قۆناغێکی دژواری نـێوان ئــەڵمانیاو تورکیا دەستی پێکرد
قۆناغێکی دژواری نـێوان ئــەڵمانیاو تورکیا دەستی پێکرد ‌ ئامادەکردنی: بورهان ئەمین‌ 25/7/2017
لەدوای دەستگیرکردنی ژمارەیەک چالاکوانی مافەکانی مرۆڤ‌لەلایەن حکومەتی تورکیا و مەیلی ئەردۆغان بۆ تێکدانی پەیوەندیەکانی لەگەڵ ئەو وڵاتەو بەرپرسانی،ئەڵمانیا بڕیاریدا چەند ڕێوشوێنێک لەبوارەکانی بازرگانی‌وئابوری‌وگەشتوگوزار بگرێتە بەرو وەڵامی توندی حکومەتی ئاکپارتی بداتەوە.

کۆمپانیا ئەڵمانیەکان تۆمەتبار دەکات
گۆڤاری»دی تسایت»ی  ئه‌ڵمانی بڵاویكردۆتەوە کە حكومه‌تی توركیا ‌لیستێكی بە ناوی ٦٨كۆمپانیای ئه‌ڵمانیای بڵاوکردۆتەوە تۆمەتی هاوریکاریکردنی تیرۆری داونەتە پاڵ، گۆڤاره‌كه‌ نوسیەیەتی لەچەند هەفتەی رابردودا لیستەکە پێشکەش بەئۆفیسی فیدراڵی دژە تیرۆرکراوەو دەیان کۆمپانیا تۆمەتبار دەکات له‌وانه‌ هەردوو گەورە کۆمپانیای «دایمله‌روباسیف»و دەیانی تر به ‌تۆمه‌تی تێوه‌گلان لەکودەتا شکستخواردوەکەی ساڵی ڕابردوی تورکیا.

تورکیا بارەکەی ئاڵۆزترکرد
لەدوای ئەو هەنگاوەی تورکیاو لەدوای ئەوەش کە دەزگا ئەمنیەکانی ئەو وڵاتە ژماره‌یه‌ك له‌ چالاكوانانی مافه‌كانی مرۆڤی نێوده‌وڵه‌تیان ده‌ه‌ستگیركرد له‌ناویاندا یاساناسی ئه‌ڵمانی «پیته‌ر شتۆینتر» و»ئیدیل ئەیسەر» بەڕێوەبەری ڕێکخراوی لێبورنی نێودەوڵەتی ‌و ژمارەیەکی تر، ئەمانە بونە هۆی گرژتربونی پەیوەندیەکانی نێوان هەردوو وڵات‌. ئەڵمانیا کۆتایی هەفتەی ڕابردو باڵیۆزی توركیای له‌به‌رلین بانگهێشت کرد.

سیاسەتیان دەگۆڕن
لەسەر ئەمە حكومه‌تی ئه‌ڵمانیا لەزاری وتەبێژەکەیەوە ئه‌و تۆمه‌تانه‌ی توركیای بە پڕوپاگەندەوچەواشەکاری ناوزەندکرد کەبەرامبەر بە کۆمپانیاو کەسایەتیەکان دەیکاو وه‌زیری دادیش بەتوندی وەڵامی ئەو وڵاتەی دایەوەو ووتی:  پێویستە لە ئاست ئەم ڕەفتارانە توندبین و دەستەوەستان نەبین، بە هەمانشێوە «زیگمار جوبرائیل»ی وەزیری دەرەوە پێی وابو، کەدەبێت بەتوندی وەڵامی تورکیا بدرێتەوەو ئیجرائاتی بەرامبەر بکرێت،جگەلەوەش وڵاتەکەی بەسیاسەتی خۆی لەبەرامبەر تورکیادا دەچێتەوەو گۆڕانکاری ڕیشەیی دەکات،هەرسەبارەت بەوە «ئەنجێلا مێرکل»یش دوپاتیکردەوە کە گۆڕینی سیاسەتی وڵاتەکەی زۆر پێوستە 

گەشتیارانی ئەڵمان ناچنە تورکیا
وەزیری دەرەوەی ئەڵمانیا ڕاشیگەیاند: کەناتوانێت لەسەلامەتی هاوڵاتیانی خۆی دڵنیابێت لەو کاتەی کەدەچنە ناوچە گەشتوگوزاریەکانی تورکیا چونکە ئەو وڵاتە دەستی داوەتە هەڵمەتێکی بەر فراوانی ڕەشبگیری‌وکەس ناپارێزێت،ئەمەش ئەوە دەگەیەنێت کە ئیدی نایانەوێت هاوڵاتیانی ئەڵمانی بچنە تورکیاو لەوێ گەشتوگوزار بکەن،لەمەدا تورکیا زیانێکی یەکجار گەورەی بەر دەکەوێ چونکە ئەڵمانەکان لەڕیز بەندی هاوڵاتیانی ئەو وڵاتانەی کە سەردانی تورکیا دەکەن یەکەمن و لەساڵی ٢٠١٥ دا ٥،٦ ملیۆن گەشتیاری ئەڵمان چوبونە تورکیا،بەهۆی نالەباری وەزعی ئەمنی ساڵی پار ژمارەکە بوە ٣ ملیۆن و بەهۆی ئەو بارەی ئێستاش ئەو ژمارەیە زۆر کەمدەبێتەوەو کەرتی گەشتیاری تورکی،گورزێکی کوشندەی بەردەکەوێت، نەبونی گرەنتی بۆ سەلامەتی ژیانی گەشتیارانی ئەڵمان زیانی ملیارەها یۆرۆ بە تورکیا دەدات.

بەرهەمهێنانی ئەڵمانیا ئەوەستێندرێت
هەر لەم چوارچێوەیەدا ئەڵمانیا هۆشداری داوەتە کۆمپانیاو دەوڵەمەندەکانی خۆی کەچیدی چالاکی و بەرهەمهێنانی خۆیان لەو وڵاتە  بوەستێنن‌و تورکیا بۆ بەرهەمهێنەرانی ئەڵمانی شوێنێکی شیاو ئەمین نییە، بەپێچەوانەوە حکومەت هیچ گرەنتیەکیان ناداتێ لە سەلامەتی و ئارامی  بازرگانی نێوان هەردوولادا، جێی باسە ساڵی ڕابردوو بەرهەمهێنانی ئەڵمانی بۆ تورکیا ٢٠،٦ ملیار یۆرۆبوە، تورکیا لەوەش زیانێکی بێ ئەندازە دەکات.

یەکێتی ئەوروپاش هاوکاریە ماددەیەکانی لێ دەبڕێت
ئەڵمانیاهەڕەشەی بڕینی ئەو هاوکاریە داراییە دەکات که‌ئەوروپا ساڵانە دەیبە خشێتە تورکیا لە چوارچێوەی دانوستانی وەرگیرانی لەیەکێتی ئەوروپا کە لەماوەی ٢٠١٤ تا ٢٠١٠ بڕەکەی ٤،٤ ملیار یۆرۆیەو ئەگەر ئەڵمانیا ئەو پێشنیازە بخاتە بەرنامەی کۆبونەوەکانی یەکێتیەکە سەردەگرێ وئەو یارمەتی‌و هاوکاریەی لێ دەبڕن، لەسەر ئەمەش کۆمسیۆنی ئەوروپا ئاماژەی بەوەدا کە ئەم بابەتە دیراسە دەکرێ و بڕیاری یاسایی لەبارەوە دەدرێت،بۆیە لەمەشدا زیانی زۆری پێ دەگاو دەرگاکانیشی لەسەر دادەخرێن.

چەکیشی بۆ نانێرن
بەپێی هەواڵیکی ڕۆژنامەی بێڵدیش بێت، ئەڵمانیا هەموو پڕۆژەکانی پڕچەککردنی تورکیاو هەناردە کردنی چەکو جبەخانەکانی ڕاگرتوەو هەموو ئەو ڕێککەتننامانەشی راگرتوە کەبەپێی ئەڵمانیا چەک بە تورکیا دەفرۆشێت،حکومەتی ئەڵمانیا لەزاری وتەبێژی وەزارەتی ئابوریەوە ئەو هەواڵەی پشتڕاستکردەوەو ڕایگەیاند، کەوڵاتەکەی هەموو داواکاریەکانی تورکیا بۆکڕینی چەک دەوەستێنێ .

