محەمەد كەریم رۆمانی(شەرم)ی سەلمان روشدی دەكات بە كوردی
محەمەد كەریم رۆمانی(شەرم)ی سەلمان روشدی دەكات بە كوردی ‌ 13/9/2017
ئەوەی ئاشنای ئەدەبی سەلمان روشدی بێت دەزانێت ئەم رۆماننووسە سەربەگۆبەندە خاوەنی سیانییەكی زۆر بەناوبانگە كە بریتین لە هەرسێ رۆمانی (مناڵانی نیوەشەو، شەرم، ئایەتە شەیتانییەكان). لەم دواییانەشدا رەخنەگران و خوێنەرانی جدی زۆر باسی رۆمانی (شالیماری لێبووك) دەكەن كە لە دوای فەتواكەی ئیمام خومەینی نووسیوێتی و شاژنی بەریتانیا لەسەر ئەم رۆمانەی خەڵاتی (شاسوار)ی پێبەخشیوە كە خەڵاتێكی زۆر گرنگە. ئەگەرچی بەلای ئەوانەوە كە بە باشی ئاشنای ئەدەبی سەلمان روشدی نین، ئەم رۆماننووسە بە تایبەتی لە دوای فەتواكەوە گەورە كراوە، بەڵام ئەمە ناحەقییەكی گەورەیە بەرامبەر سەلمان روشدی چونكە ئەم رۆماننووسە بەڕاستی نووسەرێكی داهێنەرە و نزیكەی بیست كتێبی هەیە بە رۆمان و كۆمەڵەچیرۆكەوە و چەندان خەڵاتی ئەدەبیی گرنگی وەرگرتووە.
رۆمانی شەرم، رۆمانێكی جوانی سیحرئامێزە و سەلمان روشدی لەم رۆمانەدا باسی پاكستان و سەردەمی دەسەڵاتی زولفەقار عەلی بۆتۆ و لەسەر كالابردنی دەكات، هەروەها باسی خانمی شەهیدی دەستی تیرۆر بێنەزیر بۆتۆش دەكات كە چەندە دڵسۆز و عاشقی باوكێتی و چۆن پشتیوانیی دەكات، لە پاڵ ئەمانەشدا باسی چنگی رەشی دیكتاتۆرییەت و تاوانە قێزەونەكانی دەكات لەو وڵاتەدا، جگەلەوەش چیرۆكی سەرنجڕاكێشی سەفیە زینوبیاش دەگێڕێتەوە كە كچێكی شێتۆكەی عەقڵ سووكە و توانایەكی سەرسووڕهێنەری هەیە لە كوشتن و ملپەڕاندنی ئاژەڵ و مرۆڤدا، دواجار روشدی سەرنجمان بەرەو  رەوەمناڵ و مناڵ زۆری دەبات لە پاكستان.. چیرۆكنووس و وەرگێڕ محەمەد كەریم سەبارەت بە وەرگێڕانی ئەم رۆمانە دەڵێت: 
(ئێستا وەرگێڕانی رۆمانی شەرم لە كۆتاییدایە و دوای پیاچوونەوەی بێگومان دەكەوێتە بەردیدی خوێنەران و عاشقانی سەلمان روشدی، من تەنیا لە فارسییەوە تەرجەمە دەكەم و لێرەشدا سەرچاوەی سەرەكیم دەقی رۆمانی (شرم)ە بە فارسی كە (مهدی سحابی) تەرجەمەی كردووە، بەڵام دەقی ئینگلیزی و عەرەبی ئەم رۆمانەشم لەبەردەستایە و هەرچاوێكم كردووە بە سێ چاو بۆ ئەوەی وەرگێڕانەكەم لە ئاستی گەورەیی سەلمان روشدیدا بێت و دەقێكی ناوازەی كوردی لێهەڵهێنجم، دیارە ئەوانەی وەرگێڕن دەزانن ئەم كارە چەند قورس و تاقەتپڕوكێنە، بەڵام لەوە دەچێت من فرچكم بە كاری قورس و سەختەوە گرتبێت، چونكە هەموو جارێ وا دەڵێم و دیسان دەست دەدەمەوە كارێكی قورستر، چونكە باوەڕم بە خۆم و توانای خۆم پتەوە و بەهیچ لەق نابێت، دڵنیام ئەمجارە سەلمان روشدی بە خوێنەری كورد ئاشنا دەكەم وەها خۆشەویستی دەكەم كتێبەكەی لە ئامێز بگرن، ئەگەر مەرگ لە باڵم نەدات، هێمن وتەنی: «گەر گلاشم كوردەواری و ئێوە خۆش!»   
شایانی باسە وەرگێڕانی شەرم لە لایەن محەمەد كەریم-ەوە دەبێتە دووەم كتێبی سەلمان روشدی كە بۆ زمانی كوردی وەردەگێڕدرێ. ساڵانێك بەر لە ئێستاش ئامانج عەزیز كەندی كتێبی -هارون و چیرۆكی دەریا-ی چاپ و بڵاوكردەوە، كە چیرۆكێكی درێژی سەلمان روشدییە.


ناو:  
ئیمه‌یل:    
سه‌رنج:  

#7372
25/9/2017
ئه‌رشیف
وه‌رزش
‌ پاڵێوراوانی خه‌ڵاته‌كانی فیفا زه‌ بێسته‌كان به‌ بردنه‌وه‌ی جام و نازناو دیاریی ده‌كرێن یان ئاستی هونه‌ری؟ 25/9/2017
‌ بارسێلۆنا بۆندی چه‌ند یاریزانێكی نوێ ده‌كاته‌وه‌ 24/9/2017
زانست
‌ پاسێكی كارەبایی ژمارەی پێوانەیی جیهانی تێكشكاند ئایندە بۆ ئۆتۆمبیلی كارەباییە 25/9/2017
‌ وریای سوپەر مەلاریا بن 25/9/2017
‌ دیزاینەرە گەورەكەی ئەپڵ 25/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP