به‌هێزتر
شانۆنامه‌ به‌هێزتر ‌ 16/2/2017
ئۆگه‌ست ستریندبێرگ
و. له‌ ئینگلیزییه‌وه‌: ئازاد به‌رزنجی

كاراكته‌ره‌كان:
خانم X  ئه‌كته‌ره‌ و شووی كردووه‌.
خاتوو Y ئه‌كته‌ره‌ و شووی نه‌كردووه‌.

دیمه‌ن: سووچێكه‌ له‌ كافێیه‌كی خانماندا، دوو مێزی ئاسنی بچووك و تاكێك قه‌نه‌فه‌ی سووری قه‌یفه‌ و چه‌ند كورسیه‌ك ده‌بینرێن.

خانم X دێته‌ ژووره‌وه‌، جلی زستانه‌ی پۆشیوه‌، كڵاوی له‌سه‌ردایه‌ و پاڵتۆی له‌به‌ردایه‌. سه‌به‌ته‌یه‌كی بچووكی ژاپۆنیی به‌ده‌سته‌وه‌یه‌.
خاتوو Y دانیشتووه‌ و شووشه‌یه‌ك بیره‌ی له‌به‌رده‌مدایه‌ كه‌ نیوه‌ بووه‌. ڕۆژنامه‌یه‌كی وێنه‌داری به‌ده‌سته‌وه‌یه‌ و ده‌یخوێنێته‌وه‌، دواتر ده‌ست ده‌داته‌ ڕۆژنامه‌یه‌كی تر.
خانم X: ئێواره‌ت باش ئه‌میلیا. به‌م شه‌وی كریسمسه‌ كه‌ به‌ته‌نیا لێره‌ دانیشتوویت، هه‌ر له‌ كچه‌ قه‌یره‌یه‌كی به‌سزمان ده‌چیت.(خاتوو Y له‌ سه‌روو ڕۆژنامه‌كه‌وه‌ نیگایه‌كی ده‌كات و سه‌ری ڕاده‌وه‌شێنێت، پاشان له‌سه‌ر خوێندنه‌وه‌كه‌ی خۆی به‌رده‌وام ده‌بێت).
خانم X: ئه‌زانیت پێم ناخۆشه‌ به‌م حاڵه‌ ده‌تبینم، به‌ته‌نیا له‌ كافێیه‌كدا و له‌ شه‌وی كریسمسدا. ئه‌م حاڵه‌ی تۆ ئاهه‌نگێكی زه‌ماوه‌ندم بیرده‌هێنێته‌وه‌ كه‌ له‌ ڕیستۆرانتێكی پاریسدا بینیم. بووكه‌كه‌ دانیشتبوو ڕۆژنامه‌یه‌كی كۆمیدیی ده‌خوێنده‌وه‌، له‌ولاشه‌وه‌ زاواكه‌ له‌گه‌ڵ شایه‌ته‌كاندا خه‌ریكی یاریی بلیارد بوو. بیرم كرده‌وه‌ و وتم ئه‌مه‌ سه‌ره‌تاكه‌ی بێت، ئاخۆ ده‌بێ ئه‌نجام و كۆتاییه‌كه‌ی چۆن بێت! زاوا له‌ شه‌وی ژنهێناندا بلیاردی ده‌كرد و بووكێش ڕۆژنامه‌ی كۆمێدیی ده‌خوێنده‌وه‌.
(كچه‌ خزمه‌تگوزاره‌كه‌ دێته‌ ژووره‌وه‌ و كووپێك شوكولات له‌به‌رده‌می خانم  X دا داده‌نێت و ئینجا ده‌ڕواته‌وه‌ ده‌ره‌وه‌) چیم پێ وتیت ئه‌میلیا! من له‌و باوه‌ڕه‌دام كه‌ وا چاكتر بوو ده‌سبه‌رداری ئه‌و پیاوه‌ نه‌بوویتایه‌! بیرته‌؟ من یه‌كه‌م كه‌س بووم پێم وتیت «لێی ببووره‌»، بیرته‌؟ وانه‌بووایه‌ ئێستا تۆش خاوه‌ن ماڵ و مێردی خۆت بوویت. ئه‌و كریسمسه‌ت له‌بیره‌ كه‌ له‌گه‌ڵ كه‌سوكاری ده‌زگیرانه‌كه‌تدا چووبوویت بۆ لادێ ؟ چه‌ند به‌خته‌وه‌ر بوون پێكه‌وه‌ له‌گه‌ڵ دایك و باوكی ده‌زگیرانه‌كه‌تدا؟ بیرته‌ چه‌ند خۆشحاڵ بوون پێكه‌وه‌ و به‌ته‌ما بوویت به‌ یه‌كجاری واز له‌ شانۆ بێنیت. به‌ڵێ، ئه‌میلیا، ئازیزه‌كه‌م، ماڵ له‌ هه‌موو شته‌كانی تر گرنگتره‌، دوای شانۆ و هه‌روه‌ها مناڵ. تێده‌گه‌یت؟ به‌ڵام ئه‌مه‌ ئه‌و شته‌یه‌ كه‌ تۆ تێیناگه‌یت. 
(خاتوو Y په‌ست ده‌بێت. خانم X كه‌وچكێك ده‌كات به‌ كووپه‌كه‌ی به‌رده‌میدا و ده‌یبات بۆ ده‌می، ئینجا سه‌به‌ته‌كه‌ی ده‌كاته‌وه‌ تا دیارییه‌كانی كریسمسی پیشان بدات) ته‌ماشاكه‌ چیم بۆ مناڵه‌كانم كڕیوه‌. (بووكه‌شووشه‌یه‌ك ده‌رده‌هێنێت) سه‌یركه‌، ئه‌مه‌یان بۆ لیزایه‌. ئه‌مه‌شیان ده‌مانچه‌ی ته‌ره‌قه‌یه‌ بۆ مایا. (ته‌ره‌قه‌ ده‌خاته‌ ده‌مانچه‌كه‌وه‌ و ڕووی ده‌كاته‌ خاتوو Y، ئه‌ویش داده‌چڵه‌كێت) ترسایت؟ واتزانی ده‌مه‌وێ ته‌قه‌ت لێ بكه‌م؟ چی؟ نا، ڕۆحه‌كه‌م، بڕوا ناكه‌م شتێكی وات به‌ بیردا هاتبێت. ئه‌گه‌ر تۆ ته‌قه‌ له‌ من بكه‌یت، به‌لامه‌وه‌ سه‌یر نییه‌، له‌به‌رئه‌وه‌ی من بوومه‌ كۆسپی سه‌ر ڕێت، ده‌زانم ئه‌مه‌ش شتێكه‌ هه‌رگیز بیرت ناچێته‌وه‌. به‌ڵام من له‌و مه‌سه‌له‌یه‌ ته‌واو بێبه‌ری بووم. تۆ ئێستاش له‌و باوه‌ڕه‌دایت كه‌ من داوم بۆ نایته‌وه‌ و بوومه‌ هۆی ده‌ركردنت له‌ شانۆی ستۆرا، به‌ڵام من شتی وام نه‌كردووه‌. ته‌نانه‌ت گه‌ر تۆ له‌و باوه‌ڕه‌شدا بیت؛ به‌ڵام من هه‌رگیز شتی وام نه‌كردووه‌. هه‌رچه‌نده‌ تازه‌ ئه‌مه‌ بڵێم و نه‌یڵێم، هیچ سوودێكی نییه‌، چونكه‌ تۆ ئێستاش واده‌زانیت ئه‌وه‌ كاری من بووه‌. (جووتێك نه‌علی به‌ده‌ست چنراو له‌ سه‌به‌ته‌كه‌ ده‌رده‌هێنێت) ئه‌مه‌ش بۆ پیاوه‌ ئازیزه‌كه‌مه‌. به‌و گوڵاڵه‌ سوورانه‌ی سه‌ریه‌وه‌ كه‌ به‌ده‌ستی خۆم چنیومن. من حه‌زم له‌ گوڵاڵه‌ سووره‌ نییه‌، تۆ ئه‌مه‌ ده‌زانیت، به‌ڵام ئه‌و گوڵاڵه‌سووره‌ی به‌ هه‌موو شتێكه‌وه‌ حه‌زیلێیه‌. (خاتوو Y به‌ ته‌نزێكه‌وه‌ و به‌ فزووڵه‌وه‌ سه‌یرێكی ده‌كات. خانم X هه‌ردوو ده‌ستی ده‌خاته‌ ناو نه‌عله‌كانه‌وه‌) ته‌ماشاكه‌ پێیه‌كانی بۆب چه‌ند بچكۆله‌ن! چی؟ ئینجا خۆزگه‌ ده‌یبینیت چه‌ند جوان هه‌نگاو ده‌نێت! تۆ بینیوته‌ به‌ نه‌عله‌وه‌ چۆن به‌ڕێدا ده‌ڕوات؟ (خاتوو Y به‌ ده‌نگێكی به‌رز پێده‌كه‌نێت) سه‌یركه‌، ئاوه‌ها. (ده‌سته‌كانی وه‌كو قاچی ئه‌و لێده‌كات و له‌سه‌ر مێزه‌كه‌ به‌ نه‌عله‌كانه‌وه‌ ده‌ڕوات. خاتوو Y قاقا پێده‌كه‌نێت) كاتێكیش په‌ست ده‌بێت، ئاوه‌ها توند پێیه‌كانی به‌ زه‌ویدا ده‌دات. نه‌فره‌ت له‌و ئاشپه‌زه‌، هه‌رگیز فێر نابێت قاوه‌یه‌ك دروست بكات. ئاخ، ئه‌م ده‌به‌نگانه‌ قه‌ت پڵیته‌ی چراكان به‌ ڕێكی نابڕن. ئینجا به‌پێیه‌ ته‌زیوه‌كانیه‌وه‌ نه‌عله‌كان له‌پێ ده‌كات. ئاخ، چه‌ند سارده‌، ئه‌و گه‌مژانه‌ قه‌ت زۆپاكان گه‌رم ناكه‌ن. (بنی نه‌عله‌كان له‌یه‌ك ده‌خشێنێت. خاتوو Y به‌ ئاشكرا پێده‌كه‌نێت) كاتێكیش ده‌گه‌ڕێته‌وه‌ بۆ ماڵه‌وه‌، سه‌عاتێك به‌دوای نه‌عله‌كانیدا ده‌گه‌ڕێت كه‌ ماری له‌ژێر كۆمێدیی تایبه‌ت به‌ پێڵاوه‌كاندا دایده‌نێت. ئۆو، به‌ڵام ئه‌وه‌ گوناهه‌ ژنێك لێره‌ دانیشێت و گاڵته‌ به‌ مێرده‌ بچووكه‌ باشه‌كه‌ی خۆی بكات. ئه‌میلیا، تۆش پێویستت به‌ هاوسه‌رێكی وا باشه‌. ئه‌وه‌ به‌چی پێده‌كه‌نیت؟ چی؟ چی؟... پاشان من ده‌زانم كه‌ ئه‌و ڕاستگۆیه‌ له‌گه‌ڵمدا. به‌ڵێ، ئه‌وه‌ ده‌زانم. ئه‌و خۆی ئه‌مه‌ی پێ وتووم. پێكه‌نینت به‌چێ دێت؟ كاتێ من به‌ گه‌شتێك چووبووم بۆ نه‌رویج، ئه‌و ئافره‌ته‌ بێ ئابڕووه‌، فریدریكا، هاتبوو و ویستبووی له‌ خشته‌ی ببات. سه‌یری ئه‌و بێشه‌رمییه‌! 
(وه‌ستانێك) 
به‌ڵام كاتێ له‌ ماڵه‌وه‌ بوومایه‌ و ئه‌و بهاتایه‌ بۆ لای مێرده‌كه‌م، هه‌ردوو چاویم ده‌رده‌هێنا. 
(وه‌ستانێك) 
به‌وه‌ی باش بوو بۆب خۆی هه‌موو شتێكی بۆ باس كردم و له‌ڕێی واته‌واتی خه‌ڵكیه‌وه‌ پێم نه‌گه‌یشته‌وه‌. 
(وه‌ستانێك) 
به‌ڵام فریدریكا تاقه‌ ئافره‌ت نه‌بوو، بڕوا ده‌كه‌یت، نازانم بۆ، به‌ڵام ژنان شێتی مێرده‌كه‌ی منن. دیاره‌ وابیرده‌كه‌نه‌وه‌ كه‌ بۆب له‌ بواری شانۆدا ده‌ستی ده‌ڕوات، له‌به‌رئه‌وه‌ی په‌یوه‌ندیی له‌گه‌ڵ حكوومه‌تدا هه‌یه‌. له‌وانه‌یه‌ خۆشت هه‌وڵت دابێت كاری لێ بكه‌یت. منیش زۆر متمانه‌م پێت نه‌بوو، به‌ڵام ده‌زانم ئێستا ئه‌و زۆر بایه‌خ به‌ تۆ نادات، پێده‌چێ تۆش مه‌یلت بۆ ئه‌و نه‌مابێت. 
(وه‌ستانێك) 
(به‌ شێوه‌یه‌كی سه‌یر ته‌ماشای یه‌كتری ده‌كه‌ین) ئه‌میلیا، ئه‌م ئێواره‌یه‌ وه‌ره‌ بۆ لامان و پیشانی بده‌ كه‌ تووڕه‌ نیت لێمان...به‌تایبه‌تیش كه‌ به‌ هیچ جۆرێك له‌ من تووڕه‌ نیت. نازانم بۆ، به‌ڵام ناخۆشه‌ وه‌كو دوژمنێك سه‌یرت بكه‌م. له‌به‌رئه‌وه‌ی من بووبوومه‌ كۆسپی سه‌ر ڕێت. (ورده‌ورده‌ ڕیتمی قسه‌كانی هێواشتر ده‌بێت) یان... به‌ڕاستی نازانم... بۆچی... 
(وه‌ستانێك)
خاتوو Y به‌ فزووڵه‌وه‌ سه‌یری خانم X ده‌كات) ئاشنایه‌تییه‌كه‌مان شتێكی نائاسایی و سه‌یر بوو. (بیرده‌كاته‌وه‌) كاتێ بۆ یه‌كه‌مجار تۆم بینی، زۆر لێت ده‌ترسام، زۆر ده‌ترسام، به‌جۆرێك كه‌ نه‌مده‌توانی چاو له‌سه‌رت هه‌ڵگرم. بۆیه‌ هه‌میشه‌ كه‌ ده‌هاتم و ده‌چووم، خۆم له‌لای تۆوه‌ ده‌بینییه‌وه‌... پڕكێشیی ئه‌وه‌م نه‌ده‌كرد ببمه‌ دوژمنت، هه‌ر له‌به‌ر ئه‌وه‌ش بووم به‌ هاوڕێت. به‌ڵام به‌رده‌وام هاتنه‌كانت بۆ ماڵمان ده‌بووه‌ مایه‌ی شه‌ڕوشۆڕ. له‌به‌رئه‌وه‌ی سه‌یرم ده‌كرد مێرده‌كه‌م ته‌حه‌ممولی نه‌ده‌كردیت. ئه‌وه‌ش ته‌واو منی ناڕه‌حه‌ت ده‌كرد، ڕێك وه‌ك عه‌زییه‌ك كه‌ پڕ به‌ به‌رت نه‌بێت. من هه‌موو هه‌وڵێكم ده‌دا تا وا له‌و بكه‌م وه‌كو هاوڕێیه‌ك ڕه‌فتارت له‌گه‌ڵدا بكات، به‌ڵام به‌رله‌وه‌ی ئه‌و ڕازی بكه‌م، تۆ ده‌زگیرانیی خۆت له‌گه‌ڵ كه‌سێكدا ڕاگه‌یاند. پاشان بوون به‌ هاوڕیی گیانی به‌ گیانیی یه‌كتر.. ئینجا وه‌ك ئه‌وه‌ی هه‌ر له‌ سه‌ره‌تاوه‌ ئێوه‌ ڕووبه‌ڕووی هه‌ست و نه‌ستی ڕاسته‌قینه‌ی خۆتان بووبێتنه‌وه‌، به‌و جۆره‌ ده‌ركه‌وتن. به‌ڵام پاشان چی؟ من غیره‌م نه‌كرد. چه‌ند سه‌یر بوو. بیرمه‌ له‌ ڕێوڕه‌سمی ته‌عمیدكردنی مناڵه‌كه‌ماندا كه‌ تۆ تیایدا زڕدایكی بووبیت، من هاوسه‌ره‌كه‌مم ناچار كرد ماچت بكات. ئه‌ویش ماچی كردیت، به‌ڵام تۆ ته‌واو شڵه‌ژابوویت. من ئه‌وكاته‌ زۆر سه‌رنجی ئه‌وه‌م نه‌دا، ته‌نانه‌ت دواتریش هیچ بیرم لێ نه‌كرده‌وه‌، بگره‌ هه‌رگیز بیرم لێ نه‌كردۆته‌وه‌، تاكو ئێستاش (له‌پڕێكدا هه‌ڵده‌ستێته‌ سه‌رپێ) بۆ وا بێده‌نگیت؟ به‌درێژایی ئه‌م ماوه‌یه‌ وشه‌یه‌ك له‌ ده‌مت نه‌هاته‌ ده‌ره‌وه‌! ناچارت كردم هه‌ر من قسه‌ بكه‌م. له‌ شوێنی خۆتدا دانیشتوویت به‌ڵام به‌ چاوه‌كانت هه‌موو ئه‌و شتانه‌ی  من بیریان لێ ده‌كه‌مه‌وه‌ و وه‌كو ئاوریشمی خاون له‌ناو قۆزاخه‌كه‌یاندا، ده‌رتكردن. بیروبۆچوونه‌كانم و، ڕه‌نگه‌ گومانه‌كانیشم. ئاده‌ی بابزانم، بۆچی په‌یوه‌ندیی ده‌زگیرانیه‌كه‌تان هه‌ڵوه‌شانده‌وه‌؟ ئه‌ی بۆچی ئه‌م ڕۆژانه‌ به‌ده‌گمه‌ن دێیت بۆ ماڵمان؟ بۆ ئه‌مشه‌و نایه‌یت بۆ لامان؟ (خاتوو Y وه‌ك ئه‌وه‌ی بیه‌وێ قسه‌یه‌ك بكات) وس به‌، پێویست ناكات هیچ بڵێیت. خۆم تێگه‌یشتم. له‌به‌ر ئه‌مه‌ و ئه‌وه‌... به‌ڵێ! به‌ڵێ! ئێستا هه‌موو شتێك ڕوونه‌... تف... من له‌گه‌ڵ تۆدا له‌سه‌ر مێزێك دانانیشم (شته‌كانی خۆی ده‌باته‌ سه‌ر مێزێكی تر) ئێستا ده‌زانم بۆچی ده‌بووایه‌ نه‌خشی گوڵاڵه‌سووره‌ - ئه‌و گوڵاڵه‌سووره‌یه‌ی كه‌ من ڕقم لێیه‌تی - له‌سه‌ر نه‌عله‌كانی دروست بكه‌م، له‌به‌رئه‌وه‌ی تۆ عاشقی گوڵاڵه‌سووره‌یت. (نه‌عله‌كان فڕێ ئه‌داته‌ سه‌ر ئه‌رزه‌كه‌) هه‌ر له‌به‌ر هه‌مان هۆیه‌ هاوینان ده‌چین بۆ ده‌ریاچه‌ی مالارن، له‌به‌رئه‌وه‌ی تۆ حه‌زت له‌ ئاوی سوێر نییه‌. هه‌ر له‌به‌ر ئه‌مه‌شه‌ كوڕه‌كه‌م ناوی ئیسكیله‌، چونكه‌ ناوی باوكی تۆیه‌. هه‌ر له‌به‌ر هه‌مان هۆكاره‌ من ئه‌و جلانه‌ له‌به‌رده‌كه‌م كه‌ ڕه‌نگیان له‌ ڕه‌نگی جله‌كانی تۆ ده‌چێت، ئه‌و كتێبانه‌ ده‌خوێنمه‌وه‌ كه‌ تۆ ده‌یانخوێنیته‌وه‌، ئه‌و خواردن و خواردنه‌وانه‌ ده‌خۆم و ده‌خۆمه‌وه‌ كه‌ تۆ حه‌زت لێیانه‌. بۆ نموونه‌ ئه‌م شوكولاته‌. ئای خوایه‌! كه‌ بیری لێ ده‌كه‌مه‌وه‌ شتێكی چه‌ند سه‌خت و سامناكه‌! هه‌موو شته‌كانت، هه‌موو شته‌كانی تۆ نه‌قڵ بوون بۆ ناو ناخی من، ته‌نانه‌ت هه‌ستوسۆزیشت. وه‌كچۆن كرمێك ده‌چێته‌ ناو سێوێكه‌وه‌، ئاوا ڕۆحی تۆش هاتۆته‌ ناو ڕۆحی منه‌وه‌. ده‌یخوات و ده‌یخوات و دایده‌ڕزێنێ و دایده‌ڕزێنێ، به‌جۆرێك توێكڵه‌كه‌ی ڕۆحم ماوه‌ته‌وه‌. ویستم له‌ده‌ستت ڕابكه‌م، به‌ڵام نه‌متوانی. تۆ وه‌كو مارێك خزایته‌ ناومه‌وه‌ و به‌ چاوه‌ ڕه‌شه‌كانت سیحرت لێ كردم. هه‌ستم ده‌كرد كاتێ باڵه‌كانم ده‌كرده‌وه‌، زیاتر ڕۆئه‌نیشتم. به‌ ده‌ست و پێی به‌ستراوه‌وه‌ نوقمی ناو ئاوه‌كه‌ ده‌بووم و چه‌ند هه‌وڵم ئه‌دا ڕزگارم بێت كه‌چی زیاتر ده‌نیشتمه‌ بنی ئاوه‌كه‌، ئینجا له‌وێش تۆم ده‌بینی وه‌كو قرژانگێكی گه‌وره‌ چڕنووكه‌كانت لێ گیر ده‌كردم و ئیتر منیش به‌ ناچاری له‌وێدا ده‌مامه‌وه‌. من ئێستاكه‌ له‌وێدام.
ڕقم لێته‌، ڕق، ڕق. تۆش بۆ خۆت بێده‌نگ و بێباك ئاوه‌ها دانیشتوویت. دنیا وێران بێت باكت نییه‌، شه‌وه‌ یا ڕۆژ، كریسمسه‌ یان سه‌ری ساڵ، ئه‌وانی تر خۆشبه‌ختن یان غه‌مگین. تۆ توانای ئه‌وه‌شت نییه‌ كه‌سێكت خۆشبوێت و یان رقت له‌ كه‌سێك بێت، بێده‌نگ و مات. له‌ له‌قله‌قێك ده‌چیت لای كونه‌ مشكێكه‌وه‌ بێت. تۆ توانای ئه‌وه‌ت نییه‌ نێچیره‌كه‌ت به‌ده‌ست بهێنیت، ناتوانیت خۆشه‌ویستیی پیاوێك ڕابگریت، به‌ڵام ده‌توانیت بۆسه‌ بۆ دزینی خۆشه‌ویستیی ئه‌وانی تر دابنێیت. ئه‌وه‌تانێ له‌ سووچێكی ئه‌م كافێیه‌دا دانیشتوویت. ده‌زانیت هه‌ر له‌به‌ر تۆ ئه‌م كافێیه‌یان ناوناوه‌ «ته‌ڵه‌مشك»؟ دانیشتوویت و خه‌ریكی خوێندنه‌وه‌ی ڕۆژنامه‌یت تا بزانیت چ به‌ڵایه‌ك به‌سه‌ر كه‌سانی تردا هاتووه‌، یان كێیان له‌ شانۆكه‌ ده‌ركردووه‌. یاخود حسابی قوربانیی داهاتووت ده‌كه‌یت، وه‌ك ئه‌و كه‌شتیه‌وانه‌ی كه‌ كه‌شتییه‌كه‌ی نوقم بووه‌. ئای ئه‌میلیای به‌سزمان؛ من به‌زه‌ییم پیاتدا دێته‌وه‌، له‌به‌رئه‌وه‌ی ده‌زانم چه‌ند به‌دبه‌ختیت. هێنده‌ی گیانه‌وه‌رێكی بریندار به‌دبه‌خت و تووڕه‌یت. من ناتوانم لێت تووڕه‌ بم، ته‌نانه‌ت گه‌ر واش پێویست بكات. له‌به‌رئه‌وه‌ی تۆ له‌ من لاوازتریت. هه‌رچیه‌كیشت كردووه‌ له‌گه‌ڵ بۆب به‌لامه‌وه‌ گرنگ نییه‌. جا ئه‌وه‌ چییه‌؟ چ مانایه‌كی هه‌یه‌ خواردنه‌وه‌ی شوكولات له‌ تۆوه‌ فێر بووبم یان له‌ كه‌سێكی تره‌وه‌؟ (كه‌وچكێك له‌ شوكولاته‌كه‌ ده‌دات) ئه‌مه‌ جگه‌ له‌وه‌ی كه‌ شوكولات بۆ ته‌ندروستی باشه‌. یان گریمان جلوبه‌رگ پۆشین له‌تۆوه‌ فێربووم، جا ئه‌وه‌ چییه‌؟ به‌پێچه‌وانه‌وه‌، ئه‌وه‌ بووه‌ته‌ هۆی ئه‌وه‌ی زیاتر بچمه‌ دڵی هاوسه‌ره‌كه‌مه‌وه‌. كه‌واته‌ لێره‌دا دۆڕاوه‌كه‌ تۆیت و براوه‌كه‌ منم. به‌كورتی، هه‌موو شته‌كان ده‌یسه‌لمێنن كه‌ تۆ ئه‌وت له‌ده‌ست داوه‌. دیاره‌ تۆ ده‌تویست من وازی لێ بهێنم، وه‌كچۆن تۆ وازت له‌ ده‌زگیرانه‌كه‌ت هێنا و ده‌تویست وه‌كچۆن خۆت ئێستا په‌شیمانیت، منیش ئاوه‌ها په‌شیمان ببمه‌وه‌. به‌ڵام من شتی وا ناكه‌م، نابێ چاوه‌ڕوانیت زۆر بێت. پاشان من بۆچی ئه‌و شتانه‌ هه‌ڵبگرمه‌وه‌ كه‌ ئه‌وانی تر نایانه‌وێت؟
به‌هه‌رحاڵ، من هه‌ست ده‌كه‌م ئه‌وه‌ی به‌هێزتره‌ منم. تۆ هیچت له‌ منه‌وه‌ ده‌ست نه‌كه‌وت، به‌ڵام من زۆر شتم له‌تۆوه‌ ده‌ست كه‌وت. ئێستاش، من وه‌ك دزێك دێمه‌ به‌رچاوی تۆ، له‌به‌رئه‌وه‌ی كاتێك به‌ئاگا هاتیته‌وه‌ سه‌یرت كرد هه‌موو ئه‌و شتانه‌ی هه‌تبوون له‌ده‌ستت داون. هه‌ر ده‌بووایه‌ وه‌هاش بووایه‌. له‌به‌رئه‌وه‌ی ئێستا هه‌موو ئه‌و شتانه‌ بۆ تۆ به‌ها و سوودیان نه‌ماوه‌. تازه‌ تۆ چیتر ناتوانیت به‌ گوڵاڵه‌ سووره‌ و به‌ هه‌ست و سۆز خۆشه‌ویستیی پیاوێك بۆ خۆت ڕابگریت، به‌ڵام من ده‌توانم. تۆ ناتوانیت له‌و نووسه‌رانه‌وه‌ كه‌ پێیان سه‌رسامیت فێری ژیان بیت، به‌ڵام من ده‌توانم. تۆ ئیسكیلێكی بچووكی وه‌كو كوڕه‌كه‌ی من شك نابه‌یت تا په‌روه‌رده‌ی بكه‌یت، به‌ڵام من شكی ده‌به‌م، با باوكی تۆش هه‌ر ناوی ئیسكیل بووبێت! پاشان تۆ بۆ هه‌روا بێده‌نگ دانیشتوویت، بێده‌نگ، بێده‌نگ؟ من وامده‌زانی ئه‌و بێده‌نگییه‌ت هی ئه‌وه‌یه‌ كه‌ به‌هێزیت، به‌ڵام نا، دیاره‌ هی ئه‌وه‌یه‌ هیچ شتێكت پێ نییه‌ بیڵێیت. له‌به‌رئه‌وه‌ی شتێكت نییه‌ بیری لێ بكه‌یته‌وه‌. (هه‌ڵده‌ستێ و نه‌عله‌كان هه‌ڵده‌گرێته‌وه‌) من ده‌ڕۆمه‌وه‌، گوڵاڵه‌سووره‌كانیش له‌گه‌ڵ خۆمدا ده‌به‌مه‌وه‌، گوڵاڵه‌سووره‌كانی تۆ! تازه‌ تۆ توانای ئه‌وه‌ت نییه‌ له‌وانی تره‌وه‌ فێری شت بیت، له‌به‌رئه‌وه‌ی تۆ ناتوانیت بنوشتێیته‌وه‌، چونكه‌ وه‌ك لاسكێكی وشكه‌وه‌بوو ده‌شكێیته‌وه‌. به‌ڵام من ناشكێمه‌وه‌. سوپاس ئه‌میلیا بۆ هه‌موو ئه‌و وانه‌ باشانه‌ی لێته‌وه‌ فێر بووم، سوپاس بۆ ئه‌وه‌ی هاوسه‌ره‌كه‌مت فێری خۆشه‌ویستی كرد. ئێستاش ده‌ڕۆمه‌وه‌ بۆ ماڵه‌وه‌ تا خۆشه‌ویستیی پێ ببه‌خشم. (ده‌ڕوات)
- كۆتایی -

سه‌رچاوه‌:
THE STRONGER.
A play in one act by: August Strindberg. Translated by: Charles Wangel.
One-Act-Plays.com


ناو:  
ئیمه‌یل:    
سه‌رنج:  

#7204
26/2/2017
ئه‌رشیف
وه‌رزش
‌ نه‌ورۆز، شیروانه‌، كه‌ركوك، پ.هه‌ولێر بۆ چوارگۆشه‌ی زێڕین 26/2/2017
‌ پێكانه‌كه‌ی‌ كازۆرلا تا كۆتایی وه‌رز درێژه‌ی ده‌بێت 26/2/2017
زانست
‌ هۆكاری خه‌وتنی مرۆڤ و زینده‌وه‌رانی تر ئاشكرا بوو 22/2/2017
‌ میكانیزمێكی نوێ بۆ وه‌ستاندنی خوێنبه‌ربوونی مێشك 22/2/2017
‌ كونێكی ڕه‌ش له‌ گه‌له‌ ئه‌ستێره‌كه‌ماندا خۆی شاردووه‌ته‌وه‌ 22/2/2017

© 2009 KURDISTANY NWE, All RIGHTS RESERVED. | CREATED BY AVESTA GROUP