ئەڵمانیا مۆڵگەی تیرۆریستانە
لەکاردانەوەی تورکیاش» مەولود جاوش ئۆغلۆ»ی وەزیری دەرەوە دیسانەوە ئەڵمانیا بەوە تۆمەتبار کرد کە بۆتە جێی مۆڵگەی تیرۆریستانی وەک پەکەکەو گروپی فەتحوڵلا گویلەن و ڕایگەیاند: کە تورکیا قبوڵی ناکات، هەروەها «ئیبراهیم قالین» ی وتەبێژی ئەردۆغان ووتی: ئەڵمانیا دەیەوێت دادگای تورکیا ببێتە دەزگایەکی سەر بەوان و بڕیارو ڕاسپاردەکان لەوانەوە وەرگرن.

ئەردۆغانیش وەڵامی دایەوە
دوای ئەویش لەبەرامبەر قسەی لێدوانی ئەڵمانیدا ڕۆژی هەینی «رەجەب تەیب ئەردۆغان»هەمووجۆرە هەڕەشەیەکی ڕەتکردەوەو ڕایگەیاند کەوڵاتەکەی وەک ئەڵمانیا ئارامەو مەترسی تێدانییە، حکومەتیش زەمانەتی پاراستنی هەموو کۆمپانیاکان دەکاو بەرپرسانی ئەڵمانیا ناتوانن بەو لێدوانانەیان ناوی وڵاتەکەی بزڕێنن و ناشیرینی بکەن،ووتیشی: کەداداگاکانیان سەربەخۆن و ئەڵمانیا بۆی نییە کار لە بڕیارەکانیان بکات.

وەک بارمتە بەکاریان دێنێت
لەمانگەکانی ڕابردودا تورکیا ٩ ئەڵمانی خستۆتە زیندانەوە کە چواریان بەڕەگەز تورکن لەنێوانیاندا «دێنیز یوجیل» پەیامنێری ڕۆژنامەی»دی ڤێڵت»ەو بێتاوان ماوەی پێنج مانگە لە زیندانێکی  تاکە کەسیدایە، میدیاکان باس لەوە دەکەن کە تورکیا بۆیە ئەوکەسایەتیانەی زیندانی کردوەو ئازادیان ناکات دەیەوێت بەو ئەفسەرانە بیانگۆڕێتەوە کە ماوەکانی ڕابردو لەترسی تۆمەتەکانی حکومەت خۆیان رادەستی ئەڵمانیاکردوداوای مافی پەنابەرێتیان کردبو، لەسەر ئەمە «دیڤێڵت» ئەو ڕاستیەی دوپاتکردۆتەوە کە ئەردۆغان پیشنیازی ئازادکردنی یۆجێلی کردوە لەبەرامبەر ڕادەستکردنی دوو گەورەی ئەفسەری پەنابەر.

تورکیا کەوتۆتە بەرەی دوژمنداری لەگەڵ ڕۆژئاوا 
لەسەر ئەو ڕەفتارانەی تورکیاو ئەو هەڵسوکەوتانەی میدیای ئەڵمانیا پێی وایە،  حکومەتی تورکیا کەوتۆتە بەرەی دوژمنداری لەگەڵ ڕۆژئاوا،لەمبارەیەوە ڕۆژنامەی «بەرلینەزایتنۆگ» نوسیەتی: ئەردۆغان بەو سیاسەتەی ڕۆژ بەڕۆژ نەک هەر لەئەوروپا دور دەکەوێتەوە بەڵکو دەبێتە نەیار ئەگەر دەیەوێت بەو شێوازە تواناو هێزودەسەڵاتی پتەوی خۆی دەربخات ئەوا بەو ململانێیە گەورەترین  زیان بەخۆی ووڵاتەکەی دەدات.


ناو:  
ئیمه‌یل:    
سه‌رنج:  

#7373
26/9/2017
ئه‌رشیف
وه‌رزش
‌ هه‌ڵبژارده‌ی‌ ئه‌وروپا جامی لیڤه‌ری برده‌وه‌ 26/9/2017
‌ پێگه‌ی‌ فوتباڵ لیكس ورده‌كاری بۆندی نێیمار بڵاوده‌كاته‌وه‌ 26/9/2017
زانست
‌ پاسێكی كارەبایی ژمارەی پێوانەیی جیهانی تێكشكاند ئایندە بۆ ئۆتۆمبیلی كارەباییە 25/9/2017
‌ وریای سوپەر مەلاریا بن 25/9/2017
‌ دیزاینەرە گەورەكەی ئەپڵ 25/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP