دەقی وتاری سەرۆک کۆمار بە بۆنەی رزگارکردنی موسڵەوە
دەقی وتاری سەرۆک کۆمار بە بۆنەی رزگارکردنی موسڵەوە ‌ 13/7/2017
رۆژی 11/7/2017، سەرۆک کۆمار دکتۆر فوئاد مەعسوم وتارێکی تەلەفزیۆنیی پێشکەشکرد بە بۆنەی رزگارکردنی شاری موسڵ بە تەواوەتی لەچنگی چەتەکانی داعشی تێرۆریست. تیایدا ئازایەتی و لێوەشایی فەرماندەو ئەفسەر و سەربازانی هێزە چەکدارەکانمانی بەرز نرخاندوە، هاوکات پیرۆزبایی لە گەلی عێراق و مەرجەعیەتی ئاینیی و ناوەندەکانی روناکبیریی، فیکریی، میدیایی، سەندیکایی و کۆمەڵایەتیی کردوە لە پای بەشداریکردنی بێ وێنەیان لەم سەرکەوتنەدا کە نەوەکان شانازیی پێوە دەکەن، سوربونی عێراقی دوپاتكردەوە بۆ هەنگاونان سەرلەنوێ ئاوەدانكردنەوەی تەواوی ناوچە رزگار كراوەكانی تر، سوپاسی هاوپەیمانیی نێودەوڵەتیی و پشتیوانیی دەوڵەتانی دۆستیشی کرد لە تێكشكاندنی چەتە تێرۆریستەكانی داعشی تاوانبار، داوای كرد ئاوڕ بدرێتەوە لە خانەوادەی شەهیدان و چارەسەر كردنی بریندارەكان و پاراستنی خەڵكی مەدەنیی و ئاوارە بوەكان، ئەمەش دەقی وتارەکەیە: 

بەناوی پەروەردگاری بەخشندەو میهرەبانەوە 
ئەی گەلی عێراقی دلێر 

ئەی فەرماندەو ئەفسەر و سەبازە قارەمانەکانی هێزە چەکدارەکانمان بە هەمو پێکهاتە گورز سرەوێنەکانیانەوە، 
لە چەند رۆژی رابردودا یەکێک لە مەزنترین سەروەریی قارەمانانەی نیشتمانیتان تۆمار کرد لە مێژوی هاوچەرخی وڵات و گەلەکەمان و ناوچەکەشدا ئەوەش رزگارکردنی موسڵە بە تەواوی لە چنگی چەتەکانی داعشی تێرۆریستی تاوانبار دوای ئەوەی زیاتر لە سێ ساڵی پڕ نەهامەتیی داگیریان کردبو، پشتیوان بە خوا لە ئەنجامی قوربانیدانە زۆرو زەوەندەکانتان بۆ هەتایە دەردی سەرشۆڕیی و بەزینتان دەرخواردی دەوڵەتە درۆینە و دڕندەکەیان دا. 
ئەوەی کە زیاتر ئەم سەرکەوتنە پیرۆزە پایەدار دەکات ئەوەیە ئێوە بەیەکڕیزیی بە ئاکامتان گەیاند.. قوربانی زۆرتان پێشکەش کرد، خوێنی بەنرخ و پاکی خۆتان بەخشی.. خوێنەکانتان ئاوێزانی یەکتر کرد لە گۆڕەپانەکانی جەنگە پیرۆزەکەتاندا، بۆ بەرگریی کردن لە ئازادیی و سەروەریی و شکۆیی وڵاتەکەتان و ئایندەی نەوەکانی داهاتو، هاوکات ئایندەی مرۆڤایەتیی شکۆمەندییەکەی کە بەسوربون و ئازایەتیتان سەرسامیی و پێزانین و پشتیوانیی و هاوکاریی گەلانی جیهانتان بەدەست هێنا. 
سڵاو بۆ فەرماندە و ئەفسەر و سەرباز و جەنگاوەرانی هێزە چەکدارەکانمان، سڵاو لە لێوەشاوەیی و ئازایەتییان لە بەدیهێنانی ئەم سەرکەوتنە مێژوییە مەزنە.. کە بە قارەمانیەتی و قوربانیدانی هەمو پێکهاتەکانیان تۆمار کرا هەر لە هێزەكانی دژ بە تێرۆر و سوپا و پۆلیسی فیدراڵیی و هێزی هەوایی و فڕۆكەوانیی جەنگیی و تا دەگاتە هێزەكانی پێشمەرگە و حەشدی شەعبیی و خۆبەخشەكانی رۆڵەی عەشایر و مەدەنییەكانی موسڵ وتەواوی نەینەوا و ناوچە رزگارکراوەکان. 
پیرۆزبێت ئەی گەلی عێراقی دلێرمان پیرۆز بێت لە مەرجەعیەتی ئاینیی دانامان، لە ناوەندەکانی روناکبیریی، فیکریی، میدیایی، سەندیکایی و کۆمەڵایەتیی لە پای بەشداریکردنی بێ وێنەیان لەم سەرکەوتنەدا کە نەوەکان شانازیی پێوە دەکەن. 
گەلەکەشمان ئەم سەرکەوتنە دەپارێزێت بە ئیرادەیەکی بەهێزی لە بن نەهاتو و زیاتر و زیاتریش بەهێزی دەکات.. ئەوەش بە بەردەوام بونی لە شەڕەکەی دژی پاشماوە پەڕاگەندە بوەکانی لێرە و لەوێی چەتەکانی داعشی تێرۆریست. بێ ماندو بون زانین تا پاككردنەوەی بست بە بستی خاكی وڵاتمان لە پیسیی و لیخنییان تێكشكاندنی تەواوەتیی و یەكجارەكییان لە هەمو بەرەکاندا، بەو جۆرەی زەمینە خۆش بێت بۆ چەسپاندنی ئۆقرەیی و ئاشتیی و گەشە سەندن لە وڵاتەكەمان و سەرتاسەری ناوچەكەدا. دڵنیاین ئەم سەرکەوتنە مەزنە ئەو کاتە بە ئاکام دەگات کە تێرۆر بە یەکجارەکیی لەناوببرێت و داڵدەدەرەکانی تەفر و تونا بکرێن و تۆڕەکانیان هەموی خاپور بکرێن.. راگوێزراو و ئاوارە بوەکان بگەڕێنەوە و دەستبەجێ و بەجدیی ئاشتبونەوەی ناو کۆمەڵ بە ئاکام بگات.. بە پشتگیریکردنی ئۆقرەیی و سەرلەنوێ ئاوەدانکرنەوە بە ئاکامی خۆی دەگات. 
ئەم سەرکەوتنە مەزنە لێبڕاوانەیە گرنگیی هاوئاهەنگیی نێوان هێزە چەکدارەکانمان بەهەمو ریزەکانیانەوە لەگەڵ هاوڵاتیانیشدا دوپاتدەکاتەوە کە ئەوانیش پشت و پەنایەکی پۆڵاینی هێزە چەکدارەکانمان بوون بۆ بەرگریکرن لە عێراق وئاسایش و ئازادییەکەی. 
ئەم سەرکەوتنانە بە تایبەتیی گرنگیی تەواوکردنی بنیاتنانی هێزە چەکدارەکانمان و گەشەپێدانیان دوپات دەکاتەوە، ئەوەش ساغ دەکاتەوە کە ئۆقرەیی وڵاتەکەمان لەم قۆناغە سەختەدا پشت بەم سەرکەوتنە دەبەستێت بەوپێیەی شورایەکی پۆڵاینە بۆ پاراستنی ئازادییەکانی گەلەکەمان و دەستکەوتەکانی ئەمونەدیموکراسییەکەی و پێشکەوتنەکەی.. 
شادمانم سوپاسی تایبەتیم دەرببڕم بۆ دەوڵەتانی هاوپەیمانیی نێو دەوڵەتیی و هەمو دەوڵەتانی دۆست لە بە رامبەر ئەو پشتگیرییە گەورە و هاریکارییە بنیاتنەرانەی پێشکەشیان کردوە بۆ زامنکردنی سەرکەوتنی عێراق لە رزگارکردنی هەرچی زوتری موسڵ و تەواوی خاکەکەی لە لیخنیی تێرۆر. ئێمە بێگومانین لە بەردەوامیی پشتیوانیکردنیان لە وڵاتەکەمان لە جەنگی ئاوەدانکردنەوەی ناوچە رزگار کراوەکان و لە شەڕی بەگژاچونەوەی هەڕەشەو مەترسییەکانی فیکری تێرۆر و تەکفیریی لە ناوچەکانی تردا. سەری رێز و پێزانین بۆ شەهیدانی نەمری گەلەکەمان ئەوانەی گیانی خۆیان کردە قوربانیی لە پێناوی ئازادیی وڵاتەکەیان و رزگارکردنی گەلەکەیان و مرۆڤایەتیی لە بەڵای تێرۆر، پێویستە مەزنترین رێز لێنانیان لێ بگیرێت سەرباری بایەخدانی تایبەتیی بە خانەوادەکانیان و چارەسەرکردنی بریندارەکان و یارمەتیدانیان. لە هەمو بوارەکاندا.. و قەرەبوکردنەوەی ئەو مەدەنییانەی کە ماڵو حاڵیان روخاوە و سامانیان لەدەستداوە بە هۆی تاوانەکانی داعشەوە.. 
سۆز و میهرەبانی پەروەردگار بۆ شەهیدانی نەمرمان، چاکبونەوەی خێراش بۆ بریندارە گیان بازەکانمان. 

بەخواتان دەسپێرم


ناو:  
ئیمه‌یل:    
سه‌رنج:  

#7321
23/7/2017
ئه‌رشیف
وه‌رزش
‌ بۆڵت له‌ له‌نده‌ن به‌شداری 200 مه‌تر ناكات 23/7/2017
‌ بۆندێكی بۆ ماوه‌ی‌ 5 وه‌رز له‌گه‌ڵ چێڵسی ئیمزاكرد 23/7/2017
زانست
‌ بۆ گه‌رمای هاوین خواردنه‌وه‌ی ئاوی شله‌تێن باشه‌ 23/7/2017
‌ ته‌نه‌ ئاڵۆزه‌كانی گه‌ردوون، ئامانجی به‌ هێزترین ته‌لسكۆبی جیهانه‌ 23/7/2017
‌ دەریا: من و فۆتۆ و کامێرا هاوڕێی هەمیشەیین 21/7/2017

© 2009 KURDISTANY NWE, All RIGHTS RESERVED. | CREATED BY AVESTA GROUP