ئەدەبیاتی مام
ئەدەبیاتی مام ‌ 8/10/2017
 یادگارییەکانی هەڤاڵ مام جەلال لە یادی 37ساڵەی دامەزراندنی ی.ن.ک-دا
هه‌ڤاڵ مام جه‌لال: یه‌كێتی هه‌روه‌كو چۆن حزبی شه‌هیدان‌و كۆڵنه‌دان‌و سه‌ركه‌وتن‌و پێشكه‌وتنه‌، ئاوهاش حزبی وه‌فاو چاكه‌ پێزانین‌و ته‌قدیری تیكۆشه‌رانه‌
رۆژی 1/6/2012، هه‌ڤاڵ مام جه‌لال سكرتێری گشتیی یه‌كێتیی نیشتمانیی كوردستان، به‌بۆنه‌ی یادی 37 ساڵه‌ی دامه‌زراندنی ی.ن.ك-ه‌وه‌، په‌یامێكی ئاڕاسته‌ی هه‌ڤاڵانی یه‌كێتی و كۆمه‌ڵانی خه‌ڵكی كوردستان كرد، هه‌ڤاڵ مام جه‌لال له‌په‌یامه‌كه‌یدا جگه‌ له‌پیرۆزباییكردن له‌سه‌رجه‌م یه‌كێتییه‌كان، چه‌ندین یادگاری سه‌رده‌می سه‌ختی خه‌بات و سه‌ره‌تاكانی دامه‌زراندنی ی.ن.ك و هه‌ڵگیرساندنه‌وه‌ی شۆڕشی نوێی گه‌له‌كه‌مانی خسته‌ڕوو، ئه‌مه‌ش ده‌قی په‌یامه‌كه‌یه‌:

 ئەم پاشکۆ تایبەتەی کوردستانی نوێ
رۆژی 3 / 6 / 2012، بەناوی (37) بڵاوکراوەتەوە، لە کۆستی کۆچی دوایی سەرۆک مام جەلال-دا، دووبارە بڵاویدەکەینەوە.
به‌ناوی خوای گه‌وره‌و میهره‌بان 
هه‌ڤاڵان، خۆشه‌ویستان
یادكردنه‌وه‌ی 37 ساڵه‌ی یه‌كێتیی نیشتمانیی كوردستان ئه‌مجاره‌یان به‌شێوه‌یه‌كی مۆدێرن بوو، وه‌ك جاران نه‌بوو كه‌ كۆبوونه‌وه‌ی تێدا بكرێت و وتاری سیاسی تێدا بدرێت و ئه‌و شێوه‌یه‌ بكرێت به‌شێوه‌ی گشتی یادكردنه‌وه‌كه‌، ئه‌مجاره‌یان به‌جۆری جیاجیا هه‌موو مه‌ڵبه‌نده‌كان ده‌سه‌ڵاتیان پێدرا كه‌ له‌هه‌مان كات و هه‌مان رۆژدا به‌پێی توانای خۆیان ئه‌و بیره‌وه‌رییه‌ بكه‌نه‌وه‌، به‌جۆرێك كه‌ زیاتر چه‌پكه‌ گوڵه‌كه‌ بنوێنێت، له‌و شتانه‌ی كه‌سه‌رنجی منی راكێشا خوێن به‌خشین بوو كه‌ هه‌ندێك له‌هه‌ڤاڵانی كۆمیته‌یه‌كی سلێمانی وتیان به‌بۆنه‌ی ئه‌و 37 ساڵه‌وه‌، 37 بوتڵ خوێن ده‌به‌خشین، هه‌روه‌ها نیشاندانی وێنه‌و یادگاریی شه‌هیده‌كان بوو، هه‌روه‌ها چالاكیی وه‌رزشی و كۆبوونه‌وه‌ی تری كۆمه‌ڵایه‌تی، رۆڵی ژنان، نیشاندانیان و كۆبوونه‌وه‌ی جیاجیا له‌شوێنه‌ جیاجیاكان به‌شێوه‌یه‌كی مۆدێرن و رێك و پێك.
گێڕانه‌وه‌ی هه‌ندێك بیره‌وه‌ری
منیش ئه‌مجاره‌یان بڕیارمدا كه‌ به‌شێوه‌ی گێڕانه‌وه‌ی هه‌ندێك بیره‌وه‌ری به‌شداری بكه‌م له‌زیندووكردنه‌وه‌ی ساڵیادی یه‌كێتیی نیشتمانیی كوردستان، نه‌وه‌ك وه‌ك جاران به‌یاننامه‌یه‌ك ده‌ربكه‌م، به‌ڵكو هه‌ندێك له‌بیره‌وه‌رییه‌كانم بگێڕمه‌وه‌ كه‌ ره‌نگه‌ هه‌ندێكیان نوێ بن بۆهه‌ڤاڵان، دیاره‌ له‌پێشه‌وه‌ داوای لێبووردن ده‌كه‌م ئه‌گه‌ر هه‌ندێك ناوو رووداوم له‌بیر چووبێت، یان ئێستا نه‌یه‌ته‌وه‌ یادم، هه‌رچه‌نده‌ ره‌نگه‌ له‌بیره‌وه‌رییه‌كانمدا نووسیبێتم، به‌ڵام دیاره‌ سه‌رقاڵی و قه‌ره‌باڵغی و زۆری كارو ئیش ره‌نگه‌ هه‌ندێك جێی مێشكمی گرتبێت كه‌نه‌توانم به‌چاكی هه‌موو بیره‌وه‌رییه‌كان به‌وردی بگێڕمه‌وه‌، بۆیه‌ له‌پێشه‌وه‌ داوای لێبووردن ده‌كه‌م له‌و هه‌ڤاڵانه‌ی كه‌ ناویان ناهێنم له‌م دیداره‌دا.
له‌شامه‌وه‌ به‌رنامه‌كه‌ داڕێژرا
ئێمه‌ ئه‌مانه‌ی كه‌ یه‌كێتیی نیشتمانیی كوردستانمان دامه‌زراند له‌ده‌ره‌وه‌ چه‌ند كه‌سێك بووین كه‌ له‌ده‌ره‌وه‌ی كوردستان ئیشمان پێسپێردرابوو، له‌گه‌ڵ هه‌ندێك له‌و هه‌ڤاڵانه‌ی كه‌ له‌ناوه‌وه‌ هاتن، د.فوئادو من له‌ده‌ره‌وه‌ بووین له‌كۆمیته‌ی كاروباری عه‌ره‌بی پارتی دیموكراتی كوردستان كارمان ده‌كرد، كاك عه‌زیزی شێخ ره‌زا لێپرسراومان بوو، له‌نێوان به‌یروت و قاهیره‌ هاتوچۆمان ده‌كرد، كه‌ شۆڕش دوایی پێهێنرا كۆمه‌ڵێك له‌ئه‌وانه‌ی كه ‌له‌ناو شۆڕش بوون و چوونه‌وه‌ عیراقیان په‌سه‌ند نه‌كرد هاتن بۆ به‌یروت، له‌وانه‌ كه‌ چاومان پێیان كه‌وت كاك عادل مورادو كاك عه‌بدولڕه‌زاق میرزاو كاك د.خدر بوون، هه‌ندێك هه‌ڤاڵی تر خوالێخۆشبوو نوری شاوه‌یس بوو، ئه‌مانه‌ بۆیان گێڕاینه‌وه‌ كه‌ كاره‌ساته‌كه‌ چۆن روویداوه‌و رێككه‌وتنی جه‌زائیر له‌نێوان شاو سه‌دام و خیانه‌تی شا له‌كوردو ئه‌و بارودۆخه‌ی هاتبووه‌ كایه‌وه‌ روون نه‌بوو له‌به‌رچاوی سه‌ركردایه‌تیی شۆڕش كه‌ چی بكات و چی نه‌كات؟ بۆیه‌ بڕیاری چوونه‌ ئێران دراو رێش درا به‌و كه‌سانه‌ی كه‌ده‌یانه‌وێت بچنه‌وه‌ عیراق، هه‌ندێك له‌وانه‌ی چووبوونه‌وه‌ عیراق به‌تایبه‌تی شه‌هیدان خالیدو عه‌لی عه‌سكه‌ری و كاك عومه‌ر ده‌بابه‌و كاك ره‌سول مامه‌ندو هه‌ندێك له‌و براده‌رانه‌ به‌و ئومێده‌ چووبوونه‌وه‌ كه‌له‌وێ شتێك دروستكه‌نه‌وه‌، ئه‌گه‌ر حكومه‌ت رێی پێدان حزبێكی ئاشكرا ، ئه‌گه‌رنا خۆیان كارێكی نهێنی بكه‌ن و دوای ئه‌وه‌ی زه‌مینه‌ خۆشده‌كه‌ن بنێرن به‌دوای خوالێخۆشبوو مامۆستا برایم ئەحمەدیشدا بۆ ئه‌وه‌ی بچێته‌ لایان، كاتێ مامۆستا برایم ئەحمەد ته‌شریفی هێنا بۆ سوریا من بینیم و قسه‌م له‌گه‌ڵ كردو باسی ئه‌وه‌م بۆ كرد كه‌ئێمه‌ به‌نیازین رێكخراوێك دروست بكه‌ین و بچینه‌وه‌ كایه‌و به‌گشتی بیروباوه‌ڕێ كه‌ له‌مێشكمدا بوو ده‌رباره‌ی چۆنیه‌تی دروستكردنی یه‌كێتیی نیشتمانیی كوردستان بۆم باسكرد، پێی باش و په‌سه‌ند بوو هه‌تا ناوه‌كه‌شی پێ باشبوو كه‌بكرێته‌ یه‌كێتیی نیشتمانیی كوردستان و باسی ئه‌وه‌شم بۆ كرد كه‌ئێمه‌ ده‌مانه‌وێت رێكخراوێكی نیمچه‌ به‌ره‌یی بێت و شتێكی تازه‌ بێت، هه‌موو ئه‌و شتانه‌ی پێ باشبوو.
به‌یروت وێستگه‌یه‌كی دیكه‌ بوو
دوای ئه‌وه‌ ئێمه‌ خۆمان ئه‌وانه‌ی كه‌ یه‌كێتییه‌كه‌مان دوایی دامه‌زراند له‌به‌یروت كۆبوونه‌وه‌یه‌كمان كردو یه‌كترمان دیت و من و به‌تایبه‌تی د.فوئاد مەعسوم و كاك عادل مورادو كاك عه‌بدولڕه‌زاق میرزا، بڕیارماندا كه‌ به‌ڵێ ئه‌و ئیشه‌ بكه‌ین و ئه‌وه‌ كارێكی گرنگه‌ ده‌بێت هه‌ڵسینه‌وه‌و هه‌ڵسانه‌وه‌و به‌رخودان له‌كوردستان رابگه‌یه‌نینه‌وه‌، یه‌كه‌مجار هه‌ندێك قسه‌مان كرد كه‌ده‌مانه‌وێت بگه‌ڕێینه‌وه‌و من لێدوانێكم دا كه‌ ئه‌وا‌ خۆم ئاماده‌ ده‌كه‌م بگه‌ڕێمه‌وه‌ كوردستان و به‌ئومێدی ئه‌وه‌ی كه‌ئه‌و براده‌رانه‌ی له‌شاخ ماونه‌ته‌وه‌ خۆ بگرن و نه‌چنه‌ نه‌ئێران و نه‌ بێنه‌وه‌ ناو حكومه‌تی عیراق و بنكه‌یه‌ك بمێنێت بۆ شۆڕش، به‌ڵام به‌داخه‌وه‌ ئه‌وه‌ سه‌ری نه‌گرت، كه‌ براده‌ران ته‌نانه‌ت براده‌رانی كۆمه‌ڵه‌ش ئه‌وه‌یان به‌باش زانیبوو كه‌ بچنه‌وه‌ بۆ وڵات و خه‌باتی سیاسیی خۆیان ده‌ست پێبكه‌نه‌وه‌و خۆ سازدان بكه‌ن بۆ جارێكی تر، بۆیه‌ ئێمه‌ له‌هه‌وڵی خۆمان به‌رده‌وام بووین كه‌ شتێكی نوێ بهێنینه‌ كایه‌وه‌و من خۆم به‌شبه‌حاڵی خۆم په‌یوه‌ندییه‌كی توندم هه‌بوو له‌گه‌ڵ كۆمه‌ڵه‌ له‌به‌ر ئه‌وه‌ دڵنیا بووم كه‌ كۆمه‌ڵه‌ پشتیوانمان ده‌بێت و ده‌بێته‌ هێزی سه‌ره‌كی دانانی ئه‌م ئیشه‌، له‌هه‌مانكاتدا باوه‌ڕی ته‌واوم هه‌بوو به‌ئه‌وه‌ی كه‌ شه‌هیدان عه‌لی عه‌سكه‌ری و شه‌هید خالید سەعیدو كاك عومەر ده‌بابه‌و كاك ره‌سوڵ مامه‌ندو ئه‌وانه‌ به‌شداریی ده‌كه‌ن له‌هه‌ر كارێك كه‌بمانه‌وێت بیكه‌ین، ئێمه‌ دوای ئه‌وه‌ چووینه‌ شام له‌وێ ورده‌ ورده‌ بیرۆكه‌ی دامه‌زراندنی یه‌كێتیی نیشتمانیی كوردستانمان گه‌ڵاڵه‌كردو منیان سه‌رپشك كرد كه‌ به‌یاننامه‌كه‌ بنووسم، به‌یاننامه‌ی یه‌كه‌م بنووسم ئه‌و به‌یاننامه‌یه‌ی یه‌كه‌مم نووسی، له‌چایخانه‌یه‌ك كۆبووینه‌وه‌ به‌ناوی طلیطلە‌، ئه‌و كه‌سانه‌ی كه‌ كاره‌كه‌مان ده‌ستپێكرد بریتی بووین له‌ كاك د.فوئاد مەعسوم، كاك عادل موراد، كاك عه‌بدولڕه‌زاق میرزاو به‌نده‌ی موخلیستان، پاش ئه‌وه‌ی كه‌ به‌یاننامه‌كه‌مان ئاماده‌كرد په‌یوه‌ندیشمان هه‌بوو له‌گه‌ڵ حكومه‌تی سوریاو من شه‌خسی خۆم په‌یوه‌ندیم هه‌بوو له‌گه‌ڵ خوالێخۆشبوو سه‌رۆك حافز ئه‌سه‌د، ترسی ئه‌وه‌مان هه‌بوو به‌یاننامه‌كه‌مان له‌ڕۆژنامه‌و رادیۆو ته‌له‌فزیۆنی سوریا بڵاونه‌كرێته‌وه‌، چونكه‌ ناوی كوردستانی زۆر تێدابوو، ئه‌وسا له‌سوریا وشه‌ی كوردستان بڵاونه‌ده‌كرایه‌وه‌، په‌یوه‌ندیم كرد به‌خوالێخۆشبوو سه‌رۆك حافز ئه‌سه‌ده‌وه‌و وتی بینێره‌ من جێبه‌جێی ده‌كه‌م، بۆئه‌وم ناردو ئه‌ویش دای به‌ڕاگه‌یاندنی سوریاو بڵاوكرایه‌وه‌، ئه‌و بڵاوكراوه‌یه‌ وابزانم له‌22ی مایس بوو،  كۆبوونه‌وه‌كه‌شمان یان 21 بوو، یان 22 ی مایس بوو، ده‌قی ئه‌و به‌یانه‌ش به‌ده‌ستوخه‌تی من هێشتا لای كاك د.فوئاد مەعسوم ماوه‌، ئه‌و ورده‌كارییانه‌ زۆرتر كاك د.فوئاد مەعسوم لێی ده‌زانێت، دیاره‌ ئه‌وه‌ بوو به‌هۆی ئه‌وه‌ی كه‌دوایی له‌سه‌ر رۆژی دامه‌زراندنی یه‌كێتیی نیشتمانیی كوردستان خیلافمان هه‌بێت، ئێستا باسی ده‌كه‌م چۆن بوو، كه‌ له‌وێ ئه‌و به‌یانه‌مان ده‌ركرد من په‌یوه‌ندیم هه‌بوو له‌گه‌ڵ ناوه‌وه‌، په‌یوه‌ندیم كرد به‌هه‌ڤاڵانی كۆمه‌ڵه‌ ئه‌وكاته‌ شه‌هید شیهاب و براده‌ره‌كانی له‌ده‌ره‌وه‌ بوون و ئه‌وانیش كه‌ یه‌كێك بنێرن، ئه‌وه‌ بوو دوایی كاك فه‌ره‌یدون عه‌بدولقادر یان نارد، له‌و ماوه‌یه‌دا من چووم بۆ ئه‌وروپا، پێشتر په‌یوه‌ندیم هه‌بوو له‌گه‌ڵ كاك نه‌وشیروان مسته‌فا، ئه‌و ماوه‌یه‌ ناوبه‌ناو نامه‌مان بۆ یه‌كتر ده‌نووسی، ئاگاداری كاك نه‌وشیروانم كرد، كاك نه‌وشیروان فكره‌كه‌ی پێ باشبوو، هه‌روه‌ها نامه‌م نووسی بۆ كاك كه‌مال فوئادو خۆشم چووم له‌به‌رلین كۆبووینه‌وه‌و هه‌ڤاڵان كاك نه‌وشیروان مسته‌فاو كاك د.كه‌مال فوئادو كاك د.عومه‌ر شێخ موس بوون به‌ئه‌ندامی ده‌سته‌ی دامه‌زرێنه‌ری یه‌كێتیی نیشتمانیی كوردستان، به‌و جۆره‌ بووین به‌ 7 كه‌س له‌دامه‌زراندنی یه‌كێتیی نیشتمانیی كوردستاندا.
په‌كخستنی تاوانێكی گه‌وره‌
هەر لەباسی بەرلین و رۆڵی یەکێتی لەخەباتی دەرەوەی وڵاتدا، سەرۆک مام جەلال باسی تاوانێکی رژێمی بەعسی کردو باسی  ئه‌و  كۆبوونه‌وه‌یەی  كۆمه‌ڵێک خوێندكاری كوردی کرد لەبەرلین کە لە ساڵی ١٩٨٠ بەڕێوەچوو، لەو بارەیەوە وتی:  له‌و كۆبوونه‌وه‌یه‌ به‌شداریمان كردو له‌و كۆبوونه‌وه‌یه‌ی خوێندكاران یه‌كێك له‌تاوانه‌ گه‌وره‌كانی حكومه‌تی عیراق په‌كی خرا، حكومه‌تی عیراقی سه‌دامی بڕیاریدابوو ئه‌و كۆبوونه‌وه‌یه‌ بته‌قێنێته‌وه‌ كه‌ خوێندكارانی كوردی تێدابوو، له‌بینایه‌ك ده‌كرا كه‌ سه‌دان خوێندكاری بێگانه‌شی تێدا بوو بێ ئه‌وه‌ی گوێ بده‌نه‌ ئه‌وه‌ له‌گه‌ڵ كوردێك په‌یوه‌ندییان كردبوو كه‌ جانتایه‌كی ده‌ده‌نێ، ئه‌و جانتایه‌ بباته‌ كۆبوونه‌وه‌كه‌و له‌وێ بته‌قێته‌وه‌و خۆی بێته‌ ده‌رێ، ئه‌و كوڕه‌ كوردپه‌روه‌ربووه‌، هه‌واڵی براده‌رانی كورد په‌روه‌ر ده‌دات، ئه‌وانیش هه‌واڵی پۆلیسی ئه‌ڵمانیای به‌رلینی خۆرئاوا ده‌ده‌ن، پۆلیسی به‌رلینی خۆرئاواش ده‌ڵێت باشه‌ پێیان بڵێن باشه‌و ئێمه‌ چاودێری ده‌كه‌ین و كه‌دێت جانتاكه‌ ته‌سلیم كات، ده‌یگرین، واده‌كه‌ن و ئه‌وانه‌ خۆیان ده‌كه‌نه‌ كه‌ناس و ئیشكه‌رو له‌وێ ئه‌و پۆلیسی نهێنی به‌رلینی خۆرئاوا، ئه‌و رۆژه‌ی ئه‌و دیپلۆماته‌ عیراقییه‌ی له‌به‌رلینی خۆرهه‌ڵاته‌وه‌ دێت، جانتاكه‌ی پێیه‌، ته‌بعه‌ن كورده‌كه‌ی خۆشمان هه‌واڵی داوه‌ كه‌دێت، ده‌چێت كه‌ته‌سلیمی ده‌كه‌ن ئه‌و كرێكارو كه‌ناس و شتانه‌ په‌لاماری ده‌ده‌ن و ده‌ڵێن ده‌ست به‌رزكه‌و ده‌یگرن و جانتاكه‌ ده‌كه‌نه‌وه‌و ده‌زانن ئه‌وه‌ی تێدایه‌و ده‌یگرن، ئه‌وه‌ فه‌زیحه‌تێكی دروست كرد بۆ حكومه‌تی عیراق، دوایی حكومه‌تی عیراق زۆری له‌حكومه‌تی ئه‌ڵمانیا كرد، حكومه‌تی ئه‌ڵمانیا به‌داخه‌وه‌ ملی شۆڕ كرد بۆ فشاری حكومه‌تی عیراق و بوو به‌هۆی ئه‌وه‌ی كه‌ ئه‌و تاوانباره‌ به‌ر بدرێت، یه‌كه‌م كاری تیرۆریستی ریسواكراو بوو له‌ئه‌وروپا كه‌ ئه‌و كابرایه‌ پێی هه‌ڵسابوو، خولاسه‌ له‌و به‌ڵایه‌ رزگارمان بوو.
ده‌نگوباسی براده‌رانی ناوه‌وه‌
دوایی كۆبوونه‌وه‌مان كرد ئه‌وه‌نده‌ی كه‌ له‌وێ بووین، له‌كۆبوونه‌وه‌كه‌ هه‌ندێك گۆڕانكاری له‌سه‌ر به‌یانی دامه‌زرێنه‌ر كراو ئیشه‌كانمان دابه‌شكردو كاك نه‌وشیروان مسته‌فا ئاماده‌یی خۆی نیشاندا كه‌ بگه‌ڕێته‌وه‌ بۆ كوردستان و یه‌كه‌مجار بێته‌ سوریاو له‌پاشان بچێته‌وه‌ بۆ كوردستان بۆ ئیشكردن، چونكه‌ ئێمه‌ بڕیارمان دابوو پاش ساڵێك له‌ دامه‌زراندنی یه‌كێتیی نیشتمانیی كوردستان، شۆڕش هه‌ڵگیرسێنینه‌وه‌و بۆ ئه‌وه‌ش كه‌په‌یوه‌ندیمان كردبوو له‌گه‌ڵ براده‌رانی ناوه‌وه‌، كه‌ كاك فه‌ره‌یدون عەبدولقادر هات ده‌نگوباسی براده‌رانی بۆهێناین و له‌وه‌ تێگه‌یشتین كه‌براده‌ران هه‌نه‌و ئاماده‌ییان هه‌یه‌و پێیان باشبوو بیروباوه‌ڕه‌كه‌و من ئاگادارم كردن و وتم كاك فه‌ره‌یدون ئاگاتان له‌ خۆتان و له‌پاراستنی خۆتان بێت و براده‌رێك به‌هۆی ئه‌وانه‌وه‌ په‌یوه‌ندیی كردبوو، ئه‌و براده‌ره‌ لەحه‌ره‌كه‌ی ئیشتراكی عه‌ره‌بی بوو، گیرابوو، جارێك هاتبوو بۆ لامان، وتم ئاگاتان له‌و پیاوه‌ بێت، نه‌وه‌ك ئه‌م پیاوه‌ ئیعتراف بكات و ببێته‌ هۆی ئاشكرابوونتان و خۆتان له‌وه‌ بپارێزن، ئه‌و مێژووه‌ بۆ كاك فه‌ره‌یدون و ئه‌وان به‌جێده‌هێڵم چی به‌سه‌ر هات، به‌ڵام به‌داخه‌وه‌ ئه‌وه‌ نه‌كراو له‌ئه‌نجامدا ئه‌و براده‌ره‌ی حه‌ره‌كه‌ی ئیشتراكی عه‌ره‌بی ئیعترافی له‌سه‌ر براده‌رێكی ئێمه‌ كرد كه‌ له‌گه‌ڵ ئه‌و له‌هه‌مان دائیره‌ ئیشی ده‌كرد، ئه‌و گیراو ئیتر بووه‌ به‌هۆی ئه‌وه‌ی كه‌ كاك شیهاب و ئه‌وانیش راكه‌ن و بچنه‌ ئێران، كه‌ رایان كرد بۆ ئێران به‌داخه‌وه‌ خه‌به‌ری منیان نه‌دا، ئه‌گه‌ر خه‌به‌ری منیان دابا مومكین بوو شتێكمان بكردبا، چونكه‌ ئه‌و سه‌رده‌مه‌ شای ئێران ده‌یویست په‌یوه‌ندیمان پێوه‌ بكات، زانیبووی ئێمه‌ یه‌كێتیی نیشتمانیی كوردستانمان دروستكردووه‌، هه‌روه‌ها زانیبووی كه‌ئێمه‌ ئه‌وه‌ كه‌وتووینه‌ته‌وه‌ گه‌ڕ ده‌یویست پاكانه‌ بۆ خۆی بكات، سه‌رهه‌نگێكی كورد عیسا په‌ژمانی ناردبوو له‌ڕۆماوه‌ ته‌له‌فۆنی له‌گه‌ڵ كردم وتی ئێمه‌ ده‌مانه‌وێت بۆتان روون بكه‌ینه‌وه‌و ئێوه‌ خۆتان ئه‌و بڕیاره‌تان داوه‌و ئه‌وه‌ به‌ئه‌مری شا نه‌بووه‌و شا ئاماده‌یه‌ هاوكاریتان بكات و ئه‌وانه‌، من ئه‌گه‌ر بمزانیبا كاك شیهاب و ئه‌وان رۆیشتوونه‌ بۆ ئێران ئه‌وێ رۆژێ به‌ڕاستی كۆبوونه‌وه‌كه‌م قبوڵنه‌كرد، قبوڵم ده‌كردو داده‌نیشتم له‌گه‌ڵی و داوام لێده‌كرد ئه‌وانه‌م بۆ بنێرن بۆ شام، ئه‌وه‌یان به‌من نه‌گوتبوو هه‌تا دوایی په‌یوه‌ندیشمان نه‌بوو رۆژانه‌و هه‌تا ئه‌وان دوایی ته‌سلیم بوونه‌وه‌و گیران و له‌سێداره‌دران، ته‌بعه‌ن ئه‌و كاته‌ی كه‌گیران ئێمه‌ هه‌ڵمه‌تێكی گه‌وره‌مان كرد بۆ كاك شیهاب، كاك شیهاب-مان كرده‌ زیندانی ساڵ له‌هه‌موو دنیاو له‌هه‌موو دنیادا هه‌زاران بروسكه‌و ئیمزامان كۆكرده‌وه‌ بۆ رزگاركردنیان، به‌ڵام به‌داخه‌وه‌ سه‌دام گوێی نه‌دا به‌هیچ و له‌سێداره‌ی دان.
په‌یوه‌ندیی له‌گه‌ڵ حكومه‌تی سوری و لیبییه‌كان
كه‌ كاك فه‌ره‌یدون عەبدولقادر هات ئێمه‌ ئیتیفاقمان له‌گه‌ڵ كاك فه‌ره‌یدون كرد كه‌ئه‌وان له‌ناوه‌وه‌ ده‌ست بكه‌ن به‌ئیش و ئێمه‌ش ورده‌ ورده‌ له‌شام خه‌ڵكمان كۆكرده‌وه‌و حكومه‌تی سوری رێیدان كه‌ سه‌ربازگه‌یه‌ك دروست بكه‌ین بۆ مه‌شق به‌پێشمه‌رگه‌و خۆسازدان بۆ شۆڕشی نوێ و یارمه‌تیشی داینێ، هه‌ر راستییه‌كه‌ی پێویسته‌ ئه‌مه‌ش بڵێم كه‌ من پێشتر په‌یوه‌ندییه‌كم هه‌بوو له‌گه‌ڵ لیبییه‌كان، جارێكیان ده‌عوه‌تیان كردم كه‌چووم بۆ ئه‌وێ ماڵیان ئاوا بێت وتیان ئاماده‌ین یارمه‌تیت بده‌ین و ده‌زانین تۆ رۆڵت چی بووه‌ له‌حه‌ره‌كه‌ی كوردی و چه‌ندی پاره‌ت ده‌وێت ده‌تده‌ینێ، وتم وه‌ڵڵاهی سوپاستان ده‌كه‌م ئێستا من هیچم ناوێت، به‌ڵام ئه‌گه‌ر ئیشمان كرده‌وه‌و ده‌ستمان به‌كار كرد ئه‌وا من هه‌وڵ ده‌ده‌م كه‌ بێمه‌ لای ئێوه‌و داوای یارمه‌تیتان لێبكه‌م، كه‌ده‌ستمان به‌ئیش كرد چووم بۆ لایان و وتم ئه‌وه‌ ده‌ستمان به‌ئیش كردووه‌و یه‌كێتی-مان داناوه‌، وتیان باشه‌ چه‌ندت ده‌وێت، هه‌زار ره‌حمه‌تی لێ بێت وه‌زیری جه‌نگه‌كه‌یان وتی، من وتم 50 هه‌زار پاوه‌نی لیبی، وتی باشه‌و ئه‌مرێكی ده‌ركرد بمانده‌نێ و ئه‌وه‌ سه‌رچاوه‌ی داراییمان بوو، مه‌رحوم حافز ئه‌سه‌د وتی چه‌كتان ده‌ده‌ینێ، ئه‌وه‌ چه‌كیشمان بوو، ماوه‌ ته‌ئیدی سیاسی ده‌ولی، من ده‌مه‌وێت ئه‌وه‌ش بگێڕمه‌وه‌ ته‌ئیدی سیاسی ده‌ولی پێش ته‌واو بوونی شۆڕشی كورد كه‌ له‌سه‌روبه‌ری ته‌واوبوون بوو، رێككه‌وتننامه‌ی جه‌زائیر كرابوو، پریماكۆڤ كه‌دوایی بوو به‌سه‌رۆكی وه‌زیرانی روسیا داوای كرد من له‌قاهیره‌ بووم هاتمه‌ به‌یروت بۆ دیتنی، پێی وتم ئێمه‌ وەک ده‌وڵه‌تی سۆڤێتی بڕیارمانداوه‌ كه‌سیاسه‌تی خۆمان بگۆڕین و دۆستایه‌تی بكه‌ینه‌وه‌ له‌گه‌ڵ كوردو یارمه‌تی كورد بده‌ین و وه‌كو جاران به‌و شه‌رته‌ی ئێوه‌ شۆڕشه‌كه‌تان ده‌وام پێبكه‌ن و بانه‌بڕێته‌وه‌، پێیان خۆش نه‌بوو شۆڕشی كورد ببڕێته‌وه‌، دیاره‌ من ئه‌و هه‌واڵه‌م گه‌یاند به‌سه‌ركردایه‌تیی شۆڕشی كوردستان و كات تێپه‌ڕی بوو، دوای ئه‌وه‌ من په‌یوه‌ندیم هه‌ر مابوو له‌گه‌ڵ پریماكۆڤ و پێم وت ئه‌وه‌ ئێمه‌ خه‌ریكین و یه‌كێتیی نیشتمانیی كوردستانمان دروستكردووه‌، خه‌ریكین خۆمان سازده‌ین بۆ شۆڕشی داهاتوو، ده‌مانه‌وێت له‌گه‌ڵ ئێوه‌ په‌یوه‌ندیمان هه‌بێت و وتی باشه‌، پاش ماوه‌یه‌ك سه‌فه‌رێكی به‌نهێنی بۆ رێكخستم بۆ مۆسكۆ، چوومه‌ به‌رلین كه‌ له‌به‌رلینی خۆرهه‌ڵاته‌وه‌ بێن، هاتن له‌به‌رلینی خۆرهه‌ڵاته‌وه‌ منیان برد بۆ مۆسكۆ به‌دزییەوە، له‌وێ له‌ جێگایه‌ك له‌ده‌ره‌وه‌ی شار دایاننام، لێپرسراوه‌ حزبییه‌كانم دیتن و سیاسه‌تی خۆمانم بۆ باسكردن كه‌ئێمه‌ به‌نیازین شۆڕش بكه‌ینه‌وه‌و یه‌كێتی وایه‌و تازه‌یه‌و ورده‌ ورده‌ ده‌ستمان كردووه‌ به‌ته‌نزیماتیش له‌ناوه‌وه‌ی شار، پێیان خۆشبوو، پێیان وتم باشه‌ ئێمه‌ یارمه‌تیتان ده‌ده‌ین به‌شه‌رتێك ئه‌و یارمه‌تییه‌ نهێنی بێت، به‌شه‌رتێك سه‌دام نه‌زانێت ئێمه‌ ئاماده‌ین، په‌یوه‌ندییان له‌گه‌ڵ كردین و ئێمه‌ له‌به‌یروت یه‌ك شتیان پێ وتین كه‌ سۆڤێتییه‌ت نوێنه‌ری ئێمه‌ ببینێت ناو به‌ناو، به‌ڵێنی یارمه‌تیشیان پێداین، زۆر به‌داخه‌وه‌ ئه‌و په‌یوه‌ندییه‌ ئاشكرابوو، دوایی باسی ده‌كه‌م جاسوسێك هه‌بوو له‌ناوماندا جاسوسی حكومه‌تی عیراق بوو، ئه‌و ئه‌وشتانه‌ی هه‌موو گه‌یاندبوو به‌حكومه‌تی عیراق، هه‌م ئه‌وه‌ی لیبییه‌كانی گه‌یاندبوو، هه‌م ئه‌وه‌ی سۆڤێتییه‌كانی گه‌یاندبوو، ئیتر ئه‌و هه‌وڵه‌شمان سه‌ری نه‌گرت به‌هۆی خیانه‌تی ئه‌و كابرایه‌وه‌.
سه‌دام چی وت؟
به‌ڵام دیسان ده‌ستمان كردبوو به‌كاركردن، من پشتیوانم زۆرتر جه‌بهه‌ی شه‌عبی ته‌حریری فه‌له‌ستین بوو كه‌ سه‌رۆكه‌كه‌ی خوالێخۆشبوو د.جۆرج حه‌به‌ش زۆر دۆستم بوو، من پێشتر له‌گه‌ڵ ئه‌وان دووساڵ ئیشم كردبوو، روتبه‌ی ملازمم هه‌بوو له‌ناویانداو ئه‌و به‌ڕاستی زۆر به‌گه‌رمی هات به‌پیرمانه‌وه‌و وتی هه‌موو جۆره‌ یارمه‌تییه‌كت ده‌ده‌م هه‌تا وتی من یه‌كێتیی نیشتمانیی كوردستان به‌جه‌بهه‌ی شه‌عبی كوردستان حساب ده‌كه‌م، چۆن جه‌بهه‌ی شه‌عبی له‌فه‌له‌ستین به‌نرخه‌ لای من، یه‌كێتیی نیشتمانیی كوردستانیش له‌كوردستان وه‌كو جه‌بهه‌ی شه‌عبی وابێت حساب و نرخی بۆ ده‌كه‌م، وتی من ئاماده‌م بۆ مه‌شق و بۆ چه‌ك و ئه‌و شتانه‌ی كه‌ بتانه‌وێت به‌سه‌ر چاو یارمه‌تیتان ده‌ده‌م، جارێكیش ده‌چێته‌ به‌غداو به‌حكومه‌تی عیراق ده‌ڵێت ئێوه‌ له‌گه‌ڵ كورد هه‌قه‌ باش بن و یارمه‌تی كورد بده‌ن، بۆئه‌وه‌ی كورد مافێكی هه‌بێت و ئه‌و حوكمی زاتییه‌ی ده‌ڵێن ببێته‌ راسته‌قینه‌، پێیان ده‌ڵێت ئه‌وه‌ من جه‌لال دۆستمه‌و هاتۆته‌ لام و پێی وتووم كه‌ ئه‌گه‌ر هه‌ق بده‌ن باشه‌، نه‌یده‌ن پاش ساڵێكی تر شۆڕش ده‌ست پێده‌كه‌نه‌وه‌، سه‌دام پێكه‌نی بوو، وتبووی وه‌ڵڵا ئه‌گه‌ر دارخورما له‌سه‌ر سه‌ری جەلال بڕوێت‌، ناتوانێت شه‌ش كه‌س به‌رێته‌وه‌ شاخ، تازە ئه‌و بابه‌یان مرد جارێكی تر بتوانن ئه‌وان له‌كوردستان شۆڕش بكه‌نه‌وه‌، خه‌ونه‌ ئه‌وه‌، ئه‌وه‌ وه‌ڵامه‌كه‌ی ئه‌و وابوو، له‌به‌ر ئه‌وه‌ ئه‌و هه‌وڵه‌ش كه‌ د.جۆرج حه‌به‌ش دای، سه‌ری نه‌گرت.
ده‌ستگیركردنی شه‌هید شیهاب‌و براده‌ره‌كانی
بێگومان پاش ده‌ستگیركردنی شه‌هید شیهاب‌و  ئه‌وان ده‌ستمان كرد به‌په‌یوه‌ندیی له‌گه‌ڵ سه‌ركردایه‌تیی ناوه‌وه‌، ئه‌وكاته‌ سه‌ركردایه‌تیی كۆمه‌ڵه‌ سه‌ركردایه‌تیی تازه‌ هاتبوو، كاك شه‌هید ئارام لێپرسراویان بوو، ئه‌ندامه‌ چالاكه‌كانی مه‌لا به‌ختیار بوو، شه‌هید ئازاد هه‌ورامی بوو، كاك سالار عەزیز، ئه‌مانه‌ كاك به‌ختیارو كاك سالارو شه‌هید ئازادو كاك ئارامیش هه‌موویان هاتنه‌ ده‌ره‌وه‌و ئه‌وانیش ده‌ستیان كرد به‌چالاكی، شه‌هید ئارام یه‌كه‌م كوراسی (الاتحاد الوطنی ‌الكردستانی لماذا؟) یه‌كێتیی نیشتمانیی كوردستان بۆچی؟ وه‌ریگێڕا بۆ كوردی‌و  له‌ناو وڵات بڵاویكرده‌وه‌، ئه‌وانه‌ به‌ڕاستی رۆڵێكی باشیان هه‌بوو له‌دروستكردنی دوو شت، یه‌كه‌مینیان له‌دروستكردنی رێكخستن له‌كوردستاندا به‌ناوی یه‌كێتیی نیشتمانیی كوردستان، دوو له‌دروستكردنی مه‌فره‌زه‌ی چه‌كداردا كه‌ یه‌كه‌م مه‌فره‌زه‌ له‌هه‌ڵه‌بجه‌ هاته‌ ده‌ره‌وه‌، ئه‌وكاته‌ شه‌هید شه‌وكه‌تی حاجی موشیرو شه‌هید عەلی شیعەو كاكه‌ حه‌مه‌ی حاجی مه‌حمود كه‌ ئێستا سكرتێری حزبی سۆسیالیست دیموكراته‌و كاك حامیدی ‌حاجی غالی خۆمان كه‌ ئێستا سوپاس بۆ خوا زیندووه‌و كۆمه‌ڵێك له‌وانه‌ی كه‌ماون وابزانم هه‌ر ئه‌وانه‌ن‌و  ئه‌وانی تر شه‌هیدبوون، ئه‌وان یه‌كه‌م مه‌فره‌زه‌ بوون، ئێمه‌ مه‌فره‌زه‌یه‌كمان نارده‌وه‌ مه‌فره‌زه‌ی شه‌هید ئیبراهیم عه‌زۆ، هه‌روه‌ها دوای ئه‌وانیش كاك به‌ختیارو كاك سالارو كاك ملازم عومه‌رو ئه‌وانه‌ش هه‌موو دێنه‌ دره‌وه‌و ورده‌ ورده‌ مه‌فره‌زه‌ی بچكۆله‌یان دروستكرده‌وه‌، له‌پاشان كاك عومه‌ر ده‌بابه‌و كاك ره‌سوڵ مامه‌ندو كاك خالید سەعید هاتنه‌ ده‌ره‌وه‌، پێش ئه‌وه‌ی بێنه‌ ده‌ره‌وه‌، من نامه‌م بۆ هه‌رسێكیان نوسیبوو و پێموتبوون ئه‌وه‌ شۆڕش ده‌كه‌ینه‌وه‌و پێویسته‌ رۆڵی خۆتان ببینن‌و  ئێوه‌ پیاوی تێكۆشه‌رن، ئه‌وانیش هه‌موویان ده‌ربه‌ده‌ربوون‌و نه‌فی بوون له‌باشوور، هه‌رسێكیان دێنه‌وه‌و شه‌هید سه‌عدی گچكه‌و سه‌ید كاكه‌و ئه‌وانه‌ش هانده‌ده‌ن له‌گه‌ڵ خۆیان‌و دێنه‌ ده‌ره‌وه‌و بوون به‌هێزێكی گه‌وره‌، جه‌ماعه‌تێكیش له‌براده‌رانی عه‌شیره‌تی ئاكۆ ئه‌وانیش هاتبوونه‌ ده‌رێ‌و  ژماره‌ی چه‌كدار زۆر بوو، مه‌نگوڕه‌كان هاتبوونه‌ ده‌رێ، وایلێهات كه‌ براده‌ران دڵیان خۆشبوو كه‌ ئیتر ئینشائه‌ڵڵا زوو شۆڕش په‌ره‌ ده‌سێنێت، ئێمه‌ش له‌ده‌ره‌وه‌ پلانمان دانابوو  كه‌ هه‌ڤاڵان بنێرینه‌وه‌، لێره‌دا به‌ڕاستی ئه‌و هه‌ڤاڵه‌ی كه‌ رۆڵی رێكخستنه‌وه‌ی هاتنه‌وه‌ی دیت كاك نه‌وشیروان مسته‌فا بوو، كاك نه‌وشیروان مسته‌فا له‌كۆنه‌وه‌ دۆستی من بوو، كاتێ كه‌ یه‌كێتی دامه‌زرا نامه‌م بۆ نووسی‌و به‌گه‌رمی به‌پیرییه‌وه‌ هات‌و  بوو به‌ئه‌ندامی دامه‌زرێنه‌ر، چالاك بوو، پاشان به‌ڕاستی كه‌ پێویستمان به‌گه‌ڕانه‌وه‌ هه‌بوو، وتی من ده‌گه‌ڕێمه‌وه‌، هه‌رچه‌نده‌ دوا ساڵی دكتۆرای بوو، هه‌تا هه‌ندێك له‌دكتۆراكه‌ی نووسیبوو كه‌ وازی له‌وانه‌ هه‌مووی هێناو هاته‌وه‌ بۆ سوریا له‌قامیشلی سه‌رپه‌رشتیی مه‌فره‌زه‌كانی ده‌كرد‌و له‌گه‌ڵیاندا به‌ناو توركیادا هاته‌وه‌ بۆ ناو كوردستانی عیراق.
گه‌ڕانه‌وه‌ بۆ كوردستان
 ئه‌وه‌ یه‌كه‌م كه‌سی سه‌ركردایه‌تی بوو كه‌ گه‌ڕایه‌وه‌ بۆ ناوه‌وه‌ له‌ده‌سته‌ی دامه‌زرێنه‌ر، له‌پاشان ئه‌و براده‌رانه‌ داوای منیان كرد كه‌ منیش بگه‌ڕێمه‌وه‌، پاش ماوه‌یه‌ك واته‌ ساڵێك تێپه‌ڕی بوو به‌سه‌ر دامه‌زراندنی یه‌كێتیی نیشتمانیی كوردستان، له‌بیرمه‌ كاك نه‌وشیروان نامه‌یه‌كی بۆ نووسیبووم‌و ده‌ڵێت مام جه‌لال له‌سه‌ر هیچ خۆت دوامه‌خه‌ یان له‌سه‌ر پاره‌، وه‌ره‌وه‌ ئیشمان پێته‌ تا خۆت بێیته‌وه‌ به‌په‌له‌.
به‌جێهێشتنی نه‌خۆشخانه‌ 
منیش به‌ڕاستی له‌به‌یروت بووم دایكی بافڵ-م بردبوو بۆ نه‌خۆشخانه‌‌و قوباد به‌ڕێوه‌بوو ببێت، ئیزنم له‌هێرۆش خواست وتی بڕۆوه‌ قه‌یناكه‌، هاتم به‌جێم هێشت له‌لای دایكی‌و  ئه‌وو كاك د.له‌تیف له‌گه‌ڵی مانه‌وه‌، چوومه‌ رۆما، له‌ڕۆما چوومه‌ ئه‌سته‌نبوڵ، له‌ئه‌سته‌نبوڵ به‌نیازبووم شه‌هید حه‌سه‌ن خۆشناو له‌گه‌ڵ شه‌هید نه‌جمه‌دین بیوكایه‌، چاوه‌ڕوانم بكه‌ن، ئه‌و رۆژه‌ نازانم له‌به‌رچ هۆیه‌ك له‌فڕۆكه‌خانه‌ نه‌بوون، منیش چوومه‌ ئوتێلێك، به‌ڵام ناوو ئه‌دره‌سی  پارێزه‌رێكی كوردیان دابوومێ‌و  چووم بۆ لای ئه‌و پیاوه‌، بێگومان ئه‌و پیاوه‌ نه‌ له‌كوردی باش له‌یه‌كتێده‌گه‌یشتین، نه‌ئینگلیزیی ده‌زانی، منیش به‌فه‌ڕه‌نسییه‌ شڕه‌كه‌ی خۆم قسه‌م له‌گه‌ڵ كرد، ئه‌و كه‌مێك فه‌ڕه‌نسی ده‌زانی، تێمگه‌یاند كه‌ من دۆسته‌كه‌ی نه‌جمه‌دین بیو كایه‌م‌و هاتووم: وتی وه‌ڵڵا به‌یانی لێره‌بوو، به‌ڵام نازانم وه‌عده‌ كه‌ بێته‌وه‌، ئیتر وتم پێی بڵێ دۆسته‌كه‌ت هاتووه‌و له‌فڵان ئوتێله‌، وتی باشه‌، دوعا خوازیم لێكردو ئه‌و نه‌یناسیم من كێم، هاتم ده‌گه‌ڕامه‌وه‌و له‌سه‌ر پردێك تووشی شه‌هید حه‌سه‌ن خۆشناو و شه‌هید نه‌جمه‌دین بیو كایه‌ بووم، پاش چاك‌و چۆنی، له‌گه‌ڵم هاتن‌و جێگه‌كه‌یان بۆ گۆڕیم‌و بردمیانه‌ ئوتێلێكی ترو له‌وێ ماینه‌وه‌و له‌ئه‌سته‌نبوڵه‌وه‌ به‌پاسی سه‌فه‌ری هاتین به‌ره‌و سنوور، هاتینه‌ ئه‌نقه‌ره‌، له‌ئه‌نقه‌ره‌ یه‌ك دوو رۆژ ماینه‌وه‌و هه‌ندێك له‌كورده‌ ناوداره‌كان یه‌كێك له‌وانه‌ مامۆستا كه‌مال بورقاییم بینی به‌ناوی راستیی خۆمه‌وه‌ قسه‌م له‌گه‌ڵ كردو پێموت: ئێمه‌ ده‌چینه‌وه‌ شۆڕش ده‌كه‌ین‌و  شۆڕش كراوه‌، ئه‌وكاته‌ جه‌ماعه‌تێكیش هه‌بوون پێیان ده‌وتن (ده‌ ده‌ كا ده‌)، ئه‌وانیش دۆستایه‌تی ئێمه‌یان ده‌كرد له‌ئه‌نقه‌ره‌وه‌ هاتین بۆ دیاربه‌كر، له‌دیاربه‌كر له‌ماڵی كاك عومه‌ر چه‌تین بووین كه‌ لێپرسراوی ئه‌و رێكخراوه‌ی ده‌ ده‌ كه‌ ده‌ بوو، شه‌وێك له‌وێ ماینه‌وه‌و بۆ به‌یانی ئه‌وان هه‌موو له‌گه‌ڵمدا هاتن ماڵیان ئاوابێت، به‌دوو ئۆتۆمبێل له‌گه‌ڵم هاتن بۆ وان، له‌ وان-یش بردیانم بۆ ماڵی براده‌رێكی خۆیان وابزانم ناوی عه‌لی شێر بوو، پاش ئه‌وه‌ی كه‌ شه‌وێك له‌وێ بووین، رۆژی دووه‌م به‌ڕێكه‌وتین به‌ره‌و ماسێرۆ بۆ سه‌ر سنووری كوردستانی عیراق‌و  توركیاو ئێران، سێ سوچه‌كه‌، له‌وێ یه‌كه‌مجار تووشی كاك به‌ختیار بووم كاك مەلا به‌ختیارم نه‌بینی بوو، یه‌كه‌مجار له‌وێ بینیم، هه‌روه‌ها كاك ره‌سول مامه‌ندیشم بینی له‌وێ له‌گه‌ڵی بوو، ئه‌وان ده‌چوون بۆ ده‌ره‌وه‌ بۆ سوریا ، كه‌مێكی تری پێچوو كاك نه‌وشیروان هات به‌پیرمه‌وه‌ له‌گه‌ڵم هاته‌وه‌ بۆ ناوه‌وه‌، هه‌ورازێك بوو پێكه‌وه‌ هه‌ڵده‌گه‌ڕاین، منیش حاڵم شڕبوو له‌هه‌ورازدا، كاك نه‌وشیروان وتی: مام جه‌لال وه‌ڵڵا به‌خێربێیته‌وه‌، ئه‌گه‌ر ئه‌و براده‌رانه‌ له‌شكستدا نه‌بوونایه‌، ئێستا ئیشه‌كه‌ له‌شكسته‌و خه‌ڵك ته‌سلیم ده‌بێته‌وه‌و ده‌ڕواته‌وه‌و ئیشه‌كه‌ روو له‌شكست نه‌بووایه‌، پێم ده‌وتیت بگه‌ڕێیره‌وه‌، چونكه‌ ته‌نها ناومان یه‌كه‌ له‌گه‌ڵ براده‌رانی ناوه‌وه‌، نه‌بیروباوه‌ڕمان، نه‌سیاسه‌تمان، نه‌بۆچوونمان وه‌كو یه‌كه‌، وتی: به‌ڵام ئێستا چونكه‌ له‌شكستن ده‌بێت له‌ناویان بین، له‌شكستدا نابێت ئێمه‌ میلله‌تی خۆمان‌و براده‌رانی خۆمان به‌جێبهێڵین، وتم: باشه‌ به‌سه‌رچاو، هاتینه‌وه‌و هاتینه‌ سه‌ر شاخه‌كه‌و خوار بووینه‌وه‌و هاتینه‌وه‌ ناو سنوور، سێ سنووره‌كه‌ كه‌ دوایی ناویان لێنابوو دۆڵه‌ فشه‌، له‌وێ بووین براده‌رانی ناوه‌وه‌ش هاتبوون، له‌وێ كۆبوونه‌وه‌مان كردو بۆ یه‌كه‌مجار سه‌ركردایه‌تیمان دانا، سه‌ركردایه‌تیی ناوه‌وه‌و سكرتێری گشتیمان هه‌ڵبژارد، منیان هه‌ڵبژارد به‌سكرتێری گشتی‌و شه‌هید عه‌لی عه‌سكه‌ری به‌فه‌رمانده‌ی گشتیی هێزی پێشمه‌رگه‌ی كوردستان، تائه‌و رۆژه‌ ئێمه‌ سكرتێرمان نه‌بوو له‌ده‌ره‌وه‌ هه‌ر ده‌سته‌ی دامه‌زرێنه‌ر هه‌موو پێكه‌وه‌ ئیشمان ده‌كردو هیچ كه‌سێك سكرتێری یه‌كه‌م‌و  دووه‌ممان نه‌بوو، له‌وێ ئه‌و بڕیاره‌ دراو له‌وێ كۆمه‌ڵێك ناكۆكی هاته‌ نێوانمان‌و  قڕه‌و بڕه‌ روویداو ئه‌نجامه‌كه‌ی ماینه‌وه‌، هه‌رچه‌نده‌ من لایه‌نی كاك نه‌وشیروان-م گرت، من‌و كاك نه‌وشیروان بووینه‌ یه‌ك به‌ره‌و دوایی ورده‌ ورده‌ نێوانمان چاك بۆوه‌و پێكهاتینه‌وه‌، بڕیارماندا دابه‌ش ببین‌و  بێینه‌وه‌و بچینه‌وه‌ بۆ شوێنه‌ جیاجیاكان، له‌و براده‌رانه‌ی له‌بیرمه‌ كه‌ له‌وێ بوون كاك نه‌وشیروان بوو، شه‌هید عه‌لی عه‌سكه‌ری له‌وێ بوو، كاك سالارو مەلا به‌ختیار له‌وێ بوون، كاك سه‌ید دلێر سەید مەجید له‌وێ بوو یه‌كه‌مجار ئه‌ویشم له‌وێ بینی،  هه‌ندێك هه‌ڤاڵی دیكه‌ش له‌وێ بوون، ورده‌ ورده‌ دوایی هاتینه‌وه‌ بۆ ناوه‌وه‌ی وڵات كه‌ گه‌یشتینه‌وه‌ ناوه‌وه‌ی وڵات وه‌زعمان خراپ بوو، خه‌ڵك له‌ته‌سلیمبوونه‌وه‌دا بوو، شۆڕش روو له‌كزبوون بوو، به‌ڵام ئێمه‌ بڕیارماندا كه‌ بیژێنینه‌وه‌و هه‌ڵسینه‌وه‌، له‌ نۆكان ماوه‌یه‌ك ماینه‌وه‌ له‌پاشان حكومه‌تی ئێران هات ده‌ری كردین وتی نابێت لێره‌بن ئه‌وه‌ خاكی ئێمه‌یه‌، چووینه‌ توژه‌ڵه‌ هات له‌وێش ده‌ریكردین‌و وتی ئه‌وه‌ دێی ئێمه‌یه‌، پێشتر ئێمه‌ له‌قه‌ندیل بووین، له‌قه‌ندیل تازه‌ كاره‌ساتی هه‌كاری روویدابوو، من حه‌زده‌كه‌م باسی چۆنێتی ئه‌وه‌شتان بۆ بكه‌م، كاره‌ساتی هه‌كاری دیاره‌ دیراسه‌تێكی تایبه‌تی ده‌وێت، ته‌نها ئه‌وه‌یه‌ ئێمه‌ كاتی خۆی كه‌ ئه‌و براده‌رانه‌ له‌قه‌ندیل كه‌ بڕیاردرا بچن بۆئه‌وێ‌و  ته‌نها كاك د.مه‌حمود ئاگاداری كردن وتی وریابن وابچن كه‌ تووشی شه‌ڕ دێن، پشتی لێ مه‌كه‌نه‌وه‌، منیش پێموتن: كه‌ تورك هه‌ڕه‌شه‌یه‌كی ناردبوو پێشتر، به‌هۆی مه‌رحوم عیزه‌دین قۆجه‌وه‌، عیزه‌دین قۆجه‌وه‌ توركمانێك بوو له‌كه‌ركوك، یه‌كێك له‌پیاوه‌ ناسراوه‌كانی توركمانی كه‌ركوك بوو له‌له‌نده‌ن‌و دۆستمان بوو، له‌شام دۆستمان بوو، پێی وتم: وتی من له‌توركیا بووم‌و پێیان وتووم ئه‌گه‌ر هێزی یه‌كێتی به‌ناو ئێمه‌دا تێپه‌ڕێت له‌ناویان ده‌به‌ین، له‌به‌رئه‌وه‌ وتی تكایه‌ ئاگاتان له‌وه‌ بێت كه‌ به‌ناو توركیادا مه‌چن، ئه‌گینا تورك‌و جاشه‌كانی سه‌ر به‌توركیا لێتان ده‌ده‌ن، خولاسه‌ كاره‌ساته‌كه‌ قه‌ومابوو، ئێمه‌ش له‌دۆڵه‌ نێ بووین، دره‌نگ زانیمان كاره‌ساته‌كه‌ قه‌وماوه‌، به‌ڵام له‌وێ زانیمان، دۆڵه‌ نێ ئه‌ودیوی قه‌ندیله‌ به‌شی ئێران، حكومه‌تی ئێران ده‌یزانی له‌وێین ناو به‌ناو به‌هه‌لیكۆپته‌ر لێی ده‌داین، رۆژێكیان بڕیارماندا له‌وێ ده‌رچین، به‌ڵام ئه‌وكاته‌ ئێمه‌ 42 كه‌س مابووین، نیوه‌مان بێ چه‌ك بووین، په‌یوه‌ندیمان له‌گه‌ڵ ناوشار بچڕابوو، له‌و مه‌فره‌زانه‌ی كه‌ زیندوو مابوون ته‌نها مه‌فره‌زه‌یه‌ك بوو كه‌ كاك مه‌لا به‌ختیار قیاده‌ی ده‌كردو چالاك بوو ده‌هات‌و ده‌چوو، له‌هه‌ورامانه‌وه‌ تا ده‌شتی كۆیه‌ ده‌هات‌و ده‌چوو، ده‌مانویست هه‌ڵسینه‌وه‌ سه‌رله‌نوێ، رۆژێك هه‌لیكۆپته‌ری ئێرانی هه‌راسانیان كردبووین، رۆژێك كاك نه‌وشیروان منی جیاكرده‌وه‌، جا من ئه‌وه‌ یه‌كێكه‌ له‌و شتانه‌ی هی كاك نه‌وشیروانه‌، قه‌د قه‌د له‌بیرم ناچێت‌و  هه‌ر جارێك هه‌ر شتێكی سلبیش ببینم ئه‌و چاكه‌یه‌یم دێته‌وه‌ به‌رچاو، سلبییه‌كه‌ ده‌سڕێته‌وه‌ له‌به‌رچاوم، كاك نه‌وشیروان هات منی جیاكرده‌وه‌و وتی: مام جه‌لال پێتوایه‌ من تۆم خۆشبوێت؟، وتم: به‌ڵێ، پێتوایه‌ من په‌رۆشی پاراستنی تۆم؟، وتم: به‌ڵێ، وتی قسه‌یه‌كم هه‌یه‌، مام جه‌لال هه‌تا ئێستا سه‌ركرده‌كانی شۆڕشه‌كانی كورد له‌ده‌ره‌وه‌ی وڵات مردوون، یه‌كێك له‌سه‌ركرده‌كان له‌ناوه‌وه‌ نه‌مردووه‌، هێنایه‌وه‌ له‌سه‌رده‌می شێخه‌كانی توركیاو شێخه‌كانی نه‌هری‌و شێخ مه‌حمود‌و خوالێخۆشبوو جه‌نه‌راڵ مه‌لا مسته‌فاو ئه‌وانه‌، وتی بائێمه‌ من‌و تۆ له‌خاكی كوردستان بمرین، وتی بائێمه‌ وڵاته‌كه‌ چۆڵنه‌كه‌ین، شتێك به‌جێبهێڵین بڵین له‌سه‌ر فڵان گرد مام جه‌لال شه‌هیدبوو، له‌سه‌ر فڵان گرد نه‌وشیروان شه‌هیدبوو، ئه‌مه‌ بابكه‌ین به‌نه‌ریتێك بۆ كورد كه‌ سه‌ركرده‌كان له‌شكاندا به‌جێی ناهێڵن، منیش وتم: وه‌ڵڵاهی ماڵت ئاوابێت‌و  وه‌ڵڵا زۆر زۆرم پێباشه‌و قبووڵم كرد، ئیتر بڕیارماندا بێینه‌وه‌ ناو وڵات، هاتینه‌وه‌ ناو وڵات به‌سه‌ر قه‌ندیلدا هه‌ڵگه‌ڕاین، رۆژێك له‌به‌یانی تائێواره‌ هه‌تا سه‌ركه‌وتین، چونكه‌ به‌فربوو، به‌فره‌كه‌مان شكاند تا گه‌یشتینه‌ سه‌ر شاخی قه‌ندیل، بۆ یه‌كه‌مجار له‌سه‌ر شاخی قه‌ندیل دیتم ئاگر ده‌كرێته‌وه‌ له‌سه‌ر به‌فر، نه‌مدیبوو پێشتر له‌سه‌ر به‌فر ئاگر بكرێته‌وه‌، چیلكه‌و شتیان په‌یداكردبوو له‌سه‌ر به‌فره‌كه‌ ئاگرێكیان كرده‌وه‌و خۆمان پێ گه‌رمكرده‌وه‌، له‌و ناوچه‌یه‌ هه‌موو ره‌بایه‌ی سوپای عیراق لێبوو، جاشی لێبوو، ده‌بووایه‌ تاریكدابێت ئینجا ئێمه‌ بێینه‌ خواره‌‌وه‌‌و ئاڕاسته‌كه‌مان به‌ره‌و دۆڵی خێڵاب بوو، هاتینه‌ خواره‌وه‌و كه‌مێك رۆیشتین من هه‌ڵدێرام، د.مه‌حمود به‌دوامدا هات، ماڵی ئاوا بێت د.مه‌حمودیش ئه‌و چاكه‌یه‌ی له‌سه‌رم هه‌یه‌، به‌دوامدا هات نه‌وه‌ك بكه‌وێت ده‌ستی یان قاچی بشكێت، بۆئه‌وه‌ی بمگرێته‌وه‌و یارمه‌تیم بدات به‌و پێیه‌ی كه‌ دكتۆره‌، به‌ڵام گاشه‌به‌ردێك هه‌ردووكمانی گرته‌وه‌ له‌نیوه‌ی شاخه‌كه‌، به‌ڵام وه‌ره‌ جارێكی تر هه‌ڵگه‌ڕێوه‌ زۆر ناخۆش بوو، هه‌رچۆنێك بێت، به‌و شه‌وه‌ رۆیشتین گه‌یشتینه‌ دۆڵی خێڵاب، كه‌ گه‌یشتینه‌ ئه‌وێ، هیچمان نه‌بوو، نه‌پاره‌مان هه‌بوو، نه‌خواردنمان هه‌یه‌، نه‌شتێكمان هه‌یه‌، پێشمه‌رگه‌ بڵاوبوونه‌وه‌ بۆ كۆكردنه‌وه‌ی شتێك، قارچكی زۆر لێبوو، بۆ یه‌كه‌مجار له‌مێژووی ژیانی خۆمدا ئه‌و قارچكه‌ گه‌ورانه‌مان دیت، قارچكی زۆر گه‌وره‌، كه‌ پان‌و گه‌وره‌و ئه‌ستوور بوو، هێنایان ده‌مانخوارد، به‌ڵام چۆنمان ده‌خوارد نه‌خوێمان هه‌بوو، نه‌ مه‌نجه‌ڵمان هه‌بوو، نه‌ رۆنمان هه‌بوو، ده‌مانبژاردو ده‌مانخوارد.
جوامێرییه‌كی قادر خه‌بات 
 ده‌مه‌وێت جوامێرییه‌كی قادر خه‌بات بگێڕمه‌وه‌، قادر خه‌بات یه‌كێكه‌ له‌پێشمه‌رگه‌ ئازاكانی شۆڕشی نوێ،  كه‌ ئێمه‌ له‌دۆڵه‌ نێ بووین، ناردبوومان بۆ ناو ئێران نانمان بۆ بهێنێت، كاتێك هاته‌وه‌ دوو كه‌سی له‌گه‌ڵ خۆی برد، دوو نانیان پێ مابوو، وتم جا قادر ئێمه‌ دوو نان چی لێبكه‌ین، چا هه‌بوو، وتی مامه‌ چایه‌كم بده‌نێ‌و ده‌ڕۆمه‌وه‌ چاره‌سه‌رتان بۆ ده‌كه‌م، وه‌ڵڵا چایه‌كمان دایه‌و رۆیشته‌وه‌، قادر خه‌بات ده‌چێته‌ ئه‌وێ ده‌گه‌ڕێ‌و  له‌وێ تووشی گه‌له‌ مه‌ڕێك ده‌بێت خاوه‌نه‌كه‌ی حاجییه‌ك ده‌بێت‌و له‌ناویدا ده‌بێت‌و  ده‌چێته‌ لای حاجییه‌كه‌و ده‌ڵێت: مام حاجی ئه‌مساڵ زه‌كاتت داوه‌؟، ده‌ڵێت: نه‌وه‌ڵڵا، ده‌ڵێت: ده‌باشه‌ وه‌ڵڵاهی ئێمه‌ پێشمه‌رگه‌ین‌و  ئه‌وه‌ مام جه‌لال له‌و شاخه‌یه‌، وتی وه‌ڵڵا  رۆڵه‌ هه‌قی 14 مه‌ڕت هه‌یه‌و بڕۆ 14 حه‌یوان هه‌ڵبژێره‌، قادر خه‌بات ناكاته‌ نامه‌ردی 14 مه‌ڕو بزن هه‌ڵده‌بژێرێت‌و وه‌ره‌ به‌ته‌نها له‌نزیك شنۆوه‌ ئه‌وه‌ بێنه‌ بۆ دۆڵی خێلاب، به‌و شاخ‌و  داخانه‌دا، ئاخر ئه‌وه‌ زۆر هونه‌ره‌ به‌ڕاستی، رۆژی دووه‌م بوو ئێمه‌ له‌وێ هه‌ر ئه‌وه‌بووین، دیتمان قادر خه‌بات به‌خۆی‌و به‌ 14 سه‌ر مه‌ڕو به‌رخه‌وه‌ په‌یدابوو، وه‌ڵڵا پێمانوت: جا قادر چی بكه‌ین، وتی مه‌ترسن ئه‌وه‌ ناوچه‌ی خۆمه‌و ئێستا هه‌موو شتێكتان بۆ په‌یدا ده‌كه‌م، ئێمه‌ شتمان شاردۆته‌وه‌و كون‌و كه‌له‌به‌ری ئێره‌ پێده‌زانم، وه‌ڵڵا دیسان چایه‌كمان دایه‌و رۆیشت، گه‌ڕا له‌و كون‌و  كه‌له‌به‌رانه‌ خوێ‌و مه‌نجه‌ڵ‌و  قاپی دۆزییه‌وه‌، تفه‌نگی دۆزییه‌وه‌، فیشه‌كی دۆزییه‌وه‌، جۆره‌ها شتی له‌و بابه‌تانه‌ی دۆزییه‌وه‌و هاته‌وه‌، وه‌ڵڵا خه‌نی بووین له‌سایه‌ی قادر خه‌بات، به‌رخمان سه‌ربڕی‌و به‌قارچك لێمانناو خواردمان.
14 پێشمەرگەکە
 چه‌ند رۆژێكی پێچوو زۆر ماینه‌وه‌ له‌وێ، وتمان بگوازینه‌وه‌ بۆ دۆڵی سه‌رشێخان له‌و دۆڵه‌كه‌ی تردا، كاك نه‌وشیروان مسته‌فا تاقمێك پێشمه‌رگه‌ی له‌گه‌ڵ خۆی هه‌ڵگرت‌و وتی ده‌چم ته‌فتیشی ده‌كه‌م‌و  جوابتان بۆ ده‌نێرمه‌وه‌ بزانین ئه‌گه‌ر حكومه‌ت‌و  جاش‌و شتی لێنه‌بێت، ئێمه‌ ئێواره‌ بوو به‌ڕیكه‌وتبووین، له‌ڕێگه‌ تووشی نێردراوی كاك نه‌وشیروان بووین، وتی: وه‌ڵڵا كاك نه‌وشیروان ده‌ڵێت له‌سه‌ر شێخان چرایه‌ك ده‌سووتێت، جه‌ماعه‌تێك له‌وێن، ره‌نگه‌ جاش بن، له‌به‌رئه‌وه‌ بگه‌ڕێنه‌وه‌، ئێمه‌ش گه‌ڕاینه‌وه‌، به‌ڵام قادر خه‌بات دیسان به‌كاك نه‌وشیروان ده‌ڵێت  ئه‌و دووربینه‌ی ملتم بده‌رێ، من ده‌چم ته‌فتیش ده‌كه‌م بزانم ئه‌وانه‌ كێن، وه‌ڵڵا قادر خه‌بات دووربینه‌كه‌ وه‌رده‌گرێت له‌كاك نه‌وشیروان‌و ده‌چێت ته‌ماشاده‌كات ئه‌وانه‌ پێشمه‌رگه‌ی خۆمانن، شه‌هید ئه‌حمه‌د مه‌ولودو ئه‌وان، وه‌ڵڵا به‌سه‌ریاندا ده‌چێت‌و سه‌لاموعه‌له‌یكوم، هه‌موو ده‌ڵێن عه‌له‌یكه‌ سه‌لام، قادر ئه‌وه‌ چی ده‌كه‌یت لێره‌؟، ده‌ڵێت ده‌نگ به‌رز مه‌كه‌نه‌وه‌، وه‌ڵڵا ئه‌وه‌ كاك نه‌وشیروان‌و مام جه‌لال‌و ئه‌وان لێره‌ن‌و  له‌ودیون‌و  ئێستا دێن، ئه‌وان چوارده‌ كه‌س بوون به‌چه‌كه‌وه‌، ئه‌وه‌ زۆر هێزێكی باش بوو بۆ ئێمه‌، 14 پێشمه‌رگه‌ی چه‌كدارمان دۆزییه‌وه‌و ئه‌حمه‌د مه‌ولودو ئه‌وانه‌ش پیاوی زۆر ئازاو تێكۆشه‌ربوون، وه‌ڵڵا چووینه‌ سه‌ر شێخان دۆڵه‌كه‌ی تر، شه‌هید ئه‌حمه‌د مه‌ولود وتبووی من ئاوها به‌ده‌ستی به‌تاڵ نایه‌م بۆلای مام جه‌لال‌و كاك نه‌وشیروان، ده‌چم راوێك ده‌كه‌م‌و  حه‌یوانێك ده‌كوژم‌و ئینجا دێم، چووبوو راوی كردبوو رێوییه‌كی كوشتبوو، به‌خۆو به‌ڕێوییه‌وه‌ هاتن بۆ لامان‌و له‌بن گوێزه‌كانی ئه‌وێ دانیشتبووین، به‌دیداریان شادبووینه‌وه‌و له‌وێ په‌یوه‌ندیمان كرد به‌ناوه‌وه‌، ناوه‌وه‌ بەكێ؟ به‌شه‌هید حه‌سه‌ن كوێستانی، كه‌ لێپرسراوی رێكخستنی كۆمه‌ڵه‌ بوو له‌و ناوچه‌یه‌ له‌گه‌ڵاڵه‌و ده‌وروبه‌ری، ماڵی ئاوابێت شتی بۆناردین، ئاردو برنج‌و رۆن، خوالێخۆشبوو حاجی محه‌مه‌دی باوكی قادر خه‌باتیش كه‌ زانیبووی من له‌گه‌ڵم یه‌ك مه‌نجه‌ڵی گه‌وره‌ پڵاوی بۆ ناردبووم پڕی كردبوو له‌سه‌ره‌ مریشك‌و ئه‌وانه‌، سه‌ره‌كه‌ی به‌ستبوو، ئه‌ویش نیعمه‌تێكی گه‌وره‌بوو، له‌وێ بووین رۆژێك ته‌ماشامان كرد گرده‌كه‌ی به‌رامبه‌رمان خه‌ڵكی پێوه‌یه‌، پیاوی پێوه‌یه‌، كاك نه‌وشیروانیش چه‌ند پێشمه‌رگه‌یه‌كی هه‌ڵگرت‌و وتی بچم بزانم ئه‌وانه‌ كێن‌و  ته‌حقیق بكه‌ین؟، هاته‌وه‌ وتی: وه‌ڵڵاهی ئه‌و كورده‌ قه‌ت نامرێت، وتمان بۆ؟، وتی: ئه‌وه‌ 30-40 كه‌س هاتوون‌و پاره‌یان وه‌رگرتووه‌ هی ته‌عویزات‌و یه‌كی نازانم هه‌زار دیناریان خستۆته‌ گیرفانیانه‌وه‌و هاتوون ده‌ڵێن ده‌بینه‌ پێشمه‌رگه‌، هیچیشمان له‌ئێوه‌ ناوێت‌و پاره‌مان هه‌یه‌ بۆ خۆمان تفه‌نگ ده‌كڕین‌و پاره‌ی چه‌ند ماوه‌یه‌كیشمان پێیه‌ پێی ده‌ژین، وتمان ده‌باشه‌ یاخوا به‌خێر بێن، ئه‌وانیش هاتن‌و وه‌ڵڵا زۆر بووین ئیتر ورده‌ ورده‌ هاتینه‌ قه‌ندیل، هاتینه‌ قه‌ندیل باسی كاره‌ساتی هه‌كاریمان بیستبوو، زۆر بێتاقه‌ت بووین، به‌ڵام په‌یوه‌ندیمان په‌یداكردبۆوه‌ له‌گه‌ڵ ناوه‌وه‌، بێ پاره‌بووین له‌و شاخه‌ ناوبه‌ناو له‌كۆچه‌ره‌كان سواڵێكمان ده‌كرد، رۆژێكیان پێشمه‌رگه‌ هاتن وتیان دوو گه‌نج هاتوون ده‌ڵێن ئێمه‌ به‌س لای مام جه‌لال خۆمان ئاشكرا ده‌كه‌ین، بمانبه‌نه‌ لای مام جه‌لال، وتم بڕۆ بابێن، وه‌ڵڵا دوو براده‌ره‌كه‌ هاتن یه‌كێكیان وتی من ناوم د.جه‌عفه‌ری شه‌فیعییه‌، دكتۆرم، كۆڵێكی ده‌رمان پێبوو، بیستومه‌ ئێوه‌ لێره‌ بێ دكتۆرو بێ ده‌رمانن ئه‌وه‌م بۆهێناون، به‌خێر بێن، ئه‌وی تریشیان وتی: من ناوه‌ ئه‌سڵییه‌كه‌م ساعدی وه‌ته‌ن دۆسته‌، ئه‌و مامۆستا برایمه‌ی خۆمان كه‌ ئێمه‌ ناومان لێناوه‌ مامۆستا برایم ئه‌ویش كۆڵێك دیناری پێبوو، 5هه‌زار دیناری هێنابوو، وتی: كۆمكردۆته‌وه‌ له‌مه‌عاشی خۆم‌و له‌ڕێگه‌ش بیستوومه‌ وه‌زعتان خراپه‌ خانوویه‌كه‌م له‌سنه‌ هه‌یه‌ ناردومه‌ بۆتان بفرۆشن، ئێ وتمان ماڵت ئاوابێت‌و وه‌ڵڵا ئیتر دكتۆرمان هه‌بوو له‌راستیدا، دكتۆرێكمان هه‌بوو ئه‌ویش د.خدربوو، د.خدری مه‌لا مه‌عسوم ئه‌وه‌ی ئێستا سه‌رۆكی زانكۆی كۆیه‌یه‌، د.خدر له‌گه‌ڵ شه‌هید سه‌ید كه‌ریم چووبوونه‌ ده‌ره‌وه‌ بۆ جه‌وله‌ نه‌هاتبوونه‌وه‌، ئێمه‌ش وامانزانی فه‌وتاون، دوایی په‌یدابوونه‌وه‌‌و نه‌فه‌وتابوون شوكور، به‌ڵام ئه‌و دكتۆره‌مان بۆ په‌یدابوو، دكتۆرێكی زۆریش باشبوو، زۆر خزمه‌تی كردین، هه‌روه‌ها مامۆستا برایمیش ناوم لێنان د.عه‌زیزو مامۆستا برایم‌و وتم بڵێن ئه‌وان خزمی مام جه‌لال-ن‌و خه‌ڵكی خانه‌قینن‌و له‌وێ هاتوون‌و له‌ئێران خوێندوویانه‌ بۆئه‌وه‌ی دایانپۆشین.
 ئه‌وانیش هاتن‌و باشبوو پاره‌مان بۆ په‌یدابوو، ئینجا ئێمه‌ كه‌ له‌سه‌ر سێ سنووره‌كه‌ بووین، چه‌كمان بۆ هاتبوو، چوارده‌ دۆشكامان بۆ هاتبوو، مه‌فره‌زه‌یه‌كمان نارد بیهێنێت، جاشه‌كانی كوردی توركیا كه‌مینێكیان بۆیان نابوونه‌، شه‌هید حه‌سه‌ن خۆشناوو ئه‌وانه‌یان شه‌هیدكردو چه‌كه‌كانیشیان لێخواردین‌و بردیان‌و ئه‌و سه‌رده‌مه‌ عه‌شائیری كوردی توركیا به‌شی زۆریان له‌جیاتی یارمه‌تیمان بده‌ن، دوژمنایه‌تیان ده‌كردین، شه‌هید حه‌سه‌ن شه‌هید بوو، نه‌جمه‌دین بیوكایه‌ ئه‌و براده‌ره‌ بوو كه‌ چه‌كی له‌سوریاوه‌ به‌توركیادا بۆ ده‌هێناین، هه‌تا دوای سه‌ركه‌وتنی شۆڕشی ئێرانیش مابوو و زۆرجاریش چه‌كی بۆ ده‌هێناین، دوایی گیراو له‌زیندانی دیاربه‌كر شه‌هیدیان كرد، كه‌ ئه‌ویان لای ئێمه‌ ناوی سه‌لاح بوو.
ده‌بێت لێره‌ بڕۆن
ئینجا كه‌ خه‌ریك بوو زستان دابێت، له‌قه‌ندیل نه‌مانده‌توانی بژێین، هاتینه‌ خواره‌وه‌و چووینه‌ نۆكان‌و ئێران هاته‌ سه‌رمان‌و وتی ئه‌وه‌ خاكی ئێرانه‌ ده‌بێت بڕۆن، رۆیشتین چووینه‌ توژه‌ڵه‌‌و هاتن وتیان ئه‌وه‌ش خاكی ئێرانه‌، وتمان چۆن، وتیان به‌هۆی رێككه‌وتننامه‌ی جه‌زائیره‌وه‌ بۆته‌ خاكی ئێران‌و له‌وێش ده‌ریانكردین، ئیتر هاتینه‌ ناوزه‌نگ، له‌ناچاریدا له‌ناوزه‌نگ دامانكوتاو وتمان با ئه‌مساڵ لێره‌بین بزانین خوا چی ده‌كات بۆ ساڵی داهاتوو، هیچمان پێنه‌بوو، خانوومان نه‌بوو، چادرمان نه‌بوو، یه‌ك چادری بچكۆله‌مان هه‌بوو ئه‌ویش هی كاك د.مه‌حمود بوو، له‌گه‌ڵ ژورێكمان دروستكرد كه‌ هه‌موومان زستانه‌كه‌ تێیدابین،  ئه‌و ژووره‌ بۆ ساڵی داهاتوو كردمانه‌ ته‌ویله‌ی هێستره‌كه‌، ئه‌وه‌نده‌ خراپ بوو، جا ئاخیره‌كه‌ی كورت بوو، مامۆستا برایم كه‌ڵه‌گه‌ت بوو هه‌موو جارێك كه‌ هه‌ڵده‌ستا سه‌ری لێیده‌دا، ئێمه‌ نا، ئه‌وسا ئێمه‌ له‌زه‌ڵێ ماینه‌وه‌و ورده‌ ورده‌ په‌ره‌مان سه‌نده‌وه‌و په‌یوه‌ندیمان به‌شاره‌وه‌ كردو براده‌رانی شۆڕشگێڕان‌و براده‌رانی كۆمه‌ڵه‌و ئه‌وانه‌ لێمان كۆبوونه‌وه‌و زیادبووین‌و ده‌ستمانكرده‌وه‌ به‌خۆسازدانه‌وه‌.
سه‌روبه‌ندی شۆڕشی ئێران 
سه‌روبه‌ندی شۆڕشی ئێران بوو، له‌شۆڕشی ئێراندا یه‌ك شت هه‌یه‌ خه‌ونه‌و پێویسته‌ بۆتان بگێڕمه‌وه‌، له‌شاخی قه‌ندیل بووین رۆژێكیان كوێخا محه‌مه‌دی مه‌نگوڕ هات بۆلام، من دایكم مه‌نگوڕه‌ له‌به‌رئه‌وه‌ پێم ده‌ڵێن خوارازا، كوێخا محه‌مه‌د به‌منی وت خوارا‌زا هه‌واڵێكی خۆشم بۆ هێناوی، وتم: یاخوا به‌خێربێیت خاڵه‌، دانیشت وتم هه‌واڵه‌ خۆشه‌كه‌ت چییه‌؟، وتی: شا ده‌ڕوات، شا له‌چڵه‌پۆپه‌ی هێزو عه‌زه‌مه‌تیدابوو، تازه‌ كارته‌ر هاتووه‌ به‌پیرییه‌وه‌و شا ته‌راتێنی پێده‌كرد، وتی به‌سه‌ری تۆ خه‌ونم دیووه‌، مه‌لایه‌ك هه‌یه‌ ئه‌و خه‌ونه‌م بردۆته‌ لای وتوویه‌تی ده‌ڕوات، وتی: كاتی خۆی خه‌ونیشم دی به‌ مه‌لا مسته‌فاوه‌، بۆ ئه‌و مه‌لایه‌م گێڕایه‌وه‌، وتی مه‌لا مسته‌فا ئیشی ته‌واوبووه‌و وتی: دوایی فیعله‌ن شۆڕشه‌كه‌ی تێكچوو، وتی ئه‌و جاره‌ش وتویه‌تی شا ده‌ڕوات، ئێ باشه‌ یاخوا وابێت، بێگومان ئێمه‌ له‌و سه‌روبه‌نده‌دا پاش ماوه‌یه‌ك خۆپیشاندان ده‌ستیپێكرد له‌ته‌برێزو له‌وانه‌، دوایی له‌ئێران هه‌تا كۆتایی ساڵه‌كه‌ خولاسه‌ شا رۆیشت، ده‌مه‌وێت ئه‌وه‌تان پێبڵێم ئێمه‌ كه‌ له‌قه‌ندیل بووین دوای ئه‌وه‌ی مامۆستا برایم‌و  د.عه‌زیز هاتن بۆلامان، پێویستیمان به‌وه‌بوو به‌باشمانزانی په‌یوه‌ندیی به‌خوالێخۆشبوو ئایه‌توڵڵا خومه‌ینییه‌وه‌ بكه‌ین، ئایه‌توڵڵای خومه‌ینی له‌نه‌جه‌ف بوو، ئێمه‌ش هه‌ستاین كاغه‌زێكمان نووسی به‌فارسییه‌ چاكه‌كه‌ی مامۆستا برایم‌و د.عه‌زیز‌و به‌ئیمزای من ناردمان بۆ ئه‌و خوشكه‌ وه‌سفیه‌یه‌ی كه‌ ئێستا لێپرسراوی مه‌كته‌بی شه‌هیدانه‌، ئه‌و خزمێكی هه‌بوو به‌هۆی ئه‌وه‌وه‌ گه‌یاندییه‌ ئیمام خومه‌ینی، كه‌ كاغه‌زه‌كه‌مان گه‌یشته‌ ئیمام خومه‌ینی، داوامان لێكردبوو وتمان ئێمه‌ هێزی پێشمه‌رگه‌ین‌و له‌ژێر ده‌ستی ئه‌مری جه‌نابتین، چیت ده‌وێت له‌ئێران ده‌یكه‌ین، وتبووی هیچ مه‌كه‌ن، ته‌نها پرسیارێكی حسێن عه‌لی مونته‌زه‌ریم بۆ بكه‌ن، خوالێخۆشبوو شێخ حسێن عه‌لی مونته‌زه‌ری نه‌فی كرابوو بۆ سه‌قز، وتی سۆراخێكی ئه‌وم بۆبكه‌ن، سۆراخمان بۆكردو بۆمان نارده‌وه‌و په‌یوه‌ندییه‌كمان په‌یداكرد له‌گه‌ڵ ئیمام خومه‌ینی، دوایی كه‌چووه‌ پاریسیش وه‌فدێكمان نار بۆ لای كه‌ بریتی بوو له‌كاك د.فوئاد مەعسوم و كاك عادل مورادو له‌وێ په‌یوه‌ندیمان په‌یداكردو دوایی چووینه‌ خزمه‌تی.
ناردنی سڵاو
له‌كۆتاییدا ده‌مه‌وێت سڵاو بنێرم بۆ دامه‌زرێنه‌رانی یه‌كێتیی نیشتمانیی كوردستان به‌تایبه‌تی له‌پێشه‌وه‌ سڵاو ده‌نێرم بۆ كاك د.كه‌مال فوئادو كاك عادل موراد كه‌ هه‌ردووكیان ئێستا به‌داخه‌وه‌ نه‌خۆشن‌و له‌دوو نه‌خۆشخانه‌ی ئه‌ڵمانیا گیرساونه‌ته‌وه‌، هیوای چاكبوونه‌وه‌و خۆشیان بۆ ده‌كه‌م‌و دڵنیایان ده‌كه‌م كه‌ ئه‌و په‌یامه‌ی ئه‌وان خه‌باتیان بۆكرد، به‌رده‌وامه‌و هه‌ڵگره‌كانی سوورن له‌سه‌ر درێژه‌دان به‌خه‌باته‌كه‌ هه‌تا ده‌گاته‌ سه‌ركه‌وتنی كۆتایی‌و رێبه‌ری كاروانه‌كه‌ ده‌كه‌ن تا ده‌گاته‌ مه‌نزڵ.
ده‌مه‌وێت سڵاو بنێرم بۆ كاك د.فوئادو كاك عه‌بدولڕه‌زاق میرزا كه‌ دووان له‌دامه‌زرێنه‌رانی ده‌سته‌ی یه‌كه‌می یه‌كێتیی نیشتمانیی كوردستانن‌و ئێستا وه‌كو سه‌ربازی گومناو كارده‌كه‌ن، یه‌كێكیان له‌په‌رله‌مان‌و یه‌كێكیان له‌كاروباری په‌یوه‌ندییه‌كانی ده‌ره‌وه‌.
ده‌مه‌وێت سڵاوی گه‌رمیش بنێرم بۆ كاك نه‌وشیروان مسته‌فاو كاك عومه‌ر شێخ موس، كه‌ دوو سه‌ركرده‌ی دلێرو به‌په‌رۆش‌و تێكۆشه‌ری یه‌كێتیی نیشتمانیی كوردستان بوون‌و چه‌ندین ساڵ هه‌ردووكیان له‌ڕیزی یه‌كێتی‌و له‌پێناوی یه‌كێتی خه‌باتێكی زۆریان كردو رۆڵی خۆیان هه‌بوو له‌هه‌ڵسانه‌وه‌ی یه‌كێتیی نیشتمانیی كوردستان، له‌بووژاندنه‌وه‌ی، له‌گه‌یاندنی به‌و پله‌یه‌ی كه‌ له‌پاش راپه‌ڕیندا هاته‌وه‌ سه‌ر سه‌ركه‌وتنه‌كان.
له‌گفتوگۆی داهاتوومدا لایه‌نه‌ باشه‌كانیان باس ده‌كه‌م‌و ئینشائه‌ڵڵاو هه‌قی خۆیان ده‌ده‌مێ كه‌ ئه‌وانیش له‌و یه‌كێتییه‌دا به‌شدارن، له‌و سه‌ركه‌وتنانه‌دا به‌شدران‌و رۆڵیان هه‌بووه‌، ئێستا كاك نه‌وشیروان سه‌رۆكایه‌تیی گۆڕان ده‌كات، كاك عومه‌ر شێخ موسیش له‌ئه‌وروپا له‌سوید مامۆستایه‌و هه‌ر دۆستی یه‌كێتییه‌، هه‌ر پشتیوانی یه‌كێتییه‌، سڵاوی گه‌رمم له‌هه‌ردووكیان ده‌كه‌م كه‌ رۆڵیان بووه‌ له‌یه‌كێتیداو ئێمه‌ له‌ناو یه‌كێتیدا جه‌ماعه‌تێكی به‌وه‌فاین‌و چاكه‌ی ئه‌و كه‌سانه‌مان له‌بیرناچێت كه‌ رۆژێك له‌ڕۆژان رۆڵیان هه‌بووه‌ له‌یارمه‌تیدانی سه‌رخستنی یه‌كێتیی نیشتمانیی كوردستان.
هه‌ڤاڵینه‌ 
ئه‌و یه‌كێتییه‌ی ئه‌مڕۆ ده‌یبینن سه‌دان هه‌زار كه‌س له‌یاده‌كه‌یدا شادی‌و خۆشی ده‌رده‌بڕێت‌و  ئه‌و رێزه‌ گه‌وره‌یه‌ی هه‌یه‌ كه‌ له‌عیراق‌و له‌كوردستان رۆڵی دیاری هه‌یه‌، ئه‌م یه‌كێتییه‌ به‌م شێوه‌یه‌ ده‌ستی پێكرد، له‌چوار كه‌سه‌كه‌ی چایخانه‌ی توڵه‌ی توڵه‌ له‌پاشان هی به‌رلین‌و  له‌پاشان هه‌ڤاڵانی كۆمه‌ڵه‌ له‌ناوه‌وه‌ی شار، پاشان هاتنه‌ ده‌ره‌وه‌ی شه‌هیدان كاك عومه‌رو كاك عه‌لی و كاك خالیدو كاك ره‌سول مامه‌ندو كاك سه‌عدی گچكه‌و هه‌موو براده‌ران.
ئینشائه‌ڵڵا له‌ئه‌ڵقه‌كانی داهاتوودا كه‌مێكی تر بیره‌وه‌رییه‌كانم ده‌ڵێم‌و هه‌ندێك له‌ڕاستییه‌كانیش ئاشكرا ده‌كه‌م له‌وشتانه‌ی كه‌ نه‌زانراون، له‌نهێنییه‌كاندا، چ په‌یوه‌ندییه‌كانی ناوه‌وه‌و چ په‌یوه‌ندییه‌كانی ده‌ره‌وه‌و چ رۆڵی یه‌كێتی له‌جه‌بهه‌و له‌هاوكارییه‌كانی عیراقیدا.
ئیتر جارێكی تر پیرۆزبایی له‌هه‌موو هه‌ڤاڵان‌و لایه‌نگرانی یه‌كێتیی نیشتمانیی كوردستان ده‌كه‌م، پیرۆزبایی له‌خه‌ڵكی كوردستان ده‌كه‌م.
پیرۆزبایی له‌هه‌موو ئه‌و كه‌سانه‌ ده‌كه‌م كه‌ رۆژێك له‌ڕۆژان رۆڵیان هه‌بووه‌ له‌یه‌كێتیی نیشتمانیی كوردستانداو سوپاسی چاكه‌و پیاوه‌تییه‌كانیان ده‌كه‌م‌و دڵنیایان ده‌كه‌م كه‌ یه‌كێتی چاكه‌ی له‌بیرناچێت، ئێمه‌ هه‌روه‌كو حزبی شه‌هیدان‌و كۆڵنه‌دان‌و سه‌ركه‌وتن‌و پێشكه‌وتنین، ئاوهاش حزبی وه‌فاو چاكه‌ پێزانین‌و ته‌قدیری تیكۆشه‌رانین.


ناو:  
ئیمه‌یل:    
سه‌رنج:  

#7392
17/10/2017
ئه‌رشیف
وه‌رزش
‌ رۆجێر فێدره‌ر بۆ جاری چواره‌م له‌م وه‌رزه‌دا له‌ نادالی برده‌وه‌ 17/10/2017
‌ دۆڤیزیسیۆ قۆناغی ژاپۆنی مۆتۆ جی پی برده‌وه‌ 17/10/2017
زانست
‌ ته‌كنیكی نوێ بۆ نووسینی نامه‌ بێ ده‌ستدان له‌ كیبۆرد 17/10/2017
‌ ئه‌ندۆنیزیا چاوه‌ڕوانی هه‌ڵپژانی گڕكانێكه‌ 17/10/2017
‌ زرێبار هه‌ورامی: ژیان جه‌نگه‌، له‌گه‌ڵ خۆت و له‌گه‌ڵ بارودۆخه‌كه‌ت 16/10/2017

© 2009 KURDISTANY NWE, All RIGHTS RESERVED. | CREATED BY AVESTA GROUP