پاموك پێی وتم به‌ شانازییه‌وه‌ دێم بۆ سلێمانی
سامان كه‌ریم: پاموك پێی وتم به‌ شانازییه‌وه‌ دێم بۆ سلێمانی ‌ 31/8/2017
له‌ دونیای موزیكه‌وه‌ بۆ وه‌رگێڕانی ئه‌ده‌بی، سامان كه‌ریم پیاوێكی هێمن و ئارام وه‌ك نۆته‌و ئاوازی ژێی گیتاره‌كه‌ی، ساڵانێكه‌ ئاره‌زووی ئه‌ده‌بی توركی ده‌كات، ئێستا وه‌ك یه‌كێك له‌ وه‌رگێڕه‌كانی كاره‌كانی ئورهان پاموك ده‌ناسرێت و چه‌ند جارێك ئۆرهان پاموكی بینیوه‌. بۆ زیاتر ئاشنابوون به‌ یه‌كترناسینی ئه‌و و پاموك ئه‌م دیداره‌م له‌گه‌ڵدا سازدا.
سازدانی: شاخه‌وان سدیق
*ده‌وترێت «نوسه‌ری راسته‌قینه‌ ئه‌وه‌یه‌ كه‌ خۆی له‌ نوسینه‌كانی بچێت» تۆ چه‌ند جارێك پاموكت دیوه‌و له‌گه‌ڵی دانیشتویت و گفتوگۆتان كردووه‌، وه‌ك ده‌شزانی لێره‌ ئه‌و خوێنه‌رێكی زۆری هه‌یه‌، چ سه‌رنجێكتان لا دروست بوه‌ له‌و دیدارانه‌تا له‌سه‌ر پاموك، ئایا پاموكی ناو رۆمانه‌كان چ جیاوازییه‌كی له‌گه‌ڵ پاموكی ئاسایدا هه‌یه‌؟ 
  +نامه‌وێت پاموك له‌ چه‌ند رسته‌یه‌كدا كورت بكه‌وه‌، ئه‌ته‌كێتێكی بده‌مێ، چونكه‌ ئه‌مه‌ كارێكی شیاو نابێت. وه‌ك جیاوازی نا، به‌ڵام پاموكی ئاسایی پێكهاتووه‌ له‌ هه‌موو كاره‌كته‌ره‌كانی ناو كاره‌كانی، واته‌ له‌هه‌موو روویه‌كه‌وه‌ گفتوگۆی له‌گه‌ڵدا ده‌كرێت هه‌ر له‌بواری  مێژوو، هونه‌ر، شانۆ، سینه‌ما، موزیك، كۆمه‌ڵایه‌تی هتد... به‌ڵام له‌ هیچ كاره‌كته‌رێكی ناو كاره‌كانیشی ناچێت!
*پاموك یه‌كێكه‌ له‌و نوسه‌رانه‌ی كه‌ كه‌متر خۆی له‌ قه‌ره‌ی پرسه‌ سیاسییه‌كان ده‌دات، تۆ له‌و دیدارانەدا هیچ ده‌رباره‌ی پرسی كورد قسه‌تان نه‌كرد، به‌تایبه‌ت كه‌ زانی كتێبه‌كانی به‌و كوالێتیه‌ باشه‌ وه‌رگێڕدراون بۆ كوردی و خوێنه‌رێكی زۆری له‌ كوردستان هه‌یه‌، ئه‌و تا چه‌ند ئاگاداری كێشه‌ی كوردو ته‌نانه‌ت ئه‌ده‌بیاتی كوردیشه‌، و سه‌رنجی چییه‌؟ هه‌ستی چی بوو كه‌ كتێبه‌كانی خۆی به‌ كوردی بینی؟
