خوێندنه‌وه‌یه‌ك بۆ شیعری (ئه‌و رۆژه‌ی من ده‌مرم)ی ته‌یب جه‌بار
خوێندنه‌وه‌یه‌ك بۆ شیعری (ئه‌و رۆژه‌ی من ده‌مرم)ی ته‌یب جه‌بار ‌ 12/1/2017
حسێن به‌فرین
ئه‌م بابه‌ته‌ی لێره‌دا به‌ (6) ئه‌ڵقه‌ بڵاوی ده‌كه‌ینه‌وه‌، لێكۆڵینه‌وه‌یه‌كی شاعیر حسێن به‌فرین-ه‌ له‌سه‌ر شیعرێكی شاعیر ته‌یب جه‌بار به‌ناوی (ئه‌و رۆژه‌ی من ئه‌مرم). 
ئه‌ده‌ب و هونه‌ر6-6 و کۆتایی
(38)
قسه‌یه‌كی كوردی هه‌یه‌ ئه‌ڵی(ماڵی زیاده‌ سه‌رناشكێنی)ئه‌مه‌ ئه‌گه‌رله‌بواری ئابووری ڕاست بێت، به‌ڕای من له‌بواری شیعرونووسیندا ئه‌وماڵه‌ زیاده‌یه‌ نه‌ك هه‌رسه‌رشكان به‌ڵكو ماڵوێرانیشی به‌ده‌مه‌وه‌یه‌، مه‌به‌ستم ئه‌وه‌یه‌ جاری وا هه‌یه‌ یه‌ك وشه‌ی زیاده‌ یابه‌ هه‌ڵه‌ دانراو ماڵی شاعیر یان نووسه‌ر ئه‌خاته‌ ژێرپرسیاره‌وه‌، كاره‌ ئه‌ده‌بییه‌كه‌ی وا لێ ئه‌كات هه‌روه‌ك ده‌ستی شكاوچۆن جێی خۆی ناگرێته‌وه‌، ئه‌ویش به‌هۆی زیاده‌ڕۆیی وشه‌یه‌ك یاهه‌ڵه‌ به‌كارهێنانی وشه‌یه‌كه‌وه‌ سنووری بۆچوون و ده‌ربڕینه‌كه‌  ئه‌شێوی وكاره‌ ئه‌ده‌بییه‌كه‌ش وه‌ك كۆڵی قورسی لێ دێت به‌سه‌رشانی شاعیره‌وه‌. من لێره‌دا به‌ پێویستی ئه‌زانم كه‌ سۆراغێكی وشه‌ی زیاده‌ڕۆیی بكه‌م تابزانم برای شاعیر تاچه‌ند له‌م مامه‌ڵه‌ ئه‌ده‌بییه‌دا سه‌ركه‌وتووبووه‌ یا نا. بۆیه‌ به‌پێویستی ئه‌زانم قسه‌وباسێك له‌م باره‌یه‌وه‌ له‌ ته‌ك(ته‌یب جه‌بار)دا بكه‌م.من زووتر وتبووم شیعری (ئه‌وڕۆژه‌ی من ئه‌مرم)له‌(13)تابلۆی شوێن یه‌كتركه‌وتوو پێكهاتووه‌، ئێمه‌ش هه‌وڵ ئه‌ده‌ین  تابلۆ به‌ تابلۆ لێی ورد بینه‌وه‌ وهه‌ڵسه‌نگاندنی تیادا بكه‌ین.ئه‌وه‌ی شایه‌نی باسه‌ ئه‌وه‌یه‌ ئێمه‌ تابلۆكانی(یه‌ك،دوو،سی،چوار،پێنج)ئه‌بینین هیچ كه‌م وكورتییه‌كی له‌وباره‌یه‌وه‌ نیه‌ تا ئه‌گه‌ینه‌ سه‌رتابلۆی(شه‌ش)ئیترله‌وێدا پێ به‌ئه‌رزدا ئه‌ده‌ین و وه‌ستانی له‌سه‌رئه‌كه‌ین وئه‌بینین: شاعیر به‌م جۆره‌ ده‌رگای شیعره‌كه‌ی ئه‌كاته‌وه‌:
ئه‌وڕۆژه‌ی من ده‌مرم:
خۆڵ وبا،ئاگروئاو،
سه‌ریان لی تێك ده‌چی.
شپرزه‌،دواجاركۆده‌بنه‌وه‌،
سه‌باره‌ت به‌ شێوه‌ی ناشتنم،
چه‌ند بڕیاری ده‌ده‌ن:
1/پێویسته‌..
تابووته‌كه‌ی له‌ ته‌خته‌ی مانگ بی.
2/پێویسته‌...
كفنێكی بۆبچنن له‌پرچی كچی.
3/پێویسته‌...
به‌ شیله‌ی وشه‌ بیشۆنه‌وه‌.
4/پێویسته‌...
به‌ردی ئه‌لحه‌ده‌كه‌ی..
پارچه‌یه‌ك په‌لكه‌زێڕینه‌ بێ. 
تۆ كاتێك ئه‌م تابلۆیه‌ ئه‌خوێنیته‌وه‌، ژماره‌كان و وشه‌ دووباره‌بووه‌كانی(پێویسته‌)ئه‌بینی هه‌ست به‌ ساردبوونه‌وه‌یه‌ك ئه‌كه‌یت، ئه‌بینی شاعیرئه‌وبۆچوونه‌ فه‌لسه‌فییه‌ وئه‌و وێنه‌ شیرینانه‌ ئه‌كات به‌قوربانی دووسی شتی ناپێویست چونكه‌ توخمه‌ فه‌لسه‌فی یه‌كانی:خۆڵ و باو ئاگرو ئاو خۆبه‌خۆ له‌قسه‌و باسدان و هیچ پێویست به‌ قووت كردنه‌وه‌ی ئه‌وشته‌ زیادانه‌ نیه‌ به‌ڵكوبه‌ دانانی نیشانه‌ی ته‌مه‌ته‌قی بۆهه‌ر كامێكیان شته‌كه‌ بی كه‌م وكووڕی ده‌رئه‌خات. بریا شاعیر وه‌ها  شتێكی له‌به‌رچاو بووایه‌، شیعره‌كه‌ی وا په‌رت وبڵاو نه‌كردایه‌.
(39)
هه‌ر له‌ گه‌ڕان به‌شوێن ئه‌و وشه‌ زیاد و زیانه‌خرۆیاندا به‌رده‌وام ئه‌بین، ئه‌و وشانه‌ی كه‌ ئه‌بووایه‌ شاعیر به‌ر له‌بڵاوكردنه‌وه‌ی چاودێری بكردنایه‌و نه‌یهێشتایه‌ ببنه‌ گیاكه‌ڵه‌ بۆڕۆحی جوانی شیعره‌كه‌ی وهه‌ر زووكاتی پاكنووسكردنی له‌ڕه‌گه‌وه‌ بن كێشی بكردنایه‌ چونكه‌ دوای بڵاوكردنه‌وه‌ی هیچ یاسایه‌كی ئه‌ده‌بی ڕێ به‌ ده‌ستكاری كردنی نادات به‌ بیانووی ئه‌وه‌ی هه‌موو به‌رهه‌مێك خۆی له‌ خۆیدا زاده‌ی ئه‌وكاته‌یه‌ كه‌ تیایدا دێته‌ دنیاوه‌و گونجاونیه‌ له‌ كاتێكی تردا ده‌ستكاری بكه‌یت له‌ به‌رئه‌وه‌ی كاتی ئه‌وه‌نیه‌. ئه‌وانه‌ی دوای بڵاوبوونه‌وه‌ جارێكی تر ده‌ستكاری شتیان ئه‌كه‌نه‌وه‌ هیچ له‌ مانای ڕاسته‌قینه‌ی ژیان نه‌گه‌یشتوون وخه‌ڵكێكی لامسه‌رلایین وهیچی تر.له‌به‌ر ڕۆشنایی ئه‌وقسانه‌دا دێین وسه‌رله‌ تابلۆكانی تری شیعری ئه‌و (ڕۆژه‌ی من ده‌مرم)ی (ته‌یب جه‌بار)ئه‌ده‌ینه‌وه‌،له‌ تابلۆكانی(حه‌وت ،هه‌شت،نۆ)دا ڕه‌وتی به‌رده‌وامبوونی شیعره‌كه‌ به‌بێ كه‌موكورتی مل ئه‌نێ وهیچ شتێكی نائاسایی به‌رچاو ناكه‌وێ.له‌ تابلۆی(ده‌)دا دێڕێكی دزێوبه‌بێ هۆ سه‌رقوت ئه‌كاته‌وه‌ كه‌ ئه‌وێ شوێنی ئه‌ونیه‌، شاعیروه‌ك حاڵه‌ تێكی ته‌فسیری بۆتێگه‌یشتن هێناویه‌تی، له‌ كاتێكدا شیعرپێویستی به‌ وه‌ها لێكدانه‌وه‌یه‌ك نیه‌ چونكه‌ وێنه‌ شیعریه‌كانی شیعره‌كه‌ ئه‌و ڕۆڵه‌ ئه‌بینن، ئه‌ودێڕه‌ چاوزه‌قه‌ش ئه‌مه‌یه‌(وه‌ك چۆن ئێستا كاره‌با ده‌بڕی)، ئیتر شیعره‌كه‌ به‌ ڕێگای خۆیدا به‌رده‌وام ئه‌بێ تا ئه‌گاته‌ دێڕێكی تركه‌ هه‌روه‌كو هی پێشووشاعیربه‌هه‌مان مه‌به‌ست قووتی كردووه‌ته‌وه‌ وای به‌ چاك زانیووه‌ ئه‌و ڕوونكردنه‌وه‌یه‌ بخاته‌ به‌رچاوی خوێنه‌ربۆئه‌وه‌ی له‌ ڕێگه‌ی زانینی(ئێستا)وه‌ وێنه‌ی ئه‌وكاته‌ی لابه‌رجه‌سته‌ بێت. وه‌ك وتم په‌نابردنه‌ به‌روه‌ها حاڵێكی ته‌فسیری نه‌ ئه‌ركی شاعیره‌ ونه‌ عه‌قڵیه‌تی شیعریش پێی هه‌رس ئه‌بێ. هه‌رچه‌ند قووتكردنه‌وه‌ی ئه‌م دووحاڵه‌تی ڕوونكردنه‌وه‌یه‌ هیچ په‌ڵه‌یه‌كی ناشیرینی نه‌ خستووه‌ته‌  سه‌رجوانی شیعره‌كه‌ و هه‌رخۆی وه‌ك شتێكی ئاسایی ئه‌نوێنی به‌ڵام نه‌بوونی ڕه‌واتربوو بۆشیاوبوونی باری هونه‌ری شیعره‌كه‌ وشاعیریه‌تی شاعیر خۆشی. له‌تابلۆی(11)ش هیچ ڕووی نه‌داوه‌، ته‌نها له‌ هی(12)دا دێڕی(بۆپاشای هه‌میشه‌)نه‌بوونی باشتره‌،له‌لایه‌كی تره‌وه‌ بوونی وشه‌ی (ده‌رباره‌ی)كه‌له‌ دوایه‌وه‌ بۆشایی هاتووه‌ شتی زۆر زیانه‌خرۆن تا ئه‌وه‌ی شتێكی له‌ جوانی شیعره‌كه‌ زیاد كرد بێت. به‌م جۆره‌ ئه‌بینین وریایی بۆ شاعیرچه‌ند پێویسته‌ بۆئه‌وه‌ی نه‌هێڵێت دێڕێك یا وشه‌یه‌كی نامۆخۆی هه‌ڵداته‌ ناوباخی ڕه‌نگین وبۆن خۆشی شیعره‌كانی یه‌وه‌ و(دنیابینی) شیعری لێ تێك بدات. هه‌رچه‌نده‌(ته‌یب جه‌بار) ڕووبه‌ڕووی ئه‌م جۆره‌ ڕه‌خنانه‌ ئه‌بێته‌وه‌ به‌ڵام وه‌ها شتێك له‌ جوانی وبه‌نرخی شیعری(ئه‌وڕۆژه‌ی من ده‌مرم) دا نابه‌زێنی، مرۆڤیش بێ كه‌مو كورتی نابێ وهه‌موو هه‌ربه‌ هه‌ڵه‌دا گوزه‌رئه‌كه‌ین وكه‌سێك نیه‌ هه‌ڵه‌ی نه‌بێ یا هه‌ڵه‌ نه‌كات چونكه‌ یاسای ژیان وایه‌ ومرۆڤیش كۆمه‌ڵێك سۆزوبیروهه‌ست وهۆش وتووڕه‌یی وهه‌ڵچوون وبه‌زه‌یی و گومان وخه‌م وئازارودڵه‌ ڕاوكێ و ته‌نانه‌ت ڕق هه‌ستانیشه‌ بۆیه‌ ئاساییه‌ لای ئه‌و مرۆڤه‌ هه‌رشتێك ڕووبدات.

(40)
جارێكی ترشیعری(ئه‌وڕۆژه‌ی من ده‌مرم)جێ ئه‌هێڵم وئه‌چمه‌ سه‌ر ناوبڕێك بۆ ئه‌وه‌ی سروشتی شاعیرێتی (ته‌یب جه‌بار) له‌ئاوێنه‌ی بوونی خۆیه‌وه‌ تێبگه‌ین، تا له‌شێوازی شیعر وشاعیری ئه‌ وحاڵی بین.بۆ ئه‌و مه‌به‌سته‌ پێویسته‌ به‌ وردبینییه‌وه‌ سه‌یرێكی دیوانی(ئه‌و شیعرانه‌ی ئاوڕ بۆپێشه‌وه‌ ده‌ده‌ن)ی شاعیربكه‌ین كه‌دوای(ئه‌و ڕۆژه‌ی من ده‌مرم)بڵاوكراوه‌ته‌وه‌، ئه‌بینین شاعیربه‌ته‌واوی ئه‌ڵی: من ئه‌مه‌ پێناسه‌ی سروشت وبوون وبیروڕامه‌، من خۆم وا  هه‌ڵكه‌وتووم وبه‌ هه‌ڵه‌ تێم مه‌گه‌ن. دیاره‌ ئه‌م قسانه‌ پێویستی به‌ ڕاڤه‌كردن وشیكردنه‌وه‌و  ڕوونكردنه‌وه‌ هه‌یه‌، ئه‌ویش به‌م جۆره‌یه‌: هه‌ندێك شاعیری خواپێداوهه‌بوون یاهه‌ن سروشتیان به‌جۆرێك دروست بووه‌  له‌ده‌ربڕین وقسه‌وباسیاندا(پێشبینی) داهاتووبكه‌ن، واته‌ (دواڕۆژبین یا ئاینده‌ گه‌ران)له‌شاعیرانی ئێمه‌دا(مه‌وله‌وی)نه‌مروابووه‌، تا ڕاده‌یه‌ك (پیره‌مێرد)یش هه‌روا بووه‌. له‌شاعیرانی جیهانیشدا (مایكۆفسكی)وابووه‌.به‌ڵام ئه‌مڕۆ كه‌سێكی وه‌ك(ته‌یب جه‌ بار)بۆڕی هه‌موویانی داوه‌ته‌وه‌،له‌و ڕووه‌وه‌ ئه‌و زیاد له‌پێویست سنوورشكێنه‌و حاڵی (پێشبینی )لای ئه‌وله‌ ڕاده‌به‌ده‌ر دۆخی ئاسایی تی په‌ڕاندووه‌ كه‌ به‌ ئاسانی مرۆڤ تووشی سه‌رسامی ئه‌كات، به‌وه‌ی كه‌ ئه‌م حاڵه‌ نائاساییه‌ی چۆن پی بڕاوه‌ .بۆ نموونه‌ ئه‌گه‌رشاعیرێكی وه‌ك(مایكۆفسكی)كاتی خۆی ئه‌وزمانی (پێشبینی)وتن و حاڵ ده‌ربڕینه‌ی(ته‌یب جه‌بار)ی شك ببردایه‌،ئه‌یتوانی شیعری (ئاینده‌گه‌رایی)لای خۆی بگه‌یه‌نێته‌ ئاستێك مردن وپووكانه‌وه‌ی به‌سه‌رنه‌یه‌ت، به‌ڕاستی(ته‌یب) به‌ حه‌دێك له‌ وتن وده‌ربڕینی ئه‌وهه‌ستی(پێشبینی)كردنه‌دا زاڵ و سه‌ركه‌وتووه‌ كه‌ خوێنه‌ری شیعره‌كانی تووشی واق وڕمان وتاس بردنه‌وه‌ ئه‌كات. خۆئه‌م زمانی (پێشبینی)وتنه‌ لای(ته‌یب)شتێكی تازه‌ نیه‌،به‌ڵكوهه‌رله‌سه‌ره‌تای شیعر وتنییه‌وه‌ وه‌ك سێبه‌ری خۆی به‌دوایه‌وه‌یه‌، ڕۆژ به‌ ڕۆژ گه‌وره‌بووه‌ وپه‌لوپۆی عه‌قڵیه‌تی زۆرتر ته‌رزی هاویشتووه‌ تا له‌م دیوانه‌یدا خۆی له‌ لووتكه‌ داوه‌. ئه‌م دیوانه‌ش له‌م شیعرانه‌پێكهاتووه‌(سی چوارینه‌ی پێنج خشته‌كی، ڕۆژ ژمێری مامه‌ خه‌مه‌، ئه‌و شیعرانه‌ی ئاوڕبۆپێشه‌وه‌ ده‌ده‌ن). ئێستا تۆئه‌وشتانه‌ی من باسم كردن هه‌رله‌ سه‌ردێری شیعره‌كاندابه‌دی ئه‌كه‌یت،خۆ ئه‌گه‌ر بچیته‌ ناوشیعره‌كان خۆیانه‌وه‌ یه‌كسه‌رئه‌كه‌ویته‌ دنیای سه‌رسامییه‌وه‌، هه‌ست ئه‌كه‌یت ئه‌م شیعرانه‌ ده‌ستكرد نین تا شاعیر وه‌ستایه‌تی تێدا كردبێت وبه‌ داڵغه‌وه‌ ژیانێكی(فه‌نتازیایی)پێكه‌وه‌ نابێت، هه‌ستیش ئه‌كه‌یت ئه‌م وتنانه‌، ئه‌م تێكه‌ڵاوكردنی شتی(نه‌گونجاو) به‌ شته‌  گونجاوه‌كانی ژیان وان وشاعیریش هیچ درۆیه‌كی نه‌كردووه‌ وئه‌وه‌ی وتوونی وان. لێره‌دا من ڕه‌خنه‌م له‌ ناونیشانی دیوانه‌كه‌ هه‌یه‌ له‌ڕووی رێزمانی یه‌وه‌ ئه‌بووایه‌ بنووسرایه‌ (ئاوڕ بۆپێشه‌وه‌ ده‌ده‌نه‌وه‌) نه‌ك(ده‌ده‌ن)كه‌ هه‌ڵه‌یه‌كی زه‌قه‌و پێویسته‌ شاعیرچاكی بكات وبیكاته‌وه‌به‌(ده‌ده‌نه‌وه‌) ئه‌گینا وه‌ك شیعرئه‌م شیعرانه‌ هه‌قی خۆیه‌تی  شی بكرێنه‌وه‌ وقسه‌وباسی ئه‌ده‌بی یانه‌ی خۆیان به‌ وردی له‌سه‌ربكرێت. من لێره‌دا ئه‌وه‌نده‌م پێویست به‌م باسه‌هه‌بوو تا خوێنه‌ری شیعری(ته‌یب جه‌بار) بزانێ كه‌ شیعری (ئه‌وڕۆژه‌ی من ده‌مرم)بۆیه‌ ڕووداوه‌كان له‌حاڵه‌تی باسی مردندا له‌ ده‌ره‌وه‌ی شاعیرده‌ست پێ ئه‌كه‌ن له‌به‌رئه‌وه‌ی شاعیرخاوه‌نی ئه‌وچاوی (پێشبینی) یه‌یه‌ و هه‌رئه‌وحاڵه‌ته‌ش وای كردووه‌ هه‌موو به‌سه‌رهاتی(من مردن)ه‌كه‌ واپێچه‌وانه‌ بكاته‌وه‌.

(41)
هه‌ركه‌سێك به‌ڕووكه‌شی سه‌یری شیعره‌كانی(ته‌یب جه‌بار)بكات یه‌كسه‌ر وائه‌زانی شاعیرێكی(سوریالی)یه‌وبه‌پێی بیروتێگه‌یشتنی(سوریالیه‌ت)وێنه‌كانی ئه‌نه‌خشێنی به‌ڵام له‌ڕاستیدا ئه‌و هیچ په‌یوه‌ندیه‌كی به‌و ڕێبازه‌ئه‌ده‌بییه‌وه‌ نیه‌، به‌ڵكو ئه‌وبه‌هره‌ی بینین وتێبینی ئه‌وجۆره‌هه‌ست پێكردنه‌ی له‌ڕۆحدایه‌ وله‌هه‌ڵگێڕانه‌وه‌ی وێنه‌ بینراوه‌ كانی ژیاندا وه‌ستایه‌كی بی هاوتایه‌. ئه‌ویش له‌ڕێگه‌ی شتی
(نه‌گونجاو)بۆقه‌ناعه‌تێكی (گونجاو)به‌هۆی حاڵه‌تی (گونجاویی)یه‌وه‌ كه‌مرۆڤ پێی  ڕاهاتووه‌،دیاره‌ هێنانه‌وه‌ی نموونه‌ به‌ ئاسانی یارمه‌تیده‌ری تێگه‌یشتنی ئه‌وقسانه‌یه‌ كه‌ وتم، ئه‌ویش به‌م شێوه‌یه‌:
ئه‌و ڕۆژه‌ی من ده‌ مرم:
شاخ هه‌ڵدی..
خۆی ده‌شارێته‌وه‌.
ده‌چێته‌ بن به‌ردی
به‌پێی بۆچوونی شاعیرله‌ ترسی گه‌وره‌یی مردن: شاخ به‌وزه‌به‌لاحی و قورسی یه‌شه‌وه‌ كه‌شكی ئه‌بات،ده‌ست ئه‌كات به‌ ڕاكردن بۆئه‌وه‌ی خوی بشارێته‌وه‌،كه‌ ئه‌مه‌ شتێكی(نه‌گونجاو)ه‌ و هه‌ڵگێڕانه‌وه‌ی ئه‌وه‌ی هه‌یه‌ و ئه‌بینرێ بۆحاڵه‌تێكی(گونجاو) كه‌لێره‌دا(چوونه‌ بن به‌ردی)ئه‌وحاڵه‌ته‌(گونجاو)ه‌ یه‌ بۆخۆشاردنه‌وه‌ ومرۆڤیش له‌ سه‌رزانینی ڕاهاتووه‌ و پێویستی به‌ڕوونكردنه‌وه‌ نییه‌.یا كاتێكی تر شاعیرئه‌ڵی:
ده‌شتایی ..له‌ تاوا
بێ ئه‌وه‌ی بزانێ 
به‌ ڕووتی ڕاده‌كا،
تاكوبگاته‌ په‌نای گردی.
ئه‌مه‌ش نموونه‌یه‌كی تری ڕاكردن له‌ ده‌ست مردنه‌ كه‌به‌سه‌ر(ده‌شت وده‌شتایی)دا دێت وبه‌هۆی(په‌نا بردنه‌ به‌رگردێ)له‌(نه‌گونجاو)ه‌ و ئه‌چێته‌ حاڵه‌تی(گونجاو). ئه‌گه‌رله‌ ته‌واوی وێنه‌شیعریه‌كانی شیعری(ئه‌وڕۆژه‌ی من ده‌مرم)وردبینه‌وه‌ ئه‌بینین پڕپڕه‌ له‌م حاڵه‌ته‌
(نه‌گونجاو)و(گونجاو)انه‌ كه‌ شاعیربه‌ زمانێكی ساده‌ی ڕۆژانه‌ بۆمانی باس ئه‌كات و ئه‌مان خاته‌ حاڵه‌تی سه‌رسووڕمان وتاس بردنه‌وه‌ بۆئه‌وه‌ی هه‌ست به‌ گه‌وره‌یی كاره‌ساتی مردن بكه‌ین وبزانین كه‌ ڕووداوێكی چه‌ند دڵته‌زێن وناخۆشه‌ كاتی كه‌ ئه‌ودێت ئیتر ئێمه‌ لێره‌ نین وهه‌موو(بوون)له‌به‌رنه‌مانی ئێمه‌، تا چاو بڕئه‌كات چۆڵانی ودنیایه‌كی كاكی به‌كاكییه‌.

(42)
من تا ئه‌وشوێنه‌ی به‌پێویستم زانی له‌سه‌رشیعری(ئه‌وڕۆژه‌ی من ئه‌مرم)قسه‌ی خۆم كرد و تا ڕاده‌یه‌كیش له‌وبابه‌ته‌ ئه‌ده‌بی وفكری وهونه‌ریانه‌ دووام كه‌ بۆ ئه‌م شوێنه‌ پێویستی ئه‌كرد.چ شیعره‌كه‌ وچ باسكردنه‌كه‌ی منیش له‌باره‌ی(مردن)ه‌ وه‌ بوو، بۆیه‌ هه‌رچی وتراوهه‌رچیش نووسرا له‌بازنه‌ی باسكردنی(مه‌رگ)تێپه‌ڕی نه‌كرد. له‌به‌رئه‌وه‌ی كێشه‌ی(مه‌رگ)باسێكی گرنگی خودی ژیانه‌ وبه‌رده‌وام وبه‌درێژایی مێژووش مرۆڤی سه‌رقاڵ كردووه‌ و وه‌ك سێبه‌رشوێنی كه‌وتووه‌ وتا نه‌مان لێی نابێته‌وه‌،لام پێویست بوو ڕای خۆمی له‌سه‌ربده‌م وئه‌م شیعره‌ش ئه‌و باسكردنه‌ی هه‌ڵئه‌گرت، منیش وه‌ك شاعیرێك باسم كردووه‌ و بیروڕای خۆم له‌سه‌رده‌ربڕیووه‌،له‌به‌ر ئه‌وه‌ نه‌هاتووم پۆزی فه‌لسه‌فی پێوه‌ لی بده‌م وله‌ چوارچێوه‌ دۆزی تیۆری بگرم، چونكه‌ ئه‌وه‌شتێكی پڕاكتیكی نییه‌ وته‌نها له‌ ئاستی قسه‌هێنان وبردندا ئه‌مێنێته‌وه‌، هیچی لێ سه‌وزنابێت، منیش حه‌زم له‌و بابه‌تی خۆسه‌رقاڵكردنه‌ نه‌بوو، نه‌هاتم به‌و شێوه‌ زمانه‌ بدوێم، عاده‌تیشم نیه‌ قسه‌ی ئه‌م و ئه‌وبڵێمه‌وه‌ یا به‌ ڕێگای كه‌سی تردا بڕۆمه‌وه‌ یا بیروبۆچوونی خه‌ڵكی تربجوومه‌وه‌ یا خۆم له‌(قوله‌ی قاف)ی تیۆری و تیۆركاری بخزێنم وخۆم له‌ ئاوریشمی قسه‌ی سه‌وزوسووردا بشارمه‌وه‌. هیچ كام له‌مانه‌م نه‌كرد،له‌به‌رئه‌وه‌ی من ویستوومه‌ قسه‌یه‌ك بكه‌م خه‌ڵكی ئاسایی تێم بگات وبزانی چی ئه‌ڵێم.ئه‌م شیعره‌ش خۆی له‌خۆیدا پێویستی به‌ وه‌ها زمانێك هه‌بوو، بۆ ئه‌وه‌ی ئه‌وپه‌یامه‌ی له‌گه‌ڵ خۆیدا هاوردبووی به‌ ئاسانی به‌ شوێنی مه‌به‌ست بگات، تا مرۆڤ بزانی مردن بۆلای شاعیرێكی وه‌ك(ته‌یب جه‌بار)بووه‌ته‌ كاره‌ساتێكی دوابڕاو چونكه‌ به‌رده‌وام وه‌ك ده‌ستێكی زاڵم وایه‌ و ژیان ئه‌كوژێ ومرۆڤیش هه‌میشه‌ودایم وه‌ك پڕۆژه‌یه‌كی به‌ئاكام نه‌گه‌یشتوو له‌نیوه‌ی ڕێدا ئه‌هێڵێته‌وه‌ وهیچ كات رێ نادات ده‌ستی به‌ ته‌واوی خۆزگه‌ ونیاز وئاره‌زووه‌كانی بگات وتێر له‌ هیواكانی بخوات وبه‌هاری ئاواته‌كانی سه‌وزبێت وتینوویه‌تی له‌ ژیان بشكێت. هه‌موو ئه‌م سنووره‌ ودوورونزیكانه‌ په‌یوه‌ندیان به‌وباسكردنی مردنه‌وه‌ هه‌بوو كه‌ هه‌م شاعیربیری لێكرد بۆوه‌ وهه‌م منیش ئه‌م ویست باسی بكه‌م، ئه‌وه‌ش بۆخۆی زمانێكی ئاسایی بۆباسكرن ولێكدانه‌وه‌ی گه‌ره‌ك بوو.منیش ئه‌وه‌ی پێم كراوبه‌ باشم زانی ده‌ستم بۆبرد وهێنامه‌ ناوباسكردنه‌كه‌وه‌،به‌و ورده‌ ڕه‌خنانه‌شه‌وه‌ كه‌ له‌شاعیرم گرتووه‌. هه‌رچیشم كردووه‌ وكۆشاوه‌ له‌وسنووره‌ ده‌رنه‌چووم كه‌ پێویستی ئه‌كرد. هه‌رچه‌ند لێره‌دا من ده‌سبه‌رداری ئه‌م باسكردنه‌ ئه‌بم به‌ڵام به‌دووری نازانم من و(ته‌یب جه‌بار)جارێكی تریش له‌وشیعره‌ جوانانه‌ی دیوانی(ئه‌وشیعرانه‌ی ئاووڕ بۆپێشه‌وه‌ ئه‌ده‌نه‌وه‌)به‌ یه‌كتربگه‌ینه‌وه‌ تا ئه‌وقسه‌وباسانه‌ی لێره‌دا جێی ته‌واو كردن و ڕێی ده‌ربڕینیان نه‌بوو له‌وێدا جێی خۆیان بكه‌نه‌وه‌.


ناو:  
ئیمه‌یل:    
سه‌رنج:  

#7173
20/1/2017
ئه‌رشیف
وه‌رزش
‌ خولی نایابی پێشمه‌رگه‌ی كوردستان 19/1/2017
‌ گراند سلامی ئوستورالیا 19/1/2017
زانست
‌ به‌ به‌ڵگه‌وه‌ خوێنه‌رانی‌ كتێب ساڵی‌ 1960 زیاتر بووه‌ له‌ ئێستا 19/1/2017
‌ زیانه‌كانی زۆر به‌كارهێنانی خوێ 19/1/2017
‌ تێچووی جگه‌ره‌كێشان له‌سه‌ر ئابوری جیهان گه‌یشتۆته‌ زیاتر له‌ یه‌ك تریلیۆن دۆلار 19/1/2017

© 2009 KURDISTANY NWE, All RIGHTS RESERVED. | CREATED BY AVESTA GROUP