج:  

#7372
25/9/2017
ئه‌رشیف
وه‌رزش
‌ پاڵێوراوانی خه‌ڵاته‌كانی فیفا زه‌ بێسته‌كان به‌ بردنه‌وه‌ی جام و نازناو دیاریی ده‌كرێن یان ئاستی هونه‌ری؟ 25/9/2017
‌ بارسێلۆنا بۆندی چه‌ند یاریزانێكی نوێ ده‌كاته‌وه‌ 24/9/2017
زانست
‌ پاسێكی كارەبایی ژمارەی پێوانەیی جیهانی تێكشكاند ئایندە بۆ ئۆتۆمبیلی كارەباییە 25/9/2017
‌ وریای سوپەر مەلاریا بن 25/9/2017
‌ دیزاینەرە گەورەكەی ئەپڵ 25/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP