چالاكی بازرگانی لە سنووری گەرمیان سست بووە
«داهاتی مەرزەكە لە 2016دا كەمی كردووە» چالاكی بازرگانی لە سنووری گەرمیان سست بووە ‌ 11/1/2017
یەکەی ئابووری

كۆمەڵگەی مەرزی نێودەوڵەتیی باشماخ ئاماری ساڵی رابردووی ئاشكرا كردو بەپێی ئامارەكەش، داهاتی مەرزكە بەڕێژەی (٣٠%) كەمی كردوەو لەو ماوەیەشدا ٢٨٤ هەزارو ٩٩١ گەشتیار هاتوونەتە هەرێمی كوردستانەوە.

٢٨٤ هەزارو ٩٩١ گەشتیار
لەكۆنگرەیەكی ڕۆژنامەنوسیدا، ئەزوەر محمود بەڕێوەبەری مەرزی نێودەوڵەتیی باشماخ ئاماری ساڵی رابردووی مەرزەكەی بۆ دەزگاكانی راگەیاندن ئاشكرا كردو رایگەیاند، لەماوەی ساڵی رابردوودا لە مەرزی نێودەوڵەتیی باشماخەوە ٢٨٤ هەزارو ٩٩١ گەشتیار هاتوونەتە هەرێمەوە، هەروەها ٢٧٥ هەزارو ٧٥٠ گەشتاریش رۆشتونەتە وڵاتی ئێران، جگە لەوەش ١٢ هەزارو ١١١ ئۆتۆمبێلی گەشتیاری هاتوونەتە هەرێمەوە.
وتیشی: «لە ساڵی رابردوودا ٢٩ كەسی عیراقی‌و بیانی لە مەرزەكەدا دەستگیركراون، كە ناویان لە لیستی قەدەغەدا هەبووە، هەروەها هەشت كەسی دیكە بە تۆمەتی هەڵگری پاسپۆرتی ساختەوە‌و شەش كەسی دیكەش بە تێپەڕاندنی سنوور لە مەرزكەدا دەستگیركراون».

٣٨٩ تۆن بنێشت‌و خورما
بەڕێوەبەری مەرزی نێودەوڵەتیی باشماخ ئاماژەی بەوەشدا، هەزارو ١٤٨ تۆن خواردن لە رێگەی لیژنەوە گەڕێندراونەتەوە بۆ ئێران، هەروەها ١٤٥ تۆن خواردنیش لە ناوبراوە، ٣٨٩ تۆن بنێشت‌و مازور خورماش هاوردەی وڵاتی ئێران كراوە، ئەمە جگە لەوەی ١١٨ هەزارو ٦٥٤ ئۆتۆمبێلی بارهەڵگر هاتوونەتە هەرێمەوە.
راشیگەیاند، لەلایەن یاریدەرێتی ئاسایشی باشماخەوە، ١٣ كەسی گومان لێكراو دەستگیركراون، هەروەها ٤٠ ئۆتۆمبێلیش كە باری نایاساییان پێ بووە دەستیان بەسەردا گیراوە، جگە لەوەش دەستگرتن بەسەر هەزارو ١٢٨ گرام تلیاك‌و حەشیش‌و شیشەو هیرۆین، هەروەها ٥ هەزارو ٢٢٥ دەنك حەبی ترامادۆڵ میاتدۆن‌و سڕكەرو وزەبەخش، لەگەڵ ١٠ لیتر شروبی میاتدۆن.

داهاتی مەرزەكە
بەپێی ئامارەكەش، داهاتی ساڵی رابردووی مەرزەكە بەراورد بە ساڵی ٢٠١٥، بەڕێژەی (٣٠%) كەمی كردووە، بەجۆرێك داهاتی ساڵی رابردوو ١٧٠ ملیار دینار بووە، بەڵام داهاتی ساڵی ٢٠١٥ بریتی بووە لە ٢٤٥ ملیار دینار.

٣٠٠ ئۆتۆمبێل چیمەنتۆ
هاوكات، لە دوای سەرهەڵدانی قەیرانی دارایی لە كوردستان‌‌و دواكەوتنی مووچەی مانگانەی فەرمانبەران، بازرگانان رایدەگەیەنن، چالاكی بازرگانی لە سنووری گەرمیان بەشێوەیەكی بەرچاو كەمی كردووە.
ماڵپەڕی ژووری بازرگانی‌و پیشەسازیی سلێمانی لەزاری ئەحمەد كەلاری نوێنەری بازرگانانی سنووری گەرمیان ئاشكرای دەكات، چالاكی بازرگانی لە سنووری گەرمیاندا بەشێوەیەكی بەرچاو دابەزیوە، بەتایبەت لەدوای بەرزكردنەوەی نرخی گومرگ لەسەر چیمەنتۆ، پێشتر رۆژانە لە مەرزی پەروێزخانەوە زیاتر لە ٣٠٠ ئۆتۆمبێل چیمەنتۆ دەهات، بەڵام ئێستا رۆژانە تەنیا١٠ ئۆتۆمبێل دێ.
وتیشی: «‌بەروبوومی كشتوكاڵی لەئێستادا رێگەی پێنادرێت هاوردە بكرێت، بەڕێژەیەكی بەرچاو كەمی كردووە كە رۆژانە لەپێشتردا ٧٠٠ ئۆتۆمبێل دەهاتە كوردستان، بەڵام ئێستا لە ٢٠٠ ئۆتۆمبێل تێپەڕ ناكات، ئەمەش بۆتە هۆی زەرەرمەندبوونی بەشێكی زۆر لە هاووڵاتیانی ناوچەكە كە لەو مەرزانە كار دەكەن».

كۆمەڵگەیەكی بازرگانی
 لە سنووری گەرمیان
ئاماژەی بەوەشداوە، كۆمەڵگەیەكی بازرگانی لە سنووری گەرمیان بەتایبەت كەلار كە خۆی لەچەند كۆگایەكی گەورە دەبینێتەوە دروست دەكرێت، بۆ ئەو بازرگانانەی كاری بازرگانی گەورە دەكەن لە بواری خۆراك‌‌و كەرەسەی كارەبایی‌و جۆرەكانی دیكە، كە ئێستا لەگەڵ یەكێك لەكۆمپانیا گەورەكان لەگفتوگۆداین، بۆ ئەوەی ئەو كۆگایانە دروست بكەن.
لەبارەی ژمارەی كۆگاكانەوە رایگەیاندووە، بەپێی ئەو نەخشەیەی شارەونی كەلار دایناوە، جێگەی (65) كۆگایە هەر كۆگایەكیش لەسەر رووبەری (450) مەتر دەبێت‌‌و لەو ژمارەیەش ١٤ كۆگایان لەسەر رووبەری ٩٠٠ مەتر دروست دەكرێت بۆ ئەو بازرگانانەی كە چالاكیان زۆرترە.
لە بارەی ئاڵوگۆڕی بازرگانییەوە لە سنووری گەرمیان، ئەحمەد كەلاری وتی: «لە سنووری گەرمیان مەرزێكی سەرەكیمان هەیە كە مەرزی پەروێزخانە، بەوتەی لایەنی ئێرانی (47%)ی ناردنی كاڵاو شمەكی ئێران لەو مەرزەوە دێتە كوردستان‌‌و عیراقەوە، هەروەها مەرزی سەرتەكیش هەیە ئەویش كاری ئاڵوگۆڕی تیادەكرێت، بەڵام بەشێوەیەكی فراوان نییە، مەرزی تیلەكۆش كراوەتەوە‌و ئێستا تەنها كاری كۆڵبەری تیا دەكرێت لەهەرێمی كوردستانەوە شمەك دەڕواتە سنووری ئێرانەوە وەك كەرەسەی كارەبایی‌و خۆراك، بەڵام لە ئێرانەوە هیچ شتێك نایەت».

كێشەی بازرگانان
سەبارەت بەكێشەی بازرگانان، ئەحمەد كەلاری وتی: «ئێستا بازرگانانی گەرمیان كێشەیان ئەوەیە كاتێك دەیانەوێت بۆ چارەسەركردنی كێشەكانیان لەناو ئێراندا بە ئۆتۆمبێلی خۆیان بڕۆن، دەبێت ئەوان بە ناچاری بێنە سلێمانی‌و لەگەڵ كۆمپانیای هوما بیمە بكەن‌‌و دواتر بچنە باشماخ‌و لەوێوە بچنە سنەو كرماشان، ئەمەش رێگەیەكی زۆر دوورە بۆ بازرگانان، لەكاتێكدا لە كەلارەوە یەك سەعاتە، بۆیە داوا لەحكومەت دەكەم ئاوڕ لەو كێشەیە بداتەوە، چونكە لایەنی ئێرانی رایانگەیاندوە، كە لارییان نییە لەو رێگەیەوە هاتوچۆ بكرێت، بەڵام گومرگی خۆمان رێگە نادات ئۆتۆمبێلی بازرگانەكان بڕواتە ئەودیوەوە، بۆ چارەسەركردنی ئەو كێشەیەش چەندین جار لایەنە پەیوەندارەكانم ئاگادار كردۆتەوە، بەڵام بێ ئەنجام بووە».


ناو:  
ئیمه‌یل:    
سه‌رنج:  

#7344
18/8/2017
ئه‌رشیف
وه‌رزش
‌ له‌ نێو لیستی باشترین 10 یاریزانی ئه‌وروپادا ناوی نه‌یمار نییه‌ 17/8/2017
‌ یاریزانانی سلێمانی پێشه‌نگ بوون 17/8/2017
زانست
‌ لەسەر زمانی ئێمەیە‌و لەسەر پەنجەی كەڕولاڵەكانیشە 18/8/2017
‌ ئه‌وانه‌ی‌ ئاره‌زوو ده‌كه‌ن ببن به‌ دایك ئه‌م بابه‌ته‌ بخوێننه‌وه‌ 18/8/2017
‌ منداڵ هه‌ستی‌ حه‌وته‌میشی‌ هه‌یه‌ 18/8/2017

© 2009 KURDISTANY NWE, All RIGHTS RESERVED. | CREATED BY AVESTA GROUP