*به‌ تێڕوانینێكی ئۆبجه‌كتیڤانه‌ زۆر كورد دۆسته‌. ئاره‌زووی له‌ بابه‌تی سیاسی نییه‌. چه‌ند جارێكیش دووباره‌ی كرده‌وه‌ وتی «شانازی ده‌كه‌م كه‌ ئه‌وه‌نده‌ خوێنه‌رێكی زۆری هه‌م كاره‌كانی من هه‌م ئه‌ده‌بیات به‌ گشتی هه‌یه‌ له‌ كورستان، شانازی ده‌كه‌م كه‌ خوێنه‌ری كورد بێ ئه‌وه‌ی گوێ بداته‌ قه‌باره‌ی كتێبه‌كانم ده‌یانخوێننه‌وه‌.» وه‌ك منداڵێك دڵخۆشبوو كاتێك كتێبه‌كانم بۆ برد، دامه‌ ده‌ستی. دووپاتیشی كرده‌وه‌ كه‌ شێوازی چاپی كتێبه‌كانی له‌لایه‌ن ئه‌ندێشه‌وه‌ جوانتره‌ له‌ چاپه‌ ئینگلیزی، فه‌ره‌نسییه‌كانی. ده‌مه‌وێت ئه‌وه‌ش بڵێم كه‌ جاری دووه‌م له‌سه‌ر داخوازی پاموك خۆی یه‌كتریمان بینی، به‌ دڵنییاییه‌وه‌ زۆر خۆشحاڵبووم. باسم له‌توانای چه‌ند نووسه‌رێكی كوردیش كرد، مه‌راقی بوو كاره‌كانیان بخوێنیته‌وه‌.
*بڕیاربوو پاموك له‌سه‌ربانگێشتی ئه‌ندێشه‌و به‌ داعوه‌تی ئێوه‌ بێته‌ كوردستان و سلێمانی ئه‌و هاتنه‌ كه‌یه‌ و بڕیاره‌ لێره‌ تا چه‌ند بمێنێته‌وه‌ و چ پڕۆژه‌یه‌كی هه‌بێت؟
  +به‌ڵێ جاری یه‌كه‌م كه‌ له‌ ماڵه‌كه‌ی خۆیدا یه‌كترمان بینی، دوای قسه‌كردنێكی زۆر له‌باره‌ی  ژیانی تایبه‌تی من، كه‌ زۆر مه‌راقی بوو، له‌به‌ر ئه‌وه‌ی كه‌مێك بۆم باسكرد كه‌ له‌ ئێرانه‌وه‌، به‌شاخه‌كاندا له‌ مانگی شوباتدا به‌ ڕێكردن بۆ ماوه‌ی ١٤ ڕۆژ به‌ ناو به‌فردا گه‌یشتوومه‌ته‌ ئیستانبوڵ، دواتر ژیانی كۆڵانه‌كان، فێربوونی زمانی توركی، خوێندنه‌وه‌، ده‌ستكردنم به‌ خوێندن له‌ بواری موزیكدا، ده‌رچوونم له‌ناو ده‌ی یه‌كه‌مداو رۆیشتنم بۆ مه‌دریدی ئیسپایا بۆ خوێندنی ماستركلاس، ئه‌وه‌ی زۆر سه‌رنجیشی راكێشا گه‌ڕانه‌وه‌م بوو بۆ ئیستانبوڵ، دوای سه‌ردانم بۆ چه‌ند وڵاتێكی رۆژئاوا. كاتێك ئه‌م داخوازییه‌م پێوت ڕێك به‌م شێوه‌یه‌ وه‌ڵامی دامه‌وه‌ «به‌دڵنیاییه‌وه‌ به‌ شانازییه‌وه‌ دێم بۆ سلێمانی.» زۆر حه‌ز ده‌كات كه‌ سلێمانی ببینێت، وه‌ك كاتی هاتنی دیاری كرد، به‌ڵام باسمان له‌ ماوه‌ی مانه‌وه‌ نه‌كرد، وه‌ك پڕۆژه‌ش جگه‌ له‌وه‌ی كه‌ دێته‌ ناوه‌ندی ئه‌ندێشه‌، كۆڕێك ساز ده‌كات، واژووی كتێبه‌كانی ده‌كات بۆ خوێنه‌ره‌كانی، سه‌ردانێكی گشتی سلێمانی ده‌كات، پڕۆژه‌یه‌كی درێژخایه‌نیش هه‌یه‌ له‌ نێوان هه‌ردووكماندا كه‌ باسی لێكرا، به‌ڵام له‌ ئێستادا ناتوانم باسی پڕۆژه‌كه‌ و ناوه‌ڕۆكه‌كه‌ی بكه‌م. 
*له‌ دونیادا وه‌رگێڕان وه‌ك هه‌مووكارێكی دیكه‌ پیشه‌یه‌، واته‌ ئه‌وكه‌سانه‌ی كه‌ كاری وه‌رگێڕان ده‌كه‌ن كه‌ سانی تایبه‌تمه‌ندن له‌و بواره‌داو شاره‌زایی بنه‌ماو یاساكانی وه‌رگێڕانن، چۆن بوو ئێوه‌ كه‌ خۆتان موزیسیانن بیرتان له‌ وه‌رگێڕان كرده‌وه‌؟ 
+پێشه‌كی ده‌مه‌وێت ئه‌وه‌ بڵێم كه‌ بواری وه‌رگێڕان وه‌ك بواری موزیك ته‌نها خه‌ون و حه‌زێكی تایبه‌تی خۆمه‌. وه‌ك شاره‌زایی له‌ بواری وه‌رگێڕانیشدا، زۆر نمونه‌ هه‌یه‌ كه‌ كه‌سێك هه‌م مۆسیقی بێت هه‌م وه‌رگێڕ یاخود له‌گه‌ڵ ئه‌وه‌دا كه‌ ئه‌كته‌ری سینه‌ما، شانۆیه‌ نووسه‌رو وه‌رگێڕیشه‌، هه‌تا به‌ نیسبه‌ت پاموكیشه‌وه‌ كاتێك زانی موزیسیانم زۆری پێخۆشبوو. پێده‌چێت ئه‌مه‌ له‌ وڵاتی ئێمه‌دا كه‌مێك نامۆ بێت هه‌ر وه‌ك چۆن هه‌موو شتێك به‌ نامۆ ده‌بینرێت، به‌ڵام به‌ تێڕوانینی من مۆسیقییه‌ك ده‌بێت ئاگاداری ئه‌ده‌بیاتی دنیا بێت، نووسه‌رێك ده‌بێت ئاگاداری ئۆپێرا، ستاییله‌كانی موزیك، سینه‌ما، شانۆ، بواری وێنه‌كێشان، په‌یكه‌رتاشی بێت. به‌ دڵنییاییه‌وه‌ ئه‌مه‌ به‌ پێچه‌وانه‌شه‌وه‌ بۆ وێنه‌كێشێك یاخود سینه‌ما كارێك هتد... ده‌بێت به‌و شێوه‌یه‌ بێت، هیچ نه‌بێت تێڕوانینی من به‌وشێوه‌یه‌یه‌. هۆكاری ئه‌مه‌ به‌ نیسبه‌ت منه‌وه‌ دوو خاڵه‌، یه‌كه‌میان بواره‌كه‌ی خۆتی پێ ده‌وڵه‌مه‌ند ده‌كه‌یت. دووه‌میشیان كه‌ زۆر گرنگه‌، مرۆڤ تاچه‌نده‌ له‌ توانایدا بێت ده‌بێت خۆی ده‌وڵه‌مه‌ند بكات بۆ ئه‌وه‌ی زیاتر ژیان به‌ڕوونی ببینێت. ئه‌مه‌ جگه‌ له‌وه‌ی كه‌ له‌ سه‌رده‌می ژیانما له‌ ئیستانبوڵ بۆ نموونه‌ هه‌ندێك كاری ئۆغوز ئاتای، جه‌مال سوره‌ییا، جان یوجه‌لم ده‌خوێنده‌وه‌ وه‌ریانگێڕابوون، له‌ كاتێكدا كه‌ خۆیان هه‌م نووسه‌ر، هه‌م شاعیر هه‌م وه‌رگێڕێكی باشیشن، چه‌ند سه‌رچاوه‌یه‌كیشیان هه‌یه‌ له‌باره‌ی بواری وه‌رگێڕانه‌وه‌، كه‌ سه‌رنجیان راكێشابووم. یاخود نه‌رڤالی نووسه‌ر، شاعیری فه‌ڕه‌نسی كه‌ له‌ خۆیدا وێنه‌كیشیش بووه‌. 
*ئێستا له‌ كوردستان لێشاوی وه‌رگێڕان هه‌یه‌، به‌جۆرێك هه‌ركه‌س كه‌مێك له‌ زمانێك ده‌زانێت ده‌ستپێده‌كات به‌بێ‌ سانسۆر، تا چه‌ند پێت وایه‌ پێویسته‌ وه‌رگێڕ شاره‌زایی باشی ورده‌كاری هه‌ردوو زمان بێت؟ وه‌رگێڕانی حه‌رفی چ جیاوازییه‌كی له‌گه‌ڵ وه‌رگێڕانی ئاسایی؟
+له‌ هه‌موو بوارێكدا كاری باش، جوان خۆی پیشان ده‌دات. به‌ تێڕوانینی من ئه‌گه‌ر كه‌سێك له‌هه‌ردوو زمانه‌كه‌دا توانایه‌كی باشی نه‌بێت ده‌كه‌وێته‌ ناو گێژاوێكه‌وه‌ كه‌ نه‌ك پاش زه‌مانێكیتر به‌ڵكو هه‌ر له‌ ساتی وه‌رگێڕانییه‌وه‌ هه‌ست به‌ قورساییه‌ك ده‌كات كه‌ نایتوانێت. له‌به‌ر ئه‌وه‌ مرۆڤ به‌ گشتی له‌هه‌موو بوارێكدا ده‌بێت بزانێت چی ده‌كات، چۆن ده‌یكات، ئه‌نجامیشی چی ده‌بێت. سه‌ره‌ڕای ئه‌مانه‌ش خوێنه‌ری باش ده‌توانێت بڕیار له‌سه‌ر باشی، جوانی كاری ئه‌ده‌بی بدات.
*ده‌ڵێن وه‌رگێڕان «دووباره‌ نوسینه‌وه‌ی ده‌قه‌ له‌ لایان كه‌سی وه‌رگێڕه‌وه‌» یان « وه‌رگێڕ، نوسه‌ری دووه‌می ده‌قه‌» ئه‌مه‌ تا چه‌ند ڕاسته‌، تا چه‌ند وه‌رگێڕ ئازاده‌ له‌ دوباره‌ بنیاتنانه‌وه‌و داڕشتنه‌وه‌ی زمانی ده‌ق، یان ده‌بێت وه‌رگێڕ پابه‌ندبێت به‌ ناوه‌رۆك و زمانی ده‌قه‌وه‌ وه‌ك خۆی؟
 +ده‌بێت وه‌رگێڕ هه‌م پابه‌ندبێت به‌ ناوه‌ڕۆكی رۆمانه‌كه‌وه‌ هه‌م ئازاد بێت له‌ چۆنێتی نووسینه‌وه‌ی ده‌قه‌كه‌دا، چونكه‌ وه‌رگێڕ شتێكی نوێ نانووسێت، به‌ڵكو وه‌ریده‌گێڕێت. له‌گه‌ڵ ئه‌وه‌شدا بیرفراوانی، زانیاری، تێڕوانینی وه‌رگێڕ گرنگه‌. وه‌ك جه‌مال سووره‌ییا ده‌ڵێت» وه‌رگێڕان پێویستی به‌ كۆمه‌ڵێك یاسای تایبه‌ت، ئاماده‌كاریی تایبه‌ت هه‌یه‌. به‌ڵام وه‌رگێڕان له‌ بنچینه‌دا كاری «نووسینه‌». له‌ باره‌ی وه‌رگێڕانه‌وه‌ زۆر تێڕوانین هه‌یه‌، به‌ڵام من وه‌ك خۆم گرنگی به‌ دوو لایه‌ن ده‌ده‌م، لایه‌نێكیان هه‌ستكردنمه‌ به‌ هه‌ست و تێڕوانینی نووسه‌ر له‌ ده‌قه‌كه‌دا، لایه‌نه‌كه‌ی تریشیان ئه‌وه‌یه‌ كه‌ هه‌وڵ ده‌ده‌م به‌ زمانی شیریم هه‌ست و په‌یامی نووسه‌ر وه‌ك خۆی به‌ چێژ، سه‌لیقه‌ی ئه‌ندازیارێكی به‌تواناوه‌ وشه‌كان، رسته‌كان، په‌ڕه‌گرافه‌كان سه‌ر له‌نوێ بنووسمه‌وه‌. له‌ هه‌مووشی گرنگتر ئه‌و واتا، هه‌سته‌ی كه‌ نووسه‌ر له‌ پشتی نووسراوه‌كه‌یه‌وه‌ مه‌به‌ستێتی بتوانرێت وه‌ك ده‌قه‌ راسته‌قینه‌كه‌ی هه‌ستی پێبكرێت. 
*ئه‌ده‌بی توركی ئه‌ده‌بێكی فراوان و جدیه‌، به‌ڵام لای ئێمه‌ ته‌نها چه‌ند كه‌سێكی كه‌م له‌ ئه‌دیبانی تورك ناسراون، تۆ بۆ له‌ناو ئه‌و ئه‌دیبانه‌دا ده‌ستت بۆ پاموك برد؟ 
+نزیكه‌ی بیست ساڵ له‌ توركیا، له‌ ئیستانبوڵ، سه‌رده‌مێكیش له‌ ئه‌نقه‌ره‌ ژیام. ئه‌ده‌بیاتی توركی به‌ڕاستی زۆر قووڵه‌، تاكو ئێستاش له‌ گه‌شه‌كردندایه‌. نه‌ك پاموك بگره‌ زۆرێك له‌ شاكاری نووسه‌ره‌كانی توركیام خوێندۆته‌وه‌، سه‌رنجیان راكێشاوم، به‌ڵام به‌لای منه‌وه‌ پاموك جیاوازتره‌ له‌ نووسه‌ره‌كانی تر، ئه‌مه‌ ده‌گه‌ڕێته‌وه‌ بۆ ئه‌وه‌ی كه‌ پاموك هه‌ر له‌ سه‌رده‌می منداڵییه‌وه‌ خوێنه‌رێكی زۆر باشبووه‌، له‌گه‌ڵ ئه‌وه‌شدا زۆر به‌ قووڵی سه‌رقاڵی تێگه‌یشتنی نووسه‌ره‌كانی پێش خۆی، سه‌رده‌می خۆی بووه‌ بۆ نموونه‌ یه‌حیا كه‌مال، ئه‌حمه‌د حه‌مدی تانپنار، ئۆغوز ئاتای، ئه‌حمه‌د راسیم هتد... واته‌ شاره‌زایه‌یه‌كی باشی هه‌یه‌ هه‌م له‌ مێژووی ئه‌ده‌بیاتی رۆژئاوادا هه‌م له‌ مێژووی ئه‌ده‌بیاتی توركیدا به‌ تایبه‌ت و رۆژهه‌ڵات به‌ گشتی، ئه‌مه‌ش وایكردووه‌ كه‌ پاموك بۆشایی ناو ئه‌م دوو ئه‌ده‌بیاته‌ بدۆزێته‌وه‌، به‌ شێوازێكی نوێ بنووسێت. بۆچی ده‌ستم بۆ پاموك برد؟ به‌ڕێوبه‌ری ناوه‌ندیی ئه‌ندێشه‌ هه‌ژار مه‌جید، داوای لێكردم كه‌ كاره‌كانی پاموك وه‌ربگێڕم، به‌ دڵنییاییه‌وه‌ وه‌ك بڵێی بۆ ماوه‌ی بیست ساڵ یه‌كتر بناسین، رێك داوای كارێكی لێكردم كه‌ زۆر له‌ زووه‌وه‌ بیرم لێكردبووه‌وه‌.
*خوێنه‌رانی به‌رهه‌مه‌كانی پاموك باس له‌ چیرۆكی چڕو زمانی قورس و فه‌زای ئاڵۆزو له‌ به‌رهه‌مه‌كانی پاموكدا ده‌كه‌ن، تا چه‌ند ئه‌مه‌ ڕاسته‌؟ ئایا بۆ وه‌رگێڕان و گواستنه‌وه‌ی ئه‌م ئاڵۆزیانه‌ كاره‌كه‌ هێنده‌ی تر بۆ تۆ قورستر ناكات؟
+كاره‌كانی پاموك له‌ چه‌ند خاڵێكدا هاوبه‌شن، بۆنموونه‌ له‌ باسكردنی مێژووی هه‌رشتێك بێت له‌ كاره‌كانیدا واته‌ به‌رده‌وام له‌ ناو گێڕانه‌وه‌كانیدا تیشك ده‌خاته‌ سه‌ر مێژووی هه‌ندێك بابه‌ت، به‌ڵێ له‌ توركیاش باس ده‌كرێت كه‌ كه‌مێك ئاڵۆزه‌، به‌ڵام به‌ نیسبه‌ت منه‌وه‌ ئه‌وه‌ ئاڵۆزیی نییه‌، به‌ڵكو ده‌بێت زۆر به‌ سه‌لیقه‌وه‌ كاره‌كانی بخوێنرێته‌وه‌، چونكه‌ له‌ كاره‌كانی پاموكدا، له‌ گێڕانه‌وه‌كانیدا هارمۆنییه‌تێكی زۆر به‌هێز هه‌یه‌. ده‌مه‌وێت له‌ سه‌ر بواری موزیك نموونه‌یه‌ك بده‌م كه‌ گونجاوبێت بۆ زیاتر تێگه‌یشتن له‌م بابه‌ته‌: ئه‌و موزیكانه‌ی له‌ رۆژهه‌ڵاتدا په‌سه‌ند ده‌كرێت و ئاسانن بۆ گوێگرتن، ئه‌گه‌ر لێیان وردببیته‌وه‌ هارمۆنییه‌تێكی به‌هێزیان تێدا نییه‌، واته‌ یه‌ك میلۆدی یاخود له‌ دوو میلۆدی تێپه‌ڕنابن. به‌ڵام كه‌ گوێ له‌ كارێكی بیتهۆڤن، ڤاگنه‌ر یاخود باخ ده‌گریت ئه‌مه‌نده‌ هارمۆنییه‌تێكی به‌هێزیان تێدایه‌ كه‌ به‌ڕاستی پێویست ده‌كات هه‌م زانیارییه‌كی باشت هه‌بێت له‌ باره‌ی چۆنییه‌تی گوێگرتنه‌وه‌ هه‌م سه‌لیقه‌یه‌كی زۆریشت هه‌بێت، ئینجا ده‌توانی چێژێكی پێویست وه‌ربگریت. به‌ دڵنییاییه‌وه‌ ئه‌مه‌ دوای ئه‌وه‌ی كاره‌كه‌ به‌باشی وه‌رگێردرابێت. ده‌توانین ئه‌م نموونه‌یه‌ بچوێنین به‌و كاره‌ ئه‌ده‌بییانه‌ی كه‌ پێی ده‌ڵێن ساده‌، له‌گه‌ڵ ئه‌و كارانه‌دا كه‌ پێی ده‌وترێت ئاڵۆز. ده‌توانم وه‌ك نموونه‌ی كاره‌كانی پاموكیش ئیشاره‌ت به‌ جه‌وده‌ت به‌گ و كوڕه‌كانی بده‌م كه‌ ڕۆمانێكی كلاسیكه‌ تا ڕاده‌یه‌ك ساده‌یه‌، به‌ڵام ماڵی بێده‌نگ، به‌ تایبه‌تی كتێبی ره‌ش به‌به‌راورد له‌گه‌ڵ جه‌وده‌ت به‌گ و كوڕه‌كانیدا ئاڵۆزه‌،  ئه‌مه‌ش په‌یوه‌ندی به‌وه‌وه‌ هه‌یه‌ كه‌ ماڵی بێده‌نگ رۆمانێكی پۆستمۆدێرنه‌، كتێبی ره‌شیش وه‌ك پاموك خۆی ده‌ڵێت هه‌ر نه‌ك پۆستمۆدێرن به‌ڵكو دادائیستییه‌. له‌به‌ر ئه‌وه‌ له‌ وه‌رگێڕانی كاره‌كانی پاموكدا ئه‌وه‌نده‌ هه‌ست به‌و قورسییه‌ ناكه‌م كه‌ باسی لێوه‌ده‌كرێت، چونكه‌ ئه‌و گۆشه‌ی تێڕوانینه‌م دۆزیوه‌ته‌وه‌ كه‌ پێویسته‌ بۆ تێگه‌یشتنی كاره‌كانی پاموك. 
*سه‌ره‌تای وه‌رگێڕانت به‌ پاموك ده‌ستی پێكرد و ئێستا ده‌ست بۆ هه‌ندێك نووسه‌ری تر بردووه‌ به‌ نموونه‌ كامۆ ئه‌م گۆڕانكارییه‌ به‌رده‌وام ده‌بێت و به‌نیازی به‌رهه‌می نووسه‌رانی تریش وه‌رگێڕی؟
+له‌ وه‌رگێڕانی كاره‌كانی پاموك به‌رده‌وام ده‌بم، به‌ڵام كاتێ كتێبی «ئه‌زموونه‌كانی» كامۆم گرته‌ ده‌ست، وه‌رمگێڕا. راستییه‌كه‌ی هیچ به‌ نیازی چاپكردن وه‌رمنه‌گێڕا، به‌ نیازی چاپكردنیش ده‌ستم نه‌كردووه‌ به‌ وه‌رگێڕان. به‌ڵام بیرم كرده‌وه‌ دوای ته‌واوبوونی هه‌موو كتێبێك، خۆم نزیكه‌ی سه‌د یاخود دوو سه‌د دانه‌ كۆپی بكه‌م، به‌رگه‌كانیان كاغه‌زی ڕه‌نگاو ڕه‌نگ بێت، له‌چه‌ند گۆشه‌یه‌كی گه‌ڕه‌كه‌كانی شاری سلێمانیدا بۆ نموونه‌ به‌رده‌ركی سه‌را، سه‌هۆڵه‌كه‌، تووی مه‌لیك هتد... چه‌ند دانه‌یه‌ك دابنێم له‌سه‌ر شۆسته‌كان، هیچ نه‌بێت گه‌نجه‌كان كه‌مێك تووشی مه‌راق بكه‌م بۆ ئه‌وه‌ی كتێبه‌كه‌ هه‌ڵبگرن بیخوێننه‌وه‌، هه‌ر له‌به‌ر ئه‌و هۆیه‌ش به‌رگه‌كانیانم ره‌نگاو ڕه‌نگ ده‌كرد. كاتێ هه‌ژار مه‌جید داوای وه‌رگێڕانی كاره‌كانی پاموكی لێكردم، ئه‌مه‌م زۆر پێخۆشبوو، چونكه‌ چه‌نده‌ها ساڵبوو كاره‌كانی پاموكم ده‌خوێنده‌وه‌ بۆ ئه‌وه‌ی بتوانم له‌ هه‌موو لایه‌نێكی توركیا بگه‌م. ده‌بوایه‌ ئه‌زموونه‌كان چاپ ببووایه‌، له‌سه‌ر بڕیاری من دوامان خست، ماڵی بێده‌نگی پاموكم وه‌رگێڕا، چاپ بوو، به‌ دوایدا  ژنه‌ قژسووره‌كه‌ كه‌ له‌ ماوه‌یه‌كی كه‌مدا چاپی یه‌كه‌می ته‌واوبوو، چاپی دووه‌می بڵاوبووه‌وه‌.  
*پڕۆژه‌ی داهاتووتان چییه‌؟ كتێبی تری پاموكه‌ یان به‌رهه‌می نوسه‌ری تره‌؟
  +له‌ ئێستدا له‌ قۆناغی كۆتایی وه‌رگێڕانی كتێبی ئیستانبوڵدام، له‌لایه‌كی تریشه‌ كار له‌ وه‌رگێڕانی باوه‌ڵه‌كه‌ی باوكم دا ده‌كه‌م، جگه‌ له‌ رۆمانی ماڵی بێده‌نگ، ژنه‌ قژسووره‌كه‌ كه‌ چاپكراون بڵاوبونه‌وه‌ته‌وه‌، له‌ ماوه‌یه‌كی نزیكیشدا رۆمانی سه‌مه‌ره‌یه‌ك له‌سه‌رمدا، كتێبی من دره‌ختێكم دوای ئه‌وانیش كتێبی ئیستانبوڵ، باوه‌ڵه‌كه‌ی باوكم له‌لایه‌ن ناوه‌ندی ئه‌ندێشه‌وه‌ چاپ ده‌كرێت، بڵاوده‌كرێته‌وه‌، به‌ نیازم هه‌موو كاره‌كانی پاموك وه‌ربگێڕم، ته‌وایان بكه‌م، بۆ نموونه‌ ئه‌و كارانه‌ی كه‌ به‌ نیازم دوای كتێبی ئیستانبوڵ یه‌كسه‌ر ده‌ست بكه‌م به‌ وه‌رگێڕانیان: جه‌وده‌ت به‌گ و كوڕه‌كانی، كتێبی ره‌ش، پارچه‌كان له‌ دیمه‌وه‌و ئه‌و كارانه‌ی كه‌ هێشتا وه‌رنه‌گێڕدراون.  چاوه‌ڕوانی كاره‌ نوێكانیشی ده‌كه‌م بۆ ئه‌وه‌ی ئه‌وانیش وه‌ربگێڕم. پاموك خۆیشی پێشنیازی چۆنێتی سه‌ره‌ی وه‌رگێڕانی كاره‌كانی بۆ كردم، به‌خۆشحاڵییه‌وه‌ په‌سه‌ندم كرد. له‌گه‌ڵ ئه‌مانشدا به‌ دڵنییاییه‌وه‌ ده‌ست ده‌كه‌م به‌ وه‌رگێڕانی به‌رهه‌می نووسه‌ری تریش، به‌ڵام له‌ ئێستادا خۆشتان ده‌زانن كه‌ چه‌نده‌ سه‌رقاڵم له‌گه‌ڵ كاره‌كانی پاموكدا.


ناو:  
ئیمه‌یل:    
سه‌رنج:  

#7372
25/9/2017
ئه‌رشیف
وه‌رزش
‌ پاڵێوراوانی خه‌ڵاته‌كانی فیفا زه‌ بێسته‌كان به‌ بردنه‌وه‌ی جام و نازناو دیاریی ده‌كرێن یان ئاستی هونه‌ری؟ 25/9/2017
‌ بارسێلۆنا بۆندی چه‌ند یاریزانێكی نوێ ده‌كاته‌وه‌ 24/9/2017
زانست
‌ پاسێكی كارەبایی ژمارەی پێوانەیی جیهانی تێكشكاند ئایندە بۆ ئۆتۆمبیلی كارەباییە 25/9/2017
‌ وریای سوپەر مەلاریا بن 25/9/2017
‌ دیزاینەرە گەورەكەی ئەپڵ 25/9/2017

© 2009 KURDISTANY NWE, All RIGHTS RESERVED. | CREATED BY AVESTA GROUP