مێرکل تورکـیـای بـێ هیواکرد
مێرکل تورکـیـای بـێ هیواکرد ‌ ئامادەکردنی: بورهان ئەمین‌ 7/9/2017
لەڕوبەرووبونەوەیەکی تەلەفزیۆنیدا لەمیانی هەڵمەتی هەڵبژاردنی پەرلەمانی ئەڵمانیا کەکۆتایی هەفتەی ڕابردوو لەنێوان ئەنجێلامێرکل ڕاوێژکاری ئێستای ئەڵمانیاوکاندیدی هاوپەیمانی دیموکراتی کریستیان بۆهەمان پۆست لەگەڵ»مارتن شۆڵز» سەرۆکی پارتی سۆسیالدیموکرات و کاندیدی ئەو پارتە بۆ پۆستی ڕاوێژکار، مێركڵ ڕایگەیاند: توركیاهەرگیز نابێتە ئەندام لەناو یەكێتی ئەوروپا،ئەوەش لەو کاتەدایە كەئاستی ئاڵۆزی و ناكۆكیەكان لەنێوان بەرلین و ئەنقەرە لە زیادبووندایەو گەیشتۆتە لوتکە.

مێركڵ ئەو پرسیارەی ورووژاند 
لەو دیبه‌یته‌دا دۆسیەی پەیوەندی نێوان ئەڵمانیاو تورکیا لەلایەک و ئەوروپا لەلایەکی تر پانتاییەکی زۆری داگیرکردبوو، مێرکل ووتی: من وای نابینم كەپەیوەندی توركیا بە یەكێتی ئەوروپابەڕێوەبێت، هەرگیز باوەڕ ناکەم كە ڕۆژێك ئەوە ڕووبدا ، مێركڵ ئەو پرسیارەی وروژاند کە ئایا کێ دەرگای دانوستان وگفتوگۆکانی داخستوەوهۆکارەکان کێن وچین، بەهەمانشێوە مارتین شۆڵتزی ڕکابەرەکەشی لەمێرکل توندتر باسی لەتورکیاو سیاسەتی ڕەجەب تەیب ئەردۆغانی سەرۆک و ئاکپارتی کرد،کەهەنگاو دەنێن تاوڵاتەکە بەرەو ڕژێمێكی تۆتالیتاری و دیكتاتۆری بەرن .

تورکیا به‌رپرسه‌
لەلایەکی تریشەوە کۆمسیۆنی ئەوروپی ئەندامبونی تورکیا لەناو ڕێکخراوی یەکێتی ئەوروپا بەدوور دەزانێت و ئەو پرۆسەیە چۆنیەتی مامەڵەی تورکیا لەگەڵ دۆسیەکانی مافی مرۆڤ و دیموکراسی و ئازادیەکان دەبەستێتەوە، وتەبێژی کۆمسیۆنەکە لە كۆنگرەیەکی رۆژنامەنووسیدا ،توركیای وەک سەبەبکاری دورکەوتنەوە لەبنەماکانی دروستبون و ئەندامبونی یەکێتیەکە وەسفکرد. هەروەها جەختیشی لەوەکردەوە کە هەر بڕیارێك بەکردار دەربچێت لەبارەی كوتایهێنان بەگفتوگۆکان کەماوەیەکی زۆرە لەلایەن یەکێتی ئەوروپاوە هەڵپەسێندراوە پێویستی بەڕەزامەندی هەر ٢٨ وڵاتە ئەندامەکە هەیەو پێشدەچێت بڕیارێکی لەمجۆرە دەربچێت چونکە ئەو وڵاتە هیچ سەرەداوێکی نەهێشتۆتەوەو بێ هیوای کردوین.

تورکیا نیگه‌رانه‌
لەکاردانەوەی ئەو لێدوان و ڕاگەیاندنانەشدا،وتەبێژی‌ سەرۆكایەتی‌ كۆماری‌ توركیا ڕایگەیاند وڵاتەكەی بەوپەڕی نیگەرانییەوە لەهەڵوێستەكانی ئەڵمانیا دەڕوانێت‌و پێیوایە كە سنوربەزاندنێکی ئاشکرایەو دەبێ بوەستێندرێت، تورکیا ڕەخنەی توندی  لە «مارتن شۆڵتز وئەنگێلا مێركڵ»گرت و سەرۆکایەتی ڕایگەیاند بۆیە هێرشیانكردۆتە سەر وڵاتەکەو سەرۆکەکەی تاسەرەنج لەسەر ئەو كێشانە لابدەن، كەلەئەڵمانیا ڕودەدەن  بۆنمونە ‌بەرزبونەوەی‌ ئاستی‌ جیاخوازی لەناو کۆمەڵگەکەیان.

سنوریان بەزاندووە
«ئیبراهیم كاڵان»وتەبێژی‌ سەرۆكایەتی‌ كۆمار بەڕۆژنامەنوسانی ڕاگەیاند: هێرشەكانی مێركڵ‌و شۆڵتز بۆسەر توركیاوسەرۆكەكەی ناڕەوایەو مایەی قبوڵكردن نییە،ئاماژەی بەوەشكردكە ئەڵمانیابەرانبەر توركیا‌وسەرۆكەكەی سنوریان بەزاندوەو هاوكات پشتگیری لەتیرۆریش دەكەن،ناوبراو ئەوەشی خستەڕوو كە پۆپۆلیستی‌ لە سیاسەتی‌ ئەڵمانیادا،زیاتر گەشەبەڕەگەزپەرەستی‌ وجیاخوازی‌ لەو وڵاتە دەدات و ئەوان دەزانن کە تورکیاچەندە لەدژی ئەوسیاسەتەیانە،بۆیە دەیانەوێ زومی کامیراکان لەسەر خۆیان لابەرن و بیخەنه‌ سەر تورکیا.

هەنگاونان بەرەو دیكتاتۆری 
چەندین ساڵە وتوێژەكانی توركیا بەمەبەستی بەئەندام بوون لە یەكێتی ئەروپا هەڵپەسێردراوە،بەهۆی چەندین كێشەوئاستەنگ لەبەردەم پرۆسەکەدا، لەدیارترینان تۆمەتباركردنی «ڕەجەب تەیب ئەردۆغان»لەلایەن زۆربەی ئەوروپیەکان بەهەنگاونان بەرەو ڕژێمێكی دیكتاتۆری. 

هۆکاری کێشه‌کان
شایانی باسە پەیوەندییەکانی ئەنقەرەو بەرلین لەئاستێکی گرژو زۆرخراپدایە،بەم دواییە زنجیرەیەک ئاڵۆزی دیکە ڕوویاندا،سەرەتای ناکۆکییەکان دەگەڕێتەوە بۆ ئەو کاتەی کەپەرلەمانی ئەڵمانیا بەزۆرینەی دەنگ و بەبڕیاری هەموو لیستەکانی کارەساتی کۆشتوبڕی ئەرمەنیەکانی لەساڵی١٩١٢کەبەدەستی عوسمانیەکانەوە کوژران،بەجینۆسایدناساند، تورکیا یەکسەر ئیدانەیکردو زۆر پێی سەخڵەت بوو،لەدوای کودەتاشکستخواردووەکەی ساڵی ڕابردووش ژمارەیەکی ئەفسەری پلەدارچوونە ئەڵمانیاو داوای مافی پەنابەرێتیان کرد، هەرچەندە تورکیا داوای ڕادەستکردنەوەی کردن،بەڵام ئەو داوایە ڕەتکرایەوەو ئێستا ئەوانە لەئەڵمانیاوەک پەنابەردەژین. لەماوەی دواییشدا ئەنقەرە ڕێگری کرد لەسەردانی پەرلەمانتارە ئەڵمانییەکان بۆ بنکەی سەربازیی ئینجەریک کە ژمارەیەک سەربازیی ئەڵمانی لێبو،بەو هۆیەوە بەرلین سەربازەکانی بۆئوردن گواستەوە،دواتریش گرتن و زیندانیکردنی چالاکوان و ڕۆژنامەنوسانی ئەڵمانی لەتورکیابەتۆمەتی هاوکاریکردنی تیرۆر، حکومەتی مێرکلی نیگەران کردوە،تورکیاش هەمیشە ئەڵمانیابە داڵدەدانی تیرۆریستان تۆمەتباردەکات بەو مانایەی کەژمارەیەکی زۆرلایەنگرانی فەتحوڵلا گویلەن و هەوادارانی پارتی کرێکارانی کوردستان تۆمەتبارکردوە و چەند جارێک حکومەتی ئاکپارتی داوای ڕادەستکردنەوەی کردوون، بەڵام بەرلین هەرگیز نەچۆتە ژیر باری داواکانی تورکیا.


ناو:  
ئیمه‌یل:    
سه‌رنج:  

#7367
19/9/2017
ئه‌رشیف
وه‌رزش
‌ ئایا شه‌ڕی ئه‌ستێره‌كان له‌ پاریس سانجێرمان ده‌ستیپێكرد؟ 19/9/2017
‌ نه‌فرەتی خیتافی به‌رده‌وامه‌ 19/9/2017
زانست
‌ كاسینی شۆڕشێك له‌ زانیاری ده‌رباره‌ی زوحه‌ل 19/9/2017
‌ رۆبۆته‌كان ده‌بنه‌ جووتیار 19/9/2017
‌ لە هەر ١٠ كەسێك، یەكێكیان خواردنی پێویستی نییە 18/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP