ی‌.ن.ك رێبه‌ری كۆڵنه‌ده‌ری كوردایه‌تی‌و شۆڕشه‌كه‌یه‌تی و تا سه‌ركه‌وتن یا مردن درێژه‌ به‌ خه‌بات ده‌دات
نەورۆزی بانگەوازی ئاشتبوونەوەی گشتی.. «حەفلەکەی سورداش» ی‌.ن.ك رێبه‌ری كۆڵنه‌ده‌ری كوردایه‌تی‌و شۆڕشه‌كه‌یه‌تی و تا سه‌ركه‌وتن یا مردن درێژه‌ به‌ خه‌بات ده‌دات ‌ 12/10/2017
ئەم وتارەی سەرۆکی نەمر مام جەلال سکرتێری گشتیی یەکێتیی نیشتمانیی کوردستان لە رۆژی 21/3/1984دا لەبەردەم سەدان هەزار هاووڵاتیدا پێشکەش کرا کە تێیدا هۆکارەکانی دەستپێکردنی مفاوەزەی لەگەڵ حکومەتی ئەوکاتی بەغدای روونکردەوەو هەر لەوێشەوە بانگەوازی ئاشتبوونەوەی گشتیی ئاراستەی سەرجەم لایەنە سیاسییەکانی کوردستان کرد، کە ئەو بانگەوازەش بووە ماکی پێکهاتنەوەو پێکهێنانی بەرەی کوردستانی.
خوشك‌و برایانی سه‌لار‌و ده‌لال
هه‌ڤاڵانی خه‌باتگێڕ‌و شۆڕشگێڕ
پێشمه‌رگه‌ قاره‌مانه‌كانی كوردستان
به‌ناوی (ی‌.ن.ك)ه‌وه‌، پیرۆزبایی جه‌ژنی نه‌ورۆزی ئه‌مساڵتان لێ ده‌كه‌م هیوادارم نه‌ورۆزی ئه‌مساڵمان نه‌ورۆزی ئاشتی‌و دیموكراسی‌و تۆتۆنۆمی راسته‌قینه‌ بێت بۆ هێنانه‌دی ئه‌م ئاواته‌ دێرین‌و پیرۆزه‌ی كۆمه‌ڵانی خه‌ڵكی كوردستانیش ده‌بێ نه‌ورۆزی ئه‌مساڵمان بكه‌ینه‌ نه‌ورۆزی ئاشت بوونه‌وه‌ی گشتی، واته‌ بیكه‌ینه‌ جه‌ژنی خه‌بات كردن له‌ پێناوی پێكهێنانه‌وه‌ی هه‌موو هێزه‌ سیاسی‌و چه‌كداره‌كانی كوردستان له‌سه‌ر بناغه‌ی پاراستنی ده‌سكه‌وته‌كانی خه‌ڵك‌و پارێزگاری كردنی كوردستان‌و عێراق له‌ داگیركه‌ره‌ په‌لامارده‌ره‌كانی بێگانه‌‌و په‌یڕه‌وی كردنی سه‌ره‌تای پیرۆزی سه‌ربه‌خۆیی‌و پشت به‌خۆبه‌ستن، تاكو بتوانین هه‌موو ریزه‌كانی كۆمه‌ڵانی خه‌ڵكی كوردستان یه‌كخه‌ین، سازیان بده‌ین‌و باشتریان بهێنینه‌ جۆش‌و خرۆش له‌پێناوی به‌دیهێنانی ئامانجه‌كانی گه‌له‌كه‌مان دا كه‌ ئیمڕۆ خۆیان له‌ ئاشتی‌و دیوكراسی‌و ئۆتۆنۆمی راسته‌قینه‌دا ده‌نوێنن، چونكه‌ هێزی زۆر‌و زه‌وه‌ندی كۆمه‌ڵانی خه‌ڵكی كوردستان گه‌ر بێت‌و باش رێكخرێت‌و چاك ساز درێت‌و ژیرانه‌ رێبه‌ری بكرێت، ئه‌وا ده‌توانێت به‌سه‌ر هه‌موو كۆسپ‌و گیروگرفتێكدا زاڵ بێت، ئه‌وا ده‌سته‌به‌ری به‌دیهێنانی هه‌موو ئامانجه‌كانی شۆڕشه‌كه‌مان‌و گه‌له‌كه‌مان ده‌بێت.
جا (ی‌.ن.ك) كه‌ هه‌ر له‌ سه‌ره‌تای دامه‌زراندنیه‌وه‌ باوه‌ڕی به‌و ڕاستییانه‌ هێنا‌و هه‌میشه‌ هه‌ر پشت ئه‌ستوور به‌ كۆمه‌ڵانی خه‌ڵك‌و هێزی له‌بن نه‌هاتووی جه‌ماوه‌ر درێژه‌ی به‌ خه‌باتی شۆڕشگێڕانه‌ی خۆی داوه‌. هه‌ر بۆیه‌ش زۆر زۆر په‌رۆشی یه‌كێتی ڕیزه‌كانی كۆمه‌ڵانی خه‌ڵكی كوردستانیه‌تی، هه‌ر بۆیه‌ش ئیمڕۆ دروشمی سه‌ره‌كی خۆی كردووه‌ به‌ ئاشت بوونه‌وه‌ی گشتی كه‌ ده‌بێته‌ هۆی به‌دیهێنانی یه‌كیه‌تیه‌كی ته‌واوی ڕیزه‌كانی كۆمه‌ڵانی خه‌ڵك.
پێم وایه‌ زۆربه‌ی زۆری جه‌ماوه‌ر‌و هه‌موو ژیر‌و هوشیارانی كوردستان ده‌زانن ی‌.ن.ك هه‌ر سه‌باره‌ت به‌ دڵسۆزی‌و دوربینانه‌ی بۆ ئامانجه‌كانی گه‌ل‌و نیشتمان هه‌ر سه‌باره‌ت به‌ په‌رۆشی زۆر‌و ژیرانه‌ی بۆ سه‌رخستنی خه‌باتی شۆڕشگێڕانه‌ی كۆمه‌ڵانی خه‌ڵك‌و به‌ فیڕۆنه‌دانی ڕه‌نجی ئه‌و خه‌باته‌یه‌ كه‌ به‌ گیانی له‌خۆبوردن‌و به‌وپه‌ڕی توانایه‌وه‌ بۆ ئه‌و دروشمه‌ی ئاشت بوونه‌وه‌ی گشتی هه‌وڵ‌و ته‌قه‌ڵا ده‌دات. به‌ ڕه‌چاوكردنی ئه‌م ڕاستیه‌ش كه‌ ئیمڕۆ جوڵانه‌وه‌ی رزگاری نیشتمانی‌و دیموكراتی خه‌ڵكی كوردستان كوردایه‌تی له‌ هه‌ڵچوون‌و گه‌شه‌كردنه‌وه‌ له‌ بۆ پێشه‌وه‌چووندا پێ ده‌نێته‌ قۆناغێكی تازه‌وه‌. كه‌ له‌مه‌شدا ده‌وری مێژوویینی ی‌.ن.ك بۆ هه‌موو كه‌س ده‌دره‌وشێته‌وه‌. هه‌ڵساندنه‌وه‌ی كوردایه‌تی، جۆشدانه‌وه‌ی خه‌باتی شۆڕشگێڕانه‌ی خه‌ڵكی كوردستان، هه‌ڵگیرساندنه‌وه‌ی شۆڕشی پاراستنی كورده‌واری‌و رزگاری‌و دیموكراسی بۆ خه‌ڵكی كوردستان، به‌ خه‌باتی ی‌.ن.ك‌و به‌ فیداكاری‌و خۆبه‌خت كردنی ده‌یان سه‌ركرده‌‌و فه‌رمانده‌ی ی‌.ن.ك‌و هـ.پ.ك ‌و سه‌دان كادریان‌و چه‌ند هه‌زار ئه‌ندامێكیان‌و به‌ هاوكاری‌و پشتیوانی كۆمه‌ڵانی خه‌ڵكی كوردستان بوو. هه‌موو خه‌ڵكی كوردستان كاره‌ساته‌ سامناكه‌كه‌ی ئاشتبه‌تاڵی له‌بیره‌، هه‌موو له‌بیریانه‌ كه‌ چۆن پاشان ناهومێدی باڵی ڕه‌شی به‌سه‌ر كوردستانی خۆشه‌ویستدا كێشا بوو، چۆن مانه‌وه‌‌و بوژاندنه‌وه‌ی كورد‌و كوردستان كه‌وتبووه‌ خه‌ته‌رێكی گه‌وره‌وه‌ به‌جۆرێك كه‌ دۆست‌و دوژمن پێیان وابوو، ئیتر كوردستانی عێراقیش به‌ ده‌ردی كوردستانی توركیا براوه‌، هه‌تا ده‌یان ساڵی تر هه‌ڵسانه‌وه‌ی بۆ نیه‌. له‌و رۆژه‌ ڕه‌شانه‌دا كه‌ گه‌وره‌ترین شۆڕش‌و فراوانترین ه.پ. ك له‌ خوتوخۆڕایی بگره‌ به‌ فیتی دوژمنانی بێگانه‌، بڵاوه‌ی پێكرابوو، ده‌نگی زوڵاڵی (ی‌.ن.ك) له‌ چیا‌و دۆڵ‌و شێوه‌كانی كوردستانی خوێناوی دا، ده‌نگی ده‌دایه‌وه‌‌و ڕای ده‌گه‌یاند كه‌: نه‌ته‌وه‌ی كورد له‌ كوردستانی خۆیدا رووداوێكی مێژووكردی بابه‌تی له‌ فه‌وتاندن نه‌هاتووه‌، جوڵانه‌وه‌ی رزگاری‌و دیموكراتی خه‌ڵكی كوردستان كوردایه‌تی،به‌ری پێویستیه‌كانی گه‌شه‌كردنی كۆمه‌ڵایه‌تی خه‌ڵكی كوردستان‌و نۆبه‌ره‌ی قانونی په‌یدابوون‌و بۆ پێشه‌وه‌چوونی نه‌ته‌وه‌ی كورده‌، بۆیه‌ تاكو به‌دیهێنانی ئامانجه‌ دیموكراتی‌و نه‌ته‌وایه‌تی یه‌كانی خۆی هه‌ر ده‌مێنێت‌و هه‌ر زیندوو ده‌بێت بێ ئه‌وه‌ی هیچ ده‌وڵه‌ت‌و هێز‌و توانایه‌ك بتوانێت له‌ناوی به‌رێ.
ئه‌مجاره‌یان مێژوو، شه‌ره‌فی هه‌ڵكردنه‌وەی‌ ئاڵای كوردایه‌تی‌و شۆڕشه‌كه‌ی دا به‌ ده‌ست ی‌.ن.ك ئه‌و شه‌ره‌فه‌ی به‌ ی‌.ن.ك ڕه‌وا بینی. كه‌ ئێسته‌ش وا به‌ سه‌ربه‌رزیه‌وه‌ له‌ناو كۆمه‌ڵانی خه‌ڵكی كوردستاندا ده‌وری رێبه‌ری جوڵانه‌وه‌ی رزگاری‌و دیموكراسیان ده‌بینێت‌و هه‌میشه‌ دڵسۆز‌و وه‌فادار بۆ خوێنی گه‌شی هه‌زاران شه‌هید‌و ره‌نجی ده‌یان هه‌زار خه‌باتگێڕی گه‌له‌كه‌مان دلێرانه‌ له‌ كۆڕی خه‌باتی شۆڕشگێڕانه‌ی پێشمه‌رگانه‌‌و سیاسی دا ده‌چه‌قێ بێ ئه‌وه‌ی هیچ سات‌و  كاتێك ئامانجه‌كانی خه‌ڵك‌و داخوازییه‌ نه‌ته‌وایه‌تی‌و دیموكراتی یه‌كانی خه‌ڵكی كوردستان فه‌رامۆش بكات، بێ ئه‌وه‌ی به‌قه‌ده‌ر بستێك له‌ خه‌باتی شۆڕشگێڕانه‌ی جه‌ماهیری پێشمه‌رگانه‌‌و سیاسی لابدات.
ی‌.ن.ك بێ لادان‌و كۆڵدان، بێ ووچان‌و وه‌ستان پتر له‌ حه‌وت ساڵ خه‌باتی شۆڕشگێڕانه‌ی پێشمه‌رگانه‌ی له‌ كوردستانی عێراقدا هه‌ڵگیرساند‌و په‌ره‌پێدا‌و به‌ڕێوه‌برد.توانیشی شۆڕش ببوژێنێته‌وه‌‌و په‌ره‌‌و گه‌شه‌شی پێ بدات‌و بیگه‌یه‌نێته‌ ئه‌م رۆژه‌ی كه‌ دۆست‌ودوژمن دانی پێدا ده‌نێن‌و رێزی لێ ده‌گرن. كه‌ به‌راستی ئه‌وه‌ كارێكی گه‌وره‌‌و گرنگه‌ له‌ مێژووی كورد‌و كوردستان دا. كه‌ ئه‌وه‌ش به‌ خوێنی گه‌شی ده‌یان سه‌ركرده‌ی ی‌.ن.ك ‌و هـ.پ.ك ‌و سه‌دان كادر‌و هه‌زار تێكۆشه‌ری نه‌مر له‌ مێژووی سه‌روه‌ری كوردایه‌تی دا تۆمار كراوه‌.
بێگومان مێژووی كورد‌و كوردستان لاپه‌ڕه‌ دره‌خشانه‌كانی سه‌روه‌ری خۆی به‌وه‌ ده‌ڕازێنێته‌وه‌: كه‌ هـ.پ.ك به‌ رێبه‌ری ی‌. ن.ك له‌ ده‌یان شۆڕشگێڕی بێ چه‌ك‌و به‌ چه‌كه‌وه‌، شۆڕشی بوژانده‌وه‌‌و هـ.پ.ك –ی گه‌یانده‌ هه‌زاران هه‌زار پێشمه‌رگه‌، كه‌ ده‌ستیان گرتووه‌ به‌سه‌ر به‌شێكی زۆری كوردستانه‌كه‌یاندا بێ ئه‌وه‌ی پشتیوانیه‌كی ئه‌وتۆیان له‌ ده‌ره‌وه‌ ڕا لێ كرابێت. به‌پێچه‌وانه‌ چه‌ندین جار هـ.پ.ك به‌ فریای برا شۆڕشگێڕه‌كانی كوردستانی ئێرانیان هاتوون‌و چه‌ندین شه‌هیدی قاره‌مانیان له‌ سه‌نگه‌ره‌كانی پاراستنی كوردستانی ئێران‌و شۆڕشی ره‌وای خه‌ڵكه‌ قاره‌مانه‌كه‌یدا پێشكه‌ش به‌ گه‌ل‌و نیشتمان كردووه‌. كه‌ ئه‌مه‌ش خۆی له‌ خۆیدا ده‌سكه‌وتێكی گه‌وره‌ی تره‌: كه‌ هێزه‌ سیاسی یه‌ شۆڕشگێڕه‌ ژیره‌كانی هه‌ردوو به‌شی كوردستان پێكه‌وه‌ هاوخه‌باتی بكه‌ن، له‌جیاتی ئه‌وه‌ی كه‌ جاران به‌گژ یه‌كدا ده‌كران. وه‌ پێكه‌وه‌ خوێن بڕێژن له‌جیاتی ئه‌وه‌ی لایه‌ك خوێنی لایه‌كی تر برێژێت به‌بیانووی پر‌وپووچ. ئه‌مه‌ نه‌ك هه‌ر  یه‌كێتی نه‌ته‌وه‌ی كورد ده‌سه‌لمێنێته‌وه‌، به‌ڵكو یه‌كێتی چاره‌نووسی هێزه‌ شۆڕشگێڕه‌كانی كوردستان‌و ئێران‌و عێراق‌و رۆژهه‌ڵاته‌كه‌شمان ده‌رده‌خات.
هه‌روه‌ك ئه‌و شایه‌دیه‌ش بۆ (ی‌.ن.ك) كه‌ به‌ پێچه‌وانه‌ی سیاسه‌تی چه‌وت‌و كۆنه‌په‌رستانه‌ی ڕاوكردنی كوردپه‌روه‌ره‌ شۆڕشگێڕه‌كانی كوردستانی ئێران، سیاسه‌تی هاوخه‌باتی‌و پشتیوانی كردنیانی په‌یڕه‌و كردووه‌، كه‌ له‌ ئه‌نجامدا برا كورده‌ ئێرانیه‌كانمان ناوی پیرۆز‌و پڕ له‌ سه‌روه‌ری هێزی پشتیوانیان به‌سه‌ر (هـ.پ.ك) دا بڕیوه‌. هه‌ر بۆیه‌ش هـ.پ.ك هه‌م سه‌روه‌ری پاراستنی كوردستان-له‌ دوو به‌شی دا-بۆ خۆی تۆمار كردووه‌، وه‌ هه‌م شه‌ره‌فی نواندنی یه‌كێتی خه‌بات‌و چاره‌نووسی كوردایه‌تی له‌ به‌شه‌كانی كوردستاندا. هه‌ر بۆیه‌ش ه.پ. ك كه‌ ئه‌و هه‌موو خۆشه‌ویستی‌و سه‌ربه‌رزی‌و سه‌روه‌ری‌و رێز‌و ته‌قدیره‌ی بۆ خۆی په‌یدا كردووه‌. له‌ناو دڵ‌و ده‌روونی خه‌ڵكی كوردستاندا جا به‌ خۆڕاگرتن‌و فیداكاری، به‌ درێژه‌دان به‌ خه‌باتی پێشمه‌رگانه‌، به‌سه‌ر رێبازی سیاسی‌و پێشمه‌رگانه‌ی ڕاست‌و ڕه‌وادا، به‌خۆبه‌ستنه‌وه‌ به‌ خاكی كوردستان‌و ده‌ستكه‌وته‌كانی كۆمه‌ڵانی خه‌ڵكی كوردستانه‌وه‌، به‌ په‌یڕه‌وی كردنی سیاسه‌تێكی مه‌بده‌ئی شۆڕشگێڕانه‌ بوو كه‌ ی‌.ن.ك ‌و هـ.پ.ك كه‌ ئه‌وها په‌ره‌یان سه‌ند‌و توانیان به‌سه‌ر هه‌موو نه‌خشه‌‌و پلانه‌ جۆراوجۆرانه‌دا زاڵ بن كه‌ بۆ له‌ناوبردن‌و ده‌رپه‌ڕاندنیان داندرابوون تا وای لێ هات كه‌ (ی‌.ن.ك) نه‌ك هه‌ر بوو به‌ گه‌وره‌ترین هێزی سیاسی كوردستان به‌ڵكو (هـ.پ.ك) یش بوو به‌ گه‌وره‌ترین هێزی چه‌كداری شۆڕشگێڕی كوردستان كه‌ له‌ شكاندن نایه‌ت!
به‌ڵێ وا بۆ یه‌كه‌مین جاره‌ له‌ مێژووی كوردستانی عێراقدا هێزێكی سیاسی هه‌ڵقوڵاو له‌ جه‌رگه‌ی ره‌نجده‌ران‌و رۆڵگێراوان‌و خوێنمژراوانی كوردستانه‌وه‌، هێزێكی شۆڕشگێڕی سه‌ربه‌خۆ، پشت ئه‌ستوور به‌ كۆمه‌ڵانی خه‌ڵك‌و به‌ عه‌داله‌تی خه‌باته‌كه‌ی، له‌ دژوارترین هه‌لومه‌رجدا، له‌ ناله‌بارترین رۆژدا، له‌دوای گه‌وره‌ترین شكان‌و ئاشبه‌تاڵدا، كوردایه‌تی ببوژێنێته‌وه‌‌و شۆڕشی خه‌ڵكی كوردستان هه‌ڵگیرسێنێته‌وه‌‌و بیگه‌یه‌نێته‌وه‌ قۆناغێكی ئه‌وها كه‌ دۆست‌و دوژمن نه‌توانن ئینكاری بكه‌ن‌و رێزی لێ نه‌نێن.
ئه‌ی كۆمه‌ڵانی خه‌ڵكی كوردستان
ی‌.ن.ك له‌م كاته‌دا كه‌ به‌ سه‌ربه‌رزی یه‌وه‌ ده‌فته‌ری سه‌روه‌ری خه‌باته‌كه‌ی بۆ ئێوه‌ی خۆشه‌ویست‌و تێكۆشه‌ر ده‌رده‌هێنێت به‌ نیازی سووربوون له‌سه‌ر رێبازی شۆڕشگێڕانه‌ی دێرینی خۆی، وه‌ك هه‌میشه‌ له‌ سه‌رده‌می ئێوه‌دا ده‌وه‌ستێت‌و ده‌فته‌ری حیسابی خه‌باته‌كه‌شیان بۆ ده‌كاته‌وه‌ به‌و باوه‌ڕه‌ نه‌گۆڕه‌وه‌ كه‌ نه‌ك هه‌ر پشت به‌ یارمه‌تی‌و كۆمه‌ك‌و پشتیوانی ئێوه‌ی دلێر ده‌به‌ستێت، به‌ڵكو گوێرایه‌ڵی ڕه‌ئی‌و بیرورا‌و ره‌خنه‌‌و پێشنیاره‌كانی ئێوه‌شه‌، وه‌ك هه‌میشه‌ باوه‌ڕی نه‌گۆڕی به‌ خه‌تی خه‌باتی جه‌ماهیری هه‌یه‌، كه‌ ده‌كاته‌ جۆشدانی خه‌باتی جه‌ماوه‌ر به‌ جه‌ماوه‌ر‌و بۆ جه‌ماوه‌ر. كه‌ ده‌كاته‌ توند خۆبه‌ستنه‌وه‌ به‌ خه‌باتی كۆمه‌ڵانی خه‌ڵك‌و توند ده‌ستگرتن به‌ ئه‌ڵقه‌ی رێبازی شۆڕشگێڕانه‌ی نه‌به‌زانه‌، تاكو هه‌موو ئامانجه‌كانی خه‌ڵك‌و شۆڕشی رزگاری‌و دیموكراسیان دێنێته‌دی. كه‌ ئه‌و خه‌باته‌ش، كه‌ ئه‌و رێبازه‌ شۆڕشگێڕانه‌یه‌ش هه‌م به‌شێوه‌ی پێشمه‌رگانه‌‌و هه‌م به‌شێوه‌ی سیاسی، هه‌م به‌شێوه‌ی خه‌باتی چینایه‌تی‌و هه‌م به‌شێوه‌ی خه‌باتی نه‌ته‌وایه‌تی، هه‌م به‌شێوه‌ی خه‌باتی دیموكراتی‌و هه‌م به‌شێوه‌ی خه‌باتی پیشه‌یی ده‌بێت. وه‌ له‌ هه‌ر سه‌رده‌م، له‌هه‌ر هه‌لومه‌رجه‌دا شێوه‌یه‌كی خه‌بات دێته‌ پێشه‌وه‌، به‌ڵام خه‌بات هه‌ر درێژه‌ی هه‌یه‌.
ئیمڕۆش خه‌باتی هه‌لومه‌رجێك هاتۆته‌ كایه‌وه‌، كه‌ خه‌باتی سیاسی شۆڕشگێڕانه‌ هاتۆته‌ ڕیزی پێشه‌وه‌ی شێوه‌كانی تری خه‌باته‌وه‌، بێ ئاشبه‌تاڵ‌و كۆڵدان، وه‌گفتوگۆش بۆته‌ شێوه‌یه‌كی خه‌بات بۆ به‌دیهێنانی ئامانجه‌كانی خه‌ڵك.
ده‌رباره‌ی گفتوگۆ له‌گه‌ڵ میری
ی‌.ن.ك كۆمه‌ڵانی خه‌ڵكی وا ڕاهانیوه‌، كه‌ هه‌میشه‌ راستگۆ بێت له‌گه‌ڵیان ‌و سیاسه‌تی راسته‌قینه‌ی خی بۆیان ئاواڵه‌ بكاته‌وه‌، ڕاستی یه‌كانیان بخاته‌ به‌رچاو، پرس‌و ڕایان پێ بكات‌و له‌ دوور له‌ ده‌سكه‌وتی ئه‌وان‌و بێ ره‌زامه‌ندی ئه‌وان هیچ كارێكی گرنگ نه‌كات. هه‌ر بۆیه‌ش پێی وایه‌، كه‌ كۆمه‌ڵانی خه‌ڵك هه‌قیانه‌ داوای پتر ڕوون كرنه‌وه‌ی مه‌سه‌له‌ی گقفتوگۆی لێ بكه‌ن تا بزانن (ی‌.ن.ك) ی رێبازی خه‌باته‌كه‌یان، چی بۆ داوا كردوون؟ وه‌ گفتوگۆ له‌ چ قۆناغێك دایه‌؟ هه‌ر بۆیه‌ش لێره‌دا كورته‌‌و پوخته‌ی وه‌ڵامی پێویست ده‌ده‌ینه‌وه‌:
له‌ پاییزی ساڵی رابوردوودا، دوای ئه‌وه‌ی سه‌ركردایه‌تی (ی‌.ن.ك) پرسی به‌ كادره‌ سیاسی‌و عه‌سكه‌ریه‌كانی رێكخستنه‌كانی خۆی كرد‌و پرسی به‌ زۆربه‌ی ئه‌نجومه‌نه‌كانی دێهاتی كوردستان‌و به‌ زۆر بیر رووناك‌و دڵسۆزانی هۆشیاری كورد له‌ شاره‌كان كرد.وه‌ دوای ئه‌وه‌ی هه‌موویان په‌سندیان كرد ئینجا پێشنیاری گفتوگۆكردنی له‌گه‌ڵ میری په‌سند كرد. بۆچی ئه‌و بڕیاره‌ی دا؟ سه‌باره‌ت به‌ لێكدانه‌وه‌‌و هه‌ڵسه‌نگاندنی ژیرانه‌‌و به‌رپرسیارانه‌‌و دوربینانه‌ی هه‌لومه‌رجی ئێسته‌ی كوردستان‌و عێراق كه‌:
1-هێرش‌و په‌لاماری ئێران به‌ نیازی داگیركردن‌و له‌ناوبردنی عێراق به‌ كوردستانیشه‌وه‌، هه‌ڕه‌شه‌ له‌ گه‌ل‌و نیشتمان ده‌كات، دوژمنایه‌تی تائیفی‌و هه‌ڵگیرساندنه‌وه‌ی فیتنه‌ كۆنینه‌كه‌ی له‌ رۆژهه‌ڵات دا بڵاو ده‌كاته‌وه‌ لێره‌دا هه‌ر ئه‌وه‌نده‌ ده‌ڵێم چونكه‌ پاشان دێمه‌وه‌ سه‌ری.
2-برایه‌تی‌و یه‌كێتی تێكۆشانی كورد‌و عه‌ره‌ب‌و یه‌كێتیی نیشتمانیی عێراق پێویستییه‌كی زۆریان به‌ به‌رپه‌رچدانه‌وه‌ی پرۆپاگه‌نده‌ی شۆفێنیسته‌كان ده‌كرد كه‌ گه‌ره‌كی بوو وا نیشان بدا كه‌ گوایا كورد باكی برایه‌تی یه‌ دێرینه‌كه‌ی خۆی له‌گه‌ڵ عه‌ره‌ب نیه‌، په‌رۆشی یه‌كێتیی نیشتمانیی عێراقی نیه‌. وه‌ ده‌سته‌ چه‌وره‌كه‌ی ئه‌وانه‌ی ده‌بنه‌ كه‌وا ڕه‌شی به‌ر له‌شكری په‌لامارده‌ری ئێران بۆ سه‌ر عێراق به‌ كوردستانیشه‌وه‌ به‌سه‌ری هه‌موو خه‌ڵكی كوردستان بسڕێت. بۆ هاندانی عه‌ره‌ب له‌ كورد، له‌كاتێكدا كورد زۆری په‌رۆشی برایه‌تی یه‌ مێژویینه‌كه‌ی خۆیه‌تی له‌گه‌ڵ عه‌ره‌ب‌و زۆریش دڵسۆزی یه‌كێتیی تێكۆشانی كورد‌و عه‌ره‌به‌ گه‌لی كورد هه‌رگیز پشتی گه‌لی عه‌ره‌بی برای خۆی به‌ر نه‌داوه‌‌و به‌ریشی نادات. هه‌ر زۆر له‌ رووه‌وه‌، هه‌ر له‌ زه‌مانی سه‌لیبیه‌كان‌و سه‌ڵاحه‌دینه‌وه‌، تا ئیمڕۆ هه‌میشه‌ گه‌لی كورد له‌ ناخۆشی‌و ته‌نگانه‌دا دۆست‌و برا‌و پشتیوانی گه‌لی عه‌ره‌ب بووه‌.
ئیمڕۆش ناكرێ‌و ناشی، بۆ هێزێكی سیاسی گه‌وره‌‌و پرسیاری وه‌ك ی‌.ن.ك ماوه‌ بدات به‌وه‌ی قسه‌ی ناحه‌زان سه‌ركه‌وێت‌و بگوترێ له‌كاتی په‌لاماردانی عێراقدا له‌لایه‌ن ئێرانه‌وه‌، له‌كاتی په‌لاماردانی خاكی عێراق‌و گه‌لی عێراق له‌لایه‌ن ئێرانه‌وه‌ بۆ داگیركردنی نیشتمانی عێراق‌و به‌ تاڵان بردنی سه‌روه‌ت‌و سامانه‌كه‌ی‌و زه‌وت كردنی مافی چاره‌نووس له‌ گه‌له‌كه‌ی، كورد وه‌ یان ی‌.ن.ك له‌ پشته‌وه‌ هاوكاری ئێرانیان كرد‌و له‌ دژی په‌لاماردانه‌كه‌ی نه‌ك هه‌ر نه‌وه‌ستان به‌ڵكو له‌لاوه‌ش ڕێگه‌یان بۆ خۆش كرد.
3-له‌ كاتێكدا له‌شكری عێراق(جیش عراقی) له‌ شه‌ڕدایه‌ له‌سه‌ر سنووره‌كان‌و له‌ناو خاكی عێراقدا دژی داگیركه‌ره‌ په‌لامارده‌ره‌كانی ئێرانی ده‌وه‌ستێت.(هـ.پ.ك) سه‌ر به‌ ی‌.ن.ك خه‌نجه‌ری له‌ پشته‌وه‌ لێ ده‌دات له‌ جیاتی ئه‌وه‌ی یارمه‌تی بدات. ئێمه‌ به‌هیچ كلوجێك نامانه‌وێ ئه‌و تۆمه‌تان بێته‌ سه‌ر، نه‌ك هه‌ر له‌به‌رئه‌وه‌ی له‌ دژی پێویستییه‌كانی پاراستنی عێراقه‌، به‌ڵكو له‌به‌ر خاتری له‌شكری عێراقیش ده‌یان‌و سه‌دان هه‌زار رۆڵه‌ی عێراقی تێدایه‌، ئه‌و له‌شكره‌ی كه‌ له‌گه‌لی عێراق جیا ناكرێته‌وه‌ خاوه‌نی خاسیه‌ته‌ تایبه‌تیه‌كانی خۆیه‌تی.
4-ناوچه‌كانی بن ده‌سه‌ڵاتی پێشمه‌رگه‌ی كوردستان له‌ دوو لاوه‌ هێرشیان بۆ ده‌هات ئێرانیش به‌سه‌ر لاشه‌ی شۆڕشی كوردستانی ئێراندا، له‌دوای داگیركردنه‌وه‌ی ناوچه‌ رزگاركراوه‌كانی كوردستانی ئێراندا ده‌یه‌ویست ناوچه‌كانی ئێمه‌ش داگیر بكات، كه‌چی عێراق ئاماده‌ی شه‌ڕ راگرتن بوو له‌ دژمان‌و تا ڕاده‌یه‌كیش پشتیوانی له‌ شۆڕشی كوردستانی ئێران ده‌كرد.
5-وه‌زعی ئه‌و معاره‌زه‌ عێراقی یه‌ی ئیمڕۆ تیر‌و توانج‌و تزمه‌تمان تێ ده‌گرن له‌وپه‌ڕی گزی دایه‌.جگه‌ له‌ معاره‌زه‌ی تایفی كۆنه‌په‌رستانه‌ كه‌ له‌سه‌ر نوكه‌ نێزه‌ی له‌شكری داگیركه‌ر‌و په‌لامارده‌ری ئێران گه‌ره‌كیانه‌ بێنه‌وه‌ عێراق‌و ده‌سه‌ڵاته‌كه‌ی بگرنه‌ ده‌ست وه‌ به‌شێوه‌یه‌كی كۆنه‌په‌رستانه‌ی ئێران ئاسایی حوكمی ووڵات بكه‌ن. ئه‌مه‌ له‌كاتێكدا ئێمه‌ كه‌ دروشمی رووخاندنی حوكمیشمان هه‌ڵگرتبوو داوای هێنانی حوكمی ئیئتیلافی دیموكراتمان ده‌كرد، نه‌ك حوكمی به‌ناو دینی‌و زۆر كۆنه‌په‌رست كه‌ دوژمنی كوردایه‌تی‌و دیموكراسی‌و سۆشیالیزم‌و ژیانی ئه‌م سه‌رده‌مه‌یه‌ كه‌ نموونه‌كه‌ی وا گه‌لانی ئێران ده‌هاڕێت بۆیه‌ شه‌ڕ كردنمان بۆ خزمه‌تی ئه‌و هێزه‌ كۆنه‌په‌رسته‌ ده‌ستڕه‌شه‌ كارێكی هه‌ڵه‌‌و ناڕاست بوو.
6-گرانی‌و قاتوقڕی، بێ ده‌رمانی‌و بێ ئازووقه‌یی، ز‌وریان بۆ خه‌ڵكی ناوچه‌كانی پێشمه‌رگه‌ هێنابوو. ژیانی پێشمه‌رگه‌یان زۆر تاڵتر‌و تفتر كردبوو، كه‌وا پتر له‌ حه‌وت ساڵه‌ بێ ووچان‌و پشوودان درێژه‌ به‌ شۆڕش ده‌ده‌ن.
7-سه‌ره‌ڕای هه‌موو ئه‌و راستی یانه‌، میری ده‌ری بڕیبوو كه‌ ئاماده‌یه‌ گوێ ڕابگرێ له‌هه‌موو داخوازی‌و داواكاریه‌كانی گه‌لی كورد‌و ی‌.ن.ك وه‌ ئاماده‌یه‌ كه‌موكوڕی حوكمی زاتی ببرێ‌و گه‌شه‌ی پێ بدات وه‌ك خۆی گوته‌نی: ئێمه‌ش پێمان باش بوو كه‌ جارێكی تریش داخوازیه‌كانی گه‌لی كورد به‌رینه‌ پێش‌و له‌كاتێكدا كه‌ ماوه‌ی به‌ ئاشتی وه‌رگرتنی مافه‌كان یان هه‌ندێ له‌ مافه‌كان هه‌بێت ده‌رگه‌ی گفتوگۆ بكه‌ینه‌وه‌ به‌تایبه‌تی له‌و وه‌زعه‌شدا كه‌ له‌ سه‌ره‌وه‌ باسمان كردووه‌.
ئه‌مه‌ جگه‌ له‌وه‌ی كه‌ گفتوگۆ چ زیانێكی بۆ شۆڕش‌و ی‌.ن.ك تێدا نیه‌، هـ.پ.ك له‌ شوێنه‌كانی خۆیه‌تی‌و رێكخستنه‌كانی ی‌.ن.ك له‌ گه‌شه‌كردن‌و په‌ره‌سه‌ندنی خۆیان دان. هه‌روه‌ك ئه‌و گفتوگۆیه‌ش بۆ كۆمه‌ڵانی خه‌ڵك باش‌و به‌كه‌ڵكه‌. به‌تایبه‌تی كه‌ ئێمه‌ چه‌كمان هه‌ر بۆ به‌دیهێنانی ئامانجه‌كانی گه‌ل هه‌ڵگرتبوو، جا ئه‌گه‌ر به‌ ئاشتی بهێنرێنه‌دی، ئه‌وا گه‌لێ خوێن‌و فرمێسكمان بۆ ده‌گه‌ڕێته‌وه‌.
له‌ خولی یه‌كه‌می گفتوگۆكه‌یدا باسی هه‌موو داخوازیه‌كانی گه‌لی كوردستانی عێراق كران له‌سه‌ر هه‌موویان گفتوگۆی سه‌ربه‌ستانه‌‌و بێ په‌روا‌و ئاشكرا كران. هه‌ردوولا ره‌ئیه‌كانی خۆیان ده‌ربڕی میری ئاماده‌یی خۆی نیشان دا بۆ سه‌لماندنی گه‌شه‌‌و په‌ره‌پێدانی حوكمی زاتی‌و لابردنی وه‌زعی ناله‌بار‌و ناهه‌موار له‌ كوردستانی عێراقدا‌و سه‌لماندنی مافی حوكمڕانی كردنی كوردستان له‌لایه‌ن خه‌ڵكه‌كه‌یه‌وه‌. له‌و خوله‌دا هه‌ردوولا پێكهاتن له‌سه‌ر:
1-وه‌ستاندنی شه‌ڕ له‌نێوان هـ.پ.ك‌و هێزه‌ چه‌كداره‌كانی میری دا.
2-ده‌ست كردن به‌ گفتوگۆی جدی بۆ چاره‌سه‌ركردنی كێشه‌ی كورد به‌شێوه‌یه‌كی دیموكراتی‌و ڕه‌وا له‌ چوارچێوه‌ی یه‌كێتیی عێراقدا.
3-جێبه‌جێكردنی پێویستیه‌كانی ی‌.ن.ك ‌و هـ.پ.ك له‌و قۆناغه‌دا.
كۆمه‌ڵانی خه‌ڵك‌و گفتوگۆ
دوابه‌دوای بڵاوبوونه‌وه‌ی ده‌نگ‌وباسی ڕه‌سمی له‌نێوان میری‌و ی‌.ن.ك دا، یه‌كسه‌ر سه‌دان هه‌زار كه‌س ڕژانه‌ سه‌ر شه‌قامه‌كانی شاره‌كانی كوردستانه‌وه‌، ده‌ستیان كرد به‌ دانانی دروشمی پشتیوانی له‌ ی‌.ن.ك‌و هـ.پ.ك‌و ده‌ربڕینی خۆشی‌و شادی خۆیان به‌و هه‌نگاوه‌ كه‌ به‌ سه‌ركه‌وتنێكی خۆیان دانا.
ڕاگرتنی شه‌ڕ‌و لابردنی زه‌غت‌و تۆقاندن له‌سه‌ر خه‌ڵك، بوونه‌ هۆی گه‌شانه‌وه‌ی خه‌ڵك‌و دروست بوونی جه‌وێكی هیوابه‌خش، كه‌ تێیدا كۆمه‌لانی خه‌ڵك له‌لایه‌كه‌وه‌ هه‌ناسه‌یه‌كی ئازادی‌و ئاسوده‌یی یان هه‌ڵكێشا‌و له‌لایه‌كی تره‌وه‌ تینی گرانی‌و قاتوقڕی یان له‌سه‌ر لاچوو. هیوا‌و ئومێدیشیان ژیایه‌وه‌ به‌ سه‌لماندنی مافه‌كانی دیموكراتی‌و نه‌ته‌وایه‌تیان، هه‌ر بۆیه‌ش كۆمه‌ڵانی خه‌ڵك زۆر به‌ گه‌رمی پێشوازیان له‌و هه‌نگاوه‌ی ی‌.ن.ك كرد‌و زۆریش پشتیوانیان لێ كرد، به‌م جۆره‌ جوڵانه‌وه‌یه‌كی جه‌ماهیری بوژایه‌وه‌‌و په‌ره‌ی سه‌نده‌وه‌ كه‌ شار‌و دێهاتی كوردستانی گرتۆته‌به‌ر كه‌ بێگومان بۆته‌ مایه‌ی په‌ره‌سه‌ندنی رێكخراوه‌كانی ی‌.ن.ك‌وهـ.پ.ك‌و رێكخراوه‌ دیموكراتی یه‌كانی كوردستان. ئه‌مه‌ش به‌لای ئێمه‌وه‌ ده‌سكه‌وتێكی زۆر گرنگ‌و بایه‌خداره‌. پێوسته‌ به‌وپه‌ڕی ژیری‌و هوشیاری‌و چالاكی یه‌وه‌ پێشوازی لێ بكه‌ین بۆ زۆرتر‌و پتر په‌ره‌پێدان‌و گه‌شه‌پێدانی رێكخستنه‌كان‌و هـ.پ.ك پێویسته‌ چالاكانه‌‌و هۆشیارانه‌ په‌ره‌‌و گه‌شه‌ بدرێن به‌ (ی‌.ن.ك)‌و (ی‌.نووسه‌رانی ك)‌و (ی‌.م.ك)‌و (ی‌.ه.ك)‌و هه‌رچی زووشه‌ خوشكانی تێكۆشه‌ری ی‌.ئا.ك ببوژێننه‌وه‌‌و بخه‌نه‌وه‌ گه‌ڕ. چونكه‌ بێ رێكخستن‌و جۆشدانی خه‌باتی ئافره‌تان گه‌ نیوه‌ی كۆمه‌ڵن، بێ هاوبه‌شی چالاكانه‌‌و ژیرانه‌یان له‌ خه‌باتی شۆڕشگێڕانه‌دا سه‌ركه‌وتن به‌ده‌ست نایه‌ت هه‌روه‌ك پێویسته‌ جوڵانه‌وه‌یه‌كی جه‌ماهیری رێك‌و پێكی جوتیاران ساز ده‌ین‌و جۆشبده‌ین بۆ له‌ ڕه‌گ‌و ڕیشه‌ هه‌ڵكه‌ندنی ده‌ره‌به‌گایه‌تی‌و پاشماوه‌كانی، بۆ جێبه‌جێ كردنی ئیسلاحی زه‌راعی تاكو زه‌وی ببێته‌ هی ئه‌وانه‌ی ره‌نیوی ده‌هێنن، به‌ڵام به‌بێ لادان به‌لای ڕاستۆ به‌لای چه‌پدا، بێ له‌ بیركردنی پێویستی هۆشیاركردنه‌وه‌ی جوتیاران تاكو خۆیان جوڵانه‌وه‌ی رزگاربوونی خۆیان جۆشبده‌ن‌و به‌رێوه‌به‌رن، واته‌ نه‌ك ئیسلاحێكی زه‌راعی بیروكراتی به‌ڵكو ئیسلاحێكی زه‌راعی شۆڕشگێڕانه‌؟بۆ ئه‌مه‌ش ده‌بێ پشت به‌ جوتیارانی هه‌ژار‌و ره‌نجده‌رانی لادێ ببه‌ستین‌و ئه‌وانیش هاوكاری له‌گه‌ڵ جوتیارانی ناوه‌نجی بكه‌ن‌و پێكه‌وه‌شیان هه‌وڵی بێ لایه‌ن كردنی جوتیاری ده‌وڵه‌مه‌ند بده‌ن.
جا ئێمه‌ له‌م هه‌لومه‌رجه‌ پێمان باشه‌ قانونی ژماره‌ (90) جێبه‌جێ بكرێت، پێویسته‌ خه‌بات درێژه‌ پێ بده‌ین بۆ گۆڕاندنی قانونه‌كه‌ بۆ هێنانه‌دی داخوازیه‌كانی جوتیاران بۆ به‌دیهێنانی دروشمی زه‌وی بۆ ئه‌و جوتیاره‌یه‌ كه‌ ده‌یكێڵێت دیاره‌ به‌ ڕه‌چاوكردنی وه‌زعی تایبه‌تی كوردستان.
كۆمه‌ڵانی خه‌ڵكی كوردستان هه‌رچه‌نده‌ به‌ گه‌رمی پشتیوانی له‌ گفتوگۆ ده‌كه‌ن به‌ڵام زۆر به‌په‌له‌ داوای به‌ئه‌نجام گه‌یاندنی ده‌كه‌ن، زۆر به‌په‌له‌ داوای به‌یان كردن‌و بڵاوكردنه‌وه‌ی ده‌كه‌ن، ئێمه‌ش به‌ پێویستی ده‌زانین كه‌ به‌ كۆمه‌ڵانی خه‌ڵكی كوردستانی خۆشه‌ویستی ڕابگه‌یه‌نین هه‌رچه‌نده‌ میری له‌ خولی سێیه‌می گفتوگۆشدا دووپاتی كردۆته‌وه‌ كه‌ زۆر ئیجابی یه‌ له‌ گفتوگۆیه‌كه‌دا‌و له‌ گه‌شه‌پێدانی حوكمی زاتی دا‌و له‌ چاره‌سه‌ركردنی كێشه‌ی كوردا، وه‌ هه‌رچه‌نده‌ هه‌ندێ هه‌نگاوی جیددیشیان هه‌ڵهێناوه‌ به‌ره‌و ئه‌وه‌‌و له‌و رێگه‌یه‌دا‌و چه‌ندین به‌ڵێنی باشیشیان داوه‌، به‌ڵام دیسان هه‌ر پێویسته‌ ئه‌م ڕاستی یانه‌ بخه‌ینه‌ به‌رچاو:
1-كێشه‌یه‌كی ئاڵۆزی گرێ گرێیاوی وه‌ك كێشه‌ی كورد كه‌ پتر له‌ چاره‌كه‌ قه‌ڕنێكه‌ خه‌باتی شۆڕشگێڕانه‌ی بۆ ده‌كرێ‌و له‌ پێش (23) ساڵیشه‌وه‌ خه‌باتی پێشمه‌رگانه‌ی بۆ ده‌ست پێكراوه‌، وا به‌ سووك‌و سانایی، وا به‌په‌له‌‌و به‌ زوویی چاره‌یه‌كی تێر‌و ته‌سه‌لی بۆ ناكرێت.
به‌تایبه‌تی كه‌ ناحه‌زانی ئه‌م چاره‌سه‌ركردنه‌ له‌ ده‌ره‌وه‌‌و ناوه‌وه‌ی ووڵاتدا گه‌لێ زۆرن، كه‌ چه‌ندین ده‌وڵه‌تی وه‌ك ئێران‌و توركیا له‌ دژی كارده‌كه‌ن، بۆیه‌ پێویسته‌ به‌ پشوویه‌كی شۆڕشگێڕانه‌وه‌ بنوارینه‌ مه‌سه‌له‌كه‌.
2-ی‌.ن.ك‌و میریش به‌ وردی‌و له‌سه‌ره‌خۆ مه‌سه‌له‌ی كورد ده‌رس ده‌كه‌ن‌و باس ده‌كه‌ن، هه‌رچه‌نده‌ هه‌ردوولا وه‌فدی ده‌سه‌ڵاتداری خۆیان له‌سه‌ر به‌رزترین پله‌ داناوه‌ بۆ په‌له‌كردن له‌ چاره‌سه‌ركردنی مه‌سه‌له‌ی كورد، وه‌ له‌م رۆژانه‌ی داهاتوودا ده‌ست ده‌كه‌نه‌وه‌ به‌ كار به‌ڵام دیسان پشووی شۆڕشگێڕانه‌ ده‌بێ درێژ بێ! چونكه‌ ی‌.ن.ك دوای گه‌ڵاڵه‌كردنی ریككه‌وتنه‌كه‌ش ده‌یخاته‌وه‌ پێش چاوی كادره‌كانی خۆی‌و هوشیارانی گه‌له‌كه‌مان‌و لێزان‌و پسپۆران ئینجا كۆمه‌ڵانی خه‌ڵكی كوردستان تا گه‌ر پێیان باش بوو په‌سندی بكه‌ن یان داوای ده‌سكاری پێویستی تێدا بكه‌ن. به‌ كورتی ی‌.ن.ك بێ پرس‌و ڕا به‌ خه‌ڵك و بێ ره‌زامه‌ندی كۆمه‌ڵانی خه‌ڵك هیچ هه‌نگاوێكی به‌ئه‌نجامی دوایینی ناگه‌یه‌نێت.
شێواندنی گفتوگۆ
هه‌ندێ له‌ ناحه‌زانی گفتوگۆ له‌ شاره‌كان‌و هه‌ندێ له‌ دوژمنه‌كانیشی له‌ ده‌ره‌وه‌، هه‌ر زوو كه‌وتنه‌ پرۆپاگه‌نده‌ی ژه‌هراویی‌و بگره‌ جنێودانیش به‌ (ی‌.ن.ك)، هه‌ندێ داخ له‌ دڵ‌و له‌ خۆترساوی شاره‌كان له‌گه‌ڵ هه‌ندێ له‌ ده‌ره‌به‌گه‌ نیشتمانفرۆشه‌كان پرۆپاگه‌نده‌ دژی(ی‌.ن.ك) كه‌ وا ده‌ست پێ كرد كه‌ گوایا ی‌.ن.ك گه‌ڕاوه‌ته‌وه‌ ریزی نیشتمانی، ده‌ردی خۆیان گوته‌نی: هه‌ر زوو وه‌ڵامی ده‌م كوتكه‌رانه‌ی درۆی ئه‌وانه‌مان به‌م راستی یه‌ دایه‌وه‌ كه‌ ریزی نیشتمانی راسته‌قینه‌ ریزی (ی‌.ن.ك)‌و شۆڕشه‌كه‌مانه‌. هه‌ویه‌ی نیشتمانی له‌لایه‌ن(ی‌.ن.ك) ی به‌ خوێنی گه‌شی شه‌هیده‌ نه‌مره‌كان ده‌رده‌كرێت.
له‌ ده‌ره‌وه‌ش دا هه‌ندێكی تر درۆ‌و ده‌له‌سه‌ی به‌زین‌و ((خۆبه‌ده‌سته‌وه‌دانی)) ی‌.ن.ك یان به‌ چه‌ندین جنێوی ناشیرینه‌وه‌ بڵاو كرده‌وه‌، به‌ڵام وه‌ڵامدانه‌وه‌ی ده‌مكوتكه‌رانه‌ی درۆ‌و بوختانی ئه‌وانیش هه‌ر به‌م راستی یه‌یه‌ كه‌ ی‌.ن.ك رێبه‌ری كۆڵنه‌ده‌ری كوردایه‌تی‌و شۆڕشه‌كه‌یه‌تی، نه‌ك وا هه‌ر به‌ شاخه‌وه‌یه‌‌و له‌ ده‌ره‌وه‌یه‌، به‌ڵكو تا سه‌ركه‌وتن یا مردن تا به‌ده‌ستهێنانی مافه‌كانی دیموكراتی‌و نه‌ته‌وایه‌تی گه‌لی كوردستان هه‌ر درێژه‌ به‌ خه‌بات ده‌دات به‌هه‌موو شێوه‌كانی. گفتوگۆش به‌لای ئێمه‌وه‌ هه‌ر شێوه‌یه‌كی ئه‌و خه‌باته‌یه‌، هه‌ر وه‌سیله‌یه‌كه‌ بۆ به‌دیهێنانی ئامانجه‌كانی گه‌له‌كه‌مان.
داخوازیه‌كانی گفتوگۆ
له‌ دوای خولی دووه‌می گفتوگۆیه‌كه‌دا، سه‌ركردایه‌تی ی‌.ن.ك به‌ نووسینی پرۆژه‌ی قانونی حوكمی زاتی راسته‌قینه‌‌و مافه‌ سه‌ره‌كیه‌كانی كورد‌و پرۆژه‌ی چۆنیه‌تی گه‌ڕاندنه‌وه‌ی كوردستان بۆ دۆخی ئاسایی خۆی پێشكه‌ش به‌ كاربه‌ده‌ستانی میری كردووه‌.
له‌م پرۆژه‌ نووسراوانه‌دا ی‌.ن.ك داوای ئۆتۆنۆمی راسته‌قینه‌ ده‌كات كه‌ هه‌موو ناوچه‌كانی كوردستان بگرێته‌وه‌ واته‌ هه‌موو ئه‌و ناوچانه‌ی له‌ سنووری ئۆتۆنۆمی ده‌رهێندراون‌و كوردستانن هه‌ر له‌ شه‌نگاره‌وه‌ بگره‌ تاكو خانه‌قین‌و مه‌نده‌لی داوای ده‌سه‌ڵاتی ته‌واو بۆ ده‌زگاكانی ئۆتۆنۆمی ده‌كه‌ین داوای ئه‌وه‌ ده‌كه‌ین كه‌ ئۆتۆنۆمی راسته‌قینه‌ ناوه‌رۆكێكی زیندووی هه‌بێت كه‌ حوكمڕانی خه‌ڵكی كوردستانه‌ به‌سه‌ر ناوچه‌كانی خۆیدا.
داوای جێبه‌جێ كردنی ناوه‌رۆكی به‌یانی 11/ئازاری/1970 ده‌كه‌ین. داوا ده‌كه‌ین كه‌ هه‌موو جوتیاره‌ راگوێزراوه‌كانی كوردستان بچنه‌وه‌ سه‌ر دێهاتی خۆیان‌و ئیسلاحێكی زه‌راعی شۆڕشگێڕانه‌یان بۆ بكرێت‌و چه‌كداریش بكرێن. هه‌روه‌ك ده‌بێ هه‌موو كرێكاران‌و مووچه‌خۆره‌كان‌و راگوێزراوه‌كانی شاره‌كانی گه‌رمیانی كوردستان بچنه‌وه‌ سه‌ر كاره‌كانی خۆیان له‌ شاره‌كانی خۆیاندا. پێمان وایه‌ داوامان ئه‌مه‌یه‌ كه‌ هه‌موو موچه‌خۆر‌و ئه‌فسه‌ر‌و خوێندكارانی كورد بگه‌ڕێنه‌وه‌ سه‌ر شوێنی خۆیان و پاداشتیان بدرێته‌وه‌.
داوای ئازادی‌و سه‌ربه‌ستی یه‌ دیموكراتیه‌كانمان كردووه‌ تاكو رێكخراوه‌ سیاسی‌و دیموكراتی یه‌كانی كوردستانیش بگه‌رێنه‌وه‌ سه‌ر كاركردن‌و ئه‌وانه‌ی نه‌ماون ببوژێندرێنه‌وه‌ به‌ ئاشكرا‌و به‌ سه‌ربه‌ستی نه‌ك ته‌نها هی (ی‌.ن.ك).
داوامان كردووه‌ هه‌موو زیندانیه‌ سیاسیه‌كان ئازاد بكرێن به‌ برا بارزانیه‌كانیشمانه‌وه‌ كه‌ ده‌بێ ئازاد بكرێن‌و بگه‌ڕێندرێنه‌وه‌ سه‌ر شوێن‌و دێهاتی خۆیان هه‌روه‌ها هه‌موو داخوازیه‌كانی تری خه‌ڵكی كرودستانیشمان پێشكه‌ش كردووه‌.
داوامان وایه‌ كه‌ هه‌موو ئه‌و شتانه‌ی له‌ هه‌لومه‌رجی نائاسایی دا یان هه‌موو ئه‌وانه‌ی له‌ دژی شۆرش‌و ی‌.ن.ك چه‌كدار كراون هه‌ڵوه‌شێندرێنه‌وه‌، پارێزگاری نیشتمانیش له‌و دوژمن‌و له‌ په‌لامارده‌ران پێمان وایه‌ نه‌ك به‌وانه‌ ناكرێت به‌ڵكو ده‌بنه‌ رێگر‌و كۆسپ له‌ كوردستاندا.
پارێزگاری نیشتمان 
له‌ په‌لامارده‌رانی ئێرانی
شتێكی ئاشكرایه‌ كه‌ حكومه‌تی ئێران به‌ نیازی داگیركردنی عێراق درێژه‌ به‌ هێرش‌و په‌لاماره‌كانی ده‌دا. حكومه‌تی نایشارێته‌وه‌ كه‌ ده‌یه‌وێ عێراق بگرێت، حوكمه‌كه‌ی سه‌رنگوم بكات تاكو حكومه‌تێكی به‌ناو ئیسلامی سه‌ر به‌ ئێران له‌ شوێنی دابنێت. ده‌یه‌وێ (250) هه‌زار ملیۆن دۆلار تۆڵه‌ی زیانه‌كانی شه‌ڕ له‌ عێراق بسێنێت. ده‌یه‌وێ رێككه‌وتنه‌كه‌ی جه‌زایری ساڵی 1975 بسه‌پێنێت به‌سه‌ر عێراقدا واته‌ هه‌م نیوه‌ی شه‌تولعه‌ره‌ب‌و هه‌م زۆر شوێنی تری عێراق له‌ كوردستان داگیر بكات. به‌ كورتی حكومه‌تی ئێران ده‌یه‌وێ عێراق توند به‌ پاشكۆی خۆیه‌وه‌ گرێ بدا‌و گه‌له‌كه‌ی له‌ سه‌ربه‌خۆیی نیشتمانی، مافی دانانی رژێمێكی ئیئتیلاف‌و دیموكرات، ژیانی ئازاد‌و پێشكه‌وتوو، بێبه‌ش بكا. هه‌مان حوكمی كوشت‌و كوشتار، داگیركردنی مافه‌كانی نه‌ته‌وایه‌تی‌و دیموكراتی له‌ گه‌لان كه‌ له‌ ئێران دا هه‌یه‌ به‌سه‌ر عه‌ره‌ب‌و كورد‌و توركمانی عێراقی دا بسه‌پێنێت، فیتنه‌‌و شه‌ڕ‌و ناكۆكی شیعه‌‌و سوننه‌ش له‌ عێراقدا په‌ره‌ پێ بدات تا به‌ یه‌كجاری كاولی بكات.
په‌لاماری ئێرانیش بۆ سه‌ر كوردستانی عێراق به‌سه‌ر لاشه‌ی تێكۆشه‌رانی كوردستانی ئێراندا به‌نیازی دامركاندنه‌وه‌ی شۆڕشی كوردستانه‌ له‌هه‌ردوو دیوی كوردستاندا، به‌نیازی له‌ناوبردنی نه‌ته‌وه‌ی كورده‌، به‌نیازی له‌نوبردنی جوڵانه‌وه‌ی رزگاری نیشتمانی‌و دیموكراتی خه‌ڵكی كوردستانه‌. بۆ ئه‌وه‌ی نه‌هێڵێت كوردستانی عێراق وه‌ك كوردستانی ئێران ببێته‌ پێگه‌ی هێزه‌ شۆڕشگێڕه‌كانی عێراقی دوارۆژ كه‌ به‌ ته‌مایه‌ داگیری بكات.
سووربوونی حوكمی ئێرانی له‌سه‌ر په‌لاماردان‌و داگیركردنی عێراق ‌و ئێسته‌ دوارۆژی گه‌له‌كه‌مان‌و له‌سه‌ر پێشكه‌وتن‌و گه‌شه‌كردنی كۆمه‌ڵایه‌تیش.
هه‌ر بۆیه‌ش ی‌.ن.ك ‌و هـ.پ.ك دلێرانه‌ چوونه‌وه‌ به‌ گژ په‌لاماردانی ئێرانیدا ته‌نانه‌ت له‌كاتێكدا دژی هه‌ردوو حكومه‌ته‌كه‌ی ده‌جه‌نگان.
ئێسته‌ش له‌به‌رامبه‌ر هێرش‌و په‌لاماری ئێران هه‌ر هه‌مان هه‌ڵوێستمان هه‌یه‌، به‌ڵام به‌لای ئێمه‌وه‌ بۆ ئه‌وه‌ی كۆمه‌ڵانی خه‌ڵكی كوردستان به‌ دڵ‌و گیان بچنه‌وه‌ به‌گژ هێرش‌و په‌لاماری ئێراندا‌و كوردستانیان لێ بكه‌نه‌ گۆرستان. ده‌بێ هه‌موو مافه‌ دیموكراسی‌و نه‌ته‌وایه‌تی یه‌كانی خه‌ڵك بسه‌لمێندرێن‌و دابین بكه‌ین.
ده‌بێ ئۆتۆنۆمی راسته‌قینه‌ به‌ خه‌ڵك بدرێت، ده‌بێ خه‌ڵكی كوردستان به‌هۆی نوێنه‌رانی هه‌ڵبژێردراوی خۆیانه‌وه‌ حوكمی كوردستان بكه‌ن، پێویسته‌ جوتیاره‌كان بگه‌ڕێنه‌وه‌ بۆ دێهاته‌كانی خۆیان‌و چه‌كدار بكرێن تاكو دێهاته‌كانیان بكه‌نه‌ قه‌ڵا‌و شورای پاراستنی عێراق پێویسته‌ پشت به‌ جه‌ماوه‌ری كوردستان ببه‌سترێت، جه‌ماوه‌ری كوردستان چه‌كدار بكرێن‌و جه‌ماوه‌ری كوردستان بكرێنه‌ شوره‌‌و قه‌ڵای پاراستنی ووڵات، چونكه‌ ئه‌م كاره‌ هه‌ر به‌ پێشمەرگە ده‌كرێت نه‌ك به‌ جاش‌و جاشی سووك، نه‌ك به‌ ده‌ره‌ربه‌گ‌و خێڵه‌ كۆنه‌په‌رسته‌كان كه‌ نیازیان ژیاندنه‌وه‌ی ده‌ره‌به‌گایه‌تی و چه‌وساندنه‌وه‌ی كۆمه‌ڵانی خه‌ڵكه‌.
هه‌ر به‌ ڕه‌چاوكردن‌و به‌ په‌یڕه‌وكردنی سیاسه‌تی ماف سه‌لماندن و پشت به‌ستن به‌ جه‌ماوه‌ریش مه‌سه‌له‌ی سه‌ربازی راكردوو  چاره‌سه‌ر ده‌كرێ نه‌ك به‌ تۆقاندن‌و هه‌ڵواسین، هه‌ر ئه‌وسا خۆیان به‌ دڵ و به‌گیان،  پۆل پۆل‌و ده‌سته‌ ده‌سته‌، ده‌چن بەرەو سه‌نگه‌ره‌كانی پاراستنی نیشتمان له‌ په‌لامارده‌ره‌كان، بۆیه‌ داوای په‌یره‌وی كردنی ئه‌و سیاسه‌ته‌ راست‌و ره‌وایه‌ ده‌كات و هه‌موو خه‌ڵكی كوردستان به‌ دڵ‌و به‌ گیان ده‌ست بده‌نه‌ چه‌ك‌و دیفاع لە نیشتمانه‌كه‌ی خۆیان كه‌ عێراقی خۆیانه‌ بكه‌ن.
هه‌ر به‌ په‌یره‌وی كردنێكی دڵسۆزانه‌ی ئه‌و سیاسه‌تی  دابینکردنی مافه‌كانی دیموكراتی‌و نه‌ته‌وایه‌تی خه‌ڵك ده‌كرێ‌و یه‌كێتیی نیشتمانیی عێراق بپارێزرێت‌و بچه‌سپێنرێت. هه‌ر بۆیه بە هه‌وڵدان‌و خه‌بات كردن بۆ هێنانه‌دی ئامانجه‌كانی خه‌ڵكی كوردستان ده‌كاته‌ هه‌وڵدان‌و خه‌بات بۆ پته‌وكردنی یه‌كێتیی نیشتمانی ، واته‌ به‌دیهێنانی ئۆتۆنۆمی راسته‌قینه‌ ده‌بێته‌ هۆی به‌هێزكردن و چه‌سپاندنی یه‌كێتیی نیشتمانیی عێراق‌و په‌ره‌پێدان‌ی برایه‌تی كورد‌و عه‌ره‌ب. به‌پێچه‌وانه‌وه‌ داگیركردنی  کوردستان و خه‌ڵك‌و نه‌سه‌لماندنی حوكمی زاتی راسته‌قینه‌ ده‌بێته‌ هۆی به‌هێزكردنی یه‌كێتی عێراق.
هه‌ر بۆیه‌ش ئیمڕۆ كه‌ میری به‌ڵێنی به‌دیهێنانی حوكمی زاتیی راسته‌قینه‌ به‌ گه‌لی كورد ده‌دات، كه‌ قۆڵ‌و بازووی به‌ هێزی چاره‌سه‌ركردنی مه‌سه‌له‌ی كوردی لێ هه‌ڵكردووه‌‌و كه‌وتۆته‌ گفتوگۆ له‌گه‌ڵ ی‌.ن.ك ئه‌م راستی یه‌ی له‌هه‌موو كاتێك ده‌دره‌خشێنێته‌وه‌ كه‌ سه‌لماندن‌و جێبه‌جێكردنی حوكمی زاتی راسته‌قینه‌ ده‌بێته‌ هۆی به‌هێز‌و به‌تین كردنی یه‌كێتیی عێراق‌و په‌ره‌پێدان فراوان كردنی به‌ره‌ی به‌ربه‌ره‌كانی په‌لاماردانی ئێرانی‌و هاندان‌و سازدان‌و جۆشدانی سه‌دان هه‌زار رۆڵه‌ی كورد بۆ پاراستنی گه‌ل‌و نیشتمان هه‌ر ئه‌وساش كوردستان ده‌بێته‌ گۆڕستانی داگیركه‌ران‌و په‌لامارده‌رانی ئێرانی.
ئێمه‌ش كه‌ له‌م ساته‌ سامناكه‌ی مێژووی عێراق(به‌ كوردستانیشه‌وه‌) ده‌ستمان كردووه‌ به‌ گفتوگۆ به‌ هه‌م نیاز‌و بۆ هێنانه‌دی هه‌مان ئامانجه‌ بۆ دابین كردنی مافه‌ ره‌وایه‌كانی خه‌ڵكی كوردستانه‌ بۆ ئۆتۆنۆمی راسته‌قینه‌یه‌، بۆ به‌هێزكردن‌و پته‌وكردنی یه‌كێتیی نیشتمانیی عێراق‌و په‌ره‌پ‌ێدان‌و گه‌شه‌پێدانی به‌ربه‌ره‌كانی كردنی داگیركه‌رانی ئێرانی یه‌، بۆ به‌هێز‌و پته‌وكردنی برایه‌تی مێژووكرد‌و دێرینی كورد‌و عه‌ره‌به‌، بۆ ئه‌مانه‌یه‌‌و بۆ هێنانه‌دی داخوازیه‌ ڕه‌وایه‌كانی تری خه‌ڵكه‌.
هه‌ر بۆیه‌ش هه‌ر كه‌سێ یان تاقمێ یان هێزێ وا تێ نه‌گات، وه‌ خۆی به‌ هه‌ندێ هۆی ناڕاسته‌وه‌ فڕیو بدات وه‌ك ئه‌وه‌ی هه‌ندێ بڵێن ی‌.ن.ك كه‌ ماندوو بووه‌ یان به‌زیوه‌، یان خه‌ریكی ته‌سلیم بوونه‌! ئه‌وا خۆیان تووشی هه‌ڵه‌ی گه‌وره‌‌و كوشنده‌ ده‌كه‌ن.
ی‌.ن.ك هه‌ر ئه‌و هێزه‌ شۆڕشگێڕه‌ نه‌به‌ز‌و كۆڵنه‌ده‌ره‌ سه‌ربه‌خۆیی یه‌ی كوردستانه‌، كه‌ هه‌تا سه‌ر دڵسۆزی كۆمه‌ڵانی خه‌ڵك‌و نیشتمانه‌ كه‌ ژیان‌و گیانی خۆی ‌و ئه‌ندامان‌و پێشمه‌رگه‌كان‌و لایه‌نگرانی خۆی، له‌ خه‌باتی جه‌ماهیری‌و له‌ شۆڕش چاو نیه‌‌و هه‌میشه‌ هه‌تا سه‌ركه‌وتن هه‌ر رێكخه‌ر‌و رێبه‌ری كوردایه‌تی ده‌بێت هه‌میشه‌ هه‌ر رێبه‌ر‌و رێكخه‌ری خه‌باتی كۆمه‌ڵانی خه‌ڵكی كوردستان ده‌بێت له‌پێناوی دیموكراسی‌و مافه‌ ڕه‌وایه‌كانی نه‌ته‌وایه‌تی كه‌ ئیمڕۆ خۆی له‌ ئۆتۆنۆمی ڕاسته‌قینه‌دا ده‌نوێنێت.
بۆیه‌ بێگومان، ئه‌مجاره‌ش درۆ‌و ده‌له‌سه‌‌و تۆمه‌تی بوختانی ناحه‌زان‌و سه‌رلێشێواوان هه‌ر خۆیانی پێ ریسوا ده‌بنه‌وه‌، وه‌ رووداوه‌كان ده‌ری ده‌خه‌نه‌وه‌ كه‌ ی‌.ن.ك هه‌ر رێبه‌ری نه‌به‌ز‌و كۆڵنه‌ده‌ری كوردایه‌تی شۆڕشه‌ له‌ كوردستانی عێراقدا. وه‌ هه‌تا به‌دیهێنانی هه‌موو داخوازیه‌كانی چینایه‌تی‌و نه‌ته‌وایه‌تی كۆمه‌ڵانی خه‌ڵك هه‌رده‌م خه‌باتگێڕی شۆڕشگێر‌و سه‌ربه‌خۆی گۆڕه‌پانی كوردستان ده‌بێت.
راسته‌ ی‌.ن.ك وه‌ك هێزێكی سیاسی گه‌وره‌‌و به‌رپرسیاری شۆڕشگێڕ، ژیرانه‌‌و دووربینانه‌ ده‌ڕوانێته‌ رووداوه‌كان‌و هه‌لومه‌رجی عێراق‌و خه‌ته‌ری په‌لاماردانی ئێران زۆر باش هه‌ڵده‌سه‌نگێنێت،ڕاسته‌ كه‌ زۆریش په‌رۆشی برایه‌تی كورد‌و عه‌ره‌بیه‌تی، زۆریش به‌ ته‌نگ یه‌كێتیی نیشتمانیی عێراقه‌وه‌یه‌. زۆر زۆریش باكی خوێنی پێشمه‌رگه‌كان‌و سه‌ربازه‌كانی عێراقیه‌تی وه‌ زۆر په‌رۆشی ئه‌وه‌یه‌تی كه‌ ئه‌و خوێنه‌ له‌ شوێنی خۆیدا‌و له‌كاتی پێویست وه‌ بۆ پارێزگاری نیشتمان‌و سه‌ربه‌خۆیی نیشتمان بڕژێت نه‌ك له‌ شه‌ڕی لابه‌لادا. هه‌ر بۆیه‌ش دروشمی ئاشت بوونه‌وه‌ی گشتی هه‌ڵگرتووه‌، له‌لایه‌كه‌وه‌ له‌گه‌ڵ میری بۆ به‌ ئاشتی چاره‌سه‌ركردنی كێشه‌ی ره‌وای كورد كه‌وتۆته‌ گفتوگۆوه‌، له‌لایه‌كی تریشه‌وه‌ له‌گه‌ڵ هێزه‌كانی سیاسی كه‌ له‌ كوردستاندا هه‌ن كه‌وتۆته‌ هه‌وڵ‌و ته‌قه‌ڵای ئاشتبوونه‌وه‌، نامه‌‌و راسپارده‌یان له‌گه‌ڵ ئاڵ‌وگۆر ده‌كات بۆئه‌وه‌ی ماوه‌ نه‌ده‌ین بۆ بوژاندنه‌وه‌ی خوێنی گه‌شی كورد به‌ده‌ست كورده‌وه‌، بۆ ئه‌وه‌ی هه‌موو هێزه‌ سیاسیه‌كان به‌شێوه‌ی خۆشی‌و سیاسی ناكۆكی‌و گیروگرفته‌كانی خۆیان لابه‌لا بكه‌ن.
به‌ڵام هه‌ر كه‌سێ یان هێزی ئه‌و هه‌موو هه‌ست‌و به‌رپرسیاری‌و ژیری‌و په‌رۆشه‌ی ی‌.ن.ك به‌ لاوازی‌و كزی‌و ماندووبوون‌و كۆڵدان بداته‌ قه‌ڵه‌م ئه‌وا خۆی تووشی هه‌ڵه‌یه‌كی زۆر گه‌وره‌ ده‌كات كه‌ ره‌نگه‌ به‌ره‌و هه‌ڵدێری هه‌زار به‌ هه‌زاری به‌رێت.چونكه‌ ی‌.ن.ك ئیمڕۆ له‌ هه‌موو رۆژێكی تر به‌هێز‌و تواناتره‌ له‌ رووی سیاسی‌و جه‌ماهیری‌و پێشمه‌رگایه‌تی یه‌وه‌، نه‌ك هه‌ر ماندوو په‌ككه‌وته‌ نیه‌، به‌ڵكو حه‌ساوه‌‌و ساز‌و ئاماده‌یه‌ كوری نه‌به‌رده‌.هه‌میشه‌‌و هه‌تا سه‌ر بێ لادان‌و كۆڵدان درێژه‌ی به‌ خه‌باتی جه‌ماهیری شۆڕشگێڕانه‌ی خۆی ده‌دا به‌هه‌موو داخوازیه‌كانی دیموكراتی‌و نه‌ته‌وایه‌یه‌تی‌و چینایه‌تی كۆمه‌ڵانی خه‌ڵكی كوردستانی عێراق دێنێته‌دی.
هه‌روه‌ك هه‌میشه‌ش پشتیوانی باوه‌ڕپێكراوی شۆڕشی كوردستانی ئێران‌و جوڵانه‌وه‌ی رزگاری خوازی نه‌ته‌وه‌ی كورد ده‌بێت له‌هه‌موو كوردستاندا.
گه‌ر هاتوو گفتوگۆیه‌كه‌شمان وه‌ك لێی ڕه‌چاو ده‌كرێ سه‌ركه‌وت‌و به‌ كوردستانی ئۆتۆنۆمی راسته‌قینه‌ شاد بووین، ئه‌وا بێگومان ده‌یكه‌ینه‌ قه‌ڵا‌و پشت‌و په‌نای هێزه‌ شۆڕشگێڕه‌كانی كوردستان‌و ئێران، وه‌ به‌هه‌موو جۆر‌و شێوه‌یه‌ك هاوكاری‌و هاوخه‌باتیان ده‌كه‌ین تا سه‌رده‌كه‌ون‌و ئێرانێكی ئازاد‌و سه‌ربه‌خۆ‌و دیموكرات بنیات ده‌نێن له‌سه‌ر كه‌لاوه‌ی كۆنه‌په‌رسته‌ شۆڤێنییه‌ په‌لامارده‌ره‌ داگیركه‌ره‌كه‌ی ئێسته‌یان.
خوشك‌و برایانی خۆشه‌ویست:
ده‌با نه‌ورۆزی ئه‌مساڵمان بكه‌ینه‌ نه‌ورۆزی خه‌باتی سیاسی‌و شۆڕشگێڕانه‌ بۆ ئاشت بوونه‌وه‌ی گشتی هێزه‌ سیاسی‌و چه‌كداره‌كانی كوردستان تا ئه‌ویش بمانگه‌یه‌نێت به‌ ئاشتی‌و دیموكراتی‌و ئۆتۆنۆمی ڕاسته‌قینه‌.
ده‌با هه‌موو كۆمه‌ڵانی خه‌ڵكی كوردستانیش خه‌باتی ژیرانه‌ی خۆیان ساز ده‌ن‌و جۆش ده‌ن له‌پێناوی به‌دیهێنانی مافه‌كانی خۆیاندا كه‌ گفتوگۆی ئیمڕۆمان شێوه‌یه‌كی ئه‌و خه‌باته‌یه‌، ڕێگه‌یه‌كه‌ به‌ره‌و به‌دیهێنانی ئامانجه‌كانی خه‌باته‌كه‌مان.
ده‌با هه‌ر شه‌كاوه‌ بێت ئاڵای نه‌ورۆزی كورد كه‌ نه‌ورۆزی رزگاری بووه‌ له‌ زوڵم‌و زۆری هه‌موو زوحاكه‌كان‌و له‌ سه‌رما‌وسۆڵی هه‌موو زستانه‌كانی سارد‌و سڕ!
ده‌با ده‌رس له‌ ئه‌فسانه‌ی مێژوویی نه‌ورۆز وه‌رگرین له‌ سازدان‌و جۆشدانی كۆمه‌ڵانی خه‌ڵكه‌ به‌ رێبه‌ری كاوه‌ی ئاسنگه‌ری هه‌موو سه‌رده‌مێك كه‌ ڕه‌نجده‌ره‌ هوشیار شۆرشگێڕه‌كانن.
دیسانه‌وه‌ نه‌ورۆزتان پیرۆز بێت‌و هه‌ر شاد‌و سه‌ربه‌رز‌و سه‌ركه‌وتووبن.


ناو:  
ئیمه‌یل:    
سه‌رنج:  

#7394
19/10/2017
ئه‌رشیف
وه‌رزش
‌ ئیتالیا مه‌ترسی گه‌وره‌ی سه‌رنه‌كه‌وتنی بۆ مۆندیال له‌سه‌ره‌ 19/10/2017
‌ رۆناڵدۆ زیندانی دەکرێت؟ 19/10/2017
زانست
‌ هه‌سارۆكه‌یه‌ك سڵاوی له‌ زه‌وی كرد و رۆیشت 19/10/2017
‌ چه‌ند خۆراكێكی گرنگ بۆ وه‌رزی پایز 19/10/2017
‌ كاریگه‌ری‌ ته‌له‌فزیۆن له‌ دروستكردنی‌ ترس لای‌ بینه‌ر 19/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP