له‌ناو رووناكیی‌ مێژوودا
ئیبراهیم ئه‌حمه‌د له‌ناو رووناكیی‌ مێژوودا ‌ 9/8/2017
مه‌حمود مه‌لا عزه‌ت
*له‌چله‌ی‌ دواكۆچی‌ مامۆستا ئیبراهیم ئه‌حمه‌د-دا, برای‌ خۆشه‌ویستم دكتۆر كه‌مال فوئاد ئاگاداری‌ كردم كه‌ یه‌كێك له‌و كه‌سانه‌ی‌ بۆ دانیشته‌كانی‌ ئه‌و چله‌یه‌ ده‌ستنیشانكراوه‌ كه‌ قسه‌ له‌سه‌ر لایه‌نی‌ سیاسیی‌ ‌و حزبیی‌ مامۆستا بكات، به‌نده‌یه‌.. منیش به‌خۆشحاڵییه‌وه‌ داواكه‌م قبووڵكرد, هێنده‌ی‌ بۆ ئه‌و ماوه‌ دیاریكراوه‌ گونجا، باسێكی‌ كورت ‌و پوختم پێشكه‌ش به‌ئاماده‌بووان كرد كه‌ شیاو بێت بۆ بۆنه‌یه‌كی‌ واو بۆ پیاوێكی‌ گه‌وره‌ و رابه‌رێكی‌ وامه‌زن, كه‌نزیك به‌حه‌فتا ساڵ‌ له‌ته‌مه‌نی‌ پڕ له‌خه‌بات ‌و به‌هره‌ و به‌رهه‌می‌ بۆ نه‌ته‌وه‌كه‌ی‌ ته‌رخانكرد و به‌سامانی‌ كاری‌ سیاسی‌ ‌و نووسین ‌و شیعر و چیرۆك ‌و رۆژنامه‌گه‌ریی‌ نه‌ته‌وه‌كه‌مانی‌ زۆر ده‌وڵه‌مه‌ند كرد.
*لێره‌شدا له‌ بۆنه‌ی‌ یادی‌ دوو ساڵه‌ی‌ كۆچه‌كه‌یدا و له‌سه‌ر داوای‌ كوردستانی‌ نوێ‌, له‌ڕێگه‌ی‌ مامۆستا محه‌مه‌د نوری‌ تۆفیق-ه‌وه‌ كه‌سه‌رپه‌رشتی‌ بیره‌وه‌رییه‌كه‌ ده‌كات، هه‌وڵ‌ ده‌ده‌م زیاتر له‌و دوو لایه‌نه‌ی‌ ژیانی‌ ئیبراهیم ئه‌حمه‌د، رووناكی‌ بخه‌مه‌سه‌ر ویستگه‌ گرنگ ‌و رۆڵه‌ دیارو پرشنگداره‌كانی‌، هه‌رچه‌نده‌ زه‌حمه‌ته‌ له‌ ده‌رفه‌تێكی‌ واو له‌سه‌ر لاپه‌ڕه‌ی‌ رۆژنامه‌ بتوانرێت ئه‌و كاره‌ هه‌قی‌ خۆی‌ بدرێتێ‌.. بۆیه‌ ئه‌م باسانه‌، زه‌مینه‌‌و پێشه‌كییه‌ك ده‌بێت بۆ لێكۆڵینه‌وه‌یه‌كی‌ هه‌مه‌لایه‌نه‌و درێژ.
هه‌رچه‌نده‌ باسه‌كه‌ هه‌ر له‌ڕۆژنامه‌دایه‌, به‌ڵام به‌پێی‌ دابونه‌ریتی‌ رۆژنامه‌گه‌ریی‌ ‌و له‌به‌ر خسوسیه‌تی‌ نووسینی‌ ئاسایی‌ رۆژنامه‌، كه‌ ئه‌م جۆرانه‌ له‌خۆی‌ ناگرێت، چونكه‌ له‌ نووسینی‌ ئاسایی‌ سه‌ر لاپه‌ڕه‌ی‌ رۆژنامه‌ درێژتر ده‌بێت، لێره‌دا مه‌به‌ستم له‌نووسینی‌ رۆژنامه‌یه‌ به‌گشتی‌، نه‌ك هه‌ر لای‌ خۆمان كه‌ گه‌لێك جار نووسینی‌ دوور و درێژ و به‌ئه‌ڵقه‌ ده‌گرێته‌ خۆی‌، ئه‌م دیارده‌یه‌ی‌ كه‌ كه‌متر له‌رۆژنامه‌كانی‌ ئه‌وروپادا ده‌رده‌كه‌وێت، چونكه‌ زیاتر رۆژنامه‌ كاری‌ هه‌واڵ‌ ‌و باسوخواسی‌ رۆژه‌، نه‌ك ئه‌و باسانه‌ی‌ كه‌گۆڤار ‌و كتێب ده‌یانگرنه‌ خۆیان، له‌گه‌ڵ‌ ئه‌وه‌شدا هه‌وڵده‌ده‌م كه‌ باسه‌كه‌ جۆرێ‌ له‌ڕێبازی‌ (Narrative article) به‌خۆیه‌وه‌ بگرێت, كه‌تێیدا‌و له‌نووسیندا نووسه‌ر ده‌توانێت له‌باسه‌ گشتی‌ ‌و سه‌ره‌كییه‌كانه‌وه‌ بچێـته‌ ناو باسه‌ تایبه‌تی‌‌و خسڵه‌ت نه‌زعه‌ی‌ ئینسانی‌‌و ورده‌كاری‌ ‌و درێژه‌كانه‌وه‌…تاد، بێ‌ ئه‌وه‌ی‌ بمه‌وێ‌ دوورو درێژ بێت.

رابه‌ری‌ رووناكبیری‌ ‌و خه‌بات
*ناوو ناوبانگی‌ شه‌خسییه‌ته‌ ناسراوه‌كانی‌ جیهان، زۆربه‌ی‌ هه‌ره‌ زۆریان له‌كارێكی‌ داهێنه‌رانه‌ی‌ مێژووییدا ده‌بنه‌ خاوه‌نی‌ ئه‌و پله‌وپایه‌یه‌ و خه‌ڵاته‌ به‌نێوبانگه‌كان وه‌رده‌گرن‌و لاپه‌ڕه‌كانی‌ مێژوو له‌ئامێزیان ده‌گرن، ده‌بنه‌ ره‌مزو كه‌سێتییه‌كی‌ ده‌ركه‌وتووی‌ ئه‌وتۆ له‌ناو میلله‌تی‌ خۆیاندا, كه‌به‌رده‌وام له‌یاد و بۆنه‌كاندا به‌سه‌ربكرێنه‌وه‌ وه‌ك هێمای‌ سه‌ركه‌وتن‌و پێشكه‌وتن ‌و مرۆڤپه‌روه‌ریی‌.
هه‌رچه‌نده‌ ئه‌م شه‌خسییه‌ته‌ی‌ ئێمه‌، خه‌ڵاته‌ به‌ناوبانگه‌كانی‌ وه‌ك خه‌ڵاتـی‌ نۆبلی‌ وه‌رنه‌گرت، وه‌ك زانا و شه‌خسییه‌ته‌ گه‌وره‌ و به‌ناوبانگه‌كانی‌ نه‌ته‌وه‌ رزگاربووه‌ خاوه‌ن ده‌وڵه‌ته‌كان له‌به‌ر گه‌لێك هۆی‌ زانراو، كه‌هه‌ره‌ سه‌ره‌كییه‌كانی‌ كورد بوون بوو، رۆڵه‌ی‌ میلله‌تێكی‌ چه‌وساوه‌و دابه‌شكراو بوو, كه‌ تاسه‌رده‌مێكی‌ زۆر نزیك لای‌ زۆر له‌ گه‌لانی‌ دنیا نه‌ناسراو بوو، پشتگوێ‌ خرابوو، ته‌نانه‌ت ده‌نگی‌ زوڵم ‌و زۆرو كۆمه‌ڵكوژیی‌ نه‌ده‌بیسترا.
له‌گه‌ڵ‌ ئه‌وانه‌شدا برایم ئه‌حمه‌د، له‌ناو میلله‌تی‌ خۆیدا له‌هه‌موو پارچه‌كانی‌ كوردستاندا، رابه‌ری‌ رووناكبیری‌‌و خه‌بات بوو، له‌ناو میلله‌تانی‌ برادا، عه‌ره‌ب ‌و فارس ‌و تورك ‌و میلله‌تانی‌ تری‌ رۆژهه‌ڵات، له‌ناو زۆر له‌سیاسی‌ ‌و رۆژنامه‌نووس ‌و په‌رله‌مانتار و لێپرسراوانی‌ حزبی‌ زۆر له‌وڵاتانی‌ تری‌ ئه‌وروپا‌و ئه‌مریكاو جیهاندا ناسراو بوو، جێگه‌ی‌ تایبه‌تی‌ خۆی‌ هه‌بوو، هه‌م وه‌ك رابه‌رێكی‌ گه‌وره‌ی‌ كوردایه‌تی‌ ‌و هه‌م وه‌ك چیرۆك ‌و رۆماننووس ‌و شاعیر ‌و نووسه‌ر‌و رۆژنامه‌وان ‌و وه‌ك مرۆڤ دۆستێكی‌ ئه‌وتۆش, كه‌ له‌ناو گه‌رمه‌ی‌ شه‌ڕی‌ له‌ناوبردن ‌و كۆمه‌ڵكوژیی‌ خه‌ڵكی‌ كورددا، ئه‌و ئاڵاهه‌ڵگری‌ برایه‌تی‌ ‌و هاوسانی‌ ‌و ئازادیی‌ بێت.
هه‌رچه‌نده‌ برایم ئه‌حمه‌د، له‌سه‌ره‌تای‌ ژیانی‌ سیاسیی‌ ‌و رووناكبیریدا، وه‌ك هانده‌رو رۆڵبینه‌ر له‌شه‌ڕی‌ به‌رده‌ركی‌ سه‌را, كه‌ به‌ڕاپه‌ڕینی‌ شه‌شی‌ ره‌شی‌ ئه‌یلوول ناوده‌برێت, وه‌ك پارێزه‌ر، نووسه‌ری‌ نامیلكه‌ی‌ (العرب والاكراد-1937)‌و ئینجا به‌گۆڤاری‌ گه‌لاوێژ (1939-1949) ‌و لێپرسراوی‌ لقی‌ (ژ.ك) له‌كوردستانی‌ عیراق، به‌حاكمی‌‌و به‌رگریكردن له‌جوتیاران. له‌ناو حزبه‌ كوردی‌ ‌و كوردستانی‌ ‌و عیراقییه‌كاندا ناوێكی‌ دیاری‌ سه‌رشانۆی‌ خه‌بات ‌و سیاسییه‌كی‌ دیاری‌ ناو رووناكبیر و تێكۆشه‌ران بوو.
به‌ڵام بۆ به‌نده‌‌و خه‌ڵكی‌ تری‌ ئاسایی‌، رووداوه‌كه‌ی‌ ساڵی‌ 1954 كه‌ له‌سه‌ر به‌رگریكردن له‌جوتیار‌و وه‌ك پارێزه‌ری‌ ئه‌وان ‌و پشتیوانی‌ هه‌ژاران، له‌دادگا له‌ڕووی‌ یاسایی‌ ‌و مافناسییه‌وه‌ به‌رگری‌ لێده‌كردن. ئه‌وه‌ لای‌ به‌نده‌ سه‌ره‌تای‌ ناوبیستنی‌ بوو، ئه‌و كاته‌ له‌پۆلی‌ دووی‌ ناوه‌ندیی‌ سلێمانی‌ بووم, رووداوێكی‌ تری‌ گرنگی‌ هه‌مان ساڵ‌ (ئه‌گه‌ر باش له‌زه‌ینمدا مابێت)، هه‌ڵبژاردنه‌كه‌ی‌ ئه‌و ساڵه‌ بوو كه‌ مامۆستا برایم وه‌ك نوێنه‌ری‌ خه‌ڵكی‌ شار پاڵێوراو تا ئه‌م دواییه‌ش ناوه‌كه‌ی‌ له‌سه‌ر پایه‌ و دیواری‌ خانوو ‌و دوكانی‌ سه‌رشه‌قامه‌كان مابوو, كه‌نووسرابوو: «هه‌ڵبژێرن نوێنه‌رانی‌ گه‌ل ئیبراهیم ئه‌حمه‌د و مه‌عروف به‌رزنجی‌».

سه‌رقافڵه‌ی‌ كاروانی‌ كوردایه‌تی‌
مامۆستا برایم ئه‌حمه‌د له‌هه‌ریه‌كه‌ له‌لایه‌نه‌كانی‌ ژیانی‌ سیاسی‌ ‌و دیپلۆماسیی‌، حزبایه‌تی‌‌و كاری‌ فیكری‌ ‌و رێكخستن ‌و تیۆری‌، رۆژنامه‌گه‌ریی‌، شاعیری‌ چیرۆك ‌و رۆماننووسیی‌، نووسه‌ری‌، زمانه‌وانی‌ ‌و ره‌وانبێژی‌، یاساناسی‌، ئه‌ستێره‌یه‌كی‌ گه‌شی‌ ئاسمانی‌ كورده‌واریی‌ ‌و سیاسییه‌كی‌ گه‌وره‌ی‌ به‌توانا و رابه‌رێكی‌ گه‌وره‌ی‌ كوردایه‌تی‌ ‌و رێبازی‌ كوردستانییه‌ت بووه‌، بیرچه‌پی‌ واقیعبینانه‌ هه‌میشه‌ پاڵپشتی‌ هه‌ژار و لێقه‌ومان بووه‌، ئه‌مه‌ لایه‌نه‌ زۆر گرنگه‌كانی‌ بیرو كاروانی‌ كوردایه‌تی‌ بوو كه‌ هاوژیانی‌ بووه‌، هه‌ر له‌سه‌ره‌تاوه‌ تا دواكۆچی‌. بۆیه‌ لێره‌دا، هه‌ر ئه‌وه‌نده‌ بوار ده‌بێت كه‌ له‌ده‌رگای‌ هه‌ریه‌كه‌ له‌و ویستگه‌ مێژووییانه‌ بده‌م كه‌تیایاندا توانیوێتی‌ ئه‌سپی‌ خۆی‌ تاوبدات ‌و ببێته‌ سه‌رقافڵه‌ی‌ كاروانی‌ كوردایه‌تی‌.
رابه‌ری‌ ‌و توانستی‌ برایم ئه‌حمه‌د له‌هه‌ریه‌كه‌ له‌و بوارانه‌دا له‌ئاستێكدا بوو, كه‌ناتوانرێت لایه‌نێكی‌ به‌گرنگ ‌و سه‌ركه‌وتووتر له‌وانی‌ تر دابنرێت, ئه‌وه‌ نه‌بێت كه‌ئاستی‌ فراوانیی‌ پێوه‌ندیی‌ هه‌ریه‌كه‌ له‌و لایه‌نانه‌ به‌كۆمه‌ڵانی‌ خه‌ڵكه‌وه‌، نه‌ك هه‌ر به‌نوخبه‌ی‌ رووناكبیر و نووسه‌ر و رۆژنامه‌نووسیی‌، ئه‌وه‌ ده‌رده‌خات كه‌ له‌كامه‌ بوارو لایه‌ن زۆرترین خه‌ڵكی‌ هه‌مه‌چه‌شنه‌‌و هه‌مه‌پیشه‌ی‌ لێبه‌ئاگابووه‌, بۆیه‌ ژیانی‌ سیاسی‌ ‌و حزبایه‌تیی‌ مامۆستا برایم، كوردایه‌تی‌‌و رێبازی‌ كوردستانی‌، بیرچه‌پی‌ ‌و خه‌باتی‌ بۆ رزگاریی‌ نه‌ته‌وه‌یی‌ ‌و كۆمه‌ڵایه‌تی‌ به‌تایبه‌تی‌ له‌گۆڤاری‌ گه‌لاوێژ و لێپرسراوه‌تی‌ لقی‌ (ژێكاف) له‌كوردستانی‌ عیراق, چه‌ند خه‌سڵه‌تێكی‌ زۆر دیارو ئاشكرای‌ سیاسیی‌ ‌و نیشتمانیی‌ ‌و فیكریی‌ وه‌ك چه‌ند به‌هره‌یه‌كی‌ دیاری‌ لاده‌ركه‌وت ‌و هه‌ر له‌سه‌ره‌تایه‌كی‌ زووه‌وه‌ رۆڵی‌ سه‌ركردایه‌تیی‌ حزبی‌ ‌و رابه‌ری‌ سیاسیی‌ وه‌رگرت.
به‌تایبه‌تی‌ له‌و كاته‌وه‌ كه‌بوو به‌لێپرسراوی‌ لقی‌ (ژێكاف) له‌كوردستانی‌ عیراق، هه‌ر له‌سه‌ره‌تای‌ دامه‌زراندنی‌ ئه‌و لقه‌وه‌ تاهه‌ڵوه‌شانی‌ به‌هۆی‌ رووخانی‌ جه‌مهوریه‌تی‌ كوردستان ‌و تێكچوونی‌ كاتیی‌ حزبی‌ دیموكراتی‌ كوردستان (17-12-1946), ئینجا دامه‌زراندنی‌ پارتی‌ دیموكراتی‌ كورد (16ئابی‌ 1946) بیركوردستانیی‌ ‌و خۆبه‌ستنه‌وه‌ به‌ڕێبازی‌ رزگاریی‌. ئاشكرا لای‌ برایم ئه‌حمه‌د ده‌ركه‌وتوو بوو به‌ڕابه‌ری‌ سیاسی‌ ‌و رووناكبیری‌ ئه‌و رێبازه‌، چونكه‌ له‌دامه‌زراندنی‌ پارتیدا، ئه‌و ملی‌ بۆ هاوبه‌شیكردنی‌ له‌و حزبه‌دا نه‌دا, لام وایه‌ دروشم ‌و ستراتیجی‌ ژێكاف كه‌ڕزگاری‌ ‌و دامه‌زراندنی‌ ده‌وڵه‌تی‌ یه‌كگرتووی‌ كورد له‌لایه‌ك‌و بڕوابوون به‌ڕێگه‌ی‌ ئاشتی‌ ‌و شارستانیه‌ت ‌و رووناكبیریی‌  له‌لایه‌كی‌ تر، دوو هۆی‌ هه‌ره‌ سه‌ره‌كیی‌ خۆبه‌ستنه‌وه‌ بوو به‌ژێكاف-ه‌وه‌و دووره‌په‌رێز وه‌ستان بوو له‌دامه‌زراندنی‌ پارتیدا, كه‌وه‌ك حزبی‌ دیموكرات دروشمی‌ ئۆتۆنۆمی‌ به‌رزكرده‌وه‌.
تێندێنسی‌ هه‌ڵوێست له‌شه‌ڕی‌ چه‌كداری‌ ‌و خواستی‌ شۆڕشه‌وه‌، دیارده‌یه‌كی‌ تری‌ گرنگی‌ هاوپێوه‌ند به‌ژیانی‌  سیاسیی‌ مامۆستا و مه‌سه‌له‌ی‌ شۆڕش بوو, سه‌رچاوه‌ی‌ گه‌شی‌ ئه‌و بیر‌ورێباز و ئامانجه‌ گرنگانه‌ی‌ مامۆستا، سه‌ره‌تاكه‌ی‌ راپه‌ڕینه‌كه‌ی‌ شه‌شی‌ گه‌شی‌ ئه‌یلول (1930) بوو.

خه‌باتی‌ شارو شه‌شی‌ سووری‌ گه‌شی‌ ئه‌یلول
له‌و رۆژه‌دا، رۆڵه‌ی‌ دڵسۆز و كوردپه‌روه‌رانی‌ سلێمانی‌ ‌و له‌سه‌ر رێبازی‌ سوور بوون له‌سه‌ر مافه‌ نه‌ته‌وه‌ییه‌كان ‌و وه‌ك درێژه‌ی‌ خه‌باتی‌ سه‌رده‌می‌ حوكمداری‌ ‌و مه‌لیكایه‌تییه‌كه‌ی‌ شێخی‌ زیندوو, كه‌ به‌زۆری‌ هێزی‌ دوو داگیركه‌ر رووخێنرا، ئه‌وان به‌خوێنی‌ گه‌شیان داستانی‌ شه‌شی‌ سوور و گه‌شی‌ ئه‌یلولیان تۆمار كرد, كه‌ له‌وه‌دا رووناكبیرێكی‌ تازه‌ لاو و پێگه‌یشتووی‌ مه‌یدانه‌كه‌ كه‌هانده‌ری‌ خه‌ڵك بوو بۆ راپه‌ڕین ‌و بۆ داوای‌ مافی‌ زه‌وتكراو، ئیبراهیم ئه‌حمه‌دی‌ تازه‌لاو بوو.
ئه‌م رۆڵه‌ له‌مه‌غزایه‌كی‌ گه‌وره‌ی‌ سیاسیی‌ ‌و فیكرییه‌وه‌ هه‌ڵقوڵا بوو, چونكه‌ ئه‌و له‌و سه‌ره‌تا زووه‌دا وه‌ك رووناكبیر و وه‌ك شۆڕشگێڕ، ده‌ركی‌ به‌یاساكانی‌ گه‌شه‌كردنی‌ كۆمه‌ڵایه‌تی‌ ‌و حه‌قیقه‌تی‌ قۆناغی‌ مێژوویی‌ خه‌بات ‌و رێبازی‌ گونجاو بۆ سه‌ندنه‌وه‌ی‌ ماف ‌و هه‌قی‌ زه‌وتكراو كردبوو، هوشیاریی‌ سیاسیی‌ گه‌یشتبووه‌ ئه‌و ئاسته‌ی‌ كه‌ زیاتر بڕوای‌ به‌خه‌باتی‌ جه‌ماوه‌ریی‌‌و رووناكبیریی‌ دوور له‌چه‌كداریی‌ بێت، بڕوای‌ به‌تێكه‌ڵكردنی‌ خه‌باتی‌ شاخ ‌و شار بێت.
ئه‌وه‌ خاڵی‌ وه‌رچه‌رخانی‌ گواستنه‌وه‌ی‌ خه‌بات ‌و رێبازی‌ تێكه‌ڵكردنی‌ خه‌باتی‌ شار و شاخ بوو، سه‌ره‌تای‌ رۆڵبینینی‌ خه‌ڵكی‌ شارو رووناكبیر‌و هاوبه‌شیكردن له‌سه‌ركردایه‌تیی‌ بزووتنه‌وه‌ی‌ كوردایه‌تیدا بوو. ئه‌م دوو لایه‌نه‌ گرنگه‌ له‌ڕێبازی‌ خه‌بات ‌و پێكهاته‌ی‌ سه‌ركردایه‌تیی‌، بۆ ئه‌و له‌و ته‌مه‌نه‌دا سه‌رنجڕاكێشه‌ر بوو, به‌ڵام له‌دواییدا ده‌ركه‌وت كه‌ ئه‌و رێبازه‌ سه‌ره‌تایه‌كی‌ هه‌روا ساده‌ و كرچوكاڵ‌ نه‌بوو، به‌ڵكو زه‌مینه‌ی‌ پته‌وی‌ ئه‌وه‌ له‌تێگه‌یشتنی‌ یاسای‌ جوڵانه‌وه‌ی‌ مێژوو ‌و رێباز و ئاستی‌ گه‌شه‌كردنه‌ هه‌مه‌لایه‌نه‌كانی‌ كۆمه‌ڵگه‌ و شێوه‌ی‌ خه‌بات‌و رێگه‌ی‌ دروستی‌ به‌ده‌ستهێنانی‌ ئامانجه‌كان بوو, كه‌لای‌ مامۆستا درێژه‌ی‌ هه‌بوو. نزیكه‌ی‌ (30)ساڵ‌ دوای‌ ئه‌وه‌ و له‌ڕۆژانی‌ پێش به‌رپابوونی‌ شۆڕشی‌ ئه‌یلول روون‌و كۆنكرێتی‌ تر ده‌ركه‌وتن.
*ئه‌م بابه‌ته‌ به‌شێكه‌ له‌ وتارێكی‌ مامۆستا مه‌حمود مه‌لا عززه‌ت كه‌ پێشتر به‌ دوو به‌ش له‌ رۆژنامه‌ی‌ كوردستانی‌ نوێ‌ بڵاوی‌ كردۆته‌وه‌.


ناو:  
ئیمه‌یل:    
سه‌رنج:  

#7344
18/8/2017
ئه‌رشیف
وه‌رزش
‌ له‌ نێو لیستی باشترین 10 یاریزانی ئه‌وروپادا ناوی نه‌یمار نییه‌ 17/8/2017
‌ یاریزانانی سلێمانی پێشه‌نگ بوون 17/8/2017
زانست
‌ لەسەر زمانی ئێمەیە‌و لەسەر پەنجەی كەڕولاڵەكانیشە 18/8/2017
‌ ئه‌وانه‌ی‌ ئاره‌زوو ده‌كه‌ن ببن به‌ دایك ئه‌م بابه‌ته‌ بخوێننه‌وه‌ 18/8/2017
‌ منداڵ هه‌ستی‌ حه‌وته‌میشی‌ هه‌یه‌ 18/8/2017

© 2009 KURDISTANY NWE, All RIGHTS RESERVED. | CREATED BY AVESTA GROUP